የክስተት ጥራትን ይረዱ እና ያሻሽሉ

የክስተት ጥራት፣ ከመረጡት የውሂብ ምንጭ የደረሰው የልወጣ መረጃ ለመለካት ጠቃሚ መሆኑን እንዲረዱ ያግዝዎታል። እያንዳንዱ ፒክስል ወይም የውሂብ ምንጭ የራሱ ግምገማ አለው። ነጥብዎ እና ማስጠንቀቂያዎችዎ በውቅረትዎ ውስጥ ሊመረመሩ የሚገቡ ክፍሎችን ያመለክታሉ። የዘመቻ አፈጻጸምን አይተነብዩም፣ ወይም ልወጣ ከማስታወቂያ ጋር እንደሚዛመድ ዋስትና አይሰጡም።

የክስተት ጥራት የሰባት ሙሉ የቀን መቁጠሪያ ቀናትን መረጃ በመጠቀም በየቀኑ ይታደሳል፤ የቅርብ ጊዜ ክስተቶች እንዲደርሱም ጊዜ ይሰጣል። ውቅረትዎን ከቀየሩ በኋላ፣ አዲስ ክስተቶች እንደተጠበቀው እየደረሱ መሆናቸውን ያረጋግጡ። ቀደምት ክስተቶች ከግምገማው የጊዜ ክልል እየወጡ ሲሄዱ መሻሻሎች ቀስ በቀስ ሊታዩ ይችላሉ። ማደሱ ከዘገየ፣ አዲስ ግምገማ እስኪገኝ ድረስ ቀድሞ የነበረው ነጥብዎ እንደታየ ይቆያል።

ማስጠንቀቂያዎችን እንዴት መጠቀም እንደሚቻል

ለመረጡት የውሂብ ምንጭ የቀረቡትን ማስጠንቀቂያዎች ይክፈቱ እና እያንዳንዱን ችግር ይመርምሩ። በውህደትዎ ውስጥ ሊያረጋግጧቸው በሚችሉ ችግሮች ይጀምሩ፤ ለምሳሌ ለማዛመድ የሚያግዝ መረጃ መጥፋት፣ የአገልጋይ ክስተቶች መዘግየት ወይም ክስተቶች በተደጋጋሚ መላክ። ውቅረትዎን ከመቀየርዎ በፊት ምክንያቱን ለመመርመር ከታች ያለውን መመሪያ ይጠቀሙ።

ለማጋራት የተፈቀደልዎትን መረጃ ብቻ ይላኩ፣ የግለሰቡንም የግላዊነት እና የፈቃድ ምርጫዎች ያክብሩ። እውነተኛ የደንበኛ መረጃ እና እውነተኛ የንግድ እርምጃዎችን ይጠቀሙ። ነጥብን ለማሻሻል ብለው ተጨማሪ ክስተቶችን አይላኩ፣ መለያዎችን አይፍጠሩ ወይም የክስተት ጊዜዎችን አይቀይሩ።

የኢሜይል ወይም የደንበኛ መለያ መረጃ እጥረት

ትርጉሙ፦ ለዚህ ፍተሻ ብቁ በሆኑ የልወጣ ክስተቶች ላይ ውስን የኢሜይል ወይም የማይለወጥ የደንበኛ መለያ መረጃ አይተናል። እነዚህ መለያዎች ክስተቶችን ከትክክለኛው ሰው ጋር ለማያያዝ ሊረዱ ይችላሉ። ዝቅተኛ ውጤት የውሂብ ማቀናበር ወይም የውህደት ችግርንም ሊያመለክት ይችላል። ስለዚህ ውህደትዎ በእርግጥ ምን እየላከ እንደሆነ ይመርምሩ።

ማድረግ ያለብዎት፦

• ብቁ የሆኑ የልወጣ ክስተቶችዎ፣ ውህደትዎ በሚደግፋቸው መስኮች በኩል የኢሜይል አድራሻ ወይም የራስዎን የማይለወጥ የደንበኛ መለያ ማካተታቸውን ያረጋግጡ።

• ለአንድ ሰው ሁልጊዜ ተመሳሳይ የደንበኛ መለያ ይጠቀሙ። ለተለያዩ ሰዎች የጋራ፣ ጊዜያዊ ምትክ ወይም ነባሪ መለያ መልሰው አይጠቀሙ።

• የውህደትዎን ወደ ወጥ ቅርጸት የመቀየር እና ሃሽ የማድረግ መመሪያዎች ይከተሉ። አሳሽ እና አገልጋይ ሁለቱንም የሚጠቀሙ ከሆነ፣ የሁለቱንም አተገባበር ይፈትሹ።

• በመደበኛው የደንበኛ ጉዞዎ በኩል የተጠናቀቀ ልወጣን ይሞክሩ እና የሚጠበቁት መስኮች መኖራቸውን ያረጋግጡ።

የማስታወቂያ ጠቅታ መረጃ የለም ወይም ሊያያዝ አልቻለም

ትርጉሙ፦ ከማስታወቂያ ጠቅታ ጋር ከተያያዙ እና ከተገመገሙ ልወጣዎች አንዳንዶቹ፣ ከዚያው ጠቅታ ጋር ሊያያዝ የሚችል የጠቅታ መረጃ አላካተቱም። ይህ ፍተሻ የሚሸፍነው ከጠቅታ ጋር የተያያዙ ልንገመግማቸው የምንችላቸውን ልወጣዎች ነው፤ እያንዳንዱን የማስታወቂያ ጠቅታ ወይም የደንበኛ ጉዞ አይለካም።

ማድረግ ያለብዎት፦

• አንድ ሰው ከማስታወቂያ ወደ ጣቢያዎ ሲመጣ፣ የoppref ግቤትን ሳይጠፋ ያቆዩት፤ ይህም በአቅጣጫ ማዞር እና በገጾች መካከል በመዘዋወር ወቅትም ይሠራል።

• ልወጣዎችን በConversions API በኩል የሚልኩ ከሆነ፣ በዚያ ሰው ጉዞ ውስጥ የተገኘውን የጠቅታ መረጃ ወደ አገልጋዩ ክስተት ያስተላልፉ።

• የክትትል አገናኞችን፣ አቅጣጫ ማዞሮችን፣ ክፍያ መፈጸምን እና በአሳሽና በአገልጋይ መካከል ያለውን ማንኛውንም ማስተላለፍ ጨምሮ ሙሉ መንገዱን ይሞክሩ።

• የሌላን ሰው የጠቅታ መረጃ መልሰው አይጠቀሙ፣ ወይም በነባሪ እሴት አይተኩት።

የConversions API ክስተቶች እየዘገዩ ነው

ትርጉሙ፦ ከተገመገሙት የአገልጋይ ክስተቶች አንዳንዶቹ የተመዘገበው እርምጃ ከተፈጸመ ከረጅም ጊዜ በኋላ ደርሰዋል፣ ወይም ጊዜያቸውን በትክክል መገምገም አልተቻለም። ፍተሻው ክስተቱ እርምጃው ከተፈጸመ በአንድ ሰዓት ውስጥ መድረሱን ይመለከታል።

ማድረግ ያለብዎት፦

• እውነተኛው የንግድ እርምጃ መፈጸሙ እንደተረጋገጠ ክስተቱን ወዲያውኑ ይላኩ።

• በጊዜ ሰሌዳ የተያዙ ሰቀላዎችን፣ የጥበቃ ወረፋዎችን፣ ያልተሳኩ ጥያቄዎችን እና እንደገና ለመሞከር የሚፈጠሩ መዘግየቶችን ይፈትሹ።

• ክስተትን እንደገና ለመላክ ሲሞክሩ እርምጃው መጀመሪያ የተፈጸመበትን ጊዜ ሳይቀይሩ ያቆዩ። በሰቀላው ጊዜ አይተኩት።

• በውህደትዎ ውስጥ የጊዜ ማህተም ቅርጸትን፣ አሃዶችን እና የሰዓት ቅንብሮችን ያረጋግጡ።

የልወጣ ማዛመዶች እንደገና መመርመር ያስፈልጋቸዋል

ትርጉሙ፦ ልወጣዎችን ከማስታወቂያዎች ጋር ለማያያዝ በተደረጉ ፍተሻዎች ወቅት፣ አንዳንድ ሊዛመዱ ይችላሉ ተብለው የተለዩ ልወጣዎች ተወግደዋል። ምክንያቶቹ ለአንድ እርምጃ የተደጋገሙ መልሶ ጥሪዎች፣ የጊዜ አለመጣጣም ወይም ከአንድ የማስታወቂያ እይታ ጋር የተያያዙ ከመጠን በላይ ማዛመዶች ሊሆኑ ይችላሉ። ይህ ማለት መሠረት የሆኑት የንግድ ክስተቶች ተሰርዘዋል ወይም የተነካ እያንዳንዱ ክስተት ልክ ያልሆነ ነበር ማለት አይደለም።

ማድረግ ያለብዎት፦

• ልወጣ የሚላከው እንደ የተረጋገጠ ትዕዛዝ ወይም የተጠናቀቀ ምዝገባ ያለ እውነተኛ እርምጃ ከተፈጸመ በኋላ መሆኑን ያረጋግጡ።

• አንድን እርምጃ ከአንድ ጊዜ በላይ ሊልኩ የሚችሉ ተደጋጋሚ የገጽ መጫኖችን፣ የተደገሙ መለያዎችን፣ መልሶ ጥሪዎችን እና እንደገና የመሞከር ሂደቶችን ይመርምሩ።

• የአሳሽ እና የአገልጋይ ቅጂዎችን ጨምሮ፣ ለአንድ እርምጃ ቅጂዎች ተመሳሳይ የክስተት መለያ ይጠቀሙ፤ ለተለያዩ እርምጃዎች የተለያዩ መለያዎችን ይጠቀሙ።

• የእርምጃውን የመጀመሪያ የጊዜ ማህተም ሳይቀይሩ ያቆዩ፣ ከንግድ መዝገቦችዎ ጋር የሚኖርን ማንኛውንም አለመጣጣም ይመርምሩ።

• ክስተቶቹ ትክክል ሆነው ማስጠንቀቂያው ከቀጠለ፣ የውሂብ ምንጩን፣ የተነኩትን ክስተቶች ስሞች፣ የቀን ክልሉን እና ያጠናቀቋቸውን ፍተሻዎች በመጥቀስ የድጋፍ ቡድኑን ያነጋግሩ።

ብዙ ልወጣዎች ከአንድ የማስታወቂያ መስተጋብር ጋር ተያይዘዋል

ትርጉሙ፦ ልንገመግማቸው ከምንችላቸው ልወጣዎች ውስጥ ከወትሮው በላይ ብዙዎቹ በጥቂት የማስታወቂያ ጠቅታዎች ወይም እይታዎች ላይ ተከማችተዋል። ደንበኛ ከአንድ መስተጋብር በኋላ ብዙ ትክክለኛ እርምጃዎችን ሊያጠናቅቅ ይችላል። ስለዚህ ይህ ማስጠንቀቂያ ብቻውን የተደገሙ ክስተቶች ወይም ልክ ያልሆነ እንቅስቃሴ መኖራቸውን አያረጋግጥም።

ማድረግ ያለብዎት፦

• ገጽ መጫን፣ ማደስ፣ መልሶ ጥሪ ወይም እንደገና መሞከር አንድን የንግድ እርምጃ በተደጋጋሚ እየላከ እንደሆነ ያረጋግጡ።

• የተለያዩ እርምጃዎች የተለያዩ የክስተት መለያዎች እንዳሏቸው እና እንደገና ሲሞከር የመጀመሪያው የክስተት መለያ እንደማይቀየር ያረጋግጡ።

• የልወጣ ክስተቶች የሚላኩት በደንበኛው ጉዞ ውስጥ በታሰበው ደረጃ ላይ መሆኑን ይመርምሩ።

• ይህ አዝማሚያ እውነተኛ ተደጋጋሚ ግዢዎችን ወይም በርካታ ትክክለኛ እርምጃዎችን የሚወክል ከሆነ፣ ክስተቶቹን ያቆዩ። የድጋፍ ቡድኑ ማስጠንቀቂያውን እንዲመረምር ሲጠይቁም አከናወኑን በሰነድ ያቅርቡ።

ለማዛመድ የሚያግዝ ተጨማሪ መረጃ እጥረት

ትርጉሙ፦ ለግምገማው ብቁ የሆኑ የልወጣ ክስተቶች ለማዛመድ የሚያግዝ ውስን ተጨማሪ መረጃ ይዘዋል። ይህ ፍተሻ የስልክ መረጃን፣ የስም እና የአካባቢ መረጃን፣ እንዲሁም የደንበኛ መሣሪያ IP አድራሻን ከተጠቃሚ ኤጀንት ጋር በማጣመር ይመለከታል። የሚለካው መረጃ መኖሩን እንጂ አንድ ሰው በተሳካ ሁኔታ መዛመዱን አይደለም።

ማድረግ ያለብዎት፦

• የስልክ መረጃ ካለ እና ማጋራት ከተፈቀደ፣ ውህደትዎ የሚደግፈውን መስክ እና ቅርጸት በመጠቀም ያካትቱት።

• ለስም እና ለአካባቢ መረጃ፣ የአንድን ሰው የመጀመሪያ እና የመጨረሻ ስም፣ የፖስታ ኮድ እና አገር ያቅርቡ። በሰነዶቹ የተገለጹትን የሃሽ ማድረግ እና ወደ ወጥ ቅርጸት የመቀየር መስፈርቶች ይከተሉ።

• ለአገልጋይ ክስተቶች፣ ውህደቱ የሚደግፍ ከሆነ የእውነተኛውን የደንበኛ መሣሪያ IP አድራሻ እና የተጠቃሚ ኤጀንት ያስተላልፉ። በእነዚህ ምትክ የአገልጋይዎን አድራሻ ወይም አጠቃላይ የተጠቃሚ ኤጀንት አይጠቀሙ።

• ለመላክ ብቁ የሆነ የኢሜይል ወይም የማይለወጥ የደንበኛ መለያ መረጃም መላክዎን ይቀጥሉ።

ውስን የክስተት ዓይነቶች ታይተዋል

ትርጉሙ፦ ለዚህ ፍተሻ በሚያገለግሉት መደበኛ የክስተት ቡድኖች፣ ማለትም ማሰስ፣ መካከለኛ እርምጃዎች እና የተጠናቀቁ ውጤቶች ውስጥ ውስን እንቅስቃሴ አይተናል። የተለያዩ ንግዶች የተለያዩ የደንበኛ ጉዞዎች አሏቸው፤ እያንዳንዱ ደረጃም ለሁሉም አይመለከትም። ይህ ፍተሻ ደንበኞች ወደ ልወጣ የሚያልፉባቸው ደረጃዎች በሙሉ መሟላታቸውን አያረጋግጥም።

ማድረግ ያለብዎት፦

• በደንበኛ ጉዞዎ ውስጥ ያሉትን ተጨባጭ እርምጃዎች ይዘርዝሩ እና ለንግድዎ አግባብ ያላቸውን ደረጃዎች ይለዩ።

• አግባብ ያላቸው እርምጃዎች መመዝገባቸውን ያረጋግጡ። ለምሳሌ፦ ይዘት ማየት፤ ዕቃዎችን መጨመር፣ የክፍያ ሂደት መጀመር ወይም ሊገዛ የሚችል ደንበኛ መረጃ ማስገባት፤ እንዲሁም ትዕዛዝ ማጠናቀቅ፣ የሙከራ አገልግሎት መጀመር ወይም ቀጠሮ መያዝ።

• እርምጃውን በትክክል የሚወክል ከሆነ፣ የሚደገፍ መደበኛ ክስተት ይጠቀሙ። ብጁ ክስተቶች በዚህ የክስተት ዓይነቶችን ስፋት በሚመለከት ፍተሻ ውስጥ አይካተቱም።

• እያንዳንዱ ክስተት የሚላከው ተዛማጁ እርምጃ ሲፈጸም ብቻ መሆኑን ይሞክሩ። ማስጠንቀቂያን ለማስወገድ ብለው ወደ ልወጣ የሚወስዱ አርቴፊሻል ደረጃዎችን አይፍጠሩ።

ውስን የPixel እና የConversions API እንቅስቃሴ

ትርጉሙ፦ የሚደገፉት የPixel SDK ወይም የConversions API ቻናሎች በጥሩ ሁኔታ እየተጠቀሙባቸው መሆኑን ለመገምገም፣ በእነሱ በኩል የደረሰ እና ተቀባይነት ያገኘ በቂ እንቅስቃሴ አላየንም። ውህደት መጫን ብቻውን ክስተቶች እየደረሱ መሆናቸውን አያረጋግጥም።

ማድረግ ያለብዎት፦

• እያንዳንዱ ከውቅረትዎ ጋር በሚስማማበት ሁኔታ፣ Pixel SDKዎ የአሳሽ ክስተቶችን እና የConversions API ውህደትዎ የተረጋገጡ የአገልጋይ ውጤቶችን እንደሚልኩ ያረጋግጡ።

• ጥያቄዎች ተቀባይነት እያገኙ እና ወደ ታሰበው የውሂብ ምንጭ እየተላኩ መሆናቸውን ያረጋግጡ።

• ሁለቱም ቻናሎች ተመሳሳይ እርምጃን ሲያሳውቁ፣ ቅጂዎች መሆናቸው እንዲለይ ተመሳሳይ የPixel መለያ፣ የክስተት ስም እና የክስተት መለያ ይጠቀሙ።

• ለተለያዩ እርምጃዎች የተለያዩ ክስተቶችን ይጠቀሙ፣ ውጤቶችንም ከመከሰታቸው በፊት አይላኩ።

ሁለቱንም ቻናሎች መጠቀም እርስ በእርስ የሚሟላ መረጃ ሊያቀርብ ይችላል። የቻናል እንቅስቃሴ ብቻውን ክስተቶች በትክክል መጣመራቸውን ወይም ሙሉ በሙሉ መመዝገባቸውን አያረጋግጥም።

ለተዋቀረ የልወጣ ግብ ውስን እንቅስቃሴ

ትርጉሙ፦ ቢያንስ ለአንድ ለተዋቀረ የልወጣ ግብ በግምገማው የጊዜ ክልል ውስጥ እጅግ ጥቂት ክስተቶች ደርሰዋል ወይም ምንም አልደረሱም። ይህ ማስጠንቀቂያ እየታየም ሌሎች ግቦች በቂ እንቅስቃሴ ሊኖራቸው ይችላል። ለዚህ ፍተሻ የሚቆጠሩት የደረሱ ክስተቶች፣ ከማስታወቂያ ጋር ያልተዛመዱ ክስተቶችንም ያካትታሉ።

ማድረግ ያለብዎት፦

• የተነካውን ግብ የክስተት ስም እና ውቅረት፣ ውህደትዎ ከሚልካቸው ክስተቶች ጋር ያወዳድሩ።

• ክስተቱ እውነተኛው እርምጃ ሲፈጸም እንደሚላክ እና የቅርብ ጊዜ ክስተቶች እየደረሱ መሆናቸውን ያረጋግጡ።

• ጊዜ ያለፈባቸውን ወይም ለመለካት የሚፈልጓቸውን እርምጃዎች ከእንግዲህ የማይወክሉ ግቦችን ይመርምሩ።

• እርምጃው በእርግጥ አልፎ አልፎ የሚከሰት ከሆነ ወይም የቅርብ ጊዜ ፍላጎት ዝቅተኛ ከሆነ፣ ክትትሉን ይቀጥሉ። ዝቅተኛ መጠን ብቻውን የውቅረት ጉድለት መኖሩን አያረጋግጥም።

ነጥብ ወይም ፍተሻ ላይገኝ የሚችልባቸው ምክንያቶች

የተዋቀሩ የልወጣ ግቦች የሉም፦ ለመለካት የሚፈልጓቸውን የልወጣ እርምጃዎች ማዋቀርዎን እና ውህደትዎ ተዛማጅ ክስተቶችን እንደሚልክ ያረጋግጡ።

በቂ የልወጣ እንቅስቃሴ የለም፦ ጠቃሚ ነጥብ ለማስላት የቅርብ ጊዜ የልወጣ እንቅስቃሴ በቂ ላይሆን ይችላል። ውቅረትዎን ያረጋግጡ እና እውነተኛ እንቅስቃሴ እስኪጠራቀም ይጠብቁ። ይህ ሁኔታ ዜሮ ነጥብ ከማግኘት የተለየ ነው።

ልወጣን ከማስታወቂያ ጋር ለማያያዝ በቂ ማስረጃ የለም፦ አንዳንድ ፍተሻዎች በልወጣ ክስተቶች እና በማስታወቂያ ጠቅታዎች ወይም እይታዎች መካከል ሊታይ የሚችል ግንኙነት ይፈልጋሉ። ይህ ማስረጃ አሁንም ውስን ቢሆንም ክስተቶችን እየተቀበሉ ሊሆን ይችላል። ይህ ማለት ንግድዎ እውነተኛ ልወጣዎች የሉትም ማለት አይደለም።

ለፍተሻ የሚያስፈልግ መረጃ እጥረት፦ አንድ ፍተሻ ተጨማሪ ብቁ ክስተቶችን ወይም ሊታይ የሚችል ተጨማሪ እንቅስቃሴን ሊፈልግ ይችላል። የመረጃ እጥረት ፍተሻውን እንዳለማለፍ አይቆጠርም፤ እንዲሁም ለአስተዋዋቂው በራስ-ሰር ማስጠንቀቂያ አያስከትልም።

ውሂብ አሁንም በሂደት ላይ ነው፦ የመጀመሪያው ግምገማ ከመዘጋጀቱ በፊት ወይም የቅርብ ጊዜው ግምገማ ሳይጠናቀቅ ሲቀር ነጥብ ላይገኝ ይችላል። ዕለታዊ ማደሱ መዘግየቱ ብቻ ያለውን ነጥብ አያስወግደውም። ሂደቱ ሲጠናቀቅ ተመልሰው ይመልከቱ። የማይገኝበት ሁኔታ ከቀጠለ፣ የድጋፍ ቡድኑን ያነጋግሩ።

ለውጥ ካደረጉ በኋላ፣ በመጀመሪያ ውህደቱ አሁን ትክክለኛዎቹን እርምጃዎች እና መረጃዎች እየመዘገበ መሆኑን ይመልከቱ። በግምገማው የሚሸፈነው የጊዜ ክልል እየተለወጠ ሲሄድ ነጥቡ ቀስ በቀስ ሊለወጥ ይችላል። ማንኛውም ነጥብ ለማዛመድ፣ ልወጣን ከማስታወቂያ ጋር ለማያያዝ ወይም ለዘመቻ ውጤቶች ዋስትና አይሰጥም።