Forléargas

Cuidíonn rialú luas caiteachais an bhuiséid le caiteachas d’fheachtais a scaipeadh thar thréimhse ama. De réir mar a athraíonn trácht fógraí agus deiseanna chun fógraí a thaispeáint, déanann Ads Manager taispeáint na bhfógraí a choigeartú chun cabhrú le cuid den bhuiséad a choinneáil ar fáil do dheiseanna níos déanaí sa lá nó san fheachtas.

D’fhéadfadh do chaiteachas athrú ó lá go lá. Ní ráthaíonn rialú luas an chaiteachais go gcaithfear an méid céanna ó lá go lá ná go gcaithfidh d’fheachtas a bhuiséad iomlán.

Luas caiteachais an bhuiséid laethúil a rialú

I gcás feachtais a bhfuil buiséad laethúil acu, rialaíonn Ads Manager an ráta a dtaispeántar fógraí lena linn i rith an lae. Is ionann do bhuiséad laethúil agus meánmhéid laethúil thar sheachtain an bhuiséid, ón Domhnach go dtí an Satharn, i gcrios ama do chuntais fógraíochta. Mar sin, d’fhéadfadh an caiteachas a bheith níos airde ar laethanta áirithe agus níos ísle ar laethanta eile, laistigh de na teorainneacha caiteachais is infheidhme.

Le haghaidh sonraí faoi bhuiséid laethúla, teorainneacha caiteachais agus athruithe ar bhuiséid, féach Buiséid Laethúla.

Luas caiteachais bhuiséad iomlán an fheachtais a rialú

I gcás feachtais a bhfuil buiséad iomlán feachtais acu, úsáideann Ads Manager an buiséad atá fágtha agat agus sceideal an fheachtais chun an caiteachas a threorú le himeacht ama.

Má tá d’fheachtas ag caitheamh airgid níos tapúla ná mar a bhí beartaithe, d’fhéadfadh sé go dtaispeánfaí fógraí ar ráta níos moille chun buiséad a choinneáil don tréimhse ina dhiaidh sin. Má tá an caiteachas níos moille ná mar a bhí beartaithe, is féidir leanúint de na fógraí a thaispeáint chun deis a thabhairt don fheachtas teacht suas leis an bplean. Laghdaíonn sé seo an baol go n-ídeofaí an buiséad go luath gan choinne, cé go mbraitheann an caiteachas iarbhír fós ar na deiseanna atá ar fáil chun fógraí a thaispeáint.

Molaimid dáta deiridh a shocrú chun an luas caiteachais a chur in oiriúint don fhad atá beartaithe agat don fheachtas.

Ceisteanna coitianta

An mairfidh buiséad iomlán m’fheachtais go dtí dáta deiridh an fheachtais?

Ní gá go mairfeadh. Is é an dáta deiridh an dáta is déanaí ar féidir le d’fheachtas fógraí a thaispeáint, ach d’fhéadfaí do bhuiséad a chaitheamh ina iomláine roimhe sin. Cabhraíonn rialú an luais caiteachais leis an gcaiteachas a bhainistiú le himeacht ama, ach ní ráthaíonn sé go mairfidh do bhuiséad go dtí an dáta deiridh.

Cá fhad atá an tréimhse rialaithe luais caiteachais d’fheachtas a bhfuil buiséad iomlán feachtais aige?

I gcás feachtais a bhfuil dáta deiridh acu, úsáideann Ads Manager an t-am go dtí dáta deiridh d’fheachtais, suas le huastréimhse de 365 lá féilire, chun an luas caiteachais a rialú. Úsáideann feachtais nach bhfuil dáta deiridh acu tréimhse rialaithe luais caiteachais 60 lá de réir réamhshocraithe.

Molaimid dáta deiridh a shocrú chun an luas caiteachais a chur in oiriúint don fhad atá beartaithe agat don fheachtas. Treoraíonn na tréimhsí seo an caiteachas; ní ráthaíonn siad go mairfidh do bhuiséad ar feadh na tréimhse iomláine ná go gcaithfear é ina iomláine.

An féidir liom buiséad iomlán feachtais a úsáid gan dáta deiridh?

Is féidir. Úsáideann Ads Manager tréimhse réamhshocraithe chun an luas caiteachais a rialú d’fheachtais a bhfuil buiséad iomlán feachtais acu ach nach bhfuil dáta deiridh acu. Socraigh dáta deiridh más mian leat go gcuirfí sceideal beartaithe d’fheachtais san áireamh agus an luas caiteachais á rialú.

Cad a tharlóidh má athraím buiséad iomlán nó dáta deiridh m’fheachtais?

Déanann Ads Manager an luas caiteachais a athríomh de réir do bhuiséid nó do sceidil nuashonraithe. Ní mór do bhuiséad iomlán athbhreithnithe an fheachtais an méid atá caite cheana féin a chlúdach. Má shocraíonn tú é ag an méid atá caite cheana féin, stopfar fógraí a thaispeáint.

An gcaithfidh m’fheachtas airgead níos tapúla má athraím mo straitéis tairisceana?

Ní sháraíonn athrú ar do straitéis tairisceana an rialú ar luas caiteachais bhuiséad iomlán an fheachtais. Is féidir le tairiscintí ísle srian a chur ar thaispeáint fógraí fós, rud a fhágann go gcaitheann d’fheachtas níos lú ná a bhuiséad.