વિહંગાવલોકન

મંજૂર IPની યાદી એક વૈકલ્પિક સુરક્ષા સુવિધા છે, જેનાથી તમે તમારા OpenAI APIનો ઉપયોગ માત્ર ચોક્કસ IP સરનામાં પૂરતો મર્યાદિત રાખી શકો છો.

આ સુવિધા ચાલુ હોય ત્યારે, ગોઠવેલાં IP સરનામાં અથવા IP શ્રેણીઓમાંથી આવતી વિનંતીઓને જ મંજૂરી મળે છે. અન્ય તમામ IPમાંથી આવતી વિનંતીઓ નકારવામાં આવે છે, ભલે તેમાં માન્ય API ચાવી હોય.

આ સુવિધાનો હેતુ ઉપયોગને વિશ્વસનીય નેટવર્ક વાતાવરણો પૂરતો મર્યાદિત રાખીને APIના અનધિકૃત ઉપયોગનું જોખમ ઘટાડવામાં મદદ કરવાનો છે.

નોંધ: મંજૂર IPની યાદી દ્વારા નિયંત્રણ માત્ર API વિનંતીઓને જ લાગુ પડે છે. તેની platform.openai.com ખોલવા પર કે વપરાશકર્તાના પ્રવેશ પર કોઈ અસર થતી નથી.

મંજૂર IPની યાદી શા માટે વાપરવી

મંજૂર IPની યાદી તમને આમાં મદદ કરી શકે છે:

• APIનો ઉપયોગ જાણીતા તકનીકી માળખા પૂરતો મર્યાદિત રાખવો (ઉદાહરણ તરીકે, તમારાં સર્વર અથવા ક્લાઉડ વાતાવરણો)

• API ચાવી જાહેર થઈ જાય તો દુરુપયોગનું જોખમ ઘટાડવું

• API વિનંતીઓ ક્યાંથી આવે છે તેના પર વધારાનું નિયંત્રણ મેળવવું

મંજૂર IPની યાદીનો સૌથી વધુ ઉપયોગ વાસ્તવિક સેવા આપતાં વાતાવરણોમાં થાય છે, જ્યાં API વિનંતીઓ નિશ્ચિત અથવા સ્પષ્ટ રીતે નિર્ધારિત નેટવર્ક શ્રેણીઓમાંથી આવે છે.

તે કેવી રીતે કાર્ય કરે છે

તમે મંજૂર IP સરનામાં અથવા CIDR શ્રેણીઓની યાદી ગોઠવો છો.

• મંજૂર IPમાંથી આવતી વિનંતીઓ સ્વીકારવામાં આવે છે.

• મંજૂર યાદીમાં ન હોય તેવા IPમાંથી આવતી વિનંતીઓ નકારવામાં આવે છે.

મંજૂર IPની યાદી દ્વારા નિયંત્રણ આ સ્તરે લાગુ કરી શકાય છે:

• સંસ્થા સ્તરે, અથવા

• પરિયોજના સ્તરે

ઉપલબ્ધતા

મંજૂર IPની યાદીની સુવિધા તમામ API ગ્રાહકો માટે ઉપલબ્ધ છે.

મંજૂર IPની યાદી ગોઠવવા માટે નીચેના પગલાં અનુસરો.

મંજૂર IPની યાદી ગોઠવો

નોંધ: તમે વધુમાં વધુ 50 IP સરનામાં અથવા CIDR શ્રેણીઓ ઉમેરી શકો છો.

1. ગોઠવણો ખોલો.

2. સુરક્ષા પસંદ કરો.

3. મંજૂર IPની યાદી પસંદ કરો.

4. એક અથવા વધુ IP સરનામાં અથવા CIDR શ્રેણીઓ ઉમેરો.

5. (વૈકલ્પિક) કોઈ IP તમારી મંજૂર યાદીમાં સામેલ છે કે નહીં તે ચકાસવા માટે તપાસો સાધન વાપરો.

6. મંજૂર IPની યાદી દ્વારા નિયંત્રણ આના માટે ચાલુ કરો:

   • કોઈ ચોક્કસ પરિયોજના, અથવા

   • તમારી સમગ્ર સંસ્થા.

7. તમે જે વાતાવરણોમાંથી વિનંતીઓ મોકલવાના હો, તેમાંથી વિનંતીઓ મોકલીને પરીક્ષણ કરો.

સમગ્ર સંસ્થામાં આ નિયંત્રણ લાગુ કરતાં પહેલાં એક જ પરિયોજનાથી શરૂઆત કરવાની અમે ભલામણ કરીએ છીએ.

ફેરફારો કર્યા પછી તે અમલમાં આવવામાં 15 મિનિટ સુધીનો સમય લાગી શકે છે.


નોંધ: મંજૂર IPની યાદીની ગોઠવણો કરવા માટે તમારી પાસે સંસ્થાની યોગ્ય પરવાનગીઓ હોવી જરૂરી છે.

સમસ્યાનું નિવારણ

જો વિનંતીઓ અણધારી રીતે નિષ્ફળ જાય તો:

• વિનંતી મંજૂર IP સરનામામાંથી આવે છે તેની ખાતરી કરો.

• તમારા તકનીકી માળખાનાં IP સરનામાં બદલાયાં છે કે નહીં તે તપાસો.

• તમે ગોઠવેલી IP શ્રેણીઓ સાચી છે કે નહીં તે તપાસો.

• ગોઠવણના ફેરફારો સર્વત્ર લાગુ થવા માટે 15 મિનિટ સુધી રાહ જુઓ.

• કોઈ IPને મંજૂરી છે કે નહીં તે ચકાસવા માટે તપાસો સાધન વાપરો.

વિનંતી અટકાવવામાં આવે ત્યારે શું થાય છે

જો વિનંતી મંજૂર યાદીમાં ન હોય તેવા IP સરનામામાંથી આવે, તો તે નિષ્ફળ જાય છે અને આ જવાબ મળે છે:

• HTTP સ્થિતિ: 401 Unauthorized

• ભૂલનો સંકેત: ip_not_authorized

પ્રતિસાદનું ઉદાહરણ:

{

 "error": {

   "message": "Your IP is not authorized to access this organization.",

   "type": "ip_not_authorized"

 }

}

વારંવાર પૂછાતા પ્રશ્નો

શું મંજૂર IPની યાદી મારી API ચાવીનો દરેક પ્રકારનો અનધિકૃત ઉપયોગ અટકાવશે.

ના. મંજૂર IPની યાદી API વિનંતીઓ ક્યાંથી આવી શકે તે મર્યાદિત કરીને જોખમ ઘટાડવામાં મદદ કરી શકે છે, પરંતુ તે દરેક પ્રકારના દુરુપયોગને સંપૂર્ણપણે અટકાવતી નથી. તેનો ઉપયોગ ચાવીનો સુરક્ષિત સંગ્રહ, ચાવી નિયમિતપણે બદલવી અને ખાતાની મજબૂત સુરક્ષા જેવી અન્ય શ્રેષ્ઠ સુરક્ષા પદ્ધતિઓની સાથે કરવો જોઈએ. વધારાની સુરક્ષા માટે, અમારા સહાય કેન્દ્રની API ચાવીની સુરક્ષા માટેની શ્રેષ્ઠ પદ્ધતિઓ અને અનધિકૃત ઉપયોગ અટકાવવો વિશેની માર્ગદર્શિકાઓ વાંચો.

શું મંજૂર IPની યાદી પ્રતિસાદ મળવાના સમયમાં અસર કરે છે.

મંજૂર IPની યાદીને કારણે કેટલાક કિસ્સાઓમાં, સામાન્ય રીતે શરૂઆતની વિનંતીઓમાં, થોડો વિલંબ થઈ શકે છે. તેનાથી APIની એકંદર કામગીરી પર નોંધપાત્ર અસર થવાની અપેક્ષા નથી.

મંજૂર IPની યાદીને કારણે વિનંતી નિષ્ફળ થઈ રહી છે કે નહીં તે હું કેવી રીતે જાણી શકું.

મંજૂર IPની યાદીને કારણે નિષ્ફળ થતી વિનંતીઓના જવાબમાં આ મળે છે:

• HTTP status: 401 Unauthorized

• Error code: ip_not_authorized