ક્લાઉડ બ્રાઉઝર ChatGPT કામને ક્લાઉડમાં એક અલગ કમ્પ્યુટર પર પોતાનું બ્રાઉઝર આપે છે. તે વેબ પૃષ્ઠો વાંચી શકે છે, બટન પર ક્લિક કરી શકે છે, ફોર્મમાં માહિતી દાખલ કરી શકે છે અને સમર્થિત જાહેર તેમજ સાઇન ઇન કરેલી વેબસાઇટો પર પગલાં લઈ શકે છે. તમારી વિનંતીના આધારે, ChatGPT જોડાયેલી ઍપ કે પ્લગઇન, ક્લાઉડ બ્રાઉઝર અથવા બંનેનો ઉપયોગ કરી શકે છે.

તમે વેબ અથવા મોબાઇલ પર કાર્ય શરૂ કરી શકો છો અને વાતચીત છોડ્યા પછી કે કમ્પ્યુટર બંધ કર્યા પછી પણ ChatGPTને કામ ચાલુ રાખવા દઈ શકો છો. જ્યારે તેને તમારી પાસેથી માહિતી, સાઇન ઇન અથવા પુષ્ટિની જરૂર પડે છે ત્યારે તે થોભે છે.

ઉપલબ્ધતા

જ્યાં સેવા સમર્થિત છે તેવા પ્રદેશોમાં, ફ્રી અને ગો સિવાયના સશુલ્ક ChatGPT પ્લાન પર ChatGPT કામમાં ક્લાઉડ બ્રાઉઝર ઉપલબ્ધ છે. તબક્કાવાર અમલીકરણ દરમિયાન ઉપલબ્ધતા બદલાઈ શકે છે અને તે વર્કસ્પેસની પરવાનગીઓ પર આધાર રાખી શકે છે.

ક્લાઉડ બ્રાઉઝરમાં કાર્ય શરૂ કરો

1. વેબ અથવા મોબાઇલ પર ChatGPT ખોલો અને કામ મોડમાં કાર્ય શરૂ કરો.

2. તમને જે પરિણામ જોઈએ છે તેનું વર્ણન કરો. વેબસાઇટ, સંબંધિત વિગતો અને કોઈ મર્યાદાઓ હોય તો તે જણાવો.

3. ChatGPT પૂછે તો વેબસાઇટની ઍક્સેસ માટે મંજૂરી આપો.

4. વેબસાઇટ પર સાઇન ઇન કરવું જરૂરી હોય તો સુરક્ષિત સાઇન ઇન ફૉર્મ વાપરો અને દ્વિ-પરિબળ પ્રમાણીકરણનાં જરૂરી પગલાં પૂર્ણ કરો.

5. વાતચીતમાં કાર્યની પ્રગતિ જોતા રહો અને પુષ્ટિ માટે આવતી વિનંતીઓની સમીક્ષા કરો.

6. પરિણામ પર ભરોસો કરતાં પહેલાં તે અને તેના સ્રોતો તપાસો.

તમારે ક્લાઉડ બ્રાઉઝર અલગથી પસંદ કરવાની જરૂર નથી. તેનો ઉપયોગ ક્યારે કરવો તે ChatGPT નક્કી કરે છે. જોડાયેલી ઍપ કે પ્લગઇન સીધું કાર્ય પૂર્ણ કરી શકે તેમ હોય, તો ChatGPT તેના બદલે તેનો ઉપયોગ કરી શકે છે.

કાર્યોનાં ઉદાહરણો

તમે ChatGPTને આ પ્રકારનાં કાર્યોમાં મદદ કરવા કહી શકો છો:

• રેસ્ટોરન્ટમાં જગ્યા ઉપલબ્ધ છે કે નહીં તે તપાસો અથવા વ્યવસાયો પાસેથી ભાવ મંગાવો.

• તમારી મુસાફરીની યોજના મુજબની ફ્લાઇટ શોધો અથવા ઉત્પાદનોની ઉપલબ્ધતા અને સ્થાનિક જથ્થાની તુલના કરો.

• જોડાયેલા ઇમેઇલ ખાતાની વિગતો અને પાર્સલની સ્થિતિ બતાવતી વેબસાઇટનો ઉપયોગ કરીને પાર્સલ ક્યાં પહોંચ્યું છે તે જાણો.

• મોટર વાહન વિભાગમાં મુલાકાત માટે સમય શોધો અને તમારી મંજૂરી માટે બુકિંગ તૈયાર કરો.

• વીજળી કે ગેસ જેવી સેવાના તમારા ખાતામાં સાઇન ઇન કરો અને યોજનાઓની તુલના કરો.

• તમારા માપદંડોને અનુરૂપ ફ્લૅટની જાહેરાતો શોધો અને સાચવો.

• ભરતિયાંનો હિસાબ મેળવો અને તમારા હિસાબી સૉફ્ટવેરમાં નોંધો અદ્યતન કરો.

ChatGPT શું પૂર્ણ કરી શકે છે તે વેબસાઇટ, તમને મળેલી ઍક્સેસ અને કાર્યમાં સામેલ પગલાં પર આધાર રાખે છે. કેટલાંક કાર્યોમાં તમારે સમીક્ષા કરવી પડે છે અથવા છેલ્લું પગલું જાતે પૂર્ણ કરવું પડે છે.

વેબસાઇટમાં સાઇન ઇન કરો

ChatGPT સમર્થિત સાઇન ઇન પૃષ્ઠ પર પહોંચે ત્યારે તે થોભે છે અને તમને સાઇન ઇન કરવા કહે છે. સુરક્ષિત સાઇન ઇન ફૉર્મમાં તમારું વપરાશકર્તા નામ અને પાસવર્ડ દાખલ કરો. તમારે દ્વિ-પરિબળ પ્રમાણીકરણ કોડ અથવા સુરક્ષા કોડ પણ દાખલ કરવો પડી શકે છે. 

તમને સાઇન ઇન કરવાની વિનંતી બતાવતાં પહેલાં, સમીક્ષા માટેનું એક વધારાનું મોડલ તે વિનંતી અને તમારી માહિતી જ્યાં દાખલ થવાની છે તે સ્થાનમાં ફિશિંગ કે છેતરપિંડીના સંકેતો છે કે નહીં તે તપાસે છે. આગળ વધતાં પહેલાં તમે વેબસાઇટનું સરનામું અને સાઇન ઇન ફૉર્મનું પૂર્વાવલોકન જોઈ શકો છો તથા સીધી વેબસાઇટ ખોલીને તપાસી શકો છો.

સુરક્ષિત ફૉર્મ દ્વારા દાખલ કરેલી લૉગિન વિગતો સીધી દૂરસ્થ બ્રાઉઝરમાં જાય છે. ત્યાં દાખલ કરેલું વપરાશકર્તા નામ અને પાસવર્ડ મોડલને દેખાતાં નથી અને ChatGPT તે સાઇન ઇન વિગતોનો સંગ્રહ કરતું નથી.

તમે સાઇન ઇન કરો તે પછી, ChatGPT તમારા સાઇન ઇન કરેલા સત્રનો ઉપયોગ કરીને કાર્ય ફરી શરૂ કરી શકે છે. પ્રમાણીકરણની મુદત પૂરી ન થાય ત્યાં સુધી તે ભવિષ્યનાં કાર્યો માટે જળવાઈ રહેશે, તેથી તમારે દરેક વખતે સાઇન ઇન કરવાની જરૂર નથી. 

ChatGPT કઈ વેબસાઇટની ઍક્સેસ મેળવી શકે તે નિયંત્રિત કરો

મૂળભૂત રીતે, ક્લાઉડ બ્રાઉઝરમાં નવી વેબસાઇટની ઍક્સેસ મેળવતાં પહેલાં ChatGPT તમારી પરવાનગી માંગશે. વેબસાઇટની ઍક્સેસ માટેની પરવાનગીઓનું સંચાલન કરવા તમે સેટિંગ્સ > ક્લાઉડ બ્રાઉઝર ખોલી શકો છો:

• હંમેશાં પૂછો: વેબસાઇટની ઍક્સેસ માટેની દરેક વિનંતીની જાતે સમીક્ષા કરો.

• આપમેળે મંજૂરી આપો: ChatGPTને વેબ સરનામું તપાસવા દો. તે અસુરક્ષિત લાગે તો જ ChatGPT અટકીને તમને પૂછશે.

• હંમેશાં પરવાનગી આપો: દરેક વેબસાઇટની ઍક્સેસ આપો. આ વિકલ્પની ભલામણ કરવામાં આવતી નથી.

તમે ચોક્કસ વેબસાઇટને પરવાનગી પણ આપી શકો છો અથવા તેની ઍક્સેસ રોકી શકો છો. ચોક્કસ સાઇટ માટે કરેલી આ પસંદગીઓ તમારા મૂળભૂત પરવાનગી સેટિંગ કરતાં અગ્રતા ધરાવે છે. વેબસાઇટની ઍક્સેસ માટેની પરવાનગી અને મહત્ત્વપૂર્ણ પરિણામો લાવતી ક્રિયાઓ માટેની મંજૂરી અલગ બાબતો છે. સાઇટને પરવાનગી આપ્યા પછી પણ કોઈ મહત્ત્વપૂર્ણ ક્રિયા થાય તે પહેલાં તેની સમીક્ષા કરવી જરૂરી રહે છે.

મહત્ત્વપૂર્ણ પરિણામો લાવતી ક્રિયાઓની સમીક્ષા કરો

જે ક્રિયાઓને પાછી ફેરવવી મુશ્કેલ હોય અથવા જે નાણાકીય, કાનૂની, ખાતા સંબંધિત કે વાસ્તવિક જીવનની અન્ય જવાબદારી ઊભી કરે, તે કરતાં પહેલાં પુષ્ટિ માંગે તે રીતે ChatGPT બનાવવામાં આવ્યું છે. બુકિંગની પુષ્ટિ કરવી કે ચુકવણી કરવી તેનાં ઉદાહરણો છે. ક્લાઉડ બ્રાઉઝરમાં આવી ક્રિયાઓ કરતાં પહેલાં ChatGPT તમારી પાસેથી ચેટમાં પુષ્ટિ માંગશે.

ક્લાઉડ બ્રાઉઝરનું નિયંત્રણ સંભાળો

કાર્ય કરતી વખતે ChatGPT અટકી જાય તો તે તમને તમારા ફોન કે કમ્પ્યુટર પર ક્લાઉડ બ્રાઉઝરનું નિયંત્રણ સંભાળવા કહેશે. તમે ChatGPTને સીધું એમ પણ કહી શકો છો કે તમે બ્રાઉઝરનું નિયંત્રણ સંભાળવા માંગો છો. તે તમને એક લિંક આપશે, જેને પસંદ કરીને તમે સીધું ક્લાઉડ બ્રાઉઝરનું નિયંત્રણ મેળવી શકશો.

જ્યારે વેબસાઇટ કાર્ય રોકે

કેટલીક વેબસાઇટ એવા સુરક્ષા ઉપાયો વાપરે છે જે સ્વચાલિત બ્રાઉઝર એજન્ટની ઍક્સેસ પર મર્યાદા મૂકે છે. કોઈ વેબસાઇટ તમારા પોતાના બ્રાઉઝરમાં સામાન્ય રીતે ચાલતી હોય, તો પણ તે ChatGPTને સાઇટની ઍક્સેસ મેળવવાથી અથવા તમારું કાર્ય પૂર્ણ કરવાથી રોકી શકે છે.

આ નિયંત્રણો વેબસાઇટ મૂકે છે, ChatGPT નહીં. સુસંગતતા સુધારવા અને વધુ સાઇટની ઍક્સેસ શક્ય બનાવવા અમે વેબસાઇટ સંચાલકો અને ભાગીદારો સાથે સતત કામ કરીએ છીએ. પરંતુ ક્લાઉડ બ્રાઉઝરથી આવતા ટ્રાફિકને મંજૂરી આપવી કે નહીં તે અંતે દરેક વેબસાઇટ પોતે નક્કી કરે છે.

કોઈ વેબસાઇટની ઍક્સેસ રોકાયેલી હોય તો બીજી વેબસાઇટ અજમાવો અથવા તમારા પોતાના બ્રાઉઝરમાં સીધું તે પૃષ્ઠ ખોલો. ઍક્સેસ આપવા માંગતા વેબસાઇટ સંચાલકો અમારી ક્લાઉડ બ્રાઉઝરને પરવાનગીની યાદીમાં ઉમેરવા માટેની સૂચનાઓ અનુસરી શકે છે.

ક્લાઉડ બ્રાઉઝરનો સુરક્ષિત રીતે ઉપયોગ કરો

• જોડાયેલી ઍપ કે પ્લગઇન સીધું કાર્ય કરી શકતું હોય ત્યારે તેને પ્રાધાન્ય આપો.

• સ્પષ્ટ સૂચનાઓ આપો અને તમને જે પરિણામ જોઈએ છે તે જણાવો.

• વેબસાઇટનાં સરનામાં, સાઇન ઇનનાં પૂર્વાવલોકનો, સ્ક્રીનશૉટ અને પુષ્ટિ માટેની વિનંતીઓ તપાસો.

• ChatGPT ખોટી સાઇટ ખોલે અથવા ખોટી માહિતી વાપરે તો કાર્ય રોકી દો.

• વાતચીતમાં પાસવર્ડ, સુરક્ષા કોડ કે ચુકવણીની વિગતો ક્યારેય પેસ્ટ ન કરો. લૉગિન વિગતો દાખલ કરવા માટે સુરક્ષિત સાઇન ઇન પ્રક્રિયા વાપરો.

OpenAI પ્રોમ્પ્ટ ઇન્જેક્શન, ફિશિંગ અને અનિચ્છિત ક્રિયાઓ જેવાં જોખમો માટે પરીક્ષણ કરે છે. આ સુરક્ષા ઉપાયો દરેક જોખમ દૂર કરતા નથી, તેથી સંવેદનશીલ પગલાં અને મહત્ત્વપૂર્ણ પરિણામોની સમીક્ષા કરો.

ગોપનીયતા, કૂકીઝ અને સાઇન ઇન કરેલાં સત્રો

ક્લાઉડ બ્રાઉઝર તમારા ઉપકરણના બ્રાઉઝરથી અલગ છે. તે પોતાની કૂકીઝ, બ્રાઉઝર ડેટા અને સાઇન ઇન કરેલાં સત્રો અલગથી રાખે છે. તે તમારા વ્યક્તિગત બ્રાઉઝરની ખુલ્લી ટૅબ, બ્રાઉઝિંગ ઇતિહાસ, સાચવેલા પાસવર્ડ, કૂકીઝ, એક્સ્ટેન્શન કે પહેલેથી કરેલા સાઇન ઇનનો ઉપયોગ કરતું નથી.

ક્લાઉડ બ્રાઉઝરનો સાચવેલો ડેટા દૂર કરવા માટે:

1. સેટિંગ્સ ખોલો.

2. ક્લાઉડ બ્રાઉઝર પસંદ કરો.

3. બ્રાઉઝર ડેટા હેઠળ, કૂકીઝ પસંદ કરો.

તમે બધી સાઇટનો ડેટા સાફ કરી શકો છો અથવા એક-એક સાઇટનો ડેટા સાફ કરી શકો છો.

કોઈ સાઇટનો ડેટા સાફ કરવાથી તમે તે વેબસાઇટમાંથી સાઇન આઉટ થઈ જાઓ છો. ભવિષ્યમાં ખાતાની જરૂર હોય તેવાં કાર્યો માટે તમારે ફરી સાઇન ઇન કરવું પડશે.

કાર્ય પૂર્ણ કરવા માટે ChatGPT વેબસાઇટમાંથી જે માહિતી વાપરે છે, તેનું સંચાલન તમારા ChatGPT ડેટા નિયંત્રણ સેટિંગ્સ અનુસાર થાય છે. વેબ અથવા મોબાઇલ પર સેટિંગ્સ > ડેટા નિયંત્રણોમાં જઈને તે તપાસો.

વારંવાર પૂછાતા પ્રશ્નો

શું હું જતો રહું પછી પણ કાર્ય ચાલુ રહી શકે છે.

હા. ક્લાઉડ બ્રાઉઝર ChatGPTના પોતાના દૂરસ્થ કમ્પ્યુટર પર ચાલે છે અને તમે તમારું કમ્પ્યુટર બંધ કરો કે ફોન બંધ કરી દો ત્યાર પછી પણ પૃષ્ઠભૂમિમાં કાર્ય ચાલુ રાખી શકે છે. માહિતી, સાઇન ઇન કે પુષ્ટિની જરૂર પડે ત્યારે તે થોભે છે.

શું ChatGPT મારા ઉપકરણ પર પહેલેથી સાઇન ઇન કરેલાં ખાતાંનો ઉપયોગ કરશે.

ના. ક્લાઉડ બ્રાઉઝરનાં પોતાનાં અલગ સત્રો હોય છે. સૂચના મળે ત્યારે અલગથી સાઇન ઇન કરો. ક્લાઉડ બ્રાઉઝરનું સત્ર તેની મુદત પૂરી ન થાય અથવા તમે તેનો ડેટા સાફ ન કરો ત્યાં સુધી પછીનાં કાર્યો માટે સક્રિય રહી શકે છે.

આ ડેસ્કટોપમાં સમાવિષ્ટ બ્રાઉઝરથી કેવી રીતે અલગ છે.

તમે ChatGPT કામ દ્વારા સોંપો તે કાર્યો માટે ક્લાઉડ બ્રાઉઝર દૂરસ્થ કમ્પ્યુટર પર ચાલે છે. સમાવિષ્ટ બ્રાઉઝર ChatGPT ડેસ્કટોપ ઍપમાં હોય છે, જ્યાં તમે કામ કરતી વખતે પૃષ્ઠો તપાસી શકો છો, તેમનો ક્રમ જોઈ શકો છો અને તેમના પર નોંધો ઉમેરી શકો છો.

શું ક્લાઉડ બ્રાઉઝર દરેક કાર્ય કે વ્યવહાર પૂર્ણ કરી શકે છે.

ના. કઈ સુવિધાઓ ઉપલબ્ધ છે તે વેબસાઇટ અને ક્રિયા પર આધાર રાખે છે. કોઈ સાઇટ સ્વચાલિત ઍક્સેસ રોકી શકે છે, સાઇન ઇન કે વ્યવહારનું કોઈ પગલું સમર્થિત ન હોઈ શકે અથવા ChatGPT કોઈ ક્રિયા પર મર્યાદા મૂકી શકે છે. તમારે નિયંત્રણ સંભાળવું પડી શકે છે અથવા છેલ્લું પગલું જાતે પૂર્ણ કરવું પડી શકે છે.