Ընդհանուր տեղեկություններ

Google Drive հավելվածը ChatGPT-ին հասանելիություն է տալիս այն ֆայլերին ու պանակներին, որոնք արդեն հասանելի են Google-ի ձեր հաշվին։ Կախված ձեր տրամադրած թույլտվություններից և աշխատատարածքում թույլատրված գործողություններից՝ կարող եք որոնել ֆայլեր, օգտվել Google Docs-ի, Sheets-ի ու Slides-ի նյութերից և զրույցներում օգտագործել աջակցվող գործողությունները։

Միացված հավելվածների մասին ընդհանուր տեղեկությունների համար տե՛ս Միացված հավելվածները ChatGPT-ում։

Հասանելիություն

Google Drive-ի հասանելիությունը կախված է ChatGPT-ի ձեր պլանից, գտնվելու վայրից, աշխատատարածքի կարգավորումներից և Google Workspace-ի քաղաքականություններից։ Եթե կառավարվող աշխատատարածքի անդամ եք, հնարավոր է՝ ադմինիստրատորը պետք է միացնի հավելվածը կամ հաստատի այն գործողությունները, որոնք ցանկանում եք օգտագործել։

Google Drive-ի միացում

1. Բացեք Հավելումներ կամ Հավելվածներ բաժինը՝ կախված ChatGPT-ի ձեր տարբերակում հասանելի ընտրանքներից։

2. Գտեք Google Drive-ը և ընտրեք ձեր հաշիվը միացնելու տարբերակը։

3. Մուտք գործեք Google-ի այն հաշիվը, որն ուզում եք օգտագործել։

4. Ծանոթացեք Google-ի թույլտվություններին, որոնք պահանջվում են հասանելի գործողությունների համար։

5. Ավարտեք Google-ի լիազորման գործընթացը և վերադարձեք ChatGPT։

Եթե Google-ի մի քանի հաշիվ ունեք, միացրեք այն հաշիվը, որին հասանելի են ձեզ անհրաժեշտ ֆայլերը։ Կառավարվող աշխատատարածքում կարող են նաև սահմանափակվել էլփոստի տիրույթները, որոնց հաշիվները կարող են միացնել անդամները։

Հաշիվները փոխելու կամ անջատելու հարցում օգնության համար տե՛ս Հավելվածների հաշիվների միացումն ու կառավարումը ChatGPT-ում։

Google Drive-ի օգտագործումը զրույցում

Google Drive-ը միացնելուց հետո կարող եք խնդրել ChatGPT-ին գտնել այն ֆայլերը, որոնց հասանելիության թույլտվությունն ունեք, կամ աշխատել դրանց հետ։ Google Docs-ի, Sheets-ի և Slides-ի գործողությունները հասանելի են Google Drive հավելվածի, այլ ոչ թե առանձին հավելվածների միջոցով։

Կախված ձեր պլանից, թույլտվություններից և աշխատատարածքի կարգավորումներից՝ փորձեք այսպիսի հարցումներ․

• «Գտիր նախագծի պլանի վերջին տարբերակը իմ Google Drive-ում և ամփոփիր հաջորդ քայլերը»։

• «Համեմատիր բյուջեի երկու աղյուսակները, որոնցով կիսվել եմ անցյալ շաբաթ»։

• «Իմ Google Drive-ում եղած՝ թողարկման մասին նշումների հիման վրա կարճ հաղորդագրություն կազմիր հաճախորդների համար»։

• «Թարմացրու այս փաստաթուղթը՝ ավելացնելով մեր հանդիպման ընթացքում որոշված անելիքները»։

Ֆայլը փոփոխող գործողությունները, օրինակ՝ այն ստեղծելը, թարմացնելը, տեղափոխելը, դրանով կիսվելը կամ այն ջնջելը, պահանջում են Google-ի համապատասխան թույլտվություններ և պետք է հասանելի լինեն ձեր աշխատատարածքում։ ChatGPT-ն կարող է խնդրել ձեզ հաստատել գործողությունը՝ նախքան այն կատարելը։

Google Drive-ի թույլտվությունների կառավարում

Google-ի թույլտվությունները որոշում են, թե ինչին կարող է հասանելիություն ունենալ միացված հաշիվը։ ChatGPT-ն չի կարող օգտագործել այն ֆայլերը, որոնք Google-ի միացված հաշիվը չի կարող բացել։

Կառավարվող աշխատատարածքում ChatGPT-ի ադմինիստրատորն է որոշում, թե Google Drive-ի որ գործողություններն են հասանելի։ Google Workspace-ի ադմինիստրատորն առանձին է որոշում, թե արդյոք ChatGPT/OpenAI հավելվածը վստահելի կամ հաստատված է Google OAuth-ի հասանելիության այն շրջանակների համար, որոնք պահանջում են այդ գործողությունները։ Այս դերերը կարող են կատարել տարբեր մարդիկ։

Աշխատատարածքում գործողությունների կառավարման մասին տեղեկությունների համար տե՛ս Հավելումների և հավելվածների ադմինիստրատիվ կառավարում, անվտանգություն և համապատասխանություն։

Եթե գործողությունը միացված է ChatGPT-ում, բայց Google-ում հասանելիության համապատասխան շրջանակն արգելափակված է, միանալիս, կրկին միանալիս կամ գործողությունն օգտագործելիս կարող է լիազորման սխալ առաջանալ։ Ձեր Google Workspace-ի ադմինիստրատորը կարող է հաստատել հասանելիության պահանջվող շրջանակը, կամ ChatGPT-ի ձեր աշխատատարածքի ադմինիստրատորը կարող է անջատել դրանից կախված գործողությունը։

Google Drive հավելվածը կարող է տարբեր թույլտվություններ պահանջել ֆայլերը կարդալու, դրանց մետատվյալները դիտելու կամ ֆայլեր ստեղծելու և թարմացնելու համար։ Google Docs-ի, Sheets-ի և Slides-ի գործողությունները կարող են լրացուցիչ թույլտվություններ պահանջել համապատասխան տեսակի ֆայլերի համար։

Google-ին վերաբերող գաղտնիության, թույլտվությունների և տվյալների օգտագործման մանրամասների, այդ թվում՝ Հիշողություն գործառույթի և մատակարարի կառավարման կարգավորումների մասին տե՛ս Google հավելվածի տվյալների կառավարման մասին հաճախ տրվող հարցեր։

Գաղտնիության վերաբերյալ ընդհանուր ուղեցույցի համար տե՛ս Միացված հավելվածները ChatGPT-ում։

Enterprise աշխատատարածքներում, որտեղ կառավարման այս կարգավորումները միացված են, սեփականատերերն ու ադմինիստրատորները կարող են սահմանափակել ընդհանուր դրայվների հասանելիությունը և կառավարել «Իմ դրայվը» բաժնի հասանելիությունը՝ Անվտանգության և պաշտպանության կարգավորումներ բաժնի միջոցով։ Այս կարգավորումները կիրառվում են միացված օգտատիրոջ՝ Google-ի թույլտվությունների հետ միասին։

Կարգավորման հրահանգների համար տե՛ս Google Drive-ի հասանելիության կառավարումը ChatGPT-ում։

Google Drive-ի խնդիրների լուծում

Միացման ընդհանուր խնդիրների համար տե՛ս ChatGPT-ում հավելվածների խնդիրների լուծում։

Google Drive-ը չի երևում

Ստուգեք, որ Google Drive-ը հասանելի է ձեր պլանով և ձեր գտնվելու վայրում, և համոզվեք, որ աշխատատարածքի ադմինիստրատորը միացրել է հավելվածը։ Եթե ձեր կազմակերպությունը սահմանափակում է հաշիվների տիրույթները, օգտագործեք Google-ի հաստատված հաշիվ։

Google-ի լիազորումն արգելափակված է

Խնդրեք Google Workspace-ի ձեր ադմինիստրատորին ստուգել՝ արդյոք ChatGPT/OpenAI հավելվածը վստահելի կամ հաստատված է Google-ի հասանելիության այն շրջանակների համար, որոնք պահանջվում են ձեր միացված գործողությունների համար։ Խնդրեք ChatGPT-ի ձեր ադմինիստրատորին անջատել այն գործողությունները, որոնք պահանջում են ձեր կազմակերպության կողմից չհաստատված հասանելիության շրջանակներ։

Ֆայլերը չեն երևում արդյունքներում

Համոզվեք, որ միացված է Google-ի ճիշտ հաշիվը, և որ դրանով հնարավոր է ֆայլը բացել անմիջապես Google Drive-ում։

Կառավարվող աշխատատարածքում խնդրեք ադմինիստրատորին ստուգել՝ արդյոք ընդհանուր դրայվների կամ «Իմ դրայվը» բաժնի սահմանափակումները ֆայլն անհասանելի են դարձնում։ Քաղաքականության փոփոխությունից հետո նոր հարցում փորձեք նոր զրույցում։

Միացման խնդիրների և աջակցվող ձևաչափերի ստուգման մասին տե՛ս ChatGPT-ում հավելվածների խնդիրների լուծում։

Ֆայլը երևում է, բայց ChatGPT-ն չի կարող օգտագործել դրա բովանդակությունը

Ֆայլի անունը կամ դրա մասին տեղեկությունները գտնելը դեռ չի նշանակում, որ ChatGPT-ն ստացել է ֆայլի բովանդակությունը։ Տեքստը կարդալն ու ներբեռնվող ֆայլ տրամադրելը նույնպես առանձին գործողություններ են։

1. Համոզվեք, որ Google-ի միացված հաշվով հնարավոր է ֆայլը բացել անմիջապես Google Drive-ում։

2. ChatGPT-ում նոր զրույց սկսեք, որտեղ Google Drive-ը հասանելի է։

3. Տեղադրեք ֆայլի հղումը և խնդրեք ChatGPT-ին Google Drive-ի միջոցով կարդալ կամ ամփոփել հենց այդ ֆայլը։

4. Եթե ներբեռնվող պատճեն է պետք, առանձին խնդրեք այն՝ նշելով անհրաժեշտ ձևաչափը։

Ուղիղ հղումով հարցման դեպքում ևս գործում են միացված հաշվի թույլտվություններն ու ձեր աշխատատարածքի հասանելիության կառավարման կարգավորումները։

Եթե հարցումը ձախողվում է, նշեք՝ արդյոք ChatGPT-ն կարողացավ գտնել ֆայլը, ստանալ դրա տեքստը կամ տրամադրել ներբեռնվող պատճեն։ Խնդրի մասին հաղորդելիս ներառեք սխալի ճշգրիտ հաղորդագրությունն ու ֆայլի տեսակը։

Աջակցվող ձևաչափերի ստուգման և հաջորդ քայլերի մասին տե՛ս ChatGPT-ում հավելումների և հավելվածների խնդիրների լուծում։

Գործողությունն ընդհատվում է, կամ արդյունքն անհստակ է

Եթե գործողությունը ձախողվում է, կամ արդյունքն անհստակ է, նախքան կրկին փորձելը ստուգեք այն ֆայլը, որի վրա կատարվում էր գործողությունը։ Հաջորդ քայլերի համար տե՛ս ChatGPT-ում հավելումների և հավելվածների խնդիրների լուծում։

Հաճախ տրվող հարցեր

Կարո՞ղ է ChatGPT-ն հասանելիություն ունենալ Google Docs-ին, Sheets-ին և Slides-ին։

Այո։ Google Docs-ի, Sheets-ի և Slides-ի աջակցվող հնարավորությունները հասանելի են Google Drive հավելվածի միջոցով։ Հասանելիությունը կախված է միացված հաշվից, միացված գործողություններից և Google-ի հաստատված թույլտվություններից։

Կարո՞ղ եմ հավելվածն օգտագործել պլանավորված առաջադրանքում կամ աշխատատարածքի գործակալում։

Զրույցում աշխատող գործողությունը պլանավորված առաջադրանքում կամ աշխատատարածքի գործակալում կարող է այլ լիազորում կամ հաստատում պահանջել։ Համոզվեք, որ հավելվածն ու գործողությունն աջակցվում են այն աշխատանքային գործընթացում, որը ցանկանում եք օգտագործել։ Հաստատումն ու կատարման կարգավիճակը ստուգելու մասին տե՛ս ChatGPT-ում հավելումների և հավելվածների խնդիրների լուծում։