Ընդհանուր տեղեկություններ
Նախնական տարբերակով հասանելի Apps SDK-ն մշակողներին թույլ է տալիս նախագծել ChatGPT-ում աշխատող հավելվածի և՛ տրամաբանությունը, և՛ միջերեսը։ Այն հիմնված է Մոդելի համատեքստի արձանագրության (MCP) վրա՝ բաց ստանդարտի, որը թույլ է տալիս ChatGPT-ն միացնել արտաքին գործիքներին և տվյալներին։ Apps SDK-ն ընդլայնում է MCP-ի հնարավորությունները, ուստի դրանով ստեղծված հավելվածները կարող են աշխատել այս ստանդարտն օգտագործող ցանկացած միջավայրում։ Apps SDK-ն բաց կոդով է։
Ինչից սկսել
Նախագծման ուղեցույցներին և հավելվածների օրինակներին ծանոթանալու համար կարդացեք Apps SDK-ի փաստաթղթերը։
Ստեղծեք ձեր հավելվածը՝ օգտագործելով ձեր սեփական կոդը։ Սահմանեք հավելվածի վարքագիծը զրույցում և օգտատիրոջ միջերեսը։ Միացրեք ձեր առկա սերվերային համակարգին, որպեսզի հետագայում ձեր օգտատերերը կարողանան մուտք գործել կամ օգտվել վճարովի գործառույթներից։
Փորձարկեք ChatGPT-ում՝ օգտվելով հատուկ MCP հավելվածի կարգավորման հրահանգներից՝ հատուկ հավելված ստեղծելու և դրա օգտագործման փորձառությունն աստիճանաբար բարելավելու համար։ Business և Enterprise/Edu պլանների ադմինիստրատորները կարող են կառավարել հատուկ MCP հավելվածների թույլտվությունները Աշխատատարածքի կարգավորումներում և լիազորված օգտատերերին թույլ տալ մշակել ու փորձարկել ներքին օգտագործման հավելվածներ։ Մանրամասների համար տե՛ս Հատուկ MCP սերվերների միացումը ChatGPT-ում։
Աշխատատարածքի ադմինիստրատորները կարող են նաև բացել Հավելվածներ էջը Ադմինիստրատորի վահանակից։ Ընտրեք ChatGPT-ի համապատասխան աշխատատարածքը, բացեք Հավելումներ բաժինը և ընտրեք Կառավարել հին հավելվածները։ Հավելված ստեղծելու և փորձարկելու համար օգտվեք հատուկ MCP հավելվածի կարգավորման վերոնշյալ հրահանգներից։Պատրաստվեք հավելվածը ներկայացնելուն՝ ծանոթանալով անվտանգության, գաղտնիության և գործառույթների վերաբերյալ մշակողների ուղեցույցի նախնական տարբերակին։
Հավելվածների ներկայացում և կատալոգ
Մենք ընդունում ենք հավելվածների ներկայացման հայտեր։ Մանրամասների համար տե՛ս հավելվածների ներկայացումը ChatGPT-ի հավելվածների կատալոգին։
Դիզայնի և գործառույթների ավելի բարձր չափանիշներին համապատասխանող հավելվածները կարող են ավելի տեսանելի դիրքերում ցուցադրվելու հնարավորություն ստանալ։
Եկամտի ստացում
Մանրամասները կհայտնենք հետագայում։ Նախատեսվում է աջակցություն Ագենտային առևտրի արձանագրությանը՝ բաց ստանդարտի, որը հնարավորություն է տալիս ակնթարթորեն գնումներ ձևակերպել ChatGPT-ում։
Անվտանգություն և գաղտնիություն
Մեր մշակողի ուղեցույցները կպահանջեն, որ մշակողները հետևեն OpenAI-ի օգտագործման քաղաքականություններին, հարմար լինեն բոլոր լսարանների համար և իրենց հավելվածի համար տրամադրեն հստակ գաղտնիության քաղաքականություն։ Խնդրում ենք նկատի ունենալ, որ մենք մշակողների համար որպես վաղ նախադիտում տարածել ենք մշակողի ուղեցույցների նախագիծը, սակայն այս ուղեցույցներն ու պահանջվող ստանդարտները կարող են փոփոխվել, երբ մենք սովորենք և ավելի շատ արձագանքներ ստանանք մեր մշակողների համայնքից։
Հաճախ տրվող հարցեր
Ի՞նչ է Apps SDK-ն։
Մշակողների համար նախատեսված գործիքակազմ է, որն ընդլայնում է Մոդելի համատեքստի արձանագրության հնարավորությունները՝ թույլ տալով սահմանել հավելվածի զրույցի տրամաբանությունն ու միջերեսը, այն միացնել ձեր սերվերային համակարգին և գործարկել ChatGPT-ում։
Ովքե՞ր կարող են հավելվածներ ստեղծել։
Հատուկ հավելվածներ ստեղծելու թույլտվություն ունեցող մշակողները կարող են ստեղծել և փորձարկել հավելվածներ՝ օգտագործելով Apps SDK-ի նախնական տարբերակը։ Հավելվածների կատալոգում ընդգրկվելու համար հետևեք ChatGPT հավելվածների ներկայացման առանձին ընթացակարգին։
Կարո՞ղ են ChatGPT Business, Enterprise և Edu պլաններից օգտվող կազմակերպություններն օգտագործել հավելվածներ։
Apps SDK-ի նախնական տարբերակն աջակցում է Business և Enterprise/Edu պլաններին։ Աշխատատարածքի ադմինիստրատորներն ու սեփականատերերը կարող են ստեղծել և փորձարկել հատուկ հավելվածներ։ Enterprise/Edu պլանների ադմինիստրատորները կարող են նաև ընտրված անդամներին հավելվածներ ստեղծելու և փորձարկելու թույլտվություն տալ։