Ընդհանուր տեղեկություններ

Որոշելու համար, թե արդյոք հաշիվը համապատասխանում է ChatGPT-ի՝ դեռահասների համար նախատեսված ռեժիմի պայմաններին, OpenAI-ը կարող է տարբեր ցուցիչների հիման վրա կանխատեսել՝ արդյոք հաշիվը պատկանում է 18 տարեկանից փոքր անձի։

Եթե ChatGPT-ն կանխատեսում է, որ հաշիվը կարող է պատկանել 18 տարեկանից փոքր անձի, և հաշիվը համապատասխանում է պայմաններին, այն ինքնաշխատ կերպով միացնում է դեռահասների համար նախատեսված ռեժիմը։ Սա կարող է ներառել զգայուն կամ տարիքին անհամապատասխան բովանդակությունից պաշտպանության լրացուցիչ միջոցներ և որոշ գործառույթների սահմանափակումներ։ Ձեր հաշիվը մնում է ակտիվ, և դուք կարող եք շարունակել օգտվել ChatGPT-ից՝ սովորելու, ստեղծագործելու և հարցեր տալու համար։ OpenAI-ը ձեր հաշվում գովազդ չի ցուցադրի։

Եթե դուք 18 տարեկան կամ ավելի մեծ եք, և ձեր հաշվում սխալմամբ միացվել է ChatGPT-ի՝ դեռահասների համար նախատեսված ռեժիմը, հաշվի կարգավորումներում ստուգեք տարիքային խումբը և հաստատեք ձեր տարիքը, եթե այդ տարբերակը հասանելի է։

Տարիքի կանխատեսման վերաբերյալ հարցերի կամ հարցումների դեպքում գրեք privacy@openai.com հասցեին։

Ինչպես է աշխատում տարիքի կանխատեսումը

ChatGPT-ի՝ դեռահասների համար նախատեսված ռեժիմը ներառում է պաշտպանության լրացուցիչ միջոցներ։ Այս միջոցներն օգնում են ChatGPT-ի օգտագործումն ավելի անվտանգ ու տարիքին համապատասխան դարձնել։ Դրանք կարող են սահմանափակել որոշ զգայուն բովանդակություն և փոխազդեցության որոշ տեսակներ։

ChatGPT-ն օգտագործում է տարիքի կանխատեսման համակարգ՝ որոշելու համար, թե արդյոք հաշիվը համապատասխանում է դեռահասների համար նախատեսված ռեժիմի պայմաններին։ Այն դիտարկում է ձեր հաշվի հետ կապված տարբեր ցուցիչներ։ Օրինակ՝ այն կարող է դիտարկել ձեր զրույցների ընդհանուր թեմաները, օրվա որ ժամերին եք օգտվում ChatGPT-ից, ինչպես և երբ է օգտագործվում ձեր հաշիվը, և որքան ժամանակ է անցել դրա ստեղծումից։

Տարիքի կանխատեսումն անվտանգության լրացուցիչ ստուգում է։ Այն կարող է հաշիվը համարել ChatGPT-ի՝ դեռահասների համար նախատեսված ռեժիմի պայմաններին համապատասխանող, նույնիսկ եթե հաշիվը ստեղծելիս արդեն նշել եք ձեր ծննդյան ամսաթիվը։

Ոչ մի համակարգ կատարյալ չէ։ Երբեմն ChatGPT-ն կարող է սխալվել։ Եթե դուք 18 տարեկան կամ ավելի մեծ եք, և ձեր հաշվում սխալմամբ միացվել է ChatGPT-ի՝ դեռահասների համար նախատեսված ռեժիմը, հաշվի կարգավորումներում ստուգեք տարիքային խումբը և հաստատեք ձեր տարիքը, եթե այդ տարբերակը հասանելի է։

Ստուգեք ձեր հաշվի տարիքային խումբը

Կարող եք ստուգել՝ ChatGPT-ն ձեր հաշիվը համարում է 18 տարեկանից փո՞քր, թե՞ 18 տարեկան կամ ավելի մեծ անձի պատկանող։ Տարիք կարգավորումը ցույց է տալիս տարիքային խումբը։ Այն թույլ չի տալիս փոխել ձեր ծննդյան ամսաթիվը։

Ձեր տարիքային խումբը ստուգելու համար՝

1. Բացեք Կարգավորումներ բաժինը։

2. Ընտրեք Հաշիվ։

3. Ստուգեք Տարիք կարգավորումը։

Հաստատել տարիքը տարբերակը հասանելի չէ բոլոր հաշիվներում։ Տարիք կարգավորման մեջ այն չի ցուցադրվում այն հաշիվների համար, որոնք ճանաչվել են որպես 18 տարեկան կամ ավելի մեծ անձանց պատկանող, կամ որոնց տարիքն արդեն հաստատված է։

Ինչ է փոխվում, երբ ChatGPT-ն կանխատեսում է, որ դուք կարող եք 18 տարեկանից փոքր լինել

Եթե ChatGPT-ն կանխատեսում է, որ դուք կարող եք 18 տարեկանից փոքր լինել, ձեր հաշիվը կարող է համապատասխանել «ChatGPT դեռահասների համար» ռեժիմի պայմաններին։ Այս ռեժիմը ներառում է տարիքին համապատասխան պաշտպանության միջոցներ, ինչպես նաև լրացուցիչ գործիքներ ու կարգավորումներ՝ ուսման, ստեղծագործելու և առօրյա կյանքի համար։ Կարիք չկա ինքնուրույն միացնելու ChatGPT-ի՝ դեռահասների համար նախատեսված ռեժիմը։ Եթե ձեր հաշիվը համապատասխանում է պայմաններին, ChatGPT-ն այն կմիացնի ինքնաշխատ կերպով։ Ձեր հաշիվը մնում է ակտիվ։

ChatGPT-ն կարող է օգտագործել ձեր հաշվի հետ կապված տարիքը, հաստատված տարիքը կամ տարիքի կանխատեսումը՝ որոշելու համար, թե արդյոք ձեր հաշիվը համապատասխանում է դեռահասների համար նախատեսված ռեժիմի պայմաններին։

Դեռահասների համար նախատեսված ռեժիմում ChatGPT-ն որոշ թեմաների անդրադառնում է առավել զգուշությամբ և կարող է նվազեցնել այնպիսի զգայուն բովանդակությունը, ինչպիսին է՝

• Բացահայտ բռնության կամ արյունալի տեսարանների մանրամասն նկարագրությունը

• Համացանցում արագ տարածվող մարտահրավերները, որոնք կարող են դրդել վտանգավոր կամ վնասակար վարքագծի

• Սեռական, ռոմանտիկ կամ բռնի բնույթի դերախաղերը

• Բովանդակությունը, որը խրախուսում է գեղեցկության ծայրահեղ չափանիշներ, անառողջ սննդակարգեր կամ մարմնի համար ամոթանք տալը

Բովանդակության պաշտպանության այս միջոցի մասին ավելին իմանալու համար տե՛ս «Նվազեցնել զգայուն բովանդակությունը ChatGPT-ում»։

Եթե ChatGPT-ն որոշում է, որ դուք 18 տարեկան կամ ավելի մեծ եք, կամ ձեր հաստատված ծննդյան ամսաթիվը ցույց է տալիս, որ լրացել է ձեր 18 տարին, ձեր հաշվում անջատվում է դեռահասների համար նախատեսված ռեժիմը։ Ավելին իմանալու համար տե՛ս «Ինչ է փոխվում, երբ լրանում է ChatGPT-ի օգտատիրոջ 18 տարին»։

Եթե ծնողական վերահսկողության միջոցով ձեր հաշիվը կապված է ծնողի կամ խնամակալի հաշվի հետ, նա կարող է հնարավորություն ունենալ կառավարելու ձեր հաշվի որոշ կարգավորումներ։ Ծնողական վերահսկողությունը ձեր ծնողին կամ խնամակալին հասանելիություն չի տալիս ձեր զրույցներին։ Ավելին իմանալու համար տե՛ս «Ծնողական վերահսկողությունը ChatGPT-ում»։

Հաստատեք ձեր տարիքը, եթե 18 տարեկան կամ ավելի մեծ եք

Տարիքի կանխատեսման դեպքում պարտադիր չէ հաստատել ձեր տարիքը՝ դեռահասների պաշտպանության միջոցներով ChatGPT-ից օգտվելը շարունակելու համար։ Եթե դուք 18 տարեկան կամ ավելի մեծ եք և ցանկանում եք անջատել պաշտպանության այդ միջոցները, ստուգեք՝ արդյոք ձեր հաշվում հասանելի է տարիքի հաստատումը։

Եթե ChatGPT-ն առանձին ծանուցում է ցուցադրում տարիքի պարտադիր հաստատման մասին, հետևեք հրահանգներին և պահպանեք ձեր հաշվի համար նշված ժամկետը։

Տարիքի հաստատման հասանելիությունը ստուգելու համար՝

1. Մուտք գործեք ChatGPT-ի ձեր հաշիվ վեբ տարբերակում, iOS-ում կամ Android-ում։

2. Բացեք Կարգավորումներ բաժինը։

3. Ընտրեք Հաշիվ։

4. Ստուգեք Տարիք կարգավորումը։ Եթե Հաստատել տարիքը տարբերակը հասանելի է, ընտրեք այն։

5. Հետևեք Persona-ի առաջարկած քայլերին։

Persona-ն վստահելի երրորդ կողմի ընկերություն է, որի ծառայություններից OpenAI-ն օգտվում է տարիքը հաստատելու համար։

Ինչ կարող է պահանջել Persona-ն

Իտալիայում Persona-ն կարող է պահանջել տեղում արված սելֆի, պետության կողմից տրված անձը հաստատող փաստաթուղթ կամ երկուսն էլ։

Կախված ձեր երկրից՝ Persona-ն կարող է պահանջել հետևյալներից մեկը կամ երկուսն էլ՝

• Տեղում արված սելֆի․ հեռախոսով կամ վեբ-տեսախցիկով տվյալ պահին լուսանկարեք ձեր դեմքը։

• Պետության կողմից տրված անձը հաստատող փաստաթուղթ․ վերբեռնեք փաստաթղթի լուսանկարը, օրինակ՝ վարորդական վկայականի, անձնագրի կամ նահանգի կողմից տրված նույնականացման քարտի։ Persona-ն ստուգում է ձեր ծննդյան ամսաթիվը և ձեր սելֆիի համապատասխանությունը փաստաթղթի լուսանկարին։ Ընդունվող փաստաթղթերը տարբերվում են ըստ երկրի։

Հաստատումից հետո

Եթե Persona-ն հաստատի, որ 18 տարեկան կամ ավելի բարձր տարիքի եք, ChatGPT-ն կհեռացնի դեռահասների համար նախատեսված պաշտպանական միջոցները։ Այս փոփոխության լիարժեք կիրառումը կարող է որոշ ժամանակ տևել։

Եթե հաստատումը ցույց տա, որ ձեր հաշիվը պետք է մնա «ChatGPT դեռահասների համար» միջավայրում, ChatGPT-ն կարող է պահպանել կամ վերականգնել ձեր հաշվի՝ դեռահասների համար նախատեսված պաշտպանական միջոցները։

OpenAI-ը չի տեսնում, թե ինչ եք տրամադրում Persona-ին։ OpenAI-ը ստանում է միայն ձեր հաշվի համար ճիշտ միջավայրը որոշելու նպատակով անհրաժեշտ տեղեկությունները, օրինակ՝ արդյոք հաստատել եք, որ 18 տարեկան կամ ավելի բարձր տարիքի եք, ինչպես նաև տարիքին վերաբերող տվյալներ, այդ թվում՝ ձեր ծննդյան ամսաթիվը։ OpenAI-ը չի ստանում անձը հաստատող փաստաթուղթը։

Գաղտնիություն և տվյալների օգտագործում

Persona-ն իրականացնում է տարիքի հաստատումը և դրանից հետո 7 օրվա ընթացքում ջնջում ձեր վերբեռնած անձը հաստատող փաստաթուղթը կամ սելֆին։

OpenAI-ը չի ստանում անձը հաստատող ձեր փաստաթուղթը կամ սելֆին։ OpenAI-ը ստանում է միայն ձեր ծննդյան ամսաթիվը կամ տարիքի կանխատեսումը։ OpenAI-ը այս տեղեկությունները պահպանում է անվտանգ կերպով և օգտագործում միայն իր գաղտնիության քաղաքականության մեջ նկարագրված եղանակներով։

Եթե չեք ցանկանում, որ OpenAI-ը կանխատեսի ձեր տարիքը, և ձեր հաշվի կարգավորումներում հասանելի է տարիքի հաստատումը, կարող եք հաստատել ձեր տարիքը Persona-ի միջոցով։ Ձեր տարիքը հաստատելուց հետո OpenAI-ն այլևս չի կանխատեսի ձեր հաշվի տարիքը։

Կարող եք նաև որոշել՝ արդյոք ձեր տվյալներն օգտագործվեն OpenAI-ի մոդելները բարելավելու համար՝ ձեր ChatGPT հաշվի Բարելավել մոդելը բոլորի համար կարգավորման միջոցով։ Ավելին իմանալու համար տե՛ս «Տվյալների կառավարման մասին հաճախ տրվող հարցեր»։

Եթե հարցեր ունեք կամ ցանկանում եք առարկել տարիքի կանխատեսման նպատակով OpenAI-ի կողմից տվյալների օգտագործման եղանակի դեմ, գրեք privacy@openai.com հասցեին։

Իտալիայում Persona-ի միջոցով հաստատման դեպքում ևս կիրառվում են վերը նկարագրված՝ անձը հաստատող փաստաթղթի և սելֆիի մշակման, ջնջման ժամկետի, OpenAI-ին փոխանցվող տեղեկությունների և տարիքի կանխատեսումից ազատման պայմանները։

ՀՏՀ

Ինչո՞ւ իմ հաշվում միացվեց ChatGPT-ի՝ դեռահասների համար նախատեսված ռեժիմը, եթե ես արդեն նշել էի իմ ծննդյան ամսաթիվը

Տարիքի կանխատեսումն անվտանգության լրացուցիչ ստուգում է։ Այն կարող է հաշիվը համարել ChatGPT-ի՝ դեռահասների համար նախատեսված ռեժիմի պայմաններին համապատասխանող, նույնիսկ եթե հաշիվը ստեղծելիս արդեն նշել եք ձեր ծննդյան ամսաթիվը։ Եթե դուք 18 տարեկան կամ ավելի մեծ եք, և ձեր հաշվում սխալմամբ միացվել է ChatGPT-ի՝ դեռահասների համար նախատեսված ռեժիմը, հաշվի կարգավորումներում ստուգեք տարիքային խումբը և հաստատեք ձեր տարիքը, եթե այդ տարբերակը հասանելի է։

Անձը հաստատող ի՞նչ փաստաթուղթ է անհրաժեշտ

Կախված ձեր երկրից՝ Persona-ն ընդունում է պետության կողմից տրված անձը հաստատող տարբեր փաստաթղթեր։ Հասանելի տարբերակները կտեսնեք հաստատման ընթացքում։

Հաճախ ընդունվող փաստաթղթերից են՝

• Անձնագիր

• Վարորդական վկայական կամ նահանգի/մարզի կողմից տրված անձը հաստատող փաստաթուղթ

• Ազգային նույնականացման քարտ

• Կացության թույլտվություն

• Աշխատանքի թույլտվության քարտ

Անձը հաստատող ձեր փաստաթուղթը պետք է՝

• Տրված լինի պետության կողմից

• Լինի վավեր և դյուրընթեռնելի

• Պարունակի ձեր ամբողջական անունը և ծննդյան ամսաթիվը

• Պարունակի ձեր դեմքի հստակ լուսանկարը

Ի՞նչ տեղեկություններ պետք է տեսանելի լինեն իմ անձը հաստատող փաստաթղթում։

Ձեր անձը հաստատող փաստաթղթի լուսանկարում պետք է հստակ երևան ձեր ամբողջական անունը, ծննդյան ամսաթիվը և ձեր դեմքի լուսանկարը։ Պետք չէ ցույց տալ փաստաթղթի համարները, օրինակ՝ ազգային նույնականացման համարը կամ սոցիալական ապահովության համարը։ Կարող եք դրանք ծածկել՝ նախքան վերբեռնելը։

Իսկ եթե կենդանի սելֆիի համար տեսախցիկ չունե՞մ։

Եթե ձեր համակարգիչը տեսախցիկ չունի, կարող եք օգտագործել մեկ այլ սարք։ Եթե ընդհանրապես չեք կարող սելֆի անել, կարող եք օգտագործել պետական անձը հաստատող փաստաթուղթ։