Ընդհանուր տեղեկություններ

OpenAI Presence-ը կառավարվող կորպորատիվ հարթակ է՝ մեծածավալ և բարձր պատասխանատվություն պահանջող աշխատանքային գործընթացների համար վերահսկվող ԱԲ ագենտներ ստեղծելու, ներդնելու, գործարկելու և շարունակաբար բարելավելու համար։

Presence-ը համադրում է OpenAI-ի մոդելներն այն գործիքների հետ, որոնք կազմակերպություններին անհրաժեշտ են քաղաքականություններ և թույլտվություններ սահմանելու, բիզնես համակարգեր միացնելու, ագենտի վարքագիծը փորձարկելու, իրական աշխատանքի արդյունքները մշտադիտարկելու և մարդկանց ներգրավելու համար, երբ նրանց գնահատականն անհրաժեշտ է։

Այս հոդվածը ներկայացնում է ընդհանուր տեղեկություններ։ Կոնկրետ գործառույթները, մոդելները, կապուղիները, հզորությունը, տվյալների մշակման կարգը, գները և սպասարկման պարտավորությունները սահմանվում են յուրաքանչյուր ներդրման համար։

Ո՞ւմ համար է նախատեսված OpenAI Presence-ը։

OpenAI Presence-ը նախատեսված է այն կազմակերպությունների համար, որոնք ունեն մեծածավալ, կրկնվող աշխատանքային գործընթացներ՝ հստակ կառավարման, հուսալիության և գործառնական վերահսկողության պահանջներով։ Հաճախորդների աջակցությունն ու ձայնային հաղորդակցությունը սկզբնական կիրառման խոստումնալից ոլորտներ են, սակայն Presence-ը կարող է աջակցել ինչպես հաճախորդների հետ աշխատանքին, այնպես էլ ներքին աշխատանքային գործընթացներին։

Presence-ը ներկայում հասանելի է սահմանափակ ընդհանուր հասանելիության (սահմանափակ GA) շրջանակում՝ կառավարվող ներդրման ձևաչափով (տես ստորև)։ Այն ինքնասպասարկման համար նախատեսված պրոդուկտ չէ։ Հասանելիությունը կախված է աշխատանքային գործընթացի համապատասխանությունից, ներդրմանը պատրաստ լինելուց և ներդրումն իրականացնելու համար առկա ռեսուրսներից։ Լրացուցիչ տեղեկությունների համար դիմեք OpenAI-ում ձեզ սպասարկող ներկայացուցչին։

Ի՞նչ կարող է անել Presence-ի ագենտը։

Presence-ի ագենտը կարող է կարգավորվել այնպես, որ՝

• Հետևի հաստատված հրահանգներին, ստանդարտ գործառնական ընթացակարգերին (SOP) և կազմակերպության քաղաքականություններին։

• Օգտագործի հաստատված գիտելիքներ և միանա բիզնես համակարգերին՝ սահմանված թույլտվությունների շրջանակում գործող API-ների ու գործիքների միջոցով։

• Ստանա տեղեկություններ, թարմացնի համակարգերը և կատարի հաստատված գործողություններ։

• Հաղորդակցվի աջակցվող ձայնային կամ չաթի միջավայրերում՝ կախված ներդրումից։

• Հարցը փոխանցի մասնագետին կամ աջակցության այլ ուղու, երբ քաղաքականությունը, ռիսկը կամ աշխատանքային գործընթացը պահանջում են մարդու գնահատականը։

Կոնկրետ հնարավորություններն ու ինտեգրումները հաստատվում են տեխնիկական աշխատանքների շրջանակը սահմանելիս։

Ինչպե՞ս է կառավարվում Presence-ի ագենտը։

Presence-ը ներառում է ագենտներին փորձարկելու և իրական աշխատանքային միջավայրում գործարկելու վերահսկման միջոցներ։ Կախված ներդրումից՝ դրանք կարող են ներառել՝

• Մոդելավորումներ և գնահատումներ, որոնց միջոցով մինչև թողարկումը փորձարկվում են սովորական աշխատանքային գործընթացներն ու բացառիկ դեպքերը։

• Պաշտպանիչ սահմանափակումներ, թույլտվություններ և հաստատման քայլեր, որոնք սահմանում են ագենտի թույլատրելի գործողությունները։

• Սեանսների գրառումներ, գործողությունների պատմություն և որակի ցուցանիշներ, որոնք թիմերը կարող են ուսումնասիրել՝ ագենտը բարելավելու համար։

• Հարցերը մասնագետին փոխանցելու ուղիներ՝ դրանք ստացող թիմին տրամադրվող կառուցվածքային համատեքստային տեղեկություններով։

• Նոր տարբերակների վերահսկվող գործարկման, մշտադիտարկման և նախորդ տարբերակին վերադարձի գործընթացներ։

Վերահսկման այս միջոցներն օգնում են կազմակերպություններին գնահատել փոփոխությունները մինչև թողարկումը և բարելավել ագենտը՝ հիմնվելով իրական աշխատանքի տվյալների վրա՝ միաժամանակ պահպանելով վերահսկողությունը։

Ինչպե՞ս է իրականացվում ներդրումը։

OpenAI-ի՝ հաճախորդների հետ տեղում աշխատող ինժեներները, ներդրման ընտրված գործընկերները կամ երկուսը միասին հաճախորդի հետ աշխատում են կառավարվող գործընթացով, որը սովորաբար ներառում է՝

1. Բիզնեսի ակնկալվող արդյունքների, հաջողության չափանիշների և սկզբնական աշխատանքային գործընթացների սահմանում։

2. Անհրաժեշտ համակարգերի միացում և քաղաքականությունների, թույլտվությունների ու հարցերը վերադասին փոխանցելու ուղիների ծրագրային ամրագրում։

3. Ներդրման՝ անվտանգության, գաղտնիության և իրավական հարցերի ստուգում։

4. Մոդելավորումների, գնահատումների և ընդունման փորձարկումների անցկացում։

5. Վերահսկվող, փուլային գործարկում իրական աշխատանքային միջավայրում և արդյունքների մշտադիտարկում։

6. Փաստացի տվյալների ուսումնասիրություն և ժամանակի ընթացքում փորձարկված բարելավումների իրականացում։

Presence-ի ագենտը պատրաստ չի դառնում իրական աշխատանքային միջավայրում գործելուն պարզապես փաստաթղթեր ներմուծելով։ Յուրաքանչյուր ներդրման դեպքում գործարկումից առաջ անհրաժեշտ է սահմանել աշխատանքների շրջանակը, կատարել ինտեգրում, փորձարկում, ստուգում և ստանալ հաստատում։

Ի՞նչ կապուղիներ է աջակցում OpenAI Presence-ը։

Սահմանափակ GA-ի ընթացքում Presence-ն աջակցում է ձայնային կամ չաթի միջոցով երկխոսության վրա հիմնված աշխատանքային գործընթացներին։ Հասանելի կապուղին, կոնտակտային կենտրոնի հետ ինտեգրումը, ուղղորդումը, նույնականացումն ու մասնագետին փոխանցման մեխանիզմը հաստատվում են յուրաքանչյուր ներդրման համար։

OpenAI-ի ո՞ր մոդելներն է օգտագործում Presence-ը։

Presence-ն օգտագործում է OpenAI-ի մոդելները։ Մոդելի կարգավորումներն ընտրվում են ըստ աշխատանքային գործընթացի և կարող են համատեղել իրական ժամանակի փոխազդեցությունը խորացված դատողության կամ գործիքների գործարկման հետ։ Կոնկրետ կարգավորումները ստուգվում են յուրաքանչյուր ներդրման համար և կարող են փոխվել աշխատանքային գործընթացի զարգացմանը զուգընթաց։

Ինչպե՞ս են կարգավորվում տվյալների մշակման, գաղտնիության և անվտանգության հարցերը։

Տվյալների մշակման կարգը սահմանվում և ստուգվում է յուրաքանչյուր ներդրման համար։ Սա ներառում է, թե որ տվյալներն են հասանելի ագենտին, ինչ է գրանցվում մատյաններում, ինչպես են հեռացվում կամ քողարկվում զգայուն տեղեկությունները, որքան ժամանակ և որտեղ են պահվում տվյալները, և ով կարող է հասանելիություն ունենալ դրանց։

Տես ձեր ներդրման համար հաստատված ճարտարապետությունը, անվտանգության փաստաթղթերն ու պայմանագիրը։ Presence-ի կարգավորումները կարող են տարբեր լինել յուրաքանչյուր ներդրման դեպքում, ուստի այս մանրամասների համար հիմք պետք է ընդունել ձեր ներդրման փաստաթղթերը։

Ինչո՞վ է OpenAI Presence-ը տարբերվում ChatGPT-ի աշխատատարածքի ագենտներից։

OpenAI Presence-ը առանձին, կառավարվող կորպորատիվ պրոդուկտ է՝ իրական աշխատանքային գործընթացների համար, որոնք պահանջում են ինտեգրումներ, փորձարկումներ, պաշտպանիչ սահմանափակումներ, մշտադիտարկում և ներդրման աջակցություն։

Enterprise-ի և Business-ի համար նախատեսված ChatGPT-ի աշխատատարածքի ագենտները ստեղծվում, օգտագործվում, համօգտագործվում և կառավարվում են ChatGPT-ի ու Slack-ի աջակցվող աշխատատարածքներում։ Presence-ի ագենտների աշխատանքի շրջանակը սահմանվում է, և դրանք ներդրվում են OpenAI-ի, ներդրման ընտրված գործընկերոջ կամ երկուսի հետ համատեղ։ Դրանք չեն ստեղծվում ChatGPT-ի աշխատատարածքի ագենտների միջերեսի միջոցով։

Ինչպե՞ս կարող եմ օգտվել OpenAI Presence-ից։

Կապվեք OpenAI-ում ձեզ սպասարկող թիմի հետ՝ քննարկելու մասնակցության պայմանները, աշխատանքային գործընթացի համապատասխանությունը, ներդրմանը պատրաստ լինելը և այն իրականացնելու համար առկա ռեսուրսները։ Գներն ու ներդրման աշխատանքների շրջանակը որոշվում են անհատապես՝ յուրաքանչյուր հաճախորդի և ներդրման համար։