Իմացեք, թե ինչպես է Codex Cloud-ը կատարում ծրագրավորման առաջադրանքները, պահում դրանց ֆայլերը և աշխատում ձեր հաշվի ու աշխատատարածքի հետ։

Ընդհանուր տեղեկություններ

Codex Cloud-ը ծրագրավորման առաջադրանքները կատարում է OpenAI-ի կողմից կառավարվող համակարգիչների վրա։ Երբ ձեր նախագծի համար միջավայրը պատրաստ է, կարող եք առաջադրանքներ սկսել և շարունակել համակարգչային, վեբ կամ բջջային տարբերակից։

Հասանելիություն

Ըստ պլանի հասանելիության և օգտագործման սահմանաչափերի մասին տե՛ս Codex-ի օգտագործումը ձեր ChatGPT պլանով։ Կառավարվող աշխատատարածքում ամպային Codex-ի հասանելիությունը վերահսկում է նաև ձեր ադմինիստրատորը։

Պատրաստեք միջավայր ձեր նախագծի համար

Ամպային միջավայրը միավորում է այն պահոցները, գործիքները, կախվածություններն ու հասանելիության կարգավորումները, որոնք Codex-ին անհրաժեշտ են ձեր նախագծի համար։ Հրապարակված միջավայրը թույլ է տալիս նույն կազմաձևումը կրկին օգտագործել նոր առաջադրանքների համար։

Միջավայրերը ստեղծվում և հրապարակվում են համակարգչային կամ վեբ տարբերակում։ Երբ միջավայրը պատրաստ է, կարող եք այն օգտագործել աջակցվող տարբեր սարքերից կատարվող առաջադրանքների համար։

Ամբողջական քայլ առ քայլ հրահանգների համար տե՛ս Codex Cloud-ի պատրաստումն ու կազմաձևումը։ Մշակողների ուղեցույցում նկարագրված են պահոցների միացումը, միջավայրի պատրաստումն ու փորձարկումը, նույնականացման տվյալների ավելացումը, ցանցային հասանելիության կազմաձևումը և մասնավոր ծառայությունների միացումը։

Գործարկեք առաջադրանքը և ստուգեք արդյունքները

Ընտրեք հրապարակված միջավայր և նկարագրեք, թե ինչ եք ուզում, որ Codex-ն անի։ Օրինակ՝ կարող եք խնդրել ուսումնասիրել որևէ սխալ, փոփոխել կոդը կամ գործարկել նախագծի թեստերը։ Յուրաքանչյուր առաջադրանք սկսվում է պատրաստված կազմաձևումից՝ իր մեկուսացված աշխատանքային միջավայրում, առանձին աշխատանքային ֆայլերով և փոփոխություններով։

Ամպային առաջադրանքների կատարումը կարող է շարունակվել, երբ ձեր համակարգիչը քնի ռեժիմում է։ Համակարգչային կամ վեբ տարբերակում միջավայր ստեղծելուց և հրապարակելուց հետո կարող եք ընտրել այն բջջային սարքից կատարվող առաջադրանքի համար և նույն ամպային առաջադրանքը շարունակել աջակցվող տարբեր սարքերից։ Ձեր սեփական համակարգչի վրա կատարվող առաջադրանքին հեռավար հասանելիությունն առանձին աշխատանքային ընթացք է։

Կատարված աշխատանքն օգտագործելուց առաջ ստուգեք փոփոխություններն ու թեստերի արդյունքները։ Եթե լրացուցիչ փոփոխություններ են անհրաժեշտ, շարունակեք նույն առաջադրանքի շրջանակում։

Շարունակեք աշխատանքը և թարմացրեք կազմաձևումը

Անավարտ աշխատանքը շարունակելու համար վերադարձեք սկզբնական առաջադրանքին։ Նոր առաջադրանք սկսելիս ստեղծվում է առանձին աշխատանքային միջավայր, և մեկ այլ առաջադրանքի՝ դեռևս չհաստատված փոփոխությունները չեն վերականգնվում։ Կարևոր աշխատանքը գրանցեք տարբերակների կառավարման համակարգում՝ կատարելով commit։

Լռելյայն վիրտուալ մեքենայի (VM) պահպանված վիճակը հնարավոր է վերականգնել մինչև 7 օր՝ վերջին քայլի մեկնարկից կամ առաջադրանքի վերսկսումից հետո։ Վերականգնման այս ժամկետը վերաբերում է VM-ի պահպանված վիճակին, ոչ թե զրույցների պատմության պահպանմանը։

Միջավայրի հրապարակված կազմաձևման փոփոխությունները կիրառվում են նոր առաջադրանքների նկատմամբ։ Արդեն գոյություն ունեցող առաջադրանքները պահպանում են իրենց վիճակը։ Եթե ձեր նախագծին այլ գործիքներ, կախվածություններ կամ հասանելիության կարգավորումներ են անհրաժեշտ, տե՛ս Ամպային միջավայրի թարմացումը։

Հաճախ տրվող հարցեր

Ինչո՞ւ չեմ տեսնում կամ չեմ կարող օգտագործել ամպային կառավարման գործիքները։

Ստուգեք՝ արդյոք մուտք եք գործել անհրաժեշտ հաշիվ և աշխատատարածք։ Հասանելիությունը կախված է ձեր բաժանորդագրության պլանից և աշխատատարածքի կարգավորումներից։ Կառավարվող աշխատատարածքում խնդրեք ադմինիստրատորին ստուգել ամպային ծառայությունից օգտվելու ձեր հասանելիությունը և այն գործողության համար անհրաժեշտ թույլտվությունները, որը փորձում եք կատարել։ Սեփականատեր կամ ադմինիստրատոր լինելն ինքնին չի նշանակում, որ ձեր պլանով բոլոր գործառույթները հասանելի են։

Ինչո՞ւ առաջադրանքը չի կարող մուտք գործել պահոց կամ փոփոխություններ ուղարկել այնտեղ, թեև GitHub-ը միացված է։

Համոզվեք, որ միացված GitHub հաշիվը պահոցին հասանելիություն ունի, և որ պահոցն ընդգրկված է միջավայրում։ Յուրաքանչյուրն օգտագործում է GitHub-ի իր կապը։ Միջավայրին հասանելիությունը չի փոխարինում պահոցի թույլտվություններին կամ առաջադրանքի Git-ի կազմաձևմանը։

Պարզեք, թե որ փուլում է խափանումը տեղի ունենում՝ պահոցն ընտրելիս, միջավայրը պատրաստելիս, կոդը ստանալիս, թե փոփոխություններն ուղարկելիս։ Պահոցների կազմաձևման և միացման պահանջների մասին տե՛ս Պահոցների միացումը Codex Cloud-ին։ Եթե խնդիրը չի լուծվում, աջակցման ծառայությանը դիմելիս նշեք, թե որ քայլում է խափանումը տեղի ունենում։

Ի՞նչ անեմ, եթե առաջադրանքը կամ դրա ֆայլերը հասանելի չեն։

Ստուգեք՝ արդյոք բացում եք սկզբնական առաջադրանքը։ Եթե աշխատանքը դեռ հասանելի չէ, կապվեք աջակցման ծառայության հետ՝ հնարավորության դեպքում տրամադրելով առաջադրանքի հղումը կամ ID-ն։ Նշեք, թե երբ եք վերջին անգամ բացել աշխատանքը և ինչն է բացակայում։

Ի՞նչն է հասանելի դառնում ուրիշներին, երբ կիսվում եք միջավայրով։

ChatGPT Enterprise-ում միջավայրով կիսվելիս դրա պատրաստված կազմաձևումը հասանելի է դառնում աշխատատարածքի համապատասխան իրավունքներ ունեցող անդամներին։ Դա նրանց չի տալիս մեկ այլ անձի առաջադրանքին մուտք գործելու հնարավորություն կամ միջավայրը խմբագրելու ավտոմատ թույլտվություն։

Պատրաստված ֆայլերը և միջավայրին պատկանող նույնականացման տվյալները կամ կապերը կարող են թիմակիցներին հասանելիություն տալ ընդհանուր ռեսուրսներին։ Անձնական գաղտնապահոցում պահվող արժեքները չեն պատճենվում թիմակիցների համար։ Կիսվելուց առաջ ստուգեք, թե որ ֆայլերը, նույնականացման տվյալներն ու կապերը կարող են օգտագործել թիմակիցները. Միջավայրով կիսվելը Enterprise-ում։

Ի՞նչ է լինում Codex-ի նախորդ ամպային տարբերակի հետ։

Անցումային շրջանում կոդի ստուգումը, անվտանգության ստուգումը և Linear-ի ու GitHub-ի հետ ինտեգրման գործող աշխատանքային ընթացքերը շարունակում են օգտագործել Codex Cloud-ի հին տարբերակը։

Աջակցվող հին միջավայրերը կարելի է տեղափոխել նոր տարբերակ։ Տեղափոխումը նախաձեռնում եք դուք. սկզբնական միջավայրը մնում է անփոփոխ, իսկ հին առաջադրանքների պատմությունը՝ հասանելի դիտման համար։ Միջավայրի պատրաստման և կազմաձևման մասին տե՛ս Codex Cloud-ի ուղեցույցը մշակողների համար։

Տվյալների օգտագործման սահմանափակումներ

OpenAI-ի գործարար գործընկերոջ համաձայնագիրը (BAA) չի տարածվում ամպային Codex-ի վրա։ Մի՛ օգտագործեք այն առողջության վերաբերյալ պաշտպանված տեղեկություններ (PHI) մշակելու համար։ Մանրամասների համար տե՛ս HIPAA-ի պահանջներին համապատասխանող արտադրանքներն ու գործառույթները։