Ծագման ազդանշանները (բովանդակության հավաստագրեր, SynthID) OpenAI-ի ստեղծած բովանդակության մեջ

OpenAI-ն օգտագործում է ծագման ազդանշաններ, օրինակ՝ SynthID ջրանիշներ և Content Credentials (C2PA), որպեսզի մարդկանց օգնի հասկանալ՝ արդյոք բովանդակությունը ստեղծվել է OpenAI-ի գործիքներով։ Ծագման ազդանշանները կարող են օգտակար ցուցիչներ լինել, սակայն չեն երաշխավորում, որ բովանդակությունը ճշգրիտ է, չխմբագրված, օրինականորեն պատկանում է ներկայացնողին կամ ներկայացված է ճիշտ համատեքստում։

Ի՞նչ է C2PA ստանդարտը և ի՞նչ հնարավորություն է այն տալիս։

C2PA-ն բաց տեխնիկական ստանդարտ է, որը հրատարակիչներին, ընկերություններին և այլ կողմերի թույլ է տալիս մեդիաբովանդակության մեջ ներկառուցել մետատվյալներ՝ դրա ծագումն ու հարակից տեղեկությունները ստուգելու համար։ C2PA-ն նախատեսված չէ միայն ԱԲ-ի ստեղծած բովանդակության համար։ Տեսախցիկներ արտադրողները, լրատվական կազմակերպությունները և այլ կողմեր նույնպես ներդնում են այս ստանդարտը՝ մեդիաբովանդակության աղբյուրն ու պատմությունը, այսինքն՝ ծագումը հավաստելու համար։

C2PA մետատվյալները կարող են տեղեկություններ պարունակել ֆայլը ստեղծած գործիքի կամ ծառայության, ստեղծման ժամանակի և դրա ծագման կամ պատմության այլ մանրամասների մասին։

Իմացեք ավելին C2PA-ի մասին։

Ի՞նչ է SynthID-ը և ի՞նչ հնարավորություն է այն տալիս։

SynthID-ը անտեսանելի ջրանշման տեխնոլոգիա է, որն ազդանշանն անմիջապես ներկառուցում է ստեղծված մեդիաբովանդակության մեջ։ Ի տարբերություն մետատվյալների՝ ազդանշանը հենց բովանդակության մաս է և կարող է պահպանվել որոշ խմբագրումներից կամ փոխակերպումներից հետո։

SynthID-ը C2PA մետատվյալների հետ մեկտեղ տրամադրում է ծագման լրացուցիչ ազդանշան։ Օրինակ՝ եթե ֆայլից հեռացվեն մետատվյալները, ներկառուցված ջրանիշը դեռ կարող է ազդանշան տալ, որ բովանդակությունը ստեղծվել է OpenAI-ի աջակցվող գործիքներով։

OpenAI-ի ստեղծած բովանդակության ո՞ր տեսակներն են ներառում ծագման ազդանշաններ։

OpenAI-ն բովանդակության տարբեր տեսակների համար օգտագործում է ծագման տարբեր ազդանշաններ։

Ընդգրկումը կարող է տարբեր լինել՝ ըստ արտադրանքի, մոդելի, արտահանման ուղու, ֆայլի տեսակի և բովանդակության ստեղծման ժամանակի։

Ինչո՞ւ են բովանդակության որոշ տեսակներ օգտագործում ծագման տարբեր ազդանշաններ։

Մեդիայի տարբեր ձևաչափերը ծագման մասին տեղեկությունները պահպանում են տարբեր եղանակներով։

Մետատվյալները, օրինակ՝ C2PA Content Credentials-ը, կարող են ավելի մանրամասն տեղեկություններ պարունակել, սակայն հարթակները, խմբագրման գործիքները կամ ֆայլերի փոխակերպումը երբեմն կարող են հեռացնել դրանք։

Ջրանիշները, օրինակ՝ SynthID-ը, ներկառուցվում են հենց ստեղծված մեդիաբովանդակության մեջ և կարող են ավելի լավ պահպանվել որոշ փոխակերպումների դեպքում։ Սակայն ջրանիշները սովորաբար ավելի քիչ համատեքստ են տրամադրում, քան մետատվյալները։

Տեխնիկական հնարավորության դեպքում երկու մոտեցումները պատշաճ կերպով համատեղելը նպաստում է ծագման ավելի հուսալի ազդանշանների տրամադրմանը։

Ինչպե՞ս կարող եմ OpenAI-ի գործիքներով ստեղծված պատկերին տեսանելի ջրանիշ ավելացնել։

Կարող եք մոդելին հուշել, որ ChatGPT-ի, Codex-ի և OpenAI API-ի միջոցով ստեղծված պատկերներում ներառի դրանց ծագումը բացահայտող տեսանելի նշում։ Օրինակ՝ պատկեր ստեղծելիս կարող եք ասել. «Include a visible OpenAI watermark in the image.»

Տեսանելի ջրանիշները տարբերվում են ներկառուցված ծագման ազդանշաններից, ինչպիսիք են C2PA մետատվյալները և SynthID ջրանիշները։ Դրանք կարող են դիտողներին օգնել հասկանալ, որ պատկերը ստեղծվել է OpenAI-ի գործիքներով, սակայն նույնը չեն, ինչ մեքենայաընթեռնելի ծագման ազդանշանները։

Ինչպե՞ս կարող եմ ստուգել՝ արդյոք բովանդակությունը ստեղծվել է OpenAI-ի գործիքներով։

Այցելեք openai.com/verify՝ ստուգելու, թե արդյոք աջակցվող պատկերը կամ ձայնային ֆայլը պարունակում է OpenAI-ի գործիքներով ստեղծված կամ արտահանված բովանդակության հետ կապված ծագման ազդանշաններ։

Աջակցվող ֆայլը վերբեռնելուց հետո գործիքը կփնտրի OpenAI-ի աջակցվող ծագման ազդանշաններ, օրինակ՝ SynthID ջրանիշ կամ OpenAI-ի հետ կապված վստահելի C2PA մանիֆեստ։

Եթե գործիքը հայտնաբերում է OpenAI-ի աջակցվող ծագման ազդանշան, դա ցույց է տալիս, որ բովանդակությունը ստեղծվել կամ արտահանվել է OpenAI-ի գործիքներով։

Ի՞նչ է նշանակում ստուգման արդյունքը։

Եթե ազդանշան է հայտնաբերվել, գործիքը կարող է օգնել հաստատել, որ վերբեռնված բովանդակությունը պարունակում է OpenAI-ի հետ կապված՝ աջակցվող ծագման ազդանշան։

Գործիքը չի հաստատում, որ բովանդակությունը ճշգրիտ է, չխմբագրված, օրինականորեն պատկանում է ներկայացնողին կամ ներկայացված է ճիշտ համատեքստում։ Այն նաև չի որոշում, թե ով և ինչու է ստեղծել բովանդակությունը։

Ի՞նչ է նշանակում, եթե ազդանշան չի հայտնաբերվել։

Եթե ազդանշան չի հայտնաբերվել, նշանակում է՝ գործիքը վերբեռնված ֆայլում չի գտել OpenAI-ի տրամադրած ծագման ազդանշաններ։

Բովանդակությունը, այնուամենայնիվ, կարող էր ստեղծված կամ արտահանված լինել OpenAI-ի միջոցով, եթե՝

• Բովանդակությունը ստեղծվել է նախքան ծագման ազդանշանների հասանելի դառնալը։

• Բովանդակությունը ստացվել է չաջակցվող արտադրանքից, մոդելից, արտահանման ուղուց կամ ֆայլի տեսակից։

• Մետատվյալները հեռացվել են վերբեռնման, ներբեռնման, խմբագրման, փոխակերպման կամ տարածման ընթացքում։

• Ջրանիշը թուլացել է սեղմման, եզրատման, աղմուկի, խմբագրումների, ձևաչափի փոխակերպման կամ այլ փոփոխությունների հետևանքով։

• Ձայնային հատվածը չափազանց կարճ է կամ էապես փոփոխվել է։

Նախատեսո՞ւմ եք աջակցել տեքստային արդյունքներին։

Եվրոպական հանձնաժողովի՝ ԱԲ-ի ստեղծած բովանդակության թափանցիկության վարքականոնի շրջանակում ստանձնած մեր պարտավորություններին համապատասխան՝ մեր նպատակն է ծագման ազդանշանները տարածել բոլոր եղանակների, այդ թվում՝ տեքստի վրա, որպեսզի ստանդարտների և գործիքների շարունակական զարգացմանը զուգընթաց հաճախորդներն ու մշակողները հստակ միջոցներ ունենան թափանցիկության իրենց պարտավորությունները կատարելու համար։ 

Կարո՞ղ է OpenAI Verify-ը հայտնաբերել այլ ԱԲ գործիքներով ստեղծված բովանդակությունը։

OpenAI Verify-ը նախատեսված է OpenAI-ի գործիքներով ստեղծված կամ արտահանված բովանդակության հետ կապված՝ աջակցվող ծագման ազդանշանները հայտնաբերելու համար։

Այն նախատեսված չէ այլ ԱԲ ծառայություններով ստեղծված բովանդակությունը հայտնաբերելու համար և կարող է չհայտնաբերել նաև OpenAI-ի ստեղծած բովանդակությունը, եթե համապատասխան ազդանշանը բացակայում է, չի աջակցվում կամ թուլացել է։

Կարո՞ղ են մշակողները API-ի միջոցով ստուգել բովանդակությունը։

Մշակողներն ու կազմակերպությունները կարող են OpenAI-ի ստուգման API-ով աջակցվող բովանդակության մեջ փնտրել OpenAI-ի ծագման ազդանշաններ և ստուգումը ներառել իրենց հավելվածներում կամ աշխատանքային հոսքերում։ API-ի հասանելիության մասին տեղեկությունների համար այցելեք openai.com/verify։ Օգտագործման ավելի բարձր սահմանաչափերի կարիք ունեցող կազմակերպությունները կարող են դիմել դրանք բարձրացնելու համար։ Լրացուցիչ տեղեկությունների համար այցելեք openai.com/verify։