კამპანიების რედაქტირება

ამჟამად რეკლამების მმართველში კამპანიების შეცვლის ორი ძირითადი გზა არსებობს.

• უშუალო რედაქტირება (სწრაფი განახლებისთვის): ცვლილებები სწრაფად შეიტანეთ პირდაპირ რეკლამების მმართველში. გამოიყენეთ ეს გზა სწრაფი განახლებისთვის, მაგალითად, ბიუჯეტის შესაცვლელად, რეკლამის ტექსტის გასაახლებლად ან კამპანიების შესაჩერებლად.

• ერთიანად რედაქტირება (რეკომენდებულია მასშტაბური ცვლილებებისთვის): განაახლეთ კამპანიის მონაცემები რეკლამის სქემის შაბლონში და ხელახლა ატვირთეთ. გამოიყენეთ ეს გზა სტრუქტურული ცვლილებებისთვის, მაგალითად, კონტექსტური მინიშნებების, რეკლამის ტექსტის ან სამიზნე გვერდების მასშტაბურად გასაახლებლად.

უშუალო რედაქტირება

უშუალო რედაქტირება საუკეთესოა სწრაფი, ერთჯერადი განახლებისთვის, რომელიც კამპანიის სქემის შაბლონის შეცვლას არ მოითხოვს.

არსებული კამპანიების, რეკლამების ჯგუფების ან რეკლამების რედაქტირება

მიჰყევით ამ ნაბიჯებს მცირე ცვლილებებისთვის, მაგალითად, ბიუჯეტის შესაცვლელად, რეკლამის ტექსტის ან გამოსახულების გასაახლებლად.

1. მიიტანეთ კურსორი კამპანიასთან, რეკლამების ჯგუფთან ან რეკლამასთან.

2. დააწკაპუნეთ სამწერტილიან მენიუზე.

3. აირჩიეთ „რედაქტირება“.

4. შეიტანეთ ცვლილებები უშუალოდ.

5. აირჩიეთ „შენახვა“.

ახალი რეკლამების ჯგუფების ან რეკლამების შექმნა

მიჰყევით ამ ნაბიჯებს, თუ გსურთ, არსებული კამპანიის სტრუქტურას სწრაფად დაამატოთ ახალი ობიექტები.

• რეკლამების ახალი ჯგუფის შესაქმნელად: გახსენით კამპანია მასში შემავალ რეკლამების ჯგუფებზე წვდომისთვის, შემდეგ დააწკაპუნეთ „შექმნაზე“ და „რეკლამების ჯგუფის შექმნაზე“.

• ახალი რეკლამის შესაქმნელად: გახსენით რეკლამების ჯგუფი მასში შემავალ რეკლამებზე წვდომისთვის, შემდეგ დააწკაპუნეთ „შექმნაზე“ და „რეკლამის შექმნაზე“.

ერთიანად განახლება

ერთიანად რედაქტირება საუკეთესოა რამდენიმე კამპანიის, რეკლამების ჯგუფის ან რეკლამის ერთდროულად შესაცვლელად.

არსებული კამპანიების, რეკლამების ჯგუფების ან რეკლამების განახლება

მიჰყევით ამ ნაბიჯებს, თუ გსურთ არსებული კამპანიების, რეკლამების ჯგუფების ან რეკლამების მასშტაბურად შეცვლა.

1. აირჩიეთ კამპანიები, რეკლამების ჯგუფები ან რეკლამები, რომელთა განახლებაც გსურთ.

2. დააწკაპუნეთ „რედაქტირებისთვის ექსპორტზე“. ჩამოიტვირთება ფაილი, რომელიც შეიცავს არჩეულ კამპანიებს, რეკლამების ჯგუფებს ან რეკლამებს რედაქტირებისთვის.

3. ცვლილებები შეიტანეთ უშუალოდ ექსპორტირებულ სქემის ფაილში.

4. რეკლამების მმართველში დააწკაპუნეთ „შექმნაზე“, შემდეგ — „ერთიანად ატვირთვაზე“.

5. აირჩიეთ ობიექტის შესაბამისი ტიპი: „კამპანია“, „რეკლამების ჯგუფი“ ან „რეკლამა“ და ატვირთეთ განახლებული ფაილი.

ფაილის ატვირთვის შემდეგ ცვლილებები აისახება არჩეულ კამპანიებში, რეკლამების ჯგუფებსა თუ რეკლამებში.

არსებულ კამპანიებში რეკლამების ახალი ჯგუფების ან რეკლამების შექმნა

მიჰყევით ამ ნაბიჯებს, თუ გსურთ არსებული კამპანიების გაფართოება რეკლამების ახალი ჯგუფების ან რეკლამების დამატებით.

1. აირჩიეთ რეკლამების არსებული ჯგუფები იმ კამპანიაში, რომელშიც ახალი ჯგუფების დამატება გსურთ, ან აირჩიეთ არსებული რეკლამები იმ ჯგუფში, რომელშიც ახალი რეკლამების დამატება გსურთ.

2. დააწკაპუნეთ „რედაქტირებისთვის ექსპორტზე“. ჩამოიტვირთება ფაილი, რომელსაც შეგიძლიათ რეკლამების სხვა ჯგუფები ან რეკლამები დაამატოთ.

3. სქემის ფაილში დაამატეთ ახალი სტრიქონები მშობელი ობიექტების სწორი ID-ებით, ხოლო ახალი ობიექტის ID ცარიელი დატოვეთ.

4. რეკლამების მმართველში დააწკაპუნეთ „შექმნაზე“, შემდეგ — „ერთიანად ატვირთვაზე“.

5. აირჩიეთ ობიექტის შესაბამისი ტიპი: „კამპანია“, „რეკლამების ჯგუფი“ ან „რეკლამა“ და ატვირთეთ განახლებული ფაილი.

შეიქმნება რეკლამების ახალი ჯგუფები და რეკლამები, რომლებიც მითითებული ID-ების მიხედვით დაუკავშირდება კამპანიის არსებულ სტრუქტურას.

ხშირი კითხვები რედაქტირებისა და ერთიანად ატვირთვის შესახებ

რატომ უნდა გავიტანო მონაცემები რედაქტირებამდე?

„რედაქტირებისთვის ექსპორტი“ გაწვდით მიმდინარე ID-ებსა და ველების მნიშვნელობებს, რომლებიც რეკლამების მმართველს არსებული კამპანიების, რეკლამების ჯგუფების ან რეკლამების გასაახლებლად სჭირდება. შეძლებისდაგვარად, ყოველთვის ახლად ექსპორტირებული ფაილით დაიწყეთ, განსაკუთრებით მაშინ, თუ ფაილის ბოლო ჩამოტვირთვის შემდეგ სხვა მომხმარებლებს ანგარიშში ცვლილებები შეიძლება შეეტანათ.

რომელი ID-ებია საჭირო ერთიანად რედაქტირებისთვის?

არსებული ობიექტის გასაახლებლად მის სტრიქონში დატოვეთ ამ ობიექტის ID. არსებულ კამპანიაში რეკლამების ახალი ჯგუფის დასამატებლად დააკოპირეთ არსებული კამპანიის ID ახალი ჯგუფის სტრიქონში, ხოლო რეკლამების ჯგუფის ID ცარიელი დატოვეთ. რეკლამების არსებულ ჯგუფში ახალი რეკლამის დასამატებლად დააკოპირეთ არსებული ჯგუფის ID ახალი რეკლამის სტრიქონში, ხოლო რეკლამის ID ცარიელი დატოვეთ.

შემიძლია რეკლამების ახალი ჯგუფებისა და რეკლამების ერთი ატვირთვით დამატება?

გამოიყენეთ ობიექტის ის ტიპი და შაბლონი, რომელსაც ერთიანად ატვირთვის პროცესი მოითხოვს. თუ რამდენიმე ტიპის ობიექტს ამატებთ, დაიცავით რეკლამების მმართველში ატვირთვის თანმიმდევრობა და დარწმუნდით, რომ ახალ შვილობილ სტრიქონებში მითითებულია არსებული მშობელი ობიექტის ID ან უკვე შექმნილი მშობელი ობიექტი.

კონტექსტური მინიშნებები ერთიანდება თუ ჩანაცვლდება?

რეკლამების ჯგუფის ერთიანად განახლებისას მიუთითეთ კონტექსტური მინიშნებების სრული სია, რომელიც გსურთ, ამ ჯგუფმა გამოიყენოს. გაითვალისწინეთ, რომ ატვირთული მნიშვნელობა ამ ველის არსებულ მნიშვნელობას ჩაანაცვლებს და არ დაემატება მას.

შემიძლია რედაქტირებისას მიზნის ან ბიუჯეტის ტიპის შეცვლა?

კამპანიის მიზნის შესაცვლელად შექმენით ახალი კამპანია სასურველი მიზნით. შეგიძლიათ კამპანიის მთლიანი ბიუჯეტიდან დღიურ ბიუჯეტზე გადასვლა, თუმცა ამ კამპანიას მთლიან ბიუჯეტზე ვეღარ დააბრუნებთ.

ერთიანად ატვირთვის ფაილის შემოწმების შესახებ დეტალებისთვის იხილეთ ერთიანად ატვირთვისთვის კამპანიის სქემის საკონტროლო სია.