შექმენით კამპანიები პროდუქტის ფიდებიდან

პროდუქტების ფიდზე დაფუძნებული კამპანიებით საცალო მოვაჭრე რეკლამის განმთავსებლებს შეუძლიათ რეკლამების მმართველში ატვირთონ პროდუქტების ფიდი და ამ კატალოგის საფუძველზე შექმნან რეკლამები. პროდუქტების ფიდები გაგიმარტივებთ ChatGPT-რეკლამებში თქვენი კატალოგის მეტი პროდუქტის ჩართვას, რეკლამების მასშტაბურად შექმნასა და მომხმარებლებისთვის შესაბამისი პროდუქტების შეთავაზებას ძიების, შედარებისა და გადაწყვეტილების მიღებისას. პროდუქტების ფიდებიდან შექმნილი რეკლამები ჩვენს პროგრამაში დღემდე ყველაზე შედეგიან რეკლამებს შორისაა.

რატომ უნდა შექმნათ კამპანია პროდუქტების ფიდებიდან?

ფიდზე დაფუძნებული კამპანიები განკუთვნილია საცალო მოვაჭრე რეკლამის განმთავსებლებისთვის, რომლებსაც პროდუქტების ფართო ან ხშირად ცვალებადი კატალოგები აქვთ. მათი დახმარებით შეძლებთ:

• ფიდის ერთი ატვირთვით მასშტაბურად შექმნათ კამპანიები თქვენი პროდუქტების კატალოგიდან

• მომხმარებლებს შესთავაზოთ შესაბამისი პროდუქტები მაშინ, როცა ისინი მათთვის ყველაზე სასარგებლო შეიძლება იყოს

• რეკლამებში გამოყენებული პროდუქტების დეტალები, ხელმისაწვდომობის ინფორმაცია და მეტამონაცემები მუდმივად განახლებული გქონდეთ

რეკლამის განმთავსებლები, რომლებიც პროდუქტების ფიდებს იყენებენ, პლატფორმაზე საუკეთესო შედეგების მქონე განმთავსებლებს შორის არიან. ვინაიდან ფიდის რეკლამები პროდუქტების სტრუქტურირებული მონაცემების საფუძველზე იქმნება, მათი დახმარებით უფრო მარტივად შეძლებთ უფრო მასშტაბური, მომხმარებლის ინტერესებთან მეტად შესაბამისი კამპანიების მართვასა და რეკლამების მმართველში შედეგების ზრდას.

დაწყებამდე

გასათვალისწინებელია რამდენიმე საკითხი:

• თქვენი პროდუქტების ფიდი უნდა შეესაბამებოდეს ჩვენს ფიდის სპეციფიკაციებს

• ამ ბეტა-ეტაპზე თქვენი ფიდიდან პროდუქტების გამოყენება მხოლოდ რეკლამებში იქნება შესაძლებელი. ისინი ChatGPT-ის ორგანულ საუბრებში არ გამოჩნდება, თუმცა შესაძლოა ეს შესაძლებლობა მომავალში შემოგთავაზოთ 

• პროდუქტების რეკლამები იყენებს ფორმატებს, რომლებიც სპეციალურად თქვენი კატალოგის პროდუქტების წარმოსაჩენადაა შექმნილი და მოიცავს ისეთ დეტალებს, როგორიცაა პროდუქტის სურათები, დასახელებები, ვარსკვლავებით შეფასებები, ფასები, ფასდაკლებული ფასები და თქვენი ბრენდი

ნაბიჯი 1: შექმენით პროდუქტების ფიდი

• რეკლამების მმართველში გადადით ჩანართზე „ხელსაწყოები“

• აირჩიეთ „ფიდები“

• დააწკაპუნეთ „ფიდის შექმნაზე“

• ახალი პროდუქტების ფიდის შესაქმნელად მიჰყევით მითითებებს

ნაბიჯი 2: შემოიტანეთ პროდუქტები

• ფიდის მწკრივში გახსენით სამწერტილიანი მენიუ

• აირჩიეთ ერთ-ერთი:

• CSV ან TXT ფაილის ატვირთვა: საუკეთესო ვარიანტია დასაწყებად ან დროდადრო ხელით განახლებისთვის.

• ჰოსტირებული URL: საუკეთესო ვარიანტია, თუ თქვენი პროდუქტების კატალოგი მუდმივ HTTPS მისამართზეა ხელმისაწვდომი.

• SFTP კავშირი: საუკეთესო ვარიანტია ტექნიკური გუნდებისთვის, რომლებიც სერვერებს შორის ატვირთვების ავტომატიზაციას ახდენენ.

• SFTP-ით ატვირთვის სახელმძღვანელო

• პროდუქტების ჩანაწერებს მოქმედების ვადა 2 კვირაში ეწურება, ამიტომ გირჩევთ გამოიყენოთ ჰოსტირებული URL ან SFTP-ით ავტომატური ატვირთვები.

ფიდის ფორმატირებისას იხელმძღვანელეთ ფიდის სპეციფიკაციით. რეკლამების მმართველის მეშვეობით შექმნილ ფიდებში პროდუქტები ნაგულისხმევად დაშვებულია რეკლამებში გამოსაყენებლად, გარდა იმ შემთხვევისა, როცა პროდუქტისთვის რეკლამაში გამოყენების დაშვებას აშკარად აქვს მინიჭებული მნიშვნელობა false.

ნაბიჯი 3: ატვირთეთ და შეამოწმეთ ფიდი

• დაელოდეთ, სანამ რეკლამების მმართველი ფიდს დაამუშავებს. ფიდის ზომის მიხედვით, ამას შეიძლება რამდენიმე წუთიდან რამდენიმე საათამდე დასჭირდეს

• დამუშავების მიმდინარეობისა და შეცდომების სანახავად შეამოწმეთ „ატვირთვების ისტორია“ 

ნაბიჯი 4: შექმენით კამპანია თქვენი ფიდიდან

• რეკლამების მმართველში გადადით ჩანართზე „კამპანიები“

• შექმენით ახალი კამპანია

• კამპანიის ტიპის ჩამოსაშლელ მენიუში აირჩიეთ „პროდუქტების ფიდი“

• დაასრულეთ კამპანიის პარამეტრების დაყენება სახელმძღვანელოს კამპანიების შექმნა ChatGPT-რეკლამებისთვის დახმარებით. პროდუქტების ფიდზე დაფუძნებულ ახალ კამპანიებში გეოგრაფიული ტარგეტინგი და გამორიცხვა მხოლოდ ქვეყნის დონეზეა შესაძლებელი.

ნაბიჯი 5: შექმენით რეკლამების ჯგუფი და აირჩიეთ პროდუქტები

• შექმენით რეკლამების ჯგუფი კამპანიისთვის

• აირჩიეთ პროდუქტების ფიდი, რომლის გამოყენებაც გსურთ

• პროდუქტების ფილტრებით განსაზღვრეთ, რომელი პროდუქტების გამოყენება შეიძლება რეკლამების ჯგუფში

• რეკლამების მმართველში ნაჩვენები პროდუქტების რაოდენობით გადაამოწმეთ, რამდენი ატვირთული პროდუქტი აკმაყოფილებს თქვენი ფილტრების პირობებს

• სექციაში ფსონის სტრატეგია აირჩიეთ შედეგების მაქსიმიზაცია. ეს ვარიანტი ნაგულისხმევადაა არჩეული ახალი რეკლამების ჯგუფებისთვის, რომლებიც შესაბამის მოთხოვნებს აკმაყოფილებს. ChatGPT-რეკლამები ავტომატურად არეგულირებს თქვენს ფსონებს, რათა თქვენი ბიუჯეტის ფარგლებში რაც შეიძლება მეტი დაწკაპუნება ან კონვერსია მიიღოთ, კამპანიის არჩეული მიზნის შესაბამისად. მეტი ინფორმაცია იხილეთ სტატიაში ფსონის სტრატეგია „შედეგების მაქსიმიზაცია“.

თუ არსებული ფილტრები პროდუქტების სასურველი წესით დასაჯგუფებლად საკმარისი არ არის, თქვენს ფიდში გამოიყენეთ ველი ads_metadata. მაგალითად, შეგიძლიათ დაამატოთ ისეთი მნიშვნელობები, როგორიცაა bidding_tier ან product_line, შემდეგ კი მათი დახმარებით დააჯგუფოთ პროდუქტები რეკლამების ჯგუფის შესაქმნელად.

თითოეული პროდუქტის ads_metadata ველში დაამატეთ მორგებული იარლიყები, შემდეგ კი რეკლამების ჯგუფის შექმნისას პროდუქტების ფილტრებით აირჩიეთ პროდუქტები, რომელთა გამოყენებაც ამ ჯგუფს შეეძლება. სხვადასხვა ფილტრით შეგიძლიათ ერთი და იმავე კატალოგიდან პროდუქტების სხვადასხვა ნაკრები შეარჩიოთ. მაგალითად, ფილტრი, რომელიც ამოწმებს, უდრის თუ არა custom_label_0 მნიშვნელობას WA, ამ იარლიყის მქონე პროდუქტებს ირჩევს; თავად იარლიყი რეკლამის ჩვენებას მხოლოდ ვაშინგტონში მყოფი მომხმარებლებით არ ზღუდავს. დეველოპერებისთვის განკუთვნილი მითითებები იხილეთ გვერდზე პროდუქტების ნაკრები და ფილტრები.

ნაბიჯი 6: შექმენით რეკლამის შაბლონი

• შექმენით რეკლამის შაბლონი ჯგუფისთვის

• რეკლამის შაბლონი გამოიყენება იმ პროდუქტების რეკლამირების საფუძვლად, რომლებიც რეკლამების ჯგუფის ფილტრების პირობებს აკმაყოფილებს

• ამჟამად რეკლამის შაბლონში მხოლოდ სურათის ველის არჩევაა შესაძლებელი

• თითოეული რეკლამების ჯგუფისთვის მხოლოდ ერთი რეკლამის შაბლონია საჭირო

• შეამოწმეთ სანიმუშო პროდუქტის წინასწარი ხედი და დარწმუნდით, რომ დასახელებები და აღწერები სათანადოდ ჩანს

ნაბიჯი 7: შეამოწმეთ და გაუშვით

კამპანიის გაგზავნამდე დარწმუნდით, რომ:

• არჩეულია სწორი ფიდი

• პროდუქტების რაოდენობა შეესაბამება პროდუქტების სასურველ ნაკრებს

• პროდუქტების დასახელებები, აღწერები, სურათები და სამიზნე გვერდები სათანადოდ ჩანს

• თქვენი რეკლამის შაბლონი წინასწარ ხედში სწორად ჩანს

• კამპანიის, რეკლამების ჯგუფის, ბიუჯეტის, ფსონის სტრატეგიისა და ტარგეტინგის პარამეტრები სრულადაა დაყენებული.

როცა დარწმუნდებით, რომ ყველაფერი სწორადაა, გაგზავნეთ კამპანია განსახილველად და გაუშვით ფიდზე დაფუძნებული კამპანია. 

რას აჩვენებს ჩანართი „პროდუქტები“

ჩანართში „პროდუქტები“ ანგარიშგების მონაცემები ჩანს. მასში არ ჩანს ყველა პროდუქტი, რომელიც ატვირთულია ან რეკლამებში გამოსაყენებლადაა დაშვებული. პროდუქტი იქ მას შემდეგ გამოჩნდება, რაც პროდუქტების ფიდზე დაფუძნებული აქტიური კამპანიიდან მისი ჩვენების მონაცემები შეგროვდება და ანგარიშგებაში ხელმისაწვდომი გახდება.

თუ თქვენი კამპანია არ დაწყებულა, მისი დაწყება სამომავლოდაა დაგეგმილი ან რეკლამების ჩვენება ჯერ არ მომხდარა, ჩანართი „პროდუქტები“ შეიძლება ცარიელი იყოს ან მასში უფრო ნაკლები პროდუქტი ჩანდეს, ვიდრე თქვენს ფიდშია. ეს აუცილებლად არ ნიშნავს, რომ ფიდი ვერ აიტვირთა ან პროდუქტების არჩევა თუ ჩვენება შეუძლებელია.

კამპანიის დაყენებისას, რეკლამების ჯგუფის შექმნის პროცესში ნაჩვენები პროდუქტების რაოდენობით გადაამოწმეთ, რამდენი ატვირთული პროდუქტია მზად საჩვენებლად და აკმაყოფილებს არჩეული ფილტრების პირობებს. რეკლამების ჩვენების დაწყების შემდეგ პროდუქტების მწკრივების პირველად გამოჩენას ჩანართში „პროდუქტები“ შესაძლოა შვიდ საათამდე დასჭირდეს. მონაცემების პირველად ასახვის ეს ვადა კამპანიის მეტრიკების განახლებისგან განსხვავდება: ჩვენებები, დაწკაპუნებები და CTR, ჩვეულებრივ, დაახლოებით ყოველ 15 წუთში ახლდება, ხარჯვის მონაცემები კი დაახლოებით 7–8 საათის დაგვიანებით აისახება.

თუ კამპანიის რეკლამების ჩვენების შემდეგ მოსალოდნელი პროდუქტები კვლავ არ ჩანს, დაუკავშირდით მხარდაჭერის გუნდს და მიუთითეთ:

• სარეკლამო ანგარიშის ID

• ფიდის ID

• კამპანიისა და რეკლამების ჯგუფის სახელები

• თარიღების დიაპაზონი და სასაათო სარტყელი

• პროდუქტების ID-ების მაგალითები

• ჩანართის „პროდუქტები“ ეკრანის სურათი