კონვერსიების ოპტიმიზაციის კამპანიები
გამოიყენეთ მიზანი „კონვერსიების ოპტიმიზაცია“, თუ გსურთ, რომ ChatGPT-რეკლამების ჩვენება კონკრეტულ კონვერსიის მოვლენაზე იყოს ოპტიმიზებული, მაგალითად, შეძენაზე, რეგისტრაციაზე, პოტენციური კლიენტის მიერ საკონტაქტო მონაცემების გაგზავნაზე ან სხვა მხარდაჭერილ სტანდარტულ კონვერსიის მოვლენაზე. ამ მიზნის არჩევის შემდეგ აირჩიეთ, ჩვენებების მიხედვით გადაიხდით თუ ვალიდური დაწკაპუნებების მიხედვით.
დაწკაპუნებებით დარიცხვისას იხდით ვალიდური დაწკაპუნებებისთვის, ხოლო რეკლამის ჩვენება ოპტიმიზებულია იმ კონვერსიებზე, რომლებიც რეკლამაზე დაწკაპუნების შემდეგ ხდება. ჩვენებებით დარიცხვისას იხდით რეკლამის ჩვენებებისთვის, ხოლო ჩვენება ოპტიმიზებულია კრიტერიუმების შესაბამისი კონვერსიების უფრო ფართო სპექტრზე, მათ შორის რეკლამის ნახვითა და მასზე დაწკაპუნებით განპირობებულ კონვერსიებზე.
ჩვენებებით დარიცხვა რეკლამის განმთავსებლებს ეხმარება, უკეთ გაითვალისწინონ, როგორ აღმოაჩენენ, აფასებენ და ირჩევენ ადამიანები პროდუქტებს ChatGPT-ის მეშვეობით. ადამიანმა შეიძლება რეკლამა იდეის შესწავლისას ნახოს, მოგვიანებით დაბრუნდეს და კონვერსია რეკლამაზე უშუალოდ დაწკაპუნების გარეშე განახორციელოს. რეკლამის ჩვენება კვლავ თქვენს კონვერსიის მიზანზეა ორიენტირებული, ხოლო ოპტიმიზაციისა და გაზომვისას შესაძლებელია ამ შედეგის ხელშემწყობი მეტი მომენტის გათვალისწინება.
დაწყებამდე
სანამ შექმნით კამპანიას მიზნით „კონვერსიების ოპტიმიზაცია“, დარწმუნდით, რომ:
თქვენს სარეკლამო ანგარიშზე კონვერსიების აღრიცხვა დაყენებულია. მისი დაყენება შეგიძლიათ კონვერსიების API-ის ან/და JavaScript პიქსელის მეშვეობით.
ხელმისაწვდომია მინიმუმ ერთი მხარდაჭერილი სტანდარტული კონვერსიის მოვლენა. მიზნისთვის „კონვერსიების ოპტიმიზაცია“ მორგებული კონვერსიის მოვლენები ამჟამად მხარდაჭერილი არ არის.
იცით, კონვერსიის რომელ მოვლენაზე გსურთ კამპანიის ოპტიმიზაცია.
მზად ხართ, მიზნის შესაცვლელად შექმნათ ახალი კამპანია ან არსებული კამპანიის ასლი.
1. შექმენით კამპანია ან მისი ასლი
რეკლამების მმართველში შექმენით ახალი კამპანია და ველში „კამპანიის მიზანი“ აირჩიეთ „კონვერსიების ოპტიმიზაცია“. არსებული კამპანიის მიზანზე „კონვერსიების ოპტიმიზაცია“ გადასაყვანად შექმენით მისი ასლი და ასლისთვის აირჩიეთ „ჩვენებები“.
2. აირჩიეთ დარიცხვის მეთოდი: ჩვენებები ან დაწკაპუნებები
ჩვენებებით დარიცხვისთვის აირჩიეთ „ჩვენებები“. თანხა გერიცხებათ რეკლამის ჩვენებების მიხედვით, ხოლო ჩვენება კვლავ კონვერსიის თქვენ მიერ არჩეულ მოვლენაზეა ორიენტირებული.
ვარიანტი „ჩვენებები“ მეტ კონვერსიაზე ოპტიმიზაციას უზრუნველყოფს, მათ შორის ნახვებითა და დაწკაპუნებებით განპირობებულ კონვერსიებზე. ვარიანტის „დაწკაპუნებები“ არჩევა კონვერსიების რაოდენობას შეამცირებს.
დაწკაპუნებებით დარიცხვისთვის აირჩიეთ „დაწკაპუნებები“. თანხა გერიცხებათ ვალიდური დაწკაპუნებებისთვის, ხოლო რეკლამის ჩვენება ოპტიმიზებულია იმ კონვერსიებზე, რომლებიც რეკლამაზე დაწკაპუნებას მოჰყვება.
კამპანიის შექმნის შემდეგ მის მიზანსა და დარიცხვის მეთოდს უშუალოდ ამავე კამპანიაში ვეღარ შეცვლით. კონვერსიებზე ოპტიმიზებული კამპანიის დაწკაპუნებებით დარიცხვიდან ჩვენებებით დარიცხვაზე გადასაყვანად შექმენით კამპანიის ასლი და ასლისთვის აირჩიეთ „ჩვენებები“. სხვა ცვლილებებისთვის შექმენით ახალი კამპანია.
3. აირჩიეთ კონვერსიის მოვლენა
დარიცხვის მეთოდის არჩევის შემდეგ აირჩიეთ კონვერსიის მოვლენა, რომლისთვისაც გსურთ ოპტიმიზაცია. ეს არის შემდგომი ქმედება, მაგალითად, შეძენა, რეგისტრაცია, პოტენციური კლიენტის მიერ საკონტაქტო მონაცემების გაგზავნა ან სხვა მხარდაჭერილი სტანდარტული კონვერსიის მოვლენა, რომლითაც ChatGPT-რეკლამები ჩვენებისას იხელმძღვანელებს.
თითოეული კამპანია მიზნით „კონვერსიების ოპტიმიზაცია“ იყენებს კონვერსიის ერთ არჩეულ მოვლენას. კამპანიის შექმნის შემდეგ კონვერსიის მოვლენის შეცვლა შეუძლებელია. სხვა მოვლენაზე ოპტიმიზაციისთვის შექმენით ახალი კამპანია.
4. განსაზღვრეთ კამპანიის ბიუჯეტი, თარიღები და მდებარეობები
განსაზღვრეთ კამპანიის ბიუჯეტი, დაწყებისა და დასრულების თარიღები და სამიზნე მდებარეობები ისევე, როგორც სხვა მიზნების მქონე კამპანიებისთვის. ისეთი პარამეტრები აირჩიეთ, რომ კამპანიას ეფექტიანობის შესაფასებლად ღირებული მონაცემების შესაგროვებლად საკმარისი დრო და ბიუჯეტი ჰქონდეს.
5. შექმენით რეკლამების ჯგუფები და განსაზღვრეთ შეთავაზებების მართვის პარამეტრები
შექმენით რეკლამების ჯგუფები და რეკლამები ჩვეული წესით. იხელმძღვანელეთ შეთავაზებების სტრატეგიითა და მართვის პარამეტრებით, რომლებიც რეკლამების მმართველში თქვენ მიერ არჩეული დარიცხვის მეთოდისთვის არის ნაჩვენები.
კამპანიებისთვის მიზნით „კონვერსიების ოპტიმიზაცია“, შეთავაზების ზედა ზღვარი არის მაქსიმალური თანხა, რომლის შეთავაზებაც კონვერსიისთვის გსურთ. სისტემა აუქციონზე შეთავაზების ოდენობას კონვერსიის პროგნოზირებული ალბათობით განსაზღვრავს და ამავე დროს ჩვენებას კონვერსიის თქვენ მიერ არჩეულ მოვლენაზე ოპტიმიზებს. დარიცხვა კვლავ თქვენ მიერ არჩეული მეთოდით ხდება, ხოლო თითო კონვერსიის რეალურ ღირებულებას აუქციონი განსაზღვრავს.
6. გაუშვით კამპანია და აკონტროლეთ ეფექტიანობა
კამპანიებისთვის მიზნით „კონვერსიების ოპტიმიზაცია“, რეკლამების მმართველი კონვერსიების ანგარიშებთან ერთად ჩვენებისა და დანახარჯების სტანდარტულ მაჩვენებლებსაც ასახავს. ეფექტიანობის შესაფასებლად შეგიძლიათ რეკლამების მმართველში ხელმისაწვდომი ანგარიშების სხვადასხვა ხედი გამოიყენოთ.
დაწკაპუნებებით დარიცხვისას საშუალო CPC არის ხარჯის ძირითადი მაჩვენებელი, რომელიც ასახავს, რამდენს იხდით თითო დაწკაპუნებისთვის. რადგან ჩვენება კონვერსიის თქვენ მიერ არჩეულ მოვლენაზეა ოპტიმიზებული, „კონვერსიები“ შედეგის მთავარი მაჩვენებელია, რომელსაც უნდა აკონტროლებდეთ.
ჩვენებებით დარიცხვისას საშუალო CPM და ჩვენებები დარიცხვისა და რეკლამის ჩვენების მნიშვნელოვანი მაჩვენებლებია. რადგან ჩვენება კონვერსიებზეა ოპტიმიზებული, აკონტროლეთ კონვერსიების რაოდენობა, თითო კონვერსიის ღირებულება და, თუ ხელმისაწვდომია, დაწკაპუნებისა და ნახვის შემდგომი კონვერსიების ანგარიშები.
ეფექტიანობის შეფასებისას კონვერსიების რაოდენობა განიხილეთ დანახარჯებთან, ჩვენებებთან, დაწკაპუნებებთან და კამპანიისთვის არჩეულ ატრიბუციის პერიოდებთან ერთად. თითო კონვერსიის ღირებულების გამოთვლა ასევე შეგიძლიათ დანახარჯის კონვერსიების რაოდენობაზე გაყოფით.
რჩევები ოპტიმიზაციისთვის
აირჩიეთ კონვერსიის მოვლენა, რომელიც ყველაზე უკეთ ასახავს თქვენი კამპანიის მიზანს.
გამოიყენეთ კონვერსიის მოვლენა, რომელიც საკმარის მონაცემებს იძლევა. მოვლენებმა, რომლებიც მეტისმეტად იშვიათად ხდება, შეიძლება ეფექტიანობის შეფასება გაართულოს.
უზრუნველყავით კონვერსიების აღრიცხვის გამართული მუშაობა. არასრულმა ან არასწორად დაყენებულმა აღრიცხვამ შეიძლება ანგარიშგებისა და ოპტიმიზაციის ეფექტიანობა შეამციროს.
ჩვენებებით დარიცხვისას, თუ ხელმისაწვდომია, გაეცანით როგორც დაწკაპუნების, ისე ნახვის შემდგომი კონვერსიების ანგარიშებს, რათა გაიგოთ, რა წვლილი შეაქვს რეკლამის ნახვებსა და დაწკაპუნებებს შედეგებში.
აკონტროლეთ ეფექტიანობა და კამპანიის ჩვენებისა და შედეგების მიხედვით შეცვალეთ შეთავაზების ზედა ზღვარი, შეთავაზებების სტრატეგია ან მათი მართვის ხელმისაწვდომი პარამეტრები. ამჟამად შეთავაზების რეკომენდებული ოდენობა განსაზღვრული არ არის.
სანამ შეთავაზებებს, ბიუჯეტებს ან სარეკლამო მასალებს მნიშვნელოვნად შეცვლით, ეფექტიანობა საკმარისი მოცულობის მონაცემებზე დაყრდნობით შეაფასეთ.
ვებსაიტის პიქსელისთვის ჩართეთ ავტომატური გაფართოებული დამთხვევა, რათა გააუმჯობესოთ კონვერსიების შესაბამის მომხმარებლებთან დაკავშირება და კამპანიის ოპტიმიზაციისთვის დამატებითი საზომი სიგნალები მიიღოთ.
ხშირად დასმული კითხვები
კონვერსიის რომელი ტიპის მოვლენებია მხარდაჭერილი მიზნისთვის „კონვერსიების ოპტიმიზაცია“?
მიზანი „კონვერსიების ოპტიმიზაცია“ ამჟამად თითო კამპანიაზე კონვერსიის ერთ სტანდარტულ მოვლენას უჭერს მხარს. მორგებული კონვერსიის მოვლენები ამჟამად მხარდაჭერილი არ არის.
შემიძლია არსებული კამპანია კონვერსიების ოპტიმიზაციის კამპანიის შესაქმნელად გამოვიყენო?
არსებული კამპანიის მიზანს უშუალოდ ამავე კამპანიაში ვერ შეცვლით. კონვერსიებზე ოპტიმიზებული კამპანიის დაწკაპუნებებით დარიცხვიდან ჩვენებებით დარიცხვაზე გადასაყვანად შექმენით კამპანიის ასლი და ასლისთვის დარიცხვის მეთოდად აირჩიეთ „ჩვენებები“.
ნიშნავს თუ არა მიზანი „კონვერსიების ოპტიმიზაცია“, რომ თითო კონვერსიისთვის ვიხდი?
არა. მიზანი „კონვერსიების ოპტიმიზაცია“ რეკლამის ჩვენებას კონვერსიის თქვენ მიერ არჩეულ მოვლენაზე ოპტიმიზებს, თუმცა დარიცხვა არჩეულ მეთოდზეა დამოკიდებული. დაწკაპუნებებით დარიცხვისას თანხა ვალიდური დაწკაპუნებებისთვის გერიცხებათ. ჩვენებებით დარიცხვისას თანხა რეკლამის ჩვენებებისთვის გერიცხებათ.
რატომ უნდა გამოვიყენო ჩვენებებით დარიცხვა, თუ ჩემი მიზანი კონვერსიებია?
დაწკაპუნება მომხმარებლის მიერ განვლილი გზის მხოლოდ ერთ ნაწილს ასახავს, მომხმარებლები კი ბრენდთან შეხებისთანავე ყოველთვის არ მოქმედებენ. ჩვენებებით დარიცხვას შეუძლია მეტ კონვერსიაზე ოპტიმიზაცია, მათ შორის რეკლამის ნახვებითა და დაწკაპუნებებით განპირობებულ, კრიტერიუმების შესაბამის კონვერსიებზე, ხოლო თანხა კვლავ რეკლამის ჩვენებების მიხედვით ირიცხება.
ჩვენებებით დარიცხვისას დაწკაპუნებებს კვლავ ექნება მნიშვნელობა?
დიახ. დაწკაპუნებები ინტერესის ღირებულ სიგნალად რჩება და მათ შემდგომ კონვერსიებს კვლავ აქვს მნიშვნელობა. ჩვენებებით დარიცხვა აფართოებს კრიტერიუმების შესაბამისი კონვერსიის სიგნალების სპექტრს, რომელთა გათვალისწინებაც ჩვენებისას შეიძლება, მათ შორის რეკლამის ნახვებისა და დაწკაპუნებების შემდგომი კონვერსიების ჩათვლით.
როგორ დაითვლება კონვერსიები ჩვენებებით დარიცხვისას?
ატრიბუცია დამოკიდებულია კრიტერიუმების შესაბამის კონვერსიის მოვლენასა და გაზომვის მოქმედ წესებზე. როცა ხელმისაწვდომი იქნება, დაწკაპუნებისა და ნახვის შემდგომი ატრიბუციის მოქნილი პერიოდები საშუალებას მოგცემთ, აირჩიოთ ანგარიშგების პარამეტრები, რომლებიც თქვენს გაზომვის სტრატეგიას ყველაზე მეტად შეესაბამება.
როგორ მოქმედებს შეთავაზების ზედა ზღვარი გადასახდელ თანხაზე?
დაწკაპუნებებით დარიცხვისას შეთავაზების ზედა ზღვარი კონვერსიაზე ორიენტირებული შეთავაზებაა, რომელიც განსაზღვრავს, როგორ უწევს კამპანია კონკურენციას სხვებს დაწკაპუნებების აუქციონებზე; ის არც კონვერსიისთვის დარიცხული ფასია და არც გარანტირებული ღირებულება თითო მოზიდულ კლიენტზე. თანხა გერიცხებათ ვალიდური დაწკაპუნებებისთვის, ხოლო თითო დაწკაპუნების რეალურ ღირებულებას აუქციონი განსაზღვრავს.
შემდეგი ნაბიჯები
მიზნით „კონვერსიების ოპტიმიზაცია“ კამპანიის შექმნის შემდეგ შეგიძლიათ: