მოვლენების ხარისხი გეხმარებათ გაიგოთ, რამდენად გამოსადეგია გაზომვისთვის თქვენ მიერ არჩეული მონაცემთა წყაროდან მიღებული კონვერსიის ინფორმაცია. თითოეულ პიქსელს ან მონაცემთა წყაროს საკუთარი შეფასება აქვს. ქულა და გაფრთხილებები მიგითითებთ, თქვენი კონფიგურაციის რომელი ნაწილები საჭიროებს გადახედვას. ისინი არ პროგნოზირებს კამპანიის ეფექტიანობას და არ იძლევა გარანტიას, რომ კონვერსია რეკლამას დაუკავშირდება.
მოვლენების ხარისხი ყოველდღიურად ახლდება 7 სრული კალენდარული დღის მონაცემებით. ამასთან, გათვალისწინებულია დრო ბოლო მოვლენების მისაღებად. კონფიგურაციის შეცვლის შემდეგ დარწმუნდით, რომ ახალი მოვლენები მოსალოდნელი წესით მიიღება. გაუმჯობესება შეიძლება თანდათან გამოჩნდეს, როდესაც ძველი მოვლენები შეფასების პერიოდს გასცდება. თუ განახლება დაგვიანდა, მანამდე არსებული ქულა კვლავ გამოჩნდება, სანამ ახალი შეფასება გახდება ხელმისაწვდომი.
გამოიყენეთ გაფრთხილებები
გახსენით არჩეული მონაცემთა წყაროს გაფრთხილებები და განიხილეთ თითოეული პრობლემა. დაიწყეთ იმ პრობლემებით, რომელთა გადამოწმებაც თქვენს ინტეგრაციაში შეგიძლიათ, მაგალითად, დაკავშირებისთვის საჭირო ინფორმაციის ნაკლებობით, სერვერის მოვლენების დაგვიანებით ან მოვლენების განმეორებითი დაფიქსირებით. კონფიგურაციის შეცვლამდე მიზეზის გამოსაკვლევად გამოიყენეთ ქვემოთ მოცემული მითითებები.
გაგზავნეთ მხოლოდ ის ინფორმაცია, რომლის გაზიარების უფლებაც გაქვთ, და პატივი ეცით პირის არჩევანს კონფიდენციალურობასა და თანხმობასთან დაკავშირებით. გამოიყენეთ მომხმარებელთა რეალური ინფორმაცია და რეალური ბიზნესმოქმედებები. ქულის გასაუმჯობესებლად ნუ გაგზავნით ზედმეტ მოვლენებს, ნუ გამოიგონებთ იდენტიფიკატორებს და ნუ შეცვლით მოვლენების დროს.
ელფოსტის ან მომხმარებლის ID-ის ინფორმაცია შეზღუდულია
რას ნიშნავს: ამ შემოწმებას დაქვემდებარებულ კონვერსიის მოვლენებში ელფოსტის ან მომხმარებლის მუდმივი ID-ის შესახებ შეზღუდული ინფორმაცია დავაფიქსირეთ. ეს იდენტიფიკატორები მოვლენების სწორ პირთან დაკავშირებაში გვეხმარება. დაბალი შედეგი შეიძლება დამუშავების ან ინტეგრაციის პრობლემასაც ასახავდეს, ამიტომ გადაამოწმეთ, რას აგზავნის თქვენი ინტეგრაცია სინამდვილეში.
როგორ მოიქცეთ:
შეამოწმეთ, შეიცავს თუ არა თქვენი შესაბამისი კონვერსიის მოვლენები ელფოსტის მისამართს ან მომხმარებლის თქვენეულ მუდმივ იდენტიფიკატორს ინტეგრაციის მიერ მხარდაჭერილ ველებში.
ერთი და იმავე პირისთვის შეინარჩუნეთ მომხმარებლის ერთი და იგივე იდენტიფიკატორი. სხვადასხვა პირისთვის ნუ გამოიყენებთ საერთო, დროებით ჩამნაცვლებელ ან ნაგულისხმევ იდენტიფიკატორს.
მიჰყევით თქვენი ინტეგრაციის ნორმალიზაციისა და ჰეშირების ინსტრუქციებს. თუ ორივეს იყენებთ, შეამოწმეთ როგორც ბრაუზერის, ისე სერვერის მხარეს დანერგილი ინტეგრაცია.
გამოსცადეთ დასრულებული კონვერსია მომხმარებლის ჩვეული გზის გავლით და დარწმუნდით, რომ მოსალოდნელი ველები არსებობს.
რეკლამაზე დაწკაპუნების ინფორმაცია აკლია ან მისი დაკავშირება ვერ ხერხდება
რას ნიშნავს: რეკლამაზე დაწკაპუნებასთან დაკავშირებული ზოგიერთი შეფასებული კონვერსია არ შეიცავდა დაწკაპუნების ინფორმაციას, რომელიც იმავე დაწკაპუნებას დაუკავშირდებოდა. ეს შემოწმება მოიცავს დაწკაპუნებასთან დაკავშირებულ იმ კონვერსიებს, რომელთა შეფასებაც შეგვიძლია; ის არ ზომავს რეკლამაზე ყველა დაწკაპუნებას ან ყველა მომხმარებლის გზას.
როგორ მოიქცეთ:
შეინარჩუნეთ oppref პარამეტრი, როცა ადამიანი რეკლამიდან თქვენს საიტზე გადმოდის, მათ შორის გადამისამართებებისა და გვერდებს შორის ნავიგაციის დროს.
თუ კონვერსიებს Conversions API-ის მეშვეობით აგზავნით, სერვერის მოვლენას გადაეცით ამ პირის გზაზე მიღებული დაწკაპუნების ინფორმაცია.
გამოსცადეთ სრული გზა, მათ შორის თვალთვალის ბმულები, გადამისამართებები, შეკვეთის გაფორმება და მონაცემების ნებისმიერი გადაცემა ბრაუზერსა და სერვერს შორის.
ნუ გამოიყენებთ სხვა პირის დაწკაპუნების ინფორმაციას და ნუ ჩაანაცვლებთ მას ნაგულისხმევი მნიშვნელობით.
Conversions API-ის მოვლენები იგვიანებს
რას ნიშნავს: სერვერის ზოგიერთი შეფასებული მოვლენა დაფიქსირებული მოქმედებიდან დიდი დაგვიანებით მოვიდა, ან მისი დროის სწორად შეფასება ვერ მოხერხდა. შემოწმება ადგენს, მიღებულია თუ არა მოვლენა მოქმედებიდან 1 საათის განმავლობაში.
როგორ მოიქცეთ:
გაგზავნეთ მოვლენა რეალური ბიზნესმოქმედების დადასტურებისთანავე.
შეამოწმეთ დაგეგმილი ატვირთვები, რიგები, წარუმატებელი მოთხოვნები და ხელახალი მცდელობების დაყოვნებები.
მოვლენის ხელახლა გაგზავნისას შეინარჩუნეთ მოქმედების თავდაპირველი დრო. ნუ ჩაანაცვლებთ მას ატვირთვის დროით.
თქვენს ინტეგრაციაში გადაამოწმეთ დროის ნიშნულის ფორმატი, ერთეულები და საათის პარამეტრები.
კონვერსიების კავშირები გადახედვას საჭიროებს
რას ნიშნავს: ატრიბუციის შემოწმებებისას კონვერსიების ზოგიერთი პოტენციური კავშირი გამოირიცხა. მიზეზი შეიძლება იყოს ერთი და იმავე მოქმედებისთვის განმეორებითი უკუგამოძახებები, დროის შეუსაბამობა ან რეკლამის ერთსა და იმავე ნახვასთან ზედმეტად ბევრი კავშირი. ეს არ ნიშნავს, რომ შესაბამისი ბიზნესმოვლენები წაიშალა ან რომ ყველა მოვლენა, რომელსაც ეს შეეხო, არავალიდური იყო.
როგორ მოიქცეთ:
შეამოწმეთ, რომ კონვერსია რეალური მოქმედების შემდეგ ფიქსირდება, მაგალითად, შეკვეთის დადასტურების ან რეგისტრაციის დასრულების შემდეგ.
გადაამოწმეთ გვერდის განმეორებითი ჩატვირთვები, დუბლირებული ტეგები, უკუგამოძახებები და ხელახალი მცდელობები, რომლებმაც შესაძლოა ერთი და იგივე მოქმედება რამდენჯერმე გაგზავნოს.
ერთი და იმავე მოქმედების ასლებისთვის, მათ შორის ბრაუზერისა და სერვერის ასლებისთვის, გამოიყენეთ მოვლენის ერთი და იგივე ID, ხოლო განსხვავებული მოქმედებებისთვის — განსხვავებული ID-ები.
შეინარჩუნეთ მოქმედების თავდაპირველი დროის ნიშნული და გამოიკვლიეთ თქვენს ბიზნესჩანაწერებთან ნებისმიერი შეუსაბამობა.
თუ მოვლენები ზუსტია და გაფრთხილება მაინც რჩება, დაუკავშირდით მხარდაჭერის გუნდს და მიუთითეთ მონაცემთა წყარო, შესაბამისი მოვლენების სახელები, თარიღების დიაპაზონი და თქვენ მიერ ჩატარებული შემოწმებები.
ბევრი კონვერსია დაკავშირებულია რეკლამასთან ერთსა და იმავე ინტერაქციასთან
რას ნიშნავს: იმ კონვერსიებიდან, რომელთა შეფასებაც შეგვიძლია, უჩვეულოდ დიდი წილი რეკლამაზე ცალკეულ დაწკაპუნებებს ან ნახვებს უკავშირდება. ერთი ინტერაქციის შემდეგ მომხმარებელმა სავსებით რეალურად შეიძლება რამდენიმე მოქმედება შეასრულოს, ამიტომ მხოლოდ ეს გაფრთხილება დუბლირებულ მოვლენებს ან არავალიდურ აქტივობას არ ადასტურებს.
როგორ მოიქცეთ:
შეამოწმეთ, ხომ არ იგზავნება ერთი და იგივე ბიზნესმოქმედება განმეორებით გვერდის ჩატვირთვის, განახლების, უკუგამოძახების ან ხელახალი მცდელობის გამო.
დარწმუნდით, რომ განსხვავებულ მოქმედებებს მოვლენის განსხვავებული ID-ები აქვს, ხოლო ხელახალი მცდელობებისას მოვლენის თავდაპირველი ID შენარჩუნებულია.
გადაამოწმეთ, ფიქსირდება თუ არა კონვერსიის მოვლენები მომხმარებლის გზის დაგეგმილ ეტაპზე.
თუ ეს სურათი რეალურ განმეორებით შესყიდვებს ან რამდენიმე ნამდვილ ნაბიჯს ასახავს, შეინარჩუნეთ ეს მოვლენები და მხარდაჭერის გუნდისთვის გაფრთხილების გადახედვის თხოვნისას აღწერეთ შესაბამისი ქცევა.
დაკავშირებისთვის საჭირო დამატებითი ინფორმაცია შეზღუდულია
რას ნიშნავს: შემოწმებას დაქვემდებარებული კონვერსიის მოვლენები დაკავშირებისთვის საჭირო დამატებით ინფორმაციას შეზღუდულად შეიცავს. ეს შემოწმება ითვალისწინებს ტელეფონის, სახელისა და მდებარეობის მონაცემებს, ასევე კლიენტის IP მისამართისა და მომხმარებლის აგენტის ერთობლიობას. იგი აფასებს ინფორმაციის არსებობას და არა იმას, წარმატებით დაუკავშირდა თუ არა მოვლენა კონკრეტულ პირს.
როგორ მოიქცეთ:
თუ ტელეფონის მონაცემები ხელმისაწვდომია და მათი გაზიარება ნებადართულია, მიუთითეთ ისინი თქვენი ინტეგრაციის მიერ მხარდაჭერილი ველისა და ფორმატის გამოყენებით.
სახელისა და მდებარეობის მონაცემებისთვის მიუთითეთ ერთი და იმავე პირის სახელი, გვარი, საფოსტო კოდი და ქვეყანა. დაიცავით დოკუმენტაციაში მითითებული ჰეშირებისა და ნორმალიზაციის მოთხოვნები.
სერვერის მოვლენებისთვის გადააგზავნეთ რეალური კლიენტის IP მისამართი და მომხმარებლის აგენტი, თუ ეს მხარდაჭერილია. მათ ნაცვლად ნუ მიუთითებთ თქვენი სერვერის მისამართს ან მომხმარებლის აგენტის ზოგად მნიშვნელობას.
ასევე გააგრძელეთ ელფოსტის ან მომხმარებლის მუდმივი ID-ის შესახებ ინფორმაციის გაგზავნა, რომლის გაზიარებაც ნებადართულია.
დაფიქსირებულია მოვლენების ტიპების შეზღუდული სპექტრი
რას ნიშნავს: ამ შემოწმებისთვის გამოყენებულ მოვლენების სტანდარტულ ჯგუფებში შეზღუდული აქტივობა დავაფიქსირეთ. ეს ჯგუფებია: დათვალიერება, შუალედური მოქმედებები და დასრულებული შედეგები. სხვადასხვა ბიზნესში მომხმარებლის გზა განსხვავებულია და ყველა ეტაპი ყველგან საჭირო არ არის. ეს შემოწმება არ ადასტურებს, რომ თქვენი კონვერსიის ძაბრი სრულად არის მოცული.
როგორ მოიქცეთ:
აღწერეთ თქვენი მომხმარებლის გზის რეალური ნაბიჯები და განსაზღვრეთ თქვენი ბიზნესისთვის შესაბამისი ეტაპები.
შეამოწმეთ შესაბამისი მოქმედებების აღრიცხვა, როგორიცაა შიგთავსის ნახვა; ნივთების დამატება, შეკვეთის გაფორმების დაწყება ან საკონტაქტო მონაცემების დატოვება; შეკვეთის დასრულება, საცდელი პერიოდის დაწყება ან შეხვედრის დაჯავშნა.
გამოიყენეთ მხარდაჭერილი სტანდარტული მოვლენა, როცა ის მოქმედებას ზუსტად ასახავს. მოვლენების სპექტრის ამ კონკრეტულ შემოწმებაში მორგებული მოვლენები არ შედის.
გამოსცადეთ, რომ თითოეული მოვლენა მხოლოდ შესაბამისი მოქმედების შესრულებისას ფიქსირდება. გაფრთხილების მოსახსნელად ნუ შექმნით კონვერსიის ძაბრის ხელოვნურ ეტაპებს.
Pixel-ისა და Conversions API-ის აქტივობა შეზღუდულია
რას ნიშნავს: Pixel SDK-ის ან Conversions API-ის მხარდაჭერილი არხებიდან საკმარისი მიღებული აქტივობა არ დაგვიფიქსირებია, რომ მათი გამოყენება დადებითად შევაფასოთ. მხოლოდ ინტეგრაციის დაყენება არ ადასტურებს, რომ მოვლენები მიიღება.
როგორ მოიქცეთ:
გადაამოწმეთ, რომ Pixel SDK აგზავნის ბრაუზერის მოვლენებს, ხოლო Conversions API-ის ინტეგრაცია — სერვერის დადასტურებულ შედეგებს, იმის მიხედვით, თუ რომელი შეესაბამება თქვენს კონფიგურაციას.
შეამოწმეთ, რომ მოთხოვნები მიიღება და მონაცემთა დანიშნულ წყაროში იგზავნება.
როცა ორივე არხი ერთსა და იმავე მოქმედებას გადასცემს, გამოიყენეთ ერთი და იგივე Pixel ID, მოვლენის სახელი და მოვლენის ID, რათა ასლების ამოცნობა შესაძლებელი იყოს.
განსხვავებული მოქმედებებისთვის შეინარჩუნეთ განსხვავებული მოვლენები და ნუ გაგზავნით შედეგებს მათ დადგომამდე.
ორივე არხის გამოყენებამ შეიძლება ურთიერთშემავსებელი ინფორმაცია მოგაწოდოთ. არხის აქტივობა თავისთავად არ ადასტურებს სწორ დაწყვილებას ან მოვლენების სრულ აღრიცხვას.
კონვერსიის კონფიგურირებული მიზნისთვის აქტივობა შეზღუდულია
რას ნიშნავს: შეფასების პერიოდში კონვერსიის სულ მცირე ერთი კონფიგურირებული მიზნისთვის ძალიან ცოტა მოვლენა მივიღეთ ან საერთოდ არ მიგვიღია. ამ გაფრთხილების არსებობისას სხვა მიზნებს შეიძლება ნორმალური აქტივობა ჰქონდეს. ამ შემოწმებისთვის მიღებულ მოვლენებში ის მოვლენებიც შედის, რომლებიც რეკლამას არ დაუკავშირდა.
როგორ მოიქცეთ:
შეადარეთ იმ მიზნის მოვლენის სახელი და კონფიგურაცია, რომელსაც გაფრთხილება ეხება, თქვენი ინტეგრაციის მიერ გაგზავნილ მოვლენებს.
დარწმუნდით, რომ მოვლენა რეალური მოქმედების შესრულებისას ფიქსირდება და ბოლო მოვლენები მიიღება.
გადახედეთ მოძველებულ მიზნებს ან მათ, რომლებიც აღარ ასახავს იმ მოქმედებებს, რომელთა გაზომვაც გსურთ.
თუ მოქმედება მართლაც იშვიათია ან ბოლო პერიოდში მოთხოვნა დაბალია, გააგრძელეთ მასზე დაკვირვება. მხოლოდ მცირე რაოდენობა კონფიგურაციის ხარვეზს არ ადასტურებს.
რატომ შეიძლება ქულა ან შემოწმება მიუწვდომელი იყოს
კონვერსიის მიზნები კონფიგურირებული არ არის: დარწმუნდით, რომ კონფიგურირებულია კონვერსიის ის მოქმედებები, რომელთა გაზომვაც გსურთ, და თქვენი ინტეგრაცია შესაბამის მოვლენებს აგზავნის.
კონვერსიის აქტივობა არასაკმარისია: შესაძლოა, ბოლო პერიოდში კონვერსიის აქტივობა საკმარისი არ იყოს ინფორმაციული ქულის გამოსათვლელად. გადაამოწმეთ პარამეტრები და დაელოდეთ რეალური აქტივობის დაგროვებას. ეს სტატუსი ნულოვან ქულას არ ნიშნავს.
ატრიბუციის დამადასტურებელი მონაცემები არასაკმარისია: ზოგიერთი შემოწმებისთვის საჭიროა კონვერსიის მოვლენებსა და რეკლამაზე დაწკაპუნებებს ან ნახვებს შორის კავშირი, რომლის დაფიქსირებაც შესაძლებელია. შესაძლოა, მოვლენებს იღებდეთ, თუმცა ასეთი მონაცემები ჯერ კიდევ შეზღუდული იყოს. ეს არ ნიშნავს, რომ თქვენს ბიზნესს რეალური კონვერსიები არ აქვს.
შემოწმებისთვის ინფორმაცია შეზღუდულია: კონკრეტული შემოწმებისთვის შესაძლოა საჭირო იყოს მეტი შესაბამისი მოვლენა ან მეტი დაფიქსირებადი აქტივობა. ინფორმაციის ნაკლებობა შემოწმების წარუმატებლობად არ ითვლება და რეკლამის განმთავსებლისთვის გაფრთხილებას ავტომატურად არ წარმოქმნის.
მონაცემები ჯერ კიდევ მუშავდება: ქულა შესაძლოა მიუწვდომელი იყოს პირველი შეფასების მომზადებამდე ან მაშინ, როცა უახლესი შეფასება დაუსრულებელია. ყოველდღიური განახლების შეფერხება თავისთავად არსებულ ქულას არ შლის. დაბრუნდით დამუშავების დასრულების შემდეგ. თუ მიუწვდომლობის სტატუსი შენარჩუნდა, დაუკავშირდით მხარდაჭერის გუნდს.
ცვლილების შეტანის შემდეგ, პირველ რიგში, შეამოწმეთ, აღრიცხავს თუ არა ინტეგრაცია სწორ მოქმედებებსა და ინფორმაციას. შეფასების პერიოდის გადანაცვლებასთან ერთად ქულა შეიძლება თანდათან შეიცვალოს. არცერთი ქულა არ იძლევა დაკავშირების, ატრიბუციის ან კამპანიის შედეგების გარანტიას.