წვდომა და ნებართვები

შეუძლია თუ არა ჩემს dot-ს გამოიყენოს პლაგინები, რომლებიც უკვე დავაყენე ChatGPT-ში, ChatGPT მუშაობაში ან Codex-ში?

დიახ. პლაგინების ნებართვები საერთოა dots-ისთვის, ChatGPT-ისთვის, ChatGPT მუშაობისა და Codex-ისთვის. თქვენს dot-ს შეუძლია არსებული კავშირები გამოიყენოს თქვენ მიერ გაცემული ნებართვების ფარგლებში.
თქვენს dot-ს წინასწარ აქვს განსაზღვრული მკაცრი წესები იმის შესახებ, თუ რომელ მოქმედებას სჭირდება თქვენი თანხმობა ყოველ ჯერზე, რომელი შეგიძლიათ დაამტკიცოთ წინასწარ და რომლის შესრულება შეუძლია უკითხავად. დამატებითი ინფორმაციისთვის იხილეთ სექცია „მოქმედებები, თანხმობა და კონტროლი“.

სად შემიძლია ახალი ნებართვების გაცემა ან არსებულის მართვა?

ახალი პლაგინების დაკავშირება და არსებულის მართვა შეგიძლიათ ChatGPT-ის ჩანართში პლაგინები. ეს კავშირები საერთოა dots-ისთვის, ChatGPT-ისთვის, ChatGPT მუშაობისა და Codex-ისთვის.

ასევე შეგიძლიათ თქვენს dot-ს Slack-ის ცალკე ანგარიში შეუქმნათ, რათა ამ სერვისებში საკუთარი იდენტობა და წვდომა ჰქონდეს. თქვენს dot-ს კვლავ შეუძლია ChatGPT-სთან უკვე დაკავშირებული პლაგინების გამოყენება, მაშინაც კი, თუ ელფოსტის ან Slack-ის საკუთარი ანგარიში აქვს.

როგორ ვაკონტროლო, რისი წაკითხვა ან შეცვლა შეუძლია ჩემს dot-ს პლაგინების მეშვეობით?

სხვადასხვა პლაგინზე წვდომის მართვა შეგიძლიათ ChatGPT-ის ჩანართში პლაგინები. თქვენი dot იცავს წინასწარ განსაზღვრულ მკაცრ წესებს იმის შესახებ, თუ როდის სჭირდება თქვენი თანხმობა პლაგინების მეშვეობით მოქმედების შესრულებამდე.
მორგებული წესებით შეგიძლიათ dots-ისთვის დამატებითი საზღვრები დააწესოთ — მაგალითად, თქვენს dot-ს მიუთითოთ, რომ არასოდეს გაგზავნოს ელწერილები. ეს წესები ვერ გააუქმებს გარკვეულ ჩაშენებულ დამცავ მექანიზმებსა და უსაფრთხოების მოთხოვნებს.

თქვენს dot-ს სასარგებლო სიახლეების ძიება თქვენი მოთხოვნის მიღებამდეც შეუძლია. ამას პროაქტიული კვლევა ეწოდება. მას შეუძლია ნებადართული დაკავშირებული წყაროებიდან ინფორმაციის წაკითხვა და პირადი ჩანაწერების შენახვა, თუმცა მის კვლევის ხელსაწყოებს უშუალოდ არ შეუძლია:

• სხვა ადამიანებისთვის შეტყობინებების გაგზავნა.

• პლაგინების მეშვეობით შიგთავსის შეცვლა.

• ბრაუზერის ან კომპიუტერის მართვა.

ნებისმიერი შემდგომი მოქმედებისას დაცული უნდა იყოს მოქმედების ჩვეულებრივი წესები და უსაფრთხოების შემოწმებები. იგივე წესები ვრცელდება თქვენ მიერ უკვე ნებადართულ დავალებებზეც, რომელთა შესრულებაც ფონურად გრძელდება.

შეუძლია თუ არა ჩემს dot-ს ჩემს კამერაზე, მიკროფონზე ან ეკრანზე წვდომა?

თქვენი კომპიუტერის კამერაზე, მიკროფონზე ან ეკრანზე წვდომისთვის ჯერ კომპიუტერი უნდა დაუკავშიროთ თქვენს dot-ს. ასევე, მოწყობილობის პარამეტრებში ChatGPT-ის აპს უნდა მისცეთ კამერაზე, მიკროფონზე ან ეკრანზე წვდომის ნებართვა. 

ხელმისაწვდომია თუ არა dots 18 წლამდე მომხმარებლებისთვის?

არა. dots ჯერ არ არის ხელმისაწვდომი 18 წლამდე მომხმარებლებისთვის.

მონაცემთა გამოყენება, მეხსიერება და კონფიდენციალურობა

აქვს თუ არა ჩემს dot-ს ChatGPT-სთან საზიარო მეხსიერება?

დიახ. თქვენს dot-ს შეუძლია ChatGPT-დან მიიღოს დამახსოვრებული ინფორმაცია და ბოლო საუბრების კონტექსტი, ხოლო თქვენს dot-თან საუბრებმა შეიძლება ChatGPT-ის მეხსიერება შეავსოს. ChatGPT-სა და თქვენს dot-ს შორის მეხსიერების გაზიარება დაყენების შემდეგაც შეიძლება გაგრძელდეს. 

ChatGPT-ში მეხსიერების გამორთვით ეს გაზიარება წყდება. ეს არ შლის ინფორმაციას, რომელიც თქვენმა dot-მა უკვე მიიღო.

რა ინფორმაციას ინახავს ჩემი dot და როგორ არის ის დაცული?

თქვენს dot-ს შეუძლია თქვენი საუბრებისა და პლაგინების კონტექსტი შეინახოს მანამ, სანამ თავად dot-ს არ წაშლით. თქვენი dot-ის კონტექსტის წასაშლელად შეგიძლიათ თავად dot წაშალოთ. ნებისმიერი ინფორმაცია, რომელიც თქვენმა dot-მა ChatGPT-ის მეხსიერებას გაუზიარა, შეგიძლიათ ცალკე მართოთ ChatGPT-ის მეხსიერების პარამეტრებში. 

თქვენი dot-ის კონტექსტში არ ინახება ანგარიშში შესასვლელი მონაცემები, სურათები ან ეკრანის ანაბეჭდები. ფაილებზე, რომლებსაც თქვენი dot ქმნის ან იყენებს სხვა ადგილას, მაგალითად, ChatGPT-ის ბიბლიოთეკაში, თქვენს კომპიუტერში ან დაკავშირებულ საცავის სერვისში, ვრცელდება შესაბამისი ადგილის შენახვის წესები.

OpenAI შიფრავს თქვენს შიგთავსს როგორც შენახვისას, ისე თქვენ, OpenAI-სა და ჩვენი მომსახურების მომწოდებლებს შორის გადაცემისას.

შემიძლია ვნახო, შევასწორო ან წავშალო ის, რაც ჩემს dot-ს ჩემ შესახებ ახსოვს?

თქვენი dot-ის კონტექსტის წასაშლელად შეგიძლიათ თავად dot წაშალოთ. ამჟამად dot-ის მეხსიერების ცალკეული ჩანაწერების ნახვა, წაშლა ან უშუალოდ შეცვლა შეუძლებელია. ეს მოიცავს კონკრეტულ დეტალებსაც, რომლებიც dot-ის კონტექსტში პლაგინებიდან ხვდება.

რა მოუვა ჩემს ინფორმაციას, თუ პლაგინით დაკავშირებულ სერვისს გავთიშავ?

ამით ამ კავშირის მეშვეობით შემდგომი წვდომა შეწყდება. ეს არ წაშლის ინფორმაციას, რომელიც თქვენმა dot-მა უკვე შეიტანა თავის კონტექსტში.

რა მოუვა ჩემს ინფორმაციას, თუ ჩემს dot-ს წავშლი?

• თქვენი dot-ის წაშლა: ამით იშლება თქვენი dot-ის საკუთარი კონტექსტი.

• ფაილები და საუბრები: თქვენი dot-ის მიერ შექმნილი ფაილები, Codex-ის მიმოწერები და ChatGPT-ის საუბრები ცალკე ინახება. თქვენი dot-ის წაშლით ისინი არ იშლება.

• ChatGPT-ის მეხსიერების ჩანაწერები: ChatGPT-ში თქვენი სხვა საუბრებიდან დამახსოვრებული ინფორმაცია უცვლელად რჩება. მათი მართვა შეგიძლიათ ChatGPT-ის მეხსიერების პარამეტრებიდან.

შეუძლიათ თუ არა OpenAI-სთან დაკავშირებულ პირებს ჩემი dot-ის აქტივობის შემოწმება, თუ მოდელის გაუმჯობესება გამორთული მაქვს?

დიახ. ადამიანის მიერ შემოწმება შეიძლება მოხდეს მხოლოდ გარკვეულ შემთხვევებში, მათ შორის, უსაფრთხოებასთან დაკავშირებული მიზეზებით, მაშინაც კი, როცა მოდელის გაუმჯობესება გამორთულია.

იყენებს თუ არა OpenAI ჩემი dot-ის ინფორმაციას თავისი მოდელების გასაუმჯობესებლად? როგორ ვთქვა ამაზე უარი?

ChatGPT Business-ის, Enterprise-ისა და Edu-ს სამუშაო სივრცეებში თქვენს მონაცემებს ნაგულისხმევად არ ვიყენებთ ჩვენი მოდელების გასაწვრთნელად. ChatGPT-ის პირად გეგმებში პარამეტრი „მოდელის გაუმჯობესება ყველასთვის“ განსაზღვრავს, შეიძლება თუ არა თქვენი dots-ის საუბრებისა და ნამუშევრების გამოყენება ჩვენი მოდელების გასაუმჯობესებლად. ეს შეიძლება მოიცავდეს dots-ის მოქმედებებს, სხვა აგენტებისთვის დელეგირებულ სამუშაოს, თქვენ მიერ დაყენებულ ავტომატიზაციებს და დაკავშირებული აპებიდან მიღებულ მონაცემებს, რომლებიც თქვენს საუბრებში კონტექსტად გამოიყენება. გამოსაყენებლად დაშვებული მონაცემების გამოყენებამდე ვიღებთ ზომებს, რათა, შეძლებისდაგვარად, ამოვშალოთ პიროვნების საიდენტიფიკაციო ინფორმაცია.

პროაქტიულ ფონურ კვლევასა და მის ჩანაწერებს უშუალოდ მოდელების გასაწვრთნელად არ ვიყენებთ. თუ dot ამ კვლევიდან მიღებულ ინფორმაციას გადაიტანს საუბარში ან დავალებაში, რომლის გამოყენებაც დასაშვებია, ეს ინფორმაცია, თქვენი პარამეტრების მიხედვით, შეიძლება წვრთნისთვის გამოვიყენოთ.  პარამეტრი „მოდელის გაუმჯობესება ყველასთვის“ შეგიძლიათ გამორთოთ ChatGPT-ის პარამეტრებში. თქვენი მონაცემების გამოყენების შესახებ მეტი ინფორმაციისთვის იხილეთ მონაცემთა მართვა ChatGPT-ში.

როგორ მოვითხოვო ჩემს პირად ინფორმაციაზე წვდომა, მისი შესწორება ან წაშლა?

მოთხოვნის გაგზავნა შეგიძლიათ OpenAI-ის კონფიდენციალურობის პორტალის მეშვეობით ან ელფოსტით მისამართზე dsar@openai.com, მაშინაც კი, თუ OpenAI-ის ანგარიში არ გაქვთ.

თქვენი საცხოვრებელი ადგილის მიხედვით, შეიძლება გქონდეთ პერსონალურ მონაცემებზე წვდომის, მათი შესწორების, წაშლის ან ასლის მიღების უფლება. თქვენი ვინაობის დასადასტურებლად შეიძლება დამატებითი ინფორმაცია მოგთხოვოთ. დეტალებისთვის იხილეთ ჩვენი კონფიდენციალურობის წესები.

როგორ სარგებლობს OpenAI მომსახურების მომწოდებლებით?

OpenAI მომსახურების მომწოდებლებს იყენებს თავისი სერვისების მუშაობის უზრუნველსაყოფად, მათ შორის, ჰოსტინგის, ღრუბლოვანი ინფრასტრუქტურის, მხარდაჭერის, უსაფრთხოებისა და ელფოსტის მიწოდებისთვის. ამ მომსახურების გასაწევად მომწოდებლებს შეიძლება ჰქონდეთ წვდომა პირად ინფორმაციაზე, დაამუშაონ ან შეინახონ ის OpenAI-ის მითითებების შესაბამისად.

მეტი ინფორმაციისთვის იხილეთ ჩვენი კონფიდენციალურობის წესები. ბიზნესკლიენტების სახელით დამუშავებული ინფორმაციის მართვის პირობებს განსაზღვრავს კლიენტთან დადებული შესაბამისი ხელშეკრულება.

მოქმედებები, თანხმობა და კონტროლი

რომელ მოქმედებებს სჭირდება ჩემი თანხმობა ან მართვის ჩემ მიერ გადაბარება?

თუ თქვენს dot-ს სენსიტიური მოქმედებების შესრულებას სთხოვთ, მან შეიძლება თქვენი მკაფიო თანხმობა მოითხოვოს (ზოგ შემთხვევაში მისი წინასწარ მიცემაც შეგიძლიათ) ან გთხოვოთ, მართვა გადაიბაროთ და მოქმედება თავად დაასრულოთ. თქვენს dot-ს მიცემული აქვს მითითება, დაიცვას შემდეგი წესები:

• ყველაზე სენსიტიური მოქმედებებისას, როგორიცაა პაროლის შეცვლა ან თანხის გადარიცხვა, მართვა უნდა გადაიბაროთ და ისინი თავად დაასრულოთ.

• სხვა მოქმედებებს, როგორიცაა მონაცემების სამუდამოდ წაშლა ან პროგრამული უზრუნველყოფის დაყენება, შეიძლება თანხმობა დასჭირდეს ყოველ ჯერზე, როცა თქვენს dot-ს მათ შესრულებას სთხოვთ.

• ზოგ შემთხვევაში, მაგალითად, განმეორებადი შეტყობინებების გაგზავნისას, თანხმობა შეგიძლიათ წინასწარ მისცეთ და არა ყოველ ჯერზე.

თქვენი მითითებებით dot იგებს, როდის და როგორ შეუძლია იმოქმედოს თქვენი სახელით. ამ საზღვრების მკაფიოდ განსაზღვრისთვის ზუსტად მიუთითეთ, რაზე აძლევთ თანხმობას. მოგვიანებით გასაგზავნი შეტყობინებისთვის მიუთითეთ მიმღები, ტექსტი და ის, თუ როდის ან რა პირობებში უნდა გაიგზავნოს. ერთი შეტყობინების დამტკიცება თქვენს dot-ს არ აძლევს მუდმივ უფლებას, თქვენი სახელით დაუკავშირდეს ადამიანებს. ნებისმიერი წინასწარი თანხმობა ვრცელდება მხოლოდ იმაზე, რის უფლებაც მიეცით.  dots-ს მაინც შეიძლება შეცდომები მოუვიდეს, ამიტომ მნიშვნელოვანი შედეგების მქონე სამუშაო ყოველთვის გადაამოწმეთ.

რის დაშვება ან დაბლოკვა შემიძლია მორგებული წესებით და დამტკიცების რომელ მოთხოვნებსა თუ უსაფრთხოების შემოწმებებს ვერ შევცვლი?

თქვენს dot-ს წინასწარ აქვს განსაზღვრული მკაცრი წესები იმის შესახებ, თუ რომელი მოქმედება საჭიროებს დადასტურებას შესრულების მომენტში, წინასწარ დამტკიცებას ან საერთოდ არ საჭიროებს დადასტურებას.  მორგებული წესებით შეგიძლიათ შეცვალოთ ეს პარამეტრები და მიუთითოთ თქვენს dot-ს, რომელი მხარდაჭერილი მოქმედებები შეუძლია შეასრულოს დამოუკიდებლად, რომელს სჭირდება თქვენი თანხმობა და რომელი არ უნდა შეასრულოს. თქვენი მორგებული წესების სანახავად გახსენით პარამეტრები.  მორგებული წესებით უსაფრთხოების ძირითადი მოთხოვნები ვერ გამოირთვება — მაგალითად, მოთხოვნა, რომ dot-ის ნაცვლად პაროლი თავად შეცვალოთ.  მორგებული წესებით ასევე ვერ შეცვლით უსაფრთხოების შემოწმების ცალკე სისტემას — ავტომატურ შემოწმებას — ან პროაქტიული კვლევის შეზღუდვებს.

როგორ შემიძლია ჩემი dot-ის აქტივობის ნახვა და მისთვის მითითებების მიცემა?

კომპიუტერის აპში აქტივობის ხედი აჩვენებს თქვენი dot-ის მიმდინარე და დელეგირებულ დავალებებს. მისი მუშაობის მიმდინარეობას შეგიძლიათ თვალი ადევნოთ დავალებების აღწერებისა და სტატუსის მიხედვით. ასევე შეგიძლიათ ნახოთ, რა ნაბიჯები გადადგა თქვენმა dot-მა.

შეგიძლიათ დაამატოთ კონტექსტი, განმარტოთ არასწორად გაგებული საკითხი, შეცვალოთ მიმართულება ან თქვენს dot-ს შეჩერება სთხოვოთ.

შემიძლია შევაჩერო ჩემი dot, შევასწორო მისი მითითებები ან გავაუქმო უკვე შესრულებული მოქმედება?

სანამ თქვენი dot მუშაობს, შეგიძლიათ განახლებული მითითებები მისცეთ, მიმართულება შეუცვალოთ ან შეჩერება სთხოვოთ.

უკვე შესრულებული მოქმედების გაუქმების შესაძლებლობა დამოკიდებულია თავად მოქმედებასა და შესაბამის აპზე. შეგიძლიათ თქვენს dot-ს შეცდომის გამოსწორებაში დახმარება სთხოვოთ, თუმცა ზოგი მოქმედების გაუქმება შეუძლებელია.

როგორ მოვიქცე, თუ ჩემი dot შეცდომას დაუშვებს, მოულოდნელად გააზიარებს ინფორმაციას ან შეასრულებს მოქმედებას, რომელიც არ მსურდა?

თქვენს dot-ს შეიძლება შეცდომები მოუვიდეს. თუ შეცდომა შენიშნეთ, შეგიძლიათ თქვენს dot-ს პრობლემის გამოსწორება სთხოვოთ — შესაძლოა, მან შესრულებული მოქმედებების გაუქმება შეძლოს. მაგალითად, თქვენს dot-ს შეიძლება შეეძლოს დოკუმენტში არასასურველი ცვლილებების გაუქმება ან გაგზავნილი ელწერილის უკან გამოთხოვა. თუ შეცდომის შესახებ შეტყობინება გსურთ, დამატებითი მითითებებისთვის იხილეთ თქვენს dot-თან მუშაობის დაწყება.

უსაფრთხოება და ჩაშენებული დამცავი მექანიზმები

როგორ დავიცვა ჩემი ანგარიში dots-ის გამოყენებისას?

მრავალფაქტორიანი ავთენტიფიკაცია ChatGPT-ის ანგარიშში შესვლას გადამოწმების დამატებით ნაბიჯს ამატებს, რაც ფიშინგისა და უნებართვო წვდომისგან დამატებით დაცვას უზრუნველყოფს. მის ჩასართავად გახსენით პარამეტრები > უსაფრთხოება და შესვლა.გაიგეთ, როგორ დააყენოთ მრავალფაქტორიანი ავთენტიფიკაცია.

უსაფრთხოების რომელი შემოწმებები ეხმარება ჩემს dot-ს, არ გააზიაროს პირადი ინფორმაცია და არ გასცდეს ჩემ მიერ გაცემულ ნებართვებს?

თქვენი dot დაცვის რამდენიმე დონეს იყენებს:

• მოდელის დამცავი მექანიზმები: GPT-6 Astra გაწვრთნილია, უარი თქვას საზიანო მოთხოვნებზე, მათ შორის, ბიოლოგიურ ან კიბერუსაფრთხოების სფეროში ბოროტად გამოყენებაზე.

• პლაგინების ნებართვები ზღუდავს იმას, თუ რაზე აქვს მას წვდომა.

• მორგებული წესები საშუალებას გაძლევთ, მხარდაჭერილი მოქმედებებისთვის დამატებითი საზღვრები დააწესოთ.

• ავტომატური შემოწმება გარკვეული დაგეგმილი მოქმედებების შესრულებამდე ამოწმებს მათ შესაბამისობას თქვენს მითითებებთან, მორგებულ წესებსა და უსაფრთხოების მოთხოვნებთან.

• უსაფრთხოების მონიტორინგი თქვენი dot-ის მუშაობისას პოტენციურად საზიანო ქცევას ეძებს.

მაგალითად, სანამ თქვენი dot ელწერილს გაგზავნის, ავტომატური შემოწმება ამოწმებს მიმღებსა და შეტყობინებას, რათა აღმოაჩინოს არასწორი მისამართი ან ინფორმაცია, რომლის გაზიარებაც არ გსურდათ.

თუ მოქმედება დაიბლოკება, თქვენმა dot-მა შეიძლება გთხოვოთ დაზუსტება ან თანხმობა, თუკი ამით ბლოკირება მოიხსნება, სცადოს დაშვებული ალტერნატივა ან შეჩერდეს. თქვენი თანხმობა უსაფრთხოების ძირითად მოთხოვნებს ვერ აუქმებს.

მოქმედების წესები ძალაშია მაშინაც, როცა თქვენი dot სამუშაოს სხვას გადასცემს ან მუშაობას ფონურად აგრძელებს. პროაქტიულ კვლევას დამატებითი შეზღუდვები აქვს: მის ხელსაწყოებს არ შეუძლია უშუალოდ გაუგზავნოს შეტყობინებები სხვა ადამიანებს, შეცვალოს შიგთავსი პლაგინების მეშვეობით ან მართოს ბრაუზერი თუ კომპიუტერი.

თქვენს dot-ს არ შეუძლია გამორთოს სავალდებულო ავტომატური შემოწმებები ან მოხსნას კვლევის ეს შეზღუდვები. ეს დამცავი მექანიზმები ამცირებს რისკს, თუმცა თქვენს dot-ს მაინც შეიძლება შეცდომები მოუვიდეს.

ავტომატური შემოწმების წესების მორგების შესახებ ინფორმაციისთვის იხილეთ ავტომატური შემოწმების კონფიგურაცია.

როგორ იცავს ჩემი dot თავს პრომპტ ინიექციისგან, ფიშინგისა და მავნე მითითებებისგან?

ვებსაიტი, ელფოსტა ან დოკუმენტი შეიძლება შეიცავდეს მითითებებს, რომლებიც ცდილობს, თქვენი dot მოტყუებით აიძულოს გააკეთოს ის, რაც არ გითხოვიათ, მაგალითად, გააზიაროს პირადი ინფორმაცია. ამას პრომპტ ინიექცია ეწოდება.

თქვენი dot შექმნილია ისე, რომ თქვენი მითითებები გაარჩიოს იმ შიგთავსისგან, რომელსაც მუშაობისას ხვდება. ეს შიგთავსი თავისთავად ნებართვას არ იძლევა.

დაცვის დამატებითი ზომები მოიცავს ხელსაწყოების შესაძლებლობების შეზღუდვას, ავტომატურ შემოწმებებს გარკვეული მოქმედებების წინ, თანხმობის მოთხოვნებს და უსაფრთხოების მონიტორინგს. სუსტი წერტილების აღმოსაჩენად და ამ დამცავი ზომების გასაუმჯობესებლად ვიყენებთ როგორც ადამიანების მიერ ჩატარებულ, ისე ავტომატურ ტესტირებას.

ეს დაცვა ამცირებს იმის რისკს, რომ მავნე მითითებებმა არასასურველი მოქმედება გამოიწვიოს, თუმცა რისკს სრულად ვერ გამორიცხავს.

პაროლები, ავთენტიფიკაცია და გადახდები

როგორ ამუშავებს ჩემი dot პაროლებს?

შესვლის მხარდაჭერილი მეთოდების გამოყენებისას თქვენი dot ჩერდება, სანამ ანგარიშში შესასვლელ მონაცემებს დაცულ ფორმაში შეიყვანთ. ფორმა თქვენს შესასვლელ მონაცემებს პირდაპირ ბრაუზერის გარემოში აგზავნის ისე, რომ მოდელისთვის ისინი ხელმისაწვდომი არ ხდება. ამის შემდეგ თქვენს dot-ს შეუძლია ანგარიშში შესული სესიის გამოყენებით გააგრძელოს მუშაობა.

ეს დამცავი ზომები ვრცელდება ანგარიშში შესვლის მხარდაჭერილ პროცესებზე. ისინი არ ვრცელდება პაროლებზე, რომლებსაც ცალკე აზიარებთ ჩატში, დოკუმენტში ან პლაგინის მეშვეობით.

შეუძლია თუ არა ჩემს dot-ს ჩემ ნაცვლად ანგარიშში შესვლა და უსაფრთხოების შემოწმებების გავლა?

უსაფრთხოების შემოწმების გასავლელად შეიძლება დაგჭირდეთ ავთენტიფიკაციის კოდის მიწოდება ან მართვის გადაბარება. 

შესყიდვები მოვაჭრეების ვებსაიტებზე შენახული ბარათებით

თქვენს dot-ს შესყიდვების განხორციელება მოვაჭრის ვებსაიტზე შენახული ბარათითაც შეუძლია. ამ შესყიდვებს თქვენი თანხმობა სჭირდება. მისი წინასწარ მიცემაც შეგიძლიათ, თუ ის კონკრეტულად ამ შესყიდვას მოიცავს.