მიმოხილვა
პლაგინი „შეხვედრები“ თქვენ ნაცვლად ადგენს ჩანაწერებს და ChatGPT-სივრცეში ინახავს თქვენზე მორგებულ შეჯამებებს შესასრულებელ დავალებებთან ერთად. შემდეგ შეგიძლიათ ეს ჩანაწერები ChatGPT-ში გამოიყენოთ და მათ საფუძველზე იმოქმედოთ.
„შეხვედრები“ ხელმისაწვდომია პლაგინის სახით ChatGPT-ის macOS-ის დესკტოპაპში. გამოიყენეთ „შეხვედრები“ ონლაინზარების ან პირისპირ საუბრების დროს — ზარზე ბოტის დამატების გარეშე.
ხელმისაწვდომობა
ვის შეუძლია „შეხვედრების“ გამოყენება?
„შეხვედრების“ ბეტა ვერსია ხელმისაწვდომია ChatGPT-ის macOS-ის დესკტოპაპში ყველა Pro და Business გეგმისთვის. მალე დაემატება iOS-ის, Android-ისა და Windows-ის მხარდაჭერა.
ხელმისაწვდომია „შეხვედრები“ ChatGPT Enterprise-ისთვის?
„შეხვედრები“ ჯერ არ არის საყოველთაოდ ხელმისაწვდომი ChatGPT Enterprise-ისთვის. ალფა პროგრამის ფარგლებში მას Enterprise-ის მომხმარებელთა შეზღუდულ ჯგუფთან ვამოწმებთ. ალფა პროგრამაში მონაწილეობის შესახებ ინფორმაციის მისაღებად დაუკავშირდით თქვენს ანგარიშზე პასუხისმგებელ მენეჯერს.
პირველი ნაბიჯები
როგორ გავმართო „შეხვედრები“?
გახსენით ChatGPT-ის დესკტოპაპი თქვენს Mac-ზე.
გვერდითა პანელში გახსენით პლაგინები.
იპოვეთ შეხვედრები და დააინსტალირეთ.
გვერდითა პანელში გახსენით შეხვედრები და გაიარეთ საწყისი გამართვის ნაბიჯები.
მოთხოვნის გამოჩენისას დაუშვით წვდომა მიკროფონსა და სისტემის ხმაზე.
აუცილებელია კალენდრის დაკავშირება?
არა. ჩანაწერების შედგენის დაწყება ხელითაც შეგიძლიათ, კალენდრის დაკავშირების გარეშე. შეხვედრების შეხსენებების მისაღებად და მომავალი შეხვედრების სანახავად დააკავშირეთ კალენდარი Google Calendar-ის ან Outlook Calendar-ის პლაგინით.
შეხვედრის ჩანაწერების შედგენა
რა უნდა გავაკეთო ჩანაწერების შედგენის დაწყებამდე?
შეხვედრის ყველა მონაწილეს აცნობეთ, რომ შეხვედრის ჩანაწერებს შეადგენთ, და დაწყებამდე ყველასგან მიიღეთ თანხმობა. აპში თანხმობის შეხსენება მხოლოდ თქვენ გიჩანთ. ის არც სხვა მონაწილეებს ატყობინებს და არც მათ თანხმობას იღებს თქვენ ნაცვლად.
როგორ შევადგინო შეხვედრის ჩანაწერები?
ChatGPT-ის აპში გახსენით შეხვედრები.
შეხვედრის ჩანაწერების შედგენის დასაწყებად დააწკაპეთ ღილაკზე ჩანაწერების შედგენა. დაწყებამდე დარწმუნდით, რომ ყველა მონაწილემ თანხმობა განაცხადა.
შეხვედრის გვერდზე დაამატეთ საკუთარი ჩანაწერები — პირადი მოსაზრებები, შეკითხვები ან დამატებითი კონტექსტი.
როცა დაასრულებთ, შეაჩერეთ ჩანაწერების შედგენა.
„შეხვედრები“ იყენებს ტრანსკრიპტს, თქვენს ჩანაწერებსა და შესაბამის კონტექსტს იმ დაკავშირებული აპებიდან, რომლებზეც წვდომა დაუშვით, რათა იმავე გვერდზე დაამატოს თქვენზე მორგებული შეჯამება და შემოთავაზებული დავალებები. თქვენი საკუთარი ჩანაწერებიც მათ გვერდით ინახება.
შეგიძლიათ გვერდი სხვებს გაუზიაროთ ან გადახედოთ შემოთავაზებულ დავალებებს და ChatGPT-ს მათზე მუშაობა დააწყებინოთ.
შეხვედრის ჩანაწერებთან მუშაობა
სად ვიპოვო ჩემი ჩანაწერები?
შეხვედრის ჩანაწერების საპოვნელად გვერდითა პანელიდან გახსენით „შეხვედრები“ ან მათი გვერდები ChatGPT-სივრცეში. სანამ ჩანაწერებს დაეყრდნობით ან გააზიარებთ, გადაამოწმეთ მნიშვნელოვანი დეტალები.
ასევე შეგიძლიათ ChatGPT-ს შეხვედრის შესახებ შეკითხვა დაუსვათ. მაგალითად:
„What was discussed in our team’s sync today?“
„When did I agree to schedule the follow-up with John in our last meeting?“
როგორ მარგებს ჩანაწერებს „შეხვედრები“ და როგორ მთავაზობს დავალებებს?
„შეხვედრები“ იყენებს რეჟიმს „ChatGPT მუშაობა“ და შესაბამის კონტექსტს თქვენი დაკავშირებული აპებიდან, რათა შეხვედრების შეჯამებები შეავსოს და შემდგომი დავალებები შემოგთავაზოთ, მაგალითად, ელწერილის მონახაზის შექმნა ან პროექტის გეგმის განახლება.
შეხვედრის გვერდზე შეგიძლიათ გადახედოთ და ჩაასწოროთ თითოეული შემოთავაზებული დავალება, შემდეგ კი ერთი დაწკაპებით დააწყებინოთ მასზე მუშაობა ChatGPT-ს.
კონფიდენციალურობა და მონაცემები
ვის შეუძლია ჩემი შეხვედრის ჩანაწერების ნახვა?
თქვენი შეხვედრის ჩანაწერებისთვის შექმნილი გვერდები ნაგულისხმევად პირადია. თავად წყვეტთ, გააზიაროთ თუ არა ისინი. შეხვედრის გვერდის გაზიარებისას მიმღებებს წვდომა ექნებათ ჩანაწერებზე, მაგრამ არა ტრანსკრიპტზე.
როგორ მუშავდება ჩემი აუდიო?
„შეხვედრები“ იყენებს თქვენი Mac-ის მიკროფონისა და სისტემის ხმას და რეალურ დროში გადასცემს მას OpenAI-ს შეხვედრის ჩანაწერების შესადგენად. როცა ჩანაწერები მზად იქნება, აუდიო წაიშლება თქვენი Mac-იდან და OpenAI-ის სერვერებიდან და მისი ხელახლა მოსმენა შეუძლებელი გახდება.
თუ ინტერნეტთან კავშირი არ გაქვთ ან დამუშავება არ დასრულებულა, აუდიო შეიძლება დროებით დარჩეს თქვენს Mac-ზე ატვირთვის ან დამუშავების დასრულების მოლოდინში.
პრობლემების მოგვარება
რატომ ვერ ვპოულობ ან ვერ ვიყენებ „შეხვედრებს“?
შეამოწმეთ, რომ:
იყენებთ ChatGPT-ის დესკტოპაპს macOS-ზე.
შესული ხართ ანგარიშსა და სამუშაო სივრცეში, რომელთა გეგმაშიც ეს ფუნქცია ხელმისაწვდომია.
განყოფილებიდან პლაგინები დააინსტალირეთ შეხვედრები.
თუ Business გეგმით სარგებლობთ, თქვენი სამუშაო სივრცისთვის ჩართულია ChatGPT-სივრცე და პლაგინი „შეხვედრები“. თუ რომელიმე მათგანი გამორთულია, დაუკავშირდით თქვენი სამუშაო სივრცის ადმინისტრატორს.
„შეხვედრები“ განსხვავდება ჩაწერის ფუნქციისგან, რომელიც ChatGPT-ის დესკტოპაპის ძველ ვერსიაში იყო.
რატომ აკლია საუბრის ნაწილი ჩემს ტრანსკრიპტს?
„შეხვედრებს“ სჭირდება წვდომა როგორც მიკროფონზე, ისე სისტემის ხმაზე:
მიკროფონი: გადასცემს თქვენს ხმასა და იმ ადამიანების საუბარს, რომლებიც თქვენს Mac-თან ახლოს არიან.
სისტემის ხმა: გადასცემს თქვენს Mac-ზე გაჟღერებულ ხმას, მათ შორის ონლაინშეხვედრის სხვა მონაწილეთა საუბარს.
შეამოწმეთ, ჩართულია თუ არა ორივე ნებართვა. თუ თქვენი ნათქვამი აკლია, ასევე შეამოწმეთ, რომ მიკროფონი, რომლის გამოყენებასაც აპირებთ, დაკავშირებულია და მუშაობს.
როგორ მუშაობს შეხვედრების შეხსენებები და ავტომატური შეჩერება?
„შეხვედრებმა“ შეიძლება შეგახსენოთ ჩანაწერების შედგენის დაწყება ან შეჩერება:
მომავალი შეხვედრები: თუ კალენდარი დაკავშირებული გაქვთ და შეხვედრების შეხსენებები ჩართულია, მომავალი შეხვედრების შესახებ შეხსენებებს მიიღებთ.
აღმოჩენილი შეხვედრები: „შეხვედრებს“ შეუძლია ამოიცნოს, როდის ხართ ზარზე, და შემოგთავაზოთ ჩანაწერების შედგენა მაშინაც კი, თუ შეხვედრა თქვენს კალენდარში არ არის.
შეჩერების შეხსენებები: თუ რამდენიმე წუთის განმავლობაში ხმა არ დაფიქსირდა, „შეხვედრები“ შეგახსენებთ, რომ შეწყვიტოთ ჩანაწერების შედგენა, თუკი შეხვედრა დასრულდა.
„შეხვედრები“ ასევე ავტომატურად წყვეტს ჩანაწერების შედგენას, როცა ლეპტოპის თავსახურს ხურავთ, დიდი ხნის განმავლობაში ხმა არ ფიქსირდება ან სესიის ხანგრძლივობა ოთხ საათს აღწევს. ჩანაწერების შედგენა ნებისმიერ დროს შეგიძლიათ ხელით შეაჩეროთ.
რატომ არ ვიღებ შეხვედრების შეხსენებებს?
შეამოწმეთ, რომ კალენდარი დაკავშირებულია და პარამეტრებში შეხვედრების შეხსენებები ჩართულია. ყოველთვის შეგიძლიათ გახსნათ „შეხვედრები“ და ჩანაწერების შედგენა ხელით დაიწყოთ.
რატომ არ არის ჩემი ჩანაწერები ჯერ მზად?
„შეხვედრები“ ჩანაწერებს ქმნის აუდიოს ატვირთვისა და დამუშავების დასრულების შემდეგ. ჩანაწერების შედგენას რომ შეაჩერებთ, ამ პროცესს შესაძლოა კიდევ რამდენიმე წუთი დასჭირდეს.
თუ შეხვედრის დროს თქვენი Mac ინტერნეტთან არ იყო დაკავშირებული, შეამოწმეთ ინტერნეტკავშირი, რომ აუდიო აიტვირთოს. აუდიო შეიძლება თქვენს Mac-ზე დარჩეს ატვირთვის ან დამუშავების დასრულების მოლოდინში.