Prism-იდან Codex-ზე გადასვლის გზამკვლევი

Prism მუშაობას წყვეტს. ეს გზამკვლევი დაგეხმარებათ შეინახოთ თქვენი კუთვნილი პროექტები და მათ LaTeX-ის საწყის კოდზე მუშაობა Codex-ში გააგრძელოთ. შეფერხებების თავიდან ასაცილებლად დაიწყეთ Prism-ის დახურვამდე.

რა მოუვა ჩემს მონაცემებს?

დახურვის შემდეგ Prism-თან დაკავშირებული ყველა მონაცემი წაიშლება. Prism-ის დახურვამდე გაიტანეთ თქვენი პროექტები და შეინახეთ სარეზერვო ასლი. წაშლილი მონაცემების აღდგენა შეუძლებელია. Codex-ს Prism-ში ხელმისაწვდომი მრავალი ფუნქციის მხარდაჭერა აქვს. მას შეუძლია გატანილი პროექტის სხვადასხვა ფაილზე მუშაობა და დაგეხმარებათ პროექტის რედაქტირებაში, ხარვეზების აღმოფხვრასა და აწყობაში, თუმცა Prism-ის რეალურ დროში ერთობლივი რედაქტირების ფუნქციას ვერ ჩაანაცვლებს. პროექტის ფაილებს არ გადაჰყვება პროექტის ისტორია, ტექსტში ჩართული კომენტარები, თანაავტორების წვდომის უფლებები და Zotero-სთან აქტიური კავშირი. მრავალფაილიანი LaTeX-პროექტების უმეტესობას ასევე სჭირდება TeX-ის ინსტრუმენტების ადგილობრივად დაყენებული ნაკრები. Codex-ზე წვდომა და გამოყენების ლიმიტები დამოკიდებულია თქვენს ChatGPT-ის გეგმასა და სამუშაო სივრცის მართვის პარამეტრებზე.

Prism-ის დახურვამდე

• მომხმარებლის ან სამუშაო სივრცის მენიუდან გახსენით პარამეტრები → მონაცემების მართვა → ყველა პროექტის ექსპორტი (zip) → zip-ის ჩამოტვირთვა. ასევე შეგიძლიათ თითოეული პროექტი ცალ-ცალკე გაიტანოთ: პროექტის სათაურის მენიუში აირჩიეთ ექსპორტი (zip).

• ამოაარქივეთ ჩამოტვირთული არქივი.

• სურვილისამებრ, გახსენით თითოეული მნიშვნელოვანი პროექტი, დარწმუნდით, რომ ჩატვირთულია ბოლოს წარმატებით შექმნილი PDF-ის წინასწარი ხედი, შემდეგ PDF-ის სანახავ პროგრამაში აირჩიეთ PDF-ის ჩამოტვირთვა. შეინახეთ ეს PDF შემდგომში შესადარებლად.

• გადაიტანეთ საქაღალდე Codex-ში მაუსით და შეიყვანეთ მოთხოვნა: „მოამზადე ეს PDF-პროექტი და გაუკეთე კომპილაცია“.

ყველა პროექტის არქივში ზოგიერთ პროექტს შეიძლება ჰქონდეს conversations საქაღალდე. შეინახეთ ეს JSON-ფაილები საცნობაროდ; ისინი Codex-ში Prism-ის ჩატებს ავტომატურად არ აღადგენს. გაზიარებული პროექტის შემთხვევაში, რომლის მფლობელიც არ ხართ, პროექტის მენიუდან მიღებული ZIP შეიცავს პროექტის ფაილებს, მაგრამ არა თქვენს Prism-ის საუბრების ისტორიას.

ერთი პროექტის Codex-ში გადატანა

1. ამოაარქივეთ პროექტი ცალკე საქაღალდეში და შეინარჩუნეთ საქაღალდეების სტრუქტურა.

2. დააყენეთ ან გახსენით ChatGPT-ის კომპიუტერის აპი, შედით ანგარიშში და აირჩიეთ Codex. იხილეთ Codex-ის სწრაფი დაწყების გზამკვლევი.

3. აირჩიეთ ახალი პროექტის დამატება ან macOS-ზე დააჭირეთ Cmd+O-ს, შემდეგ აირჩიეთ პროექტის ძირეული საქაღალდე. იხილეთ პროექტები და ჩატები.

4. დაიწყეთ ჩატი რეჟიმში ლოკალური / ეს კომპიუტერი, რათა Codex-მა თქვენს კომპიუტერში არსებულ ფაილებთან მუშაობა შეძლოს. საწყის ეტაპზე ჩართული დატოვეთ დადასტურების მოთხოვნა. იხილეთ Codex-ის გარემოები და წვდომის უფლებები.

5. სანამ რამეს შეცვლით, სთხოვეთ Codex-ს პროექტის შემოწმება.
   
   _{შეამოწმე ეს LaTeX-პროექტი ცვლილებების შეტანის გარეშე. დაადგინე ძირითადი დოკუმენტი, საჭირო TeX-ის ძრავა, არსებული აწყობის ბრძანება, ბიბლიოგრაფიასთან მუშაობის პროცესი, ილუსტრაციები, მორგებული პაკეტები და რა საჭირო კომპონენტები აკლია პროექტს. შეინარჩუნე მრავალფაილიანი სტრუქტურა. სანამ რამეს გაუშვებ ან დაარედაქტირებ, მარტივი ენით აღწერე შემოწმების შედეგები.}

   ---

6. სთხოვეთ Codex-ს პროექტის latexm.rc ფაილის გაშვება. თუ ასეთი ფაილი არ არსებობს, სთხოვეთ, ჯერ განსაზღვროს მინიმალური შესაფერისი ლოკალური კონფიგურაცია.
   
   _{გაუკეთე ძირითად დოკუმენტს კომპილაცია პროექტის აწყობის არსებული პროცესით. თუ კომპილაცია ვერ შესრულდება, მარტივი ენით ახსენი პირველი შეცდომა, რომლის გამოსწორებაც შესაძლებელია, და შემომთავაზე მინიმალური შესწორება. პროგრამული უზრუნველყოფის დაყენებამდე ან ფაილების შეცვლამდე მკითხე. აწყობის შეცდომის დასამალად ხელნაწერის შიგთავსი არ გადაწერო.}

   ---

7. გახსენით შექმნილი PDF ჩატის გვერდით და შეადარეთ Prism-იდან მიღებულ ბოლო PDF-ს. Codex-ს შეუძლია ლოკალური ფაილების წინასწარ ჩვენება, თუმცა მისი ჩაშენებული LaTeX-კომპილატორი განკუთვნილია ცალკეული .tex ფაილებისთვის და არა Prism-ის სრული მრავალფაილიანი პროექტისთვის.
   
   _{შეადარე ახალი PDF Prism-იდან მიღებულ ბოლო PDF-ს. შეამოწმე სათაური და ავტორები, სექციების თანმიმდევრობა, ილუსტრაციები, ცხრილები, განტოლებების ნუმერაცია, ციტირებები, ბიბლიოგრაფია და გვერდების რაოდენობა. სანამ რომელიმე საწყის ფაილს დაარედაქტირებ, აღწერე ყველა განსხვავება.}

   ---

8. რედაქტირება განაგრძეთ მხოლოდ მას შემდეგ, რაც პროექტი წარმატებით აიწყობა და შედეგი თქვენს მოლოდინს დაემთხვევა. შეინახეთ სარეზერვო ასლები და შეარჩიეთ ისტორიის შენახვისა და თანამშრომლობის ახალი სამუშაო პროცესი.

რა იცვლება ექსპორტის შემდეგ

სასარგებლო საწყისი მოთხოვნა

შექმენი მოკლე README, რომელიც განმარტავს ამ პროექტის კომპილაციის წესს და მიუთითებს მთავარ ფაილს, TeX-ის ძრავას, ბიბლიოგრაფიის ინსტრუმენტს, საჭირო პაკეტებსა და შედეგის შემოწმების ნაბიჯებს. შენახვამდე მაჩვენე სამუშაო ვერსია.

თანამშრომლობა და სარეზერვო ასლები

Codex თქვენ მიერ არჩეულ საქაღალდეში არსებულ ფაილებს არედაქტირებს. რედაქტირების პირველ დავალებამდე შეინახეთ ექსპორტის უცვლელი ასლი და შექმენით სამუშაო ასლი. მარტივი სამუშაო პროცესისთვის შეინახეთ საკვანძო ეტაპების ასლები თარიღების მითითებით ან გამოიყენეთ თქვენი დაწესებულების მიერ დამტკიცებული სარეზერვო სისტემა, რომელიც ფაილების ისტორიას ინახავს. გუნდებისთვის, რომლებიც ვერსიების კონტროლს კარგად ფლობენ, Git-ს შეუძლია ცვლილებების უფრო ზუსტი ისტორიის შენახვა, თუმცა მისი გამოყენება სავალდებულო არ არის. რადგან Codex-ის ლოკალური პროექტები Prism-ის მსგავსად რეალურ დროში რედაქტირებას არ უზრუნველყოფს, თანაავტორები უნდა შეთანხმდნენ ფაილების გაცვლის წესზე და მოერიდონ ერთი და იმავე ასლის ერთდროულ რედაქტირებას, თუ მათ მიერ არჩეული თანამშრომლობის ინსტრუმენტი ამას უსაფრთხოდ არ უჭერს მხარს.

თუ პრობლემა წარმოიშვა

• ექსპორტი ვერ შესრულდა: შეამოწმეთ export-errors.json და ხელახლა სცადეთ პროექტის მენიუდან ექსპორტი (zip) მოქმედებით. თუ პროექტი კვლავ აკლია ან დახმარება გჭირდებათ, მოგვწერეთ მისამართზე support@openai.com.

• პროექტის კომპილაცია ვერ სრულდება: სთხოვეთ Codex-ს, მიუთითოს პირველი შეცდომა, რომლის გამოსწორებაც შესაძლებელია, და საჭირო ძრავა ან პაკეტი. პროგრამული უზრუნველყოფის დაყენება მხოლოდ დამტკიცებული წყაროდან დაუშვით.

• Codex ვერ ხსნის საქაღალდეს: გაეცანით Codex-ის პრობლემების მოგვარების გზამკვლევს და, თუ ოპერაციული სისტემა მოგთხოვთ, დაუშვით არჩეულ საქაღალდეზე წვდომა.