მიმოხილვა
API-ის გამოყენებაზე ვრცელდება მოთხოვნების ლიმიტები. ეს ლიმიტები ზღუდავს მოთხოვნების, ტოკენების ან სხვა რესურსების გამოყენებას განსაზღვრული პერიოდის განმავლობაში.
პასუხი კოდით 429 შეიძლება მიუთითებდეს მოთხოვნების დროებით ლიმიტზე, წინასწარ შევსებული ბალანსის ამოწურვაზე ან ხარჯვისა თუ გამოყენების ლიმიტზე. ხელახლა ცდამდე ან გადახდის პარამეტრების შეცვლამდე შეამოწმეთ შეცდომის დეტალები.
დაადგინეთ მიზეზი
წაიკითხეთ შეცდომის შეტყობინება და error.code, თუ ის მითითებულია. გადახდასთან დაკავშირებული შეცდომებისთვისაც შეიძლება გამოყენებული იყოს error.type-ის უფრო ზოგადი მნიშვნელობა insufficient_quota.
| შეცდომა ან კოდი | რას ნიშნავს | როგორ მოიქცეთ |
| მიღწეულია მოთხოვნების ან ტოკენების რაოდენობის ლიმიტი | მოთხოვნები აჭარბებს მოქმედ მოთხოვნების ლიმიტს. | გაანაწილეთ მოთხოვნები დროში და მიჰყევით ქვემოთ მოცემულ ხელახალი ცდის რეკომენდაციებს. |
| credit_balance_exhausted | ორგანიზაციას წინასწარ შეძენილი კრედიტები აღარ დარჩა. | დაამატეთ კრედიტები API-ის გადახდის პარამეტრებში. |
| organization_usage_limit_exceeded | ორგანიზაციამ მიაღწია OpenAI-ის მიერ განსაზღვრულ გამოყენების ლიმიტს. | მოითხოვეთ გამოყენების უფრო მაღალი ლიმიტის დამტკიცება. |
| organization_spend_limit_exceeded | ორგანიზაციამ მიაღწია ხარჯვის სავალდებულო ლიმიტს. | გაზარდეთ ან მოხსენით ლიმიტი, ან დაელოდეთ ყოველთვიურ განულებას. |
| project_spend_limit_exceeded | პროექტმა მიაღწია ხარჯვის სავალდებულო ლიმიტს. | გაზარდეთ ან მოხსენით პროექტის ლიმიტი, ან დაელოდეთ ყოველთვიურ განულებას. |
გადახდის, ხარჯვის ან კვოტის შეცდომის შემდეგ მოთხოვნის ხელახლა გაგზავნა წვდომას არ აღადგენს. ჯერ მოაგვარეთ მითითებული ბალანსის ან ლიმიტის პრობლემა. ხარჯვის სავალდებულო ლიმიტების ცვლილებების ამოქმედებას შეიძლება დრო დასჭირდეს.
ხარჯვის ლიმიტის შესაცვლელად საჭიროა შესაბამისი ორგანიზაციის ან პროექტის პარამეტრების მართვის ნებართვა. თუ წვდომა არ გაქვთ, მიმართეთ პირს, რომელიც ამ პარამეტრებს მართავს.
კრედიტების წინასწარ შესაძენად იხილეთ: API-ის წინასწარი გადახდის დაყენება და მართვა.
ხარჯვის კონტროლის სხვადასხვა მექანიზმის შესახებ იხილეთ API-ის ხარჯვის ლიმიტების სახელმძღვანელო.
შეამოწმეთ მოთხოვნების მოქმედი ლიმიტები
გადადით თქვენი ორგანიზაციის ლიმიტების გვერდზე, რათა ნახოთ გამოყენების მიმდინარე დონე და ლიმიტები.
მოთხოვნების ლიმიტები შეიძლება მოქმედებდეს ორგანიზაციისა და პროექტის დონეზე. ეს არ არის ცალკეული მომხმარებლებისთვის გამოყოფილი კვოტები. ლიმიტები მოდელის მიხედვითაც განსხვავდება, ხოლო მოდელების ზოგიერთ ოჯახს საერთო ლიმიტი აქვს.
შეამოწმეთ, რომელ ლიმიტზე მიუთითებს შეცდომა. მაგალითად, წუთში მოთხოვნების რაოდენობასა და წუთში ტოკენების რაოდენობაზე ცალ-ცალკე ლიმიტები მოქმედებს. შეიძლება ერთ ლიმიტს მიაღწიოთ, მეორეს კი ჯერ არ მიახლოებოდეთ.
შეამოწმეთ სურათის გენერირების API-ის ლიმიტები
სურათის გენერირების API-ის მოთხოვნების ლიმიტები დამოკიდებულია მოდელსა და თქვენი გამოყენების დონეზე. ლიმიტების სანახავად აირჩიეთ თქვენი მოდელი მოდელების გვერდზე.
გამართვის ინსტრუქციებისთვის იხილეთ სურათის გენერირების სახელმძღვანელო დეველოპერებისთვის. გამოყენების დონეების შესახებ მეტი ინფორმაციისთვის იხილეთ API-ის მოთხოვნების ლიმიტების სახელმძღვანელო.
გადაამოწმეთ, რომელ ორგანიზაციას იყენებს თქვენი მოთხოვნა
თუ რამდენიმე ორგანიზაციის წევრი ხართ, დარწმუნდით, რომ თქვენი მოთხოვნები სასურველ ორგანიზაციასა და პროექტს იყენებს.
თუ თქვენი API გასაღები ნაგულისხმევ ორგანიზაციას იყენებს, შეამოწმეთ ნაგულისხმევი ორგანიზაციის პარამეტრი. სხვადასხვა ორგანიზაციას შეიძლება გადახდის განსხვავებული პირობები და გამოყენების დონეები ჰქონდეს.
შეამცირეთ მოთხოვნების ლიმიტით გამოწვეული დროებითი შეცდომები
გაანაწილეთ მოთხოვნები დროში და მოერიდეთ ერთბაშად გაგზავნას
ერთდროულად დიდი რაოდენობით გაგზავნის ნაცვლად, მოთხოვნები დროში გაანაწილეთ.
მოთხოვნების ლიმიტები შეიძლება ნაჩვენებ ინტერვალზე მოკლე პერიოდებზეც ვრცელდებოდეს. მაგალითად, წუთში 60 მოთხოვნის ლიმიტი შეიძლება 1-წამიან პერიოდებზეც კონტროლდებოდეს. ამიტომ მოკლე დროში ბევრი მოთხოვნის გაგზავნამ შეიძლება შეცდომა გამოიწვიოს მაშინაც კი, თუ საშუალო გამოყენება წუთობრივ ლიმიტზე ნაკლები ჩანს.
გრძელმა მოთხოვნებმა და გამომავალი ტოკენებისთვის ზედმეტად მაღალი ზღვრის დაწესებამაც შეიძლება ტოკენების სიხშირის ლიმიტთან დაკავშირებული შეცდომები გამოიწვიოს.
მოიცადეთ და ხელახლა სცადეთ
მოთხოვნების ლიმიტით გამოწვეული დროებითი შეცდომების შემთხვევაში:
შეამოწმეთ, შეიცავს თუ არა პასუხი Retry-After სათაურს.
თუ სათაურში მითითებულია დაყოვნების ვალიდური დრო, ხელახლა ცდამდე მოიცადეთ სულ მცირე ამ ხნის განმავლობაში.
თუ სათაური არ არის ან არავალიდურია, გამოიყენეთ ექსპონენციალურად მზარდი დაყოვნება შემთხვევითი ცვალებადობით: ყოველი წარუმატებელი მცდელობის შემდეგ გაზარდეთ ლოდინის დრო და დაამატეთ მცირე, შემთხვევითი დაყოვნება.
შეზღუდეთ როგორც განმეორებითი მცდელობების რაოდენობა, ისე მათზე დახარჯული ჯამური დრო.
OpenAI-ის ოფიციალური SDK-ები მოთხოვნების ლიმიტთან დაკავშირებული შესაბამისი შეცდომებისას უკვე ავტომატურად იმეორებს მოთხოვნებს და ითვალისწინებს Retry-After სათაურს, თუ ის მითითებულია. ხელახალი ცდების კიდევ ერთი ციკლის დამატებამდე გაითვალისწინეთ ეს განმეორებითი მცდელობები.
წარუმატებელი მოთხოვნებიც ითვლება წუთობრივ ლიმიტებში. ერთი და იმავე მოთხოვნის განუწყვეტლივ ხელახლა გაგზავნამ შეიძლება პრობლემის მოგვარება შეაფერხოს.
განხორციელების რეკომენდაციებისა და მაგალითებისთვის იხილეთ API-ის მოთხოვნების ლიმიტების სახელმძღვანელო. მესამე მხარის ხელახალი ცდის ბიბლიოთეკა თქვენს აპლიკაციაში გამოყენებამდე შეამოწმეთ.
შეამოწმეთ მოთხოვნისა და პასუხის მოცულობა
ამოიღეთ მოთხოვნებიდან არასაჭირო ინსტრუქციები, განმეორებული კონტექსტი და მაგალითები. გამოსცადეთ შეცვლილი მოთხოვნა, რათა დარწმუნდეთ, რომ ის კვლავ სასურველ შედეგს იძლევა.
გამოიყენეთ გამომავალი ტოკენების ის პარამეტრი, რომელსაც თქვენი საბოლოო წერტილი და მოდელი უჭერს მხარს:
Chat Completions იყენებს max_completion_tokens პარამეტრს.
Responses იყენებს max_output_tokens პარამეტრს.
არ დააწესოთ მოთხოვნისთვის საჭიროზე გაცილებით მაღალი ზღვარი. ეს პარამეტრები მოიცავს როგორც მსჯელობის ტოკენებს, ისე ხილულ პასუხს, ამიტომ მსჯელობის მოდელის გამოყენებისას ორივესთვის საკმარისი მოცულობა გაითვალისწინეთ.
შეამოწმეთ თქვენი გამოყენების დონე
თუ მოთხოვნების ერთბაშად გაგზავნის შემცირებისა და ტოკენების გამოყენების შემოწმების შემდეგ შეცდომები კვლავ ჩნდება, ლიმიტების გვერდზე ნახეთ ლიმიტების გაზრდის ხელმისაწვდომი გზები.
თქვენი ორგანიზაციის ფასიანი გამოყენების დონე ავტომატურად იზრდება, როცა კრედიტების შესაძენად დახარჯული ჯამური თანხა Build, Launch და Grow დონეების ზღვრებს აღწევს. უფრო მაღალი დონეები, როგორც წესი, მოთხოვნების უფრო მაღალ ლიმიტებს ითვალისწინებს. დონეების მოთხოვნები იხილეთ API-ის მოთხოვნების ლიმიტების სახელმძღვანელოში.
თქვენთვის დამტკიცებული გამოყენების თვიური ლიმიტი განცალკევებულია მოთხოვნებისა და ტოკენების სიხშირის ლიმიტებისგან. ერთის გაზრდა არ ადასტურებს, რომ მეორეც შეიცვალა.
თუ პრობლემა კვლავ გრძელდება
დახმარებისთვის მიმართვამდე
მოამზადეთ შეცდომის შეტყობინების ზუსტი ტექსტი, შეცდომის კოდი, შესაბამისი მოთხოვნების ID-ები, შეცდომის დრო თქვენი დროის სარტყლის მითითებით და თქვენს ანგარიშში ნაჩვენები შესაბამისი ლიმიტი. აღნიშნეთ, რა ნაბიჯები გადადგით უკვე.
დაუკავშირდით OpenAI-ის მხარდაჭერის გუნდს
თუ მითითებული ლიმიტის შემოწმების შემდეგ პრობლემას ვერ აგვარებთ, დახმარების ცენტრის მეშვეობით დაუკავშირდით OpenAI-ის მხარდაჭერის გუნდს. არ მიუთითოთ API გასაღებები ან ავთენტიფიკაციის სხვა საიდუმლო მონაცემები.