ಅವಲೋಕನ

OpenAI Presence ನಿರ್ವಹಣಾ ಸೇವೆಯೊಂದಿಗೆ ಒದಗಿಸುವ ಸಾಂಸ್ಥಿಕ ವೇದಿಕೆಯಾಗಿದೆ. ಬೃಹತ್ ಪ್ರಮಾಣದ ಹಾಗೂ ಗಂಭೀರ ಪರಿಣಾಮಗಳನ್ನು ಬೀರಬಲ್ಲ ಕಾರ್ಯಪ್ರವಾಹಗಳಿಗಾಗಿ ಆಡಳಿತ ನಿಯಂತ್ರಣಕ್ಕೆ ಒಳಪಟ್ಟ ಕೃತಕ ಬುದ್ಧಿಮತ್ತೆಯ ಏಜೆಂಟ್‌ಗಳನ್ನು ನಿರ್ಮಿಸಲು, ನಿಯೋಜಿಸಲು, ಕಾರ್ಯನಿರ್ವಹಿಸುವಂತೆ ಮಾಡಲು ಮತ್ತು ನಿರಂತರವಾಗಿ ಸುಧಾರಿಸಲು ಇದು ನೆರವಾಗುತ್ತದೆ.

ನೀತಿಗಳು ಮತ್ತು ಅನುಮತಿಗಳನ್ನು ನಿರ್ಧರಿಸಲು, ವ್ಯವಹಾರ ವ್ಯವಸ್ಥೆಗಳನ್ನು ಸಂಪರ್ಕಿಸಲು, ಏಜೆಂಟ್‌ನ ವರ್ತನೆಯನ್ನು ಪರೀಕ್ಷಿಸಲು, ನೈಜ ಬಳಕೆಯ ಫಲಿತಾಂಶಗಳನ್ನು ಮೇಲ್ವಿಚಾರಣೆ ಮಾಡಲು ಮತ್ತು ಮಾನವ ವಿವೇಚನೆ ಅಗತ್ಯವಾದಾಗ ಜನರನ್ನು ಒಳಗೊಳ್ಳಲು ಸಂಸ್ಥೆಗಳಿಗೆ ಬೇಕಾದ ಸಾಧನಗಳನ್ನು Presence, OpenAI ಮಾಡೆಲ್‌ಗಳೊಂದಿಗೆ ಸಂಯೋಜಿಸುತ್ತದೆ.

ಈ ಲೇಖನವು ಸಾಮಾನ್ಯ ಅವಲೋಕನವನ್ನು ನೀಡುತ್ತದೆ. ಪ್ರತಿ ನಿಯೋಜನೆಗೂ ನಿಖರ ವೈಶಿಷ್ಟ್ಯಗಳು, ಮಾಡೆಲ್‌ಗಳು, ಸಂವಹನ ಮಾಧ್ಯಮಗಳು, ಸಾಮರ್ಥ್ಯ, ದತ್ತಾಂಶ ನಿರ್ವಹಣೆ, ದರಗಳು ಮತ್ತು ಸೇವಾ ಬದ್ಧತೆಗಳನ್ನು ನಿರ್ಧರಿಸಲಾಗುತ್ತದೆ.

OpenAI Presence ಯಾರಿಗಾಗಿ?

ಬೃಹತ್ ಪ್ರಮಾಣದಲ್ಲಿ ಮರುಕಳಿಸುವ ಕಾರ್ಯಪ್ರವಾಹಗಳಿಗೆ ದೃಢವಾದ ಆಡಳಿತ, ವಿಶ್ವಾಸಾರ್ಹತೆ ಮತ್ತು ಕಾರ್ಯಾಚರಣೆಯ ಮೇಲ್ವಿಚಾರಣೆ ಅಗತ್ಯವಿರುವ ಸಂಸ್ಥೆಗಳಿಗಾಗಿ OpenAI Presence ಅನ್ನು ವಿನ್ಯಾಸಗೊಳಿಸಲಾಗಿದೆ. ಗ್ರಾಹಕ ಬೆಂಬಲ ಮತ್ತು ಧ್ವನಿ ಸಂವಹನವು ಆರಂಭಿಕ ಬಳಕೆಗೆ ಸೂಕ್ತವಾದ ಕ್ಷೇತ್ರಗಳಾಗಿವೆ. ಆದರೆ Presence ಗ್ರಾಹಕರೊಂದಿಗಿನ ಹಾಗೂ ಆಂತರಿಕ ಕಾರ್ಯಪ್ರವಾಹಗಳೆರಡನ್ನೂ ಬೆಂಬಲಿಸುತ್ತದೆ.

Presence ಪ್ರಸ್ತುತ ಸೀಮಿತ ಸಾಮಾನ್ಯ ಲಭ್ಯತೆಯ (ಸೀಮಿತ ಜಿಎ) ಮೂಲಕ ನಿರ್ವಹಣಾ ಸೇವೆಯೊಂದಿಗೆ ನಿಯೋಜನೆಗೆ ಲಭ್ಯವಿದೆ (ಕೆಳಗೆ ನೋಡಿ). ಇದು ನೀವೇ ಸ್ವತಃ ಹೊಂದಿಸಿ ಬಳಸಬಹುದಾದ ಉತ್ಪನ್ನವಲ್ಲ. ಪ್ರವೇಶವು ಕಾರ್ಯಪ್ರವಾಹಕ್ಕೆ ಇದು ಎಷ್ಟು ಸೂಕ್ತವಾಗಿದೆ, ಅನುಷ್ಠಾನಕ್ಕೆ ಸಿದ್ಧತೆ ಮತ್ತು ಸೇವೆ ಒದಗಿಸಲು ಲಭ್ಯವಿರುವ ಸಾಮರ್ಥ್ಯವನ್ನು ಅವಲಂಬಿಸಿರುತ್ತದೆ. ಹೆಚ್ಚಿನ ಮಾಹಿತಿಗಾಗಿ ನಿಮ್ಮ OpenAI ಖಾತೆ ಪ್ರತಿನಿಧಿಯನ್ನು ಸಂಪರ್ಕಿಸಿ.

Presence ಏಜೆಂಟ್ ಏನು ಮಾಡಬಹುದು?

ಕೆಳಗಿನ ಕೆಲಸಗಳನ್ನು ಮಾಡಲು Presence ಏಜೆಂಟ್ ಅನ್ನು ಸಂರಚಿಸಬಹುದು:

• ಅನುಮೋದಿತ ಸೂಚನೆಗಳು, ಪ್ರಮಾಣಿತ ಕಾರ್ಯಾಚರಣಾ ವಿಧಾನಗಳು (ಎಸ್‌ಒಪಿಗಳು) ಮತ್ತು ಸಂಸ್ಥೆಯ ನೀತಿಗಳನ್ನು ಅನುಸರಿಸುವುದು.

• ಅನುಮೋದಿತ ಜ್ಞಾನವನ್ನು ಬಳಸುವುದು ಮತ್ತು ಸೀಮಿತ ಕಾರ್ಯವ್ಯಾಪ್ತಿಯ ಅನುಮತಿಗಳಿರುವ ಎಪಿಐಗಳು ಹಾಗೂ ಸಾಧನಗಳ ಮೂಲಕ ವ್ಯವಹಾರ ವ್ಯವಸ್ಥೆಗಳಿಗೆ ಸಂಪರ್ಕಿಸುವುದು.

• ಮಾಹಿತಿಯನ್ನು ಪಡೆಯುವುದು, ವ್ಯವಸ್ಥೆಗಳನ್ನು ನವೀಕರಿಸುವುದು ಮತ್ತು ಅನುಮೋದಿತ ಕ್ರಮಗಳನ್ನು ಪೂರ್ಣಗೊಳಿಸುವುದು.

• ನಿಯೋಜನೆಗೆ ಅನುಗುಣವಾಗಿ, ಬೆಂಬಲಿತ ಧ್ವನಿ ಅಥವಾ ಪಠ್ಯ ಸಂವಾದ ಸೌಲಭ್ಯಗಳ ಮೂಲಕ ಸಂವಹನ ನಡೆಸುವುದು.

• ನೀತಿ, ಅಪಾಯ ಅಥವಾ ಕಾರ್ಯಪ್ರವಾಹದ ಕಾರಣದಿಂದ ಮಾನವ ವಿವೇಚನೆ ಅಗತ್ಯವಾದಾಗ ವ್ಯಕ್ತಿಗೆ ಅಥವಾ ಮತ್ತೊಂದು ಬೆಂಬಲ ಮಾರ್ಗಕ್ಕೆ ವರ್ಗಾಯಿಸುವುದು.

ತಾಂತ್ರಿಕ ಕಾರ್ಯವ್ಯಾಪ್ತಿಯನ್ನು ನಿರ್ಧರಿಸುವಾಗ ನಿಖರ ಸಾಮರ್ಥ್ಯಗಳು ಮತ್ತು ಏಕೀಕರಣಗಳನ್ನು ದೃಢಪಡಿಸಲಾಗುತ್ತದೆ.

Presence ಏಜೆಂಟ್‌ನ ಆಡಳಿತವನ್ನು ಹೇಗೆ ನಿರ್ವಹಿಸಲಾಗುತ್ತದೆ?

ಏಜೆಂಟ್‌ಗಳನ್ನು ಪರೀಕ್ಷಿಸಲು ಮತ್ತು ನೈಜ ಬಳಕೆಯಲ್ಲಿ ಕಾರ್ಯನಿರ್ವಹಿಸುವಂತೆ ಮಾಡಲು Presence ನಿಯಂತ್ರಣಗಳನ್ನು ಒಳಗೊಂಡಿದೆ. ನಿಯೋಜನೆಗೆ ಅನುಗುಣವಾಗಿ, ಇವುಗಳಲ್ಲಿ ಕೆಳಗಿನವು ಸೇರಿರಬಹುದು:

• ಬಿಡುಗಡೆಗೆ ಮುನ್ನ ಸಾಮಾನ್ಯ ಕಾರ್ಯಪ್ರವಾಹಗಳು ಮತ್ತು ಅಪರೂಪದ ಸನ್ನಿವೇಶಗಳನ್ನು ಪರೀಕ್ಷಿಸುವ ಅನುಕರಣೆಗಳು ಹಾಗೂ ಮೌಲ್ಯಮಾಪನಗಳು.

• ಏಜೆಂಟ್ ಏನು ಮಾಡಬಹುದು ಎಂಬುದನ್ನು ನಿರ್ಧರಿಸುವ ಸುರಕ್ಷತಾ ಮಿತಿಗಳು, ಅನುಮತಿಗಳು ಮತ್ತು ಅನುಮೋದನೆಯ ಹಂತಗಳು.

• ಏಜೆಂಟ್ ಅನ್ನು ಸುಧಾರಿಸಲು ತಂಡಗಳು ಪರಿಶೀಲಿಸಬಹುದಾದ ಅಧಿವೇಶನದ ದಾಖಲೆಗಳು, ಕೈಗೊಂಡ ಕ್ರಮಗಳ ಇತಿಹಾಸ ಮತ್ತು ಗುಣಮಟ್ಟದ ಸೂಚಕಗಳು.

• ಮಾನವ ನೆರವಿಗೆ ವರ್ಗಾಯಿಸುವ ಮಾರ್ಗಗಳು ಮತ್ತು ಜವಾಬ್ದಾರಿ ವಹಿಸಿಕೊಳ್ಳುವ ತಂಡಕ್ಕೆ ವ್ಯವಸ್ಥಿತವಾಗಿ ಒದಗಿಸುವ ಸಾಂದರ್ಭಿಕ ಮಾಹಿತಿ.

• ಹೊಸ ಆವೃತ್ತಿಗಳ ನಿಯಂತ್ರಿತ ಬಿಡುಗಡೆ, ಮೇಲ್ವಿಚಾರಣೆ ಮತ್ತು ಹಿಂದಿನ ಆವೃತ್ತಿಗೆ ಮರಳಿಸುವ ಪ್ರಕ್ರಿಯೆಗಳು.

ಈ ನಿಯಂತ್ರಣಗಳು ಸಂಸ್ಥೆಗಳಿಗೆ ಬಿಡುಗಡೆಯ ಮೊದಲು ಬದಲಾವಣೆಗಳನ್ನು ಮೌಲ್ಯಮಾಪನ ಮಾಡಲು ಮತ್ತು ನೈಜ ಬಳಕೆಯ ಪುರಾವೆಗಳ ಆಧಾರದಲ್ಲಿ ಏಜೆಂಟ್ ಅನ್ನು ಸುಧಾರಿಸಲು ನೆರವಾಗುತ್ತವೆ. ಜೊತೆಗೆ, ನಿಯಂತ್ರಣವು ಸಂಸ್ಥೆಯ ಕೈಯಲ್ಲೇ ಉಳಿಯುವಂತೆ ಮಾಡುತ್ತವೆ.

ನಿಯೋಜನೆ ಹೇಗೆ ನಡೆಯುತ್ತದೆ?

ಗ್ರಾಹಕರೊಂದಿಗೆ ನೇರವಾಗಿ ಕಾರ್ಯನಿರ್ವಹಿಸುವ OpenAI ಎಂಜಿನಿಯರ್‌ಗಳು, ಆಯ್ದ ನಿಯೋಜನಾ ಪಾಲುದಾರರು ಅಥವಾ ಇಬ್ಬರೂ ಸೇರಿ ನಿರ್ವಹಿತ ಪ್ರಕ್ರಿಯೆಯ ಮೂಲಕ ಗ್ರಾಹಕರೊಂದಿಗೆ ಕೆಲಸ ಮಾಡುತ್ತಾರೆ. ಈ ಪ್ರಕ್ರಿಯೆಯಲ್ಲಿ ಸಾಮಾನ್ಯವಾಗಿ ಇವು ಸೇರಿರುತ್ತವೆ:

1. ವ್ಯವಹಾರದ ನಿರೀಕ್ಷಿತ ಫಲಿತಾಂಶಗಳು, ಯಶಸ್ಸಿನ ಮಾನದಂಡಗಳು ಮತ್ತು ಆರಂಭಿಕ ಕಾರ್ಯಪ್ರವಾಹಗಳನ್ನು ನಿರ್ಧರಿಸುವುದು.

2. ಅಗತ್ಯ ವ್ಯವಸ್ಥೆಗಳನ್ನು ಸಂಪರ್ಕಿಸುವುದು ಮತ್ತು ನೀತಿಗಳು, ಅನುಮತಿಗಳು ಹಾಗೂ ಉನ್ನತ ಮಟ್ಟದ ನೆರವಿಗೆ ವರ್ಗಾಯಿಸುವ ಮಾರ್ಗಗಳನ್ನು ವ್ಯವಸ್ಥೆಯಲ್ಲಿ ಅಳವಡಿಸುವುದು.

3. ನಿಯೋಜನೆಗಾಗಿ ಭದ್ರತೆ, ಗೌಪ್ಯತೆ ಮತ್ತು ಕಾನೂನು ಪರಿಶೀಲನೆಯನ್ನು ಪೂರ್ಣಗೊಳಿಸುವುದು.

4. ಅನುಕರಣೆಗಳು, ಮೌಲ್ಯಮಾಪನಗಳು ಮತ್ತು ಸ್ವೀಕೃತಿ ಪರೀಕ್ಷೆಗಳನ್ನು ನಡೆಸುವುದು.

5. ನಿಯಂತ್ರಿತ ರೀತಿಯಲ್ಲಿ ಹಂತ ಹಂತವಾಗಿ ನೈಜ ಬಳಕೆಗೆ ತರುವುದು ಮತ್ತು ಫಲಿತಾಂಶಗಳನ್ನು ಮೇಲ್ವಿಚಾರಣೆ ಮಾಡುವುದು.

6. ಪುರಾವೆಗಳನ್ನು ಪರಿಶೀಲಿಸುವುದು ಮತ್ತು ಕಾಲಕ್ರಮೇಣ ಪರೀಕ್ಷಿತ ಸುಧಾರಣೆಗಳನ್ನು ಅಳವಡಿಸುವುದು.

ದಾಖಲೆಗಳನ್ನು ಒದಗಿಸಿದ ಮಾತ್ರಕ್ಕೆ Presence ಏಜೆಂಟ್ ನೈಜ ಬಳಕೆಗೆ ಸಿದ್ಧವಾಗುವುದಿಲ್ಲ. ಪ್ರತಿ ನಿಯೋಜನೆಯನ್ನು ಪ್ರಾರಂಭಿಸುವ ಮೊದಲು ಕಾರ್ಯವ್ಯಾಪ್ತಿ ನಿರ್ಧಾರ, ಏಕೀಕರಣ, ಪರೀಕ್ಷೆ, ಪರಿಶೀಲನೆ ಮತ್ತು ಅನುಮೋದನೆ ಅಗತ್ಯ.

OpenAI Presence ಯಾವ ಸಂವಹನ ಮಾಧ್ಯಮಗಳನ್ನು ಬೆಂಬಲಿಸುತ್ತದೆ?

ಸೀಮಿತ ಸಾಮಾನ್ಯ ಲಭ್ಯತೆಯ ಅವಧಿಯಲ್ಲಿ, Presence ಧ್ವನಿ ಅಥವಾ ಪಠ್ಯ ಸಂವಾದದ ಮೂಲಕ ಸಂಭಾಷಣಾ ಕಾರ್ಯಪ್ರವಾಹಗಳನ್ನು ಬೆಂಬಲಿಸುತ್ತದೆ. ಪ್ರತಿ ನಿಯೋಜನೆಗೂ ಲಭ್ಯವಿರುವ ಸಂವಹನ ಮಾಧ್ಯಮ, ಸಂಪರ್ಕ ಕೇಂದ್ರದ ಏಕೀಕರಣ, ಸೂಕ್ತ ಮಾರ್ಗಕ್ಕೆ ನಿರ್ದೇಶಿಸುವಿಕೆ, ದೃಢೀಕರಣ ಮತ್ತು ಮಾನವ ಸಿಬ್ಬಂದಿಗೆ ಹಸ್ತಾಂತರಿಸುವ ವ್ಯವಸ್ಥೆಯ ವಿನ್ಯಾಸವನ್ನು ದೃಢಪಡಿಸಲಾಗುತ್ತದೆ.

Presence ಯಾವ OpenAI ಮಾಡೆಲ್‌ಗಳನ್ನು ಬಳಸುತ್ತದೆ?

Presence, OpenAI ಮಾಡೆಲ್‌ಗಳನ್ನು ಬಳಸುತ್ತದೆ. ಕಾರ್ಯಪ್ರವಾಹಕ್ಕೆ ತಕ್ಕಂತೆ ಮಾಡೆಲ್ ಸಂರಚನೆಯನ್ನು ಆಯ್ಕೆ ಮಾಡಲಾಗುತ್ತದೆ. ಇದು ತತ್‌ಕ್ಷಣದ ಸಂವಹನದ ಜೊತೆಗೆ ಆಳವಾದ ರೀಜನಿಂಗ್ ಅಥವಾ ಸಾಧನಗಳನ್ನು ಚಲಾಯಿಸುವ ಸಾಮರ್ಥ್ಯವನ್ನು ಸಂಯೋಜಿಸಬಹುದು. ಪ್ರತಿ ನಿಯೋಜನೆಗೂ ನಿಖರ ಸಂರಚನೆಯ ಸೂಕ್ತತೆಯನ್ನು ಪರಿಶೀಲಿಸಲಾಗುತ್ತದೆ. ಕಾರ್ಯಪ್ರವಾಹ ವಿಕಸನಗೊಂಡಂತೆ ಸಂರಚನೆ ಬದಲಾಗಬಹುದು.

ದತ್ತಾಂಶ, ಗೌಪ್ಯತೆ ಮತ್ತು ಭದ್ರತೆಯನ್ನು ಹೇಗೆ ನಿರ್ವಹಿಸಲಾಗುತ್ತದೆ?

ಪ್ರತಿ ನಿಯೋಜನೆಗೂ ದತ್ತಾಂಶ ನಿರ್ವಹಣೆಯ ವಿಧಾನವನ್ನು ನಿರ್ಧರಿಸಿ ಪರಿಶೀಲಿಸಲಾಗುತ್ತದೆ. ಏಜೆಂಟ್ ಯಾವ ದತ್ತಾಂಶವನ್ನು ಪ್ರವೇಶಿಸಬಹುದು, ಏನನ್ನು ದಾಖಲಿಸಲಾಗುತ್ತದೆ, ಸೂಕ್ಷ್ಮ ಮಾಹಿತಿಯನ್ನು ಹೇಗೆ ತೆಗೆದುಹಾಕಲಾಗುತ್ತದೆ ಅಥವಾ ಮರೆಮಾಡಲಾಗುತ್ತದೆ, ದತ್ತಾಂಶವನ್ನು ಎಷ್ಟು ಕಾಲ ಉಳಿಸಿಕೊಳ್ಳಲಾಗುತ್ತದೆ, ಎಲ್ಲಿ ಸಂಗ್ರಹಿಸಲಾಗುತ್ತದೆ ಮತ್ತು ಯಾರು ಅದನ್ನು ಪ್ರವೇಶಿಸಬಹುದು ಎಂಬುದು ಇದರಲ್ಲಿ ಸೇರಿದೆ.

ನಿಮ್ಮ ನಿಯೋಜನೆಗಾಗಿ ಅನುಮೋದಿಸಲಾದ ವ್ಯವಸ್ಥೆಯ ವಿನ್ಯಾಸ, ಭದ್ರತಾ ದಾಖಲೆಗಳು ಮತ್ತು ಒಪ್ಪಂದವನ್ನು ನೋಡಿ. Presence ನಿಯೋಜನೆಗಳ ನಡುವೆ ಸಂರಚನೆ ಭಿನ್ನವಾಗಿರಬಹುದು. ಆದ್ದರಿಂದ ಈ ವಿವರಗಳಿಗೆ ನಿಮ್ಮ ನಿಯೋಜನೆಯ ದಾಖಲೆಗಳೇ ಅಧಿಕೃತ ಆಧಾರ.

OpenAI Presence, ChatGPT ವರ್ಕ್‌ಸ್ಪೇಸ್ ಏಜೆಂಟ್‌ಗಳಿಗಿಂತ ಹೇಗೆ ಭಿನ್ನವಾಗಿದೆ?

OpenAI Presence ಪ್ರತ್ಯೇಕವಾಗಿ ನಿರ್ವಹಣಾ ಸೇವೆಯೊಂದಿಗೆ ಒದಗಿಸುವ ಸಾಂಸ್ಥಿಕ ಉತ್ಪನ್ನವಾಗಿದೆ. ಏಕೀಕರಣಗಳು, ಪರೀಕ್ಷೆ, ಸುರಕ್ಷತಾ ಮಿತಿಗಳು, ಮೇಲ್ವಿಚಾರಣೆ ಮತ್ತು ನಿಯೋಜನಾ ಬೆಂಬಲ ಅಗತ್ಯವಿರುವ ನೈಜ ಕಾರ್ಯಪ್ರವಾಹಗಳಿಗಾಗಿ ಇದನ್ನು ರೂಪಿಸಲಾಗಿದೆ.

ಎಂಟರ್‌ಪ್ರೈಸ್ ಮತ್ತು ಬಿಸಿನೆಸ್‌ಗಾಗಿ ChatGPT ವರ್ಕ್‌ಸ್ಪೇಸ್ ಏಜೆಂಟ್‌ಗಳನ್ನು ಬೆಂಬಲಿತ ChatGPT ಮತ್ತು Slack ವರ್ಕ್‌ಸ್ಪೇಸ್ ಪರಿಸರಗಳಲ್ಲೇ ರಚಿಸಲಾಗುತ್ತದೆ, ಬಳಸಲಾಗುತ್ತದೆ, ಹಂಚಿಕೊಳ್ಳಲಾಗುತ್ತದೆ ಮತ್ತು ನಿರ್ವಹಿಸಲಾಗುತ್ತದೆ. OpenAI, ಆಯ್ದ ನಿಯೋಜನಾ ಪಾಲುದಾರರು ಅಥವಾ ಇಬ್ಬರ ಸಹಯೋಗದೊಂದಿಗೆ Presence ಏಜೆಂಟ್‌ಗಳ ಕಾರ್ಯವ್ಯಾಪ್ತಿಯನ್ನು ನಿರ್ಧರಿಸಿ ನಿಯೋಜಿಸಲಾಗುತ್ತದೆ. ಅವುಗಳನ್ನು ChatGPT ವರ್ಕ್‌ಸ್ಪೇಸ್ ಏಜೆಂಟ್ ಬಳಕೆದಾರ ಸಂಪರ್ಕತಾಣದ ಮೂಲಕ ರಚಿಸಲಾಗುವುದಿಲ್ಲ.

OpenAI Presence ಪ್ರವೇಶವನ್ನು ನಾನು ಹೇಗೆ ಪಡೆಯಬಹುದು?

ಅರ್ಹತೆ, ಕಾರ್ಯಪ್ರವಾಹಕ್ಕೆ ಸೂಕ್ತತೆ, ಅನುಷ್ಠಾನಕ್ಕೆ ಸಿದ್ಧತೆ ಮತ್ತು ಸೇವೆ ಒದಗಿಸುವ ಸಾಮರ್ಥ್ಯದ ಬಗ್ಗೆ ಚರ್ಚಿಸಲು ನಿಮ್ಮ OpenAI ಖಾತೆ ತಂಡವನ್ನು ಸಂಪರ್ಕಿಸಿ. ದರಗಳು ಮತ್ತು ಅನುಷ್ಠಾನದ ವ್ಯಾಪ್ತಿಯನ್ನು ಪ್ರತಿ ಗ್ರಾಹಕ ಹಾಗೂ ನಿಯೋಜನೆಗೆ ಪ್ರತ್ಯೇಕವಾಗಿ ನಿರ್ಧರಿಸಲಾಗುತ್ತದೆ.