Многу училишни окрузи и високообразовни институции во своите политики за академска чесност сè уште не ја земаат предвид генеративната ВИ. Свесни сме дека некои ученици и студенти можеби ги користеле овие алатки за задачи без да наведат дека користеле ВИ. Освен што можеби ги прекршуваат училишните кодекси на чесност, таквите случаи може да бидат и спротивни на нашите Услови за користење: корисниците мора да имаат најмалку 13 години, а оние на возраст од 13 до 18 години мора да имаат дозвола од родител или старател за да ја користат платформата.
Во текот на изминатата година, различни училишни окрузи и универзитети донесоа нови политики за содржини генерирани со ВИ. Ги поттикнуваме просветните работници самостојно да ги истражат различните пристапи за да утврдат што најмногу им одговара, во временска рамка соодветна за нив и за нивните ученици и студенти.
Исто така, вложуваме значителни средства во партнерства со високообразовни институции и очекуваме употребата од страна на студентите и просветните работници да се прошири. Досега:
Ги унапредивме можностите за анализа и истражување
Обезбедивме приспособливи GPT-ја што може да помогнат при наставата или задачите во универзитетските работни простори
Ако вашата организација е заинтересирана за партнерство со OpenAI, посетете ја нашата страница за образование.
Дали детекторите за ВИ функционираат?
Накратко, според нашето искуство — не. Нашето истражување на детекторите не покажа дека се доволно сигурни, особено затоа што просветните работници би можеле врз основа на нив да донесуваат одлуки за учениците и студентите со потенцијално трајни последици. Иако други развивачи објавија алатки за откривање, не можеме да ја коментираме нивната корисност.
Покрај тоа, ChatGPT нема „сознанија“ за тоа која содржина би можела да биде генерирана со ВИ. Понекогаш измислува одговори на прашања како „дали ти го напиша ова [есе]?“ или „дали ова можеби е напишано од ВИ?“ Овие одговори се случајни и немаат фактичка основа.
Да ги објасниме подетално нашите истражувања за недостатоците на детекторите: еден од клучните наоди беше дека овие алатки понекогаш посочуваат дека содржина напишана од човек е генерирана со ВИ.
Кога ние во OpenAI се обидовме да обучиме детектор за содржини генерирани со ВИ, откривме дека текстови напишани од луѓе, како делата на Шекспир и Декларацијата за независност, ги означуваше како генерирани со ВИ.
Имаше и показатели дека тој би можел несразмерно да влијае врз учениците и студентите што го научиле или го учат англискиот како втор јазик, како и врз оние чие пишување е особено шаблонско или концизно.
Дури и кога овие алатки би можеле точно да препознаат содржина генерирана со ВИ (а не можат), учениците и студентите може да направат мали измени за да избегнат откривање.
Сепак, постојат неколку пристапи што други ги сметаат за корисни:
Една техника што некои наставници ја сметаат за корисна е да ги поттикнат учениците и студентите да споделуваат конкретни разговори од ChatGPT (упатства овде). Ова може да донесе многу придобивки:
Прикажување на процесот на работа и формативно оценување:
Просветните работници може да побараат учениците и студентите да ја евидентираат употребата на ChatGPT или ВИ во својата работа и да ги наведат изворите.
Просветните работници може да ги анализираат интеракциите на учениците и студентите со ChatGPT за да го согледаат нивното критичко размислување и пристапите кон решавањето проблеми.
Споделените врски им овозможуваат на учениците и студентите меѓусебно да си ја прегледуваат работата, поттикнувајќи средина за соработка.
Со водење евиденција за своите разговори со ВИ, учениците и студентите може да размислуваат за својот напредок со текот на времето. Тие може да видат како се развивале нивните вештини за поставување прашања, анализирање одговори и поврзување информации. Наставниците може да ги користат овие записи и за да дадат персонализирани повратни информации и да го поддржат индивидуалниот развој.
Информациска писменост и писменост за ВИ:
Учениците и студентите може да ја покажат својата способност за интеракција со ВИ и разбирањето на недостатоците на системите за ВИ. Просветните работници може да го оценат квалитетот на поставените прашања, релевантноста на добиените информации и колку добро ученикот или студентот разбрал дека треба критички да ги преиспита и провери тие информации и да ги земе предвид можните пристрасности во нив.
Очекуваме иднина во која употребата на алатки за ВИ како ChatGPT ќе биде вообичаена. Поттикнувањето одговорна употреба им помага на учениците и студентите да се подготват за иднина во која можеби ќе се очекува да ја користат ВИ во различни контексти.
Воспоставување одговорност:
Споделувањето на интеракциите со моделот гарантира дека учениците и студентите ќе сносат одговорност за начинот на кој ја користат ВИ во својата работа. Просветните работници може да проверат дали учениците и студентите ја користат алатката одговорно и целисходно, наместо само да ги копираат одговорите.