നിങ്ങളുടെ ചാറ്റ് ചരിത്രത്തിൽ വേഗത്തിലും കാര്യക്ഷമമായും തിരയാം. പ്രത്യേക വിവരങ്ങൾ പരിശോധിക്കാനായാലും നിർത്തിയിടത്തുനിന്ന് ഒരു സംഭാഷണം തുടരാനായാലും മുൻ സംഭാഷണങ്ങൾ എളുപ്പത്തിൽ കണ്ടെത്താൻ സഹായിക്കുന്നതാണ് ഈ സൗകര്യം.
മുൻ സംഭാഷണങ്ങൾ തിരയുന്ന വിധം
വെബിൽ
നിങ്ങളുടെ ചാറ്റ് ചരിത്രം തിരയാൻ:
വെബ് ബ്രൗസറിൽ ChatGPT-ലേക്ക് പ്രവേശിക്കുക.
ഇടത് വശത്തെ സൈഡ്ബാറിൽ തിരയലിനുള്ള ഭൂതക്കണ്ണാടി ചിഹ്നം കണ്ടെത്തുക. PC-യിൽ ctrl+k അല്ലെങ്കിൽ Mac-ൽ cmd+k ഉപയോഗിക്കാനും കഴിയും.
കണ്ടെത്താൻ ആഗ്രഹിക്കുന്ന സംഭാഷണത്തിൽനിന്ന് ഓർമ്മയുള്ള പ്രധാന പദങ്ങളോ വാക്യശകലങ്ങളോ നൽകുക.
തിരയൽ ഫലങ്ങൾ കാണുക. നിങ്ങളുടെ തിരയൽ പദങ്ങളുമായി പൊരുത്തപ്പെടുന്ന സംഭാഷണങ്ങളുടെ പട്ടിക അവിടെ കാണാം. ഏതെങ്കിലും ഫലത്തിൽ ക്ലിക്ക് ചെയ്ത് ആ സംഭാഷണം തുറന്ന് വായിക്കുകയോ നിർത്തിയിടത്തുനിന്ന് തുടരുകയോ ചെയ്യാം.
മൊബൈലിൽ
നിങ്ങളുടെ ചാറ്റ് ചരിത്രം തിരയാൻ:
iOS അല്ലെങ്കിൽ Android ആപ്പിൽ ChatGPT-ലേക്ക് പ്രവേശിക്കുക.
ഇടത് വശത്തെ സൈഡ്ബാറിൽ തിരയൽപ്പട്ടി കണ്ടെത്തുക.
കണ്ടെത്താൻ ആഗ്രഹിക്കുന്ന സംഭാഷണത്തിൽനിന്ന് ഓർമ്മയുള്ള പ്രധാന പദങ്ങളോ വാക്യശകലങ്ങളോ നൽകുക.
തിരയൽ ഫലങ്ങൾ കാണുക. നിങ്ങളുടെ തിരയൽ പദങ്ങളുമായി പൊരുത്തപ്പെടുന്ന സംഭാഷണങ്ങളുടെ പട്ടിക അവിടെ കാണാം. ഏതെങ്കിലും ഫലത്തിൽ അമർത്തി ആ സംഭാഷണം തുറന്ന് വായിക്കുകയോ നിർത്തിയിടത്തുനിന്ന് തുടരുകയോ ചെയ്യാം.
പ്രധാന കാര്യങ്ങൾ
ഇൻസ്റ്റൻ്റ് പ്രവേശനം: സംഭാഷണം നടന്നതിന് തൊട്ടുപിന്നാലെ അത് തിരയാനാകുന്നതിനാൽ ഏതാനും മിനിറ്റുകൾക്കുള്ളിൽ കണ്ടെത്താം.
വിപുലമായ തിരയൽശേഷി: നിങ്ങൾ നടത്തിയ ഏത് ChatGPT സംഭാഷണവും എളുപ്പത്തിൽ പരിശോധിക്കാം.
അനായാസ വീണ്ടെടുക്കൽ: സൗകര്യത്തിന് പ്രാധാന്യം നൽകി രൂപകൽപ്പന ചെയ്തതിനാൽ നിങ്ങൾ അന്വേഷിക്കുന്നത് വേഗത്തിൽ കണ്ടെത്താം.
ശേഖരിച്ച സംഭാഷണങ്ങൾ: സൈഡ്ബാറിൽ ദൃശ്യമല്ലെങ്കിലും ശേഖരിച്ച സംഭാഷണങ്ങൾ തിരയാനാകുകയും തിരയൽ ഫലങ്ങളിൽ പ്രത്യക്ഷപ്പെടുകയും ചെയ്യും. ക്രമീകരണ മെനുവിൽ പ്രത്യേകം ക്രമീകരിച്ചിട്ടുള്ള ഈ ശേഖരിച്ച സംഭാഷണങ്ങൾ അവിടെനിന്നും തുറക്കാം.
തിരയലിലെ സ്വകാര്യത: ഒരു സംഭാഷണം ഇല്ലാതാക്കിയാൽ അത് തിരയൽ സൂചികയിൽനിന്നും നീക്കംചെയ്യപ്പെടും. അതിനാൽ ഇല്ലാതാക്കിയ സംഭാഷണങ്ങൾ വീണ്ടെടുക്കാനാകില്ല.
സൈഡ്ബാറിലെ പഴയ ചാറ്റ് ചരിത്രം
സിസ്റ്റത്തിന്റെ വേഗവും വിശ്വാസ്യതയും നിലനിർത്താൻ, അതിവേഗം ലോഡാകുന്ന സൈഡ്ബാറിൽ ഏറ്റവും പുതിയ സംഭാഷണങ്ങളുടെ ചുരുക്കപ്പട്ടിക മാത്രമാണ് സൂക്ഷിക്കുന്നത്. സ്ഥലം ലാഭിക്കാനും വേഗക്കുറവ് ഒഴിവാക്കാനും പഴയ ചാറ്റുകൾ ആ ദ്രുത താൽക്കാലിക സംഭരണിയിൽനിന്ന് നീക്കംചെയ്യും. ഒന്നും ഇല്ലാതാക്കുന്നില്ല. പഴയൊരു ചാറ്റ് ആവശ്യമെങ്കിൽ അത് തിരയുകയോ സംഭാഷണം തുറക്കുകയോ ചെയ്യുമ്പോൾ ഉറവിടത്തിൽനിന്ന് പൂർണമായി വീണ്ടെടുത്ത് പ്രദർശിപ്പിക്കും. താൽക്കാലികമായി സൂക്ഷിച്ച പട്ടികയും ഇതിലൂടെ പുതുക്കാനാകും. ഉടൻ ലഭിക്കുന്ന പട്ടികയുടെ സമ്പൂർണത അൽപ്പം കുറച്ചുകൊണ്ട് കൂടുതൽ വേഗവും സ്ഥിരതയുമുള്ള പ്രവർത്തനം ഇതിലൂടെ ലഭിക്കുന്നു. അതേസമയം, തിരയുമ്പോൾ എല്ലാ സംഭാഷണങ്ങളും കണ്ടെത്താനാകും.
ChatGPT-യിലെ ചാറ്റ് ചരിത്രം നിയന്ത്രിക്കാനുള്ള സൗകര്യം നൽകി നിങ്ങളുടെ അനുഭവം മെച്ചപ്പെടുത്തുകയാണ് ഞങ്ങളുടെ ലക്ഷ്യം. പഴയൊരു ആശയം പരിശോധിക്കാനായാലും മുൻ ഇടപെടലുകൾ പിന്തുടരാനായാലും നിങ്ങളുടെ ചാറ്റ് ചരിത്രം തിരയുന്നത് ഇപ്പോൾ ഏറെ എളുപ്പമാണ്.