വ്യക്തിഗത വിവരങ്ങളുടെ ശേഖരണവും ഉപയോഗവും (നിർബന്ധം)
വ്യക്തിഗത ഉപഭോക്താക്കൾക്കുള്ള സേവനങ്ങളുടെ കാര്യത്തിൽ, നിങ്ങൾ ഞങ്ങളുടെ സേവനങ്ങൾ ഉപയോഗിക്കുമ്പോൾ താഴെ വിവരിച്ചിരിക്കുന്നതുപോലെ OpenAI നിങ്ങളുടെ വ്യക്തിഗത വിവരങ്ങൾ ശേഖരിക്കുകയും ഉപയോഗിക്കുകയും ചെയ്യുന്നു. ഞങ്ങളുടെ API പോലുള്ള ബിസിനസ് സേവനങ്ങളുടെ ഉപഭോക്താക്കൾക്കുവേണ്ടി ഞങ്ങൾ പ്രോസസ്സ് ചെയ്യുന്ന ഉള്ളടക്കത്തിന്റെ ഉപയോഗം, ആ സേവനങ്ങൾക്കായുള്ള ഉപഭോക്തൃ കരാറുകൾക്ക് വിധേയമാണ്. ഞങ്ങളുടെ സ്ഥാപനങ്ങളുടെ സ്വകാര്യത സംബന്ധിച്ച പേജ് കാണുക.
ശേഖരിക്കുന്ന വ്യക്തിഗത വിവരങ്ങളുടെ ഇനങ്ങൾ:
ഞങ്ങളുടെ സേവനങ്ങൾ ഉപയോഗിക്കാൻ അക്കൗണ്ട് സൃഷ്ടിക്കുമ്പോഴോ ഞങ്ങളുമായി ആശയവിനിമയം നടത്തുമ്പോഴോ നിങ്ങൾ നൽകുന്ന വ്യക്തിഗത വിവരങ്ങൾ:
അക്കൗണ്ട് വിവരങ്ങൾ: നിങ്ങൾ ഞങ്ങളുടെ സേവനത്തിൽ അക്കൗണ്ട് സൃഷ്ടിക്കുമ്പോൾ, നിങ്ങളുടെ പേര്, ബന്ധപ്പെടാനുള്ള വിവരങ്ങൾ, അക്കൗണ്ടിൽ പ്രവേശിക്കാനുള്ള വിവരങ്ങൾ, ജനനത്തീയതി, പണമടയ്ക്കൽ വിവരങ്ങൾ, ഇടപാട് ചരിത്രം എന്നിവയുൾപ്പെടെ അക്കൗണ്ടുമായി ബന്ധപ്പെട്ട വിവരങ്ങൾ ഞങ്ങൾ ശേഖരിക്കും (ഇവയെ ഒരുമിച്ച് “അക്കൗണ്ട് വിവരങ്ങൾ” എന്നു വിളിക്കുന്നു). അക്കൗണ്ട് വിവരങ്ങളുടെ ഭാഗമായി പ്രൊഫൈൽ ചിത്രം, ഉപയോക്തൃനാമം, മറ്റ് വിവരങ്ങൾ എന്നിവ അപ്‌ലോഡ് ചെയ്യാനും ഞങ്ങളുടെ ചില സേവനങ്ങൾ അനുവദിച്ചേക്കാം.
ഉപയോക്തൃ ഉള്ളടക്കം: ഞങ്ങളുടെ സേവനങ്ങളിൽ നിങ്ങൾ നൽകുന്ന ഇൻപുട്ടിലെ വ്യക്തിഗത വിവരങ്ങൾ (“ഉള്ളടക്കം”) ഞങ്ങൾ ശേഖരിക്കുന്നു. നിങ്ങൾ ഉപയോഗിക്കുന്ന സവിശേഷതകൾക്കനുസരിച്ച്, നിങ്ങളുടെ നിർദ്ദേശങ്ങൾ, അപ്‌ലോഡ് ചെയ്യുന്ന ഫയലുകൾ, ചിത്രങ്ങൾ, ശബ്ദവും വീഡിയോയും, Sora കഥാപാത്രങ്ങൾ തുടങ്ങിയ മറ്റ് ഉള്ളടക്കങ്ങൾ, കൂടാതെ ബന്ധിപ്പിച്ച സേവനങ്ങളിൽനിന്നുള്ള വിവരങ്ങൾ എന്നിവ ഇതിൽ ഉൾപ്പെടുന്നു. പ്രസിദ്ധീകരിക്കുക, അഭിപ്രായമിടുക, സന്ദേശങ്ങൾ അയയ്ക്കുക തുടങ്ങിയ രീതികളിൽ മറ്റ് ഉപയോക്താക്കളുമായി ഇടപഴകാൻ ഞങ്ങളുടെ ചില സേവനങ്ങൾ അനുവദിക്കുന്നു. ഈ ഇടപെടലുകളെയും ഞങ്ങൾ ഉള്ളടക്കമായി കണക്കാക്കുന്നു.
ആശയവിനിമയ വിവരങ്ങൾ: ഇമെയിൽ വഴിയോ സാമൂഹിക മാധ്യമ സൈറ്റുകളിലെ ഞങ്ങളുടെ പേജുകൾ വഴിയോ മറ്റോ നിങ്ങൾ ഞങ്ങളുമായി ആശയവിനിമയം നടത്തുകയാണെങ്കിൽ, നിങ്ങളുടെ പേര്, ബന്ധപ്പെടാനുള്ള വിവരങ്ങൾ, അയയ്ക്കുന്ന സന്ദേശങ്ങളിലെ ഉള്ളടക്കം തുടങ്ങിയ വ്യക്തിഗത വിവരങ്ങൾ ഞങ്ങൾ ശേഖരിച്ചേക്കാം (“ആശയവിനിമയ വിവരങ്ങൾ”).
സമ്പർക്ക വിവരങ്ങൾ: നിങ്ങളുടെ ഉപകരണത്തിലെ സമ്പർക്കപ്പട്ടിക ബന്ധിപ്പിക്കാൻ തീരുമാനിച്ചാൽ, അതിലെ വിലാസപ്പട്ടികകളിൽനിന്നുള്ള വിവരങ്ങൾ ഞങ്ങൾ അപ്‌ലോഡ് ചെയ്യുകയും അവരിൽ ആരൊക്കെ ഞങ്ങളുടെ സേവനങ്ങൾ ഉപയോഗിക്കുന്നുവെന്ന് പരിശോധിക്കുകയും ചെയ്യും. നിങ്ങളുടെ സമ്പർക്കപ്പട്ടികയിൽ ഇതുവരെ ഞങ്ങളുടെ സേവനങ്ങൾ ഉപയോഗിക്കാത്ത ആരെങ്കിലും പിന്നീട് സേവനങ്ങളിൽ രജിസ്റ്റർ ചെയ്താൽ ഞങ്ങൾ നിങ്ങളെ അറിയിക്കും.നിങ്ങളുടെ സമ്പർക്കപ്പട്ടിക ബന്ധിപ്പിക്കുന്നതിനെക്കുറിച്ച് കൂടുതലറിയുക. ഞങ്ങളുടെ സേവനങ്ങൾ ഉപയോഗിക്കാത്ത ആളുകളുടെ അപ്‌ലോഡ് ചെയ്ത സമ്പർക്ക വിവരങ്ങൾ ഞങ്ങൾ എങ്ങനെ ഉപയോഗിക്കുന്നുവെന്നും അറിയുക.
നിങ്ങൾ നൽകുന്ന മറ്റ് വിവരങ്ങൾ: ഞങ്ങളുടെ പരിപാടികളിലോ സർവേകളിലോ പങ്കെടുക്കുമ്പോൾ നിങ്ങൾ നൽകുന്ന മറുപടികളും, നിങ്ങളുടെ വ്യക്തിത്വമോ പ്രായമോ സ്ഥിരീകരിക്കുന്നതിനായി ഞങ്ങൾക്കോ ഞങ്ങൾക്കുവേണ്ടി പ്രവർത്തിക്കുന്ന സേവനദാതാവിനോ നിങ്ങൾ നൽകുന്ന വിവരങ്ങളും ഞങ്ങൾ ശേഖരിക്കുന്നു.
സേവനങ്ങൾ സന്ദർശിക്കുമ്പോഴോ ഉപയോഗിക്കുമ്പോഴോ അവയുമായി ഇടപഴകുമ്പോഴോ ഞങ്ങൾക്ക് ലഭിക്കുന്ന വ്യക്തിഗത വിവരങ്ങൾ:
ലോഗ് വിവരങ്ങൾ: ഞങ്ങളുടെ സേവനങ്ങൾ ഉപയോഗിക്കുമ്പോൾ നിങ്ങളുടെ ബ്രൗസറോ ഉപകരണമോ സ്വയമേവ അയയ്ക്കുന്ന വിവരങ്ങൾ ഞങ്ങൾ ശേഖരിക്കുന്നു. നിങ്ങളുടെ ഇന്റർനെറ്റ് പ്രോട്ടോക്കോൾ വിലാസം, ബ്രൗസറിന്റെ തരവും ക്രമീകരണങ്ങളും, അഭ്യർത്ഥനയുടെ തീയതിയും സമയവും, ഞങ്ങളുടെ സേവനങ്ങളുമായി നിങ്ങൾ ഇടപഴകുന്ന രീതി എന്നിവ ലോഗ് വിവരങ്ങളിൽ ഉൾപ്പെടുന്നു.
ഉപയോഗ വിവരങ്ങൾ: നിങ്ങൾ കാണുകയോ ഇടപഴകുകയോ ചെയ്യുന്ന ഉള്ളടക്കത്തിന്റെ തരങ്ങൾ, ഉപയോഗിക്കുന്ന സവിശേഷതകൾ, ചെയ്യുന്ന പ്രവർത്തനങ്ങൾ തുടങ്ങിയ സേവന ഉപയോഗ വിവരങ്ങൾ ഞങ്ങൾ ശേഖരിക്കുന്നു. കൂടാതെ, നിങ്ങളുടെ സമയ മേഖല, രാജ്യം, സേവനം ഉപയോഗിച്ച തീയതികളും സമയങ്ങളും, ഉപകരണം സേവനങ്ങൾ ആക്‌സസ് ചെയ്യുന്ന പൊതുവായ പ്രദേശം, യൂസർ ഏജന്റും പതിപ്പും, കമ്പ്യൂട്ടറിന്റെയോ മൊബൈൽ ഉപകരണത്തിന്റെയോ തരം, കമ്പ്യൂട്ടർ കണക്ഷൻ എന്നിവയും ശേഖരിക്കുന്നു. നിങ്ങൾ അറ്റ്‌ലസ് ബ്രൗസർ ഉപയോഗിക്കുന്നുവെങ്കിൽ, നിങ്ങളുടെ നിയന്ത്രണ ക്രമീകരണങ്ങളും സേവനത്തിന്റെ ഉപയോഗവും അനുസരിച്ച് ബ്രൗസർ വിവരങ്ങളും ഞങ്ങൾ ശേഖരിച്ചേക്കാം.
പരസ്യ വിവരങ്ങൾ: ഫ്രീ, ഗോ ഉപയോക്താക്കളുടെ കാര്യത്തിൽ, നിങ്ങളുടെ തിരഞ്ഞെടുപ്പുകൾക്കും നിയന്ത്രണ ക്രമീകരണങ്ങൾക്കും വിധേയമായി, നിങ്ങൾ കാണുകയോ ഇടപഴകുകയോ ചെയ്യുന്ന പരസ്യ ഉള്ളടക്കത്തിന്റെ തരങ്ങൾ പോലുള്ള പരസ്യ ചരിത്രവും താൽപ്പര്യങ്ങളും സംബന്ധിച്ച വിവരങ്ങൾ ഞങ്ങൾ ശേഖരിക്കുന്നു.
ഉപകരണ വിവരങ്ങൾ: സേവനങ്ങൾ ആക്‌സസ് ചെയ്യാൻ ഉപയോഗിക്കുന്ന ഉപകരണത്തിന്റെ പേര്, പ്രവർത്തന സംവിധാനം, ഉപകരണ തിരിച്ചറിയൽ വിവരങ്ങൾ, ഉപയോഗിക്കുന്ന ബ്രൗസർ തുടങ്ങിയ വിവരങ്ങൾ ഞങ്ങൾ ശേഖരിക്കുന്നു. ശേഖരിക്കുന്ന വിവരങ്ങൾ നിങ്ങൾ ഉപയോഗിക്കുന്ന ഉപകരണത്തിന്റെ തരത്തെയും അതിന്റെ ക്രമീകരണങ്ങളെയും ആശ്രയിച്ചിരിക്കാം.
കുക്കികളും സമാന സാങ്കേതികവിദ്യകളും: ഞങ്ങളുടെ സേവനങ്ങൾ പ്രവർത്തിപ്പിക്കാനും നിയന്ത്രിക്കാനും നിങ്ങളുടെ അനുഭവം മെച്ചപ്പെടുത്താനും കുക്കികളും സമാന സാങ്കേതികവിദ്യകളും ഞങ്ങൾ ഉപയോഗിക്കുന്നു. പ്രൈവസി പോളിസിയിൽ വിവരിച്ചിരിക്കുന്ന ചില വിവരങ്ങൾ കുക്കികൾ ഉപയോഗിച്ച് ഞങ്ങൾ സൂക്ഷിക്കുന്നു. ഉദാഹരണത്തിന്, നിങ്ങൾ ലോഗിൻ ചെയ്തിട്ടില്ലെങ്കിൽ വിവിധ ബ്രൗസിങ് സെഷനുകളിലുടനീളം നിങ്ങളുടെ മുൻഗണനകൾ നിലനിർത്താനോ, പ്രാമാണീകരണത്തിനും ഉപഭോക്തൃ പിന്തുണയ്ക്കും സഹായിക്കാനോ ആണ് ഇത്. കുക്കികളുടെ ഉപയോഗത്തെക്കുറിച്ചുള്ള വിശദാംശങ്ങൾക്ക് ഞങ്ങളുടെ കുക്കി അറിയിപ്പ് വായിക്കുക.
ശേഖരണത്തിന്റെയും ഉപയോഗത്തിന്റെയും ഉദ്ദേശ്യം:
ഞങ്ങളുടെ സേവനങ്ങൾ നൽകാനും വിശകലനം ചെയ്യാനും പരിപാലിക്കാനും; ഉദാഹരണത്തിന്, ChatGPT-യോടുള്ള നിങ്ങളുടെ ചോദ്യങ്ങൾക്ക് മറുപടി നൽകാൻ;
ഞങ്ങളുടെ സേവനങ്ങൾ മെച്ചപ്പെടുത്താനും വികസിപ്പിക്കാനും ഗവേഷണം നടത്താനും; ഉദാഹരണത്തിന്, ഉൽപ്പന്നങ്ങളിൽ പുതിയ സവിശേഷതകൾ വികസിപ്പിക്കാൻ;
ഞങ്ങളുടെ സേവനങ്ങളിലുടനീളം നിങ്ങളുടെ അനുഭവം താൽപ്പര്യങ്ങൾക്കും ആവശ്യങ്ങൾക്കും അനുസൃതമാക്കാൻ; ഉദാഹരണത്തിന്, നിങ്ങൾക്ക് കൂടുതൽ പ്രസക്തമായ ഉള്ളടക്കം നൽകാൻ;
ChatGPT-യിൽ നിങ്ങൾക്ക് പരസ്യങ്ങൾ കാണിക്കാനും, ഉപയോക്താക്കൾ ആ പരസ്യങ്ങളുമായി എങ്ങനെ ഇടപഴകുന്നുവെന്ന് മൊത്തത്തിൽ മനസ്സിലാക്കാനും, പരസ്യങ്ങളുടെ നിലവാരം മെച്ചപ്പെടുത്തുന്നതിനായി ഞങ്ങളുടെ വിപണന-പരസ്യ ശ്രമങ്ങളുടെ ഫലപ്രാപ്തി വിലയിരുത്താനും. ChatGPT-യിലെ പരസ്യങ്ങളെക്കുറിച്ച് കൂടുതലറിയുക;
നിങ്ങളുടെ ചോദ്യങ്ങൾക്ക് മറുപടി നൽകുന്നതുൾപ്പെടെ നിങ്ങളുമായി ആശയവിനിമയം നടത്താനും ഞങ്ങളുടെ സേവനങ്ങളെയും പരിപാടികളെയും കുറിച്ചുള്ള വിവരങ്ങൾ അയയ്ക്കാനും; ഉദാഹരണത്തിന്, സേവനങ്ങളിലെ മാറ്റങ്ങളോ മെച്ചപ്പെടുത്തലുകളോ അറിയിക്കാൻ;
നിങ്ങളുടെ സമ്പർക്കപ്പട്ടിക ബന്ധിപ്പിക്കാൻ തീരുമാനിക്കുമ്പോൾ, അതിലുള്ള ആരൊക്കെ ഞങ്ങളുടെ സേവനങ്ങൾ ഉപയോഗിക്കുന്നുവെന്ന് കണ്ടെത്താനും അവർ പിന്നീട് ഞങ്ങളുടെ സേവനങ്ങളിൽ ചേരുകയാണെങ്കിൽ നിങ്ങളെ അറിയിക്കാനും;
ഞങ്ങളുടെ പ്ലാറ്റ്‌ഫോമുകളിൽ സമർപ്പിക്കപ്പെടുന്നതോ കൈമാറുന്നതോ ആയ ഉള്ളടക്കം നിരീക്ഷിക്കുന്നത് ഉൾപ്പെടെയുള്ള മാർഗങ്ങളിലൂടെ തട്ടിപ്പ്, നിയമവിരുദ്ധ പ്രവർത്തനങ്ങൾ, സേവനങ്ങളുടെ ദുരുപയോഗം എന്നിവ തടയാൻ ( ഇവിടെ കൂടുതലറിയുക); കൂടാതെ
നിയമപരമായ ബാധ്യതകൾ പാലിക്കാനും ഞങ്ങളുടെ ഉപയോക്താക്കളുടെയോ OpenAI-യുടെയോ മൂന്നാം കക്ഷികളുടെയോ അവകാശങ്ങൾ, സ്വകാര്യത, സുരക്ഷ, സ്വത്ത് എന്നിവ സംരക്ഷിക്കാനും; ഉദാഹരണത്തിന്, നിങ്ങൾക്കോ മറ്റുള്ളവർക്കോ ദോഷം സംഭവിക്കുന്നത് തടയാൻ, അല്ലെങ്കിൽ പ്രായത്തിന് അനുയോജ്യമായ അനുഭവം നൽകുന്നതിനായി നിങ്ങളുടെ പ്രായം കണക്കാക്കാൻ.
സൂക്ഷിക്കുന്നതിന്റെയും ഉപയോഗിക്കുന്നതിന്റെയും കാലയളവ്:
നിങ്ങളുടെ വ്യക്തിഗത വിവരങ്ങൾ നിങ്ങൾക്ക് ഞങ്ങളുടെ സേവനങ്ങൾ നൽകുന്നതിനോ, തർക്കങ്ങൾ പരിഹരിക്കൽ, സുരക്ഷ ഉറപ്പാക്കൽ, നിയമപരമായ ബാധ്യതകൾ പാലിക്കൽ തുടങ്ങിയ മറ്റ് നിയമാനുസൃത ബിസിനസ് ആവശ്യങ്ങൾക്കോ വേണ്ടിവരുന്ന കാലയളവിൽ മാത്രം ഞങ്ങൾ സൂക്ഷിക്കും. വ്യക്തിഗത വിവരങ്ങൾ എത്രകാലം സൂക്ഷിക്കുന്നു എന്നത് വിവരങ്ങളുടെ തരം, അവ ഞങ്ങൾ ഉപയോഗിക്കുന്ന രീതി, പല സാഹചര്യങ്ങളിലും നിങ്ങളുടെ ക്രമീകരണങ്ങൾ എന്നിവയെ ആശ്രയിച്ചിരിക്കും. ഉദാഹരണത്തിന്:
നിങ്ങൾ ഇല്ലാതാക്കുന്നതുവരെ ഞങ്ങൾ സൂക്ഷിക്കുന്ന വിവരങ്ങൾ: നിങ്ങളുടെ അക്കൗണ്ടിൽ സൂക്ഷിച്ചിരിക്കുന്ന വ്യക്തിഗത വിവരങ്ങൾ ഇല്ലാതാക്കാൻ ഞങ്ങളുടെ ചില സേവനങ്ങൾ അനുവദിക്കുന്നു. ഉദാഹരണത്തിന്, നിങ്ങളുടെ ChatGPT സംഭാഷണങ്ങളിൽ ചിലതോ എല്ലാമോ ഇല്ലാതാക്കാം, തിരഞ്ഞെടുത്ത സംരക്ഷിച്ച ഓർമ്മകൾ ഇല്ലാതാക്കാം, അല്ലെങ്കിൽ നിങ്ങളുടെ അക്കൗണ്ട് ഇല്ലാതാക്കാം. വ്യക്തിഗത വിവരങ്ങൾ ഇല്ലാതാക്കാൻ നിങ്ങൾ തീരുമാനിച്ചുകഴിഞ്ഞാൽ, 30 ദിവസത്തിനുള്ളിൽ അവ ഞങ്ങളുടെ സംവിധാനങ്ങളിൽനിന്ന് നീക്കം ചെയ്യും. എന്നാൽ താഴെ വിവരിച്ചിരിക്കുന്നതുപോലെ കൂടുതൽ കാലം അവ സൂക്ഷിക്കേണ്ടതുണ്ടെങ്കിലോ, നിങ്ങളുടെ ഉള്ളടക്കം ഞങ്ങളുടെ മോഡലുകൾ മെച്ചപ്പെടുത്താൻ ഉപയോഗിക്കുന്നതിന് നിങ്ങൾ അനുമതി നൽകിയപ്പോൾത്തന്നെ നിങ്ങളെ തിരിച്ചറിയാവുന്ന വിവരങ്ങൾ നീക്കി അക്കൗണ്ടുമായുള്ള ബന്ധം വേർപെടുത്തിയിട്ടുണ്ടെങ്കിലോ ഇത് ബാധകമല്ല.
ഞങ്ങൾ സ്വയമേവ ഇല്ലാതാക്കുന്ന വിവരങ്ങൾ: ചില സാഹചര്യങ്ങളിൽ, വ്യക്തിഗത വിവരങ്ങൾ സ്വയമേവ ഇല്ലാതാക്കപ്പെടും. ഉദാഹരണത്തിന്, താൽക്കാലിക സംഭാഷണങ്ങൾ 30 ദിവസത്തിനുള്ളിൽ സ്വയമേവ ഇല്ലാതാക്കപ്പെടും (താഴെ കൂടുതൽ വിശദീകരിച്ചിരിക്കുന്നതുപോലെ, സുരക്ഷാ കാരണങ്ങളാലോ നിയമപരമായ കാരണങ്ങളാലോ അവ സൂക്ഷിക്കേണ്ടിവരുന്നില്ലെങ്കിൽ). കൂടാതെ, നിങ്ങളുടെ അറ്റ്‌ലസിലെ ആൾമറയുള്ള ബ്രൗസിങ് ചരിത്രം സെഷൻ അവസാനിപ്പിച്ചതിനുശേഷം സൂക്ഷിക്കപ്പെടില്ല.
ന്യായമായ സുരക്ഷാ കാരണങ്ങളാലോ നിയമപരമായ കാരണങ്ങളാലോ ഞങ്ങൾ കൂടുതൽ കാലം സൂക്ഷിക്കുന്ന വിവരങ്ങൾ: ചില സാഹചര്യങ്ങളിൽ, നിങ്ങൾ ഇല്ലാതാക്കിയതിനുശേഷവും വ്യക്തിഗത വിവരങ്ങൾ കൂടുതൽ കാലം സൂക്ഷിക്കേണ്ടിവരും. ഉദാഹരണത്തിന്, നിയമപരമായി അത് ആവശ്യമായതിനാലോ, തട്ടിപ്പും ദുരുപയോഗവും നേരിടുന്നതിനോ, സുരക്ഷാ കാരണങ്ങളാലോ, സാമ്പത്തിക രേഖകൾ സൂക്ഷിക്കുന്നതിനോ ഇങ്ങനെ ചെയ്യേണ്ടിവരാം. ഉദാഹരണത്തിന്:
ഞങ്ങളുടെ ഉപയോഗ നയങ്ങൾ ലംഘിച്ചതിനാൽ നിർദ്ദിഷ്ട ഉള്ളടക്കമോ നിങ്ങളുടെ അക്കൗണ്ടോ നിരോധിക്കപ്പെട്ടാൽ, തട്ടിപ്പ്, ദുരുപയോഗം, ഞങ്ങളുടെ നയങ്ങളുടെ മറ്റ് ലംഘനങ്ങൾ എന്നിവയിൽനിന്ന് സേവനങ്ങളെ സംരക്ഷിക്കാൻ ആ വിവരങ്ങൾ ഞങ്ങൾ സൂക്ഷിച്ചേക്കാം;
നിങ്ങളുടെ വിവരങ്ങൾ സൂക്ഷിക്കാൻ നിയമപരമായി ഞങ്ങൾ ബാധ്യസ്ഥരാണെങ്കിൽ (ഉദാഹരണത്തിന്, നിയമാനുസൃതമായ സമൻസ് ലഭിച്ചാൽ), ബന്ധപ്പെട്ട നിയമപരമോ നിയന്ത്രണപരമോ ആയ ബാധ്യത നിലനിൽക്കുന്ന കാലയളവിൽ അവ ഞങ്ങൾ സൂക്ഷിച്ചേക്കാം;
ഞങ്ങൾ ഒരു സാമ്പത്തിക ഇടപാടിൽ കക്ഷിയാകുമ്പോൾ (ഉദാഹരണത്തിന്, ChatGPT Plus അല്ലെങ്കിൽ Pro അക്കൗണ്ടിനുള്ള നിങ്ങളുടെ പണമടയ്ക്കൽ കൈകാര്യം ചെയ്യുമ്പോഴോ, ChatGPT വഴി ഒരു വാങ്ങൽ സാധ്യമാക്കുമ്പോഴോ), കണക്കുസൂക്ഷിക്കൽ, തർക്കപരിഹാരം, നിയന്ത്രണ വ്യവസ്ഥകൾ പാലിക്കൽ എന്നിവയ്ക്കായി പണമടയ്ക്കലും ഇടപാടുമായി ബന്ധപ്പെട്ട വിവരങ്ങൾ ഞങ്ങൾ സൂക്ഷിച്ചേക്കാം;
നിങ്ങളുടെ വ്യക്തിഗത വിവരങ്ങൾ ഇല്ലാതാക്കാൻ ഞങ്ങളോട് ആവശ്യപ്പെടുമ്പോൾ, ആ അഭ്യർത്ഥന പാലിച്ചിട്ടുണ്ടെന്ന് പരിശോധിച്ച് ഉറപ്പാക്കുന്നതിനായി ഇല്ലാതാക്കൽ അഭ്യർത്ഥനയുടെ പരിശോധനാരേഖ ഞങ്ങൾ സൂക്ഷിക്കുന്നു.
ഈ സൂക്ഷിപ്പുകാലയളവുകൾ നിർണ്ണയിക്കുമ്പോൾ ഞങ്ങൾ പല ഘടകങ്ങളും പരിഗണിക്കുന്നു. ഉദാഹരണത്തിന്:
വ്യക്തിഗത വിവരങ്ങൾ പ്രോസസ്സ് ചെയ്യുന്നതിന്റെ ഉദ്ദേശ്യം (ഞങ്ങളുടെ സേവനങ്ങൾ നൽകാൻ അവ സൂക്ഷിക്കേണ്ടതുണ്ടോ എന്നതുപോലുള്ള കാര്യങ്ങൾ);
വിവരങ്ങളുടെ അളവ്, സ്വഭാവം, സ്വകാര്യതാപ്രാധാന്യം;
അനധികൃത ഉപയോഗമോ വെളിപ്പെടുത്തലോ മൂലം ദോഷം സംഭവിക്കാനുള്ള സാധ്യത;
ഞങ്ങൾക്ക് ബാധകമായ ഏതെങ്കിലും നിയമപരമായ ആവശ്യകതകൾ.
മുകളിൽ വിവരിച്ചതുപോലെ വ്യക്തിഗത വിവരങ്ങൾ ശേഖരിക്കുന്നതിനും ഉപയോഗിക്കുന്നതിനും സമ്മതം നൽകാതിരിക്കാൻ നിങ്ങൾക്ക് അവകാശമുണ്ട്. എന്നാൽ, സമ്മതം നൽകുന്നില്ലെങ്കിൽ വെബ്‌സൈറ്റിലെ നിങ്ങളുടെ രജിസ്ട്രേഷന് നിയന്ത്രണമുണ്ടാകും.
വ്യക്തിഗത വിവരങ്ങൾ മൂന്നാം കക്ഷികൾക്ക് നൽകൽ/വിദേശത്തേക്ക് കൈമാറ്റം ചെയ്യൽ (നിർബന്ധം)
ചില സാഹചര്യങ്ങളിൽ, മുകളിലെ “ശേഖരിക്കുന്ന വ്യക്തിഗത വിവരങ്ങളുടെ ഇനങ്ങൾ” എന്ന ഭാഗത്ത് പറഞ്ഞിരിക്കുന്ന നിങ്ങളുടെ വ്യക്തിഗത വിവരങ്ങൾ, താഴെ വിവരിക്കുന്ന നിർദ്ദിഷ്ടവും പരിമിതവുമായ ആവശ്യങ്ങൾക്കായി OpenAI മൂന്നാം കക്ഷികൾക്ക് നൽകിയേക്കാം:
സർക്കാർ അധികാരികളോ മറ്റ് മൂന്നാം കക്ഷികളോ: ഞങ്ങളുടെ സേവനങ്ങളുമായുള്ള നിങ്ങളുടെ ഇടപെടലുകൾ സംബന്ധിച്ച വിവരങ്ങൾ ഉൾപ്പെടെയുള്ള വ്യക്തിഗത വിവരങ്ങൾ, നിയമം പാലിച്ചുകൊണ്ട് സർക്കാർ അധികാരികളുമായോ ഇതേ മേഖലയിലെ മറ്റ് സ്ഥാപനങ്ങളുമായോ മറ്റ് മൂന്നാം കക്ഷികളുമായോ ഞങ്ങൾ പങ്കിട്ടേക്കാം: (i) നിയമപരമായ ബാധ്യത പാലിക്കാൻ അത് ആവശ്യമായാൽ, അല്ലെങ്കിൽ അത്തരമൊരു ബാധ്യത പാലിക്കാൻ ആ നടപടി ആവശ്യമാണെന്ന് ഉത്തമവിശ്വാസത്തിൽ കരുതുന്നുവെങ്കിൽ; (ii) ഞങ്ങളുടെ അവകാശങ്ങളോ സ്വത്തോ സംരക്ഷിക്കുന്നതിനും പ്രതിരോധിക്കുന്നതിനും; (iii) ഞങ്ങളുടെ നിബന്ധനകളോ നയങ്ങളോ നിയമമോ ലംഘിക്കപ്പെട്ടതായി ഞങ്ങളുടെ മാത്രം വിവേചനാധികാരത്തിൽ തീരുമാനിച്ചാൽ; (iv) തട്ടിപ്പോ മറ്റ് നിയമവിരുദ്ധ പ്രവർത്തനങ്ങളോ കണ്ടെത്തുന്നതിനോ തടയുന്നതിനോ; (v) ഞങ്ങളുടെ ഉൽപ്പന്നങ്ങൾ, ജീവനക്കാർ, ഉപയോക്താക്കൾ, പൊതുജനങ്ങൾ എന്നിവരുടെ സുരക്ഷയും സംരക്ഷണവും അഖണ്ഡതയും ഉറപ്പാക്കുന്നതിന്; അല്ലെങ്കിൽ (vi) നിയമപരമായ ബാധ്യതയിൽനിന്ന് സംരക്ഷണം നേടുന്നതിന്.
അനുബന്ധ സ്ഥാപനങ്ങൾ: OpenAI-യെ നിയന്ത്രിക്കുന്നതോ, OpenAI-യുടെ നിയന്ത്രണത്തിലുള്ളതോ, OpenAI-യുമായി പൊതുവായ നിയന്ത്രണത്തിലുള്ളതോ ആയ സ്ഥാപനങ്ങളാണ് ഞങ്ങളുടെ അനുബന്ധ സ്ഥാപനങ്ങൾ. ഇവയ്ക്ക് ഞങ്ങൾ വ്യക്തിഗത വിവരങ്ങൾ വെളിപ്പെടുത്തിയേക്കാം. ഞങ്ങളുടെ പ്രൈവസി പോളിസിക്ക് അനുസൃതമായി ഈ വ്യക്തിഗത വിവരങ്ങൾ അനുബന്ധ സ്ഥാപനങ്ങൾ ഉപയോഗിച്ചേക്കാം.
ബിസിനസ് അക്കൗണ്ട് നിർവാഹകർ: നിങ്ങൾ ഒരു ChatGPT Enterprise അല്ലെങ്കിൽ ബിസിനസ് അക്കൗണ്ടിൽ ചേരുമ്പോൾ, ആ അക്കൗണ്ടിന്റെ നിർവാഹകർക്ക് നിങ്ങളുടെ ഉള്ളടക്കം കാണുന്നതുൾപ്പെടെ നിങ്ങളുടെ OpenAI അക്കൗണ്ട് ആക്‌സസ് ചെയ്യാനും നിയന്ത്രിക്കാനും കഴിഞ്ഞേക്കാം. കൂടാതെ, നിങ്ങളുടെ തൊഴിലുടമയുടെയോ മറ്റൊരു സ്ഥാപനത്തിന്റെയോ ഇമെയിൽ വിലാസം ഉപയോഗിച്ച് അക്കൗണ്ട് സൃഷ്ടിക്കുകയാണെങ്കിൽ, നിങ്ങൾക്ക് അക്കൗണ്ട് ഉണ്ടെന്ന കാര്യവും ഇമെയിൽ വിലാസം പോലുള്ള ചില അക്കൗണ്ട് വിവരങ്ങളും നിങ്ങളുടെ തൊഴിലുടമയുമായോ സ്ഥാപനവുമായോ ഞങ്ങൾ പങ്കിട്ടേക്കാം. ഉദാഹരണത്തിന്, അവരുടെ ബിസിനസ് അക്കൗണ്ടിൽ നിങ്ങളെ ചേർക്കാൻ കഴിയുന്നതിനായിരിക്കാം ഇത്.
നിങ്ങൾ ഇടപഴകുകയോ വിവരങ്ങൾ പങ്കിടുകയോ ചെയ്യുന്ന മറ്റ് ഉപയോക്താക്കളും മൂന്നാം കക്ഷികളും: മറ്റ് ഉപയോക്താക്കളുമായോ മൂന്നാം കക്ഷികളുമായോ ഇടപഴകാനും വിവരങ്ങൾ പങ്കിടാനും ചില സേവനങ്ങൾ അനുവദിക്കുന്നു. ഉദാഹരണത്തിന്, ChatGPT സംഭാഷണങ്ങൾ അല്ലെങ്കിൽ Sora വീഡിയോകൾ കൂടാതെ കഥാപാത്രങ്ങൾ പോലുള്ള ഉള്ളടക്കം പങ്കിടാം. അല്ലെങ്കിൽ മൂന്നാം കക്ഷികളായ തിരയൽ, ഷോപ്പിങ് പങ്കാളികളുമായി വിവരങ്ങൾ പങ്കിടാം. മൂന്നാം കക്ഷി പങ്കാളികളുമായി നിങ്ങൾ പങ്കിടുന്ന വിവരങ്ങൾ അവരുടെ സ്വന്തം നിബന്ധനകൾക്കും പ്രൈവസി പോളിസികൾക്കും വിധേയമാണ്. അവരുമായി വിവരങ്ങൾ പങ്കിടുന്നതിനുമുമ്പ് ആ നിബന്ധനകളും നയങ്ങളും മനസ്സിലാക്കിയിട്ടുണ്ടെന്ന് ഉറപ്പാക്കണം.
ആവശ്യാനുസരണം സമയാസമയങ്ങളിൽ ടെലികമ്മ്യൂണിക്കേഷൻ ശൃംഖലകൾ വഴി കൊറിയയും യു.എസും അല്ലാത്ത രാജ്യങ്ങളിലേക്കും ഈ വിവരങ്ങൾ വെളിപ്പെടുത്തിയേക്കാം.
സമ്മതം നൽകാതിരിക്കുകയോ കൊറിയ പ്രൈവസി പോളിസി അനുബന്ധത്തിലെ ബന്ധപ്പെടാനുള്ള വിവരങ്ങൾ ഉപയോഗിച്ച് ഞങ്ങളെ അറിയിക്കുകയോ ചെയ്തുകൊണ്ട്, വ്യക്തിഗത വിവരങ്ങൾ നൽകുന്നതിനും/അല്ലെങ്കിൽ കൈമാറുന്നതിനും സമ്മതം നിരസിക്കാം. എന്നാൽ, സമ്മതം നൽകുന്നില്ലെങ്കിൽ വെബ്‌സൈറ്റിലെ നിങ്ങളുടെ രജിസ്ട്രേഷന് നിയന്ത്രണമുണ്ടാകും.