നിങ്ങളുടെ ചോദ്യം എന്തെങ്കിലും വാങ്ങാനുള്ള ഉദ്ദേശ്യം സൂചിപ്പിക്കുമ്പോൾ (ഉദാഹരണത്തിന്, “എന്റെ നായയ്ക്ക് വേഷങ്ങൾ കണ്ടെത്താൻ സഹായിക്കൂ”), ചിത്രങ്ങളും ഉൽപ്പന്ന വിവരങ്ങളും, കൂടുതൽ അറിയാനോ വാങ്ങാനോ കഴിയുന്ന സൈറ്റുകളിലേക്കുള്ള ലിങ്കുകളും സഹിതം ഉൽപ്പന്നങ്ങൾ ChatGPT-യ്ക്ക് കാണിക്കാനാകും. യോഗ്യമായ ചില ഉൽപ്പന്നങ്ങൾക്കും വിൽപ്പനക്കാർക്കും ChatGPT ഇൻസ്റ്റന്റ് ചെക്കൗട്ട് ഓപ്ഷനും കാണിച്ചേക്കാം. വിൽപ്പനക്കാരന്റെ സൈറ്റിലേക്ക് പോകാതെ ChatGPT-യിൽ തന്നെ വാങ്ങൽ പൂർത്തിയാക്കാൻ ഇത് നിങ്ങളെ അനുവദിക്കുന്നു.

ഉൽപ്പന്ന ഫലങ്ങൾ ChatGPT സ്വതന്ത്രമായാണ് തിരഞ്ഞെടുക്കുന്നത്. അവ പരസ്യങ്ങളല്ല, OpenAI-യുടെ ഏതെങ്കിലും പങ്കാളിത്തങ്ങൾ അവയെ സ്വാധീനിക്കുന്നുമില്ല. പരസ്യങ്ങൾ ഉൽപ്പന്ന ഫലങ്ങളിൽനിന്ന് വേറിട്ടതാണ്. ChatGPT-യിലെ പരസ്യങ്ങളെക്കുറിച്ച് കൂടുതൽ അറിയാം.

വസ്ത്രങ്ങളും അലങ്കാരവസ്തുക്കളും ധരിച്ചാൽ എങ്ങനെയുണ്ടാകുമെന്ന് വെർച്വലായി നോക്കാം

വസ്ത്രങ്ങളുടെയും അലങ്കാരവസ്തുക്കളുടെയും ഉൽപ്പന്ന ലിസ്റ്റിങ്ങുകളിൽ “ധരിച്ചുനോക്കുക” എന്ന ബട്ടൺ കാണാം. ആ ഇനം ധരിച്ചാൽ നിങ്ങൾക്ക് എങ്ങനെയുണ്ടാകുമെന്ന് കാണാൻ ഇത് ഉപയോഗിക്കുക. നിങ്ങൾ അത് ധരിച്ചുനോക്കുന്ന വെർച്വൽ ചിത്രം ChatGPT ഇമേജസ് ഉപയോഗിച്ചാണ് സൃഷ്ടിക്കുന്നത്.

ഒരു ഇനം ധരിച്ചുനോക്കാൻ:

1. വസ്ത്രത്തിന്റെയോ അലങ്കാരവസ്തുവിന്റെയോ ഉൽപ്പന്ന ലിസ്റ്റിങ്ങിലെ “ധരിച്ചുനോക്കുക” ബട്ടൺ തിരഞ്ഞെടുക്കുക.

2. ഒരു സെൽഫി എടുക്കുക അല്ലെങ്കിൽ അപ്‌ലോഡ് ചെയ്യുക.

3. നിങ്ങൾ അത് ധരിച്ചിരിക്കുന്നതായി സൃഷ്ടിച്ച ചിത്രം കാണുക.

ഒരു സംഭാഷണത്തിൽ വസ്ത്രത്തിന്റെയോ അലങ്കാരവസ്തുവിന്റെയോ ചിത്രം അപ്‌ലോഡ് ചെയ്ത്, അത് ധരിച്ചാൽ നിങ്ങൾക്ക് എങ്ങനെയുണ്ടാകുമെന്ന് കാണിക്കാൻ ChatGPT-യോട് ആവശ്യപ്പെടുകയും ചെയ്യാം.

ധരിച്ചുനോക്കുന്ന ചിത്രങ്ങൾ ഉൽപ്പന്നത്തെയോ നിങ്ങളുടെ രൂപത്തെയോ കൃത്യമായി പ്രതിനിധീകരിച്ചേക്കില്ല. അവ പാകമാകുമെന്നോ അളവ് ശരിയായിരിക്കുമെന്നോ ഉറപ്പുനൽകുന്നില്ല. വാങ്ങുന്നതിനുമുമ്പ് വിൽപ്പനക്കാരൻ നൽകിയ അളവുകൾ, ഉൽപ്പന്ന വിവരങ്ങൾ, മടക്കിനൽകൽ നയം എന്നിവ പരിശോധിക്കുക.

റഫറൻസ് ഫോട്ടോകൾ സംരക്ഷിക്കുകയും നിയന്ത്രിക്കുകയും ചെയ്യുക

പിന്നീടും ധരിച്ചുനോക്കാൻ ഉപയോഗിക്കുന്നതിനായി നിങ്ങളുടെ റഫറൻസ് ഫോട്ടോകൾ സംരക്ഷിക്കുന്നു. അതിനാൽ ഓരോ തവണയും അപ്‌ലോഡ് ചെയ്യാതെ അവ വീണ്ടും ഉപയോഗിക്കാം. ക്രമീകരണങ്ങൾ വഴി നിങ്ങളുടെ ഫോട്ടോകൾ മാറ്റുകയോ നീക്കം ചെയ്യുകയോ ചെയ്യാം.

നിങ്ങളുടെ റഫറൻസ് ഫോട്ടോകൾ നിയന്ത്രിക്കാൻ:

1. ക്രമീകരണങ്ങൾ തുറക്കുക.

2. വ്യക്തിഗതമാക്കൽ തിരഞ്ഞെടുക്കുക.

3. റഫറൻസ് ഫോട്ടോകൾ തിരഞ്ഞെടുക്കുക.

4. നിങ്ങൾ നിയന്ത്രിക്കാൻ ആഗ്രഹിക്കുന്ന ഫോട്ടോ തിരഞ്ഞെടുക്കുക.

5. പകരം മറ്റൊരു ഫോട്ടോ ചേർക്കാൻ ഫോട്ടോ മാറ്റുക തിരഞ്ഞെടുക്കുക. അത് നീക്കം ചെയ്യാൻ ഇല്ലാതാക്കൽ ഐക്കൺ തിരഞ്ഞെടുക്കുക.

ലൈബ്രറിയിൽ ഉൽപ്പന്നങ്ങൾ സംരക്ഷിക്കുക

ഏത് ഉൽപ്പന്നവും പ്രിയപ്പെട്ടവയിൽ സംരക്ഷിക്കാം. അല്ലെങ്കിൽ, നിങ്ങൾ കണ്ടെത്തിയവ ക്രമീകരിക്കാൻ നിങ്ങളുടെ ChatGPT ലൈബ്രറിയിൽ ഒരു ഫോൾഡർ സൃഷ്ടിക്കാം. 

• ഒരു ഉൽപ്പന്നം സംരക്ഷിക്കാൻ അതിന്റെ ബുക്ക്മാർക്ക് ഐക്കൺ തിരഞ്ഞെടുക്കുക. അത് നിങ്ങളുടെ പ്രിയപ്പെട്ടവയിൽ സംരക്ഷിക്കപ്പെടും.

• ഇനങ്ങൾ സംരക്ഷിക്കുമ്പോൾ അവയ്ക്കായി പുതിയൊരു ഫോൾഡർ സൃഷ്ടിക്കാനും തിരഞ്ഞെടുക്കാം. 

• സംരക്ഷിച്ച ഉൽപ്പന്നം നീക്കം ചെയ്യാൻ, അതിന്റെ നിറം നിറച്ച ബുക്ക്മാർക്ക് ഐക്കൺ (പ്രിയപ്പെട്ടവയിൽനിന്ന് നീക്കം ചെയ്യുക) തിരഞ്ഞെടുക്കുക. 

സംരക്ഷിച്ച ഉൽപ്പന്നങ്ങളും ഫോൾഡറുകളും നോക്കാൻ ChatGPT ലൈബ്രറിയിലേക്ക് മടങ്ങുക.

ലഭ്യത

മൊബൈലിലും വെബിലും ChatGPT-യിൽ ലഭ്യമാണ്. 

ഉൽപ്പന്ന ഫലങ്ങൾ തിരഞ്ഞെടുക്കുന്നത് എങ്ങനെ

നിങ്ങളുടെ ഉദ്ദേശ്യത്തിന് പ്രസക്തമാണെന്ന് ChatGPT കരുതുമ്പോഴാണ് ഒരു ഉൽപ്പന്നം കരൗസലിൽ പ്രത്യക്ഷപ്പെടുന്നത്. നിങ്ങളുടെ ചോദ്യവും അനുബന്ധ വിവരങ്ങളും (മെമ്മറി അല്ലെങ്കിൽ ഇഷ്ടാനുസൃത നിർദ്ദേശങ്ങൾ പോലുള്ളവ) ഇത് പരിഗണിക്കുന്നു.


കൂടുതൽ വിവരങ്ങൾക്ക് കാണുക: മെമ്മറി കൂടാതെ ഇഷ്ടാനുസൃത നിർദ്ദേശങ്ങൾ.

ഉദാഹരണത്തിന്, നായകൾക്കുള്ള രസകരമായ വേഷങ്ങൾ നിങ്ങൾ ചോദിച്ചാൽ, ലഭ്യമായ ഓപ്ഷനുകൾ, വില, അവലോകനങ്ങൾ, ഉപയോഗിക്കാനുള്ള എളുപ്പം എന്നിവയ്ക്കൊപ്പം നിങ്ങൾ നൽകുന്ന മറ്റ് വിവരങ്ങളും ChatGPT പരിഗണിച്ചേക്കാം. കോമാളികളെ ഇഷ്ടമല്ലെന്ന് നിങ്ങൾ പറഞ്ഞിട്ടുണ്ടെങ്കിൽ, കോമാളിവേഷങ്ങൾ അത് ഒഴിവാക്കിയേക്കാം.

ഉപയോക്താവിന്റെ ഉദ്ദേശ്യം മോഡൽ വ്യാഖ്യാനിക്കുകയാണ് ചെയ്യുന്നത് എന്നതിനാൽ, ചിലപ്പോൾ തെറ്റുകൾ സംഭവിക്കാം. ഉദാഹരണത്തിന്, കോമാളിവേഷങ്ങൾ പരിഗണിക്കാൻ നിങ്ങൾക്ക് യഥാർത്ഥത്തിൽ വിരോധമുണ്ടാകണമെന്നില്ല. എന്തെങ്കിലും അനുയോജ്യമല്ലെന്ന് തോന്നിയാൽ, മാറ്റങ്ങൾ വരുത്താൻ ChatGPT-യോട് ആവശ്യപ്പെട്ടുകൊണ്ട് നിങ്ങളുടെ മുൻഗണനകൾ വ്യക്തമാക്കാം.

ഏതൊക്കെ ഉൽപ്പന്നങ്ങൾ കാണിക്കണമെന്ന് തീരുമാനിക്കുമ്പോൾ ChatGPT പരിഗണിക്കുന്നവ:

• നേരിട്ടുള്ള ദാതാക്കളിൽനിന്നും മൂന്നാം കക്ഷി ദാതാക്കളിൽനിന്നുമുള്ള ഘടനാബദ്ധമായ മെറ്റാഡാറ്റയും (ഉദാ. വില, ഉൽപ്പന്ന വിവരണം) മറ്റ് മൂന്നാം കക്ഷി ഉള്ളടക്കവും. വിശദാംശങ്ങൾക്ക് കാണുക: ChatGPT സെർച്ച്.

• പുതിയ തിരയൽ ഫലങ്ങൾ പരിഗണിക്കുന്നതിന് മുമ്പ് ChatGPT സൃഷ്ടിക്കുന്ന മോഡൽ പ്രതികരണങ്ങൾ. വിശദാംശങ്ങൾക്ക് കാണുക: ChatGPT-യും ഞങ്ങളുടെ അടിസ്ഥാന മോഡലുകളും എങ്ങനെയാണ് വികസിപ്പിക്കുന്നത്.

• OpenAI-യുടെ സുരക്ഷാ മാനദണ്ഡങ്ങളും ഉൽപ്പന്ന നയങ്ങളും. വിശദാംശങ്ങൾക്ക് കാണുക: OpenAI സുരക്ഷ.

നിങ്ങളുടെ ആവശ്യങ്ങൾക്കനുസരിച്ച്, ഈ ഘടകങ്ങളിൽ ചിലത് മറ്റുള്ളവയെക്കാൾ പ്രസക്തമായിരിക്കും. ഉദാഹരണത്തിന്, നിങ്ങൾ $30 ബജറ്റ് നിശ്ചയിച്ചാൽ ChatGPT വിലയ്ക്ക് കൂടുതൽ പ്രാധാന്യം നൽകും. വിലയെക്കുറിച്ച് പറഞ്ഞിട്ടില്ലെങ്കിൽ, പകരം മറ്റ് വശങ്ങൾക്ക് പ്രാധാന്യം നൽകിയേക്കാം.

ലഭ്യമായ എല്ലാ ഉൽപ്പന്നങ്ങളും കാണിക്കണമെന്നില്ല എന്നത് ഓർക്കുക (നായകൾക്കായി ധാരാളം വേഷങ്ങൾ വിപണിയിലുണ്ട്). വാങ്ങുന്നതിനുമുമ്പ് ഉൽപ്പന്നങ്ങൾ നിങ്ങളുടെ നിർദ്ദിഷ്ട ആവശ്യങ്ങൾ നിറവേറ്റുന്നുണ്ടെന്ന് പരിശോധിക്കാൻ ഞങ്ങൾ ശുപാർശ ചെയ്യുന്നു.

ഉൽപ്പന്ന വിവരണങ്ങൾ, ലേബലുകൾ, അവലോകനങ്ങൾ, റേറ്റിങ്ങുകൾ

ഒരേ ഉൽപ്പന്നത്തിന് വിൽപ്പനക്കാർ പലപ്പോഴും വ്യത്യസ്ത പേരുകളും വിവരണങ്ങളും ഉപയോഗിക്കുന്നു. അതിനാൽ, ഫലങ്ങൾ വായിക്കാൻ എളുപ്പമാക്കാൻ മൂന്നാം കക്ഷി ദാതാക്കളിൽനിന്ന് ലഭിക്കുന്ന വിവരങ്ങളെ അടിസ്ഥാനമാക്കി ChatGPT ലളിതമായ ഉൽപ്പന്ന പേരുകളും വിവരണങ്ങളും സൃഷ്ടിച്ചേക്കാം.

ചില ഉൽപ്പന്ന ചിത്രങ്ങളിൽ “ചെലവ് കുറഞ്ഞത്” അല്ലെങ്കിൽ “ഏറ്റവും ജനപ്രിയം” തുടങ്ങിയ സവിശേഷതാ ലേബലുകൾ ഉണ്ടായേക്കാം. മോഡലിന് ലഭ്യമായ വിവരങ്ങളെ അടിസ്ഥാനമാക്കിയാണ് ChatGPT ഈ ലേബലുകൾ സൃഷ്ടിക്കുന്നത്. ഇവയിൽ മൂന്നാം കക്ഷി ഡാറ്റയും ഉൾപ്പെട്ടേക്കാം. അവ ഉറപ്പുകളോ സ്ഥിരീകരിച്ച പ്രസ്താവനകളോ അല്ല. ലഭ്യമായ എല്ലാ വിപണി വിവരങ്ങളും അവ പ്രതിഫലിപ്പിച്ചേക്കില്ല. ഉദാഹരണത്തിന്, “ചെലവ് കുറഞ്ഞത്” എന്ന ലേബൽ, മുടക്കുന്ന പണത്തിന് നല്ല മൂല്യം ലഭിക്കുന്നതായി അവലോകനങ്ങളിൽ പതിവായി പറയുന്നുവെന്ന് അർത്ഥമാക്കാം. അത് ലഭ്യമായ ഏറ്റവും കുറഞ്ഞ വിലയാണെന്ന് നിർബന്ധമില്ല.

ഉൽപ്പന്ന അവലോകനങ്ങളുടെ സംഗ്രഹങ്ങളും ChatGPT കാണിച്ചേക്കാം. മോഡൽ സൃഷ്ടിക്കുന്ന ഈ സംഗ്രഹങ്ങൾ പൊതുവായി ലഭ്യമായ വെബ്‌സൈറ്റുകളിലെ അവലോകനങ്ങളെ അടിസ്ഥാനമാക്കിയുള്ളതാണ്. ഒരു ഉൽപ്പന്നത്തെക്കുറിച്ച് ഉപയോക്താക്കൾക്ക് പൊതുവെ ഇഷ്ടപ്പെട്ടതും ഇഷ്ടപ്പെടാത്തതുമായ കാര്യങ്ങൾ എടുത്തുകാണിക്കാനാണ് ഇവ ഉദ്ദേശിച്ചിരിക്കുന്നത്. അവലോകനങ്ങളും റേറ്റിങ്ങുകളും OpenAI പരിശോധിച്ച് സ്ഥിരീകരിക്കുന്നില്ല.

വിലനിർണ്ണയം

ChatGPT കാണിക്കുന്ന ഉൽപ്പന്ന ലിസ്റ്റിങ്ങുകളിൽ വിലകൾ ഉൾപ്പെട്ടേക്കാം. ഈ വിവരങ്ങൾ ഞങ്ങൾക്ക് മൂന്നാം കക്ഷി ദാതാക്കളിൽനിന്നാണ് ലഭിക്കുന്നത്. ഒരു ഉൽപ്പന്നം തിരഞ്ഞെടുത്ത ശേഷം, അതേ വിലയ്ക്കോ വ്യത്യസ്ത വിലയ്ക്കോ ആ ഉൽപ്പന്നം നൽകുന്ന മറ്റ് വിൽപ്പനക്കാരുടെ ഓപ്ഷനുകളും നിങ്ങൾക്ക് കാണാനായേക്കാം.

ChatGPT-യുടെ ആദ്യ മറുപടിയിൽ കാണിക്കുന്ന വിലകൾ സാധാരണയായി പട്ടികയിലെ ആദ്യ വിൽപ്പനക്കാരന്റെ വിലയാണ്. ഇത് ലഭ്യമായ ഏറ്റവും കുറഞ്ഞ വിലയായിരിക്കണമെന്നില്ല. ഉൽപ്പന്ന വിവര പേജിലും വിൽപ്പനക്കാരുടെ റാങ്കിങ്ങിലും തനിക്കറിയാവുന്ന ഏറ്റവും കുറഞ്ഞ വിലയുള്ള ഓപ്ഷൻ എടുത്തുകാണിക്കാൻ ChatGPT ശ്രമിക്കുന്നു. ഒന്നിലധികം വിൽപ്പനക്കാർ ഉൽപ്പന്നം നൽകുമ്പോൾ, ആ ഓപ്ഷന് “മികച്ച വില” എന്ന ലേബൽ ഉണ്ടായേക്കാം. “ഇൻസ്റ്റന്റ് ചെക്കൗട്ട്” പോലുള്ള മറ്റൊരു ലേബൽ ബാധകമാണെങ്കിൽ, ഏറ്റവും കുറഞ്ഞ വിലയുള്ള ഓപ്ഷനിൽ “മികച്ച വില” എന്ന ലേബൽ കൂടി കാണിച്ചേക്കില്ല.

വിൽപ്പനക്കാർ വിലയോ ഉൽപ്പന്നം അയയ്ക്കുന്നതിനുള്ള നിബന്ധനകളോ പുതുക്കുമ്പോൾ, നിങ്ങൾ കാണുന്ന വിവരങ്ങളിൽ ആ മാറ്റം പ്രതിഫലിക്കാൻ കുറച്ച് സമയമെടുത്തേക്കാം. ഈ വിവരങ്ങൾ കൂടുതൽ വേഗത്തിൽ പുതുക്കാനുള്ള മാർഗങ്ങൾ വികസിപ്പിക്കാൻ ഞങ്ങൾ സജീവമായി പ്രവർത്തിക്കുന്നു. എന്തെങ്കിലും പിശക് കണ്ടാൽ, അഭിപ്രായം സമർപ്പിച്ച് ഞങ്ങളെ അറിയിക്കുക (നിർദ്ദേശങ്ങൾ ചുവടെയുണ്ട്).

വിൽപ്പനക്കാരെ തിരഞ്ഞെടുക്കുന്നത് എങ്ങനെ

നിങ്ങൾ ഒരു ഉൽപ്പന്നം തിരഞ്ഞെടുക്കുമ്പോൾ, അത് വിൽക്കുന്നവരുടെ പട്ടിക ChatGPT കാണിച്ചേക്കാം. മൂന്നാം കക്ഷി ദാതാക്കളിൽനിന്നോ വിൽപ്പനക്കാരിൽനിന്ന് നേരിട്ടോ ലഭിക്കുന്ന വിൽപ്പനക്കാരെയും ഉൽപ്പന്നങ്ങളെയും കുറിച്ചുള്ള മെറ്റാഡാറ്റയുടെ അടിസ്ഥാനത്തിലാണ് ChatGPT ഈ പട്ടിക സൃഷ്ടിക്കുന്നത്. ലഭ്യത, വില, ഗുണനിലവാരം, ആ ഇനത്തിന്റെ നിർമ്മാതാവാണോ പ്രധാന വിൽപ്പനക്കാരനാണോ തുടങ്ങിയ ഘടകങ്ങളെ അടിസ്ഥാനമാക്കിയാണ് വിൽപ്പനക്കാരുടെ റാങ്ക് നിശ്ചയിക്കുന്നത്. ഉപയോക്താക്കളുടെ മുൻഗണനകൾക്കനുസരിച്ച് വിൽപ്പനക്കാരുടെ റാങ്കിങ് കൂടുതൽ വ്യക്തിഗതമാക്കുന്നത് ഉൾപ്പെടെ, ഷോപ്പിങ് അനുഭവം മെച്ചപ്പെടുത്തുന്നതിനൊപ്പം ഈ രീതിയും വികസിക്കുമെന്ന് ഞങ്ങൾ പ്രതീക്ഷിക്കുന്നു.

ഷോപ്പിഫൈയിലെ വിൽപ്പനക്കാരുടെ ഉൽപ്പന്ന ഡാറ്റ ഷോപ്പിഫൈ കാറ്റലോഗ് വഴി ഇതിനകം ChatGPT-യുമായി സംയോജിപ്പിച്ചിട്ടുണ്ട്. പ്രസക്തമായ ഉപയോക്തൃ സംഭാഷണങ്ങളിൽ ഉൽപ്പന്നങ്ങൾ കൂടുതൽ കൃത്യമായും പൂർണ്ണമായും പ്രത്യക്ഷപ്പെടാൻ ഇത് സഹായിക്കുന്നു. ഓരോ വിൽപ്പനക്കാരനും ഇതിനായി അധികമായി ഒന്നും ചെയ്യേണ്ടതില്ല.

തങ്ങളുടെ ഉൽപ്പന്നങ്ങളെക്കുറിച്ചുള്ള ഏറ്റവും പുതിയ വിവരങ്ങൾ ChatGPT എല്ലായ്‌പ്പോഴും കാണിക്കുന്നുവെന്ന് ഉറപ്പാക്കാൻ OpenAI-യ്ക്ക് നേരിട്ട് ഉൽപ്പന്ന ഫീഡ് നൽകാൻ താൽപ്പര്യമുള്ള വിൽപ്പനക്കാർക്ക്, ഞങ്ങളുടെ ഡെവലപ്പർ സൈറ്റിലെ ഉൽപ്പന്ന ഫീഡ് ഡോക്യുമെന്റേഷൻ വായിക്കാനും നേരിട്ടുള്ള ഫീഡുകൾ നൽകാനുള്ള അനുമതിക്ക് അപേക്ഷിക്കാനും കഴിയും.

അഭിപ്രായം അറിയിക്കുക

ഉൽപ്പന്ന ഫലങ്ങൾ മെച്ചപ്പെടുത്താൻ ഞങ്ങൾ നിരന്തരം പ്രവർത്തിക്കുന്നു. നിങ്ങളുടെ അഭിപ്രായങ്ങൾ സ്വാഗതം ചെയ്യുന്നു. ഉൽപ്പന്നത്തിലെ തള്ളവിരൽ മുകളിലേക്കോ താഴേക്കോ ചൂണ്ടുന്ന ഐക്കൺ തിരഞ്ഞെടുത്ത് നിങ്ങളുടെ അഭിപ്രായം പങ്കിടാം. തെറ്റായ വിവരങ്ങളുള്ളതോ ഞങ്ങളുടെ നയങ്ങൾ ലംഘിക്കുന്നതോ ആയ ഉൽപ്പന്നങ്ങൾ അവയിലെ മെനു വഴി റിപ്പോർട്ട് ചെയ്യുകയോ ഉള്ളടക്കം റിപ്പോർട്ട് ചെയ്യാനുള്ള ഫോം പൂരിപ്പിക്കുകയോ ചെയ്യാം.