അവലോകനം

നിങ്ങളുടെ OpenAI API ഏതൊക്കെ IP വിലാസങ്ങൾക്ക് ഉപയോഗിക്കാമെന്ന് നിയന്ത്രിക്കാൻ സഹായിക്കുന്ന ഐച്ഛിക സുരക്ഷാസംവിധാനമാണ് IP അനുമതിപ്പട്ടിക.

ഇത് പ്രാബല്യത്തിലാക്കിയാൽ, സജ്ജമാക്കിയ IP വിലാസങ്ങളിൽ നിന്നോ IP ശ്രേണികളിൽ നിന്നോ വരുന്ന അഭ്യർത്ഥനകൾ മാത്രമേ അനുവദിക്കൂ. സാധുവായ API കീ ഉൾപ്പെട്ടിട്ടുണ്ടെങ്കിലും മറ്റെല്ലാ IP വിലാസങ്ങളിൽ നിന്നുള്ള അഭ്യർത്ഥനകളും നിരസിക്കും.

വിശ്വസനീയമായ ശൃംഖലാ സംവിധാനങ്ങളിൽ നിന്നുള്ള പ്രവേശനം മാത്രം അനുവദിച്ച് അനധികൃത API ഉപയോഗത്തിനുള്ള സാധ്യത കുറയ്ക്കാൻ സഹായിക്കുന്നതാണ് ഈ സൗകര്യം.

കുറിപ്പ്: IP അനുമതിപ്പട്ടിക API അഭ്യർത്ഥനകൾക്ക് മാത്രമേ ബാധകമാകൂ. ഇത് platform.openai.com സന്ദർശിക്കുന്നതിനെയോ ഉപയോക്താക്കൾ അക്കൗണ്ടിൽ പ്രവേശിക്കുന്നതിനെയോ ബാധിക്കില്ല.

IP അനുമതിപ്പട്ടിക എന്തിന് ഉപയോഗിക്കണം

IP അനുമതിപ്പട്ടിക ഇനിപ്പറയുന്ന കാര്യങ്ങൾക്ക് സഹായിക്കും:

• അറിയാവുന്ന അടിസ്ഥാന സംവിധാനങ്ങൾക്ക് മാത്രം API ഉപയോഗിക്കാൻ അനുമതി നൽകുക (ഉദാഹരണത്തിന്, നിങ്ങളുടെ സെർവറുകളോ ക്ലൗഡ് സംവിധാനങ്ങളോ)

• API കീ ചോർന്നാൽ ദുരുപയോഗത്തിനുള്ള സാധ്യത കുറയ്ക്കുക

• API അഭ്യർത്ഥനകൾ എവിടെനിന്ന് വരുന്നു എന്നതിൽ അധിക നിയന്ത്രണം ഏർപ്പെടുത്തുക

സ്ഥിരമായതോ വ്യക്തമായി നിർവചിച്ചതോ ആയ ശൃംഖലാ ശ്രേണികളിൽ നിന്ന് API അഭ്യർത്ഥനകൾ വരുന്ന, യഥാർഥ ഉപയോഗത്തിനായി പ്രവർത്തിക്കുന്ന സംവിധാനങ്ങളിലാണ് IP അനുമതിപ്പട്ടിക ഏറ്റവും സാധാരണമായി ഉപയോഗിക്കുന്നത്.

ഇത് പ്രവർത്തിക്കുന്ന വിധം

അനുവദനീയമായ IP വിലാസങ്ങളുടെയോ CIDR ശ്രേണികളുടെയോ പട്ടിക നിങ്ങൾ സജ്ജമാക്കുന്നു.

• അനുവദനീയമായ IP വിലാസങ്ങളിൽ നിന്നുള്ള അഭ്യർത്ഥനകൾ സ്വീകരിക്കും.

• അനുമതിപ്പട്ടികയിൽ ഇല്ലാത്ത IP വിലാസങ്ങളിൽ നിന്നുള്ള അഭ്യർത്ഥനകൾ നിരസിക്കും.

IP അനുമതിപ്പട്ടിക ഇനിപ്പറയുന്ന തലങ്ങളിൽ നടപ്പാക്കാം:

• സ്ഥാപനതലത്തിൽ, അല്ലെങ്കിൽ

• പദ്ധതിതലത്തിൽ

ലഭ്യത

എല്ലാ API ഉപഭോക്താക്കൾക്കും IP അനുമതിപ്പട്ടിക ലഭ്യമാണ്.

IP അനുമതിപ്പട്ടിക സജ്ജമാക്കാൻ താഴെപ്പറയുന്ന ഘട്ടങ്ങൾ പാലിക്കുക.

IP അനുമതിപ്പട്ടിക സജ്ജമാക്കുക

കുറിപ്പ്: നിങ്ങൾക്ക് പരമാവധി 50 IP വിലാസങ്ങളോ CIDR ശ്രേണികളോ ചേർക്കാം.

1. ക്രമീകരണങ്ങൾ തുറക്കുക.

2. സുരക്ഷ തിരഞ്ഞെടുക്കുക.

3. IP അനുമതിപ്പട്ടിക തിരഞ്ഞെടുക്കുക.

4. ഒന്നോ അതിലധികമോ IP വിലാസങ്ങളോ CIDR ശ്രേണികളോ ചേർക്കുക.

5. (ഐച്ഛികം) ഒരു IP നിങ്ങളുടെ അനുമതിപ്പട്ടികയിൽ ഉൾപ്പെട്ടിട്ടുണ്ടോ എന്ന് ഉറപ്പാക്കാൻ പരിശോധിക്കുക എന്ന ഉപകരണം ഉപയോഗിക്കുക.

6. ഇനിപ്പറയുന്നവയ്ക്ക് അനുമതിപ്പട്ടിക പ്രാബല്യത്തിലാക്കുക:

   • ഒരു പ്രത്യേക പദ്ധതിക്ക്, അല്ലെങ്കിൽ

   • നിങ്ങളുടെ സ്ഥാപനത്തിലുടനീളം.

7. നിങ്ങൾ ഉപയോഗിക്കാൻ ഉദ്ദേശിക്കുന്ന സംവിധാനങ്ങളിൽ നിന്നുള്ള അഭ്യർത്ഥനകൾ പരീക്ഷിക്കുക.

സ്ഥാപനത്തിലുടനീളം നിയന്ത്രണം നടപ്പാക്കുന്നതിന് മുമ്പ് ഒരു പദ്ധതിയിൽ മാത്രം തുടങ്ങാൻ ഞങ്ങൾ ശുപാർശ ചെയ്യുന്നു.

മാറ്റങ്ങൾ വരുത്തിയ ശേഷം അവ പ്രാബല്യത്തിൽ വരാൻ 15 മിനിറ്റ് വരെ എടുത്തേക്കാം.


കുറിപ്പ്: IP അനുമതിപ്പട്ടികയുടെ ക്രമീകരണങ്ങൾ സജ്ജമാക്കാൻ സ്ഥാപനത്തിൽ നിങ്ങൾക്ക് ഉചിതമായ അനുമതികൾ ഉണ്ടായിരിക്കണം.

പ്രശ്നപരിഹാരം

അഭ്യർത്ഥനകൾ അപ്രതീക്ഷിതമായി പരാജയപ്പെടുന്നെങ്കിൽ:

• അനുവദനീയമായ IP വിലാസത്തിൽ നിന്നാണ് അഭ്യർത്ഥന വരുന്നതെന്ന് ഉറപ്പാക്കുക.

• നിങ്ങളുടെ അടിസ്ഥാന സംവിധാനങ്ങളുടെ IP വിലാസങ്ങൾ മാറിയിട്ടുണ്ടോ എന്ന് പരിശോധിക്കുക.

• നിങ്ങൾ സജ്ജമാക്കിയ IP ശ്രേണികൾ കൃത്യമാണോ എന്ന് പരിശോധിക്കുക.

• ക്രമീകരണങ്ങളിലെ മാറ്റങ്ങൾ എല്ലായിടത്തും പ്രാബല്യത്തിൽ വരാൻ 15 മിനിറ്റ് വരെ കാത്തിരിക്കുക.

• ഒരു IP അനുവദനീയമാണോ എന്ന് ഉറപ്പാക്കാൻ പരിശോധിക്കുക എന്ന ഉപകരണം ഉപയോഗിക്കുക.

ഒരു അഭ്യർത്ഥന തടയപ്പെടുമ്പോൾ എന്ത് സംഭവിക്കും

അനുമതിപ്പട്ടികയിൽ ഇല്ലാത്ത ഒരു IP വിലാസത്തിൽ നിന്നാണ് അഭ്യർത്ഥന വരുന്നതെങ്കിൽ, അത് പരാജയപ്പെടുകയും ഇനിപ്പറയുന്ന പ്രതികരണം ലഭിക്കുകയും ചെയ്യും:

• HTTP നില: 401 Unauthorized

• പിശക് കോഡ്: ip_not_authorized

പ്രതികരണത്തിന്റെ ഉദാഹരണം:

{

 "error": {

   "message": "Your IP is not authorized to access this organization.",

   "type": "ip_not_authorized"

 }

}

പതിവുചോദ്യങ്ങൾ

എന്റെ API കീയുടെ എല്ലാ അനധികൃത ഉപയോഗങ്ങളും IP അനുമതിപ്പട്ടിക തടയുമോ.

ഇല്ല. API അഭ്യർത്ഥനകൾ എവിടെനിന്ന് വരാമെന്ന് നിയന്ത്രിക്കുന്നതിലൂടെ അപകടസാധ്യത കുറയ്ക്കാൻ IP അനുമതിപ്പട്ടിക സഹായിക്കും. എന്നാൽ എല്ലാ തരത്തിലുള്ള ദുരുപയോഗവും ഇത് പൂർണ്ണമായി തടയില്ല. കീകൾ സുരക്ഷിതമായി സൂക്ഷിക്കുക, ഇടയ്ക്കിടെ മാറ്റുക, അക്കൗണ്ടിന്റെ സുരക്ഷ ശക്തമാക്കുക തുടങ്ങിയ മറ്റ് മികച്ച സുരക്ഷാരീതികൾക്കൊപ്പം ഇത് ഉപയോഗിക്കണം. കൂടുതൽ സുരക്ഷയ്ക്കായി, ഞങ്ങളുടെ സഹായകേന്ദ്രത്തിലെ API കീ സുരക്ഷയ്ക്കുള്ള മികച്ച രീതികൾ, അനധികൃത ഉപയോഗം തടയൽ എന്നീ മാർഗനിർദേശങ്ങൾ വായിക്കുക.

IP അനുമതിപ്പട്ടിക പ്രതികരണസമയത്തെ ബാധിക്കുമോ.

IP അനുമതിപ്പട്ടിക ചില സാഹചര്യങ്ങളിൽ, സാധാരണയായി ആദ്യ അഭ്യർത്ഥനകളിൽ, വളരെ ചെറിയ കാലതാമസം ഉണ്ടാക്കിയേക്കാം. ഇത് API-യുടെ മൊത്തത്തിലുള്ള പ്രവർത്തനക്ഷമതയെ കാര്യമായി ബാധിക്കുമെന്ന് പ്രതീക്ഷിക്കുന്നില്ല.

ഒരു അഭ്യർത്ഥന പരാജയപ്പെടുന്നത് IP അനുമതിപ്പട്ടിക മൂലമാണെന്ന് എങ്ങനെ അറിയാം.

IP അനുമതിപ്പട്ടിക മൂലം പരാജയപ്പെടുന്ന അഭ്യർത്ഥനകൾക്ക് ഇനിപ്പറയുന്ന പ്രതികരണം ലഭിക്കും:

• HTTP status: 401 Unauthorized

• Error code: ip_not_authorized