കൺവേർഷൻ വർധിപ്പിക്കാനുള്ള പ്രചാരണങ്ങൾ

വാങ്ങൽ, രജിസ്ട്രേഷൻ, താൽപ്പര്യമുള്ള ഉപഭോക്താവിന്റെ വിവരസമർപ്പണം, അല്ലെങ്കിൽ പിന്തുണയ്ക്കുന്ന മറ്റേതെങ്കിലും സാധാരണ കൺവേർഷൻ ഇവന്റ് എന്നിവ ലക്ഷ്യമാക്കി ChatGPT പരസ്യങ്ങൾ പരസ്യവിതരണം മെച്ചപ്പെടുത്തണമെങ്കിൽ, കൺവേർഷൻ വർധിപ്പിക്കൽ എന്ന ലക്ഷ്യം ഉപയോഗിക്കുക. ഈ ലക്ഷ്യം തിരഞ്ഞെടുത്ത ശേഷം, പ്രദർശനങ്ങളുടെ അടിസ്ഥാനത്തിലാണോ സാധുവായ ക്ലിക്കുകളുടെ അടിസ്ഥാനത്തിലാണോ നിരക്ക് ഈടാക്കേണ്ടതെന്ന് തിരഞ്ഞെടുക്കുക.

ക്ലിക്കുകൾ അടിസ്ഥാനമാക്കിയുള്ള നിരക്കിൽ, സാധുവായ ക്ലിക്കുകൾക്കാണ് നിങ്ങൾ പണം നൽകുന്നത്. ആരെങ്കിലും നിങ്ങളുടെ പരസ്യത്തിൽ ക്ലിക്ക് ചെയ്തതിനുശേഷം നടക്കുന്ന കൺവേർഷനുകൾ ലക്ഷ്യമാക്കിയാണ് പരസ്യവിതരണം മെച്ചപ്പെടുത്തുന്നത്. പ്രദർശനങ്ങൾ അടിസ്ഥാനമാക്കിയുള്ള നിരക്കിൽ, പരസ്യം പ്രദർശിപ്പിച്ച എണ്ണത്തിനാണ് നിങ്ങൾ പണം നൽകുന്നത്. പരസ്യം കണ്ടതും ക്ലിക്ക് ചെയ്തതും വഴി ഉണ്ടാകുന്നവ ഉൾപ്പെടെ, പരിഗണനയ്ക്ക് യോഗ്യമായ കൂടുതൽ തരം കൺവേർഷനുകൾ ലക്ഷ്യമാക്കിയാണ് പരസ്യവിതരണം മെച്ചപ്പെടുത്തുന്നത്.

ChatGPT വഴി ആളുകൾ ഉൽപ്പന്നങ്ങൾ കണ്ടെത്തുന്നതും വിലയിരുത്തുന്നതും തിരഞ്ഞെടുക്കുന്നതും കൂടുതൽ കൃത്യമായി കണക്കിലെടുക്കാൻ പ്രദർശനങ്ങൾ അടിസ്ഥാനമാക്കിയുള്ള നിരക്ക് പരസ്യദാതാക്കളെ സഹായിക്കും. ഒരു ആശയം പര്യവേക്ഷണം ചെയ്യുമ്പോൾ ഒരാൾ പരസ്യം കാണുകയും പിന്നീട് തിരിച്ചെത്തി, പരസ്യത്തിൽ നേരിട്ട് ക്ലിക്ക് ചെയ്യാതെതന്നെ ഒരു കൺവേർഷൻ പൂർത്തിയാക്കുകയും ചെയ്തേക്കാം. പരസ്യവിതരണം നിങ്ങളുടെ കൺവേർഷൻ ലക്ഷ്യത്തിൽ ശ്രദ്ധ കേന്ദ്രീകരിച്ചുതന്നെ തുടരും. അതേസമയം, ആ ഫലത്തിലേക്ക് നയിക്കുന്ന കൂടുതൽ ഇടപെടലുകൾ മെച്ചപ്പെടുത്തലിലും അളക്കലിലും കണക്കിലെടുക്കാനാകും.

ആരംഭിക്കുന്നതിന് മുമ്പ്

കൺവേർഷൻ വർധിപ്പിക്കൽ ലക്ഷ്യത്തോടെ ഒരു പ്രചാരണം സൃഷ്ടിക്കുന്നതിന് മുമ്പ്, ഇനിപ്പറയുന്നവ ഉറപ്പാക്കുക:

• നിങ്ങളുടെ പരസ്യ അക്കൗണ്ടിൽ കൺവേർഷൻ നിരീക്ഷണം സജ്ജീകരിച്ചിരിക്കണം. കൺവേർഷൻസ് API വഴിയോ JavaScript പിക്സൽ വഴിയോ ഇവ രണ്ടും ഉപയോഗിച്ചോ ഇത് സജ്ജീകരിക്കാം.

• പിന്തുണയ്ക്കുന്ന ഒരു സാധാരണ കൺവേർഷൻ ഇവന്റെങ്കിലും ലഭ്യമായിരിക്കണം. ഇഷ്ടാനുസൃത കൺവേർഷൻ ഇവന്റുകൾക്ക് കൺവേർഷൻ വർധിപ്പിക്കൽ ലക്ഷ്യത്തിൽ നിലവിൽ പിന്തുണയില്ല.

• ഏത് കൺവേർഷൻ ഇവന്റ് ലക്ഷ്യമാക്കിയാണ് പ്രചാരണം മെച്ചപ്പെടുത്തേണ്ടതെന്ന് നിങ്ങൾക്ക് വ്യക്തമായിരിക്കണം.

• ലക്ഷ്യം മാറ്റാൻ പുതിയൊരു പ്രചാരണം സൃഷ്ടിക്കാനോ നിലവിലുള്ള പ്രചാരണത്തിന്റെ പകർപ്പ് സൃഷ്ടിക്കാനോ നിങ്ങൾ തയ്യാറായിരിക്കണം. 

1. പ്രചാരണമോ അതിന്റെ പകർപ്പോ സൃഷ്ടിക്കുക

പരസ്യ മാനേജറിൽ പുതിയൊരു പ്രചാരണം സൃഷ്ടിച്ച്, പ്രചാരണ ലക്ഷ്യം എന്ന ഫീൽഡിൽ കൺവേർഷൻ വർധിപ്പിക്കൽ തിരഞ്ഞെടുക്കുക. നിലവിലുള്ള പ്രചാരണം കൺവേർഷൻ വർധിപ്പിക്കൽ ലക്ഷ്യത്തിലേക്ക് മാറ്റാൻ, അതിന്റെ പകർപ്പ് സൃഷ്ടിച്ച് പകർത്തിയ പ്രചാരണത്തിനായി പ്രദർശനങ്ങൾ തിരഞ്ഞെടുക്കുക.

2. നിരക്ക് ഈടാക്കുന്ന രീതി തിരഞ്ഞെടുക്കുക: പ്രദർശനങ്ങളോ ക്ലിക്കുകളോ

പ്രദർശനങ്ങളുടെ അടിസ്ഥാനത്തിൽ നിരക്ക് ഈടാക്കാൻ പ്രദർശനങ്ങൾ തിരഞ്ഞെടുക്കുക. പരസ്യം പ്രദർശിപ്പിച്ച എണ്ണത്തിന്റെ അടിസ്ഥാനത്തിലാണ് നിരക്ക് ഈടാക്കുന്നത്. പരസ്യവിതരണം നിങ്ങൾ തിരഞ്ഞെടുത്ത കൺവേർഷൻ ഇവന്റിൽ ശ്രദ്ധ കേന്ദ്രീകരിച്ചുതന്നെ തുടരും.

പ്രദർശനങ്ങൾ തിരഞ്ഞെടുക്കുമ്പോൾ, പരസ്യം കണ്ടതും ക്ലിക്ക് ചെയ്തതും വഴി ഉണ്ടാകുന്നവ ഉൾപ്പെടെ കൂടുതൽ കൺവേർഷനുകൾ നേടാനായി പരസ്യവിതരണം മെച്ചപ്പെടുത്തുന്നു. ക്ലിക്കുകൾ തിരഞ്ഞെടുക്കുന്നത് നിങ്ങളുടെ കൺവേർഷനുകൾ കുറയ്ക്കും.

ക്ലിക്കുകളുടെ അടിസ്ഥാനത്തിൽ നിരക്ക് ഈടാക്കാൻ ക്ലിക്കുകൾ തിരഞ്ഞെടുക്കുക. സാധുവായ ക്ലിക്കുകൾക്കാണ് നിരക്ക് ഈടാക്കുന്നത്. പരസ്യത്തിലെ ക്ലിക്കിന് ശേഷമുള്ള കൺവേർഷനുകൾ ലക്ഷ്യമാക്കി പരസ്യവിതരണം മെച്ചപ്പെടുത്തുന്നു.

പ്രചാരണം സൃഷ്ടിച്ച ശേഷം അതിൽത്തന്നെ പ്രചാരണ ലക്ഷ്യമോ നിരക്ക് ഈടാക്കുന്ന രീതിയോ മാറ്റാനാവില്ല. കൺവേർഷനുകൾക്കായി മെച്ചപ്പെടുത്തിയ പ്രചാരണത്തിൽ ക്ലിക്കുകൾക്ക് പകരം പ്രദർശനങ്ങളുടെ അടിസ്ഥാനത്തിൽ നിരക്ക് ഈടാക്കാൻ, പ്രചാരണത്തിന്റെ പകർപ്പ് സൃഷ്ടിച്ച് അതിനായി പ്രദർശനങ്ങൾ തിരഞ്ഞെടുക്കുക. മറ്റ് മാറ്റങ്ങൾക്കായി പുതിയൊരു പ്രചാരണം സൃഷ്ടിക്കുക.

3. ഒരു കൺവേർഷൻ ഇവന്റ് തിരഞ്ഞെടുക്കുക

നിരക്ക് ഈടാക്കുന്ന രീതി തിരഞ്ഞെടുത്ത ശേഷം, ഏത് കൺവേർഷൻ ഇവന്റിനായി പരസ്യവിതരണം മെച്ചപ്പെടുത്തണമെന്ന് തിരഞ്ഞെടുക്കുക. വാങ്ങൽ, രജിസ്ട്രേഷൻ, താൽപ്പര്യമുള്ള ഉപഭോക്താവിന്റെ വിവരസമർപ്പണം, അല്ലെങ്കിൽ പിന്തുണയ്ക്കുന്ന മറ്റൊരു സാധാരണ കൺവേർഷൻ ഇവന്റ് പോലുള്ള തുടർനടപടിയാണിത്. പരസ്യവിതരണം നയിക്കാൻ ChatGPT പരസ്യങ്ങൾ ഈ നടപടിയാണ് ഉപയോഗിക്കുന്നത്.

കൺവേർഷൻ വർധിപ്പിക്കൽ ലക്ഷ്യമുള്ള ഓരോ പ്രചാരണവും തിരഞ്ഞെടുത്ത ഒരു കൺവേർഷൻ ഇവന്റാണ് ഉപയോഗിക്കുന്നത്. പ്രചാരണം സൃഷ്ടിച്ച ശേഷം കൺവേർഷൻ ഇവന്റ് മാറ്റാനാവില്ല. മറ്റൊരു ഇവന്റ് ലക്ഷ്യമാക്കി പരസ്യവിതരണം മെച്ചപ്പെടുത്താൻ പുതിയൊരു പ്രചാരണം സൃഷ്ടിക്കുക.

4. പ്രചാരണത്തിന്റെ ചെലവുപരിധി, തീയതികൾ, സ്ഥലങ്ങൾ എന്നിവ സജ്ജീകരിക്കുക

മറ്റ് പ്രചാരണ ലക്ഷ്യങ്ങൾക്കായി ചെയ്യുന്നതുപോലെ, പ്രചാരണത്തിന്റെ ചെലവുപരിധി, ആരംഭ-അവസാന തീയതികൾ, ലക്ഷ്യമിടുന്ന സ്ഥലങ്ങൾ എന്നിവ സജ്ജീകരിക്കുക. പ്രകടനം വിലയിരുത്താൻ ഉപകരിക്കുന്ന വിവരങ്ങൾ ശേഖരിക്കുന്നതിന് പ്രചാരണത്തിന് മതിയായ സമയവും തുകയും നൽകുന്ന ക്രമീകരണങ്ങൾ തിരഞ്ഞെടുക്കുക.

5. പരസ്യ ഗ്രൂപ്പുകൾ സൃഷ്ടിച്ച് ലേലത്തുക നിയന്ത്രണങ്ങൾ സജ്ജീകരിക്കുക

പതിവുപോലെ പരസ്യ ഗ്രൂപ്പുകളും പരസ്യങ്ങളും സൃഷ്ടിക്കുക. നിങ്ങൾ തിരഞ്ഞെടുത്ത നിരക്ക് രീതിക്കായി പരസ്യ മാനേജറിൽ കാണിക്കുന്ന ലേലത്തുക തന്ത്രവും ലേലത്തുക നിയന്ത്രണ ഓപ്ഷനുകളും പിന്തുടരുക.

കൺവേർഷൻ വർധിപ്പിക്കൽ ലക്ഷ്യമുള്ള പ്രചാരണങ്ങളിൽ, ഒരു കൺവേർഷനായി ലേലത്തിൽ വാഗ്ദാനം ചെയ്യാൻ നിങ്ങൾ തയ്യാറുള്ള പരമാവധി തുകയാണ് ലേലത്തുകയുടെ പരിധി. നിങ്ങൾ തിരഞ്ഞെടുത്ത കൺവേർഷൻ ഇവന്റ് ലക്ഷ്യമാക്കി പരസ്യവിതരണം മെച്ചപ്പെടുത്തുമ്പോൾ, ലേലത്തുക നിശ്ചയിക്കാൻ സിസ്റ്റം പ്രവചിക്കപ്പെട്ട കൺവേർഷൻ സാധ്യത ഉപയോഗിക്കുന്നു. നിങ്ങൾ തിരഞ്ഞെടുത്ത രീതിയുടെ അടിസ്ഥാനത്തിൽത്തന്നെ നിരക്ക് ഈടാക്കും. ഓരോ കൺവേർഷനുമുള്ള യഥാർഥ ചെലവ് ലേലത്തിലൂടെയാണ് നിശ്ചയിക്കപ്പെടുന്നത്.

6. പ്രചാരണം ആരംഭിച്ച് പ്രകടനം നിരീക്ഷിക്കുക

കൺവേർഷൻ വർധിപ്പിക്കൽ ലക്ഷ്യമുള്ള പ്രചാരണങ്ങൾക്ക്, കൺവേർഷൻ റിപ്പോർട്ടുകൾക്കൊപ്പം സാധാരണ പരസ്യവിതരണ, ചെലവ് അളവുകോലുകളും പരസ്യ മാനേജർ കാണിക്കുന്നു. പരസ്യ മാനേജറിൽ ലഭ്യമായ വിവിധ റിപ്പോർട്ട് കാഴ്ചകളിലൂടെ പ്രകടനം അവലോകനം ചെയ്യാം.

ക്ലിക്കുകളുടെ അടിസ്ഥാനത്തിൽ നിരക്ക് ഈടാക്കുമ്പോൾ, ഓരോ ക്ലിക്കിനും നിങ്ങൾ നൽകുന്ന തുകയുടെ പ്രധാന ചെലവ് അളവുകോൽ ശരാശരി CPC ആണ്. നിങ്ങൾ തിരഞ്ഞെടുത്ത കൺവേർഷൻ ഇവന്റ് ലക്ഷ്യമാക്കിയാണ് പരസ്യവിതരണം മെച്ചപ്പെടുത്തുന്നത് എന്നതിനാൽ, നിരീക്ഷിക്കേണ്ട പ്രധാന ഫല അളവുകോൽ കൺവേർഷനുകളാണ്.

പ്രദർശനങ്ങളുടെ അടിസ്ഥാനത്തിൽ നിരക്ക് ഈടാക്കുമ്പോൾ, ശരാശരി CPM-ഉം പ്രദർശനങ്ങളുടെ എണ്ണവും നിരക്ക് ഈടാക്കലിന്റെയും പരസ്യവിതരണത്തിന്റെയും പ്രധാന അളവുകോലുകളാണ്. കൺവേർഷനുകൾ ലക്ഷ്യമാക്കിയാണ് പരസ്യവിതരണം മെച്ചപ്പെടുത്തുന്നത് എന്നതിനാൽ, കൺവേർഷനുകളുടെ എണ്ണവും ഓരോ കൺവേർഷനുമുള്ള ചെലവും നിരീക്ഷിക്കുക. ലഭ്യമാകുമ്പോൾ, പരസ്യത്തിൽ ക്ലിക്ക് ചെയ്തതിനും പരസ്യം കണ്ടതിനും ശേഷമുള്ള കൺവേർഷൻ റിപ്പോർട്ടുകളും നിരീക്ഷിക്കുക.

പ്രകടനം വിലയിരുത്തുമ്പോൾ, കൺവേർഷനുകളുടെ എണ്ണത്തിനൊപ്പം ചെലവ്, പ്രദർശനങ്ങൾ, ക്ലിക്കുകൾ, പ്രചാരണത്തിനായി തിരഞ്ഞെടുത്ത ഫലബന്ധന കാലയളവുകൾ എന്നിവയും പരിഗണിക്കുക. ചെലവിനെ കൺവേർഷനുകളുടെ എണ്ണം കൊണ്ട് ഹരിച്ചും ഓരോ കൺവേർഷനുമുള്ള ചെലവ് കണക്കാക്കാം.

പ്രകടനം മെച്ചപ്പെടുത്താനുള്ള നുറുങ്ങുകൾ

• നിങ്ങളുടെ പ്രചാരണ ലക്ഷ്യത്തെ ഏറ്റവും നന്നായി പ്രതിനിധീകരിക്കുന്ന കൺവേർഷൻ ഇവന്റ് തിരഞ്ഞെടുക്കുക.

• മതിയായ സൂചനകൾ നൽകുന്ന ഒരു കൺവേർഷൻ ഇവന്റ് ഉപയോഗിക്കുക. വളരെ അപൂർവമായി നടക്കുന്ന ഇവന്റുകൾ പ്രകടനം വിലയിരുത്തുന്നത് കൂടുതൽ ബുദ്ധിമുട്ടാക്കാം.

• കൺവേർഷൻ നിരീക്ഷണം ശരിയായി പ്രവർത്തിക്കുന്നുണ്ടെന്ന് ഉറപ്പാക്കുക. അപൂർണമോ തെറ്റായി സജ്ജീകരിച്ചതോ ആയ നിരീക്ഷണം റിപ്പോർട്ടുകളുടെയും പ്രകടനമെച്ചപ്പെടുത്തലിന്റെയും ഫലപ്രാപ്തി കുറയ്ക്കാം.

• പ്രദർശനങ്ങളുടെ അടിസ്ഥാനത്തിൽ നിരക്ക് ഈടാക്കുമ്പോൾ, ലഭ്യമെങ്കിൽ പരസ്യത്തിൽ ക്ലിക്ക് ചെയ്തതിനും പരസ്യം കണ്ടതിനും ശേഷമുള്ള കൺവേർഷൻ റിപ്പോർട്ടുകൾ രണ്ടും അവലോകനം ചെയ്യുക. പരസ്യം കാണുന്നതും ക്ലിക്ക് ചെയ്യുന്നതും ഫലങ്ങൾക്ക് എങ്ങനെ സംഭാവന നൽകുന്നുവെന്ന് മനസ്സിലാക്കാൻ ഇത് സഹായിക്കും.

• പ്രകടനം നിരീക്ഷിച്ച്, പ്രചാരണത്തിലെ പരസ്യവിതരണവും ഫലങ്ങളും അനുസരിച്ച് ലേലത്തുകയുടെ പരിധി, ലേലത്തുക തന്ത്രം, അല്ലെങ്കിൽ ലഭ്യമായ ലേലത്തുക നിയന്ത്രണങ്ങൾ ക്രമീകരിക്കുക. നിലവിൽ പ്രത്യേക ലേലത്തുകയൊന്നും ശുപാർശ ചെയ്യുന്നില്ല.

• ലേലത്തുകകളിലോ ചെലവുപരിധികളിലോ പരസ്യ ഉള്ളടക്കത്തിലോ വലിയ മാറ്റങ്ങൾ വരുത്തുന്നതിന് മുമ്പ്, മതിയായ വിവരങ്ങളുടെ അടിസ്ഥാനത്തിൽ പ്രകടനം അവലോകനം ചെയ്യുക.

• കൺവേർഷനുകൾ പൊരുത്തപ്പെടുത്തുന്നത് മെച്ചപ്പെടുത്താനും പ്രചാരണത്തിന്റെ പ്രകടനം മെച്ചപ്പെടുത്താൻ അധിക അളക്കൽ സൂചനകൾ നൽകാനും, നിങ്ങളുടെ വെബ്‌സൈറ്റ് പിക്സലിൽ സ്വയമേവയുള്ള വിപുലമായ പൊരുത്തപ്പെടുത്തൽ പ്രവർത്തനക്ഷമമാക്കുക.

പതിവുചോദ്യങ്ങൾ

കൺവേർഷൻ വർധിപ്പിക്കൽ ലക്ഷ്യത്തിൽ ഏതൊക്കെ തരം കൺവേർഷൻ ഇവന്റുകളാണ് പിന്തുണയ്ക്കുന്നത്?

കൺവേർഷൻ വർധിപ്പിക്കൽ ലക്ഷ്യം നിലവിൽ ഓരോ പ്രചാരണത്തിനും ഒരു സാധാരണ കൺവേർഷൻ ഇവന്റിനെ പിന്തുണയ്ക്കുന്നു. ഇഷ്ടാനുസൃത കൺവേർഷൻ ഇവന്റുകൾക്ക് നിലവിൽ പിന്തുണയില്ല.

കൺവേർഷൻ വർധിപ്പിക്കാനുള്ള പ്രചാരണം സൃഷ്ടിക്കാൻ നിലവിലുള്ള ഒരു പ്രചാരണം ഉപയോഗിക്കാമോ?

നിലവിലുള്ള പ്രചാരണത്തിൽത്തന്നെ അതിന്റെ ലക്ഷ്യം മാറ്റാനാവില്ല. കൺവേർഷനുകൾക്കായി മെച്ചപ്പെടുത്തിയ പ്രചാരണത്തിൽ ക്ലിക്കുകൾക്ക് പകരം പ്രദർശനങ്ങളുടെ അടിസ്ഥാനത്തിൽ നിരക്ക് ഈടാക്കാൻ, പ്രചാരണത്തിന്റെ പകർപ്പ് സൃഷ്ടിച്ച് അതിന്റെ നിരക്ക് രീതിയായി പ്രദർശനങ്ങൾ തിരഞ്ഞെടുക്കുക. 

കൺവേർഷൻ വർധിപ്പിക്കൽ ലക്ഷ്യം തിരഞ്ഞെടുക്കുന്നതിലൂടെ ഓരോ കൺവേർഷനും പണം നൽകണമെന്നാണോ അർഥം?

അല്ല. കൺവേർഷൻ വർധിപ്പിക്കൽ ലക്ഷ്യം നിങ്ങൾ തിരഞ്ഞെടുത്ത കൺവേർഷൻ ഇവന്റിനായി പരസ്യവിതരണം മെച്ചപ്പെടുത്തുന്നു. എന്നാൽ നിരക്ക് ഈടാക്കുന്നത് നിങ്ങൾ തിരഞ്ഞെടുക്കുന്ന രീതിയെ ആശ്രയിച്ചിരിക്കും. ക്ലിക്കുകൾ അടിസ്ഥാനമാക്കിയുള്ള നിരക്കിൽ, സാധുവായ ക്ലിക്കുകൾക്കാണ് പണം ഈടാക്കുന്നത്. പ്രദർശനങ്ങൾ അടിസ്ഥാനമാക്കിയുള്ള നിരക്കിൽ, പരസ്യം പ്രദർശിപ്പിച്ച എണ്ണത്തിനാണ് പണം ഈടാക്കുന്നത്.

കൺവേർഷനുകളാണ് എന്റെ ലക്ഷ്യമെങ്കിൽ, പ്രദർശനങ്ങൾ അടിസ്ഥാനമാക്കിയുള്ള നിരക്ക് എന്തിന് ഉപയോഗിക്കണം?

ഉപഭോക്താവിന്റെ യാത്രയിലെ ഒരു ഘട്ടം മാത്രമാണ് ഒരു ക്ലിക്കിൽ പ്രതിഫലിക്കുന്നത്. ഒരു ബ്രാൻഡിനെക്കുറിച്ച് അറിഞ്ഞ ഉടൻതന്നെ ഉപഭോക്താക്കൾ എപ്പോഴും നടപടി സ്വീകരിക്കണമെന്നില്ല. പ്രദർശനങ്ങൾ അടിസ്ഥാനമാക്കിയുള്ള നിരക്ക് ഉപയോഗിക്കുമ്പോൾ, പരസ്യം കണ്ടതും ക്ലിക്ക് ചെയ്തതും വഴി ഉണ്ടാകുന്ന യോഗ്യമായ കൺവേർഷനുകൾ ഉൾപ്പെടെ കൂടുതൽ കൺവേർഷനുകൾക്കായി പരസ്യവിതരണം മെച്ചപ്പെടുത്താനാകും. അതേസമയം, നിരക്ക് ഈടാക്കുന്നത് പരസ്യം പ്രദർശിപ്പിച്ച എണ്ണത്തിന്റെ അടിസ്ഥാനത്തിൽത്തന്നെയായിരിക്കും.

പ്രദർശനങ്ങളുടെ അടിസ്ഥാനത്തിൽ നിരക്ക് ഈടാക്കുമ്പോഴും ക്ലിക്കുകൾക്ക് പ്രാധാന്യമുണ്ടാകുമോ?

ഉണ്ട്. താൽപ്പര്യത്തിന്റെ വിലപ്പെട്ട സൂചനയായി ക്ലിക്കുകൾ തുടരും. ക്ലിക്കിന് ശേഷമുള്ള കൺവേർഷനുകൾക്കും തുടർന്നും പ്രാധാന്യമുണ്ടാകും. പ്രദർശനങ്ങൾ അടിസ്ഥാനമാക്കിയുള്ള നിരക്ക്, പരസ്യവിതരണത്തെ നയിക്കാൻ പരിഗണിക്കാവുന്ന കൺവേർഷൻ സൂചനകളുടെ പരിധി വികസിപ്പിക്കുന്നു. പരസ്യം കണ്ടതിനും ക്ലിക്ക് ചെയ്തതിനും ശേഷമുള്ള കൺവേർഷനുകളും ഇതിൽ ഉൾപ്പെടുന്നു.

പ്രദർശനങ്ങളുടെ അടിസ്ഥാനത്തിൽ നിരക്ക് ഈടാക്കുമ്പോൾ കൺവേർഷനുകൾ എങ്ങനെ കണക്കാക്കും?

ഫലബന്ധനം, പരിഗണനയ്ക്ക് യോഗ്യമായ കൺവേർഷൻ ഇവന്റിനെയും ബാധകമായ അളക്കൽ നിയമങ്ങളെയും ആശ്രയിച്ചിരിക്കും. പരസ്യത്തിൽ ക്ലിക്ക് ചെയ്തതിനും പരസ്യം കണ്ടതിനും ശേഷമുള്ള ഫലബന്ധന കാലയളവുകൾ ഇഷ്ടാനുസരണം ക്രമീകരിക്കാനുള്ള സൗകര്യം ലഭ്യമാകുമ്പോൾ, നിങ്ങളുടെ അളക്കൽ തന്ത്രത്തിന് ഏറ്റവും അനുയോജ്യമായ റിപ്പോർട്ട് ക്രമീകരണങ്ങൾ തിരഞ്ഞെടുക്കാനാകും.

എന്റെ ലേലത്തുകയുടെ പരിധി ഞാൻ നൽകുന്ന തുകയെ എങ്ങനെ ബാധിക്കുന്നു?

ക്ലിക്കുകളുടെ അടിസ്ഥാനത്തിൽ നിരക്ക് ഈടാക്കുമ്പോൾ, ക്ലിക്ക് ലേലങ്ങളിൽ പ്രചാരണം എങ്ങനെ മത്സരിക്കണമെന്ന് നിർണയിക്കാൻ ഉപയോഗിക്കുന്ന, കൺവേർഷനെ ലക്ഷ്യമിട്ടുള്ള ലേലത്തുകയാണ് ലേലത്തുകയുടെ പരിധി. അത് ഒരു കൺവേർഷന് ഈടാക്കുന്ന വിലയോ ഒരു ഉപഭോക്താവിനെ നേടാൻ ഉറപ്പുനൽകുന്ന ചെലവോ അല്ല. സാധുവായ ക്ലിക്കുകൾക്കാണ് നിരക്ക് ഈടാക്കുന്നത്. ഓരോ ക്ലിക്കിനുമുള്ള യഥാർഥ ചെലവ് ലേലത്തിലൂടെയാണ് നിശ്ചയിക്കപ്പെടുന്നത്.

അടുത്ത ഘട്ടങ്ങൾ

കൺവേർഷൻ വർധിപ്പിക്കൽ ലക്ഷ്യത്തോടെ പ്രചാരണം സൃഷ്ടിച്ച ശേഷം നിങ്ങൾക്ക് ചെയ്യാവുന്നവ:

• പരസ്യ ഗ്രൂപ്പുകളും പരസ്യങ്ങളും സൃഷ്ടിക്കുക.

• നിങ്ങളുടെ പ്രചാരണം ആരംഭിക്കുക.

• ലഭ്യമാകുമ്പോൾ, പരസ്യത്തിൽ ക്ലിക്ക് ചെയ്തതിനും പരസ്യം കണ്ടതിനും ശേഷമുള്ള ഫലങ്ങൾ അളക്കുക.