അവലോകനം

ബജറ്റ് ചെലവഴിക്കുന്ന വേഗം ക്രമീകരിക്കുന്നത് പ്രചാരണച്ചെലവ് കാലയളവിലുടനീളം വിതരണം ചെയ്യാൻ സഹായിക്കുന്നു. പരസ്യങ്ങൾ കാണുന്നവരുടെ എണ്ണവും പ്രദർശന അവസരങ്ങളും മാറുന്നതിനനുസരിച്ച് പരസ്യ മാനേജർ പ്രദർശനം ക്രമീകരിക്കുന്നു. ദിവസത്തിലോ പ്രചാരണത്തിലോ പിന്നീടുണ്ടാകുന്ന അവസരങ്ങൾക്കായി ബജറ്റ് ശേഷിക്കാൻ ഇത് സഹായിക്കുന്നു.

നിങ്ങളുടെ ചെലവ് ഓരോ ദിവസവും വ്യത്യാസപ്പെട്ടേക്കാം. ചെലവിന്റെ വേഗം ക്രമീകരിക്കുന്നത് എല്ലാ ദിവസവും ഒരേ തുക ചെലവാകുമെന്നോ പ്രചാരണത്തിന്റെ ബജറ്റ് മുഴുവനായി ചെലവാകുമെന്നോ ഉറപ്പുനൽകുന്നില്ല.

പ്രതിദിന ബജറ്റ് ചെലവഴിക്കുന്ന വേഗം ക്രമീകരിക്കൽ

പ്രതിദിന ബജറ്റുള്ള പ്രചാരണങ്ങളിൽ, ദിവസം മുഴുവൻ പരസ്യങ്ങൾ പ്രദർശിപ്പിക്കാനായി പരസ്യ മാനേജർ പ്രദർശനത്തിന്റെ വേഗം ക്രമീകരിക്കുന്നു. നിങ്ങളുടെ പരസ്യ അക്കൗണ്ടിന്റെ സമയമേഖലയിൽ ഞായർ മുതൽ ശനി വരെയുള്ള ബജറ്റ് ആഴ്ചയിലെ ശരാശരി പ്രതിദിന തുകയാണ് പ്രതിദിന ബജറ്റ്. അതിനാൽ, ബാധകമായ ചെലവുപരിധികൾക്കുള്ളിൽ ചില ദിവസങ്ങളിൽ കൂടുതൽ തുകയും മറ്റു ദിവസങ്ങളിൽ കുറവ് തുകയും ചെലവാകാം.

പ്രതിദിന ബജറ്റുകൾ, ചെലവുപരിധികൾ, ബജറ്റ് മാറ്റങ്ങൾ എന്നിവയെക്കുറിച്ചുള്ള വിശദാംശങ്ങൾക്ക് പ്രതിദിന ബജറ്റുകൾ കാണുക.

പ്രചാരണത്തിന്റെ മൊത്തം ബജറ്റ് ചെലവഴിക്കുന്ന വേഗം ക്രമീകരിക്കൽ

മൊത്തം ബജറ്റ് നിശ്ചയിച്ചിട്ടുള്ള പ്രചാരണങ്ങളിൽ, ശേഷിക്കുന്ന ബജറ്റും പ്രചാരണത്തിന്റെ സമയക്രമവും അനുസരിച്ച് പരസ്യ മാനേജർ കാലയളവിലുടനീളമുള്ള ചെലവ് ക്രമീകരിക്കുന്നു.

പ്രചാരണത്തിൽ നിശ്ചയിച്ച വേഗത്തേക്കാൾ വേഗത്തിൽ പണം ചെലവാകുന്നുണ്ടെങ്കിൽ, പിന്നീടുള്ള ആവശ്യങ്ങൾക്ക് ബജറ്റ് ശേഷിക്കാനായി പരസ്യപ്രദർശനത്തിന്റെ വേഗം കുറച്ചേക്കാം. ചെലവ് നിശ്ചയിച്ച വേഗത്തേക്കാൾ പിന്നിലാണെങ്കിൽ, പ്രതീക്ഷിച്ച ചെലവുനിലയിലേക്ക് എത്താൻ അവസരം നൽകുന്നതിനായി പരസ്യപ്രദർശനം തുടരാം. ബജറ്റ് അപ്രതീക്ഷിതമായി നേരത്തേ തീർന്നുപോകാനുള്ള സാധ്യത കുറയ്ക്കാൻ ഇത് സഹായിക്കുന്നു. എങ്കിലും, യഥാർഥ ചെലവ് ലഭ്യമായ പരസ്യപ്രദർശന അവസരങ്ങളെ ആശ്രയിച്ചിരിക്കും.

നിങ്ങൾ ഉദ്ദേശിക്കുന്ന പ്രചാരണ കാലയളവിന് അനുയോജ്യമായി ചെലവഴിക്കുന്ന വേഗം ക്രമീകരിക്കാൻ, ഒരു അവസാന തീയതി സജ്ജമാക്കാൻ ഞങ്ങൾ ശുപാർശ ചെയ്യുന്നു.

പതിവുചോദ്യങ്ങൾ

പ്രചാരണത്തിന്റെ അവസാന തീയതി വരെ എന്റെ മൊത്തം ബജറ്റ് ശേഷിക്കുമോ.

അങ്ങനെ ആവണമെന്നില്ല. പ്രചാരണത്തിൽ പരസ്യങ്ങൾ പ്രദർശിപ്പിക്കാൻ കഴിയുന്ന ഏറ്റവും ഒടുവിലത്തെ ദിവസമാണ് അവസാന തീയതി. എന്നാൽ അതിനു മുമ്പുതന്നെ ബജറ്റ് മുഴുവനായി ചെലവായേക്കാം. ചെലവിന്റെ വേഗം ക്രമീകരിക്കുന്നത് കാലയളവിലുടനീളം ചെലവ് നിയന്ത്രിക്കാൻ സഹായിക്കുന്നു. എന്നാൽ അവസാന തീയതി വരെ ബജറ്റ് ശേഷിക്കുമെന്ന് ഇത് ഉറപ്പുനൽകുന്നില്ല.

മൊത്തം ബജറ്റുള്ള പ്രചാരണത്തിൽ ചെലവിന്റെ വേഗം ക്രമീകരിക്കാൻ എത്ര ദൈർഘ്യമുള്ള കാലയളവാണ് ഉപയോഗിക്കുന്നത്.

അവസാന തീയതിയുള്ള പ്രചാരണങ്ങളിൽ, ചെലവിന്റെ വേഗം ക്രമീകരിക്കാൻ പരസ്യ മാനേജർ ആ തീയതി വരെയുള്ള സമയം ഉപയോഗിക്കുന്നു. ഈ കാലയളവ് പരമാവധി 365 കലണ്ടർ ദിവസങ്ങളാണ്. അവസാന തീയതിയില്ലാത്ത പ്രചാരണങ്ങളിൽ, മുൻകൂട്ടി നിശ്ചയിച്ച 60 ദിവസത്തെ കാലയളവാണ് ചെലവിന്റെ വേഗം ക്രമീകരിക്കാൻ ഉപയോഗിക്കുന്നത്.

നിങ്ങൾ ഉദ്ദേശിക്കുന്ന പ്രചാരണ കാലയളവിന് അനുയോജ്യമായി ചെലവഴിക്കുന്ന വേഗം ക്രമീകരിക്കാൻ, ഒരു അവസാന തീയതി സജ്ജമാക്കാൻ ഞങ്ങൾ ശുപാർശ ചെയ്യുന്നു. ചെലവ് ക്രമീകരിക്കാനുള്ള അടിസ്ഥാനമാണ് ഈ കാലയളവുകൾ. കാലയളവ് മുഴുവൻ ബജറ്റ് ശേഷിക്കുമെന്നോ ബജറ്റ് മുഴുവനായി ചെലവാകുമെന്നോ ഇവ ഉറപ്പുനൽകുന്നില്ല.

അവസാന തീയതി ഇല്ലാതെ പ്രചാരണത്തിന് മൊത്തം ബജറ്റ് ഉപയോഗിക്കാമോ.

അതെ. മൊത്തം ബജറ്റുള്ളതും അവസാന തീയതി ഇല്ലാത്തതുമായ പ്രചാരണങ്ങളിൽ, ചെലവിന്റെ വേഗം ക്രമീകരിക്കാൻ പരസ്യ മാനേജർ മുൻകൂട്ടി നിശ്ചയിച്ച ഒരു കാലയളവ് ഉപയോഗിക്കുന്നു. നിങ്ങൾ ഉദ്ദേശിക്കുന്ന പ്രചാരണ സമയക്രമം അനുസരിച്ച് ചെലവിന്റെ വേഗം ക്രമീകരിക്കണമെങ്കിൽ, ഒരു അവസാന തീയതി സജ്ജമാക്കുക.

പ്രചാരണത്തിന്റെ മൊത്തം ബജറ്റോ അവസാന തീയതിയോ മാറ്റിയാൽ എന്ത് സംഭവിക്കും.

പുതുക്കിയ ബജറ്റോ സമയക്രമമോ അനുസരിച്ച് പരസ്യ മാനേജർ ചെലവഴിക്കുന്ന വേഗം വീണ്ടും കണക്കാക്കുന്നു. പ്രചാരണത്തിന്റെ പുതുക്കിയ മൊത്തം ബജറ്റ് ഇതിനകം ചെലവഴിച്ച തുകയേക്കാൾ കുറവാകരുത്. അത് ഇതിനകം ചെലവഴിച്ച തുകയ്ക്ക് തുല്യമായി സജ്ജമാക്കിയാൽ പരസ്യപ്രദർശനം നിർത്തും.

ലേലത്തുക നിശ്ചയിക്കുന്ന രീതി മാറ്റിയാൽ എന്റെ പ്രചാരണത്തിൽ പണം കൂടുതൽ വേഗത്തിൽ ചെലവാകുമോ.

ലേലത്തുക നിശ്ചയിക്കുന്ന രീതി മാറ്റിയാലും പ്രചാരണത്തിന്റെ മൊത്തം ബജറ്റ് ചെലവഴിക്കുന്ന വേഗത്തിനുള്ള ക്രമീകരണം മറികടക്കാനാകില്ല. അപ്പോഴും കുറഞ്ഞ ലേലത്തുകകൾ പരസ്യപ്രദർശനം പരിമിതപ്പെടുത്തുകയും പ്രചാരണത്തിൽ ബജറ്റിനേക്കാൾ കുറവ് തുക ചെലവാകാൻ ഇടയാക്കുകയും ചെയ്യാം.