ഉപയോഗം തുടങ്ങുമ്പോഴും നയങ്ങളുമായി ബന്ധപ്പെട്ടും ഉണ്ടാകുന്ന സാധാരണ പ്രശ്നങ്ങൾ പരിഹരിക്കൽ

പരസ്യ മാനേജറിലെ സാധാരണ പ്രശ്നങ്ങൾ പരിഹരിക്കാൻ ഈ മാർഗദർശി ഉപയോഗിക്കുക. നിങ്ങളുടെ പ്രശ്നത്തിന് ഏറ്റവും അനുയോജ്യമായ വിഭാഗത്തിൽ നിന്ന് തുടങ്ങി നിർദേശിച്ച പരിശോധനകൾ നടത്തുക. പ്രശ്നം തുടരുകയാണെങ്കിൽ സഹായവിഭാഗവുമായി ബന്ധപ്പെടുക. അക്കൗണ്ട് സ്ഥിരീകരണം, അക്കൗണ്ടിന് അംഗീകാരം നൽകൽ, പരസ്യ അവലോകനം, പരസ്യ പ്രദർശനം എന്നിവയ്ക്കുള്ള പരിശോധനകൾ വെവ്വേറെയാണ്. ഒരെണ്ണം പൂർത്തിയായതുകൊണ്ട് മറ്റെല്ലാം പൂർത്തിയായി എന്നർത്ഥമില്ല.

1. ബിസിനസ് സ്ഥിരീകരണം

എന്റെ ബിസിനസ് സ്ഥിരീകരണം പരാജയപ്പെട്ടു

• ഇതിന്റെ അർത്ഥം: നിങ്ങളുടെ അക്കൗണ്ടിന്റെ സ്ഥിരീകരണ പരിശോധന പൂർത്തിയാക്കിയെങ്കിലും അംഗീകാരം നൽകാനായില്ല. നിങ്ങളുടെ ബിസിനസിന്റെ സ്വത്വം, ഉടമസ്ഥാവകാശം, മറ്റ് സ്ഥാപനങ്ങളുമായുള്ള ബന്ധങ്ങൾ എന്നിവയുടെ കൃത്യത ഉറപ്പാക്കാനാകാത്തപ്പോൾ സ്ഥിരീകരണം പരാജയപ്പെടാം.

• അടുത്ത നടപടി: നിങ്ങളുടെ അക്കൗണ്ട്, പരസ്യങ്ങൾ, പരസ്യത്തിലൂടെ എത്തുന്ന പേജുകൾ എന്നിവ നിങ്ങളുടെ ബിസിനസിനെയും മറ്റ് വ്യക്തികൾ, സ്ഥാപനങ്ങൾ, ബ്രാൻഡുകൾ എന്നിവയുമായുള്ള ബന്ധങ്ങളെയും കൃത്യമായി പ്രതിനിധീകരിക്കുന്നുവെന്ന് ഉറപ്പാക്കുക.

എന്റെ ബിസിനസ് സ്ഥിരീകരണം പുരോഗമിക്കുന്നു

• ഇതിന്റെ അർത്ഥം: സ്ഥിരീകരണത്തിൽ ഇതുവരെ അന്തിമ തീരുമാനമായിട്ടില്ല. തുടർനടപടികൾക്കായി കാത്തിരിക്കുന്ന പരിശോധനകളും തീർപ്പാകാത്ത നിലയിൽ ഉൾപ്പെടാം. അതിനാൽ, നിലവിൽ പരിശോധന നടന്നുകൊണ്ടിരിക്കുന്നു എന്ന് എല്ലായ്പ്പോഴും അർത്ഥമില്ല. പരസ്യ മാനേജറിൽ കാണിക്കുന്ന നിർദേശങ്ങൾ പാലിക്കുക. പേജ് ദൃശ്യമാകുമ്പോഴും നിങ്ങൾ ടാബിലേക്ക് മടങ്ങിവരുമ്പോഴും സ്ഥിരീകരണ ഫലങ്ങളിൽ മാറ്റങ്ങളുണ്ടോ എന്ന് പരസ്യ മാനേജർ പരിശോധിക്കും.

• അടുത്ത നടപടി: പരിശോധന പൂർത്തിയാകാൻ 7 പ്രവൃത്തിദിവസം വരെ എടുത്തേക്കാം. അതിലധികം സമയമെടുത്താൽ പരസ്യ സഹായവിഭാഗത്തെ ബന്ധപ്പെടുക.

എന്റെ ബിസിനസ് സ്ഥിരീകരണം ആരംഭിച്ചിട്ടില്ല

• ആദ്യം പരിശോധിക്കേണ്ടത്: ശരിയായ പരസ്യ മാനേജർ അക്കൗണ്ടിലെ സ്ഥിരീകരണ നിർദേശത്തിലേക്ക് മടങ്ങുക. പേജ് പുതുക്കുക അല്ലെങ്കിൽ ബ്രൗസറിന്റെ ഏറ്റവും പുതിയ പതിപ്പ് ഉപയോഗിച്ച് വീണ്ടും പ്രവേശിക്കുക.

• അടുത്ത നടപടി: സ്ഥിരീകരണം ഇപ്പോഴും തുറക്കുന്നില്ലെങ്കിൽ പരസ്യ സഹായവിഭാഗത്തെ ബന്ധപ്പെടുക. നിങ്ങളുടെ പരസ്യ അക്കൗണ്ട് ഐഡി, തിരഞ്ഞെടുത്ത ബട്ടൺ അല്ലെങ്കിൽ ലിങ്ക്, പിശകിന്റെ കൃത്യമായ സന്ദേശം അല്ലെങ്കിൽ സ്ക്രീൻഷോട്ട്, ശ്രമം നടത്തിയ തീയതി, സമയം, സമയമേഖല എന്നിവ ഉൾപ്പെടുത്തുക. പിശക് പ്രത്യക്ഷപ്പെടുന്നതിന് മുമ്പ് സ്ഥിരീകരണ ഫോം തുറന്നോ എന്ന് ഞങ്ങളെ അറിയിക്കുക. സഹായം തേടിയുള്ള സന്ദേശത്തിൽ തിരിച്ചറിയൽ രേഖകളോ പാസ്‌വേഡുകളോ പണമടയ്ക്കൽ വിവരങ്ങളോ അയയ്ക്കരുത്.

സ്ഥിരീകരണം കാരണം എനിക്ക് പരസ്യം സംരക്ഷിക്കാനാകുന്നില്ല

• ഇതിന്റെ അർത്ഥം: സ്ഥിരീകരണം ആവശ്യമായ സ്വയം സേവന അക്കൗണ്ടുകളിൽ, മറ്റൊരു വെബ്‌സൈറ്റ് ഡൊമെയ്‌നിലേക്ക് നയിക്കുന്ന പരസ്യം ഉപയോഗിക്കാൻ ആദ്യം അക്കൗണ്ട് സ്ഥിരീകരണത്തിന് അംഗീകാരം ലഭിക്കേണ്ടിവന്നേക്കാം. സ്ഥിരീകരണത്തിന്റെ നിലവിലെ നില അറിയാൻ പരസ്യ മാനേജറിലെ സന്ദേശം പരിശോധിക്കുക.

• അടുത്ത നടപടി: സന്ദേശത്തിൽ അഡ്‌മിന്റെ ഇടപെടൽ ആവശ്യപ്പെടുന്നുണ്ടെങ്കിൽ, സ്ഥിരീകരണം പൂർത്തിയാക്കാൻ അക്കൗണ്ട് അഡ്‌മിനോട് ആവശ്യപ്പെടുക. വീണ്ടും ശ്രമിക്കുക എന്ന് കാണിക്കുന്നുണ്ടെങ്കിൽ, ലഭ്യമായ പുനഃശ്രമം ആരംഭിക്കാൻ അത് തിരഞ്ഞെടുക്കാം. വീണ്ടും ശ്രമിക്കുന്നത് ലഭ്യമായ സ്ഥിരീകരണ ശ്രമങ്ങളിൽ ഒന്ന് ഉപയോഗിച്ചേക്കാം. സംരക്ഷിക്കുക എന്നത് മാത്രം തിരഞ്ഞെടുക്കുന്നതിലൂടെ പരാജയപ്പെട്ടതോ നിരസിക്കപ്പെട്ടതോ ആയ സ്ഥിരീകരണം വീണ്ടും നടത്തില്ല. സഹായവിഭാഗത്തെ ബന്ധപ്പെടുക എന്ന് കാണിക്കുന്നുണ്ടെങ്കിൽ, ആ ഓപ്ഷൻ ഉപയോഗിക്കുക. അല്ലാത്തപക്ഷം, കാണിച്ചിരിക്കുന്ന സ്ഥിരീകരണ നിർദേശങ്ങൾ പാലിക്കുക.

ബിസിനസ് സ്ഥിരീകരണം പൂർത്തിയാകുന്നതിന് മുമ്പ് എന്റെ പരസ്യങ്ങൾ പ്രദർശിപ്പിക്കപ്പെടുകയും നിരക്കുകൾ ഈടാക്കപ്പെടുകയും ചെയ്യുമോ?

ചില അക്കൗണ്ടുകൾക്ക് അധിക ബിസിനസ് സ്ഥിരീകരണം ആവശ്യമായി വരുന്നതിന് മുമ്പുതന്നെ പരസ്യങ്ങൾ പ്രദർശിപ്പിക്കാൻ തുടങ്ങാം. ഇതിനായി പരസ്യങ്ങൾക്ക് അംഗീകാരം ലഭിച്ചിരിക്കണം. കൂടാതെ, ബില്ലിങ്, അക്കൗണ്ടിന്റെ സജ്ജാവസ്ഥ, ക്യാമ്പെയ്ൻ നില, ബജറ്റ്, സമയക്രമം എന്നിവ പരസ്യപ്രദർശനം അനുവദിക്കുന്നതായിരിക്കണം. ഈ കാലയളവിൽ പരസ്യച്ചെലവ് ഉണ്ടാകാം.

ഒരു അക്കൗണ്ടിലെ ചെലവ് നിശ്ചിത പരിധിയിലെത്തിയാൽ അധിക ബിസിനസ് സ്ഥിരീകരണം ആവശ്യമായി വന്നേക്കാം. സ്ഥിരീകരണം ആവശ്യമായി വരുന്ന ചെലവുപരിധികൾ അക്കൗണ്ടുകൾക്കനുസരിച്ച് വ്യത്യാസപ്പെടാം; അവയിൽ മാറ്റവും വരാം. സ്ഥിരീകരണം ആവശ്യമായി വരുന്ന ചെലവുപരിധി നിങ്ങളുടെ ക്യാമ്പെയ്ൻ ബജറ്റിൽനിന്നും, നിങ്ങൾ തിരഞ്ഞെടുത്ത പേയ്‌മെന്റ് മാർഗത്തിലൂടെ എപ്പോൾ തുക ഈടാക്കണമെന്ന് നിർണയിക്കുന്ന പേയ്‌മെന്റ് പരിധിയിൽനിന്നും വ്യത്യസ്തമാണ്. ഇത് സൗജന്യ പരസ്യ ക്രെഡിറ്റ് അല്ല.

സ്ഥിരീകരണത്തിലെ ഒരു ഘട്ടം പൂർത്തിയായിട്ടില്ല എന്നതുകൊണ്ട് ക്യാമ്പെയ്ൻ താൽക്കാലികമായി നിർത്തിയ നിലയിൽ തുടരുമെന്നോ ചെലവ് ഉണ്ടാകില്ലെന്നോ കരുതരുത്. പരസ്യം നൽകാൻ നിങ്ങൾ തയ്യാറല്ലെങ്കിൽ, നിങ്ങളുടെ ക്യാമ്പെയ്‌നുകൾ താൽക്കാലികമായി നിർത്തി അവയുടെ നില പരസ്യ മാനേജറിൽ സ്ഥിരീകരിക്കുക. ചെലവ് നിയന്ത്രിക്കാൻ നിങ്ങളുടെ ക്യാമ്പെയ്ൻ ബജറ്റുകളും സമയക്രമങ്ങളും പരിശോധിക്കുക. സ്ഥിരീകരണം പൂർത്തിയാക്കാൻ പരസ്യ മാനേജർ ആവശ്യപ്പെടുകയാണെങ്കിൽ, അതിൽ കാണിക്കുന്ന നിർദ്ദേശങ്ങൾ പാലിക്കുക. ആവശ്യമായ സ്ഥിരീകരണത്തിന് അംഗീകാരം ലഭിക്കുന്നതുവരെ പരസ്യപ്രദർശനം പരിമിതപ്പെടുത്തിയേക്കാം.

2. വ്യവസായ മേഖലയ്ക്കുള്ള യോഗ്യത

എന്റെ ബിസിനസിനോ വ്യവസായ മേഖലയ്ക്കോ പരസ്യം നൽകാൻ യോഗ്യതയില്ല

• ഇതിന്റെ അർത്ഥം: നിലവിലെ പരസ്യ നയങ്ങൾ പ്രകാരം നിങ്ങളുടെ വ്യവസായ മേഖലയ്ക്കോ സേവനങ്ങൾക്കോ OpenAI വഴി പരസ്യം നൽകാൻ അനുമതിയില്ല. അനുവദനീയമായ വ്യവസായ, സേവന വിഭാഗങ്ങൾ അറിയാൻ താഴെയുള്ള യോഗ്യതാ പട്ടിക കാണുക. രജിസ്ട്രേഷനോ ലൈസൻസോ ഉള്ളതുകൊണ്ട് മാത്രം ഒരു ബിസിനസിന് എല്ലാ പരസ്യ വിഭാഗങ്ങളിലും വിപണികളിലും യോഗ്യത ലഭിക്കില്ല.

• അടുത്ത നടപടി: പരസ്യദാതാവിന്റെ അക്കൗണ്ട് സംബന്ധിച്ച തീരുമാനം തെറ്റാണെന്ന് കരുതുന്നെങ്കിൽ, തീരുമാനം അറിയിച്ച ഇമെയിലിലെ അപ്പീൽ ലിങ്ക് ഉപയോഗിക്കുക. ഒരു പ്രത്യേക പരസ്യത്തെക്കുറിച്ചുള്ള തീരുമാനമാണെങ്കിൽ, പരസ്യ മാനേജറിൽ അപ്പീൽ ഓപ്ഷനോ അവലോകനം അഭ്യർത്ഥിക്കുക എന്ന ഓപ്ഷനോ ലഭ്യമാണെങ്കിൽ അത് ഉപയോഗിക്കുക. ബാധകമായ അപ്പീൽ ഓപ്ഷൻ കണ്ടെത്താനോ തുറക്കാനോ കഴിയുന്നില്ലെങ്കിൽ പരസ്യ സഹായവിഭാഗവുമായി ബന്ധപ്പെടുക.

3. പരസ്യങ്ങൾ നിരസിക്കപ്പെടുന്നത് (നയപ്രകാരമുള്ള യോഗ്യതാ പട്ടിക)

എന്റെ പരസ്യം നിരസിക്കപ്പെട്ടു

• ആദ്യം പരിശോധിക്കേണ്ടത്: പരസ്യ മാനേജറിലെ നിരസിക്കൽ സന്ദേശം വായിച്ച് പ്രശ്നമുള്ള വാചകമോ ചിത്രമോ ലാൻഡിംഗ് പേജോ ഏതെന്ന് കണ്ടെത്തുക. പരസ്യം മുഴുവനായും അത് നയിക്കുന്ന പേജും പരസ്യ നയങ്ങൾ പാലിക്കുന്നുണ്ടെന്നും ഒരേ ഉൽപ്പന്നത്തെയോ സേവനത്തെയോ ആണ് വിവരിക്കുന്നതെന്നും പരിശോധിക്കുക.

• അടുത്ത നടപടി: ചൂണ്ടിക്കാട്ടിയ നയപരമായ കാരണം നിങ്ങളുടെ പരസ്യത്തിന് ബാധകമല്ലെന്ന് കരുതുന്നെങ്കിൽ, പരസ്യ മാനേജറിലെ അപ്പീൽ ഓപ്ഷനോ അവലോകനം അഭ്യർത്ഥിക്കുക എന്ന ബട്ടണോ ഉപയോഗിക്കാം. പരിഹാരത്തിനുള്ള ഏറ്റവും വേഗത്തിലുള്ള മാർഗം അപ്പീലാണ്. അതിനാൽ അപ്പീൽ ഓപ്ഷൻ ലഭ്യമല്ലെങ്കിലോ അപ്പീലിൽ തീരുമാനമാകാതെ 7 ദിവസത്തിലധികം കഴിഞ്ഞെങ്കിലോ മാത്രം പരസ്യ സഹായവിഭാഗവുമായി ബന്ധപ്പെടുക.

ഞാൻ തിരഞ്ഞെടുത്ത രാജ്യങ്ങളിൽ എന്റെ പരസ്യങ്ങൾ പ്രദർശിപ്പിക്കാനാകുന്നില്ല

• ഇതിന്റെ അർത്ഥം: പരസ്യപ്രചാരണം ലക്ഷ്യമിടുന്ന രാജ്യങ്ങളും നയപ്രകാരം അനുവദനീയമായ വിഭാഗങ്ങളും താരതമ്യം ചെയ്യുക. നയത്തിൽ ഉൾപ്പെടുന്ന വിഭാഗങ്ങൾ ചില ഭൂപ്രദേശങ്ങളിൽ അനുവദനീയമല്ലാത്തപ്പോഴാണ് ഈ പിശക് സന്ദേശം കാണുന്നത്. ചില വിഭാഗങ്ങളിൽ അംഗീകാരം ലഭിച്ച തിരഞ്ഞെടുത്ത പരസ്യദാതാക്കൾക്ക് മാത്രമേ അനുമതിയുള്ളൂ. നിലവിൽ കുറച്ച് പരസ്യദാതാക്കളുമായി മാത്രമാണ് ഞങ്ങൾ പ്രവർത്തിക്കുന്നത്. നയത്തിൽ ഉൾപ്പെടുന്ന ചില വിഭാഗങ്ങളിൽ അംഗീകാരത്തിനുള്ള അപേക്ഷകൾ ഇപ്പോൾ സ്വീകരിക്കുന്നില്ല. താഴെയുള്ള പരസ്യ നയപ്രകാരമുള്ള യോഗ്യതാ പട്ടിക കാണുക.

  അവലോകനത്തിൽ അംഗീകാരം ലഭിച്ചാലും തിരഞ്ഞെടുത്ത രാജ്യങ്ങളിൽ പരസ്യം പ്രദർശിപ്പിക്കാൻ യോഗ്യതയുണ്ടാകണമെന്നില്ല. നയത്തിൽ ഉൾപ്പെടുന്ന വിഭാഗവും രാജ്യങ്ങളിലെ നിയന്ത്രണങ്ങളും പരിശോധിക്കുക. നിങ്ങളുടെ പരസ്യം തെറ്റായ വിഭാഗത്തിലാണ് ഉൾപ്പെടുത്തിയതെന്ന് കരുതുന്നെങ്കിൽ, ലഭ്യമായ അപ്പീൽ ഓപ്ഷനോ അവലോകനം അഭ്യർത്ഥിക്കുക എന്ന ഓപ്ഷനോ ഉപയോഗിക്കുക.

• അടുത്ത നടപടി: പരസ്യത്തിൽ ഏർപ്പെടുത്തിയ നയപരമായ നിയന്ത്രണം തെറ്റാണെന്ന് തോന്നുന്നെങ്കിൽ, പരസ്യ മാനേജറിലോ നിരസിക്കൽ അറിയിപ്പിലോ അപ്പീൽ ഓപ്ഷൻ ലഭ്യമാണെങ്കിൽ അത് ഉപയോഗിക്കുക. പരിഹാരത്തിനുള്ള ഏറ്റവും വേഗത്തിലുള്ള മാർഗം അപ്പീലാണ്. അതിനാൽ അപ്പീൽ ഓപ്ഷൻ ലഭ്യമല്ലെങ്കിലോ അപ്പീലിൽ തീരുമാനമാകാതെ 7 ദിവസത്തിലധികം കഴിഞ്ഞെങ്കിലോ മാത്രം പരസ്യ സഹായവിഭാഗവുമായി ബന്ധപ്പെടുക.

4. ഡൊമെയ്ൻ അംഗീകാരം

ഈ അക്കൗണ്ടിനായി എന്റെ ഡൊമെയ്നിന് അംഗീകാരം ലഭിച്ചിട്ടില്ല

• ഇതിന്റെ അർത്ഥം: പരസ്യദാതാവ് എന്ന നിലയിലുള്ള നിങ്ങളുടെ തിരിച്ചറിയൽ വിവരങ്ങൾ നൽകിയ ഡൊമെയ്നുമായി പൊരുത്തപ്പെടുന്നുവെന്ന് ഞങ്ങൾക്ക് സ്ഥിരീകരിക്കാനായില്ല.

• അടുത്ത നടപടി: പരസ്യദാതാവ് എന്ന നിലയിലുള്ള നിങ്ങളുടെ തിരിച്ചറിയൽ വിവരങ്ങൾ നൽകിയ ഡൊമെയ്ൻ വിവരങ്ങളുമായി പൊരുത്തപ്പെടുന്നുവെന്ന് ഉറപ്പാക്കുക. നിരസിച്ചതിന്റെ കാരണവും തുടർനടപടികളും വിശദീകരിക്കുന്ന ഒരു ഇമെയിൽ നിങ്ങൾക്ക് ലഭിച്ചിട്ടുണ്ടാകണം. തീരുമാനം തെറ്റാണെന്ന് കരുതുന്നെങ്കിൽ, ആ ഇമെയിലിലെ ലിങ്ക് ഉപയോഗിച്ച് അപ്പീൽ നൽകുക. പരിഹാരത്തിനുള്ള ഏറ്റവും വേഗത്തിലുള്ള മാർഗം അപ്പീലാണ്. അപ്പീൽ നൽകുന്നതിൽ പ്രശ്നങ്ങളുണ്ടെങ്കിലോ അപ്പീൽ ഓപ്ഷൻ കാണുന്നില്ലെങ്കിലോ പരസ്യ സഹായവിഭാഗവുമായി ബന്ധപ്പെടുക.

ads-support@openai.com എന്ന വിലാസത്തിൽ പരസ്യ സഹായവിഭാഗവുമായി ബന്ധപ്പെടാം. ബന്ധപ്പെടുമ്പോൾ നിങ്ങളുടെ പരസ്യ അക്കൗണ്ട് ഐഡിയും നേരിടുന്ന പ്രശ്നം ഏത് വിഭാഗത്തിൽപ്പെടുന്നു എന്ന വിവരവും ഉൾപ്പെടുത്തുക.

കർശന നിയന്ത്രണങ്ങളുള്ള മേഖലകൾക്കായുള്ള പരസ്യ നയപ്രകാരമുള്ള യോഗ്യതാ പട്ടിക

ആരോഗ്യം

സാമ്പത്തിക സേവനങ്ങൾ

നിയമ സേവനങ്ങൾ