आढावा

तुमच्या प्रश्नातून खरेदी करण्याचा हेतू दिसत असल्यास (उदाहरणार्थ, “माझ्या कुत्र्यासाठी वेशभूषा शोधायला मदत करा”), ChatGPT उत्पादनांचे पर्याय, त्यांची चित्रे व तपशील दाखवू शकते. तसेच, अधिक माहिती मिळवण्यासाठी किंवा खरेदी करण्यासाठी संकेतस्थळांचे दुवेही देऊ शकते.

दाखवली जाणारी उत्पादने ChatGPT स्वतंत्रपणे निवडते. या जाहिराती नसतात आणि OpenAI च्या कोणत्याही भागीदारीचा या निवडीवर प्रभाव नसतो. जाहिराती या दाखवलेल्या उत्पादनांच्या पर्यायांपासून वेगळ्या असतात. तुम्ही ChatGPT मधील जाहिरातींविषयी अधिक जाणून घेऊ शकता.

उत्पादनांची तुलना करून तुमच्यासाठी योग्य पर्याय निवडा

तुम्ही ChatGPT ला उत्पादनांची तुलना करायला, फायदे-तोटे समजावून सांगायला किंवा पर्याय सुचवायला सांगू शकता. तुमची खर्चाची मर्यादा, आवडीनिवडी आणि काही विशिष्ट गरजा असल्यास त्या सांगा. दाखवलेले पर्याय तुमच्या गरजांनुसार नसल्यास, ChatGPT ला ते बदलायला सांगा.

कपडे आणि पेहरावाला पूरक वस्तू आभासी पद्धतीने घालून पाहा

कपडे आणि पेहरावाला पूरक वस्तूंच्या उत्पादन सूचींवर “घालून पाहा” हे बटण दिसते. ती वस्तू तुमच्यावर कशी दिसू शकेल हे पाहण्यासाठी ते वापरा. तुम्ही ती वस्तू घातलेली आभासी प्रतिमा ChatGPT इमेजेस वापरून तयार केली जाते.

एखादी वस्तू घालून पाहण्यासाठी:

1. कपडे किंवा पेहरावाला पूरक वस्तूंच्या उत्पादन सूचीवरील “घालून पाहा” बटण निवडा.

2. सेल्फी काढा किंवा अपलोड करा.

3. तुम्ही ती वस्तू घातलेली तयार झालेली प्रतिमा पाहा.

तुम्ही संभाषणात कपडे किंवा पेहरावाला पूरक वस्तूंचे छायाचित्र अपलोड करून, ती वस्तू तुमच्यावर कशी दिसू शकेल हे दाखवायला ChatGPT ला सांगू शकता.

या प्रतिमांमध्ये उत्पादन किंवा तुमचे रूप अगदी अचूक दिसेलच असे नाही. तसेच, त्यावरून वस्तू व्यवस्थित बसेल किंवा तिचे माप योग्य असेल याची हमी मिळत नाही. खरेदी करण्यापूर्वी विक्रेत्याने दिलेली मापे, उत्पादनाचे तपशील आणि वस्तू परत करण्याचे धोरण तपासा.

संदर्भ फोटो जतन करा आणि त्यांचे व्यवस्थापन करा

पुढील वेळी वस्तू आभासी पद्धतीने घालून पाहण्यासाठी तुमचे संदर्भ फोटो जतन केले जातात. त्यामुळे प्रत्येक वेळी ते अपलोड न करता तुम्ही पुन्हा वापरू शकता. तुम्ही सेटिंग्जमध्ये तुमचे फोटो बदलू किंवा काढून टाकू शकता.

तुमच्या संदर्भ फोटोंचे व्यवस्थापन करण्यासाठी:

1. सेटिंग्ज उघडा.

2. वैयक्तिकीकरण निवडा.

3. संदर्भ फोटो निवडा.

4. तुम्हाला ज्या फोटोचे व्यवस्थापन करायचे आहे तो निवडा.

5. त्याऐवजी दुसरा फोटो ठेवण्यासाठी फोटो बदला निवडा किंवा तो काढून टाकण्यासाठी हटवण्याचे चिन्ह निवडा.

संग्रहात उत्पादने जतन करा

कोणतेही उत्पादन आवडत्यांमध्ये जतन करा किंवा तुम्हाला सापडलेली उत्पादने ChatGPT संग्रहात व्यवस्थित ठेवण्यासाठी फोल्डर तयार करा. 

• उत्पादन जतन करण्यासाठी त्याचे बुकमार्क चिन्ह निवडा. ते तुमच्या आवडत्यांमध्ये जतन होईल.

• जतन करताना तुमच्या जतन केलेल्या वस्तूंसाठी नवीन फोल्डर तयार करण्याचा पर्यायही तुम्ही निवडू शकता. 

• जतन केलेले उत्पादन काढून टाकण्यासाठी त्याचे भरलेले बुकमार्क चिन्ह (आवडत्यांमधून काढून टाका) निवडा. 

तुमची जतन केलेली उत्पादने आणि फोल्डर पाहण्यासाठी ChatGPT संग्रहात परत जा.

उपलब्धता

मोबाइल आणि वेबवरील ChatGPT मध्ये उपलब्ध. 

उत्पादनांचे निकाल कसे निवडले जातात

एखादे उत्पादन तुमच्या उद्देशाशी सुसंगत आहे असे ChatGPT ला वाटल्यास, ते सरकवून पाहता येणाऱ्या उत्पादनांच्या पट्टीत दिसते. यासाठी ते तुमचा प्रश्न आणि संदर्भ (उदा. मेमरी किंवा सानुकूल सूचना) विचारात घेते.


अधिक माहितीसाठी, पाहा: मेमरी आणि सानुकूल सूचना.

उदाहरणार्थ, तुम्ही कुत्र्यांसाठी मजेशीर पोशाख विचारल्यास, ChatGPT उपलब्ध पर्याय, किंमत, परीक्षणे, वापरण्याची सुलभता, तसेच तुम्ही दिलेले इतर संदर्भ विचारात घेऊ शकते. तुम्हाला विदूषक आवडत नाहीत असे तुम्ही सांगितले असल्यास, ते विदूषकांचे पोशाख वगळू शकते.

मॉडेल वापरकर्त्याचा उद्देश समजून घेण्याचा प्रयत्न करत असल्याने, कधीकधी त्याच्याकडून चुका होऊ शकतात. उदाहरणार्थ, कदाचित विदूषकांच्या पोशाखांचाही विचार करायला तुम्ही तयार असाल. काहीतरी विसंगत वाटल्यास, तुमची पसंती स्पष्ट करून त्यानुसार बदल करण्यास तुम्ही ChatGPT ला सांगू शकता.

कोणती उत्पादने दाखवायची हे ठरवताना ChatGPT पुढील बाबी विचारात घेते:

• प्रथम-पक्ष आणि तृतीय-पक्ष प्रदात्यांकडून मिळालेला संरचित मेटाडेटा (उदा. किंमत, उत्पादनाचे वर्णन) आणि इतर तृतीय-पक्ष आशय. तपशीलांसाठी, पाहा: ChatGPT सर्च.

• कोणतेही नवीन शोध निकाल विचारात घेण्यापूर्वी ChatGPT ने तयार केलेली मॉडेलची उत्तरे. तपशीलांसाठी, पाहा: ChatGPT आणि आमची पायाभूत मॉडेल कशी विकसित केली जातात.

• OpenAI ची सुरक्षा मानके आणि उत्पादन धोरणे. तपशीलांसाठी, पाहा: OpenAI सुरक्षा.

तुमच्या गरजांनुसार, यांपैकी काही घटक इतरांपेक्षा अधिक महत्त्वाचे ठरतील. उदाहरणार्थ, तुम्ही $30 ची खर्चमर्यादा सांगितल्यास, ChatGPT किंमतीवर अधिक भर देईल. मात्र, किंमतीचा उल्लेख नसल्यास ते इतर बाबींवर भर देऊ शकते.

उपलब्ध असलेली सर्वच उत्पादने दाखवली जातील असे नाही, हे लक्षात ठेवा (कुत्र्यांसाठी बाजारात खूप पोशाख उपलब्ध आहेत). खरेदी करण्यापूर्वी उत्पादने तुमच्या विशिष्ट गरजा पूर्ण करतात का ते तपासून पाहण्याची आम्ही शिफारस करतो.

उत्पादनांची वर्णने, लेबले, परीक्षणे आणि गुणांकने

विक्रेते एकाच उत्पादनासाठी अनेकदा वेगवेगळी शीर्षके आणि वर्णने वापरतात. त्यामुळे निकाल वाचायला सोपे जावेत म्हणून, तृतीय-पक्ष प्रदात्यांकडून मिळालेल्या माहितीच्या आधारे ChatGPT उत्पादनांची शीर्षके आणि वर्णने सोप्या भाषेत तयार करू शकते.

काही उत्पादनांच्या चित्रांवर “खिशाला परवडणारे” किंवा “सर्वाधिक लोकप्रिय” अशी वैशिष्ट्ये दर्शवणारी लेबले असू शकतात. मॉडेलला उपलब्ध असलेल्या माहितीच्या आधारे ChatGPT ही लेबले तयार करते. या माहितीत तृतीय-पक्ष माहितीचाही समावेश असू शकतो. ही लेबले म्हणजे हमी किंवा पडताळलेली विधाने नाहीत. तसेच, बाजारातील सर्व उपलब्ध माहिती त्यांत प्रतिबिंबित होईलच असे नाही. उदाहरणार्थ, “खिशाला परवडणारे” या लेबलाचा अर्थ असा असू शकतो की परीक्षण लिहिणारे लोक त्या उत्पादनाला वारंवार पैशाच्या मोबदल्यात चांगले मूल्य देणारे म्हणतात. मात्र, ते उपलब्ध असलेल्या सर्वात कमी किंमतीचेच आहे असा त्याचा अर्थ नाही.

ChatGPT उत्पादनांच्या परीक्षणांचे सारांशही दाखवू शकते. मॉडेलने तयार केलेले हे सारांश सार्वजनिक संकेतस्थळांवरील परीक्षणांवर आधारित असतात. उत्पादनाबद्दल वापरकर्त्यांना साधारणपणे काय आवडते आणि काय आवडत नाही हे ठळकपणे मांडणे हा त्यांचा उद्देश असतो. OpenAI परीक्षणे आणि गुणांकने यांची पडताळणी करत नाही.

किंमती

ChatGPT ने दाखवलेल्या उत्पादन सूचींमध्ये किंमती असू शकतात. या किंमती आम्हाला तृतीय-पक्ष पुरवठादारांकडून मिळतात. ते उत्पादन निवडल्यानंतर, तेच उत्पादन त्याच किंवा वेगळ्या किंमतींना विकणाऱ्या इतर विक्रेत्यांचे आणखी पर्याय तुम्हाला दिसू शकतात.

ChatGPT च्या सुरुवातीच्या प्रतिसादातील किंमती सहसा यादीतील पहिल्या विक्रेत्याच्या असतात. त्या उपलब्ध असलेल्या सर्वात कमी किंमती असतीलच असे नाही. उत्पादनाच्या तपशीलांच्या पृष्ठावर आणि विक्रेत्यांच्या क्रमवारीत, माहीत असलेला सर्वात कमी किंमतीचा पर्याय ठळकपणे दाखवण्याचा ChatGPT प्रयत्न करते. एकापेक्षा जास्त विक्रेते ते उत्पादन विकत असल्यास, त्या पर्यायावर “सर्वोत्तम किंमत” असे लेबल असू शकते.

विक्रेत्यांनी किंमती किंवा माल पाठवण्याच्या अटी बदलल्यावर, तुम्हाला दिसणाऱ्या माहितीत हे बदल दिसण्यासाठी थोडा वेळ लागू शकतो. ही माहिती अधिक वेगाने अद्ययावत करण्याच्या पद्धतींवर आम्ही सक्रियपणे काम करत आहोत. तुम्हाला एखादी चूक आढळल्यास, कृपया अभिप्राय पाठवून आम्हाला कळवा (सूचना खाली दिल्या आहेत).

खरेदी करण्यापूर्वी तपशील तपासा

खरेदी करण्यापूर्वी, विक्रेत्याकडून या तपशिलांची खात्री करून घ्या:

• कर, शुल्क आणि माल पाठवण्याचा खर्च यांसह अंतिम किंमत.

• उपलब्धता आणि माप किंवा रंगांचे पर्याय.

• वस्तू परत करण्याची आणि हमीची धोरणे.

विक्रेते कसे निवडले जातात

तुम्ही एखादे उत्पादन निवडल्यावर, ChatGPT ते विकणाऱ्या विक्रेत्यांची यादी दाखवू शकते. तृतीय-पक्ष पुरवठादारांकडून किंवा थेट विक्रेत्यांकडून मिळालेल्या विक्रेते आणि उत्पादने यांविषयीच्या मेटाडेटाच्या आधारे ChatGPT ही यादी तयार करते. उपलब्धता, किंमत, गुणवत्ता आणि विक्रेता त्या वस्तूचा निर्माता किंवा प्रमुख विक्रेता आहे का, अशा घटकांवरून विक्रेत्यांची क्रमवारी ठरवली जाते. खरेदीचा अनुभव सुधारत असताना या पद्धतीतही बदल होत राहतील अशी आमची अपेक्षा आहे. उदाहरणार्थ, विक्रेत्यांची क्रमवारी वापरकर्त्यांच्या आवडीनिवडींनुसार अधिक वैयक्तिक करता येईल.

Shopify वरील विक्रेत्यांच्या उत्पादनांची माहिती Shopify Catalog द्वारे ChatGPT मध्ये आधीपासूनच समाविष्ट आहे. त्यामुळे वापरकर्त्यांच्या संबंधित संभाषणांमध्ये उत्पादने अधिक अचूकपणे आणि संपूर्ण माहितीसह दिसण्यास मदत होते. यासाठी प्रत्येक विक्रेत्याला स्वतंत्रपणे कोणतेही अतिरिक्त काम करावे लागत नाही.

ChatGPT मध्ये आपल्या उत्पादनांची सर्वात अद्ययावत माहिती नेहमी दिसावी यासाठी OpenAI ला थेट उत्पादन माहितीप्रवाह देऊ इच्छिणारे विक्रेते आमच्या विकसक संकेतस्थळावरील उत्पादन माहितीप्रवाहाविषयीचे दस्तऐवज वाचू शकतात आणि थेट माहितीप्रवाह पाठवण्याची सुविधा मिळवण्यासाठी अर्ज करू शकतात.

अभिप्राय द्या

उत्पादनांचे निकाल सुधारण्यासाठी आम्ही सातत्याने काम करत आहोत आणि तुमच्या अभिप्रायाचे स्वागत करतो. उत्पादनाच्या नोंदीतील वर किंवा खाली वळलेल्या अंगठ्याचे चिन्ह निवडून तुम्ही तुमचे मत नोंदवू शकता. चुकीची माहिती असलेल्या किंवा आमच्या धोरणांचे उल्लंघन करणाऱ्या उत्पादनांची तक्रार त्यांच्या नोंदीतील मेनू वापरून करू शकता किंवा आशयाबद्दल तक्रार करण्याचा फॉर्म भरू शकता.