आढावा

आयपी अनुमतीसूची हे एक ऐच्छिक सुरक्षा वैशिष्ट्य आहे. याच्या मदतीने तुम्ही तुमच्या OpenAI एपीआयचा वापर ठरावीक आयपी पत्त्यांपुरता मर्यादित करू शकता.

हे वैशिष्ट्य सक्षम केल्यावर, केवळ निश्चित केलेल्या आयपी पत्त्यांवरून किंवा आयपी श्रेणींमधून येणाऱ्या विनंत्यांना परवानगी दिली जाते. इतर सर्व आयपी पत्त्यांवरून येणाऱ्या विनंत्यांमध्ये वैध एपीआय प्रवेशकळ असली तरी त्या नाकारल्या जातात.

केवळ विश्वासार्ह संजाळ वातावरणांतून प्रवेश देऊन एपीआयच्या अनधिकृत वापराचा धोका कमी करण्यास मदत करणे, हा या वैशिष्ट्याचा उद्देश आहे.

टीप: आयपी अनुमतीसूची केवळ एपीआय विनंत्यांना लागू होते. याचा platform.openai.com वरील प्रवेशावर किंवा वापरकर्त्यांच्या खातेप्रवेशावर परिणाम होत नाही.

आयपी अनुमतीसूची का वापरावी

आयपी अनुमतीसूची तुम्हाला पुढील गोष्टींसाठी मदत करू शकते:

• एपीआयचा वापर ज्ञात पायाभूत प्रणालींपुरता मर्यादित ठेवणे (उदाहरणार्थ, तुमचे सर्व्हर किंवा क्लाउड वातावरणे)

• एपीआय प्रवेशकळ उघड झाल्यास गैरवापराचा धोका कमी करणे

• एपीआय विनंत्या कोणत्या स्रोतांकडून येतात यावर अधिक नियंत्रण ठेवणे

प्रत्यक्ष वापरातील ज्या संगणकीय वातावरणांत एपीआय विनंत्या स्थिर किंवा स्पष्टपणे निश्चित केलेल्या संजाळ श्रेणींमधून येतात, तेथे आयपी अनुमतीसूची सर्वाधिक वापरली जाते.

हे कसे कार्य करते

तुम्ही परवानगी असलेल्या आयपी पत्त्यांची किंवा सीआयडीआर श्रेणींची सूची तयार करता.

• परवानगी असलेल्या आयपी पत्त्यांवरून येणाऱ्या विनंत्या स्वीकारल्या जातात.

• अनुमतीसूचीत नसलेल्या आयपी पत्त्यांवरून येणाऱ्या विनंत्या नाकारल्या जातात.

आयपी अनुमतीसूची पुढील स्तरांवर लागू करता येते:

• संस्था स्तरावर, किंवा

• प्रकल्प स्तरावर

उपलब्धता

आयपी अनुमतीसूची सर्व एपीआय ग्राहकांसाठी उपलब्ध आहे.

आयपी अनुमतीसूचीची मांडणी करण्यासाठी खालील पायऱ्यांचे अनुसरण करा.

आयपी अनुमतीसूचीची मांडणी करा

टीप: तुम्ही जास्तीत जास्त 50 आयपी पत्ते किंवा सीआयडीआर श्रेणी जोडू शकता.

1. सेटिंग्ज उघडा.

2. सुरक्षा निवडा.

3. आयपी अनुमतीसूची निवडा.

4. एक किंवा अधिक आयपी पत्ते किंवा सीआयडीआर श्रेणी जोडा.

5. (ऐच्छिक) एखादा आयपी पत्ता तुमच्या अनुमतीसूचीत आहे का हे पडताळण्यासाठी तपासा हे साधन वापरा.

6. यासाठी अनुमतीसूची सक्षम करा:

   • विशिष्ट प्रकल्प, किंवा

   • तुमची संपूर्ण संस्था.

7. ज्या संगणकीय वातावरणांतून विनंत्या येणे अपेक्षित आहे, तेथून विनंत्या पाठवून चाचणी करा.

संपूर्ण संस्थेसाठी अंमलबजावणी सुरू करण्यापूर्वी एकाच प्रकल्पापासून सुरुवात करण्याची आम्ही शिफारस करतो.

केलेले बदल लागू होण्यासाठी 15 मिनिटांपर्यंत वेळ लागू शकतो.


टीप: आयपी अनुमतीसूचीची सेटिंग्ज बदलण्यासाठी तुमच्याकडे संस्थेतील योग्य परवानग्या असणे आवश्यक आहे.

समस्यानिवारण

विनंत्या अनपेक्षितपणे अयशस्वी होत असल्यास:

• विनंती परवानगी असलेल्या आयपी पत्त्यावरून येत असल्याची खात्री करा.

• तुमच्या पायाभूत प्रणालींचे आयपी पत्ते बदलले आहेत का ते तपासा.

• तुम्ही निश्चित केलेल्या आयपी श्रेणी अचूक आहेत का ते तपासा.

• मांडणीतील बदल सर्वत्र लागू होण्यासाठी 15 मिनिटांपर्यंत वेळ द्या.

• एखाद्या आयपी पत्त्याला परवानगी आहे का हे पडताळण्यासाठी तपासा हे साधन वापरा.

विनंती रोखली जाते तेव्हा काय होते

अनुमतीसूचीत नसलेल्या आयपी पत्त्यावरून विनंती आल्यास ती अयशस्वी होते आणि पुढील प्रतिसाद मिळतो:

• एचटीटीपी स्थिती: 401 Unauthorized

• त्रुटी संकेतांक: ip_not_authorized

प्रतिसादाचे उदाहरण:

{

 "error": {

   "message": "Your IP is not authorized to access this organization.",

   "type": "ip_not_authorized"

 }

}

वारंवार विचारले जाणारे प्रश्न

आयपी अनुमतीसूचीमुळे माझ्या एपीआय प्रवेशकळीचा सर्व प्रकारचा अनधिकृत वापर रोखला जाईल का.

नाही. एपीआय विनंत्या कोणत्या स्रोतांकडून येऊ शकतात यावर मर्यादा घालून आयपी अनुमतीसूची धोका कमी करण्यास मदत करू शकते. मात्र, ती सर्व प्रकारचा गैरवापर पूर्णपणे रोखू शकत नाही. प्रवेशकळ सुरक्षितपणे साठवणे, ती नियमितपणे बदलणे आणि खात्याची सुरक्षा मजबूत ठेवणे अशा इतर शिफारस केलेल्या सुरक्षा उपायांसोबत तिचा वापर करावा. अधिक सुरक्षिततेसाठी आमच्या मदत केंद्रातील एपीआय प्रवेशकळीच्या सुरक्षिततेसाठी शिफारस केलेल्या पद्धती आणि अनधिकृत वापर रोखणे यांवरील मार्गदर्शक वाचा.

आयपी अनुमतीसूचीमुळे प्रतिसाद मिळण्यास लागणाऱ्या वेळेवर परिणाम होतो का.

आयपी अनुमतीसूचीमुळे काही प्रकरणांत, विशेषतः सुरुवातीच्या विनंत्यांना प्रतिसाद मिळण्यास किंचित विलंब होऊ शकतो. यामुळे एपीआयच्या एकूण कार्यक्षमतेवर लक्षणीय परिणाम होणे अपेक्षित नाही.

आयपी अनुमतीसूचीमुळे विनंती अयशस्वी होत आहे हे कसे ओळखावे.

आयपी अनुमतीसूचीमुळे अयशस्वी होणाऱ्या विनंत्यांना पुढील प्रतिसाद मिळतो:

• HTTP status: 401 Unauthorized

• Error code: ip_not_authorized