संदर्भसूचना म्हणजे तुमचा व्यवसाय, उत्पादन किंवा सेवा यांबद्दलचे अतिरिक्त तपशील. ChatGPT मध्ये तुमच्या जाहिराती कधी सुसंगत ठरू शकतात, हे समजून घेण्यास आमच्या प्रणालींना या तपशिलांची मदत होते. तुमची जाहिरात किंवा तिचे गंतव्य पृष्ठ यांतून स्पष्ट होत नसेल अशी उपयुक्त माहिती देण्यासाठी, जाहिरात गटाच्या पातळीवर या संदर्भसूचना जोडा.

संदर्भसूचना लिहा

स्वतःला विचारा: तुमचे उत्पादन, ते कोणाच्या उपयोगी पडते आणि कधी उपयोगी ठरते याबद्दल आम्हाला आणखी काय माहीत असायला हवे?

• काय: उत्पादनाची संबंधित वैशिष्ट्ये, सेवा, किंमती, उपलब्धता किंवा सेवा पुरवली जाणारी क्षेत्रे.

• कोणासाठी: ग्राहकांच्या अशा गरजा, आवडीनिवडी किंवा परिस्थिती, ज्यांसाठी तुमचे उत्पादन किंवा सेवा योग्य आहे.

• कधी: तुमचे उत्पादन किंवा सेवा उपयोगी ठरू शकेल अशा परिस्थिती किंवा निर्णय घेण्याचे प्रसंग.

तुमचे उत्पादन किंवा सेवा ज्यांच्यासाठी सर्वाधिक योग्य आहे असे ग्राहक आणि व्यवसायाला अधिक चांगले परिणाम मिळवून देणाऱ्या परिस्थिती यांबद्दल तुम्हाला असलेली माहिती वापरा. त्याआधारे तुमचे उत्पादन किंवा सेवा कोणत्या गरजा पूर्ण करू शकते ते लिहा.

परस्परांशी संबंध नसलेल्या मुख्य शब्दांची यादी देण्याऐवजी, एका कल्पनेवर लक्ष केंद्रित करणारा स्पष्ट आणि सहज समजणारा वाक्यांश लिहा. प्रत्येक संदर्भसूचनेत या तिन्ही बाबी असणे आवश्यक नाही.

चांगल्या संदर्भसूचनेची वैशिष्ट्ये

प्रभावी संदर्भसूचना अशा असतात:

• पूरक: तुमच्या जाहिरातीतून किंवा तिच्याशी जोडलेल्या पृष्ठावरून आधीच स्पष्ट होत असलेल्या माहितीपलीकडचे उपयुक्त संदर्भ द्या.

• नेमक्या: उत्पादनाचे एखादे ठोस वैशिष्ट्य, सेवेचा तपशील, ग्राहकाची गरज किंवा एखादी परिस्थिती यांचे वर्णन करा.

• सुसंगत: तुमचे उत्पादन किंवा सेवा आणि त्यांचा वापर होऊ शकणारा प्रसंग यांच्यातील वास्तविक संबंध स्पष्ट करा.

• अचूक: तुम्ही प्रत्यक्षात देत असलेल्या उत्पादनाचे किंवा सेवेचे वर्णन करा. वैशिष्ट्ये, किंमती, विशेष सवलती, उपलब्धता किंवा सेवा पुरवली जाणारी क्षेत्रे बदलल्यास संदर्भसूचना अद्ययावत करा.

एखादा तपशील जाहिरातीशी जोडलेल्या पृष्ठावर आधीच दिलेला असला, तरी संदर्भसूचनेत त्याचा संबंध ग्राहकाच्या गरजेशी जोडल्यास तो उपयुक्त ठरू शकतो. उदाहरणार्थ, “उष्ण हवामानात सराव करण्यासाठी हवा खेळती ठेवणारे धावण्याचे बूट” यातून एखादे वैशिष्ट्य महत्त्वाचे का आहे हे स्पष्ट होते.

संदर्भसूचनांची उदाहरणे

ही उदाहरणे केवळ समजावून सांगण्यासाठी दिली आहेत. तुमच्या व्यवसायाचे अचूक वर्णन करणारे तपशील वापरा.

संदर्भसूचनांमध्ये प्रत्यक्षात शक्य असलेल्या इतर वापरांचेही वर्णन करता येते. उदाहरणार्थ, पायांना आधार देणारे खेळाचे बूट दीर्घकाळ उभे राहून काम करणाऱ्यांसाठीही योग्य ठरू शकतात, जर ते बूट अशा वापरासाठी योग्य असतील. केवळ एखाद्या ग्राहकवर्गापर्यंत पोहोचण्याची तुमची इच्छा आहे म्हणून तुमचे उत्पादन किंवा सेवा त्या ग्राहकवर्गासाठी सुसंगत ठरत नाही.

व्यवसायाचा संदर्भ आणि जाहिरात प्रदर्शनाची नियंत्रणे

संदर्भसूचना जाहिरातीची सुसंगतता ठरवण्यासाठी माहिती देतात. लोकांची गरज किंवा परिस्थिती तुमच्या संदर्भसूचनेशी सुसंगत असण्यासाठी त्यांनी त्यातील नेमके शब्दच वापरणे आवश्यक नाही.

संदर्भसूचना म्हणजे लक्ष्यित प्रेक्षक ठरवण्याचे नियम किंवा जाहिरात दाखवण्याच्या सूचना नाहीत. विशिष्ट संभाषणांमध्ये, विशिष्ट प्रेक्षकांना किंवा विशिष्ट परिस्थितीत तुमची जाहिरात दिसेल याची त्या हमी देत नाहीत. तसेच, त्यांच्याद्वारे भौगोलिक मर्यादा, वेळापत्रके किंवा वगळण्याचे नियम लागू करता येत नाहीत.

उदाहरणार्थ, “शिकागोमध्ये घरगुती नळकामाच्या सेवा उपलब्ध आहेत” हे तुमच्या व्यवसायाचे वर्णन आहे. “ही जाहिरात फक्त शिकागोमधील लोकांना दाखवा” ही जाहिरात दाखवण्याबाबतची सूचना आहे. जाहिरात दाखवण्यावर निर्बंध घालण्यासाठी, उत्पादनात त्यासाठी उपलब्ध असलेली समर्थित नियंत्रणे वापरा.

जाहिरात गट कोणत्या उत्पादनांचा प्रचार करतो हेही तुम्ही लिहू शकता. यामुळे कोणती उत्पादने समाविष्ट आहेत हे स्पष्ट होते; विशिष्ट व्यक्ती किंवा संभाषणे वगळली जात नाहीत.

संदर्भसूचना जाहिरात गटाशी संबंधित ठेवा

समान उत्पादन, सेवा, विषय किंवा ग्राहकाची गरज यांवर आधारित संदर्भसूचना एकत्र करा. परस्परांशी संबंधित परिस्थिती एकाच जाहिरात गटात समाविष्ट करता येतात. वेगवेगळ्या वापरांसाठी वेगळा संदेश देण्याची किंवा जाहिरातींना वेगळी पृष्ठे जोडण्याची गरज असल्यास, स्वतंत्र जाहिरात गट तयार करण्याचा विचार करा.

अधिक मार्गदर्शनासाठी, पाहा: ChatGPT Ads साठी जाहिरात गट तयार करा.