ਵਿੱਤ ਸਹੂਲਤ ਅਮਰੀਕਾ ਵਿੱਚ Free, Go, Plus ਅਤੇ Pro ਵਰਤੋਂਕਾਰਾਂ ਲਈ ਵੈੱਬ, iOS ਅਤੇ Android 'ਤੇ ਉਪਲਬਧ ਹੈ.
ਅਮਰੀਕਾ ਵਿੱਚ ਯੋਗ ਵਰਤੋਂਕਾਰ ਆਪਣੇ ਵਿੱਤੀ ਖਾਤਿਆਂ ਅਤੇ ਕ੍ਰੈਡਿਟ ਰਿਪੋਰਟ ਦੇ ਡੇਟਾ ਨੂੰ ਸੁਰੱਖਿਅਤ ਢੰਗ ਨਾਲ ਜੋੜ ਸਕਦੇ ਹਨ, ਡੈਸ਼ਬੋਰਡ 'ਤੇ ਦੇਖ ਸਕਦੇ ਹਨ ਕਿ ਉਨ੍ਹਾਂ ਦਾ ਪੈਸਾ ਕਿੱਥੇ ਖ਼ਰਚ ਹੋ ਰਿਹਾ ਹੈ, ਅਤੇ ਆਪਣੀ ਵਿੱਤੀ ਸਥਿਤੀ ਦੇ ਆਧਾਰ 'ਤੇ ChatGPT ਨੂੰ ਸਵਾਲ ਪੁੱਛ ਸਕਦੇ ਹਨ.
ਤੁਸੀਂ ਚੈਟ ਵਿੱਚ ਸਵਾਲ ਪੁੱਛ ਸਕਦੇ ਹੋ ਜਾਂ ਵਿੱਤ ਪੰਨੇ 'ਤੇ ਆਪਣੇ ਖ਼ਰਚੇ, ਬਿੱਲ, ਗਾਹਕੀਆਂ, ਸ਼ੁੱਧ ਸੰਪਤੀ, ਨਿਵੇਸ਼ ਅਤੇ ਕ੍ਰੈਡਿਟ ਸਕੋਰ ਇੱਕੋ ਥਾਂ ਦੇਖ ਸਕਦੇ ਹੋ.
ਤੁਸੀਂ Plaid ਰਾਹੀਂ ਵਿੱਤੀ ਖਾਤੇ ਅਤੇ Experian ਰਾਹੀਂ ਕ੍ਰੈਡਿਟ ਰਿਪੋਰਟ ਦਾ ਡੇਟਾ ਜੋੜ ਸਕਦੇ ਹੋ. ਇਹ ਵੱਖੋ-ਵੱਖਰੇ ਕਨੈਕਸ਼ਨ ਹਨ; ਤੁਸੀਂ ਇਨ੍ਹਾਂ ਵਿੱਚੋਂ ਕੋਈ ਇੱਕ ਜਾਂ ਦੋਵੇਂ ਵਰਤ ਸਕਦੇ ਹੋ.
ChatGPT ਨਾਲ ਵਿੱਤੀ ਜਾਣਕਾਰੀ ਜੋੜ ਕੇ ਤੁਸੀਂ ਕੀ ਕਰ ਸਕਦੇ ਹੋ
ਤੁਸੀਂ ਆਪਣੇ ਵਿੱਤੀ ਮਾਮਲਿਆਂ ਦੇ ਪ੍ਰਬੰਧ ਬਾਰੇ ਸਵਾਲ ਪੁੱਛਣ ਅਤੇ ਜਵਾਬ ਲੈਣ ਲਈ ChatGPT ਵਰਤ ਸਕਦੇ ਹੋ. ਇਨ੍ਹਾਂ ਕੰਮਾਂ ਵਿੱਚ ਮਦਦ ਲਓ:
ਇਹ ਸਮਝਣਾ ਕਿ ਤੁਹਾਡਾ ਪੈਸਾ ਕਿੱਥੇ ਖ਼ਰਚ ਹੋ ਰਿਹਾ ਹੈ
ਸ਼੍ਰੇਣੀ ਅਨੁਸਾਰ ਖ਼ਰਚਿਆਂ 'ਤੇ ਨਜ਼ਰ ਰੱਖਣਾ
ਗਾਹਕੀਆਂ ਅਤੇ ਨਿਯਮਿਤ ਤੌਰ 'ਤੇ ਆਉਣ ਵਾਲੇ ਬਿੱਲਾਂ ਦਾ ਪਤਾ ਲਗਾਉਣਾ
ਆਉਣ ਵਾਲੀਆਂ ਅਦਾਇਗੀਆਂ ਦੀ ਸਮੀਖਿਆ ਕਰਨਾ
ਇਸ ਮਹੀਨੇ ਦੇ ਖ਼ਰਚਿਆਂ ਦੀ ਹਾਲੀਆ ਰੁਝਾਨਾਂ ਨਾਲ ਤੁਲਨਾ ਕਰਨਾ
ਸਮੇਂ ਦੇ ਨਾਲ ਆਪਣੀ ਸ਼ੁੱਧ ਸੰਪਤੀ ਵਿੱਚ ਬਦਲਾਅ ਦੇਖਣਾ
ਆਪਣੇ ਨਿਵੇਸ਼ਾਂ ਦੀ ਵੰਡ ਦੀ ਸਮੀਖਿਆ ਕਰਨਾ
ਆਪਣੇ ਸ਼ੇਅਰਾਂ ਅਤੇ ਐਕਸਚੇਂਜ 'ਤੇ ਵਪਾਰ ਹੋਣ ਵਾਲੇ ਫੰਡਾਂ ਵਿੱਚ ਰੋਜ਼ਾਨਾ ਬਦਲਾਅ ਸਮਝਣਾ
ਬਜਟ, ਬੱਚਤ ਦੇ ਟੀਚਿਆਂ, ਕਰਜ਼ਾ ਚੁਕਾਉਣ ਅਤੇ ਵੱਡੀਆਂ ਖ਼ਰੀਦਾਂ ਦੀ ਯੋਜਨਾ ਬਣਾਉਣਾ
ਆਪਣਾ ਕ੍ਰੈਡਿਟ ਸਕੋਰ, ਉਸ ਨੂੰ ਪ੍ਰਭਾਵਿਤ ਕਰਨ ਵਾਲੇ ਕਾਰਕ ਅਤੇ ਆਪਣੀ ਕ੍ਰੈਡਿਟ ਰਿਪੋਰਟ ਵਿੱਚ ਅਹਿਮ ਬਦਲਾਅ ਸਮਝਣਾ
ChatGPT ਵੱਖ-ਵੱਖ ਚੋਣਾਂ ਦੇ ਫ਼ਾਇਦੇ ਅਤੇ ਨੁਕਸਾਨ ਸਮਝਣ ਵਿੱਚ ਵੀ ਮਦਦ ਕਰ ਸਕਦਾ ਹੈ. ਮਿਸਾਲ ਲਈ, ਇਹ ਅਜਿਹੀ ਜਾਣਕਾਰੀ ਦੇ ਸਕਦਾ ਹੈ ਜੋ ਕਰਜ਼ੇ, ਐਮਰਜੈਂਸੀ ਲਈ ਪੈਸਾ ਜੋੜਨ, ਸੇਵਾਮੁਕਤੀ ਲਈ ਯੋਗਦਾਨ ਵਧਾਉਣ ਜਾਂ ਵਿਹਲੇ ਪਏ ਪੈਸੇ ਨੂੰ ਵੱਧ ਵਿਆਜ ਵਾਲੇ ਖਾਤੇ ਵਿੱਚ ਪਾਉਣ ਵਰਗੇ ਵਿਸ਼ਿਆਂ 'ਤੇ ਸੋਚ-ਵਿਚਾਰ ਕਰਨ ਵਿੱਚ ਤੁਹਾਡੀ ਮਦਦ ਕਰੇ.
ਟੈਕਸਾਂ ਦੇ ਮਾਮਲੇ ਵਿੱਚ, ChatGPT ਜਾਣਕਾਰੀ ਨੂੰ ਤਰਤੀਬ ਦੇਣ, ਧਾਰਨਾਵਾਂ ਸਮਝਾਉਣ ਅਤੇ ਕਟੌਤੀਆਂ ਜਾਂ ਅੰਦਾਜ਼ਨ ਅਦਾਇਗੀਆਂ ਵਰਗੇ ਸੰਭਾਵੀ ਵਿਸ਼ਿਆਂ ਦੀ ਪਛਾਣ ਕਰਨ ਵਿੱਚ ਮਦਦ ਕਰ ਸਕਦਾ ਹੈ ਜਿਨ੍ਹਾਂ ਦੀ ਸਮੀਖਿਆ ਕਰਨੀ ਚਾਹੀਦੀ ਹੈ. ਇਹ ਟੈਕਸ ਮਾਹਰ ਦੀ ਥਾਂ ਨਹੀਂ ਲੈਂਦਾ ਅਤੇ ਤੁਹਾਡੀ ਟੈਕਸ ਰਿਟਰਨ ਦਾਖ਼ਲ ਨਹੀਂ ਕਰਦਾ. ChatGPT ਨਾ ਤਾਂ ਤੁਹਾਡੇ ਹਿੱਤ ਵਿੱਚ ਕੰਮ ਕਰਨ ਲਈ ਕਾਨੂੰਨੀ ਤੌਰ 'ਤੇ ਜ਼ਿੰਮੇਵਾਰ ਅਮਾਨਤਦਾਰ ਹੈ, ਨਾ ਰਜਿਸਟਰਡ ਨਿਵੇਸ਼ ਸਲਾਹਕਾਰ, ਦਲਾਲ-ਵਪਾਰੀ, ਟੈਕਸ ਰਿਟਰਨ ਤਿਆਰ ਕਰਨ ਵਾਲਾ ਜਾਂ ਕਾਨੂੰਨੀ ਫ਼ਰਮ. ਜਵਾਬ ਸਿਰਫ਼ ਜਾਣਕਾਰੀ ਅਤੇ ਯੋਜਨਾਬੰਦੀ ਦੇ ਉਦੇਸ਼ਾਂ ਲਈ ਹਨ.
ਆਪਣੇ ਵਿੱਤੀ ਫ਼ੈਸਲਿਆਂ ਲਈ ਤੁਸੀਂ ਖ਼ੁਦ ਜ਼ਿੰਮੇਵਾਰ ਹੋ. ਕਾਨੂੰਨ, ਟੈਕਸ ਜਾਂ ਨਿਵੇਸ਼ ਨਾਲ ਜੁੜੇ ਨਤੀਜਿਆਂ ਵਾਲੇ ਫ਼ੈਸਲੇ ਲੈਣ ਤੋਂ ਪਹਿਲਾਂ ਤੁਹਾਨੂੰ ਕਿਸੇ ਯੋਗ ਮਾਹਰ ਨਾਲ ਸਲਾਹ ਕਰਨੀ ਚਾਹੀਦੀ ਹੈ.
ਤੁਹਾਡੇ ਵਿੱਤੀ ਖਾਤੇ ਤੁਹਾਡੇ ਕੰਟਰੋਲ ਵਿੱਚ ਹੀ ਰਹਿੰਦੇ ਹਨ
ChatGPT ਵਿੱਤੀ ਫ਼ੈਸਲਿਆਂ ਨੂੰ ਸਮਝਣ, ਉਨ੍ਹਾਂ ਦੀ ਯੋਜਨਾ ਬਣਾਉਣ ਅਤੇ ਮੁਲਾਂਕਣ ਕਰਨ ਵਿੱਚ ਮਦਦ ਕਰ ਸਕਦਾ ਹੈ, ਪਰ ਤੁਹਾਡੇ ਵੱਲੋਂ ਵਿੱਤੀ ਕਾਰਵਾਈਆਂ ਨਹੀਂ ਕਰ ਸਕਦਾ.
ChatGPT ਇਹ ਕੰਮ ਨਹੀਂ ਕਰ ਸਕਦਾ:
ਪੈਸੇ ਤਬਦੀਲ ਕਰਨਾ
ਬਿੱਲਾਂ ਦੀ ਅਦਾਇਗੀ ਕਰਨਾ
ਖਾਤੇ ਦੀਆਂ ਸੈਟਿੰਗਾਂ ਬਦਲਣਾ
ਨਿਵੇਸ਼ਾਂ ਦੀ ਖ਼ਰੀਦੋ-ਫ਼ਰੋਖ਼ਤ ਕਰਨਾ
ਸੇਵਾਮੁਕਤੀ ਲਈ ਯੋਗਦਾਨ ਬਦਲਣਾ
ਵਿੱਤੀ ਖਾਤੇ ਖੋਲ੍ਹਣਾ ਜਾਂ ਬੰਦ ਕਰਨਾ
ਟੈਕਸ ਰਿਟਰਨ ਦਾਖ਼ਲ ਕਰਨਾ
ਤੁਹਾਡੇ ਵਿੱਤੀ, ਕਾਨੂੰਨੀ, ਟੈਕਸ ਜਾਂ ਨਿਵੇਸ਼ ਸਲਾਹਕਾਰ ਵਜੋਂ ਕੰਮ ਕਰਨਾ
ਵਿੱਤ ਡੈਸ਼ਬੋਰਡ ਨੂੰ ਸਮਝਣਾ
ਵਿੱਤ ਡੈਸ਼ਬੋਰਡ ਤੁਹਾਡੀ ਵਿੱਤੀ ਸਥਿਤੀ ਦੇਖਣ ਅਤੇ ਵਿੱਤੀ ਸਵਾਲ ਪੁੱਛਣ ਲਈ ਇੱਕ ਖ਼ਾਸ ਥਾਂ ਦਿੰਦਾ ਹੈ. ਇਸ ਵਿੱਚ ਤੁਹਾਡੇ ਕਨੈਕਸ਼ਨ ਦੀ ਸਥਿਤੀ, ਆਖ਼ਰੀ ਵਾਰ ਡੇਟਾ ਸਿੰਕ ਹੋਣ ਦਾ ਸਮਾਂ, ਗੱਲਬਾਤ ਸ਼ੁਰੂ ਕਰਨ ਲਈ ਸੁਝਾਏ ਸਵਾਲ ਅਤੇ ਵਿੱਤੀ ਵਿਜੈਟ ਸ਼ਾਮਲ ਹਨ.
ਤੁਹਾਡੇ ਜੁੜੇ ਹੋਏ ਡੇਟਾ ਦੇ ਆਧਾਰ 'ਤੇ ਤੁਹਾਨੂੰ ਇਨ੍ਹਾਂ ਲਈ ਵਿਜੈਟ ਦਿਖ ਸਕਦੇ ਹਨ:
ਸ਼੍ਰੇਣੀ ਅਨੁਸਾਰ ਖ਼ਰਚੇ, ਜੋ ਦਿਖਾਉਂਦਾ ਹੈ ਕਿ ਹਰ ਮਹੀਨੇ ਤੁਹਾਡਾ ਪੈਸਾ ਕਿੱਥੇ ਖ਼ਰਚ ਹੋ ਰਿਹਾ ਹੈ
ਇਸ ਮਹੀਨੇ ਦੇ ਖ਼ਰਚੇ, ਜੋ ਮੌਜੂਦਾ ਖ਼ਰਚਿਆਂ ਦੀ ਹਾਲੀਆ ਰੁਝਾਨਾਂ ਨਾਲ ਤੁਲਨਾ ਕਰਦਾ ਹੈ
ਆਉਣ ਵਾਲੀਆਂ ਅਦਾਇਗੀਆਂ, ਜੋ ਸੰਭਾਵੀ ਬਿੱਲਾਂ ਅਤੇ ਨਿਯਮਿਤ ਕਟੌਤੀਆਂ ਦੀ ਝਲਕ ਦਿੰਦਾ ਹੈ
ਗਾਹਕੀਆਂ, ਜਿਸ ਵਿੱਚ ਤੁਸੀਂ ਚਾਲੂ ਗਾਹਕੀਆਂ, ਉਨ੍ਹਾਂ ਦੀ ਰਕਮ, ਅਦਾਇਗੀ ਦੇ ਅੰਤਰਾਲ ਅਤੇ ਅਗਲੀ ਕਟੌਤੀ ਦੀਆਂ ਤਾਰੀਖਾਂ ਦੇਖ ਸਕਦੇ ਹੋ
ਬਿੱਲ, ਜਿਸ ਨਾਲ ਘਰੇਲੂ ਅਤੇ ਬਿਜਲੀ-ਪਾਣੀ ਵਰਗੀਆਂ ਸੇਵਾਵਾਂ ਦੀਆਂ ਨਿਯਮਿਤ ਅਦਾਇਗੀਆਂ 'ਤੇ ਨਜ਼ਰ ਰੱਖ ਸਕਦੇ ਹੋ
ਸ਼ੁੱਧ ਸੰਪਤੀ, ਜੋ ਦਿਖਾਉਂਦਾ ਹੈ ਕਿ ਸਮੇਂ ਦੇ ਨਾਲ ਤੁਹਾਡੀ ਸ਼ੁੱਧ ਸੰਪਤੀ ਕਿਵੇਂ ਬਦਲੀ ਹੈ
ਨਿਵੇਸ਼ਾਂ ਦੀ ਵੰਡ, ਜੋ ਸ਼ੇਅਰਾਂ, ਬਾਂਡਾਂ, ਐਕਸਚੇਂਜ 'ਤੇ ਵਪਾਰ ਹੋਣ ਵਾਲੇ ਫੰਡਾਂ, ਨਕਦੀ ਅਤੇ ਕ੍ਰਿਪਟੋ ਵਰਗੀਆਂ ਸੰਪਤੀਆਂ ਵਿਚਕਾਰ ਵੰਡ ਦਿਖਾਉਂਦਾ ਹੈ
ਬਾਜ਼ਾਰ ਦੀ ਤਾਜ਼ਾ ਜਾਣਕਾਰੀ, ਜੋ ਤੁਹਾਡੇ ਸ਼ੇਅਰਾਂ ਵਿੱਚ ਰੋਜ਼ਾਨਾ ਬਦਲਾਅ, ਮੌਜੂਦਾ ਮੁੱਲ ਅਤੇ ਹਿੱਸੇਦਾਰੀ ਦੀ ਮਾਤਰਾ ਦਿਖਾਉਂਦਾ ਹੈ
ਕ੍ਰੈਡਿਟ ਸਕੋਰ, ਜਿਸ ਵਿੱਚ ਹਰ ਮਹੀਨੇ ਨਵੀਂ ਜਾਣਕਾਰੀ ਉਪਲਬਧ ਹੋਣ 'ਤੇ ਤੁਸੀਂ ਆਪਣਾ Experian ਸਕੋਰ, ਉਸ ਨੂੰ ਪ੍ਰਭਾਵਿਤ ਕਰਨ ਵਾਲੇ ਕਾਰਕ ਅਤੇ ਪਿਛਲੇ ਸਕੋਰ ਦੇਖ ਸਕਦੇ ਹੋ
ਵਿਜੈਟਾਂ ਦਾ ਕ੍ਰਮ ਬਦਲਣ ਜਾਂ ਇਹ ਚੁਣਨ ਲਈ ਕਿ ਕਿਹੜੇ ਵਿਜੈਟ ਦਿਖਣ, ਪੈਨਸਿਲ ਦੇ ਚਿੰਨ੍ਹ ਦੀ ਵਰਤੋਂ ਕਰੋ. ਵਿਜੈਟ ਤਾਂ ਹੀ ਦਿਖਾਏ ਜਾਂਦੇ ਹਨ ਜਦੋਂ ChatGPT ਕੋਲ ਉਨ੍ਹਾਂ ਨੂੰ ਬਣਾਉਣ ਲਈ ਲੋੜੀਂਦਾ ਜੁੜਿਆ ਹੋਇਆ ਡੇਟਾ ਹੁੰਦਾ ਹੈ.
ਡੈਸ਼ਬੋਰਡ ਦਾ ਕਾਰਡ ਜਾਂ ਵਿਜੈਟ ਗ਼ਲਤ ਕਿਉਂ ਲੱਗਦਾ ਹੈ?
ਡੈਸ਼ਬੋਰਡ ਦੇ ਕਾਰਡ ਅਤੇ ਵਿਜੈਟ ChatGPT ਨੂੰ ਉਪਲਬਧ ਜੁੜਿਆ ਹੋਇਆ ਡੇਟਾ ਵਰਤਦੇ ਹਨ, ਜਿਸ ਵਿੱਚ Plaid ਰਾਹੀਂ ਵਿੱਤੀ ਖਾਤਿਆਂ ਅਤੇ Experian ਰਾਹੀਂ ਕ੍ਰੈਡਿਟ ਰਿਪੋਰਟਾਂ ਦਾ ਡੇਟਾ ਸ਼ਾਮਲ ਹੈ. ਕਿਸੇ ਵਿਜੈਟ ਦੀ ਕਿਸੇ ਹੋਰ ਐਪ ਜਾਂ ਸਟੇਟਮੈਂਟ ਨਾਲ ਤੁਲਨਾ ਕਰਦੇ ਸਮੇਂ ਸਰੋਤ ਅਤੇ ਤਾਰੀਖ ਦੇਖੋ.
ਬੈਂਕ ਖਾਤਿਆਂ ਦੇ ਵਿਜੈਟਾਂ ਵਿੱਚ ਅਧੂਰਾ ਸਿੰਕ ਹੋਇਆ ਡੇਟਾ ਜਾਂ ਗੁੰਮ ਖਾਤੇ ਅਤੇ ਲੈਣ-ਦੇਣ ਨਤੀਜੇ ਨੂੰ ਪ੍ਰਭਾਵਿਤ ਕਰ ਸਕਦੇ ਹਨ. ਕ੍ਰੈਡਿਟ ਵਿਜੈਟ ਤੁਹਾਡੀ ਨਵੀਨਤਮ Experian ਰਿਪੋਰਟ ਦਿਖਾਉਂਦੇ ਹਨ, ਖਾਤੇ ਦੀ ਤੁਰੰਤ ਚੱਲ ਰਹੀ ਸਰਗਰਮੀ ਨਹੀਂ. ਹਾਲੀਆ ਅਦਾਇਗੀ ਉਦੋਂ ਤੱਕ ਨਹੀਂ ਦਿਖ ਸਕਦੀ ਜਦੋਂ ਤੱਕ ਤੁਹਾਡਾ ਕਰਜ਼ਦਾਤਾ ਉਸ ਦੀ ਜਾਣਕਾਰੀ ਨਹੀਂ ਭੇਜਦਾ ਅਤੇ ਤੁਹਾਡੀ ਰਿਪੋਰਟ ਅੱਪਡੇਟ ਨਹੀਂ ਹੁੰਦੀ.
ਤੁਸੀਂ ChatGPT ਨੂੰ ਪੁੱਛ ਸਕਦੇ ਹੋ ਕਿ ਉਸ ਨੇ ਕਿਹੜਾ ਡੇਟਾ ਵਰਤਿਆ ਹੈ ਅਤੇ ਕੋਈ ਅੰਕੜਾ ਵੱਖਰਾ ਕਿਉਂ ਦਿਖਦਾ ਹੈ. ਇਹ ਲੈਣ-ਦੇਣ ਦੀਆਂ ਸ਼੍ਰੇਣੀਆਂ ਦੀ ਸਮੀਖਿਆ ਕਰਨ ਵਿੱਚ ਮਦਦ ਕਰ ਸਕਦਾ ਹੈ, ਪਰ ਤੁਹਾਡੀ Experian ਕ੍ਰੈਡਿਟ ਰਿਪੋਰਟ ਵਿੱਚ ਜਾਣਕਾਰੀ ਨਹੀਂ ਬਦਲ ਸਕਦਾ. ਕ੍ਰੈਡਿਟ ਰਿਪੋਰਟ ਵਿੱਚ ਗ਼ਲਤ ਜਾਣਕਾਰੀ ਲਈ ਹੇਠਾਂ Experian ਸਹਾਇਤਾ ਬਾਰੇ ਮਾਰਗਦਰਸ਼ਨ ਦੇਖੋ.
ਚੈਟ ਵਿੱਚ ਸਵਾਲ ਪੁੱਛੋ
ਤੁਸੀਂ ਵਿੱਤ ਪੰਨੇ ਤੋਂ ਜਾਂ ChatGPT ਦੀ ਆਮ ਗੱਲਬਾਤ ਵਿੱਚ ਵਿੱਤੀ ਸਵਾਲ ਪੁੱਛ ਸਕਦੇ ਹੋ. ਜਦੋਂ ਤੁਹਾਡਾ ਸਵਾਲ ਤੁਹਾਡੇ ਜੁੜੇ ਹੋਏ ਵਿੱਤੀ ਡੇਟਾ ਨਾਲ ਸੰਬੰਧਿਤ ਹੁੰਦਾ ਹੈ, ਤਾਂ ChatGPT ਜਵਾਬ ਦੇਣ ਲਈ ਉਸ ਸੰਦਰਭ ਨੂੰ ਵਰਤ ਸਕਦਾ ਹੈ. ਤੁਸੀਂ ਚੈਟ ਬਾਕਸ ਵਿੱਚ /finances ਜਾਂ @finances ਵੀ ਲਿਖ ਸਕਦੇ ਹੋ.
ਇਸ ਤਰ੍ਹਾਂ ਦੇ ਸਵਾਲ ਪੁੱਛ ਕੇ ਦੇਖੋ:
“ਇਸ ਮਹੀਨੇ ਮੈਂ ਸਭ ਤੋਂ ਵੱਧ ਪੈਸਾ ਕਿੱਥੇ ਖ਼ਰਚ ਕੀਤਾ?”
“ਮੈਂ ਕਿਹੜੀਆਂ ਗਾਹਕੀਆਂ ਲਈ ਭੁਗਤਾਨ ਕਰ ਰਿਹਾ ਹਾਂ?”
“ਅੱਗੇ ਕਿਹੜੇ ਬਿੱਲਾਂ ਦੀ ਅਦਾਇਗੀ ਕਰਨੀ ਹੈ?”
“ਕੀ ਮੇਰੇ ਮੌਜੂਦਾ ਖ਼ਰਚੇ ਮੁਤਾਬਕ ਰਾਸ਼ਨ ਦਾ ਖ਼ਰਚਾ ਬਜਟ ਦੇ ਅੰਦਰ ਰਹੇਗਾ?”
“ਹਾਲ ਹੀ ਵਿੱਚ ਮੇਰੀ ਸ਼ੁੱਧ ਸੰਪਤੀ ਕਿਵੇਂ ਬਦਲੀ ਹੈ?”
“ਮੇਰੇ ਨਿਵੇਸ਼ਾਂ ਦੀ ਵੰਡ ਕਿਵੇਂ ਹੋਈ ਹੈ?”
“ਕੀ ਮੇਰੀ ਕੋਈ ਅਦਾਇਗੀ ਦੋ ਵਾਰ ਹੋਈ ਹੈ?”
“ਮੈਨੂੰ ਆਪਣੇ ਚਾਲੂ ਖਾਤੇ ਵਿੱਚ ਕਿੰਨੀ ਨਕਦੀ ਰੱਖਣੀ ਚਾਹੀਦੀ ਹੈ?”
“ਆਪਣੇ ਕ੍ਰੈਡਿਟ ਕਾਰਡ ਦਾ ਕਰਜ਼ਾ ਘਟਾਉਣ ਲਈ ਮੈਂ ਕਿਹੜੀ ਅਮਲੀ ਯੋਜਨਾ ਅਪਣਾ ਸਕਦਾ ਹਾਂ?”
“ਮੇਰੇ ਕ੍ਰੈਡਿਟ ਸਕੋਰ ਨੂੰ ਕਿਹੜੇ ਕਾਰਕ ਪ੍ਰਭਾਵਿਤ ਕਰ ਰਹੇ ਹਨ?”
“ਮੇਰੀ ਕ੍ਰੈਡਿਟ ਸੀਮਾ ਦੀ ਵਰਤੋਂ ਵਿੱਚ ਸਭ ਤੋਂ ਵੱਧ ਹਿੱਸਾ ਕਿਹੜੇ ਕਾਰਡ ਦਾ ਹੈ?”
“ਮਕਾਨ ਲਈ ਗਿਰਵੀ ਕਰਜ਼ੇ ਦੀ ਅਰਜ਼ੀ ਦੇਣ ਤੋਂ ਪਹਿਲਾਂ ਮੈਨੂੰ ਆਪਣੀ ਕ੍ਰੈਡਿਟ ਸਥਿਤੀ ਬਾਰੇ ਕੀ ਸਮਝਣਾ ਚਾਹੀਦਾ ਹੈ?”
ਜਦੋਂ ChatGPT ਜੁੜਿਆ ਹੋਇਆ ਵਿੱਤੀ ਡੇਟਾ ਵਰਤਦਾ ਹੈ, ਤਾਂ ਇਹ ਸੰਬੰਧਿਤ ਸਰੋਤ ਡੇਟੇ ਦਾ ਹਵਾਲਾ ਦੇ ਸਕਦਾ ਹੈ ਤਾਂ ਜੋ ਤੁਸੀਂ ਦੇਖ ਸਕੋ ਕਿ ਜਵਾਬ ਕਿਸ ਜਾਣਕਾਰੀ 'ਤੇ ਆਧਾਰਿਤ ਹੈ.
ਵਿੱਤੀ ਯਾਦਾਂ
ਜੁੜੇ ਹੋਏ ਖਾਤਿਆਂ ਤੋਂ ਇਲਾਵਾ, ਤੁਸੀਂ ਆਪਣੀ ਵਿੱਤੀ ਜ਼ਿੰਦਗੀ ਬਾਰੇ ਅਹਿਮ ਜਾਣਕਾਰੀ ਸਾਂਝੀ ਕਰ ਸਕਦੇ ਹੋ, ਜਿਵੇਂ ਮਕਾਨ ਦਾ ਗਿਰਵੀ ਕਰਜ਼ਾ, ਬੱਚਤ ਦਾ ਟੀਚਾ ਜਾਂ ਕੋਈ ਵੱਡੀ ਖ਼ਰੀਦ ਜਿਸ ਦੀ ਤੁਸੀਂ ਯੋਜਨਾ ਬਣਾ ਰਹੇ ਹੋ.
ਮਿਸਾਲ ਲਈ, ਤੁਸੀਂ ChatGPT ਨੂੰ ਕਹਿ ਸਕਦੇ ਹੋ:
“ਮੈਂ ਅਗਲੇ ਸਾਲ ਦੇ ਸ਼ੁਰੂ ਵਿੱਚ ਕਾਰ ਖ਼ਰੀਦਣ ਲਈ ਪੈਸੇ ਜੋੜ ਰਿਹਾ ਹਾਂ.”
“ਮੇਰੇ ਮਾਪਿਆਂ ਨੇ ਮੈਨੂੰ ਜੋ ਕਰਜ਼ਾ ਦਿੱਤਾ ਸੀ, ਉਸ ਵਿੱਚੋਂ ਅਜੇ [amount] ਵਾਪਸ ਕਰਨੇ ਬਾਕੀ ਹਨ.”
“ਮੈਂ ਅਤੇ ਮੇਰਾ ਸਾਥੀ ਕਿਰਾਇਆ ਵੰਡ ਕੇ ਦਿੰਦੇ ਹਾਂ.”
“ਮੈਂ ਆਪਣੇ ਚਾਲੂ ਖਾਤੇ ਵਿੱਚ ਘੱਟੋ-ਘੱਟ [amount] ਰੱਖਣਾ ਚਾਹੁੰਦਾ ਹਾਂ.”
ChatGPT ਇਸ ਜਾਣਕਾਰੀ ਨੂੰ ਤੁਹਾਡੀਆਂ ਵਿੱਤੀ ਯਾਦਾਂ ਵਿੱਚ ਸੰਭਾਲ ਸਕਦਾ ਹੈ ਅਤੇ ਭਵਿੱਖ ਦੀਆਂ ਵਿੱਤੀ ਗੱਲਬਾਤਾਂ ਨੂੰ ਤੁਹਾਡੀ ਸਥਿਤੀ ਮੁਤਾਬਕ ਹੋਰ ਢੁਕਵਾਂ ਬਣਾਉਣ ਲਈ ਵਰਤ ਸਕਦਾ ਹੈ.
ਵਿੱਤੀ ਯਾਦਾਂ ChatGPT ਨੂੰ ਹਰ ਸਵਾਲ ਨੂੰ ਵੱਖਰੇ ਤੌਰ 'ਤੇ ਦੇਖਣ ਦੀ ਬਜਾਏ ਤੁਹਾਡੇ ਖਾਤਿਆਂ, ਟੀਚਿਆਂ ਅਤੇ ਸਾਂਝੀ ਕੀਤੀ ਜਾਣਕਾਰੀ ਨੂੰ ਆਪਸ ਵਿੱਚ ਜੋੜ ਕੇ ਸਮਝਣ ਵਿੱਚ ਮਦਦ ਕਰਦੀਆਂ ਹਨ. ਤੁਸੀਂ ਵਿੱਤ ਪੰਨੇ 'ਤੇ ਤਿੰਨ ਬਿੰਦੀਆਂ ਵਾਲੇ ਮੀਨੂ ਰਾਹੀਂ ਕਿਸੇ ਵੀ ਸਮੇਂ ਵਿੱਤੀ ਯਾਦਾਂ ਦੇਖ ਜਾਂ ਮਿਟਾ ਸਕਦੇ ਹੋ.
ਮੈਂ ਅਸਮਰਥਿਤ ਖਾਤੇ ਜਾਂ ਹੱਥੀਂ ਖਾਤੇ ਕਿਵੇਂ ਜੋੜ ਸਕਦਾ ਹਾਂ?
ਤੁਸੀਂ ਵਿੱਤੀ ਜਾਣਕਾਰੀ ਉਦੋਂ ਵੀ ਜੋੜ ਸਕਦੇ ਹੋ ਜਦੋਂ ਉਹ ਕਿਸੇ ਜੁੜੇ ਹੋਏ ਸਰੋਤ ਰਾਹੀਂ ਉਪਲਬਧ ਨਾ ਹੋਵੇ.
ਜੇ ਕਿਸੇ ਖਾਤੇ, ਸੰਪਤੀ, ਕਰਜ਼ੇ ਜਾਂ ਹੋਰ ਵਿੱਤੀ ਵੇਰਵੇ ਨੂੰ ਜੋੜਨ ਦੀ ਸਹੂਲਤ ਨਹੀਂ ਹੈ, ਤਾਂ ਵੀ ਤੁਸੀਂ ਵਿੱਤੀ ਗੱਲਬਾਤ ਵਿੱਚ ChatGPT ਨੂੰ ਉਸ ਬਾਰੇ ਦੱਸ ਸਕਦੇ ਹੋ. ਮਿਸਾਲ ਲਈ, ਤੁਸੀਂ ਕਿਸੇ ਜਾਇਦਾਦ, ਨਿੱਜੀ ਕਰਜ਼ੇ, ਬੱਚਤ ਦੇ ਟੀਚੇ, ਯੋਜਨਾਬੱਧ ਖ਼ਰੀਦ ਜਾਂ ਹੋਰ ਵਿੱਤੀ ਸਥਿਤੀ ਬਾਰੇ ਜਾਣਕਾਰੀ ਸਾਂਝੀ ਕਰ ਸਕਦੇ ਹੋ ਜਿਸ ਨੂੰ ਤੁਸੀਂ ਚਾਹੁੰਦੇ ਹੋ ਕਿ ChatGPT ਧਿਆਨ ਵਿੱਚ ਰੱਖੇ.
ChatGPT ਤੁਹਾਡੇ ਸਾਂਝੇ ਕੀਤੇ ਅਹਿਮ ਵੇਰਵਿਆਂ ਨੂੰ ਵਿੱਤੀ ਯਾਦਾਂ ਵਜੋਂ ਸੰਭਾਲ ਸਕਦਾ ਹੈ ਤਾਂ ਜੋ ਭਵਿੱਖ ਦੀਆਂ ਵਿੱਤੀ ਗੱਲਬਾਤਾਂ ਹੋਰ ਢੁਕਵੀਆਂ ਹੋਣ. ਤੁਸੀਂ ਵਿੱਤ ਦੇ ਮੁੱਖ ਪੰਨੇ ਤੋਂ ਵਿੱਤੀ ਯਾਦਾਂ ਦੇਖ ਜਾਂ ਮਿਟਾ ਸਕਦੇ ਹੋ.
ਆਪਣੇ ਡੇਟਾ ਅਤੇ ਪਰਦੇਦਾਰੀ ਦਾ ਪ੍ਰਬੰਧ ਕਰਨਾ
ਤੁਸੀਂ ਆਪਣੇ ਜੁੜੇ ਹੋਏ ਵਿੱਤੀ ਡੇਟਾ ਦਾ ਪ੍ਰਬੰਧ ਦੋ ਥਾਵਾਂ ਤੋਂ ਕਰ ਸਕਦੇ ਹੋ.
ਸੈਟਿੰਗਾਂ ਵਿੱਚ ਤੁਸੀਂ ਵਿੱਤ ਦਾ ਕਨੈਕਸ਼ਨ ਹਟਾ ਸਕਦੇ ਹੋ. ਵਿੱਤ ਦਾ ਕਨੈਕਸ਼ਨ ਹਟਾਉਣ ਨਾਲ ਤੁਹਾਡਾ ਜੁੜਿਆ ਹੋਇਆ ਵਿੱਤੀ ਡੇਟਾ ChatGPT ਤੋਂ ਹਟ ਜਾਂਦਾ ਹੈ. ਇੱਥੇ ਤੁਸੀਂ ਵਿੱਤੀ ਯਾਦਾਂ ਦਾ ਪ੍ਰਬੰਧ ਵੀ ਕਰ ਸਕਦੇ ਹੋ.
ਵਿੱਤ ਪੰਨੇ ਦੀ ਖਾਤੇ ਟੈਬ ਵਿੱਚ ਤੁਸੀਂ ਹਰੇਕ ਜੁੜੇ ਹੋਏ ਖਾਤੇ ਦਾ ਪ੍ਰਬੰਧ ਕਰ ਸਕਦੇ ਹੋ. ਤੁਸੀਂ ਹਰੇਕ ਖਾਤੇ ਦੇ ਕਨੈਕਸ਼ਨ ਦੀ ਸਥਿਤੀ ਦੇਖ ਸਕਦੇ ਹੋ, ਜਾਣ ਸਕਦੇ ਹੋ ਕਿ ਕਿਸੇ ਖਾਤੇ ਲਈ ਕੋਈ ਕਦਮ ਚੁੱਕਣ ਦੀ ਲੋੜ ਹੈ ਜਾਂ ਨਹੀਂ, ਖਾਤਾ ਹਟਾ ਸਕਦੇ ਹੋ ਅਤੇ ਲੋੜ ਪੈਣ 'ਤੇ ਕਨੈਕਸ਼ਨ ਦੀਆਂ ਗ਼ਲਤੀਆਂ ਠੀਕ ਕਰ ਸਕਦੇ ਹੋ.
ਤੁਹਾਡੇ ਮੌਜੂਦਾ ChatGPT ਡੇਟਾ ਕੰਟਰੋਲ ਵਿੱਤ 'ਤੇ ਵੀ ਲਾਗੂ ਹੁੰਦੇ ਹਨ. ਤੁਸੀਂ ChatGPT ਦੀਆਂ ਸੈਟਿੰਗਾਂ ਵਿੱਚ ਇਨ੍ਹਾਂ ਕੰਟਰੋਲਾਂ ਦੀ ਸਮੀਖਿਆ ਕਰ ਸਕਦੇ ਹੋ ਜਾਂ ਇਨ੍ਹਾਂ ਨੂੰ ਬਦਲ ਸਕਦੇ ਹੋ.
ਤੁਹਾਡੀ ਜਾਣਕਾਰੀ ਹਮੇਸ਼ਾ ਤੁਹਾਡੇ ਕੰਟਰੋਲ ਵਿੱਚ ਰਹਿੰਦੀ ਹੈ:
ਸਰੋਤਾਂ ਦੇ ਕਨੈਕਸ਼ਨ ਹਟਾਉਣਾ: ਬੈਂਕ ਖਾਤਿਆਂ ਅਤੇ ਕ੍ਰੈਡਿਟ ਰਿਪੋਰਟਾਂ ਦੇ ਕਨੈਕਸ਼ਨ ਵੱਖੋ-ਵੱਖਰੇ ਹਨ. ਕਨੈਕਸ਼ਨ ਹਟਾਉਣ ਦੇ ਵੇਰਵਿਆਂ ਲਈ ਹੇਠਾਂ Plaid ਅਤੇ Experian ਵਾਲੇ ਭਾਗ ਦੇਖੋ. ਕਿਸੇ ਸਰੋਤ ਦਾ ਕਨੈਕਸ਼ਨ ਹਟਾਉਣ ਨਾਲ ਤੁਹਾਡੀ ਗੱਲਬਾਤ ਦੇ ਇਤਿਹਾਸ ਵਿੱਚ ਪਹਿਲਾਂ ਤੋਂ ਮੌਜੂਦ ਜਾਣਕਾਰੀ ਨਹੀਂ ਮਿਟਦੀ; ਤੁਸੀਂ ਉਨ੍ਹਾਂ ਗੱਲਬਾਤਾਂ ਨੂੰ ਵੱਖਰੇ ਤੌਰ 'ਤੇ ਮਿਟਾ ਸਕਦੇ ਹੋ.
ਵਿੱਤੀ ਯਾਦਾਂ ਮਿਟਾਉਣਾ: ChatGPT ਵਿੱਤ ਵਿੱਚ ਤੁਹਾਡੇ ਸਾਂਝੇ ਕੀਤੇ ਅਹਿਮ ਵੇਰਵੇ ਯਾਦ ਰੱਖ ਸਕਦਾ ਹੈ, ਜਿਵੇਂ ਟੀਚੇ, ਦੇਣਦਾਰੀਆਂ ਜਾਂ ਤੁਹਾਡੇ ਪੈਸੇ ਨਾਲ ਜੁੜੀ ਹੋਰ ਜਾਣਕਾਰੀ, ਤਾਂ ਜੋ ChatGPT ਵਿੱਚ ਭਵਿੱਖ ਦੀਆਂ ਵਿੱਤੀ ਗੱਲਬਾਤਾਂ ਹੋਰ ਢੁਕਵੀਆਂ ਅਤੇ ਤੁਹਾਡੇ ਮੁਤਾਬਕ ਹੋਣ. ਇਹ ਵਿੱਤੀ ਯਾਦਾਂ ਵਜੋਂ ਸੰਭਾਲੇ ਜਾਂਦੇ ਹਨ. ਇਹ ਯਾਦਾਂ ਦੀ ਇੱਕ ਖ਼ਾਸ ਕਿਸਮ ਹੈ ਜੋ ਖ਼ਾਸ ਤੌਰ 'ਤੇ ਵਿੱਤੀ ਗੱਲਬਾਤਾਂ ਵਿੱਚ ਸੰਦਰਭ ਦੇਣ ਲਈ ਵਰਤੀ ਜਾਂਦੀ ਹੈ. ਤੁਸੀਂ ਵਿੱਤ ਦੇ ਮੁੱਖ ਪੰਨੇ ਤੋਂ ਕਿਸੇ ਵੀ ਸਮੇਂ ਇਨ੍ਹਾਂ ਨੂੰ ਦੇਖ ਜਾਂ ਮਿਟਾ ਸਕਦੇ ਹੋ.
ਅਸਥਾਈ ਚੈਟਾਂ: ਜਦੋਂ ਤੁਸੀਂ ਅਸਥਾਈ ਚੈਟਾਂ ਵਰਤਦੇ ਹੋ, ਤਾਂ ChatGPT ਨਾ ਤਾਂ ਤੁਹਾਡੇ ਜੁੜੇ ਹੋਏ ਵਿੱਤੀ ਖਾਤਿਆਂ ਤੱਕ ਪਹੁੰਚ ਕਰੇਗਾ ਅਤੇ ਨਾ ਹੀ ਜਵਾਬਾਂ ਨੂੰ ਤੁਹਾਡੇ ਮੁਤਾਬਕ ਬਣਾਉਣ ਲਈ ਯਾਦਾਂ ਵਰਤੇਗਾ ਜਾਂ ਬਣਾਏਗਾ. ਅਸਥਾਈ ਚੈਟਾਂ ਤੁਹਾਡੇ ਇਤਿਹਾਸ ਵਿੱਚ ਨਹੀਂ ਦਿਖਣਗੀਆਂ.
ਕੀ ਮੇਰਾ ਵਿੱਤੀ ਡੇਟਾ ਮਾਡਲ ਦੀ ਸਿਖਲਾਈ ਲਈ ਵਰਤਿਆ ਜਾਂਦਾ ਹੈ?
ਵਿੱਤ ਨਾਲ ਤੁਹਾਡੀਆਂ ਗੱਲਬਾਤਾਂ 'ਤੇ ਮਾਡਲ ਦੀ ਸਿਖਲਾਈ ਦੀਆਂ ਉਹੀ ਸੈਟਿੰਗਾਂ ਲਾਗੂ ਹੁੰਦੀਆਂ ਹਨ ਜੋ ਤੁਸੀਂ ਪੂਰੇ ChatGPT ਲਈ ਚੁਣਦੇ ਹੋ. ਤੁਸੀਂ ਸੈਟਿੰਗਾਂ > ਡੇਟਾ ਕੰਟਰੋਲ ਵਿੱਚ ਕਿਸੇ ਵੀ ਸਮੇਂ ਇਹ ਸੈਟਿੰਗ ਬਦਲ ਸਕਦੇ ਹੋ.
ਜਦੋਂ ਤੁਸੀਂ ਅਸਥਾਈ ਚੈਟਾਂ ਵਰਤਦੇ ਹੋ, ਤਾਂ ChatGPT ਉਨ੍ਹਾਂ ਚੈਟਾਂ ਨੂੰ ਯਾਦਾਂ ਬਣਾਉਣ ਜਾਂ ਅੱਪਡੇਟ ਕਰਨ ਲਈ ਨਹੀਂ ਵਰਤਦਾ.
Plaid ਰਾਹੀਂ ਵਿੱਤੀ ਖਾਤੇ
ਵਿੱਤੀ ਖਾਤੇ ਕਿਵੇਂ ਜੋੜਨੇ ਹਨ
ਸ਼ੁਰੂ ਕਰਨ ਲਈ, ChatGPT ਵਿੱਚ ਵਿੱਤ ਖੋਲ੍ਹੋ ਅਤੇ ਸ਼ੁਰੂ ਕਰੋ ਚੁਣੋ. ਤੁਸੀਂ ਕਿਸੇ ਵੀ ਗੱਲਬਾਤ ਵਿੱਚ @Finances, ਮੇਰੇ ਖਾਤੇ ਜੋੜੋ ਵੀ ਲਿਖ ਸਕਦੇ ਹੋ.
ChatGPT ਤੁਹਾਨੂੰ Plaid ਰਾਹੀਂ ਖਾਤੇ ਸੁਰੱਖਿਅਤ ਢੰਗ ਨਾਲ ਜੋੜਨ ਦੇ ਕਦਮ ਦੱਸੇਗਾ. ਤੁਹਾਡੇ ਵੱਲੋਂ ਪ੍ਰਮਾਣੀਕਰਨ ਪੂਰਾ ਕਰਨ ਤੋਂ ਬਾਅਦ, ChatGPT ਤੁਹਾਡੇ ਡੇਟਾ ਨੂੰ ਸਿੰਕ ਕਰਨਾ ਅਤੇ ਸ਼੍ਰੇਣੀਆਂ ਵਿੱਚ ਵੰਡਣਾ ਸ਼ੁਰੂ ਕਰਦਾ ਹੈ, ਜਿਸ ਵਿੱਚ ਕੁਝ ਮਿੰਟ ਲੱਗ ਸਕਦੇ ਹਨ.
ChatGPT ਵਿੱਚ ਵਿੱਤ ਖੋਲ੍ਹੋ ਅਤੇ ਸ਼ੁਰੂ ਕਰੋ ਚੁਣੋ.
Plaid ਨਾਲ ਜੋੜੋ ਚੁਣੋ.
ਸਾਈਨ ਇਨ ਕਰੋ ਅਤੇ ਉਹ ਵਿੱਤੀ ਸੰਸਥਾਵਾਂ ਚੁਣੋ ਜਿਨ੍ਹਾਂ ਨੂੰ ਤੁਸੀਂ ਜੋੜਨਾ ਚਾਹੁੰਦੇ ਹੋ.
ਵਿੱਤ ਵਰਤਣਾ ਸ਼ੁਰੂ ਕਰਨ ਲਈ ChatGPT 'ਤੇ ਵਾਪਸ ਜਾਓ.
ਜੋੜਨ ਤੋਂ ਬਾਅਦ, ChatGPT ਖਾਤੇ ਦੀ ਹਾਲੀਆ ਸਰਗਰਮੀ ਦਾ ਵਿਸ਼ਲੇਸ਼ਣ ਕਰ ਸਕਦਾ ਹੈ ਅਤੇ ਗੱਲਬਾਤ ਸ਼ੁਰੂ ਕਰਨ ਲਈ ਸੁਝਾਏ ਸਵਾਲ, ਵਿੱਤੀ ਵਿਜੈਟ ਅਤੇ ਲਾਭਦਾਇਕ ਜਾਣਕਾਰੀ ਦਾ ਸਾਰ ਦਿਖਾ ਸਕਦਾ ਹੈ.
ਸਿੰਕ ਅਤੇ ਕਨੈਕਸ਼ਨ ਦੀ ਸਥਿਤੀ
ਤੁਹਾਡੇ ਵੱਲੋਂ ਪ੍ਰਮਾਣੀਕਰਨ ਪੂਰਾ ਕਰਨ ਤੋਂ ਬਾਅਦ, ChatGPT ਤੁਹਾਡੇ ਡੇਟਾ ਨੂੰ ਸਿੰਕ ਕਰਨਾ ਅਤੇ ਸ਼੍ਰੇਣੀਆਂ ਵਿੱਚ ਵੰਡਣਾ ਸ਼ੁਰੂ ਕਰਦਾ ਹੈ. ਇਸ ਵਿੱਚ ਆਮ ਤੌਰ 'ਤੇ ਕੁਝ ਮਿੰਟ ਲੱਗਦੇ ਹਨ, ਪਰ ਬਹੁਤ ਘੱਟ ਮਾਮਲਿਆਂ ਵਿੱਚ ਕਈ ਘੰਟੇ ਵੀ ਲੱਗ ਸਕਦੇ ਹਨ.
ਜੁੜੇ ਹੋਏ ਖਾਤਿਆਂ ਦਾ ਡੇਟਾ ਆਪਣੇ-ਆਪ ਸਿੰਕ ਹੁੰਦਾ ਹੈ. ਵਿੱਤ ਪੰਨਾ ਦਿਖਾਉਂਦਾ ਹੈ ਕਿ ਤੁਹਾਡੇ ਖਾਤੇ ਆਖ਼ਰੀ ਵਾਰ ਕਦੋਂ ਸਿੰਕ ਹੋਏ ਸਨ ਅਤੇ ਕੀ ਕਿਸੇ ਖਾਤੇ ਲਈ ਕੋਈ ਕਦਮ ਚੁੱਕਣ ਦੀ ਲੋੜ ਹੈ.
ਜੇ ਕਿਸੇ ਕਨੈਕਸ਼ਨ ਲਈ ਕਾਰਵਾਈ ਦੀ ਲੋੜ ਹੈ, ਤਾਂ ਤੁਹਾਨੂੰ ਖਾਤਾ ਮੁੜ ਜੋੜਨਾ, ਆਪਣੀ ਵਿੱਤੀ ਸੰਸਥਾ ਕੋਲ ਕੋਈ ਕਾਰਵਾਈ ਪੂਰੀ ਕਰਨੀ ਜਾਂ ਆਪਣੀ ਲੌਗਇਨ ਜਾਣਕਾਰੀ ਅੱਪਡੇਟ ਕਰਨੀ ਪੈ ਸਕਦੀ ਹੈ.
ਮੇਰੇ ਜੁੜੇ ਹੋਏ ਵਿੱਤੀ ਖਾਤੇ ਵਿੱਚ ਪੁਰਾਣਾ ਡੇਟਾ ਸੀਮਿਤ ਕਿਉਂ ਹੈ ਜਾਂ ਬਿਲਕੁਲ ਕਿਉਂ ਨਹੀਂ ਹੈ?
ChatGPT ਸਿਰਫ਼ ਉਹ ਵਿੱਤੀ ਡੇਟਾ ਦਿਖਾ ਸਕਦਾ ਹੈ ਜੋ ਤੁਹਾਡੀ ਸੰਸਥਾ ਕਨੈਕਸ਼ਨ ਰਾਹੀਂ ਉਪਲਬਧ ਕਰਵਾਉਂਦੀ ਹੈ.
ਕੁਝ ਮਾਮਲਿਆਂ ਵਿੱਚ, ਵਿੱਤੀ ਸੰਸਥਾ ਸੀਮਿਤ ਪੁਰਾਣਾ ਡੇਟਾ ਦੇ ਸਕਦੀ ਹੈ.
ਮੇਰਾ ਖਾਤਾ ਜੁੜ ਗਿਆ ਪਰ ਮੇਰਾ ਸਾਰਾ ਡੇਟਾ ਕਿਉਂ ਨਹੀਂ ਦਿਖਿਆ?
ਕੁਝ ਖਾਤੇ ਸਫਲਤਾਪੂਰਵਕ ਜੁੜ ਸਕਦੇ ਹਨ, ਪਰ ਹੋ ਸਕਦਾ ਹੈ ਕਿ ਉਹ ChatGPT ਵਿੱਚ ਵਿੱਤ ਵੱਲੋਂ ਵਰਤੇ ਜਾਣ ਵਾਲੇ ਹਰ ਕਿਸਮ ਦੇ ਡੇਟਾ ਨੂੰ ਉਪਲਬਧ ਨਾ ਕਰਵਾਉਣ.
ਮਿਸਾਲ ਲਈ, ਕੋਈ ਸੰਸਥਾ ਖਾਤੇ ਦੀਆਂ ਬਕਾਇਆ ਰਕਮਾਂ ਸਾਂਝੀਆਂ ਕਰ ਸਕਦੀ ਹੈ, ਪਰ ਲੈਣ-ਦੇਣ ਦਾ ਪੂਰਾ ਇਤਿਹਾਸ, ਨਿਵੇਸ਼ਾਂ ਦਾ ਵੇਰਵਾ, ਕਰਜ਼ਿਆਂ ਦੇ ਵੇਰਵੇ, ਸਾਲਾਨਾ ਪ੍ਰਤੀਸ਼ਤ ਦਰਾਂ, ਅਦਾਇਗੀ ਦੀਆਂ ਆਖ਼ਰੀ ਤਾਰੀਖਾਂ ਜਾਂ ਹੋਰ ਵੇਰਵੇ ਨਹੀਂ.
ਜੇ ਕੋਈ ਜਾਣਕਾਰੀ ਅਧੂਰੀ ਲੱਗੇ, ਤਾਂ ਖਾਤੇ ਦੇ ਕਨੈਕਸ਼ਨ ਦੀ ਸਥਿਤੀ ਅਤੇ ਆਖ਼ਰੀ ਵਾਰ ਸਿੰਕ ਹੋਣ ਦਾ ਸਮਾਂ ਦੇਖੋ. ਤੁਸੀਂ ChatGPT ਨੂੰ ਇਹ ਵੀ ਪੁੱਛ ਸਕਦੇ ਹੋ ਕਿ ਉਸ ਨੇ ਜਵਾਬ ਵਿੱਚ ਕਿਹੜਾ ਡੇਟਾ ਵਰਤਿਆ, ਜਾਂ ਉਸ ਨੂੰ ਗੁੰਮ ਜਾਣਕਾਰੀ ਦੇ ਕੇ ਭਵਿੱਖ ਦੀਆਂ ਵਿੱਤੀ ਗੱਲਬਾਤਾਂ ਲਈ ਯਾਦ ਰੱਖਣ ਲਈ ਕਹਿ ਸਕਦੇ ਹੋ.
ਮੇਰੇ ਖ਼ਰਚਿਆਂ ਦਾ ਵੇਰਵਾ ਗ਼ਲਤ ਕਿਉਂ ਹੈ?
ਤੁਹਾਡੇ ਖ਼ਰਚਿਆਂ ਦਾ ਵੇਰਵਾ ਇਸ ਗੱਲ 'ਤੇ ਨਿਰਭਰ ਕਰਦਾ ਹੈ ਕਿ ChatGPT ਕਿਹੜੇ ਲੈਣ-ਦੇਣ ਦੇਖ ਸਕਦਾ ਹੈ ਅਤੇ ਉਨ੍ਹਾਂ ਨੂੰ ਕਿਹੜੀਆਂ ਸ਼੍ਰੇਣੀਆਂ ਵਿੱਚ ਰੱਖਿਆ ਗਿਆ ਹੈ.
ਜੇ ਪੈਸਿਆਂ ਦੇ ਤਬਾਦਲੇ, ਕ੍ਰੈਡਿਟ ਕਾਰਡ ਦੀਆਂ ਅਦਾਇਗੀਆਂ, ਖ਼ਰਚੇ ਦੀ ਭਰਪਾਈ ਜਾਂ ਦੋ ਵਾਰ ਦਰਜ ਹੋਏ ਲੰਬਿਤ ਲੈਣ-ਦੇਣ ਨੂੰ ਖ਼ਰਚਾ ਮੰਨ ਲਿਆ ਜਾਵੇ, ਤਾਂ ਖ਼ਰਚਿਆਂ ਦਾ ਵੇਰਵਾ ਗ਼ਲਤ ਲੱਗ ਸਕਦਾ ਹੈ. ਅਤੇ ਹਮੇਸ਼ਾ ਵਾਂਗ, ਮਸਨੂਈ ਬੁੱਧੀ ਤੋਂ ਗ਼ਲਤੀਆਂ ਹੋ ਸਕਦੀਆਂ ਹਨ.
ਤੁਸੀਂ ChatGPT ਨੂੰ ਇਹ ਦੱਸਣ ਲਈ ਕਹਿ ਸਕਦੇ ਹੋ ਕਿ ਕਿਹੜੇ ਲੈਣ-ਦੇਣ ਸ਼ਾਮਲ ਕੀਤੇ ਗਏ ਹਨ, ਗ਼ਲਤ ਲੱਗਣ ਵਾਲੇ ਲੈਣ-ਦੇਣ ਦੀ ਸ਼੍ਰੇਣੀ ਬਦਲਣ ਲਈ ਕਹਿ ਸਕਦੇ ਹੋ ਅਤੇ ਭਵਿੱਖ ਦੀਆਂ ਵਿੱਤੀ ਗੱਲਬਾਤਾਂ ਲਈ ਸੰਬੰਧਿਤ ਸੁਧਾਰ ਯਾਦ ਰੱਖਣ ਲਈ ਕਹਿ ਸਕਦੇ ਹੋ.
Plaid ਬਾਰੇ
ChatGPT ਵਿੱਚ ਵਿੱਤ, ਸਮਰਥਿਤ ਵਿੱਤੀ ਖਾਤਿਆਂ ਨੂੰ ਸੁਰੱਖਿਅਤ ਢੰਗ ਨਾਲ ਜੋੜਨ ਵਿੱਚ ਤੁਹਾਡੀ ਮਦਦ ਲਈ Plaid ਵਰਤਦਾ ਹੈ. Plaid ਤੁਹਾਨੂੰ ChatGPT ਸਮੇਤ ਆਪਣੀ ਚੋਣ ਦੀਆਂ ਐਪਾਂ ਅਤੇ ਸੇਵਾਵਾਂ ਨਾਲ ਖ਼ਾਸ ਵਿੱਤੀ ਡੇਟਾ ਸਾਂਝਾ ਕਰਨ ਦਿੰਦਾ ਹੈ, ਤਾਂ ਜੋ ਉਹ ਤੁਹਾਨੂੰ ਤੁਹਾਡੇ ਵੱਲੋਂ ਮੰਗੀਆਂ ਸਹੂਲਤਾਂ ਦੇ ਸਕਣ.
ਜਦੋਂ ਤੁਸੀਂ ਕੋਈ ਖਾਤਾ ਜੋੜਦੇ ਹੋ, ਤਾਂ Plaid, ChatGPT ਅਤੇ ਤੁਹਾਡੀ ਵਿੱਤੀ ਸੰਸਥਾ ਵਿਚਕਾਰ ਇੱਕ ਸੁਰੱਖਿਅਤ ਕਨੈਕਸ਼ਨ ਸਥਾਪਿਤ ਕਰਨ ਵਿੱਚ ਮਦਦ ਕਰਦਾ ਹੈ. ਇਸ ਨਾਲ ChatGPT ਤੁਹਾਡੀ ਜੁੜੀ ਹੋਈ ਵਿੱਤੀ ਜਾਣਕਾਰੀ ਨੂੰ ਵਰਤ ਕੇ ਖ਼ਰਚਿਆਂ, ਬਿੱਲਾਂ, ਗਾਹਕੀਆਂ, ਬੱਚਤ, ਸ਼ੁੱਧ ਸੰਪਤੀ, ਨਿਵੇਸ਼ਾਂ ਅਤੇ ਹੋਰ ਨਿੱਜੀ ਵਿੱਤੀ ਸਵਾਲਾਂ ਵਿੱਚ ਮਦਦ ਕਰ ਸਕਦਾ ਹੈ.
ਕਿਹੜੇ ਖਾਤੇ ਜੋੜਨੇ ਹਨ, ਇਹ ਤੁਸੀਂ ਚੁਣਦੇ ਹੋ.
Plaid ਕੀ ਹੈ?
Plaid ਲੋਕਾਂ ਨੂੰ ਉਨ੍ਹਾਂ ਦੀ ਚੋਣ ਦੀਆਂ 9,000 ਤੋਂ ਵੱਧ ਐਪਾਂ ਅਤੇ ਸੇਵਾਵਾਂ ਨਾਲ ਵਿੱਤੀ ਡੇਟਾ ਸੁਰੱਖਿਅਤ ਢੰਗ ਨਾਲ ਸਾਂਝਾ ਕਰਨ ਵਿੱਚ ਮਦਦ ਕਰਦਾ ਹੈ. Plaid ਦਾ ਉਦੇਸ਼ ਲੋਕਾਂ ਨੂੰ ਆਪਣੇ ਵਿੱਤੀ ਡੇਟਾ ਤੱਕ ਪਹੁੰਚ ਅਤੇ ਉਸ 'ਤੇ ਕੰਟਰੋਲ ਦੇ ਕੇ ਵਿੱਤੀ ਆਜ਼ਾਦੀ ਦਾ ਰਾਹ ਖੋਲ੍ਹਣਾ ਹੈ. ਤੁਸੀਂ ਇਸ ਬਾਰੇ ਹੋਰ ਜਾਣ ਸਕਦੇ ਹੋ ਕਿ Plaid ਦੀ ਭੂਮਿਕਾ ਕਿਉਂ ਹੈ ਅਤੇ Plaid ਕਿਵੇਂ ਕੰਮ ਕਰਦਾ ਹੈ.
ChatGPT ਨਿੱਜੀ ਵਿੱਤ ਵਿੱਚ, Plaid ਤੁਹਾਡੇ ਵਿੱਤੀ ਖਾਤਿਆਂ ਨੂੰ ChatGPT ਨਾਲ ਜੋੜਨ ਵਿੱਚ ਮਦਦ ਕਰਦਾ ਹੈ, ਤਾਂ ਜੋ ChatGPT ਤੁਹਾਡੇ ਜੁੜੇ ਹੋਏ ਖਾਤਿਆਂ ਦੀ ਜਾਣਕਾਰੀ ਵਰਤ ਕੇ ਤੁਹਾਡੇ ਮੁਤਾਬਕ ਵਿੱਤੀ ਸਹੂਲਤਾਂ ਦੇ ਸਕੇ.
Plaid ਕਿਵੇਂ ਕੰਮ ਕਰਦਾ ਹੈ?
ਬਹੁਤ ਸਾਰੀਆਂ ਵਿੱਤੀ ਐਪਾਂ ਅਤੇ ਸੇਵਾਵਾਂ ਨੂੰ ਵਰਤੋਂਕਾਰਾਂ ਵੱਲੋਂ ਮੰਗੀਆਂ ਸਹੂਲਤਾਂ ਦੇਣ ਲਈ ਵਿੱਤੀ ਡੇਟਾ ਤੱਕ ਪਹੁੰਚ ਦੀ ਲੋੜ ਹੁੰਦੀ ਹੈ. ਮਿਸਾਲ ਲਈ, ਬਜਟ ਬਣਾਉਣ ਵਾਲੀ ਐਪ ਤੁਹਾਡੇ ਬੈਂਕ ਖਾਤੇ ਨਾਲ ਜੁੜਨ ਲਈ ਕਹਿ ਸਕਦੀ ਹੈ ਤਾਂ ਜੋ ਉਹ ਖ਼ਰਚਿਆਂ 'ਤੇ ਨਜ਼ਰ ਰੱਖਣ ਵਿੱਚ ਮਦਦ ਕਰ ਸਕੇ.
Plaid ਇਨ੍ਹਾਂ ਕਨੈਕਸ਼ਨਾਂ ਨੂੰ ਸੰਭਵ ਬਣਾਉਣ ਵਿੱਚ ਮਦਦ ਕਰਦਾ ਹੈ. ਜਦੋਂ ਤੁਸੀਂ ਆਪਣਾ ਬੈਂਕ ਖਾਤਾ ਜੋੜਨ ਦੀ ਚੋਣ ਕਰਦੇ ਹੋ, ਤਾਂ Plaid ਤੁਹਾਡੇ ਵੱਲੋਂ ਵਰਤੀ ਜਾ ਰਹੀ ਐਪ ਜਾਂ ਸੇਵਾ ਨੂੰ ਲੋੜੀਂਦਾ ਵਿੱਤੀ ਡੇਟਾ ਸੁਰੱਖਿਅਤ ਢੰਗ ਨਾਲ ਸਾਂਝਾ ਕਰਦਾ ਹੈ ਅਤੇ ਇੱਕ ਸੁਰੱਖਿਅਤ ਕਨੈਕਸ਼ਨ ਸਥਾਪਿਤ ਕਰਦਾ ਹੈ ਜੋ ਤੁਹਾਡੇ ਕੰਟਰੋਲ ਵਿੱਚ ਹੁੰਦਾ ਹੈ.
Plaid 12,000 ਤੋਂ ਵੱਧ ਵਿੱਤੀ ਸੰਸਥਾਵਾਂ ਨਾਲ ਕਨੈਕਸ਼ਨ ਬਣਾਉਂਦਾ ਅਤੇ ਬਣਾਈ ਰੱਖਦਾ ਹੈ. ਇਸ ਨਾਲ ਐਪਾਂ ਅਤੇ ਸੇਵਾਵਾਂ ਹਰ ਵਿੱਤੀ ਸੰਸਥਾ ਨਾਲ ਵੱਖਰਾ ਤਕਨੀਕੀ ਏਕੀਕਰਨ ਕੀਤੇ ਬਿਨਾਂ ਖਾਤਿਆਂ ਨੂੰ ਸੁਰੱਖਿਅਤ ਢੰਗ ਨਾਲ ਜੋੜ ਸਕਦੀਆਂ ਹਨ.
ਕੀ Plaid ਸੁਰੱਖਿਅਤ ਹੈ?
ਤੁਹਾਡੀ ਵਿੱਤੀ ਜਾਣਕਾਰੀ ਨਿੱਜੀ ਹੈ ਅਤੇ ਸੁਰੱਖਿਆ Plaid ਦੀਆਂ ਮੁੱਖ ਤਰਜੀਹਾਂ ਵਿੱਚੋਂ ਇੱਕ ਹੈ.
Plaid ਦਾ ਜਾਣਕਾਰੀ ਸੁਰੱਖਿਆ ਪ੍ਰੋਗਰਾਮ ਉਦਯੋਗ ਦੇ ਮਿਆਰਾਂ ਨੂੰ ਪੂਰਾ ਕਰਨ ਜਾਂ ਉਨ੍ਹਾਂ ਤੋਂ ਅੱਗੇ ਜਾਣ ਲਈ ਬਣਾਇਆ ਗਿਆ ਹੈ. ਨਿੱਜੀ ਜਾਣਕਾਰੀ ਨੂੰ ਸੁਰੱਖਿਅਤ ਰੱਖਣ ਵਿੱਚ ਮਦਦ ਲਈ Plaid ਕਈ ਸੁਰੱਖਿਆ ਉਪਾਅ ਵਰਤਦਾ ਹੈ. Plaid ISO 27001 ਅਤੇ ISO 27701 ਸਮੇਤ ਅੰਤਰਰਾਸ਼ਟਰੀ ਪੱਧਰ 'ਤੇ ਮਾਨਤਾ ਪ੍ਰਾਪਤ ਸੁਰੱਖਿਆ ਮਿਆਰਾਂ ਲਈ ਪ੍ਰਮਾਣਿਤ ਹੈ ਅਤੇ SSAE18 SOC 2 ਦੀ ਪਾਲਣਾ ਕਰਦਾ ਹੈ.
ਕੀ ਮੈਂ ਐਪ ਦੀ ਪਹੁੰਚ ਹਟਾ ਸਕਦਾ ਹਾਂ ਜਾਂ Plaid ਤੋਂ ਆਪਣਾ ਡੇਟਾ ਮਿਟਾ ਸਕਦਾ ਹਾਂ?
ਹਾਂ. ਜੇ ਤੁਸੀਂ Plaid ਰਾਹੀਂ ਆਪਣੇ ਖਾਤੇ ChatGPT ਵਿੱਚ ਵਿੱਤ ਨਾਲ ਜੋੜੇ ਹਨ, ਤਾਂ ਤੁਸੀਂ ChatGPT ਤੋਂ ਉਹ ਕਨੈਕਸ਼ਨ ਹਟਾ ਸਕਦੇ ਹੋ. ਤੁਸੀਂ ਸੈਟਿੰਗਾਂ > ਐਪਾਂ > ਵਿੱਤ ਵਿੱਚ ਜਾਂ ਵਿੱਤ ਦੇ ਮੁੱਖ ਪੰਨੇ ਤੋਂ Plaid ਖਾਤਿਆਂ ਦੇ ਕਨੈਕਸ਼ਨ ਹਟਾ ਸਕਦੇ ਹੋ. ਜਦੋਂ ਤੁਸੀਂ ਵਿੱਤ ਦਾ ਕਨੈਕਸ਼ਨ ਹਟਾਉਂਦੇ ਹੋ ਜਾਂ ਕੋਈ ਜੁੜਿਆ ਹੋਇਆ ਖਾਤਾ ਹਟਾਉਂਦੇ ਹੋ, ਤਾਂ ਸਿੰਕ ਹੋਇਆ ਖਾਤੇ ਦਾ ਡੇਟਾ 30 ਦਿਨਾਂ ਦੇ ਅੰਦਰ OpenAI ਦੇ ਸਿਸਟਮਾਂ ਤੋਂ ਮਿਟਾ ਦਿੱਤਾ ਜਾਂਦਾ ਹੈ. ਉਸ ChatGPT ਕਨੈਕਸ਼ਨ ਨਾਲ ਜੁੜਿਆ ਡੇਟਾ ਵੀ Plaid ਦੀਆਂ ਨੀਤੀਆਂ ਅਨੁਸਾਰ 30 ਦਿਨਾਂ ਦੇ ਅੰਦਰ Plaid ਤੋਂ ਮਿਟਾ ਦਿੱਤਾ ਜਾਂਦਾ ਹੈ.
ਤੁਹਾਨੂੰ ਸਿੱਧੇ Plaid ਕੋਲ ਆਪਣੇ ਡੇਟਾ ਦਾ ਪ੍ਰਬੰਧ ਸਿਰਫ਼ ਤਾਂ ਹੀ ਕਰਨ ਦੀ ਲੋੜ ਹੈ ਜੇ ਤੁਸੀਂ ChatGPT ਤੋਂ ਇਲਾਵਾ ਹੋਰ ਐਪਾਂ ਜਾਂ ਸੇਵਾਵਾਂ ਨਾਲ ਵੀ ਆਪਣੇ ਵਿੱਤੀ ਖਾਤੇ ਜੋੜਨ ਲਈ Plaid ਵਰਤਿਆ ਹੈ. ChatGPT ਵਿੱਚ ਵਿੱਤ ਦਾ ਕਨੈਕਸ਼ਨ ਹਟਾਉਣ ਨਾਲ ChatGPT ਵਾਲਾ ਕਨੈਕਸ਼ਨ ਹਟ ਜਾਂਦਾ ਹੈ, ਪਰ ਤੁਹਾਡੇ ਵੱਲੋਂ ਵੱਖਰੇ ਤੌਰ 'ਤੇ ਮਨਜ਼ੂਰ ਕੀਤੇ ਹੋਰ Plaid ਕਨੈਕਸ਼ਨਾਂ 'ਤੇ ਕੋਈ ਅਸਰ ਨਹੀਂ ਪੈਂਦਾ. ਉਨ੍ਹਾਂ ਹੋਰ ਕਨੈਕਸ਼ਨਾਂ ਦੀ ਸਮੀਖਿਆ ਕਰਨ ਜਾਂ ਉਨ੍ਹਾਂ ਨੂੰ ਮਿਟਾਉਣ ਲਈ, ਤੁਸੀਂ Plaid ਪੋਰਟਲ ਜਾਂ Plaid ਦਾ ਪਰਦੇਦਾਰੀ ਬੇਨਤੀ ਫਾਰਮ ਵਰਤ ਸਕਦੇ ਹੋ.
ਹੋਰ ਜਾਣਕਾਰੀ ਲਈ, ਕਿਰਪਾ ਕਰਕੇ Plaid ਦਾ ਹੈਲਪ ਸੈਂਟਰ ਦੇਖੋ. ਬੇਨਤੀ ਪੂਰੀ ਕਰਨ ਲਈ Plaid ਨੂੰ ਤੁਹਾਡੀ ਪਛਾਣ ਦੀ ਪੁਸ਼ਟੀ ਵਾਸਤੇ ਅਜੇ ਵੀ ਜਾਣਕਾਰੀ ਦੀ ਲੋੜ ਹੋ ਸਕਦੀ ਹੈ. ਇਹ ਕਾਨੂੰਨ ਵੱਲੋਂ ਮਨਜ਼ੂਰ ਜਾਂ ਲਾਜ਼ਮੀ ਹੋਣ 'ਤੇ ਕੁਝ ਜਾਣਕਾਰੀ ਰੱਖ ਵੀ ਸਕਦਾ ਹੈ. ਹੋਰ ਜਾਣਨ ਲਈ ਤੁਸੀਂ ਉਨ੍ਹਾਂ ਦੀ ਅੰਤਿਮ ਵਰਤੋਂਕਾਰ ਪ੍ਰਾਈਵੇਸੀ ਪਾਲਿਸੀ ਵਿੱਚ Plaid ਦੇ ਡੇਟਾ ਸੰਭਾਲ ਕੇ ਰੱਖਣ ਦੇ ਤਰੀਕਿਆਂ ਵਾਲਾ ਭਾਗ ਦੇਖ ਸਕਦੇ ਹੋ.
ਮੈਨੂੰ ਆਪਣਾ ਬੈਂਕ, ਕ੍ਰੈਡਿਟ ਕਾਰਡ ਜਾਰੀਕਰਤਾ, ਦਲਾਲੀ ਫ਼ਰਮ ਜਾਂ ਹੋਰ ਵਿੱਤੀ ਸੰਸਥਾ ਕਿਉਂ ਨਹੀਂ ਮਿਲ ਰਹੀ?
ਹੋ ਸਕਦਾ ਹੈ ਕਿ ਤੁਹਾਡਾ ਬੈਂਕ, ਕ੍ਰੈਡਿਟ ਕਾਰਡ ਜਾਰੀਕਰਤਾ, ਦਲਾਲੀ ਫ਼ਰਮ ਜਾਂ ਹੋਰ ਵਿੱਤੀ ਸੰਸਥਾ ਇਸ ਕਨੈਕਸ਼ਨ ਲਈ ਉਪਲਬਧ ਨਾ ਹੋਵੇ. ਇਹ ਉਦੋਂ ਹੋ ਸਕਦਾ ਹੈ ਜੇ:
Plaid ਅਜੇ ਉਸ ਸੰਸਥਾ ਨਾਲ ਜੁੜਨ ਦੀ ਸਹੂਲਤ ਨਹੀਂ ਦਿੰਦਾ
Plaid ਉਸ ਸੰਸਥਾ ਨਾਲ ਜੁੜ ਸਕਦਾ ਹੈ, ਪਰ ਸੰਸਥਾ ChatGPT ਵਿੱਚ ਵਿੱਤ ਲਈ ਲੋੜੀਂਦਾ ਡੇਟਾ ਨਹੀਂ ਦਿੰਦੀ
Plaid ਪਹਿਲਾਂ ਉਸ ਸੰਸਥਾ ਨਾਲ ਜੁੜ ਸਕਦਾ ਸੀ, ਪਰ ਇਸ ਵੇਲੇ ਭਰੋਸੇਯੋਗ ਢੰਗ ਨਾਲ ਨਹੀਂ ਜੁੜ ਸਕਦਾ
ਜੇ ਤੁਹਾਨੂੰ ਆਪਣੀ ਸੰਸਥਾ ਨਹੀਂ ਮਿਲਦੀ, ਤਾਂ ਦੇਖੋ ਕਿ ਕੀ ਉਹ ਕਿਸੇ ਹੋਰ ਨਾਮ ਹੇਠ ਦਿਖਦੀ ਹੈ. ਜੇ ਫਿਰ ਵੀ ਉਹ ਨਹੀਂ ਦਿਖਦੀ, ਤਾਂ ਹੋ ਸਕਦਾ ਹੈ ਕਿ ਉਹ ਇਸ ਕਨੈਕਸ਼ਨ ਲਈ ਉਪਲਬਧ ਨਾ ਹੋਵੇ.
ਮੈਂ ਆਪਣਾ ਖਾਤਾ ਜੋੜ ਜਾਂ ਤਾਜ਼ਾ ਕਿਉਂ ਨਹੀਂ ਕਰ ਸਕਦਾ?
ਕਨੈਕਸ਼ਨ ਕੁਝ ਕਾਰਨਾਂ ਕਰਕੇ ਅਸਫਲ ਹੋ ਸਕਦਾ ਹੈ. ਹੋ ਸਕਦਾ ਹੈ ਕਿ ਤੁਹਾਡੀ ਲੌਗਇਨ ਜਾਣਕਾਰੀ ਗ਼ਲਤ ਹੋਵੇ, ਤੁਹਾਡਾ ਖਾਤਾ ਲੌਕ ਹੋਵੇ, ਤੁਹਾਡੀ ਵਿੱਤੀ ਸੰਸਥਾ ਅਸਥਾਈ ਤੌਰ 'ਤੇ ਉਪਲਬਧ ਨਾ ਹੋਵੇ ਜਾਂ ਡੇਟਾ ਸਾਂਝਾ ਕਰਨ ਤੋਂ ਪਹਿਲਾਂ ਸੰਸਥਾ ਤੁਹਾਨੂੰ ਕੋਈ ਸੁਰੱਖਿਆ ਕਦਮ ਪੂਰਾ ਕਰਨ ਲਈ ਕਹੇ.
ਪਹਿਲਾਂ ਆਪਣੀ ਵਿੱਤੀ ਸੰਸਥਾ ਵਿੱਚ ਸਿੱਧਾ ਸਾਈਨ ਇਨ ਕਰੋ ਤਾਂ ਜੋ ਇਹ ਯਕੀਨੀ ਹੋ ਸਕੇ ਕਿ ਤੁਹਾਡਾ ਲੌਗਇਨ ਕੰਮ ਕਰਦਾ ਹੈ ਅਤੇ ਉੱਥੇ ਦਿਖਣ ਵਾਲੀਆਂ ਹਦਾਇਤਾਂ ਪੂਰੀਆਂ ਕੀਤੀਆਂ ਜਾ ਸਕਣ. ਫਿਰ ChatGPT ਵਿੱਚ ਵਿੱਤ 'ਤੇ ਵਾਪਸ ਜਾਓ ਅਤੇ ਖਾਤਾ ਮੁੜ ਜੋੜਨ ਜਾਂ ਤਾਜ਼ਾ ਕਰਨ ਦੀ ਕੋਸ਼ਿਸ਼ ਕਰੋ.
ਮੈਂ ਅਵੈਧ ਲੌਗਇਨ ਜਾਣਕਾਰੀ ਜਾਂ ਵਰਤੋਂਕਾਰ ਨਾਮ ਦੀ ਗ਼ਲਤੀ ਕਿਵੇਂ ਠੀਕ ਕਰਾਂ?
ਪਹਿਲਾਂ ਆਪਣੀ ਵਿੱਤੀ ਸੰਸਥਾ ਵਿੱਚ ਸਿੱਧਾ ਸਾਈਨ ਇਨ ਕਰਕੇ ਪੁਸ਼ਟੀ ਕਰੋ ਕਿ ਤੁਹਾਡਾ ਵਰਤੋਂਕਾਰ ਨਾਮ ਅਤੇ ਪਾਸਵਰਡ ਕੰਮ ਕਰਦੇ ਹਨ. ਫਿਰ ਆਪਣੇ-ਆਪ ਜਾਣਕਾਰੀ ਭਰਨ ਦੀ ਸਹੂਲਤ ਜਾਂ ਪਾਸਵਰਡ ਪ੍ਰਬੰਧਕ ਵਰਤੇ ਬਿਨਾਂ Plaid ਰਾਹੀਂ ਮੁੜ ਜੋੜਨ ਦੀ ਕੋਸ਼ਿਸ਼ ਕਰੋ.
ਵੱਡੇ-ਛੋਟੇ ਅੱਖਰਾਂ ਦੀਆਂ ਗ਼ਲਤੀਆਂ, ਟਾਈਪ ਕਰਨ ਦੀਆਂ ਗ਼ਲਤੀਆਂ ਅਤੇ ਵਾਧੂ ਖ਼ਾਲੀ ਥਾਵਾਂ ਦੀ ਜਾਂਚ ਕਰੋ. Plaid ਵਰਤੋਂਕਾਰ ਨਾਮ ਅਤੇ ਪਾਸਵਰਡ ਵਿੱਚ ਵੱਡੇ ਅਤੇ ਛੋਟੇ ਅੱਖਰਾਂ ਨੂੰ ਵੱਖਰਾ ਮੰਨ ਸਕਦਾ ਹੈ, ਭਾਵੇਂ ਤੁਹਾਡੀ ਵਿੱਤੀ ਸੰਸਥਾ ਅਜਿਹਾ ਨਾ ਕਰਦੀ ਹੋਵੇ.
ਜੇ ਤੁਸੀਂ ਖਾਤਾ ਪਹਿਲੀ ਵਾਰ ਜੋੜਨ ਤੋਂ ਬਾਅਦ ਆਪਣਾ ਵਰਤੋਂਕਾਰ ਨਾਮ ਬਦਲਿਆ ਹੈ, ਤਾਂ ਮੌਜੂਦਾ ਕਨੈਕਸ਼ਨ ਹਟਾਓ ਅਤੇ ਖਾਤਾ ਮੁੜ ਜੋੜੋ.
“ਕਾਰਵਾਈ ਲੋੜੀਂਦੀ ਹੈ” ਦਾ ਕੀ ਮਤਲਬ ਹੈ?
“ਕਾਰਵਾਈ ਲੋੜੀਂਦੀ ਹੈ” ਦਾ ਮਤਲਬ ਹੈ ਕਿ ਖਾਤਾ ਜੋੜਨ ਜਾਂ ਤਾਜ਼ਾ ਕਰਨ ਤੋਂ ਪਹਿਲਾਂ ਤੁਹਾਡੀ ਵਿੱਤੀ ਸੰਸਥਾ ਤੁਹਾਨੂੰ ਕੋਈ ਕਦਮ ਪੂਰਾ ਕਰਨ ਲਈ ਕਹਿ ਰਹੀ ਹੈ.
ਇਸ ਵਿੱਚ ਬਹੁ-ਕਾਰਕ ਪ੍ਰਮਾਣੀਕਰਨ ਕੋਡ ਦਰਜ ਕਰਨਾ, ਸੁਰੱਖਿਆ ਸਵਾਲ ਦਾ ਜਵਾਬ ਦੇਣਾ, ਅੱਪਡੇਟ ਕੀਤੀਆਂ ਸ਼ਰਤਾਂ ਸਵੀਕਾਰ ਕਰਨਾ, ਪਾਸਵਰਡ ਮੁੜ ਸੈੱਟ ਕਰਨਾ, ਸੰਪਰਕ ਜਾਣਕਾਰੀ ਅੱਪਡੇਟ ਕਰਨਾ, ਖਾਤੇ ਦਾ ਲੌਕ ਖੋਲ੍ਹਣਾ ਜਾਂ ਤੀਜੀਆਂ ਧਿਰਾਂ ਨਾਲ ਡੇਟਾ ਸਾਂਝਾ ਕਰਨ ਦੀ ਇਜਾਜ਼ਤ ਦੇਣਾ ਸ਼ਾਮਲ ਹੋ ਸਕਦਾ ਹੈ.
ਆਪਣੀ ਵਿੱਤੀ ਸੰਸਥਾ ਵਿੱਚ ਸਿੱਧਾ ਸਾਈਨ ਇਨ ਕਰੋ, ਲੋੜੀਂਦੇ ਕਦਮ ਪੂਰੇ ਕਰੋ, ਫਿਰ ChatGPT 'ਤੇ ਵਾਪਸ ਆ ਕੇ ਦੁਬਾਰਾ ਕੋਸ਼ਿਸ਼ ਕਰੋ.
ਮੇਰੀ ਵਿੱਤੀ ਸੰਸਥਾ ਅਸਥਾਈ ਤੌਰ 'ਤੇ ਉਪਲਬਧ ਕਿਉਂ ਨਹੀਂ ਹੈ?
ਕਈ ਵਾਰ ਵਿੱਤੀ ਸੰਸਥਾ ਦੀ ਸੇਵਾ ਬੰਦ ਹੋ ਸਕਦੀ ਹੈ, ਜਵਾਬ ਦੇਣ ਵਿੱਚ ਦੇਰ ਕਰ ਸਕਦੀ ਹੈ ਜਾਂ ਅਸਥਾਈ ਤੌਰ 'ਤੇ ਡੇਟਾ ਸਾਂਝਾ ਕਰਨ ਦੇ ਯੋਗ ਨਹੀਂ ਹੁੰਦੀ. ਇਸ ਦਾ ਹਮੇਸ਼ਾ ਇਹ ਮਤਲਬ ਨਹੀਂ ਹੁੰਦਾ ਕਿ ਤੁਹਾਡੀ ਲੌਗਇਨ ਜਾਣਕਾਰੀ ਗ਼ਲਤ ਹੈ.
ਜੇ ਅਜਿਹਾ ਹੁੰਦਾ ਹੈ, ਤਾਂ ਉਡੀਕ ਕਰੋ ਅਤੇ ਬਾਅਦ ਵਿੱਚ ਦੁਬਾਰਾ ਕੋਸ਼ਿਸ਼ ਕਰੋ. ਜੇ ਤੁਹਾਡਾ ਖਾਤਾ ਪਹਿਲਾਂ ਹੀ ਜੁੜਿਆ ਹੋਇਆ ਸੀ, ਤਾਂ ਕਨੈਕਸ਼ਨ ਮੁੜ ਤਾਜ਼ਾ ਹੋਣ ਤੱਕ ਵਿੱਤ ਤੁਹਾਡੇ ਆਖ਼ਰੀ ਸਫਲ ਸਿੰਕ ਦਾ ਨਵੀਨਤਮ ਡੇਟਾ ਦਿਖਾਉਂਦਾ ਰਹਿ ਸਕਦਾ ਹੈ.
ਮੈਂ Plaid ਸਹਾਇਤਾ ਨਾਲ ਕਿਵੇਂ ਸੰਪਰਕ ਕਰ ਸਕਦਾ ਹਾਂ?
ਜੇ ਤੁਹਾਨੂੰ Plaid ਬਾਰੇ ਮਦਦ ਚਾਹੀਦੀ ਹੈ, ਤਾਂ my.plaid.com/help 'ਤੇ Plaid ਦੇ ਹੈਲਪ ਸੈਂਟਰ ਵਿੱਚ ਜਾਓ. ਉੱਥੇ ਸਹਾਇਤਾ ਪੰਨੇ ਦੇ ਹੇਠਲੇ ਸੱਜੇ ਪਾਸੇ ਚੈਟ ਦੇ ਚਿੰਨ੍ਹ ਰਾਹੀਂ ਤੁਸੀਂ Plaid ਦੀ ਸਹਾਇਤਾ ਟੀਮ ਨਾਲ ਸੰਪਰਕ ਕਰ ਸਕਦੇ ਹੋ.
Experian® ਰਾਹੀਂ ਕ੍ਰੈਡਿਟ ਰਿਪੋਰਟਾਂ ਅਤੇ ਸਕੋਰ
ਆਪਣੀ ਕ੍ਰੈਡਿਟ ਰਿਪੋਰਟ ਕਿਵੇਂ ਜੋੜਨੀ ਹੈ
ਤੁਸੀਂ ਆਪਣੇ ਬੈਂਕ ਖਾਤਿਆਂ ਤੋਂ ਵੱਖਰੇ ਤੌਰ 'ਤੇ ChatGPT ਵਿੱਚ ਆਪਣੇ ਕ੍ਰੈਡਿਟ ਸਕੋਰ 'ਤੇ ਨਜ਼ਰ ਰੱਖ ਸਕਦੇ ਹੋ. Plaid ਰਾਹੀਂ ਖਾਤੇ ਜੋੜਨ ਨਾਲ ਤੁਹਾਡੀ ਕ੍ਰੈਡਿਟ ਜਾਣਕਾਰੀ ਨਹੀਂ ਜੁੜਦੀ ਅਤੇ ਕ੍ਰੈਡਿਟ ਸਕੋਰ ਦੀ ਸਹੂਲਤ ਵਰਤਣ ਲਈ ਤੁਹਾਨੂੰ ਬੈਂਕ ਖਾਤਾ ਜੋੜਨ ਦੀ ਲੋੜ ਨਹੀਂ ਹੈ.
ChatGPT ਨੂੰ ਆਪਣਾ ਕ੍ਰੈਡਿਟ ਸਕੋਰ ਜੋੜਨ ਲਈ ਕਹੋ ਜਾਂ ਵਿੱਤ ਦੇ ਮੁੱਖ ਪੰਨੇ 'ਤੇ ਆਪਣਾ ਕ੍ਰੈਡਿਟ ਸਕੋਰ ਜੋੜਨ ਦਾ ਵਿਕਲਪ ਚੁਣੋ.
ਆਪਣੀ ਪਛਾਣ ਦੀ ਪੁਸ਼ਟੀ ਕਰਨ ਅਤੇ ਆਪਣੇ ਕ੍ਰੈਡਿਟ ਡੇਟਾ ਤੱਕ ਪਹੁੰਚ ਦੀ ਇਜਾਜ਼ਤ ਦੇਣ ਲਈ Experian ਦਾ ਫਾਰਮ ਪੂਰਾ ਭਰੋ. ਧਿਆਨ ਰੱਖੋ ਕਿ ਨਿੱਜੀ ਜਾਣਕਾਰੀ ਅਤੇ ਪੁਸ਼ਟੀਕਰਨ ਕੋਡ Experian ਦੇ ਫਾਰਮ ਵਿੱਚ ਹੀ ਦਰਜ ਕਰੋ, ChatGPT ਨਾਲ ਆਪਣੀ ਗੱਲਬਾਤ ਵਿੱਚ ਨਹੀਂ.
ਆਪਣਾ ਸਕੋਰ ਦੇਖਣ ਅਤੇ ਆਪਣੀ ਕ੍ਰੈਡਿਟ ਸਥਿਤੀ ਬਾਰੇ ਸਵਾਲ ਪੁੱਛਣ ਲਈ ChatGPT 'ਤੇ ਵਾਪਸ ਜਾਓ.
OpenAI ਦਾ ਸੇਵਾ ਪ੍ਰਦਾਤਾ Experian ਉਹ ਜਾਣਕਾਰੀ ਇਕੱਠੀ ਕਰਦਾ ਹੈ ਜੋ ਤੁਸੀਂ ਪਛਾਣ ਦੀ ਪੁਸ਼ਟੀ ਲਈ ਦਰਜ ਕਰਦੇ ਹੋ. OpenAI ਨੂੰ ਤੁਹਾਡੇ ਕਨੈਕਸ਼ਨ ਦੀ ਸਥਿਤੀ ਅਤੇ ਉਹ ਕ੍ਰੈਡਿਟ ਡੇਟਾ ਮਿਲਦਾ ਹੈ ਜਿਸ ਨੂੰ ਸਾਂਝਾ ਕਰਨ ਦੀ ਤੁਸੀਂ Experian ਨੂੰ ਇਜਾਜ਼ਤ ਦਿੰਦੇ ਹੋ. ਇਸ ਕਨੈਕਸ਼ਨ ਰਾਹੀਂ ਆਪਣਾ ਸਕੋਰ ਦੇਖਣਾ ਇੱਕ ਸਧਾਰਨ ਕ੍ਰੈਡਿਟ ਜਾਂਚ ਹੈ, ਜਿਸ ਨਾਲ ਤੁਹਾਡੇ ਕ੍ਰੈਡਿਟ ਸਕੋਰ 'ਤੇ ਕੋਈ ਅਸਰ ਨਹੀਂ ਪੈਂਦਾ.
Experian ਕੀ ਹੈ?
Experian ਖਪਤਕਾਰਾਂ ਦੀ ਕ੍ਰੈਡਿਟ ਜਾਣਕਾਰੀ ਰੱਖਣ ਵਾਲੀ ਸੰਸਥਾ ਹੈ. ਤੁਹਾਡੀ ਇਜਾਜ਼ਤ ਨਾਲ, ਇਹ ChatGPT ਨੂੰ ਲਗਾਤਾਰ ਤੁਹਾਡੀ ਕ੍ਰੈਡਿਟ ਰਿਪੋਰਟ, ਸਕੋਰ ਅਤੇ ਨਿਗਰਾਨੀ ਸੰਬੰਧੀ ਸੂਚਨਾਵਾਂ ਦਿੰਦੀ ਹੈ. ਇਹ ਕਨੈਕਸ਼ਨ Plaid ਰਾਹੀਂ ਜੋੜੇ ਗਏ ਵਿੱਤੀ ਖਾਤਿਆਂ ਤੋਂ ਵੱਖਰਾ ਹੈ.
ਮੈਂ ਕਿਹੜੀ ਕ੍ਰੈਡਿਟ ਜਾਣਕਾਰੀ ਦੇਖ ਸਕਦਾ ਹਾਂ?
ਕ੍ਰੈਡਿਟ ਸਕੋਰ ਦੀ ਸਹੂਲਤ ਤੁਹਾਡੀ Experian ਕ੍ਰੈਡਿਟ ਰਿਪੋਰਟ ਅਤੇ VantageScore® 3.0 ਕ੍ਰੈਡਿਟ ਸਕੋਰ ਦਿਖਾਉਂਦੀ ਹੈ. ਹੋਰ ਵੇਰਵੇ ਦੇਖਣ ਲਈ ਕੋਈ ਕਾਰਕ ਚੁਣੋ ਜਾਂ ChatGPT ਨੂੰ ਰਿਪੋਰਟ ਕੀਤੇ ਖਾਤਿਆਂ, ਬਕਾਇਆ ਰਕਮਾਂ, ਕ੍ਰੈਡਿਟ ਸੀਮਾਵਾਂ, ਉਨ੍ਹਾਂ ਦੀ ਵਰਤੋਂ, ਅਦਾਇਗੀਆਂ ਦੇ ਇਤਿਹਾਸ ਅਤੇ ਕ੍ਰੈਡਿਟ ਜਾਂਚਾਂ ਬਾਰੇ ਪੁੱਛੋ. ਉਪਲਬਧ ਵੇਰਵੇ ਇਸ ਗੱਲ 'ਤੇ ਨਿਰਭਰ ਕਰ ਸਕਦੇ ਹਨ ਕਿ Experian ਕਿਹੜਾ ਡੇਟਾ ਸਾਂਝਾ ਕਰਦਾ ਹੈ.
ਮੇਰਾ ਸਕੋਰ ਹੋਰ ਥਾਂ ਦਿਖਣ ਵਾਲੇ ਸਕੋਰ ਤੋਂ ਵੱਖਰਾ ਕਿਉਂ ਹੈ?
ChatGPT ਤੁਹਾਡੀ Experian ਕ੍ਰੈਡਿਟ ਰਿਪੋਰਟ ਦੇ ਆਧਾਰ 'ਤੇ ਤੁਹਾਡਾ VantageScore 3.0 ਕ੍ਰੈਡਿਟ ਸਕੋਰ ਦਿਖਾਉਂਦਾ ਹੈ. ਵੱਖ-ਵੱਖ ਸੇਵਾਵਾਂ ਅਤੇ ਕਰਜ਼ਦਾਤਿਆਂ ਦੇ ਸਕੋਰ ਵੱਖਰੇ ਹੋ ਸਕਦੇ ਹਨ ਕਿਉਂਕਿ ਉਹ ਸਕੋਰ ਕੱਢਣ ਦੇ ਵੱਖਰੇ ਮਾਡਲ, ਕ੍ਰੈਡਿਟ ਜਾਣਕਾਰੀ ਰੱਖਣ ਵਾਲੀਆਂ ਵੱਖਰੀਆਂ ਸੰਸਥਾਵਾਂ ਜਾਂ ਵੱਖਰੀਆਂ ਤਾਰੀਖਾਂ ਦੀਆਂ ਰਿਪੋਰਟਾਂ ਵਰਤ ਸਕਦੇ ਹਨ.
ਕ੍ਰੈਡਿਟ ਸਕੋਰ ਬਾਰੇ ਪੂਰਾ ਖੁਲਾਸਾ ਪੜ੍ਹੋ.
ਮੇਰਾ ਸਕੋਰ ਅਤੇ ਰਿਪੋਰਟ ਕਿੰਨੀ ਵਾਰ ਅੱਪਡੇਟ ਹੁੰਦੇ ਹਨ?
ਜੋੜਨ ਤੋਂ ਬਾਅਦ, ਤੁਹਾਡਾ ਸਕੋਰ ਅਤੇ ਰਿਪੋਰਟ ਹਰ ਮਹੀਨੇ ਅੱਪਡੇਟ ਹੋਣਗੇ. ਜੁੜੇ ਹੋਏ ਕ੍ਰੈਡਿਟ ਸਕੋਰ ਅਤੇ ਰਿਪੋਰਟ ਦੀ ਜਾਣਕਾਰੀ ਦੀ ਸਮੀਖਿਆ ਕਰਦੇ ਸਮੇਂ ਰਿਪੋਰਟ ਦੀ ਤਾਰੀਖ ਦੇਖੋ. ਜਿਵੇਂ-ਜਿਵੇਂ ਹਰ ਮਹੀਨੇ ਨਵੀਂ ਜਾਣਕਾਰੀ ਉਪਲਬਧ ਹੁੰਦੀ ਹੈ, ਕ੍ਰੈਡਿਟ ਸਕੋਰ ਅਤੇ ਰਿਪੋਰਟ ਦਾ ਇਤਿਹਾਸ ਬਣਦਾ ਜਾਂਦਾ ਹੈ; ਪਹਿਲੀ ਵਾਰ ਜੋੜਨ 'ਤੇ ਤੁਹਾਨੂੰ ਸਿਰਫ਼ ਇੱਕ ਸਕੋਰ ਦਿਖ ਸਕਦਾ ਹੈ.
ਕ੍ਰੈਡਿਟ ਨਿਗਰਾਨੀ ਤੁਹਾਨੂੰ ਤੁਹਾਡੀ Experian ਕ੍ਰੈਡਿਟ ਰਿਪੋਰਟ ਵਿੱਚ ਅਹਿਮ ਬਦਲਾਅ ਦੀ ਸੂਚਨਾ ਦੇ ਸਕਦੀ ਹੈ, ਜਿਵੇਂ ਨਵੀਂ ਕ੍ਰੈਡਿਟ ਜਾਂਚ, ਖਾਤਾ ਜਾਂ ਪਤਾ.
ਮੇਰੀ ਕ੍ਰੈਡਿਟ ਰਿਪੋਰਟ ਦੀ ਬਕਾਇਆ ਰਕਮ ਮੇਰੇ ਬੈਂਕ ਖਾਤੇ ਤੋਂ ਵੱਖਰੀ ਕਿਉਂ ਹੈ?
ਤੁਹਾਡੀ ਕ੍ਰੈਡਿਟ ਰਿਪੋਰਟ ਉਹ ਬਕਾਇਆ ਰਕਮ ਦਿਖਾਉਂਦੀ ਹੈ ਜੋ ਤੁਹਾਡੇ ਕਰਜ਼ਦਾਤਾ ਨੇ ਆਖ਼ਰੀ ਵਾਰ Experian ਨੂੰ ਦੱਸੀ ਸੀ, ਨਾ ਕਿ ਇਸ ਵੇਲੇ ਦੀ ਰਕਮ. ਕੋਈ ਹਾਲੀਆ ਅਦਾਇਗੀ ਜਾਂ ਖ਼ਰੀਦ ਤੁਹਾਡੀ ਕ੍ਰੈਡਿਟ ਰਿਪੋਰਟ ਵਿੱਚ ਦਿਖਣ ਤੋਂ ਪਹਿਲਾਂ ਤੁਹਾਡੇ ਜੁੜੇ ਹੋਏ ਬੈਂਕ ਖਾਤੇ ਵਿੱਚ ਦਿਖ ਸਕਦੀ ਹੈ. ਇਨ੍ਹਾਂ ਦੀ ਤੁਲਨਾ ਕਰਦੇ ਸਮੇਂ ਤਾਰੀਖਾਂ ਦੇਖੋ.
ਕੀ ਮੈਂ ਕਨੈਕਸ਼ਨ ਹਟਾਏ ਬਿਨਾਂ ਕ੍ਰੈਡਿਟ ਸੂਚਨਾਵਾਂ ਬੰਦ ਕਰ ਸਕਦਾ ਹਾਂ?
ਹਾਂ. ਤੁਸੀਂ ਸੂਚਨਾਵਾਂ ਦੀਆਂ ਸੈਟਿੰਗਾਂ ਵਿੱਚ ਕ੍ਰੈਡਿਟ ਸੂਚਨਾਵਾਂ ਬੰਦ ਕਰ ਸਕਦੇ ਹੋ ਅਤੇ ਆਪਣਾ Experian ਕਨੈਕਸ਼ਨ ਕਾਇਮ ਰੱਖ ਸਕਦੇ ਹੋ. ਤੁਹਾਡਾ ਸਕੋਰ ਅਤੇ ਰਿਪੋਰਟ ਹਰ ਮਹੀਨੇ ਅੱਪਡੇਟ ਹੁੰਦੇ ਰਹਿਣਗੇ.
ਜੇ ਕੋਈ ਜਾਣਕਾਰੀ ਗ਼ਲਤ ਹੋਵੇ ਜਾਂ ਮੈਂ ਕਨੈਕਸ਼ਨ ਨਾ ਜੋੜ ਸਕਾਂ ਤਾਂ ਕੀ ਕਰਾਂ?
ਜੇ Experian ਤੁਹਾਡੀ ਪਛਾਣ ਦੀ ਪੁਸ਼ਟੀ ਨਹੀਂ ਕਰ ਸਕਦਾ, ਤਾਂ ਉਸ ਦੀ ਪੁਸ਼ਟੀਕਰਨ ਪ੍ਰਕਿਰਿਆ ਵਿੱਚ ਦਿੱਤੀਆਂ ਹਦਾਇਤਾਂ ਦੀ ਪਾਲਣਾ ਕਰੋ ਜਾਂ Experian ਸਹਾਇਤਾ ਨਾਲ ਸੰਪਰਕ ਕਰੋ. ਜੇ ਤੁਹਾਡੀ ਰਿਪੋਰਟ ਅਜੇ ਤਿਆਰ ਹੋ ਰਹੀ ਹੈ, ਤਾਂ ਹੋ ਸਕਦਾ ਹੈ ਕਿ ਸਕੋਰ ਹਾਲੇ ਉਪਲਬਧ ਨਾ ਹੋਵੇ. ChatGPT ਵਰਤਣ ਦੌਰਾਨ ਆਉਣ ਵਾਲੀਆਂ ਸਮੱਸਿਆਵਾਂ ਲਈ, OpenAI ਸਹਾਇਤਾ ਨਾਲ ਸੰਪਰਕ ਕਰੋ.
ਕਿਸੇ ਅਣਜਾਣ ਖਾਤੇ, ਰਿਪੋਰਟ ਵਿੱਚ ਗ਼ਲਤ ਜਾਣਕਾਰੀ ਜਾਂ ਪਛਾਣ ਦੀ ਚੋਰੀ ਦੇ ਸ਼ੱਕ ਨਾਲ ਜੁੜੀਆਂ ਸਮੱਸਿਆਵਾਂ ਲਈ Experian ਨਾਲ ਸੰਪਰਕ ਕਰੋ. ChatGPT ਤੁਹਾਡੇ ਵੱਲੋਂ ਇਤਰਾਜ਼ ਦਰਜ ਨਹੀਂ ਕਰ ਸਕਦਾ, ਤੁਹਾਡੀ ਕ੍ਰੈਡਿਟ ਰਿਪੋਰਟ ਨਹੀਂ ਬਦਲ ਸਕਦਾ ਅਤੇ ਨਾ ਹੀ ਤੁਹਾਡੀ ਕ੍ਰੈਡਿਟ ਫਾਈਲ 'ਤੇ ਰੋਕ ਲਗਾ ਸਕਦਾ ਹੈ.
ਕੀ ਮੈਂ Experian ਦਾ ਕਨੈਕਸ਼ਨ ਹਟਾ ਸਕਦਾ ਹਾਂ ਜਾਂ ਆਪਣਾ ਡੇਟਾ ਮਿਟਾ ਸਕਦਾ ਹਾਂ?
ਤੁਸੀਂ ਕਿਸੇ ਵੀ ਸਮੇਂ ਆਪਣੇ Experian ਕ੍ਰੈਡਿਟ ਸਕੋਰ ਅਤੇ ਰਿਪੋਰਟਾਂ ਦਾ ਕਨੈਕਸ਼ਨ ਹਟਾ ਸਕਦੇ ਹੋ, ਆਪਣੇ ਬੈਂਕ ਕਨੈਕਸ਼ਨ ਹਟਾਏ ਬਿਨਾਂ ਵੀ. ਇਸ ਦਾ ਮਤਲਬ ਹੈ ਕਿ Experian, ChatGPT ਨਾਲ ਕ੍ਰੈਡਿਟ ਸਕੋਰ ਅਤੇ ਰਿਪੋਰਟਾਂ ਸਾਂਝੀਆਂ ਕਰਨੀਆਂ ਬੰਦ ਕਰ ਦੇਵੇਗਾ. OpenAI ਵੀ 30 ਦਿਨਾਂ ਦੇ ਅੰਦਰ ਆਪਣੇ ਸਿਸਟਮਾਂ ਤੋਂ Experian ਕ੍ਰੈਡਿਟ ਰਿਪੋਰਟ ਦਾ ਮੂਲ ਡੇਟਾ ਮਿਟਾ ਦੇਵੇਗਾ. ਕਨੈਕਸ਼ਨ ਹਟਾਉਣ ਨਾਲ ਪਿਛਲੀਆਂ ਗੱਲਬਾਤਾਂ ਜਾਂ ਵਿੱਤੀ ਯਾਦਾਂ ਵਿੱਚੋਂ ਜਾਣਕਾਰੀ ਨਹੀਂ ਹਟਦੀ; ਤੁਸੀਂ ਉਨ੍ਹਾਂ ਨੂੰ ਵੱਖਰੇ ਤੌਰ 'ਤੇ ਮਿਟਾ ਸਕਦੇ ਹੋ.
ChatGPT ਤੋਂ Experian ਦਾ ਕਨੈਕਸ਼ਨ ਹਟਾਉਣ ਨਾਲ ਤੁਹਾਡੀ ਕ੍ਰੈਡਿਟ ਫਾਈਲ ਜਾਂ ਤੁਹਾਡੇ ਵੱਲੋਂ ਵੱਖਰੇ ਤੌਰ 'ਤੇ ਵਰਤੀਆਂ ਜਾਂਦੀਆਂ Experian ਦੀਆਂ ਸੇਵਾਵਾਂ 'ਤੇ ਕੋਈ ਅਸਰ ਨਹੀਂ ਪੈਂਦਾ.
ਕ੍ਰੈਡਿਟ ਸਕੋਰ ਬਾਰੇ ਖੁਲਾਸਾ
VantageScore 3.0 ਇੱਕ ਆਸਾਨੀ ਨਾਲ ਸਮਝ ਆਉਣ ਵਾਲਾ ਕ੍ਰੈਡਿਟ ਸਕੋਰ ਮਾਡਲ ਹੈ, ਜਿਸ ਦੇ ਸਕੋਰ 300 ਤੋਂ 850 ਤੱਕ ਹੁੰਦੇ ਹਨ. ਇਸ ਨੂੰ ਦੇਸ਼ ਭਰ ਵਿੱਚ ਕੰਮ ਕਰਦੀਆਂ ਤਿੰਨ ਪ੍ਰਮੁੱਖ ਕ੍ਰੈਡਿਟ ਰਿਪੋਰਟਿੰਗ ਏਜੰਸੀਆਂ, Experian®, TransUnion® ਅਤੇ Equifax® ਨੇ ਵਿਕਸਿਤ ਕੀਤਾ ਹੈ. ਕੁਝ ਕਰਜ਼ਦਾਤੇ VantageScore 3.0 ਵਰਤਦੇ ਹਨ, ਪਰ ਸਾਰੇ ਨਹੀਂ. ਉੱਚਾ ਸਕੋਰ ਇਸ ਗੱਲ ਦੀ ਵੱਧ ਸੰਭਾਵਨਾ ਦਿਖਾਉਂਦਾ ਹੈ ਕਿ ਤੁਸੀਂ ਆਪਣੇ ਕਰਜ਼ੇ ਵਾਪਸ ਕਰ ਦਿਓਗੇ, ਇਸ ਲਈ ਕਰਜ਼ਦਾਤੇ ਤੁਹਾਨੂੰ ਕਰਜ਼ਾ ਦੇਣ ਵਿੱਚ ਘੱਟ ਜੋਖਮ ਮੰਨਦੇ ਹਨ. ਘੱਟ ਸਕੋਰ ਕਰਜ਼ਦਾਤਿਆਂ ਨੂੰ ਸੰਕੇਤ ਦਿੰਦਾ ਹੈ ਕਿ ਤੁਹਾਨੂੰ ਕਰਜ਼ਾ ਦੇਣ ਵਿੱਚ ਵੱਧ ਜੋਖਮ ਹੋ ਸਕਦਾ ਹੈ.
ਤਿੰਨ ਵੱਖਰੀਆਂ ਪ੍ਰਮੁੱਖ ਕ੍ਰੈਡਿਟ ਰਿਪੋਰਟਿੰਗ ਏਜੰਸੀਆਂ—Experian, TransUnion ਅਤੇ Equifax—ਤੁਹਾਡੇ ਕ੍ਰੈਡਿਟ ਇਤਿਹਾਸ ਦਾ ਰਿਕਾਰਡ ਰੱਖਦੀਆਂ ਹਨ, ਜਿਸ ਨੂੰ ਤੁਹਾਡੀ ਕ੍ਰੈਡਿਟ ਫਾਈਲ ਕਿਹਾ ਜਾਂਦਾ ਹੈ. ਕ੍ਰੈਡਿਟ ਸਕੋਰ ਉਸ ਵੇਲੇ ਤੁਹਾਡੀ ਕ੍ਰੈਡਿਟ ਫਾਈਲ ਵਿੱਚ ਮੌਜੂਦ ਜਾਣਕਾਰੀ 'ਤੇ ਆਧਾਰਿਤ ਹੁੰਦੇ ਹਨ ਜਦੋਂ ਸਕੋਰ ਦੀ ਬੇਨਤੀ ਕੀਤੀ ਜਾਂਦੀ ਹੈ. ਤੁਹਾਡੀ ਕ੍ਰੈਡਿਟ ਫਾਈਲ ਦੀ ਜਾਣਕਾਰੀ ਹਰੇਕ ਏਜੰਸੀ ਕੋਲ ਵੱਖਰੀ ਹੋ ਸਕਦੀ ਹੈ ਕਿਉਂਕਿ ਕੁਝ ਕਰਜ਼ਦਾਤੇ ਤੁਹਾਡਾ ਕ੍ਰੈਡਿਟ ਇਤਿਹਾਸ ਸਿਰਫ਼ ਇੱਕ ਜਾਂ ਦੋ ਏਜੰਸੀਆਂ ਨੂੰ ਹੀ ਭੇਜਦੇ ਹਨ. ਇਸ ਲਈ ਜੇ ਉਨ੍ਹਾਂ ਕੋਲ ਤੁਹਾਡੀ ਫਾਈਲ ਵਿੱਚ ਵੱਖਰੀ ਜਾਣਕਾਰੀ ਹੈ, ਤਾਂ ਤੁਹਾਡੇ ਕ੍ਰੈਡਿਟ ਸਕੋਰ ਵੀ ਵੱਖਰੇ ਹੋ ਸਕਦੇ ਹਨ. ਕਿਉਂਕਿ ਤੁਹਾਡੀ ਫਾਈਲ ਦੀ ਜਾਣਕਾਰੀ ਸਮੇਂ ਦੇ ਨਾਲ ਬਦਲ ਸਕਦੀ ਹੈ, ਇਸ ਲਈ ਤੁਹਾਡੇ ਕ੍ਰੈਡਿਟ ਸਕੋਰ ਵੀ ਹਰ ਦਿਨ ਵੱਖਰੇ ਹੋ ਸਕਦੇ ਹਨ. ਕ੍ਰੈਡਿਟ ਸਕੋਰ ਕੱਢਣ ਦੇ ਵੱਖਰੇ ਮਾਡਲ ਇੱਕੋ ਖਪਤਕਾਰ ਅਤੇ ਇੱਕੋ ਕ੍ਰੈਡਿਟ ਫਾਈਲ ਲਈ ਵੀ ਕਰਜ਼ੇ ਦੇ ਜੋਖਮ, ਅਰਥਾਤ ਕਰਜ਼ਾ ਨਾ ਚੁਕਾਉਣ ਦੇ ਜੋਖਮ, ਦਾ ਵੱਖਰਾ ਮੁਲਾਂਕਣ ਕਰ ਸਕਦੇ ਹਨ.
ਕਰਜ਼ਦਾਤੇ ਅਤੇ ਬੀਮਾ ਕੰਪਨੀਆਂ ਕ੍ਰੈਡਿਟ ਸਕੋਰ ਕੱਢਣ ਲਈ ਵੱਖ-ਵੱਖ ਮਾਡਲ ਵਰਤ ਸਕਦੇ ਹਨ. ਹੋ ਸਕਦਾ ਹੈ ਕਿ ਤੁਹਾਡਾ ਕਰਜ਼ਦਾਤਾ VantageScore 3.0 ਨਾ ਵਰਤਦਾ ਹੋਵੇ, ਇਸ ਲਈ ਜੇ ਉਹ ਤੁਹਾਨੂੰ ਤੁਹਾਡੇ VantageScore ਤੋਂ ਵੱਖਰਾ ਸਕੋਰ ਦੇਵੇ ਤਾਂ ਹੈਰਾਨ ਨਾ ਹੋਵੋ. (ਅਤੇ ਤੁਹਾਡਾ VantageScore 3.0 ਹੋਰ ਕਿਸਮਾਂ ਦੇ VantageScore ਮੁਤਾਬਕ ਮਿਲਣ ਵਾਲੇ ਸਕੋਰ ਤੋਂ ਵੱਖਰਾ ਹੋ ਸਕਦਾ ਹੈ). ਬੱਸ ਯਾਦ ਰੱਖੋ ਕਿ ਭਾਵੇਂ ਅੰਕ ਵੱਖਰਾ ਹੋਵੇ, ਤੁਹਾਡੇ ਨਾਲ ਜੁੜਿਆ ਜੋਖਮ ਦਾ ਪੱਧਰ ਅਕਸਰ ਇੱਕੋ ਜਿਹਾ ਹੁੰਦਾ ਹੈ. ਹਾਲਾਂਕਿ, ਕੁਝ ਖਪਤਕਾਰਾਂ ਲਈ VantageScore 3.0 ਦਾ ਜੋਖਮ ਮੁਲਾਂਕਣ ਕਰਜ਼ਦਾਤਾ ਦੇ ਸਕੋਰ ਤੋਂ ਵੱਖਰਾ ਹੋ ਸਕਦਾ ਹੈ, ਕਈ ਵਾਰ ਕਾਫ਼ੀ ਵੱਖਰਾ. ਜੇ ਕਰਜ਼ਦਾਤਾ ਦਾ ਸਕੋਰ ਤੁਹਾਡੇ VantageScore 3.0 ਤੋਂ ਘੱਟ ਹੈ, ਤਾਂ ਸੰਭਵ ਹੈ ਕਿ ਇਸ ਫ਼ਰਕ ਕਾਰਨ ਤੁਹਾਨੂੰ ਵੱਧ ਵਿਆਜ ਦਰਾਂ ਦੇਣੀਆਂ ਪੈਣ ਅਤੇ ਕਈ ਵਾਰ ਕਰਜ਼ਾ ਦੇਣ ਤੋਂ ਇਨਕਾਰ ਵੀ ਹੋ ਜਾਵੇ.