Ubora wa matukio hukusaidia kuelewa ikiwa maelezo ya ushawishikaji yaliyopokelewa kutoka kwenye chanzo cha data ulichochagua yanafaa kwa upimaji. Kila pikseli au chanzo cha data kina tathmini yake. Alama na maonyo yako huangazia maeneo ya usanidi wako yanayohitaji kukaguliwa. Havitabiri utendaji wa kampeni wala kuhakikisha kuwa tukio la ushawishikaji litalinganishwa na tangazo.
Ubora wa matukio husasishwa kila siku kwa kutumia siku saba kamili za kalenda, huku muda ukitolewa kwa matukio ya hivi karibuni kufika. Baada ya kubadilisha usanidi wako, hakikisha matukio mapya yanafika kama ilivyotarajiwa. Maboresho yanaweza kuonekana taratibu kadiri matukio ya awali yanavyoondoka kwenye kipindi kinachotathminiwa. Usasishaji ukichelewa, alama yako ya awali itaendelea kuonekana hadi tathmini mpya ipatikane.
Jinsi ya kutumia maonyo
Fungua maonyo ya chanzo cha data ulichochagua na ukague kila tatizo. Anza na matatizo unayoweza kuhakiki katika muunganisho wako, kama vile kukosekana kwa maelezo ya kulinganisha, kuchelewa kwa matukio ya seva au kutumwa kwa tukio mara kwa mara. Tumia mwongozo ulio hapa chini kuchunguza chanzo cha tatizo kabla ya kubadilisha usanidi wako.
Tuma tu maelezo unayoruhusiwa kushiriki na uheshimu maamuzi ya mtu kuhusu faragha na idhini. Tumia maelezo halisi ya wateja na hatua halisi za biashara. Usitume matukio ya ziada, kubuni vitambulisho au kubadilisha nyakati za matukio ili kuboresha alama.
Maelezo machache ya barua pepe au kitambulisho cha mteja
Maana yake: Tuliona maelezo machache ya barua pepe au kitambulisho kisichobadilika cha mteja kwenye matukio ya ushawishikaji yanayostahiki ukaguzi huu. Vitambulisho hivi vinaweza kusaidia kuhusisha matukio na mtu sahihi. Matokeo ya chini pia yanaweza kuashiria tatizo la uchakataji au muunganisho, kwa hivyo kagua kile ambacho muunganisho wako unatuma kwa kweli.
Cha kufanya:
Hakikisha matukio yako yanayostahiki ya ushawishikaji yanajumuisha anwani ya barua pepe au kitambulisho chako kisichobadilika cha mteja kupitia sehemu zinazokubaliwa na muunganisho wako.
Tumia kitambulisho kilekile cha mteja kwa mtu yuleyule. Usitumie kitambulisho cha pamoja, cha kishikilia nafasi au chaguomsingi kwa watu tofauti.
Fuata maagizo ya muunganisho wako kuhusu kusawazisha muundo wa data na kutumia hashi. Kagua utekelezaji wa kivinjari na seva ikiwa unatumia vyote viwili.
Jaribu tukio la ushawishikaji lililokamilika kupitia safari ya kawaida ya mteja wako na uhakikishe sehemu zinazotarajiwa zipo.
Maelezo ya mbofyo wa tangazo hayapo au hayawezi kuhusishwa
Maana yake: Baadhi ya matukio ya ushawishikaji yaliyotathminiwa yanayohusishwa na mbofyo wa tangazo hayakuwa na maelezo ya mbofyo yanayoweza kuhusishwa na mbofyo huo huo. Ukaguzi huu unahusu matukio ya ushawishikaji yaliyotokana na mibofyo ambayo tunaweza kutathmini; haupimi kila mbofyo wa tangazo au kila safari ya mteja.
Cha kufanya:
Hifadhi kigezo cha oppref mtu anapofika kwenye tovuti yako kutoka kwenye tangazo, ikiwemo kupitia uelekezaji upya na urambazaji.
Ukituma matukio ya ushawishikaji kupitia Conversions API, pitisha maelezo ya mbofyo kutoka kwenye safari ya mtu huyo hadi kwenye tukio la seva.
Jaribu njia yako yote, ikijumuisha viungo vya ufuatiliaji, uelekezaji upya, kulipia bidhaa na uhamishaji wowote kati ya kivinjari na seva.
Usitumie tena maelezo ya mbofyo ya mtu mwingine au kuweka thamani chaguomsingi badala yake.
Matukio ya Conversions API yamechelewa
Maana yake: Baadhi ya matukio ya seva yaliyotathminiwa yalifika muda mrefu mno baada ya hatua iliyorekodiwa, au nyakati zake hazikuweza kutathminiwa kwa usahihi. Ukaguzi huangalia ikiwa tukio lilipokelewa ndani ya saa moja baada ya hatua kutokea.
Cha kufanya:
Tuma tukio mara tu hatua halisi ya biashara inapothibitishwa.
Kagua upakiaji ulioratibiwa, foleni, maombi yaliyoshindwa na ucheleweshaji wa majaribio ya kurudia.
Hifadhi wakati asili wa hatua unapojaribu kutuma tukio tena. Usiubadilishe kwa wakati wa kupakia.
Hakiki muundo wa muhuri wa wakati, vipimo na mipangilio ya saa katika muunganisho wako.
Ulinganishaji wa ushawishikaji unahitaji kukaguliwa
Maana yake: Baadhi ya ulinganishaji unaowezekana wa ushawishikaji uliondolewa wakati wa ukaguzi wa uhusishaji. Sababu zinaweza kujumuisha miito ya kurudisha iliyorudiwa kwa hatua ileile, nyakati zisizolingana, au ulinganishaji mwingi mno unaohusishwa na mtazamo uleule wa tangazo. Hii haimaanishi kuwa matukio husika ya biashara yalifutwa au kwamba kila tukio lililoathiriwa halikuwa halali.
Cha kufanya:
Hakikisha tukio la ushawishikaji linatumwa baada ya hatua halisi, kama vile agizo lililothibitishwa au usajili uliokamilika.
Kagua upakiaji wa kurudiwa wa ukurasa, lebo rudufu, miito ya kurudisha na majaribio ya kurudia ambayo yanaweza kutuma hatua ileile zaidi ya mara moja.
Tumia kitambulisho kilekile cha tukio kwa nakala za hatua ileile, zikiwemo za kivinjari na seva; tumia vitambulisho tofauti kwa hatua tofauti.
Hifadhi muhuri asili wa wakati wa hatua hiyo na uchunguze tofauti zozote na rekodi za biashara yako.
Ikiwa matukio ni sahihi na onyo linaendelea, wasiliana na usaidizi ukitoa chanzo cha data, majina ya matukio yaliyoathiriwa, kipindi cha tarehe na ukaguzi uliokamilisha.
Matukio mengi ya ushawishikaji yanahusishwa na mwingiliano uleule wa tangazo
Maana yake: Matukio ya ushawishikaji tunayoweza kutathmini yamejikita isivyo kawaida kwenye mibofyo au mitazamo fulani ya matangazo. Mteja anaweza kukamilisha hatua nyingi kihalali baada ya mwingiliano mmoja, kwa hivyo onyo hili pekee halithibitishi matukio rudufu au shughuli batili.
Cha kufanya:
Kagua ikiwa kupakia au kuonyesha upya ukurasa, mwito wa kurudisha au jaribio la kurudia kunatuma hatua ileile ya biashara mara kwa mara.
Hakikisha hatua tofauti zina vitambulisho tofauti vya matukio na kwamba majaribio ya kurudia yanahifadhi kitambulisho asili cha tukio.
Kagua ikiwa matukio ya ushawishikaji yanatumwa katika hatua iliyokusudiwa ya safari ya mteja.
Ikiwa mwenendo huo unaonyesha ununuzi halisi wa kurudia au hatua kadhaa halali, hifadhi matukio hayo na ueleze mwenendo huo unapoomba usaidizi ukague onyo.
Maelezo machache ya ziada ya kulinganisha
Maana yake: Matukio yanayostahiki ya ushawishikaji yana maelezo machache ya ziada ya kulinganisha. Ukaguzi huu huzingatia maelezo ya simu, jina na eneo, pamoja na mchanganyiko wa anwani ya IP ya kifaa cha mteja na wakala wa mtumiaji. Hupima uwepo wa maelezo, si ikiwa mtu alilinganishwa kwa mafanikio.
Cha kufanya:
Maelezo ya simu yakipatikana na kuruhusiwa kushirikiwa, yajumuishe ukitumia sehemu na muundo unaokubaliwa na muunganisho wako.
Kwa maelezo ya jina na eneo, toa jina la kwanza na la mwisho, msimbo wa posta na nchi ya mtu huyo huyo. Fuata masharti yaliyoandikwa ya kutumia hashi na kusawazisha muundo wa data.
Kwa matukio ya seva, sambaza anwani halisi ya IP ya kifaa cha mteja na wakala wa mtumiaji, ikiwa muunganisho unaruhusu. Usitumie anwani ya seva yako au wakala wa mtumiaji wa jumla badala yake.
Pia endelea kutuma maelezo yanayostahiki ya barua pepe au kitambulisho kisichobadilika cha mteja.
Aina chache za matukio zimeonekana
Maana yake: Tuliona shughuli chache katika makundi ya kawaida ya matukio yanayotumika kwa ukaguzi huu: kuvinjari, hatua za kati na matokeo yaliyokamilika. Biashara tofauti zina safari tofauti za wateja, na si kila hatua inatumika. Ukaguzi huu hauhakikishi kuwa mchakato wako wote wa kuelekea ushawishikaji umekamilika.
Cha kufanya:
Ainisha hatua halisi katika safari ya mteja wako na utambue zile zinazohusika na biashara yako.
Kagua urekodi wa hatua zinazohusika, kama vile kutazama maudhui; kuongeza bidhaa, kuanza kulipia au kutuma maelezo ya mteja mtarajiwa; na kukamilisha agizo, kuanza kipindi cha majaribio au kuweka miadi.
Tumia tukio la kawaida linalokubaliwa ikiwa linawakilisha hatua hiyo kwa usahihi. Matukio maalumu hayajumuishwi katika ukaguzi huu wa wigo wa aina za matukio.
Fanya majaribio kuhakikisha kila tukio linatumwa tu wakati hatua yake husika inapotokea. Usibuni hatua za mchakato wa ushawishikaji ili kuondoa onyo.
Shughuli chache za Pixel na Conversions API
Maana yake: Hatujaona shughuli za kutosha zilizokubaliwa kutoka kwenye njia zinazotumika za Pixel SDK au Conversions API ili kutathmini matumizi yake kuwa mazuri. Kusakinisha muunganisho pekee hakuthibitishi kuwa matukio yanafika.
Cha kufanya:
Hakiki kuwa Pixel SDK yako inatuma matukio ya kivinjari na muunganisho wako wa Conversions API unatuma matokeo yaliyothibitishwa ya seva, kulingana na inavyofaa kwa usanidi wako.
Hakikisha maombi yanakubaliwa na kutumwa kwenye chanzo cha data kilichokusudiwa.
Njia zote mbili zinaporipoti hatua ileile, tumia kitambulisho kilekile cha Pixel, jina lilelile la tukio na kitambulisho kilekile cha tukio ili nakala zitambuliwe.
Weka matukio tofauti kwa hatua tofauti na usitume matokeo kabla hayajatokea.
Kutumia njia zote mbili kunaweza kutoa maelezo yanayokamilishana. Shughuli katika njia pekee hazithibitishi uoanishaji sahihi au urekodi kamili wa matukio.
Shughuli chache kwa lengo la ushawishikaji lililowekwa
Maana yake: Angalau lengo moja la ushawishikaji lililowekwa lina matukio machache sana au halina matukio yaliyopokelewa katika kipindi kinachotathminiwa. Malengo mengine yanaweza kuwa na shughuli za kutosha huku onyo hili likionekana. Matukio yaliyopokelewa kwa ukaguzi huu yanajumuisha yale ambayo hayakulinganishwa na tangazo.
Cha kufanya:
Linganisha jina la tukio na usanidi wa lengo lililoathiriwa na matukio yanayotumwa na muunganisho wako.
Hakikisha tukio linatumwa wakati hatua halisi inapotokea na kwamba matukio ya hivi karibuni yanapokelewa.
Kagua malengo yaliyopitwa na wakati au ambayo hayawakilishi tena hatua unazotaka kupima.
Ikiwa hatua hiyo hutokea mara chache kweli au mahitaji yamekuwa ya chini hivi karibuni, endelea kuifuatilia. Idadi ndogo pekee haithibitishi kasoro katika usanidi.
Kwa nini alama au ukaguzi huenda usipatikane
Hakuna malengo ya ushawishikaji yaliyowekwa: Hakikisha umeweka hatua za ushawishikaji unazotaka kupima na kwamba muunganisho wako unatuma matukio yanayolingana nazo.
Shughuli za ushawishikaji hazitoshi: Huenda shughuli za hivi karibuni za ushawishikaji hazitoshi kutoa alama yenye manufaa. Hakiki usanidi wako na uruhusu shughuli halisi ziongezeke. Hali hii ni tofauti na alama ya sifuri.
Ushahidi wa uhusishaji hautoshi: Baadhi ya ukaguzi huhitaji uhusiano unaoweza kuonekana kati ya matukio ya ushawishikaji na mibofyo au mitazamo ya matangazo. Unaweza kuwa unapokea matukio huku ushahidi huu ukiwa bado mchache. Hii haimaanishi kuwa biashara yako haina ushawishikaji halisi.
Maelezo machache kwa ukaguzi: Ukaguzi fulani huenda ukahitaji matukio zaidi yanayostahiki au shughuli zaidi zinazoweza kuonekana. Kukosekana kwa maelezo hakuchukuliwi kuwa ukaguzi umeshindwa, wala hakutoi onyo kwa mtangazaji kiotomatiki.
Data bado inachakatwa: Alama huenda isipatikane kabla ya tathmini ya kwanza kuwa tayari au wakati tathmini ya karibuni haijakamilika. Kuchelewa kwa usasishaji wa kila siku pekee hakuondoi alama iliyopo. Rudi baada ya uchakataji kukamilika. Hali ya kutopatikana ikiendelea, wasiliana na usaidizi.
Baada ya kufanya mabadiliko, zingatia kwanza ikiwa muunganisho sasa unarekodi hatua na maelezo sahihi. Alama inaweza kubadilika taratibu kadiri kipindi kinachotathminiwa kinavyosonga, na hakuna alama inayohakikisha ulinganishaji, uhusishaji au matokeo ya kampeni.