கண்ணோட்டம்

கொள்கை மீறல், பாதுகாப்புச் சிக்கல் அல்லது கணக்கிற்கான தேவையை நிறைவேற்றாதது ஆகிய காரணங்களால் OpenAI ஒரு கணக்கைச் செயலிழக்கச் செய்யலாம் அல்லது கட்டுப்படுத்தலாம். தீவிரமான பாதுகாப்புக் கவலை எழுந்தாலும் ChatGPT ஒரு கணக்கைத் தற்காலிகமாக இடைநிறுத்தலாம்.

தற்காலிகப் பாதுகாப்பு இடைநிறுத்தமும் நிரந்தரக் கணக்கு மூடலும் வெவ்வேறு நடவடிக்கைகள். என்ன நடந்தது, அடுத்து நீங்கள் என்ன செய்ய வேண்டும் என்பதை அறிய, உங்களுக்கு வரும் செய்தி உதவும்.

கணக்கு செயலிழக்கப்படுவதற்கான காரணங்கள்

கொள்கை மீறல், பாதுகாப்புச் சிக்கல், தொடர்ச்சியான தவறான பயன்பாடு அல்லது தேவையான சரிபார்ப்பை முடிக்காதது ஆகிய காரணங்களுக்காக OpenAI ஒரு கணக்கைச் செயலிழக்கச் செய்யலாம். இதற்கான காரணம், கணக்கையும் அதில் நடந்த செயல்பாட்டையும் பொறுத்தது.

பயன்பாட்டுக் கொள்கை மீறல்கள்

OpenAI-இன் பயன்பாட்டுக் கொள்கைகள், அதன் சேவைகளைச் சில நோக்கங்களுக்குப் பயன்படுத்துவதைத் தடைசெய்கின்றன. இந்தக் கொள்கைகளை மீறக்கூடிய உள்ளடக்கம் அல்லது செயல்பாடுகளில் பின்வருவன அடங்கும்:

• பொருந்தும் கொள்கைக் கட்டுப்பாடுகளை மீறும் பாலியல் உள்ளடக்கம்.

• குழந்தைகளைச் சுரண்டுதல் அல்லது துன்புறுத்துதல்.

• வன்முறைக்கோ பிறருக்குத் தீங்கு விளைவிப்பதற்கோ உதவும் உள்ளடக்கம்.

• தற்கொலையையோ சுயதீங்கையோ ஊக்குவிக்கும் உள்ளடக்கம்.

• ஏமாற்றும் நடத்தை அல்லது மோசடிகள்.

• வெறுப்பு, துன்புறுத்தல் அல்லது தேவையற்ற செய்திகளை அனுப்புதல்.

• சட்டவிரோதச் செயல்பாடு.

• அறிவுசார் சொத்துரிமை மீறல்.

உணர்வுபூர்வமான ஒரு தலைப்பைப் பற்றி விவாதிப்பது மட்டுமே உங்கள் கணக்கு நிரந்தரமாக மூடப்படுவதற்குக் காரணமாகாது. கணக்கு மீதான நடவடிக்கைகள், சூழ்நிலைகளையும் பொருந்தும் கொள்கைகளையும் பொறுத்தவை.

டெர்ம்ஸ் ஆஃப் யூஸ் மீறல்கள்

OpenAI-இன் டெர்ம்ஸ் ஆஃப் யூஸ் விதிகளை மீறும் செயல்பாட்டிற்காக உங்கள் கணக்கு நிரந்தரமாக மூடப்படலாம். எடுத்துக்காட்டுகள்:

• பாதுகாப்பு அல்லது அணுகல் கட்டுப்பாடுகளைத் தாண்டிச் செல்லுதல்.

• விதிமுறைகளை மீறும் வகையில் உங்கள் கணக்கு அல்லது ஏபிஐ விசைகளைப் பகிர்தல்.

• பிறருக்குத் தீங்கு விளைவிக்கக்கூடிய அல்லது சேவைகளுக்கு இடையூறு ஏற்படுத்தக்கூடிய வகையில் OpenAI சேவைகளைப் பயன்படுத்துதல்.

பாதுகாப்புச் சிக்கல்கள் அல்லது அனுமதியற்ற அணுகல்

உங்கள் கணக்கை வேறு யாரோ அணுகியிருப்பதாக அதன் செயல்பாடு காட்டினால், OpenAI கணக்கு அணுகலைக் கட்டுப்படுத்தலாம். இத்தகைய பாதுகாப்புக் கட்டுப்பாடு, வன்முறை அல்லது தீங்கு தொடர்பான தற்காலிகப் பாதுகாப்பு இடைநிறுத்தத்திலிருந்து வேறுபட்டது.

அனுமதியற்ற அணுகல் நடந்திருக்கலாம் எனச் சந்தேகித்தால்:

1. உங்கள் கணக்கின் கடவுச்சொல்லை மாற்றவும்.

2. உங்களுக்குத் தெரியாத செயல்பாடுகள் அல்லது கட்டணங்கள் உள்ளனவா என உங்கள் கணக்கைச் சரிபார்க்கவும்.

3. வெளியில் கசிந்திருக்கக்கூடிய ஏபிஐ விசைகளை மாற்றிப் புதிய விசைகளை உருவாக்கவும்.

4. உங்கள் கணக்கை அணுக முடியாவிட்டாலோ, அனுமதியற்ற செயல்பாட்டைப் புகாரளிக்க உதவி தேவைப்பட்டாலோ, OpenAI ஆதரவுக் குழுவைத் தொடர்புகொள்ளவும்.

உங்கள் கணக்கைப் பாதுகாக்க உதவி பெற, இதைப் பார்க்கவும்: உங்கள் OpenAI கணக்கில் உங்களுக்குத் தெரியாத செயல்பாடு.

ஏபிஐ விசைகளைப் பாதுகாப்பது மற்றும் மாற்றுவது குறித்த வழிகாட்டுதலுக்கு, இதைப் பார்க்கவும்: ஏபிஐ விசைப் பாதுகாப்பிற்கான சிறந்த நடைமுறைகள்.

எச்சரிக்கைக்குப் பிறகும் தொடரும் மீறல்கள்

சில கொள்கை மீறல்களுக்கு, OpenAI எச்சரிக்கை அனுப்பி, சிக்கலைச் சரிசெய்ய உங்களுக்கு வாய்ப்பளிக்கலாம். சிக்கல் தொடர்ந்தாலோ, எச்சரிக்கையில் குறிப்பிட்ட காலக்கெடுவுக்குள் தீர்க்கப்படாவிட்டாலோ, உங்கள் கணக்கு நிரந்தரமாக மூடப்படலாம்.

முடிக்கப்படாத அடையாள அல்லது வயது சரிபார்ப்பு

சில கணக்குகளுக்கு அடையாள அல்லது வயது சரிபார்ப்பு தேவை. தேவையான சரிபார்ப்பை நீங்கள் முடிக்காவிட்டால், அதை முடிக்கும்வரை உங்கள் கணக்கு செயலிழக்கச் செய்யப்படலாம் அல்லது முடக்கப்படலாம்.

தேவையான வயது சரிபார்ப்பை முடிக்கும்படி கேட்கப்பட்டால், ChatGPT-இல் காட்டப்படும் வழிமுறைகளையும் காலக்கெடு ஏதேனும் இருந்தால் அதையும் பின்பற்றவும்.

இத்தாலியில் கட்டாயமான வயது சரிபார்ப்பைக் காலக்கெடுவுக்குள் முடிக்காததால் உங்கள் கணக்கு செயலிழக்கப்பட்டிருந்தால், உள்நுழைய முயன்று, செயலிழப்பு அறிவிப்புத் திரையில் உங்கள் வயதைச் சரிபார்க்கவும் என்பதைத் தேர்ந்தெடுக்கவும். நீங்கள் ஸ்ட்ரைப் மூலம் சரிபார்ப்பை மீண்டும் தொடங்கவும் முடியும். எந்த மின்னஞ்சல் முகவரியைப் பயன்படுத்துவது உள்ளிட்ட முழு வழிமுறைகளுக்கும், இதைப் பார்க்கவும்: வயது சரிபார்ப்புக் காலக்கெடுவைத் தவறவிட்ட பிறகு கணக்கை மீட்டெடுத்தல்.

பதின்பருவத்தினருக்கான ChatGPT அனுபவத்திற்கு நீங்கள் மாற்றப்படுவது மட்டுமே உங்கள் கணக்கு செயலிழக்கப்படுவதற்குக் காரணமாகாது. மேலும் அறிய, இதைப் பார்க்கவும்: ChatGPT-இல் வயதைக் கணித்தல்.

சரிபார்ப்புச் செயல்முறை குறித்து அறிய, இதைப் பார்க்கவும்: வயது சரிபார்ப்புக்காக உங்கள் அடையாள ஆவணத்தைச் சமர்ப்பித்த பிறகு என்ன நடக்கும்.

சரிபார்ப்பு ஏன் தேவைப்படலாம் என்பதை அறிய, இதைப் பார்க்கவும்: உங்கள் அடையாளத்தைச் சரிபார்க்கும்படி ஏன் கேட்கப்படலாம்.

உங்கள் சரிபார்ப்பு மின்னஞ்சலைக் கண்டுபிடிக்க முடியாவிட்டால், அதை மீண்டும் அனுப்பக் கோரி OpenAI ஆதரவுக் குழுவைத் தொடர்புகொள்ளவும்.

தற்காலிகப் பாதுகாப்பு இடைநிறுத்தங்கள்

உரையாடல்கள் பலமுறை முடிக்கப்பட்ட பிறகும், அடுத்தடுத்த உரையாடல்கள் வன்முறை அல்லது பிறருக்குத் தீங்கு ஏற்படுவது குறித்த தீவிரக் கவலைகளை எழுப்பினால், ChatGPT உங்கள் கணக்கைத் தற்காலிகமாக இடைநிறுத்தலாம்.

தற்காலிகப் பாதுகாப்பு இடைநிறுத்தம் தொடங்கியவுடன், உங்கள் உள்நுழைவு உடனடியாக முடிக்கப்படும். இடைநிறுத்தம் அமலில் இருக்கும்வரை நீங்கள் உள்நுழையவோ ChatGPT-ஐப் பயன்படுத்தவோ முடியாது. இடைநிறுத்தம் முடிந்ததும், கணக்கு மீதான வேறொரு நடவடிக்கை உங்கள் அணுகலைப் பாதிக்காதவரை, நீங்கள் மீண்டும் உள்நுழையலாம்.

தற்காலிகப் பாதுகாப்பு இடைநிறுத்தம் விதிக்கப்பட்டிருப்பது மட்டுமே உங்கள் கணக்கு நிரந்தரமாக மூடப்பட்டுவிட்டதாக அர்த்தமல்ல. கணக்கு நிரந்தரமாக மூடப்பட்டதாகத் தனி அறிவிப்பு வந்தால், அதில் உள்ள வழிமுறைகளைப் பின்பற்றவும்.

முடிக்கப்பட்ட உரையாடல்கள் மற்றும் தற்காலிகக் கணக்கு இடைநிறுத்தங்கள் குறித்து மேலும் அறிய, இதைப் பார்க்கவும்: வன்முறை குறித்த கவலைகளால் ChatGPT உங்கள் உரையாடலை முடித்தது அல்லது உங்கள் கணக்கைத் தற்காலிகமாக இடைநிறுத்தியது ஏன்.

யாருடைய பாதுகாப்பிற்காவது ஆபத்து இருந்தால், உடனடியாக உள்ளூர் அவசர உதவிச் சேவைகளைத் தொடர்புகொள்ளவும். உங்கள் கணக்கு இடைநிறுத்தப்பட்டிருக்கும்போதும், உள்நுழைவுத் திரையில் நெருக்கடிக்கால ஆதரவு உதவிகளை அணுகலாம். உங்கள் நாட்டில் அல்லது பகுதியில் உள்ள நெருக்கடிக்கால உதவி எண்ணைக் கண்டறிய, இதைப் பார்க்கவும்: உதவி எண்ணைக் கண்டறியவும்.

நிரந்தரக் கணக்கு மூடலை மறுஆய்வு செய்யக் கோரவும்

உங்கள் கணக்கு தவறுதலாக நிரந்தரமாக மூடப்பட்டதாக நீங்கள் கருதினால், கணக்கு மூடல் அறிவிப்பு மின்னஞ்சலில் உள்ள மேல்முறையீட்டு இணைப்பைப் பயன்படுத்தவும்.

அந்த மின்னஞ்சலை உங்களால் அணுக முடியாவிட்டால், கணக்கு மூடல் மேல்முறையீட்டுப் படிவம் வழியாகக் கோரிக்கையைச் சமர்ப்பிக்கவும்.

உங்கள் கணக்கிற்கான அணுகலை இழந்தும் கணக்கு மூடல் மின்னஞ்சல் வரவில்லை என்றால், ஹெல்ப் சென்டர் வழியாக OpenAI ஆதரவுக் குழுவைத் தொடர்புகொள்ளவும்.

மறுஆய்வு கோருவதால் உங்கள் கணக்கு மீட்டெடுக்கப்படும் என்ற உத்தரவாதம் இல்லை.

சேர்க்க வேண்டிய தகவல்கள்

உங்கள் சூழ்நிலைக்குப் பொருந்தும் விவரங்களைச் சேர்க்கவும்:

• கிடைத்தால், உங்கள் பயனர் அடையாள எண் மற்றும் நிறுவன ID.

• உங்கள் கணக்குச் செயல்பாடு குறித்த தொடர்புடைய தகவல்கள் மற்றும் கணக்கு நிரந்தரமாக மூடப்பட்டது தவறு என நீங்கள் கருதுவதற்கான காரணம்.

• அனுமதியற்ற அணுகல் நடந்திருக்கலாம் எனச் சந்தேகிக்கும் காலப்பகுதியின் தொடக்க மற்றும் முடிவுத் தேதிகள்.

• உங்கள் கணக்கைப் பாதுகாக்க அல்லது சிக்கலைத் தீர்க்க நீங்கள் எடுத்த நடவடிக்கைகள்.

உங்களுக்குத் தெரியாத கட்டணங்கள் இருந்தால், இவற்றையும் சேர்க்கவும்:

• ஒவ்வொரு கட்டணமும் வசூலிக்கப்பட்ட தேதி.

• ஒவ்வொரு கட்டணத்தின் தொகை.

• பணம் செலுத்திய அட்டையின் கடைசி 4 இலக்கங்கள்.

• அட்டையின் வணிகப்பெயர்.

• அட்டையை வழங்கிய வங்கியின் பெயர்.

• கட்டண முகவரியின் அஞ்சல் குறியீடு.

பணம் செலுத்தும் அட்டையின் முழு எண்ணையோ பாதுகாப்புக் குறியீட்டையோ சேர்க்க வேண்டாம்.

எதிர்காலத்தில் கணக்குக் கட்டுப்பாடுகள் விதிக்கப்படும் வாய்ப்பைக் குறைக்கவும்

உங்கள் கணக்கைப் பாதுகாக்கவும், எதிர்காலத்தில் கொள்கை அல்லது பாதுகாப்புச் சிக்கல்கள் ஏற்படும் வாய்ப்பைக் குறைக்கவும்:

• OpenAI-இன் பயன்பாட்டுக் கொள்கைகள் மற்றும் டெர்ம்ஸ் ஆஃப் யூஸ் ஆகியவற்றைப் படித்துப் பின்பற்றவும்.

• உங்கள் கடவுச்சொல், கணக்கு உள்நுழைவுத் தகவல்கள் மற்றும் ஏபிஐ விசைகளைப் பாதுகாப்பாக வைத்திருக்கவும்.

• கொள்கை எச்சரிக்கைகளுக்குப் பதிலளித்து, தேவையான சரிபார்ப்பைக் குறிப்பிட்ட காலக்கெடுவுக்குள் முடிக்கவும்.

• வழக்கத்திற்கு மாறான கணக்குச் செயல்பாடுகள் அல்லது கட்டணங்களை உடனடியாகச் சரிபார்க்கவும்.

• OpenAI ஏபிஐ மூலம் உருவாக்குகிறீர்கள் என்றால், பொருந்தும் கொள்கைகளை மீறக்கூடிய உள்ளடக்கத்தைக் கண்டறிய உள்ளடக்க நெறிப்படுத்தல் எண்ட்பாயிண்ட் பயன்படுத்துவதைக் கருத்தில் கொள்ளவும்.

OpenAI ஆதரவுக் குழுவைத் தொடர்புகொள்ளவும்

கணக்கு அணுகல், சரிபார்ப்பு, அனுமதியற்ற செயல்பாடு அல்லது உங்களுக்கு வராத கணக்கு மூடல் அறிவிப்பு குறித்து உதவி தேவைப்பட்டால், ஹெல்ப் சென்டர் வழியாக OpenAI ஆதரவுக் குழுவைத் தொடர்புகொள்ளவும்.