ஸ்லாக் மற்றும் மைக்ரோசாஃப்ட் டீம்ஸில் உங்கள் நிறுவனத்தின் @ChatGPT உதவியாளரைப் பயன்படுத்தி, அதன் கணக்கு, இணைப்புகள், அணுகல் பற்றி அறியுங்கள்.

கண்ணோட்டம்

கேள்விகளைக் கேட்கவும், தகவலைச் சுருக்கவும், குழுவினருடன் சேர்ந்து பணி சார்ந்த வரைவுகளை உருவாக்கவும் ஸ்லாக் அல்லது மைக்ரோசாஃப்ட் டீம்ஸில் உங்கள் நிறுவனத்தின் @ChatGPT உதவியாளரைப் பயன்படுத்துங்கள்.

உதவியாளருக்கான வழிமுறைகளையும் நிறுவனக் கருவிகளுடனான இணைப்புகளையும் உங்கள் நிர்வாகி அமைக்கிறார். அது எதற்கெல்லாம் உதவ முடியும் என்பது அந்த அமைப்பையும் அதற்குக் கிடைக்கும் தகவலையும் பொறுத்தது. சில கோரிக்கைகளுக்கு, உங்கள் சொந்தக் கணக்குடன் இணைக்கப்பட்ட செயலிகளைப் பயன்படுத்த @ChatGPT அனுமதி கேட்கலாம். கேட்கப்படும்போது அந்த அணுகலை மதிப்பாய்வு செய்து ஒப்புதல் அளிக்கவும்.

ஸ்லாக் அல்லது மைக்ரோசாஃப்ட் டீம்ஸுடன் ChatGPT-ஐப் பயன்படுத்துவதற்கான பிற வழிகளை அறிய, ஸ்லாக் மற்றும் மைக்ரோசாஃப்ட் டீம்ஸுடன் ChatGPT என்பதைப் பார்க்கவும்.

கிடைக்கும் நிலை

நீங்கள் @ChatGPT உதவியாளரைப் பயன்படுத்துவதற்கு முன், உங்கள் நிறுவனம் அதை நிறுவி இயக்க வேண்டும். அது எங்கெல்லாம் கிடைக்கும், எந்தெந்த நிறுவனக் கருவிகளைப் பயன்படுத்த முடியும் என்பதை உங்கள் வர்க்ஸ்பேஸ் நிர்வாகியிடம் கேளுங்கள்.

நிர்வாகிகளுக்கான அமைவு வழிமுறைகளுக்கு, ஸ்லாக் மற்றும் மைக்ரோசாஃப்ட் டீம்ஸில் @ChatGPT-ஐ அமைத்தல் மற்றும் நிர்வகித்தல் என்பதைப் பார்க்கவும்.

முன்பு ஸ்லாக்கின் பக்கப்பட்டியிலிருந்து ChatGPT-ஐப் பயன்படுத்தியிருந்தால், @ChatGPT-க்கு மாறுவது குறித்து உங்கள் நிர்வாகியிடம் கேளுங்கள். ஏற்கெனவே உள்ள நிறுவல்கள் மற்றும் தேவையான ஸ்லாக் அனுமதி மேம்பாடு குறித்து அறிய, ஸ்லாக் மற்றும் மைக்ரோசாஃப்ட் டீம்ஸுடன் ChatGPT என்பதைப் பார்க்கவும்.

உரையாடலைத் தொடங்குங்கள்

@ChatGPT-க்குத் தேவையான அனைத்து விவரங்களையும் உங்கள் செய்தியிலேயே சேர்த்து, ஒரு கோரிக்கையுடன் தொடங்குங்கள். இணைக்கப்பட்ட கருவியில் தகவலைக் கண்டறியச் சொல்வதற்கு முன், உதவியாளரைச் சோதித்துப் பார்க்க இது உதவும்.

1. உங்கள் நிறுவனம் @ChatGPT-ஐ இயக்கியுள்ள சேனலைத் திறக்கவும்.

2. @ChatGPT எனக் குறிப்பிட்டு, அது என்ன செய்ய வேண்டும் என்பதை விவரிக்கவும்.

3. பதிலைப் படித்து, விவரங்களைச் சரிபார்க்கவும். மாற்றம் தேவைப்பட்டால், மீண்டும் @ChatGPT எனக் குறிப்பிடவும்.

எடுத்துக்காட்டாக, இவ்வாறு கேட்கலாம்:

@ChatGPT, இந்த உரையாடல் தொடரில் நாம் விவாதித்தவற்றின் அடிப்படையில் திட்டத்தின் தற்போதைய நிலையைச் சுருக்கமாக எழுதவும்.

ஸ்லாக்கில், @ChatGPT-ஐச் சேனலில் சேர்க்க வேண்டும். எந்தெந்த சேனல்களில் அதனுடன் உரையாடலைத் தொடங்கலாம் என்பதையும் உங்கள் நிர்வாகி அமைக்கலாம். ஸ்லாக் சேனல் கட்டுப்பாடுகள் நேரடிச் செய்திகளுக்குப் பொருந்தாது.

ஆதரிக்கப்படும் மைக்ரோசாஃப்ட் டீம்ஸ் உரையாடல்களுக்கு உங்கள் நிறுவனத்தின் வழிமுறைகளைப் பின்பற்றவும்.

கணக்குகள், அணுகல் மற்றும் தனியுரிமையைப் புரிந்துகொள்ளுங்கள்

கணக்கும் அமைவும்

@ChatGPT ஒரு சேவைக் கணக்கு மூலம் இயங்குகிறது. இது உங்கள் தனிப்பட்ட ChatGPT கணக்கு அல்ல; உதவியாளருக்காக அமைக்கப்பட்ட கணக்கு. கோரிக்கையை விடுப்பவர் நீங்கள்தான் என்பதை உங்கள் ஸ்லாக் அல்லது டீம்ஸ் கணக்கு அடையாளப்படுத்துகிறது.

உங்கள் நிர்வாகி கணக்கு இணைப்பைக் கட்டாயமாக்காத வரை, உதவியாளர் இயக்கப்பட்ட சேனல்களில் உங்கள் சொந்த ChatGPT கணக்கை இணைக்காமலேயே கோரிக்கைகளை விடுக்கலாம். உங்கள் தனிப்பட்ட செயலிகளைப் பயன்படுத்தும் கோரிக்கைகளுக்குத் தனியாக இணைப்பும் அனுமதியும் தேவை.

@ChatGPT-க்கு நேரடிச் செய்தி அனுப்புவது மட்டுமே, உதவியாளரை உங்கள் தனிப்பட்ட ChatGPT கணக்கிற்கு மாற்றிவிடாது.

தரவும் இணைப்புகளும்

தனக்குக் கிடைக்கும் உரையாடல் சூழலையும் உங்கள் நிறுவனம் அமைத்துள்ள கருவிகளையும் @ChatGPT பயன்படுத்துகிறது. கோப்புகள், செயலிகள் அல்லது தனிப்பட்ட சேனல்களுக்கு உங்களுக்குள்ள அணுகல் அதற்குத் தானாகக் கிடைக்காது.

வர்க்ஸ்பேஸ் இணைப்புகள் மூலம் நிறுவனக் கருவிகளை அணுக உங்கள் நிறுவனம் @ChatGPT-க்கு அனுமதி அளிக்கலாம். இந்த இணைப்புகளில், உதவியாளர் எந்தத் தகவலைப் படிக்கலாம், என்னென்ன செயல்களைச் செய்யலாம் என்பதை இணைக்கப்பட்ட கணக்கின் அனுமதிகள் தீர்மானிக்கின்றன.

எடுத்துக்காட்டாக, நிறுவனத்தின் தகவல் மூலம் ஒன்று இணைக்கப்பட்டிருந்தால், குறிப்பிட்ட ஆவணத்தைப் பயன்படுத்துமாறு @ChatGPT-யிடம் கேட்கலாம். அதன் பெயர் அல்லது நேரடி இணைப்பைச் சேர்த்து, அதிலிருந்து உங்களுக்கு என்ன தேவை என்பதை விளக்கவும். உங்களால் அந்த ஆவணத்தைத் திறக்க முடியும் என்பதால், @ChatGPT-யாலும் அதைத் திறக்க முடியும் என்று உறுதியாகக் கூற முடியாது.

சில கோரிக்கைகளுக்கு, உங்கள் சொந்தக் கணக்குடன் இணைக்கப்பட்ட செயலிகள் @ChatGPT-க்குத் தேவைப்படலாம். கேட்கப்படும்போது, கோரப்பட்ட அணுகலை மதிப்பாய்வு செய்யவும். நீங்கள் ஒப்புதல் அளித்தாலும், மற்றவர்கள் @ChatGPT-யிடம் கேட்டு உங்கள் இணைக்கப்பட்ட செயலிகளைப் பயன்படுத்த முடியாது.

ஸ்லாக்கில் ஒரு வாரத்திற்கு அனுமதி என்ற விருப்பம் தெரிந்தால், கோரப்பட்ட அணுகல் நிலையை 7 நாட்களுக்கு நினைவில் வைத்திருக்க அதைத் தேர்ந்தெடுக்கலாம். பலர் பங்கேற்கும்போது, ஒரு பணி உங்களுக்காகவே செய்யப்படுகிறது என்பதை உறுதிப்படுத்துமாறு அப்போதும் உங்களிடம் கேட்கப்படலாம்.

ஒப்புதல் கோரிக்கை காலாவதியாகிவிட்டதாக @ChatGPT தெரிவித்தால், மீண்டும் முயற்சிக்க @ChatGPT என மறுபடியும் குறிப்பிடவும்.

மெமரியும் வழிமுறைகளும்

உங்களுக்கெனச் சேமிக்கப்பட்ட நினைவுகள், தனிப்பயன் வழிமுறைகள், திறன்கள் மற்றும் ChatGPT உரையாடல் வரலாறு ஆகியவை @ChatGPT-க்குத் தானாக மாற்றப்படாது. அதற்குத் தேவையான பின்னணித் தகவல் அல்லது விருப்பத்தேர்வுகளை உங்கள் கோரிக்கையில் சேர்க்கவும்.

எப்படித் தொடர்புகொள்ள வேண்டும் அல்லது இணைக்கப்பட்ட கருவிகளை எப்படிப் பயன்படுத்த வேண்டும் என்பது போன்ற வழிமுறைகளை உங்கள் நிர்வாகி @ChatGPT-க்கு அமைக்கலாம்.

அறிமுகப்படுத்தப்படும் நிலையில், @ChatGPT நினைவுகளைப் பதிவு செய்யவோ அணுகவோ செய்யாது.

பதில்களை யார் பார்க்கலாம்

பகிரப்பட்ட உரையாடல்களில் உள்ள பதில்களை அவற்றில் பங்கேற்பவர்கள் பார்க்கலாம். ஒரு செய்தியில் தகவலைச் சேர்ப்பதற்கு முன்போ, தனிப்பட்ட இணைப்பைப் பயன்படுத்தும் கோரிக்கைக்கு அனுமதி அளிப்பதற்கு முன்போ, அதைப் பார்க்கக்கூடியவர்களை மனதில் கொள்ளவும்.

உருவாக்கப்படும் கோப்புகளுக்குத் தனிப்பட்ட அனுமதிகள் இருக்கலாம். குழு உறுப்பினரால் உரையாடலில் ஒரு கோப்பின் இணைப்பைப் பார்க்க முடிந்தாலும், அந்தக் கோப்பைத் திறக்க முடியாமல் இருக்கலாம். கோப்பைப் பகிர்வதற்கு முன், அதன் இருப்பிடத்தையும் பகிர்வு அமைப்புகளையும் அதன் உரிமையாளரிடம் சரிபார்க்கவும்.

தேவையான கணக்கு இணைப்பை நிறைவுசெய்யுங்கள்

உதவியாளரைப் பயன்படுத்துவதற்கு முன், உங்கள் ஸ்லாக் அல்லது மைக்ரோசாஃப்ட் டீம்ஸ் கணக்கை ChatGPT-யுடன் இணைக்க வேண்டும் என்று உங்கள் நிர்வாகி கட்டாயப்படுத்தலாம். அந்தக் கோரிக்கை உங்களுக்கு வந்தால்:

1. கணக்கை இணைப்பதற்குக் கோரிக்கையில் வழங்கப்பட்டுள்ள இணைப்பைத் திறக்கவும்.

2. கேட்கப்பட்டால், நீங்கள் பயன்படுத்த விரும்பும் ChatGPT கணக்கில் உள்நுழையவும்.

3. நீங்கள் பயன்படுத்த விரும்பும் நிறுவனம் மற்றும் கணக்கிற்கான ஸ்லாக் அல்லது மைக்ரோசாஃப்ட் டீம்ஸ் இணைப்பை நிறைவுசெய்யவும்.

4. அசல் உரையாடல் தொடருக்குத் திரும்பி, உங்கள் கோரிக்கையை மீண்டும் முயற்சிக்கவும்.

உங்கள் நிறுவனம் இணைப்பைத் தடுத்தாலோ, உங்களால் அதை நிறைவுசெய்ய முடியவில்லை என்றாலோ, உங்கள் வர்க்ஸ்பேஸ் நிர்வாகியிடம் உதவி கேட்கவும். தனிப்பட்ட செயலிக்கு அனுமதி அளிப்பதற்கான கோரிக்கையும், கோப்புக்கான மைக்ரோசாஃப்ட் அணுகலுக்கு ஒப்புதல் அளிப்பதற்கான கோரிக்கையும் இதிலிருந்து வேறுபட்டவை. அந்தக் கோரிக்கைக்காகக் காட்டப்படும் வழிமுறைகளைப் பின்பற்றவும்.

பொதுவான சிக்கல்களைத் தீர்க்கவும்

உதவியாளரைக் கண்டறியுங்கள்

நீங்கள் பயன்படுத்த விரும்பும் ஸ்லாக் பணியிடம் அல்லது டீம்ஸ் நிறுவனச் சூழலில்தான் இருக்கிறீர்கள் என்பதை உறுதிப்படுத்தவும். @ChatGPT காணப்படவில்லை என்றால், அதன் நிறுவல், ஒதுக்கீடு மற்றும் அது எங்கெல்லாம் இயக்கப்பட்டுள்ளது என்பதைச் சரிபார்க்குமாறு உங்கள் நிர்வாகியிடம் கேட்கவும்.

பதிலைப் பெறுங்கள்

புதிய உரையாடல் தொடரில் சரியான @ChatGPT உதவியாளரைக் குறிப்பிட்டு, உங்கள் செய்தியிலேயே உள்ள தகவலைப் பயன்படுத்தும் ஒரு கோரிக்கையை முயற்சிக்கவும். அப்போதும் பதில் வரவில்லை என்றால், செய்திக்கான இணைப்பையும் அதை அனுப்பிய தோராயமான நேரத்தையும் உங்கள் நிர்வாகிக்கு அனுப்பவும்.

நிறுவனத் தகவலுக்கான அணுகலை மீட்டெடுங்கள்

தகவல் மூலத்திற்கான நேரடி இணைப்பைச் சேர்த்து, உதவியாளர் கோரும் தனிப்பட்ட அனுமதிகளை மதிப்பாய்வு செய்யவும். நீங்கள் அனுமதி அளித்த பிறகும் அணுக முடியவில்லை என்றால், பகிரப்பட்ட இணைப்பையும் இணைக்கப்பட்ட கணக்கின் அனுமதிகளையும் சரிபார்க்குமாறு இணைப்பின் உரிமையாளரிடம் கேட்கவும்.

உதவியாளரால் நேரடி இணைப்பைத் திறக்க முடிகிறதா, பெயரை வைத்து தகவல் மூலத்தைக் கண்டறிய முடிகிறதா, அல்லது இரண்டுமே முடியவில்லையா என்பதைத் தெரிவிக்கவும். இந்த முடிவுகள் சிக்கலைக் கண்டறிய உதவும்.

உருவாக்கப்பட்ட கோப்பைத் திறக்கவும்

கோப்பின் இருப்பிடத்தையும் அனுமதிகளையும் சரிபார்க்குமாறு அதன் உரிமையாளரிடம் அல்லது உங்கள் நிர்வாகியிடம் கேட்கவும். உரையாடலுக்கான அணுகலும் கோப்புக்கான அணுகலும் தனித்தனியானவை.

உதவி கேட்கும்போது, பாதிக்கப்பட்ட வர்க்ஸ்பேஸ், செய்திக்கான இணைப்பு, எதிர்பார்த்த முடிவு, கிடைத்த முடிவு மற்றும் பிழைச் செய்தி ஏதேனும் இருந்தால் அதையும் சேர்க்கவும். கடவுச்சொற்கள், அணுகல் டோக்கன்கள் அல்லது பிற உள்நுழைவுச் சான்றுகளைச் சேர்க்க வேண்டாம்.