கணக்குகளை மாற்றும் வசதி தற்போது ChatGPT இணையதளத்தில் கிடைக்கிறது; Codex கணினிச் செயலியிலும் ChatGPT கைப்பேசிச் செயலிகளிலும் இது இன்னும் ஆதரிக்கப்படவில்லை.
கணக்குகளை மாற்றும் வசதி மூலம் ஒரே நேரத்தில் 2 ChatGPT கணக்குகளில் உள்நுழைந்திருக்கலாம்; வெளியேறாமலேயே அவற்றுக்கு இடையே உடனடியாக மாறலாம்.
இதனால், ஒரே உலாவி அல்லது சாதனத்தைப் பயன்படுத்தும்போதும் உங்கள் வேலை மற்றும் தனிப்பட்ட பயன்பாட்டை எளிதாகத் தனித்தனியாக வைத்திருக்கலாம்.
கணக்கு மாற்றி என்ன செய்கிறது
கணக்கு மாற்றி மூலம் நீங்கள்:
ஒரே அமர்வில் 2 கணக்குகளில் உள்நுழைந்திருக்கலாம்
அவற்றுக்கு இடையே உடனடியாக மாறலாம்
அரட்டைகள், நினைவகம், வரலாறு, கட்டண விவரங்கள், வர்க்ஸ்பேஸ்கள் ஆகியவற்றை முற்றிலும் தனித்தனியாக வைத்திருக்கலாம்
ஒவ்வொரு கணக்கும் தொடர்ந்து தனித்தே இயங்கும். கணக்குகளை மாற்றுவது அவற்றை ஒன்றிணைக்கவோ சேர்க்கவோ செய்யாது.
கணக்கு மாற்றி எவ்வாறு செயல்படுகிறது
2 கணக்குகளில் உள்நுழைந்திருங்கள்
நீங்கள் பின்வரும் கணக்குகளில் உள்நுழைந்திருக்கலாம்:
தனிப்பட்ட கணக்கு (எ.கா., bobby@gmail.com)
வேலைக்கான கணக்கு (எ.கா., bobby@acmecorp.com)
ஒரு நேரத்தில் ஒரு கணக்கு மட்டுமே செயலில் இருக்கும்; ஆனால் மற்றொன்றுக்கு உடனடியாக மாறலாம்.
நீங்கள் கூடுதல் கணக்குகளை உருவாக்கலாம். ஆனால், கணக்கு மாற்றி ஒரு அமர்வில் அதிகபட்சம் 2 கணக்குகளில் உள்நுழைந்திருப்பதை மட்டுமே ஆதரிக்கிறது.
கணக்கைச் சேர்க்கவும்
இரண்டாவது கணக்கைச் சேர்க்க:
கணக்கு மெனுவைத் திறக்கவும்.
கணக்கைச் சேர்க்கவும் என்பதைத் தேர்ந்தெடுக்கவும்.
உள்நுழையவும் அல்லது புதிய கணக்கை உருவாக்கவும்.
மற்றொரு கணக்கைச் சேர்க்க, தற்போதைய கணக்கிலிருந்து வெளியேற வேண்டியதில்லை.
இரண்டாவது கணக்கை உருவாக்கக் கட்டணம் செலுத்தத் தேவையில்லை. புதிதாக உருவாக்கிய உங்கள் கணக்கு இயல்பாகவே இலவசத் திட்டத்தில் தொடங்கும்.
கணக்குகளை மாற்றவும்
கணக்குகளை மாற்ற, கணக்கு மெனுவைப் பயன்படுத்தவும். நீங்கள் கணக்கை மாற்றும்போது, தேர்ந்தெடுத்த கணக்கின் அரட்டைகள், நினைவகம், கோப்புகள், அமைப்புகள் ஆகியவையே கிடைக்கும். வர்க்ஸ்பேஸ்கள் இருந்தால், அந்தக் கணக்கைச் சேர்ந்தவை மட்டுமே கிடைக்கும்.
கணக்குகளை மாற்றுவது அவற்றை ஒன்றிணைப்பது அல்ல. கணக்குகளை மாற்றுவதால் பின்வருவன நிகழாது:
கணக்குகளுக்கு இடையே அரட்டைகளை நகர்த்துதல்
நினைவகம் அல்லது உரையாடல் வரலாற்றைப் பகிர்தல்
கோப்புகள் அல்லது பதிவேற்றங்களைப் பகிர்தல்
கட்டண விவரங்கள் அல்லது சந்தாக்களை ஒன்றிணைத்தல்
வர்க்ஸ்பேஸ்களை ஒன்றிணைத்தல்
உங்கள் பணித் தரவு உங்கள் நிறுவனத்தின் நிர்வாகக் கட்டுப்பாட்டில் இருக்க வேண்டுமென விரும்பினால், உரையாடலைத் தொடங்கும் முன் பணிக் கணக்கைப் பயன்படுத்துகிறீர்களா என்பதை உறுதிப்படுத்தவும்.
வேலைக்கான மற்றும் நிறுவனக் கணக்குகள்
உங்கள் ChatGPT கணக்கை உங்கள் நிறுவனம் நிர்வகித்தால்:
அந்தக் கணக்குடன் தொடர்புடைய தரவை உங்கள் நிர்வாகியால் அணுகவும் நிர்வகிக்கவும் முடியலாம்.
நிர்வகிக்கப்படும் உங்கள் கணக்கில் உருவாக்கப்படும் தரவுக்கு உங்கள் நிறுவனத்தின் கொள்கைகள் பொருந்தும்.
கணக்குகளை மாற்றுவதால் பொருந்தும் கொள்கைகள் மாறாது.
மேலும் அறிய, நிர்வகிக்கப்படும் உங்கள் ChatGPT கணக்கின் தரவு அணுகல் பற்றிப் பார்க்கவும். எந்தக் கணக்கைப் பயன்படுத்துகிறீர்கள் என்பது உறுதியாகத் தெரியாவிட்டால், கணக்கு மெனுவில் செயலில் உள்ளதாகக் காட்டப்படும் கணக்கைப் பார்க்கவும். உங்கள் நிறுவனம் நிர்வகிக்கும் கணக்கு குறித்துக் கேள்விகள் இருந்தால், உங்கள் தகவல் தொழில்நுட்ப நிர்வாகியைத் தொடர்புகொள்ளவும்.
ChatGPT-இல் உள்நுழைய நீங்கள் பயன்படுத்துவது கணக்கு. உங்கள் அரட்டைகள், உள்ளடக்கம், அமைப்புகள் ஆகியவை இருக்கும் இடம் வர்க்ஸ்பேஸ். ஒரு கணக்கிலிருந்து தனிப்பட்ட வர்க்ஸ்பேஸ், நிறுவன வர்க்ஸ்பேஸ் உட்பட பல வர்க்ஸ்பேஸ்களை அணுகலாம். உங்கள் பணி மின்னஞ்சலின் கீழ் உள்ள தனிப்பட்ட வர்க்ஸ்பேஸும், உங்களுக்குச் சொந்தமான மின்னஞ்சல் முகவரியைப் பயன்படுத்தும் தனிக் கணக்கும் ஒன்றல்ல.
தனிப்பட்ட பயன்பாட்டிற்கு, உங்களுக்குச் சொந்தமானதும் உங்கள் கட்டுப்பாட்டில் உள்ளதுமான மின்னஞ்சல் முகவரியைக் கொண்டு தனிக் கணக்கை உருவாக்கவும். தனிப்பட்ட உரையாடல்களுக்கும் தரவுக்கும் பணி அல்லது நிறுவன மின்னஞ்சல் முகவரியைப் பயன்படுத்துவதைத் தவிர்க்கவும்.
உங்கள் பணிக்காலம் முடிவடைந்து, உங்கள் பணி மின்னஞ்சல் அல்லது நிர்வகிக்கப்படும் வர்க்ஸ்பேஸுக்கான அணுகலை நிறுவனம் நீக்கினால், சம்பந்தப்பட்ட கணக்கு அல்லது வர்க்ஸ்பேஸையும் அதில் சேமிக்கப்பட்டுள்ள தனிப்பட்ட தரவையும் அணுக முடியாது. கணக்கு மாற்றும் வசதி அந்த அணுகலைத் தக்கவைக்காது; தரவை உங்கள் தனிப்பட்ட கணக்கிற்கு மாற்றவும் செய்யாது.
உங்கள் தனிப்பட்ட வர்க்ஸ்பேஸை ஒரு நிறுவன அல்லது வணிக வர்க்ஸ்பேஸுடன் ஒன்றிணைத்தால், ஒன்றிணைப்புக்குப் பிறகு தனிப்பட்ட வர்க்ஸ்பேஸ் மூடப்படும். இந்த ஒன்றிணைப்பு நிரந்தரமானது: பின்னர் அசல் தனிப்பட்ட வர்க்ஸ்பேஸைப் பிரிக்கவோ மீட்டெடுக்கவோ முடியாது. சில வணிகத் திட்ட அழைப்புகள், தனிப்பட்ட வர்க்ஸ்பேஸைத் தனியாக வைத்திருக்க அனுமதிக்கின்றன; தொடர்வதற்கு முன் கிடைக்கும் விருப்பங்களைச் சரிபார்க்கவும்.
சரிபார்க்கப்பட்ட நிறுவன மின்னஞ்சல் மூலம் நிறுவனத் திட்டத்தில் சேரும்போது, உங்கள் தனிப்பட்ட வர்க்ஸ்பேஸை ஒன்றிணைத்தோ அதன் தரவை ஏற்றுமதி செய்து நீக்கியோ அதை மூட வேண்டியிருக்கலாம். தனிப்பட்ட வர்க்ஸ்பேஸை ஒன்றிணைக்கவோ நீக்கவோ வணிகத் திட்ட நிர்வாகிகள் உங்களைக் கட்டாயப்படுத்த முடியாது.
அடிக்கடி கேட்கப்படும் கேள்விகள்
கணக்கு மாற்றும் வசதி மூலம் 2 கணக்குகளை ஒன்றிணைக்க முடியுமா?
முடியாது. கணக்கு மாற்றும் வசதி பல கணக்குகளை எளிதாக அணுக உதவுகிறது; ஆனால் அவற்றை ஒன்றிணைக்காது.
எல்லா வகையான திட்டங்களிலும் இதைப் பயன்படுத்தலாமா?
எல்லா வகையான திட்டங்களிலும் கணக்கு மாற்றும் வசதியைப் பயன்படுத்தலாம். ஆனால், நிர்வகிக்கப்படும் உங்கள் வர்க்ஸ்பேஸில் இந்த வசதி கிடைக்குமா என்பதை உங்கள் நிறுவனம் கட்டுப்படுத்தலாம். நிர்வகிக்கப்படும் வர்க்ஸ்பேஸில் கணக்குகளைச் சேர்க்கும் அல்லது மாற்றும் விருப்பம் தெரியவில்லை என்றால், உங்கள் வர்க்ஸ்பேஸ் நிர்வாகியிடம் விசாரிக்கவும்.
எனது வர்க்ஸ்பேஸ் செயலிழக்கச் செய்யப்பட்டால் என்ன ஆகும்?
ஒரு கணக்குடன் தொடர்புடைய வர்க்ஸ்பேஸ் செயலிழக்கச் செய்யப்பட்டால்:
அந்த மாற்றத்தை விளக்கும் அறிவிப்புப் பட்டை உங்களுக்குத் தெரியலாம்.
வேறு கணக்கில் உள்நுழையுமாறு அல்லது புதிய சந்தாவை வாங்குமாறு உங்களிடம் கேட்கப்படலாம் (திட்டத்தின் வகையைப் பொறுத்து).
ChatGPT உங்களைத் தானாகவே வேறொரு கணக்கிற்கு மாற்றாது.
இரண்டாவது கணக்கை எப்போது பயன்படுத்த வேண்டும்?
பின்வருவன உங்களுக்குத் தேவைப்பட்டால், தனிக் கணக்கு உதவியாக இருக்கும்:
வேலை மற்றும் தனிப்பட்ட அரட்டைகளைத் தெளிவாகப் பிரித்து வைத்தல்
தனித்தனி உரையாடல் வரலாறு
வெவ்வேறு கட்டண ஏற்பாடுகள் அல்லது சந்தாத் திட்டங்கள்
வெவ்வேறு வர்க்ஸ்பேஸ்கள்
வெவ்வேறு தனியுரிமை அல்லது நிர்வாகக் கட்டுப்பாடுகள்
உங்கள் பணி நடவடிக்கைகள் உங்கள் நிறுவனத்தின் நிர்வாகக் கட்டுப்பாட்டிலேயே இருக்க வேண்டுமென விரும்பினால், வேலை தொடர்பான உரையாடல்களுக்கு நிறுவனம் நிர்வகிக்கும் பணிக் கணக்கைப் பயன்படுத்தவும்.