கண்ணோட்டம்

உங்கள் OpenAI API-ஐ எந்த IP முகவரிகள் அணுகலாம் என்பதைக் கட்டுப்படுத்த உதவும் விருப்பப் பாதுகாப்பு அம்சமே IP அனுமதிப் பட்டியல்.

இதைச் செயல்படுத்தினால், நீங்கள் அமைத்த IP முகவரிகள் அல்லது IP வரம்புகளிலிருந்து வரும் கோரிக்கைகள் மட்டுமே அனுமதிக்கப்படும். மற்ற எல்லா IP முகவரிகளிலிருந்தும் வரும் கோரிக்கைகளில் செல்லுபடியாகும் API விசை இருந்தாலும் அவை நிராகரிக்கப்படும்.

நம்பகமான பிணையச் சூழல்களுக்கு மட்டும் அணுகலை வழங்குவதன் மூலம், அங்கீகரிக்கப்படாத API பயன்பாட்டின் அபாயத்தைக் குறைக்க உதவுவதே இந்த அம்சத்தின் நோக்கம்.

குறிப்பு: IP அனுமதிப் பட்டியல் API கோரிக்கைகளுக்கு மட்டுமே பொருந்தும். இது platform.openai.com தளத்தை அணுகுவதையோ பயனர் உள்நுழைவையோ பாதிக்காது.

IP அனுமதிப் பட்டியலை ஏன் பயன்படுத்த வேண்டும்

IP அனுமதிப் பட்டியல் பின்வருவனவற்றுக்கு உதவும்:

• தெரிந்த உள்கட்டமைப்பிற்கு மட்டுமே API அணுகலை வழங்குதல் (எடுத்துக்காட்டாக, உங்கள் சேவையகங்கள் அல்லது மேகக்கணினிச் சூழல்கள்)

• API விசை கசிந்தால் ஏற்படும் பாதுகாப்பு அபாயத்தைக் குறைத்தல்

• API போக்குவரத்து எங்கிருந்து வருகிறது என்பதில் கூடுதல் கட்டுப்பாட்டை ஏற்படுத்துதல்

நிலையான அல்லது தெளிவாக வரையறுக்கப்பட்ட பிணைய வரம்புகளிலிருந்து API போக்குவரத்து வரும் நேரடிப் பயன்பாட்டுச் சூழல்களில்தான் IP அனுமதிப் பட்டியல் பெரும்பாலும் பயன்படுத்தப்படுகிறது.

இது செயல்படும் விதம்

அனுமதிக்கப்பட்ட IP முகவரிகள் அல்லது CIDR வரம்புகளின் பட்டியலை நீங்கள் அமைக்கிறீர்கள்.

• அனுமதிக்கப்பட்ட IP முகவரிகளிலிருந்து வரும் கோரிக்கைகள் ஏற்கப்படும்.

• அனுமதிப் பட்டியலில் இல்லாத IP முகவரிகளிலிருந்து வரும் கோரிக்கைகள் நிராகரிக்கப்படும்.

IP அனுமதிப் பட்டியலைப் பின்வரும் நிலைகளில் பயன்படுத்தலாம்:

• நிறுவன அளவில், அல்லது

• திட்ட அளவில்

யாருக்குக் கிடைக்கும்

அனைத்து API வாடிக்கையாளர்களுக்கும் IP அனுமதிப் பட்டியல் வசதி கிடைக்கும்.

IP அனுமதிப் பட்டியலை அமைக்க, கீழே உள்ள படிகளைப் பின்பற்றவும்.

IP அனுமதிப் பட்டியலை அமைத்தல்

குறிப்பு: அதிகபட்சம் 50 IP முகவரிகள் அல்லது CIDR வரம்புகளைச் சேர்க்கலாம்.

1. அமைப்புகள் பகுதியைத் திறக்கவும்.

2. பாதுகாப்பு என்பதைத் தேர்ந்தெடுக்கவும்.

3. IP அனுமதிப் பட்டியல் என்பதைத் தேர்ந்தெடுக்கவும்.

4. ஒன்று அல்லது அதற்கு மேற்பட்ட IP முகவரிகள் அல்லது CIDR வரம்புகளைச் சேர்க்கவும்.

5. (விருப்பத்தேர்வு) ஓர் IP முகவரி உங்கள் அனுமதிப் பட்டியலில் உள்ளதா என்பதை உறுதிப்படுத்த, சரிபார் கருவியைப் பயன்படுத்தவும்.

6. பின்வருவனவற்றுக்கு அனுமதிப் பட்டியலைச் செயல்படுத்தவும்:

   • ஒரு குறிப்பிட்ட திட்டத்திற்கு, அல்லது

   • உங்கள் நிறுவனம் முழுவதற்கும்.

7. நீங்கள் பயன்படுத்தவுள்ள சூழல்களிலிருந்து கோரிக்கைகளை அனுப்பிச் சோதிக்கவும்.

நிறுவனம் முழுவதும் இந்தக் கட்டுப்பாட்டைச் செயல்படுத்தும் முன், ஒரு திட்டத்தில் மட்டும் தொடங்குமாறு பரிந்துரைக்கிறோம்.

மாற்றங்களைச் செய்த பிறகு, அவை நடைமுறைக்கு வர 15 நிமிடங்கள் வரை ஆகலாம்.


குறிப்பு: IP அனுமதிப் பட்டியல் அமைப்புகளை மாற்ற, நிறுவனத்தில் உங்களுக்கு உரிய அனுமதிகள் இருக்க வேண்டும்.

சிக்கல்களைத் தீர்த்தல்

கோரிக்கைகள் எதிர்பாராத விதமாகத் தோல்வியடைந்தால்:

• அனுமதிக்கப்பட்ட IP முகவரியிலிருந்துதான் கோரிக்கை வருகிறது என்பதை உறுதிப்படுத்தவும்.

• உங்கள் உள்கட்டமைப்பின் IP முகவரிகள் மாறியுள்ளனவா எனச் சரிபார்க்கவும்.

• நீங்கள் அமைத்த IP வரம்புகள் சரியாக உள்ளனவா எனச் சரிபார்க்கவும்.

• அமைப்பு மாற்றங்கள் அனைத்துப் பகுதிகளிலும் நடைமுறைக்கு வர 15 நிமிடங்கள் வரை காத்திருக்கவும்.

• ஓர் IP முகவரி அனுமதிக்கப்பட்டுள்ளதா என்பதை உறுதிப்படுத்த, சரிபார் கருவியைப் பயன்படுத்தவும்.

ஒரு கோரிக்கை தடுக்கப்படும்போது என்ன நடக்கும்

அனுமதிப் பட்டியலில் இல்லாத IP முகவரியிலிருந்து ஒரு கோரிக்கை வந்தால், அது பின்வரும் பிழையுடன் தோல்வியடையும்:

• HTTP நிலை: 401 Unauthorized

• பிழைக் குறியீடு: ip_not_authorized

எடுத்துக்காட்டு பதில்:

{

 "error": {

   "message": "Your IP is not authorized to access this organization.",

   "type": "ip_not_authorized"

 }

}

அடிக்கடி கேட்கப்படும் கேள்விகள்

எனது API விசையின் அங்கீகரிக்கப்படாத பயன்பாடு அனைத்தையும் IP அனுமதிப் பட்டியல் தடுக்குமா.

இல்லை. API கோரிக்கைகள் எங்கிருந்து வருகின்றன என்பதைக் கட்டுப்படுத்துவதன் மூலம், IP அனுமதிப் பட்டியல் அபாயத்தைக் குறைக்க உதவும். ஆனால், எல்லா வகையான தவறான பயன்பாடுகளையும் இது முழுமையாகத் தடுக்காது. விசைகளைப் பாதுகாப்பாகச் சேமித்தல், அவ்வப்போது விசைகளை மாற்றுதல், கணக்கிற்கு வலுவான பாதுகாப்பை ஏற்படுத்துதல் போன்ற பிற சிறந்த பாதுகாப்பு நடைமுறைகளுடன் சேர்த்து இதைப் பயன்படுத்த வேண்டும். கூடுதல் பாதுகாப்பிற்காக, எங்கள் உதவி மையத்தில் உள்ள API விசையைப் பாதுகாப்பதற்கான சிறந்த நடைமுறைகள் மற்றும் அங்கீகரிக்கப்படாத பயன்பாட்டைத் தடுத்தல் குறித்த வழிகாட்டிகளைப் பார்க்கவும்.

IP அனுமதிப் பட்டியல் பதிலளிக்கும் நேரத்தைப் பாதிக்குமா.

IP அனுமதிப் பட்டியலால் சில நேரங்களில், குறிப்பாக ஆரம்பக் கோரிக்கைகளில், மிகச் சிறிய தாமதம் ஏற்படலாம். ஒட்டுமொத்த API செயல்திறனை இது குறிப்பிடத்தக்க அளவில் பாதிக்கும் என எதிர்பார்க்கப்படவில்லை.

IP அனுமதிப் பட்டியலால் ஒரு கோரிக்கை தோல்வியடைகிறதா என்பதை எப்படி அறிவது.

IP அனுமதிப் பட்டியலால் தோல்வியடையும் கோரிக்கைகளுக்கு இவை திருப்பி அனுப்பப்படும்:

• HTTP status: 401 Unauthorized

• Error code: ip_not_authorized