ChatGPT கணினிச் செயலியின் உள்ளமைந்த உலாவியில் திறந்திருக்கும் இணையதளங்களில் நேரடியாகச் செயல்படத் தளக் கருவிகள் ChatGPT-க்கு உதவுகின்றன. சொடுக்குதல், தட்டச்சு செய்தல் ஆகியவற்றை மட்டுமே சார்ந்திருக்காமல், இணையதளம் வழங்கும் கருவிகளைப் பயன்படுத்தி ChatGPT தகவல்களைத் தேடலாம், உள்ளடக்கத்தைப் புதுப்பிக்கலாம், ஊடாடும் கருவிகளில் பணியாற்றலாம்.

முன்மொழியப்பட்டுள்ள இணையத் தரநிலையான WebMCP-ஐத் தளக் கருவிகள் பயன்படுத்துகின்றன. உங்கள் கணக்கிற்கு அணுகல் வழங்கப்பட்டு, இணையதளமும் தளக் கருவிகளை வழங்கும்போது அவை கிடைக்கும்.

தளக் கருவிகளைப் பயன்படுத்துங்கள்

1. ChatGPT கணினிச் செயலியின் கருவிப்பட்டியிலிருந்து உள்ளமைந்த உலாவியைத் திறக்கவும்.

2. நீங்கள் பயன்படுத்த விரும்பும் இணையதளத்திற்குச் சென்று, தேவைப்பட்டால் அதிலேயே நேரடியாக உள்நுழையவும்.

3. அந்த இணையதளம் தளக் கருவிகளை வழங்கினால், முகவரிப் பட்டியில் ஓர் அம்புக்குறி தோன்றும். கிடைக்கும் கருவிகளைப் பார்க்க அதைத் தேர்ந்தெடுக்கவும்.

4. தகவலைக் கண்டறிவது அல்லது ஆவணத்தைப் புதுப்பிப்பது போன்ற நீங்கள் செய்ய விரும்பும் செயலை ChatGPT-யிடம் கூறவும்.

5. ChatGPT தொடர்வதற்கு முன், இணையதள அணுகலுக்கான அனுமதிக் கோரிக்கைகள் ஏதேனும் வந்தால் அவற்றைச் சரிபார்க்கவும்.

6. இணையப்பக்கத்திலோ உங்கள் உரையாடலிலோ முடிவைச் சரிபார்க்கவும்.

தளக் கருவிகள் கிடைக்கும்போது முகவரிப் பட்டியில் உள்ள அம்புக்குறி சாம்பல் நிறத்தில் இருக்கும். ChatGPT அவற்றைப் பயன்படுத்தும்போது அது நீல நிறமாக மாறும். இணையதளம் வழங்கும் கருவிகளையும், அவற்றால் தகவல்களைப் படிக்க முடியுமா அல்லது மாற்றங்களைச் செய்ய முடியுமா என்பதையும் பார்க்க அம்புக்குறியைத் தேர்ந்தெடுக்கவும். ஒரு கருவி என்ன செய்கிறது என்பதை அறிய அதைத் தேர்ந்தெடுக்கவும்.

உங்கள் கோரிக்கைக்குப் பொருத்தமான கருவியை ஓர் இணையதளம் வழங்கினால், ChatGPT அதைத் தானாகவே கண்டறிந்து பயன்படுத்த முடியும். ChatGPT ஒரு தளக் கருவியைப் பயன்படுத்திய பிறகு, முகவரிப் பட்டியில் உள்ள அம்புக்குறியைத் தேர்ந்தெடுக்கவும். பின்னர், சமீபத்தில் பயன்படுத்திய கருவிகளைப் பார்க்க “சமீபத்தில் பயன்படுத்தியவை” பொத்தானைத் தேர்ந்தெடுக்கவும்.

ஆதரிக்கப்படும் இணையதளங்களில் தேடுங்கள், திருத்துங்கள், புதுப்பியுங்கள்

இணையதளம் தளக் கருவிகளை ஆதரித்தால், பின்வருவனவற்றைச் செய்ய ChatGPT உங்களுக்கு உதவும்:

• ஆவணங்களில் தேடுவது அல்லது தகவல்களை ஒப்பிடுவது.

• ஆவணம், பகிரப்பட்ட வெண்பலகை அல்லது குறிப்பேட்டைத் திருத்துவது.

• தகவல் பலகை அல்லது வேறு ஓர் ஊடாடும் பக்கத்தை ஆராய்வது.

• பயணத் திட்டத்தை உருவாக்குவது அல்லது கிடைக்கும் விருப்பங்களை ஒப்பிடுவது.

• வாங்குவதற்கான பொருட்கள் கூடையைப் புதுப்பிப்பது.

எந்தக் கருவிகளை வழங்குவது என்பதை ஒவ்வோர் இணையதளமும் முடிவு செய்கிறது. கிடைக்கும் தளக் கருவிகள் இணையதளத்திற்கும் பக்கத்திற்கும் ஏற்ப மாறுபடலாம்.

தற்போதைய பக்கத்தையும் கணக்கையும் பயன்படுத்திப் பணியாற்றுங்கள்

நீங்கள் திறந்து வைத்துள்ள இணையப்பக்கம், அதன் தற்போதைய நிலை, நீங்கள் உள்நுழைந்துள்ள அமர்வு ஆகியவற்றைத் தளக் கருவிகள் பயன்படுத்துகின்றன. நீங்களும் ChatGPT-யும் ஒரே பக்கத்தில் ஒரே நேரத்தில் பணியாற்றி, மாற்றங்கள் நிகழும்போதே அவற்றைச் சரிபார்க்கலாம்.

தளக் கருவிகளின் செயல்பாடுகள் அவை நிகழும் வரிசையில் உங்கள் உரையாடலில் காட்டப்படும். ஆதாரங்கள் பகுதியில், செயல்பாடுகள் இணையதள வாரியாக ஒழுங்கமைக்கப்பட்டிருக்கும். ChatGPT பயன்படுத்திய கருவிகளும் அதில் இடம்பெறும்.

உள்ளமைந்த உலாவி தனக்கெனத் தனியான உலாவி நிலையைக் கொண்டுள்ளது. அதே இணையதளத்தில் நீங்கள் ஏற்கெனவே Chrome-இல் உள்நுழைந்திருந்தாலும், உள்ளமைந்த உலாவியில் மீண்டும் உள்நுழைய வேண்டியிருக்கலாம்.

இணையதள அணுகலைப் பாதுகாப்பாக நிர்வகியுங்கள்

இணையப்பக்கத்தில் வழக்கமாகக் கிடைக்காத செயல்பாடுகளைத் தளக் கருவிகள் வழங்கக்கூடும். இதனால் தரவை அனுமதியின்றி வெளியேற்றுவது, ப்ராம்ப்ட் இன்ஜெக்ஷன் உள்ளிட்ட புதிய அபாயங்கள் ஏற்படலாம். உங்கள் தரவைப் பாதுகாக்கவும் கட்டுப்பாடு உங்களிடமே இருக்கவும் ChatGPT பல்வேறு பாதுகாப்பு நடவடிக்கைகளைப் பயன்படுத்துகிறது.

பிற உலாவிப் பணிகளுக்கான அதே பாதுகாப்புச் சோதனைகளும் உறுதிப்படுத்தல் தேவைகளும் தளக் கருவிகளுக்கும் பொருந்தும். ஓர் இணையதளத்தில் செயல்படுவதற்கு முன் ChatGPT அனுமதி கேட்கும். நீங்கள் நம்பும் இணையதளங்களில் மட்டுமே செயல்படுமாறு பரிந்துரைக்கிறோம்.

தரவுப் பகிர்வும் கவனமாக மேற்கொள்ள வேண்டிய செயல்களும்

தனிப்பட்ட தகவல்களைப் பகிர்வது, பொருட்களை வாங்குவது, தரவை நீக்குவது, கணக்கு அனுமதிகளை மாற்றுவது அல்லது உங்கள் சார்பாகச் செய்திகளை அனுப்புவது போன்ற கவனமாக மேற்கொள்ள வேண்டிய செயல்களுக்கு முன் ChatGPT உங்கள் உறுதிப்படுத்தலைக் கேட்கும்.

பாதுகாக்கப்பட வேண்டிய தகவல்களைப் பகிர்வதற்கு முன், என்ன தகவல்கள் பகிரப்படும், அவை எங்கு அனுப்பப்படும், எதற்காக அனுப்பப்படும் என்பதை ChatGPT விளக்கும். நீங்கள் ஏற்கெனவே அந்த இணையதளத்திற்கோ பணிக்கோ ஒப்புதல் அளித்திருந்தாலும், தகவல்களை அனுப்புவதற்கு உடனடியாக முன்பு உங்கள் உறுதிப்படுத்தலைக் கேட்கும்.

இணையதளம் அல்லது தளக் கருவி வழங்கும் வழிமுறைகள், உங்கள் சார்பாகத் தகவல்களைப் பகிரவோ கவனமாக மேற்கொள்ள வேண்டிய செயல்களைச் செய்யவோ ChatGPT-க்கு அனுமதி அளிக்க முடியாது. தற்போதைய இணையப்பக்கத்திற்கு வெளியே உள்ள தகவல்களை ஒரு தளக் கருவி கோரினால், தொடர்வதற்கு முன் அந்தக் கோரிக்கையைச் சரிபார்க்குமாறு ChatGPT உங்களிடம் கேட்கும்.

கடவுச்சொற்களை இணையதளத்திலேயே நேரடியாக உள்ளிடவும். உங்கள் ChatGPT உரையாடலில் ஒருபோதும் உள்ளிட வேண்டாம்.

கூடுதல் பாதுகாப்புச் சோதனைகள்

ChatGPT-யின் வழக்கமான உலாவிப் பாதுகாப்பு நடவடிக்கைகளுடன், தளக் கருவிகளுக்குக் கூடுதல் பாதுகாப்பும் உள்ளது. அனுமதியற்ற தரவுப் பகிர்வையோ உங்கள் கோரிக்கைக்குப் பொருந்தாத செயல்களையோ தடுக்க உதவும் வகையில், ஒவ்வொரு கருவி அழைப்புக்கும் முன் அந்தக் கருவியையும் அதற்கு அனுப்பப்படவுள்ள தகவல்களையும் ChatGPT ஆய்வு செய்கிறது.

பாதுகாப்பு மற்றும் தகவல் பாதுகாப்புக் குறைபாடுகளைப் புகாரளியுங்கள்

தளக் கருவிகளைப் பயன்படுத்தும்போது நீங்கள் கண்டறியும் பாதுகாப்பு அல்லது தகவல் பாதுகாப்புச் சிக்கல்கள் குறித்த புகார்களை வரவேற்கிறோம். தகவல் பாதுகாப்புக் குறைபாடுகளை எங்கள் தகவல் பாதுகாப்புப் பிழைகளுக்கான வெகுமதித் திட்டம் வழியாகவும், ப்ராம்ப்ட் இன்ஜெக்ஷன் மற்றும் பிற செயற்கை நுண்ணறிவுப் பாதுகாப்புச் சிக்கல்களை எங்கள் பாதுகாப்புப் பிழைகளுக்கான வெகுமதித் திட்டம் வழியாகவும் புகாரளிக்கவும்.

அடிக்கடி கேட்கப்படும் கேள்விகள்

ChatGPT ஏன் தளக் கருவியைப் பயன்படுத்தவில்லை

உங்கள் கணக்கும் தேர்ந்தெடுத்த மாடலும் தளக் கருவிகளை ஆதரிப்பதுடன், தற்போதைய இணையப்பக்கம் உங்கள் கோரிக்கைக்குப் பொருத்தமான கருவியை வழங்கினால் மட்டுமே தளக் கருவிகள் கிடைக்கும்.

எல்லா இணையதளங்களும் தளக் கருவிகளை ஆதரிப்பதில்லை. ஆதரிக்கும் இணையதளங்களும் ஒவ்வொரு பணிக்கும் ஏற்ற கருவியை வழங்காமல் இருக்கலாம். உட்பொதிக்கப்பட்ட உள்ளடக்கம் மட்டுமே வழங்கும் கருவிகளுக்குத் தற்போது ஆதரவு இல்லை.

தளக் கருவி கிடைக்காவிட்டாலும், ChatGPT தனது வழக்கமான உலாவல் திறன்களைப் பயன்படுத்தி உதவக்கூடும்.

நான் ஏதேனும் நிறுவவோ உள்ளமைக்கவோ வேண்டுமா

தனியாக இணைப்பு எதுவும் தேவையில்லை. தளக் கருவிகள் தற்போது ChatGPT கணினிச் செயலியின் உள்ளமைந்த உலாவியில் மட்டுமே கிடைக்கின்றன; Chrome-இல் கிடைக்காது. உங்கள் கணக்கில் தளக் கருவிகள் கிடைக்கும்போது, அவற்றை ஆதரிக்கும் இணையப்பக்கம் வழங்கும் கருவிகளை ChatGPT தானாகவே கண்டறியும்.

தளக் கருவிகள் வெவ்வேறு உலாவித் தாவல்களில் செயல்பட முடியுமா

ChatGPT வெவ்வேறு தாவல்களில் செயல்பட முடியும். ஆனால் ஒவ்வொரு தளக் கருவியும் அதை வழங்கும் இணையப்பக்கத்தில் மட்டுமே கிடைக்கும். ஒரு பக்கத்தில் உள்ள கருவியை மற்றொரு பக்கத்திலோ இணையதளத்திலோ பயன்படுத்த முடியாது.

இணையப்பக்கத்தை மூடினால் என்ன ஆகும்

தொடர்புடைய இணையப்பக்கம் திறந்திருக்கும்போது மட்டுமே தளக் கருவிகள் கிடைக்கும். அந்தப் பக்கத்தின் கருவிகளை ChatGPT பயன்படுத்த வேண்டுமெனில், பக்கத்தை மீண்டும் திறக்கவும்.

தளக் கருவிகளை முடக்க முடியுமா

ஆம். ChatGPT கணினிச் செயலியில், உலாவி அமைப்புகள் பகுதியைத் திறந்து, அனுமதிகள் என்பதைத் தேர்ந்தெடுத்து, தளக் கருவிகளை இயக்கு என்பதை முடக்கவும்.

WebMCP என்றால் என்ன

WebMCP என்பது முன்மொழியப்பட்ட ஓர் இணையத் தரநிலை. இதன் மூலம் இணையதளங்கள் செயற்கை நுண்ணறிவு முகவர்களுக்குக் கருவிகளை நேரடியாக வழங்க முடியும். நீங்கள் பார்க்கும் பக்கத்தில் ChatGPT செயல்பட உதவுவதற்குத் தளக் கருவிகள் இதைப் பயன்படுத்துகின்றன.

உள்ளமைந்த உலாவியைப் பற்றி மேலும் அறியுங்கள்