கண்ணோட்டம்

உங்கள் dot என்பது ChatGPT-இல் எப்போதும் செயல்படும் ஓர் ஏஜென்ட். ஒரு திட்டத்தின் ஆரம்ப யோசனையைப் பயன்படக்கூடிய படைப்பாக மாற்ற இது உதவும். அதற்கு ஓர் இலக்கைக் கொடுத்து, பின்னணித் தகவல்களைப் பகிருங்கள். உரையாடல்களுக்கு இடையிலும் அது தொடர்ந்து முன்னேறிச் செயல்படும்.

தனக்கென உள்ள கணினியையும் நீங்கள் இணைக்கும் செயலிகளையும் பயன்படுத்தி, உங்கள் dot ஆராயவும், உருவாக்கவும், பணிகளைத் தொடர்ந்து செய்து முடிக்கவும் முடியும். ChatGPT நினைவகத்திலுள்ள பின்னணித் தகவல்களுடன் தொடங்கி, நீங்கள் வேலை செய்ய விரும்பும் முறையைக் கற்றுக்கொள்கிறது. அது தானாக என்ன செய்யலாம் என்பதை நீங்கள் தேர்வுசெய்யலாம். அதன் வேலையை மதிப்பாய்வு செய்து, தேவைக்கேற்ப கருத்துத் தெரிவிக்கலாம் அல்லது செயல்படும் திசையை மாற்றலாம். எப்போது வேண்டுமானாலும் அதை இடைநிறுத்தலாம்.

எனது dot எதிலெல்லாம் உதவும்?

முழுமையாகச் செய்து முடிக்க உங்களுக்கு உதவி தேவைப்படும் ஒரு திட்டத்துடன் தொடங்குங்கள்:

• விளக்கக்காட்சியைத் தயாரிக்கலாம். தரவுகளையும் வாடிக்கையாளர் கருத்துகளையும் ஒன்றுதிரட்டி, என்ன மாற்றம் ஏற்பட்டுள்ளது என ஆராய்ந்து, புதிய தகவல்கள் வரும்போது விளக்கக்காட்சியைப் புதுப்பிக்கலாம்.

• உள்ளடக்கத்தை உருவாக்கலாம். நேர்காணலின் எழுத்துப்பதிவை நிகழ்ச்சிக் குறிப்புகளாகவும் சமூக ஊடகப் பதிவுகளாகவும் மாற்றி, நீங்கள் செய்யும் திருத்தங்களை அனைத்து வரைவுகளிலும் செயல்படுத்தலாம்.

• செயலியை மேம்படுத்தலாம். ஒரு மாற்றத்தின் வரம்பை வரையறுத்து, நிரல் எழுதி, சோதிக்கலாம். இதனால், சரியாகச் செயல்படும் மாற்றங்களை நீங்கள் மதிப்பாய்வு செய்யலாம்.

எந்தத் திட்டங்களில் dots உள்ளன?

ஐரோப்பிய பொருளாதாரப் பகுதி, சுவிட்சர்லாந்து, ஐக்கிய இராச்சியம் ஆகியவற்றைத் தவிர மற்ற சந்தைகளில், 18 வயதும் அதற்கு மேற்பட்ட வயதும் உள்ள Pro பயனர்களுக்கு ChatGPT-இல் dots படிப்படியாக வழங்கப்படுகின்றன. ChatGPT ஆதரிக்கப்படும் பகுதிகளில் உள்ள Business Premium பயனர்களுக்கும், வர்க்ஸ்பேஸ் தகுதித் தேவைகளுக்கு உட்பட்டு dots கிடைக்கும். Enterprise பயனர்கள் (Edu மற்றும் Healthcare உட்பட), தங்கள் வர்க்ஸ்பேஸ் நிர்வாகி இயக்கியதும் சோதனைப் பதிப்பைப் பயன்படுத்திப் பார்க்கலாம். ஆனால் தொடக்கத்தில் இது இயல்பாகவே அணைக்கப்பட்டிருக்கும். வர்க்ஸ்பேஸ் அமைப்புகள், குறியாக்கம், தரவு சேமிக்கப்படும் அல்லது மாதிரி கணிப்பு நடைபெறும் இடம் தொடர்பான தேவைகளும் தகுதியைப் பாதிக்கலாம்.

உங்கள் Pro அல்லது Business Premium திட்டத்தில் கூடுதல் கட்டணமின்றி முதல் dot சேர்க்கப்பட்டுள்ளது. உங்களுடன் பேசவும், நீங்கள் சிந்திக்க உதவவும், உங்களுக்கு முக்கியமானவற்றைத் தொடர்ந்து கவனிக்கவும் அது 24/7 கிடைக்கும். ஆழமான வேலைக்கான பயன்பாட்டு ஒதுக்கீடும் உங்கள் திட்டத்தில் உள்ளது. அறிமுகத்திற்குப் பிந்தைய முதல் மாதத்தில் கூடுதல் பயன்பாட்டு வரம்புகள் வழங்கப்படும். வருங்காலத்தில், மேலும் dots சேர்க்க முடியும். ஒவ்வொரு dot-இன் வேகத்தை அதிகரிப்பதன் மூலமோ, அது மாதந்தோறும் ஏற்கக்கூடிய மொத்த வேலையின் அளவை அதிகரிப்பதன் மூலமோ அதன் உற்பத்தித் திறனை உயர்த்த முடியும்.

dots படிப்படியாக வழங்கப்படுகின்றன. உங்கள் கணக்கிற்கு அணுகல் கிடைக்கச் சில நாட்கள் ஆகலாம்.

தொடங்குதல்

எனது dot-ஐ எப்படி அமைப்பது?

iOS அல்லது Android-இல் உள்ள ChatGPT கைப்பேசிச் செயலி, கணினிச் செயலி அல்லது கணினியில் உள்ள இணையதளத்தில் உங்கள் dot-ஐ உருவாக்குங்கள். தொடங்குவதற்கு, ஆரம்ப அமைப்பு வழிமுறைகளைப் பின்பற்றுங்கள். கைப்பேசியில் அமைக்க, கைப்பேசிச் செயலியின் சமீபத்திய பதிப்பைப் பயன்படுத்துங்கள். கணினிச் செயலி Windows-இலும் கிடைக்கிறது.

ChatGPT கைப்பேசிச் செயலியிலும் உங்கள் dot-உடன் பேசலாம். கைப்பேசி இணையதளத்தில் dots ஆதரிக்கப்படுவதில்லை.

அமைக்கும்போது உங்கள் dot-க்கு ஒரு பெயர் கொடுக்கலாம். அதன் இயல்புநிலை அடையாளப்பெயர் @yourname-dot. நீங்கள் பெயரிட்டதும், அதன் அடையாளப்பெயர் @yourname-agentname என மாறும். பின்னர் அதன் பெயரையோ தோற்றப்படத்தையோ மாற்ற, அதன் பெயர் அல்லது தோற்றப்படத்தைத் தேர்ந்தெடுத்து சுயவிவரத்தைத் திறக்கவும். பிறகு பென்சில் சின்னத்தைத் தேர்ந்தெடுக்கவும்.

உங்கள் dot-க்கு வழங்கப்பட்டுள்ள கதாபாத்திரங்களில் ஒன்றையோ செல்லப்பிராணியையோ தேர்ந்தெடுக்கலாம். உங்கள் dot உங்களுக்காக ஒரு செல்லப்பிராணியை உருவாக்கவும் கூடும்.

உங்கள் dot-உடன் பணிபுரிதல்

வழக்கமான ChatGPT உரையாடலிலிருந்து எனது dot எப்படி வேறுபடுகிறது?

உங்கள் dot என்பது ChatGPT-இல் எப்போதும் செயல்படும் ஓர் ஏஜென்ட். அது தொடர்ச்சியான பொறுப்புகளை ஏற்று, உரையாடல்களுக்கு இடையிலும் தொடர்ந்து முன்னேறிச் செயல்படும். உங்கள் dot-க்கு எனத் தனி மேகக் கணினி உள்ளது. நீங்கள் இணைக்கும் செயலிகளில் அது வேலை செய்கிறது; நடந்துவரும் வேலையில் உதவ, பின்னணித் தகவல்களை நினைவில் வைத்துக்கொள்கிறது.

உங்கள் dot-க்கு ஓர் இலக்கைக் கொடுத்து, அது தானாக என்ன செய்யலாம் என்பதை வரையறுக்கவும். சிக்கலான பிரச்சினைகளை ஆராய்ந்து தீர்க்கவும், அடுத்து என்ன செய்ய வேண்டும் என்பதைக் கண்டறியவும், உங்கள் மதிப்பாய்வுக்காக முடிவுகளை வழங்கவும் அதனால் முடியும். உங்கள் தீர்மானம் தேவைப்படும் முடிவுகளுக்கு அது உங்களை அணுகும்.

எனது dot-க்கு ஒரு பணியை எப்படிக் கொடுப்பது?

உங்கள் dot என்ன செய்ய வேண்டும் என்பதை விவரித்து, அதற்குத் தேவையான விவரங்களைப் பகிருங்கள். எடுத்துக்காட்டாக, உங்கள் நாள்காட்டியைப் பார்க்கவோ, ஒரு தலைப்பை ஆராயவோ, ஏதாவது ஒன்றைப் பின்னர் நினைவூட்டவோ அதைக் கேட்கலாம். கூடுதல் தகவல்களை வழங்க அல்லது கோரிக்கையை மாற்ற, உரையாடலில் பதிலளிக்கலாம்.

ஒரு கோப்பையோ புகைப்படத்தையோ இணைக்க, உரையாடலில் + என்பதைத் தேர்ந்தெடுக்கவும்.

கணினிச் செயலியில் உங்கள் dot-இன் சுயவிவரத்தைத் திறந்து, நடந்துகொண்டிருப்பவை, திட்டமிடப்பட்டவை, முடிக்கப்பட்டவை ஆகியவற்றின் கீழ் செயல்பாடுகளை மதிப்பாய்வு செய்யலாம். சுயவிவரத்திலிருந்து உங்கள் dot-இன் கணினியைத் திறந்து, அதைப் பார்க்கவும் அதில் செயல்படவும் முடியும். கைப்பேசியில், கணினி உங்கள் கட்டுப்பாட்டில் திறக்கும்.

எனது dot எனது சொந்தக் கணினியைப் பயன்படுத்த முடியுமா?

உங்கள் dot-க்கு எனத் தனி மேகக் கணினி உள்ளது. உங்கள் உள்ளூர் கணினிக்கான அணுகலை வழங்குவது உங்கள் விருப்பம். தொடக்கத்தில் அது அணைக்கப்பட்டிருக்கும். ஒரு கணினியை இணைக்க, அந்தக் கணினியில் உள்ள ChatGPT கணினிச் செயலியைப் பயன்படுத்தவும். உங்கள் உள்ளூர் கணினியில் செய்யப்படும் வேலை தனித்தனிப் பணிகளாக நடைபெறும். அவை பக்கப்பட்டியில் தோன்றும்.

ஒரு கணினியை இணைத்து, அணுகலை அனுமதி என்பதை உறுதிசெய்ததும், உங்கள் dot அதன் எந்தச் செய்தியிடல் வழியாகவும் அந்தக் கணினியில் கோப்புகளை அணுகவும் வேலை செய்யவும் முடியும். அந்தக் கணினியில் உங்கள் dot கோப்புகளை அணுகுவதையோ வேலை செய்வதையோ நிறுத்த, அணுகலைத் திரும்பப் பெறு என்பதை உறுதிசெய்யவும்.

உள்ளூர் கணினி அணுகல் இயக்கப்பட்டிருந்தால், உங்கள் dot வேலை அல்லது Codex பணிகளை உருவாக்கலாம், உள்ளூர் திறன்களைப் பயன்படுத்தலாம். அதன் மேக உலாவி தடுக்கப்படும்போது உங்கள் உள்ளூர் உலாவியையும் பயன்படுத்தலாம்.

எனது dot Codex மேகச் சூழல்களைப் பயன்படுத்த முடியுமா?

உங்கள் dot, Codex மேகச் சூழல்களில் மேகப் பணிகளை உருவாக்க முடியும். அதைப் பயன்படுத்துமாறு உங்கள் dot-ஐக் கேட்கும் முன், Codex-இல் அந்தச் சூழலை உருவாக்கவும்.

இணைக்கப்பட்ட செயலிகள்

செயலிகளை எப்படி இணைத்து நிர்வகிப்பது?

இணைக்கப்பட்ட செயலிகள், உங்கள் பணிகளுக்குப் பயன்படும் தகவல்களை உங்கள் dot அணுக அனுமதிக்கின்றன. அந்தத் தகவல்கள் குறித்து நீங்கள் குறிப்பிட்ட கேள்வி எதுவும் கேட்காவிட்டாலும், உங்கள் dot தானாக முன்வந்து அவற்றைப் பரிசீலித்து, அவற்றிலிருந்து நினைவுகளை உருவாக்கலாம்.

கைப்பேசியில் ஒரு செயலியைப் பரிசீலிக்க அல்லது இணைக்க, உங்கள் dot-இன் சுயவிவரத்தைத் திறந்து தனிப்பயனாக்கு > செருகுநிரல்கள் என்பதற்குச் செல்லவும். ஆதரிக்கப்படும் செயலியைத் தேர்ந்தெடுத்து, இணைக்கும் முன் அதன் அனுமதிகளைப் பரிசீலிக்கவும். செருகுநிரல்கள் திரை, பகிரப்பட்ட ChatGPT அமைப்புகளைப் பயன்படுத்துகிறது. கிடைக்கும் செயலிகள் மாறுபடலாம்.

இணைக்கப்பட்ட செயலிகளின் இணைப்பைத் துண்டிக்கலாம். ஒரு செயலியின் இணைப்பைத் துண்டிப்பதால், அதிலிருந்து உங்கள் dot ஏற்கெனவே பெற்ற தகவல்கள் நீக்கப்படாது. உங்கள் dot-ஐ நீக்கினால், அது தனது சொந்த நினைவுகளில் சேமித்த தகவல்கள் அகற்றப்படும். “எனது dot-ஐ எப்படி மீட்டமைப்பது?” என்ற பகுதியைப் பார்க்கவும். அது கீழே உள்ளது.

எனது dot-ஐ Slack அல்லது மின்னஞ்சலுடன் இணைக்க முடியுமா?

கணினியில் உள்ள ChatGPT-இலிருந்து உங்கள் dot-ஐ Slack-உடன் இணைக்கலாம். உங்கள் தனிப்பட்ட மின்னஞ்சல் கணக்கையும் இணைக்கலாம். இதனால் உங்கள் பணிகளுக்கு dot அதைப் பயன்படுத்த முடியும். அறிமுகத்தின்போது, உங்கள் dot-க்கு எனத் தனியான மின்னஞ்சல் முகவரியை வழங்க முடியாது.

எனது dot என்னை அழைக்க முடியுமா?

அறிமுகத்தின்போது, உங்கள் dot தானாக உங்களை அழைக்க முடியாது.

திட்டமிடப்பட்ட பணிகள்

பணிகளைத் திட்டமிட்டு, நிலவரத் தகவல்களைப் பெறுவது எப்படி?

நினைவூட்டலை அமைக்கவோ, குறிப்பிட்ட இடைவெளிகளில் சரிபார்க்கவோ உங்கள் dot-ஐக் கேளுங்கள். எடுத்துக்காட்டாக, தினமும் காலையில் உங்கள் நாள்காட்டியைப் பார்த்து, அடுத்தடுத்து என்ன நிகழ்வுகள் உள்ளன எனச் சொல்லுமாறு கேட்கலாம்.

திட்டமிட்டபடி செயல்படுத்தப்படும் பணிகளும் தானாக முன்வந்து வழங்கப்படும் நிலவரத் தகவல்களும் உரையாடலில் தோன்றும். திட்டமிடப்பட்ட பணியை நிர்வகிக்க, உங்கள் dot-இன் சுயவிவரத்தில் சமீபத்திய செயல்பாடு என்பதில் அதைத் தேர்ந்தெடுக்கவும் அல்லது ChatGPT-இல் திட்டமிடப்பட்டவை பகுதியைத் திறக்கவும். செயலில் உள்ள, இடைநிறுத்தப்பட்ட, முடிக்கப்பட்ட பணிகளைப் பரிசீலிக்கலாம். ஒரு பணி மீண்டும் நிகழும் அட்டவணை, நேரம் அல்லது நிறைவு அறிவிப்புகளை மாற்ற, அந்தப் பணியைத் திறக்கவும்.

என்னிடமிருந்து புதிய செய்தி வராமலேயே எனது dot எப்போது வேலையைத் தொடங்கும்?

உங்கள் dot பின்னணியில் ஆராய்ந்து, உதவுவதற்கான வழிகளைப் பரிந்துரைக்கலாம். நீங்கள் புதிய கேள்வி எதுவும் கேட்காவிட்டாலும், இணைக்கப்பட்ட தகவல்களைத் தானாக முன்வந்து பரிசீலித்து, அவற்றிலிருந்து நினைவுகளை உருவாக்கலாம். நீங்கள் திட்டமிட்டுள்ள நினைவூட்டல்கள் அல்லது தொடர்ச்சிப் பணிகளை அது செயல்படுத்தலாம். உங்கள் dot-இன் சுயவிவரத்தில் திட்டமிடப்பட்ட வேலையைப் பரிசீலிக்கலாம் அல்லது அது தொடர வேண்டாம் என நீங்கள் விரும்பும்போது dot-ஐ இடைநிறுத்தலாம்.

குறுஞ்செய்தி அனுப்புதல்

யார் dot-க்கு குறுஞ்செய்தி அனுப்பலாம்?

அமெரிக்காவில் குறைந்த எண்ணிக்கையிலான Pro பயனர்களுக்குக் குறுஞ்செய்தி வசதி சோதனைப் பதிப்பாகக் கிடைக்கிறது. Business அல்லது Enterprise வர்க்ஸ்பேஸ்களில் இது ஆதரிக்கப்படுவதில்லை.

உங்கள் dot-க்கு குறுஞ்செய்தி அனுப்ப iMessage அல்லது RCS தேவை.

எனது dot-க்கு குறுஞ்செய்தி அனுப்புவது எப்படி?

ChatGPT கைப்பேசிச் செயலியிலோ, கணினியில் உள்ள இணையதளத்திலோ, கணினிச் செயலியிலோ உங்கள் தொலைபேசியை இணைக்கலாம்:

1. உங்கள் dot-இன் சுயவிவரத்தைத் திறந்து குறுஞ்செய்தி அனுப்புதல் என்பதைத் தேர்ந்தெடுக்கவும்.

2. உங்கள் தொலைபேசி எண்ணை உள்ளிட்டு, உறுதிப்படுத்தல் குறுஞ்செய்தியை அனுப்பு என்பதைத் தேர்ந்தெடுக்கவும்.

3. உங்களுக்குக் கிடைக்கும் குறியீட்டை உள்ளிட்டு, தொலைபேசி எண்ணைச் சரிபார் என்பதைத் தேர்ந்தெடுக்கவும்.

உங்கள் எண் சரிபார்க்கப்பட்டதும், உங்கள் தொலைபேசியிலிருந்து dot-க்கு குறுஞ்செய்தி அனுப்பலாம்.

உங்கள் dot-இன் சுயவிவரத்தில் குறுஞ்செய்தி அனுப்புதல் என்ற விருப்பம் தெரியவில்லை என்றால், உங்கள் கணக்கிற்குக் குறுஞ்செய்தி வசதி இன்னும் கிடைக்கவில்லை. பின்னர் மீண்டும் முயலவும். 

எனது மற்ற குறுஞ்செய்தி உரையாடல்களை dot பார்க்க முடியுமா?

இல்லை. குறுஞ்செய்தி வசதியை இயக்கினால், உங்கள் dot-க்கு செய்தி அனுப்ப மட்டுமே முடியும். உங்கள் மற்ற குறுஞ்செய்தி உரையாடல்களை அணுகும் உரிமையை உங்கள் dot-க்கோ OpenAI-க்கோ அது வழங்காது.

மற்றவர்கள் எனது dot-க்கு குறுஞ்செய்தி அனுப்ப முடியுமா?

இல்லை. குறுஞ்செய்தி வசதி உங்களுக்கும் உங்கள் dot-க்கும் இடையிலான தனிப்பட்ட உரையாடலுக்கு மட்டுமே செயல்படும். குழுக் குறுஞ்செய்தி உரையாடல்களில் உங்கள் dot பங்கேற்க முடியாது.

எனது dot-க்கு SMS அனுப்பினால் என்ன ஆகும்?

SMS ஆதரிக்கப்படுவதில்லை. இணைக்கப்பட்ட எண்ணிலிருந்து SMS அனுப்பினால், அதற்குப் பதிலாக iMessage, RCS அல்லது ChatGPT செயலியைப் பயன்படுத்துமாறு தானியங்குப் பதில் உங்களுக்கு வரலாம். உங்கள் தொலைத்தொடர்பு நிறுவனத்தின் SMS கட்டணங்கள் பொருந்தும்.

எனது dot-இன் தொலைபேசி எண்ணுக்கு அழைக்க முடியுமா?

இல்லை, உங்கள் dot-இன் தொலைபேசி எண்ணுக்குக் குறுஞ்செய்தி மட்டுமே அனுப்ப முடியும். 

உங்கள் dot-ஐ அழைக்க, ChatGPT கைப்பேசிச் செயலியில் அதன் உரையாடலைத் திறந்து தொலைபேசிப் பொத்தானைத் தேர்ந்தெடுக்கவும்.

எனது dot-க்கு அனுப்பும் குறுஞ்செய்திகள் முனையிலிருந்து முனைவரை குறியாக்கம் செய்யப்படுமா?

உங்கள் dot-க்கான குறுஞ்செய்திகளை அனுப்பவும் பெறவும், மூன்றாம் தரப்புச் செய்தியிடல் சேவை வழங்குநரான Linq-ஐப் பயன்படுத்துகிறோம். Linq உடனான கூட்டாண்மையின் ஒரு பகுதியாக, எங்கள் அதிநவீன மாதிரிகளையும் மூன்றாம் தரப்புப் பாதுகாப்பு நிறுவனங்களையும் கொண்டு விரிவான பாதுகாப்புச் சோதனைகளை மேற்கொண்டுள்ளோம். OpenAI-ஐ அடையும் முன் Linq இந்தச் செய்திகளைச் செயலாக்குவதால், நீங்கள் iMessage அல்லது RCS பயன்படுத்தினாலும், உங்களுக்கும் உங்கள் dot-க்கும் இடையிலான உரையாடல் முனையிலிருந்து முனைவரை குறியாக்கம் செய்யப்படுவதில்லை. 

எனது செய்திகள் எப்படிப் பாதுகாக்கப்பட்டுச் சேமிக்கப்படுகின்றன?

உங்கள் குறுஞ்செய்திகளைச் சென்றுசேர்ப்பதற்காக Linq அவற்றைச் செயலாக்குகிறது. ஆனால் சென்றுசேர்ந்த பிறகு அவற்றின் உள்ளடக்கத்தை வைத்திருப்பதில்லை. அதன் ஊழியர்கள் உங்கள் குறுஞ்செய்திகளை எப்போது அணுகலாம் என்பதையும் அது கட்டுப்படுத்துகிறது. நேரப் பதிவுகள், சென்றுசேர்ந்த நிலை போன்ற, செய்தி விநியோகம் பற்றிய குறைந்த அளவிலான தகவல்களை அது வைத்திருக்கலாம். எங்கள் பிரைவசி பாலிசியில் விவரிக்கப்பட்டுள்ளபடி, ChatGPT-இல் உங்கள் dot உரையாடல்களின் ஒரு பகுதியாக உங்கள் குறுஞ்செய்திகளை OpenAI சேமிக்கிறது.

அறிமுகத்திற்கு முன், Linq உடனான தனது இணைப்பை OpenAI மதிப்பாய்வு செய்தது. ஒரு சுயாதீன நிறுவனமும் Linq-இன் செய்தியிடல் சேவையைச் சோதித்தது.

எனது dot-இலிருந்து வரும் குறுஞ்செய்திகளை எப்படி நிறுத்துவது?

உங்கள் dot-இலிருந்து குறுஞ்செய்திகள் வருவதை நிறுத்த, STOP எனப் பதிலளிக்கவும்.

ChatGPT செயலியிலும் கணினியில் உள்ள இணையதளத்திலும் குறுஞ்செய்தி வசதியை அணைக்கலாம்:

1. உங்கள் dot-இன் சுயவிவரத்தைத் திறக்கவும்.

2. குறுஞ்செய்தி அனுப்புதல் > குறுஞ்செய்தி வசதியை அணை என்பதைத் தேர்ந்தெடுக்கவும்.

குறுஞ்செய்தி வசதியை அணைத்தால் எனது உரையாடல்கள் நீக்கப்படுமா?

இல்லை. குறுஞ்செய்தி வசதியை அணைத்தால், உங்கள் தொலைபேசி எண்ணின் இணைப்பு துண்டிக்கப்படும். ChatGPT-இல் உள்ள பழைய உரையாடல்களோ சேமித்த நினைவுகளோ உடனடியாகவோ 30 நாட்களுக்குப் பிறகோ நீக்கப்படாது.

செய்தி அல்லது தரவுக் கட்டணங்கள் பொருந்துமா?

செய்தி மற்றும் தரவுக் கட்டணங்கள் பொருந்தக்கூடும். குறுஞ்செய்தி வசதியை இயக்கும்போது காட்டப்படும் அறிவிப்புடன், OpenAI-இன் டெர்ம்ஸ் ஆஃப் யூஸ் மற்றும் பிரைவசி பாலிசி ஆகியவற்றையும் படிக்கவும்.

மெமரி

எனது dot நினைவகத்தை எப்படிப் பயன்படுத்துகிறது?

உங்கள் dot, ChatGPT-இலிருந்து நினைவுகளைப் பெறுகிறது. இணைக்கப்பட்ட செயலிகளில் உள்ள தகவல்கள் உட்பட, தனக்கெனச் சொந்த நினைவுகளையும் உருவாக்க முடியும். இதனால், நடந்துவரும் வேலையில் பின்னணித் தகவல்களை அதனால் பயன்படுத்த முடிகிறது.

கைப்பேசியில், தனிப்பயனாக்கு > மெமரி என்பதில் ChatGPT நினைவில் வைத்துள்ளவற்றைப் பார்க்கலாம். இந்தத் திரை, பகிரப்பட்ட ChatGPT நினைவக அமைப்புகளைப் பயன்படுத்துகிறது.

உங்கள் dot தனக்கெனச் சேமித்த நினைவுகளை நீக்க, அந்த dot-ஐ நீக்க வேண்டும். எனது dot-ஐ எப்படி மீட்டமைப்பது? என்ற பகுதியைப் பார்க்கவும். அது கீழே உள்ளது.

கட்டுப்பாடுகளும் ஒப்புதல்களும்

உறுதிப்படுத்தல்களையும் தனிப்பயன் விதிகளையும் எப்படி நிர்வகிப்பது?

சில செயல்களுக்கு, உங்கள் dot எதைப் பகிரலாம், வாங்கலாம் அல்லது அணுகலாம் என்பதற்கான விதிகளை அமைக்கலாம்.

கைப்பேசியில், இயல்புநிலை விதிகளைப் பரிசீலிக்க அல்லது புதிய விதியைச் சேர்க்க, தனிப்பயனாக்கு > தனிப்பயன் விதிகள் என்பதைத் திறக்கவும். அந்த விதி எந்தச் செயலுக்குப் பொருந்தும் என்பதை விவரித்து, பின்வரும் செயல்முறைகளில் ஒன்றைத் தேர்ந்தெடுக்கவும்:

• கேட்காமல் செயல்படு

• முன் ஒப்புதல் இருந்தால் செயல்படு

• செயல்படும் முன் கேள்

• உங்களிடம் ஒப்படை

“முன் ஒப்புதல்” என்பது, அந்தச் செயலைச் செய்யுமாறு உங்கள் ப்ராம்ப்ட்டில் நீங்கள் வெளிப்படையாகக் கேட்டிருப்பதைக் குறிக்கும். சரிக்குறியைப் பயன்படுத்தி விதியைச் சேமித்து, பிறகு தனிப்பயன் விதிகள் என்பதில் அதைச் சரிபார்க்கவும்.

உங்கள் விதிகளைப் பின்பற்றும்போதுகூட உங்கள் dot தவறுகள் செய்யக்கூடும். அதன் வேலையை மதிப்பாய்வு செய்து, முடிவை நம்பிப் பயன்படுத்தும் முன் முக்கிய விவரங்களைச் சரிபார்க்கவும்.

எனது dot-ஐ எப்படி இடைநிறுத்துவது?

நீங்கள் மீண்டும் தொடங்கத் தயாராகும் வரை உங்கள் dot-ஐ நிறுத்திவைக்க, அதன் சுயவிவரத்தில் கூடுதல் விருப்பங்கள் பட்டியலை (•••) திறந்து, இடைநிறுத்து என்பதைத் தேர்ந்தெடுக்கவும். அதை மீண்டும் தொடங்க, இடைநிறுத்தப்பட்டது • தொடரத் தட்டவும் என்பதைத் தேர்ந்தெடுக்கவும்.

எனது dot-ஐ எப்படி மீட்டமைப்பது?

உங்கள் dot-ஐ நீக்கினால், அது தனக்கெனச் சேமித்த நினைவுகளும் திட்டமிடப்பட்ட பணிகளும் அகற்றப்படும். அது உருவாக்கிய தனி வேலை அல்லது Codex அரட்டைகள் நீக்கப்படாமல் இருக்கும். உங்கள் முதன்மை உரையாடல் காப்பகப்படுத்தப்படும். அந்த dot-உடன் அதைத் தொடர முடியாது. உறுதிசெய்யும் முன், உரையாடலிலிருந்து உங்களுக்குத் தேவையானவற்றைச் சேமித்துக்கொள்ளவும். நீக்கியதை மீட்டெடுக்க முடியாது.

1. உங்கள் dot-இன் சுயவிவரத்தைத் திறந்து, கூடுதல் விருப்பங்கள் பட்டியலை (•••) தேர்ந்தெடுக்கவும்.

2. நீக்கு என்பதைத் தேர்ந்தெடுக்கவும்.

3. உறுதிசெய்ய நீக்கு என்பதையோ, உங்கள் dot-ஐ வைத்திருக்க ரத்துசெய் என்பதையோ தேர்ந்தெடுக்கவும்.

உங்கள் dot-ஐ நீக்குவதால் அதற்குப் பதிலாக மற்றொன்று உருவாக்கப்படாது. அமைக்கும் வசதி உங்களுக்குக் கிடைக்கும் சாதனத்தில் புதிய dot-ஐ உருவாக்கலாம்.

உங்கள் dot-இல் ஏற்படும் சிக்கல்களைத் தீர்த்தல்

எனது dot-ஆல் எனது கணினியையோ உள்ளூர் கருவிகளையோ பயன்படுத்த முடியவில்லை

உங்கள் dot பயன்படுத்த வேண்டிய கணினியில் உள்ள ChatGPT கணினிச் செயலியில் உள்ளூர் அணுகலை இயக்கவும்:

1. உங்கள் dot-இன் சுயவிவரத்தைத் திறக்கவும்.

2. கணினிகள் என்பதன் கீழ், உங்கள் கணினி என்பதைக் கண்டறிந்து, அணுகலை அனுமதி என்பதைத் தேர்ந்தெடுக்கவும்.

3. உறுதிப்படுத்தல் விவரங்களைப் படித்து, மீண்டும் அணுகலை அனுமதி என்பதைத் தேர்ந்தெடுக்கவும்.

அந்தக் கணினியை இணையத்தில் இணைத்தபடி, ChatGPT செயலியைத் திறந்து வைத்திருக்கவும். இணைய இணைப்பில் இல்லை என்பது கணினி தற்போது பயன்பாட்டிற்குக் கிடைக்கவில்லை என்பதைக் குறிக்கும்; அதற்கான இணைப்பு அனுமதி திரும்பப் பெறப்பட்டதாக அர்த்தமல்ல. அணுகலை அனுமதி என்ற விருப்பம் கிடைக்கவில்லை என்றால், அந்தக் கணினியில் கணினிச் செயலியைப் பயன்படுத்துகிறீர்களா எனச் சரிபார்க்கவும்.

ஒரு கணினியை Codex-உடன் இணைப்பதோ வேலை ஒத்திசைவை இயக்குவதோ உங்கள் dot-க்கு உள்ளூர் அணுகலை வழங்காது. உள்ளூர் திறன்களைப் பயன்படுத்த, உங்கள் dot-உடன் இணைக்கப்பட்ட கணினி தேவை.

எனது dot-ஆல் ஒரு செயலியையோ இணையதளத்தையோ பயன்படுத்த முடியவில்லை

இணைக்கப்பட்ட செயலி என்றால், அதற்கான ஆதரிக்கப்படும் செருகுநிரல் நிறுவப்பட்டு, சரியான கணக்குடன் இணைக்கப்பட்டுள்ளதா எனச் சரிபார்க்கவும். அனுமதிக்கப்பட்ட செயல்களைப் பரிசீலிக்கவும்: தகவல்களைப் படிக்கும் அனுமதியில், அவற்றை மாற்றவோ செய்திகளை அனுப்பவோ அனுமதி இல்லாமல் இருக்கலாம். இணைப்பு காலாவதியாகியிருந்தால், மீண்டும் இணைப்பதற்கான கோரிக்கையைத் திறந்து இணைக்கவும்.

உங்கள் dot-இன் மேக உலாவிக்கு எனத் தனி உள்நுழைவு அமர்வுகள் உள்ளன. உங்கள் தனிப்பட்ட கணினியில் உள்நுழைவதால், உங்கள் dot உள்நுழையாது. இணையதளச் சரிபார்ப்பு உட்பட உள்நுழைவுக் கோரிக்கையை நிறைவேற்றவும் அல்லது கட்டுப்பாட்டை ஏற்று நீங்களே உள்நுழையவும். முடித்ததும் கட்டுப்பாட்டைத் திருப்பிக் கொடுக்கவும்.

ஒரு இணையதளம் மேக உலாவியைத் தடுத்தால், உங்கள் இணைக்கப்பட்ட கணினியில் முயலுமாறு dot-ஐக் கேட்கலாம். இதனால் தனியான உள்ளூர் பணி உருவாகலாம். மேக உலாவியின் அமர்வு அதற்கு மாற்றப்படாது; இணையதளம் செயல்படும் என்பதற்கும் உத்தரவாதம் இல்லை.

ஒரு செயலுக்கு ஒப்புதல் அளித்தும் அது இன்னும் தடுக்கப்பட்டுள்ளது

பாதிக்கப்பட்ட பணியைத் திறந்து, தனியான உள்நுழைவு, இணைப்பு அல்லது ஒப்புதல் கோரிக்கை உள்ளதா எனச் சரிபார்க்கவும். தொடர்புடைய தனிப்பயன் விதியைப் பரிசீலிக்கவும்: அதற்கு வெளிப்படையான அறிவுறுத்தல் தேவைப்பட்டால், அந்தச் செயலைச் செய்யுமாறு நேரடியாகக் கேட்கவும். வரைவு ஒன்றைக் கேட்பது, அதை அனுப்புவதற்கான அனுமதி ஆகாது.

தனிப்பயன் விதிகள் செயலி அல்லது கணினிக்கான அணுகலை வழங்காது; உள்ளமைந்த பாதுகாப்பு ஏற்பாடுகளையும் மீறாது. கடவுச்சொல்லை மாற்றுவது போன்ற சில படிகளை நீங்களே செய்ய வேண்டும்.

எனது dot செய்த வேலையையோ அதன் கோப்புகளையோ கண்டுபிடிக்க முடியவில்லை

ChatGPT கணினிச் செயலியில், உங்கள் dot-இன் பெயர் அல்லது தோற்றப்படத்தைத் தேர்ந்தெடுத்து அதன் சுயவிவரத்தைத் திறக்கவும். தொடர்புடைய பணியைத் திறந்து, அதன் முன்னேற்றம், கோப்புகள், முடிவுகளைப் பரிசீலிக்கவும். இணைக்கப்பட்ட கணினியின் பக்கப்பட்டியில் உள்ளூர் பணிகள் தோன்றும்; தொடர்ச்சியாக நடைபெறும் வேலை திட்டமிடப்பட்டவை என்பதன் கீழ் இருக்கும்.

அந்தப் பணி தொடங்கப்பட்ட கணினி அல்லது மேகச் சூழலைச் சரிபார்க்கவும். உங்கள் dot-க்குத் தேர்ந்தெடுக்கப்பட்ட கணினியை மாற்றுவதால், ஏற்கெனவே உள்ள பணி இடம் மாறாது.

உங்கள் dot-இன் மேகக் கணினியைப் பார்க்க, அதன் சுயவிவரத்தில் கணினிகள் என்பதன் கீழ் பார்க்கவும். உங்களுக்குக் கட்டுப்பாடு தேவைப்பட்டால், கட்டுப்பாட்டை ஏற்றுக்கொள் என்பதைத் தேர்ந்தெடுக்கவும். உங்கள் dot தொடரத் தயாரானதும், கட்டுப்பாட்டைத் திருப்பிக் கொடு என்பதைத் தேர்ந்தெடுக்கவும்.

எனது dot வேலை செய்வதை நிறுத்திவிட்டது அல்லது ஓர் அறிவுறுத்தலைப் பின்பற்றவில்லை

பாதிக்கப்பட்ட பணியைத் திறந்து, நிலுவையில் உள்ள முடிவு, ஒப்புதல், உள்நுழைவு அல்லது இணைப்புக் கோரிக்கைக்குப் பதிலளிக்கவும். உங்கள் dot இடைநிறுத்தப்பட்டிருந்தால், அதை மீண்டும் தொடரச் செய்யவும்.

தொடர்ச்சியாக நடைபெறும் வேலைக்கு, திட்டமிடப்பட்டவை என்பதைத் திறந்து, சேமிக்கப்பட்ட அறிவுறுத்தல்களையும் நேரத்தையும் சரிபார்க்கவும். ஒரு பணி செயல்படுத்தப்பட்டு முடிந்ததாகக் குறிக்கப்பட்டிருந்தாலும், அதன் முடிவைப் பரிசீலிக்கவும்.

பாதிக்கப்பட்ட பணியிலேயே நேரடியாகத் திருத்தங்களைத் தெரிவிக்கவும். உங்களுக்குத் தேவையான முடிவையும் தொடர்புடைய கோப்புகள் அல்லது இணைப்புகளையும் சேர்க்கவும். ஒவ்வொரு பணிக்கும் தனி உரையாடல் உள்ளது. உங்கள் dot-உடன் நீங்கள் நடத்திய அனைத்து உரையாடல்களும் அந்தப் பணிக்குத் தானாகக் கிடைக்காது.

எனது dot-ஐக் கண்டுபிடிக்க முடியவில்லை

நீங்கள் பயன்படுத்த விரும்பும் கணக்கிலும் வர்க்ஸ்பேஸிலும் இருக்கிறீர்களா எனச் சரிபார்த்து, பின்னர் chatgpt.com/dots என்பதைத் திறக்கவும்.

• Pro: ஐரோப்பிய பொருளாதாரப் பகுதி, சுவிட்சர்லாந்து, ஐக்கிய இராச்சியம் ஆகியவற்றுக்கு வெளியே உள்ள, 18 வயதும் அதற்கு மேற்பட்ட வயதும் உடைய பயனர்களுக்குக் கிடைக்கும்.

• Business Premium: வர்க்ஸ்பேஸ் தகுதித் தேவைகளுக்கு உட்பட்டு, ChatGPT ஆதரிக்கப்படும் பகுதிகளில் கிடைக்கும்.

• Edu மற்றும் Healthcare உள்ளிட்ட Enterprise: சோதனைப் பதிப்பிற்கான அணுகலை உங்கள் வர்க்ஸ்பேஸ் நிர்வாகி இயக்க வேண்டும்; அது இயல்பாகவே அணைக்கப்பட்டிருக்கும்.

படிப்படியான அறிமுகத்தைப் பொறுத்தே அணுகல் கிடைக்கும்.

உங்கள் dot-ஐ அழைப்பதில் சிக்கலா?

உங்கள் dot-இன் உரையாடலைத் திறந்து, அதை அழைக்கத் தொலைபேசிப் பொத்தானைத் தேர்ந்தெடுக்கவும். அழைப்பு செயல்படாமல் அரட்டை வசதி கிடைத்தால், அங்கே தட்டச்சு செய்து உரையாடலைத் தொடரலாம்.

மெமரி அமைப்புகளும் மீட்டமைப்பும் எவற்றை மாற்றுகின்றன?

கைப்பேசியில், தனிப்பயனாக்கு > மெமரி என்பதில் பகிரப்பட்ட ChatGPT நினைவக அமைப்புகளைக் காணலாம். உங்கள் dot தனக்கெனச் சேமித்த நினைவுகள் தனியானவை. அந்த அமைப்புகளை மாற்றுவதால், உங்கள் dot ஏற்கெனவே சேமித்த குறிப்புகளும் மாறும் என்று சொல்ல முடியாது.

உங்கள் dot-ஐ நீக்கினால், அது தனக்கெனச் சேமித்த நினைவுகளும் திட்டமிடப்பட்ட பணிகளும் அகற்றப்படும். அது உருவாக்கிய தனி வேலை அல்லது Codex அரட்டைகள் நீக்கப்படாமல் இருக்கும். உறுதிசெய்யும் முன், உங்களுக்குத் தேவையான முடிவுகளைச் சேமித்து, நீக்குதல் குறித்த அறிவிப்பைப் படிக்கவும்.