கண்ணோட்டம்
ஏபிஐ பயன்பாடு விகித வரம்புகளுக்கு உட்பட்டது. இந்த வரம்புகள் குறிப்பிட்ட காலத்தில் கோரிக்கைகள், டோக்கன்கள் அல்லது பிற பயன்பாட்டைக் கட்டுப்படுத்துகின்றன.
429 பதில் என்பது தற்காலிக விகித வரம்பு, முன்கட்டண இருப்பு தீர்ந்துபோனது அல்லது செலவு அல்லது பயன்பாட்டு வரம்பைக் குறிக்கலாம். மீண்டும் முயற்சிக்கும் முன் அல்லது கட்டண அமைப்புகளை மாற்றும் முன் பிழை விவரங்களைச் சரிபார்க்கவும்.
காரணத்தைக் கண்டறியவும்
பிழைச் செய்தியையும், வழங்கப்பட்டிருந்தால் error.code மதிப்பையும் படிக்கவும். கட்டணம் தொடர்பான பிழைகளிலும், பரந்த வகைப்பாட்டைக் குறிக்கும் insufficient_quota என்ற error.type மதிப்பு பயன்படுத்தப்படலாம்.
| பிழை அல்லது குறியீடு | இதன் பொருள் | என்ன செய்ய வேண்டும் |
| கோரிக்கைகள் அல்லது டோக்கன்களுக்கான விகித வரம்பு எட்டப்பட்டது | கோரிக்கைகள் பொருந்தும் விகித வரம்பை மீறுகின்றன. | கோரிக்கைகளை இடைவெளிவிட்டு அனுப்பி, கீழே உள்ள மறுமுயற்சி வழிகாட்டுதலைப் பின்பற்றவும். |
| credit_balance_exhausted | நிறுவனத்தில் முன்கட்டண கிரெடிட்கள் எதுவும் மீதமில்லை. | உங்கள் ஏபிஐ கட்டண அமைப்புகளில் கிரெடிட்களைச் சேர்க்கவும். |
| organization_usage_limit_exceeded | OpenAI நிர்ணயித்த பயன்பாட்டு வரம்பை நிறுவனம் எட்டிவிட்டது. | அதிக பயன்பாட்டு வரம்புக்கான ஒப்புதலைக் கோரவும். |
| organization_spend_limit_exceeded | நிறுவனம் தனக்கு அமலில் உள்ள செலவு வரம்பை எட்டிவிட்டது. | வரம்பை அதிகரிக்கவும் அல்லது நீக்கவும். இல்லையெனில், மாதாந்திர மீட்டமைப்பு வரை காத்திருக்கவும். |
| project_spend_limit_exceeded | திட்டம் தனக்கு அமலில் உள்ள செலவு வரம்பை எட்டிவிட்டது. | திட்ட வரம்பை அதிகரிக்கவும் அல்லது நீக்கவும். இல்லையெனில், மாதாந்திர மீட்டமைப்பு வரை காத்திருக்கவும். |
கட்டணம், செலவு அல்லது ஒதுக்கீடு தொடர்பான பிழைக்குப் பிறகு மீண்டும் முயற்சிப்பதால் அணுகல் மீண்டும் கிடைக்காது. முதலில் குறிப்பிடப்பட்ட இருப்பு அல்லது வரம்புச் சிக்கலைத் தீர்க்கவும். அமலில் உள்ள செலவு வரம்புகளில் செய்யப்படும் மாற்றங்கள் நடைமுறைக்கு வர நேரம் ஆகலாம்.
செலவு வரம்பை மாற்ற, தொடர்புடைய நிறுவனம் அல்லது திட்ட அமைப்புகளை நிர்வகிக்கும் அனுமதி தேவை. உங்களுக்கு அணுகல் இல்லாவிட்டால், அந்த அமைப்புகளை நிர்வகிப்பவரிடம் கேட்கவும்.
முன்கட்டண கிரெடிட்களை வாங்குவது பற்றி அறிய, முன்கட்டண ஏபிஐ கட்டண முறையை அமைத்தல் மற்றும் நிர்வகித்தல் என்பதைப் பார்க்கவும்.
பல்வேறு செலவுக் கட்டுப்பாடுகளைப் பற்றி அறிய, ஏபிஐ செலவு வரம்பு வழிகாட்டியைப் பார்க்கவும்.
பொருந்தும் விகித வரம்புகளைச் சரிபார்க்கவும்
உங்கள் நிறுவனத்தின் தற்போதைய பயன்பாட்டு நிலையையும் வரம்புகளையும் சரிபார்க்க, அதன் வரம்புகள் பக்கத்திற்குச் செல்லவும்.
விகித வரம்புகள் நிறுவனம் மற்றும் திட்ட அளவில் பொருந்தலாம். அவை தனிப்பட்ட பயனர்களுக்கான ஒதுக்கீடுகள் அல்ல. மாடலைப் பொறுத்தும் வரம்புகள் மாறுபடும். சில மாடல் குடும்பங்கள் ஒரே வரம்பைப் பகிர்ந்துகொள்கின்றன.
பிழை எந்த வரம்பைக் குறிப்பிடுகிறது என்பதைச் சரிபார்க்கவும். எடுத்துக்காட்டாக, நிமிடத்திற்கான கோரிக்கைகளும் நிமிடத்திற்கான டோக்கன்களும் தனித்தனி வரம்புகள். ஒரு வரம்புக்குக் கீழே இருக்கும்போதே மற்றொரு வரம்பை நீங்கள் எட்டக்கூடும்.
இமேஜ் ஜெனரேஷன் ஏபிஐ வரம்புகளைச் சரிபார்க்கவும்
இமேஜ் ஜெனரேஷன் ஏபிஐ விகித வரம்புகள் மாடலையும் உங்கள் பயன்பாட்டு நிலையையும் பொறுத்தவை. உங்கள் மாடலின் வரம்புகளைக் காண, மாடல்கள் பக்கத்தில் அதைத் தேர்ந்தெடுக்கவும்.
அமைப்பதற்கான வழிமுறைகளுக்கு, இமேஜ் ஜெனரேஷன் உருவாக்குநர் வழிகாட்டியைப் பார்க்கவும். பயன்பாட்டு நிலைகளைப் பற்றி மேலும் அறிய, ஏபிஐ விகித வரம்பு வழிகாட்டியைப் பார்க்கவும்.
உங்கள் கோரிக்கை பயன்படுத்தும் நிறுவனத்தை உறுதிப்படுத்தவும்
நீங்கள் பல நிறுவனங்களில் உறுப்பினராக இருந்தால், உங்கள் கோரிக்கைகள் நீங்கள் விரும்பும் நிறுவனத்தையும் திட்டத்தையும் பயன்படுத்துகின்றனவா என்பதை உறுதிப்படுத்தவும்.
உங்கள் ஏபிஐ விசை இயல்புநிலை நிறுவனத்தைப் பயன்படுத்தினால், இயல்புநிலை நிறுவன அமைப்பைச் சரிபார்க்கவும். நிறுவனங்களுக்கு இடையே கட்டண ஏற்பாடுகளும் பயன்பாட்டு நிலைகளும் வேறுபடலாம்.
தற்காலிக விகித வரம்புப் பிழைகளைக் குறைக்கவும்
கோரிக்கைகளை இடைவெளிவிட்டு அனுப்பவும்; ஒரே நேரத்தில் குவிப்பதைத் தவிர்க்கவும்
ஒரே நேரத்தில் அதிக எண்ணிக்கையிலான கோரிக்கைகளை அனுப்புவதற்குப் பதிலாக, அவற்றை இடைவெளிவிட்டு அனுப்பவும்.
காட்டப்படும் கால இடைவெளியைவிடக் குறுகிய கால இடைவெளிகளிலும் விகித வரம்புகள் அமல்படுத்தப்படலாம். எடுத்துக்காட்டாக, நிமிடத்திற்கு 60 கோரிக்கைகள் என்ற வரம்பு, 1 வினாடிக் கால இடைவெளிகளிலும் அமல்படுத்தப்படலாம். எனவே, உங்கள் சராசரிப் பயன்பாடு நிமிட வரம்புக்குக் கீழே இருப்பதாகத் தோன்றினாலும், குறுகிய நேரத்தில் அதிக கோரிக்கைகளை அனுப்புவது பிழையை ஏற்படுத்தலாம்.
நீண்ட ப்ராம்ப்ட்களும், தேவையின்றி அதிகமாக அனுமதிக்கப்பட்ட வெளியீட்டு டோக்கன் அளவுகளும் டோக்கன் விகிதப் பிழைகளுக்கு வழிவகுக்கலாம்.
சிறிது இடைவெளிவிட்டு மீண்டும் முயற்சிக்கவும்
தற்காலிக விகித வரம்புப் பிழைகளுக்கு:
பதிலில் Retry-After தலைப்பு உள்ளதா எனச் சரிபார்க்கவும்.
தலைப்பில் செல்லுபடியாகும் காத்திருப்பு நேரம் இருந்தால், மீண்டும் முயற்சிக்கும் முன் குறைந்தது அந்த நேரம் வரை காத்திருக்கவும்.
தலைப்பு இல்லாவிட்டால் அல்லது செல்லுபடியாகாவிட்டால், சீரற்ற சிறு இடைவெளியுடன் காத்திருப்பு நேரத்தை அடுக்குமுறையில் அதிகரிக்கவும்: ஒவ்வொரு தோல்வியடைந்த முயற்சிக்குப் பிறகும் காத்திருப்பு நேரத்தை அதிகரித்து, கூடுதலாகச் சிறிது சீரற்ற நேரத்தைச் சேர்க்கவும்.
மறுமுயற்சிகளின் எண்ணிக்கையையும் அவற்றுக்குச் செலவிடும் மொத்த நேரத்தையும் கட்டுப்படுத்தவும்.
அதிகாரப்பூர்வ OpenAI மென்பொருள் உருவாக்கக் கருவித்தொகுப்புகள், மறுமுயற்சிக்கு ஏற்ற விகித வரம்புப் பிழைகளுக்கு ஏற்கெனவே மீண்டும் முயற்சிக்கின்றன. Retry-After இருந்தால் அதையும் பின்பற்றுகின்றன. மற்றொரு மறுமுயற்சிச் சுழற்சியைச் சேர்க்கும் முன், அந்த மறுமுயற்சிகளையும் கணக்கில் கொள்ளவும்.
தோல்வியடைந்த கோரிக்கைகளும் நிமிடத்திற்கு விதிக்கப்படும் வரம்புகளில் கணக்கிடப்படுகின்றன. ஒரே கோரிக்கையைத் தொடர்ந்து மீண்டும் அனுப்புவது சிக்கலை நீடிக்கச் செய்யலாம்.
செயல்படுத்துவதற்கான வழிகாட்டுதலுக்கும் எடுத்துக்காட்டுகளுக்கும், ஏபிஐ விகித வரம்பு வழிகாட்டியைப் பார்க்கவும். மூன்றாம் தரப்பு மறுமுயற்சி நிரல் நூலகத்தை உங்கள் செயலியில் பயன்படுத்தும் முன் அதை ஆய்வு செய்யவும்.
ப்ராம்ப்ட் மற்றும் வெளியீட்டின் அளவைச் சரிபார்க்கவும்
உங்கள் ப்ராம்ப்ட்களிலிருந்து தேவையற்ற வழிமுறைகள், மீண்டும் இடம்பெறும் சூழல் தகவல்கள் மற்றும் எடுத்துக்காட்டுகளை நீக்கவும். திருத்தப்பட்ட ப்ராம்ப்ட் உங்களுக்குத் தேவையான முடிவை இன்னும் வழங்குகிறதா என்பதைச் சோதித்து உறுதிப்படுத்தவும்.
உங்கள் எண்ட்பாயிண்ட்டும் மாடலும் ஆதரிக்கும் வெளியீட்டு டோக்கன் அளவுருவைப் பயன்படுத்தவும்:
Chat Completions, max_completion_tokens அளவுருவைப் பயன்படுத்துகிறது.
Responses, max_output_tokens அளவுருவைப் பயன்படுத்துகிறது.
கோரிக்கைக்குத் தேவையானதைவிட மிக அதிகமான அளவை அனுமதிக்க வேண்டாம். இந்த அளவுருக்கள் கண்ணுக்குத் தெரியும் வெளியீட்டுடன் ரீஸனிங் டோக்கன்களையும் உள்ளடக்குகின்றன. எனவே, ரீஸனிங் மாடலைப் பயன்படுத்தும்போது இரண்டிற்கும் போதுமான அளவை அனுமதிக்கவும்.
உங்கள் பயன்பாட்டு நிலையைச் சரிபார்க்கவும்
ஒரே நேரத்தில் அதிக கோரிக்கைகள் அனுப்புவதைக் குறைத்து, டோக்கன் பயன்பாட்டைச் சரிபார்த்த பிறகும் பிழைகள் தொடர்ந்தால், வரம்புகளை அதிகரிப்பதற்கான வழிகளை உங்கள் வரம்புகள் பக்கத்தில் பார்க்கவும்.
உங்கள் நிறுவனம் வாங்கிய கிரெடிட்களின் மொத்தத் தொகை உருவாக்கம், அறிமுகம், வளர்ச்சி ஆகிய நிலைகளுக்கான தகுதி அளவுகளை எட்டும்போது, அதன் கட்டணப் பயன்பாட்டு நிலை தானாக மேம்படும். உயர் நிலைகளில் பொதுவாக அதிக விகித வரம்புகள் கிடைக்கும். நிலைகளுக்கான தகுதித் தேவைகளை அறிய, ஏபிஐ விகித வரம்பு வழிகாட்டியைப் பார்க்கவும்.
உங்களுக்கு ஒப்புதல் அளிக்கப்பட்ட மாதாந்திரப் பயன்பாட்டு வரம்பு, கோரிக்கை மற்றும் டோக்கன் விகித வரம்புகளிலிருந்து தனியானது. ஒன்றை அதிகரித்தால் மற்றொன்றும் மாறிவிட்டதாகக் கருதக்கூடாது.
சிக்கல் தொடர்ந்தால்
மேலதிக உதவியை நாடுவதற்கு முன்
பிழைச் செய்தியை அப்படியே பதிவு செய்து வைத்திருக்கவும். பிழைக் குறியீடு ஏதேனும் இருந்தால் அதையும், தொடர்புடைய கோரிக்கை அடையாளங்காட்டிகள், உங்கள் நேர மண்டலத்துடன் பிழை ஏற்பட்ட நேரம், உங்கள் கணக்கில் காட்டப்படும் தொடர்புடைய வரம்பு ஆகியவற்றையும் தயாராக வைத்திருக்கவும். நீங்கள் ஏற்கெனவே முயற்சித்த நடவடிக்கைகளைக் குறித்து வைத்துக்கொள்ளவும்.
OpenAI ஆதரவுக் குழுவைத் தொடர்புகொள்ளவும்
குறிப்பிடப்பட்ட வரம்பைச் சரிபார்த்த பிறகும் சிக்கலைத் தீர்க்க முடியாவிட்டால், ஹெல்ப் சென்டர் வழியாக OpenAI ஆதரவுக் குழுவைத் தொடர்புகொள்ளவும். ஏபிஐ விசைகளையோ பிற அங்கீகார ரகசியத் தகவல்களையோ சேர்க்க வேண்டாம்.