ChatGPT-ஐ இயக்கும் மாடல்கள் உட்பட OpenAI-இன் அடித்தள மாடல்கள், மூன்று முதன்மைத் தகவல் மூலங்களைப் பயன்படுத்தி உருவாக்கப்படுகின்றன: (1) இணையத்தில் பொதுவில் கிடைக்கும் தகவல்கள், (2) மூன்றாம் தரப்பினருடன் இணைந்து நாங்கள் அணுகும் தகவல்கள், (3) எங்கள் பயனர்கள், மனிதப் பயிற்றுநர்கள் மற்றும் ஆராய்ச்சியாளர்கள் வழங்கும் அல்லது உருவாக்கும் தகவல்கள்.

ChatGPT-இல் பயன்படுத்தப்படுவது போன்ற அடித்தள மாடல்களை உருவாக்குவதில், பயிற்சித் தரவைத் தயாரித்தல், ப்ரீ-ட்ரெயினிங், பிந்தைய பயிற்சி ஆகியவற்றுடன், பயன்பாட்டுக்குக் கொண்டுவந்த பிறகு தொடர்ந்து மதிப்பீடு செய்தல் மற்றும் மேம்படுத்துதல் உள்ளிட்ட பல கட்டங்கள் உள்ளன. மாடலின் செயல்திறன், நம்பகத்தன்மை மற்றும் பாதுகாப்பை மேம்படுத்துவது உள்ளிட்ட பல்வேறு நோக்கங்களுக்காக இந்தக் கட்டங்களில் வெவ்வேறு வகையான தகவல்கள் பயன்படுத்தப்படலாம். 

இந்த மாடல்களை உருவாக்க உதவ நாங்கள் பயன்படுத்தும் தகவல்கள், தனியுரிமைச் சட்டங்களுக்கு இணங்க அவற்றைச் சேகரித்துப் பயன்படுத்தும் விதம், பயிற்சிச் செயல்முறை முழுவதும் நாங்கள் மேற்கொள்ளும் பாதுகாப்பு ஏற்பாடுகள் ஆகியவற்றை இந்தக் கட்டுரை சுருக்கமாக விளக்குகிறது. எங்கள் சேவைகளைப் பயன்படுத்துவோரிடமிருந்து தகவல்களை எவ்வாறு சேகரித்துப் பயன்படுத்துகிறோம் என்பதையும், எங்கள் மாடல்களை மேம்படுத்த ChatGPT உரையாடல்கள் பயன்படுத்தப்படுவதை எவ்வாறு மறுப்பது என்பதையும் அறிய, எங்கள் பிரைவசி பாலிசியையும், மாடலின் செயல்திறனை மேம்படுத்த உங்கள் தரவு எவ்வாறு பயன்படுத்தப்படுகிறது என்ற கட்டுரையையும் பார்க்கவும்.

ChatGPT என்றால் என்ன, அது எவ்வாறு செயல்படுகிறது.

ChatGPT என்பது இணையம் அல்லது செயலி வழியாக அணுகக்கூடிய, செயற்கை நுண்ணறிவு அடிப்படையிலான ஒரு சேவை. தகவல்களை ஒழுங்குபடுத்திச் சுருக்குதல், மொழிபெயர்ப்புக்கு உதவுதல், நிரலாக்கம், ஆராய்ச்சி மற்றும் பகுப்பாய்வுக்கு ஆதரவளித்தல், பல கருவிகளில் பல படிகளைக் கொண்ட பணிகளை முடித்தல், படங்களைப் பகுப்பாய்வு செய்தல் அல்லது உருவாக்குதல், படைப்பாற்றலையும் புதிய யோசனைகளையும் ஊக்குவித்தல் மற்றும் பிற அன்றாடச் செயல்பாடுகள் எனப் பல்வேறு பணிகளுக்கு ChatGPT-ஐப் பயன்படுத்தலாம். உரை, படங்கள், ஒலி மற்றும் காணொளி உள்ளிட்ட பெருமளவிலான தகவல்களில் உள்ள ஒழுங்குமுறைகளைக் கற்றுக்கொண்டு, பயனர்களின் கேள்விகளையும் அறிவுறுத்தல்களையும் புரிந்துகொண்டு பதிலளிக்கும் வகையில் ChatGPT வடிவமைக்கப்பட்டுள்ளது. 

பயிற்சியின்போது, ஒரு சூழலில் எந்தெந்தச் சொற்கள் பொதுவாகச் சேர்ந்து வருகின்றன என்பது போன்ற, தரவிலுள்ள தொடர்புகளை மாடல் பகுப்பாய்வு செய்கிறது. அந்தப் புரிதலைப் பயன்படுத்தி, பதிலை உருவாக்கும்போது அடுத்து வர அதிக வாய்ப்புள்ள சொல்லைக் கணித்து, ஒவ்வொரு சொல்லாகப் பதிலை உருவாக்குகிறது. உரை சிறிய அலகுகளாக மாற்றப்படலாம். சில நேரங்களில் “கூறுகள்” என அழைக்கப்படும் இவை, முழுச் சொற்கள், சொற்களின் பகுதிகள் அல்லது நிறுத்தற்குறிகளைக் குறிக்கலாம். மாடல் செயலாக்கும் உரையின் அடிப்படை அலகுகளே இந்தக் கூறுகள். அதேபோல், படங்கள் போன்ற பிற வகை உள்ளடக்கங்களை உருவாக்கும் மாடல்கள், பயிற்சித் தரவில் படப்புள்ளிகள் ஒன்றோடொன்றும், அவற்றுக்குரிய விளக்கவுரைகளுடனும் எவ்வாறு தொடர்புபட்டுள்ளன என்பதில் உள்ள ஒழுங்குமுறைகளைக் கற்றுக்கொள்கின்றன.

எடுத்துக்காட்டாக, மாடலின் கற்றல் செயல்முறையின்போது (“பயிற்சி” எனப்படும்), “இடப்புறம் திரும்பாமல், அவள் ___ திரும்பினாள்.” போன்ற வாக்கியத்தை நிறைவு செய்யும் பணி மாடலுக்கு வழங்கப்படலாம். பயிற்சியின் தொடக்கத்தில் அதன் பதில்கள் பெரும்பாலும் சீரற்றதாக இருக்கும். ஆனால், பெருமளவிலான உரையை மாடல் செயலாக்கிக் கற்றுக்கொள்ளும்போது, ஒழுங்குமுறைகளை அடையாளம் காண்பதிலும் அடுத்து வர அதிக வாய்ப்புள்ள சொல்லைக் கணிப்பதிலும் அதன் திறன் மேம்படுகிறது. அதன் புரிதலைச் செம்மைப்படுத்தவும் துல்லியத்தை மேம்படுத்தவும் இந்தச் செயல்முறை லட்சக்கணக்கான வாக்கியங்களில் மீண்டும் மீண்டும் மேற்கொள்ளப்படுகிறது.

“இடப்புறம் திரும்பாமல், அவள் வலப்புறம் திரும்பினாள்” என்பதில் உள்ள “வலப்புறம்” என்பதற்குப் பதிலாக “சுற்றி” அல்லது “பின்னால்” என்றும் ஒரு வாக்கியத்தைப் பொருத்தமாக நிறைவு செய்யலாம். இவ்வாறு பல சாத்தியங்கள் இருப்பதால், மாடல் பதிலளிக்கும் விதத்தில் இயல்பாகவே சீரற்ற தன்மையும் உள்ளது. எனவே, ஒரே கேள்வியை வெவ்வேறு முறைகள் கேட்கும்போது வெவ்வேறு பதில்கள் கிடைக்கலாம்.

இயந்திரக் கற்றல் மாடல்களில் “எடைகள்” அல்லது “அளவுருக்கள்” எனப்படும் பெரும் எண் தொகுப்புகளும், அந்த எண்களைப் புரிந்துகொண்டு பயன்படுத்தும் நிரல்குறியீடும் உள்ளன. இந்த மாடல்கள், தங்களுக்குப் பயிற்சி அளிக்கப் பயன்படுத்தப்பட்ட தரவின் நகல்களைச் சேமிப்பதோ தக்கவைப்பதோ இல்லை. மாறாக, ஒரு மாடல் கற்றுக்கொள்ளும்போது, அது அடையாளம் கண்ட ஒழுங்குமுறைகளைப் பிரதிபலிக்கும் வகையில் அதன் அளவுருக்களின் மதிப்புகள் சிறிதளவு மாற்றியமைக்கப்படுகின்றன. முந்தைய எடுத்துக்காட்டில், சீரற்ற சொற்களைக் கணிப்பதிலிருந்து மேலும் துல்லியமாகக் கணிக்கும் நிலைக்கு மாடல் மேம்பட்டது. இதற்குக் காரணம் பயிற்சி வாக்கியங்களைச் சேமித்தது அல்ல; அதன் உள் அளவுருக்களைப் புதுப்பித்ததே. பயிற்சியின்போது செயலாக்கும் வாக்கியங்கள், படங்கள் அல்லது ஒலியின் நகல்களை மாடல் தக்கவைப்பதில்லை. ChatGPT தனது பயிற்சித் தரவிலிருந்து “நகலெடுத்து ஒட்டுவதில்லை”. விரிவாகப் படித்த ஓர் ஆசிரியர், மூலப் பாடங்களை மனப்பாடம் செய்யாமலோ வார்த்தைக்கு வார்த்தை மீண்டும் கூறாமலோ, கருத்துகளுக்கிடையிலான தொடர்புகளைப் புரிந்துகொண்டு விளக்குவதைப் போன்றதே இது. பயனரின் கோரிக்கைக்குப் பதிலை உருவாக்கும்போது, கற்றுக்கொண்ட இந்த எடைகளைப் பயன்படுத்தி மாடல் கணிப்புகளைச் செய்து புதிய உள்ளடக்கத்தை உருவாக்குகிறது.

ChatGPT-க்குக் கற்பிக்க எந்த வகையான தகவல்கள் பயன்படுத்தப்படுகின்றன.

பொதுவில் கிடைக்கும் இணைய உள்ளடக்கத்தைப் பொறுத்தவரை, இணையத்தில் கட்டணமின்றி அனைவரும் அணுகக்கூடிய தகவல்களை மட்டுமே பயன்படுத்துகிறோம். இதில் பொதுவில் கிடைக்கும் வலைப்பக்கங்கள், பொது மன்றங்கள், பொது வலைப்பதிவுகள், பொதுப் பதிவுகள் மற்றும் பிற பொது இணைய உள்ளடக்கங்கள் அடங்கலாம். எடுத்துக்காட்டாக, அனைவரும் அணுகக்கூடிய இணைய விவாத மன்றத்தில் நீங்கள் பங்கேற்றாலோ, பொது வலைப்பதிவு அல்லது வேறொரு பொதுப் பதிவை வெளியிட்டாலோ, பொதுவில் அணுகக்கூடிய அந்த உள்ளடக்கத்தை மாடலுக்குப் பயிற்சி அளிக்க நாங்கள் பயன்படுத்தலாம். இருப்பினும், எங்கள் பயிற்சிச் செயல்முறையில் தனிப்பட்ட தகவல்கள் செயலாக்கப்படுவதைக் குறைக்க நடவடிக்கைகளை எடுக்கிறோம்.  பொதுவில் கிடைக்கும் இணைய உள்ளடக்கத்தைச் சேகரிக்கும்போது, கட்டணம் செலுத்தினால் மட்டுமே அணுக முடியும் என்று அறியப்பட்ட மூலங்களிலிருந்தோ, இருண்ட இணையத்திலிருந்தோ நாங்கள் வேண்டுமென்றே தரவைச் சேகரிப்பதில்லை. மேலும், வெறுப்புப் பேச்சு, வயது வந்தோருக்கான உள்ளடக்கம், தனிப்பட்ட தகவல்களைத் திரட்டும் தளங்கள் மற்றும் தேவையற்ற பதிவுகள் போன்ற, எங்கள் மாடல்கள் கற்றுக்கொள்ள வேண்டாம் என நாங்கள் கருதும் உள்ளடக்கங்களை அகற்ற வடிகட்டிகளைப் பயன்படுத்துகிறோம். பின்னர் எஞ்சிய தகவல்கள் எங்கள் மாடல்களுக்குப் பயிற்சி அளிக்கப் பயன்படுத்தப்படுகின்றன. 

எங்கள் மாடல்களுக்குப் பயிற்சி அளிக்க உதவும் வகையில் GPTBot பொதுவில் கிடைக்கும் உள்ளடக்கத்தை வலைவலம் வரக்கூடும். இணையதள உரிமையாளர்கள் robots.txt போன்ற வழக்கமான இணையக் கட்டுப்பாடுகள் மூலம் GPTBot-ஐத் தடைசெய்து, தங்கள் தளங்களில் பொதுவில் கிடைக்கும் உள்ளடக்கத்தைப் பயிற்சிக்காக அணுகலாமா என்பதை நிர்வகிக்கலாம். இணையதள உரிமையாளர்கள் தங்கள் தளங்களும் உள்ளடக்கமும் எங்கள் செயற்கை நுண்ணறிவு அமைப்புகளுடன் எவ்வாறு தொடர்புகொள்கின்றன என்பதை நிர்வகிக்க உதவும் வழிகாட்டுதலை வழங்குகிறோம். 

எங்கள் மாடல்களுக்குப் பயிற்சி அளிக்கவும் அவற்றை மேம்படுத்தவும் மூன்றாம் தரப்புக் கூட்டாளர்களிடமிருந்து பெறும் தகவல்களையும் பயன்படுத்துகிறோம். இதில் மூன்றாம் தரப்பினருடனான ஒப்பந்தங்கள் மூலம் நாங்கள் அணுகும் தரவுத்தொகுப்புகளில் உள்ள தகவல்களும், எங்கள் கொள்கைகள் மற்றும் ஒப்பந்தங்களின்படி அனுமதிக்கப்படும் நிலையில் மனிதப் பயிற்றுநர்கள் மற்றும் ஆராய்ச்சியாளர்கள் வழங்கும் அல்லது உருவாக்கும் தகவல்களும் அடங்கலாம். இது எங்கள் மாடல்களின் தரம், பாதுகாப்பு மற்றும் செயல்திறனை மேம்படுத்த உதவுகிறது. தரவுத்தொகுப்பைப் பொறுத்து, இந்த மூலங்களில் உரை, படங்கள், ஒலி, காணொளி அல்லது பிற வகைத் தரவுகள் இருக்கலாம்.

சில பயிற்சிச் செயல்முறைகளில் செயற்கையாக உருவாக்கப்பட்ட தரவையும் அதிகளவில் பயன்படுத்தி வருகிறோம். எடுத்துக்காட்டாக, செயற்கையான உள்ளீட்டு வழிமுறைகள், பன்மொழி எடுத்துக்காட்டுகள் அல்லது பிற பயிற்சிப் பொருட்களை உருவாக்கத் தகவல்களையும் எங்கள் மாடல்களையும் பயன்படுத்தலாம். தரவு குறைவாகவோ சமநிலையற்றோ உள்ள பகுதிகளில் கூடுதல் பயிற்சித் தரவை வழங்குவது உள்ளிட்ட வழிகளில், செயற்கையாக உருவாக்கப்பட்ட தரவு மாடலின் செயல்திறனை மேம்படுத்த உதவும். மாடல் உருவாக்கத்தில் தனியுரிமையை மேம்படுத்தும் அணுகுமுறைகளுக்கும் இது உதவக்கூடும்.

ChatGPT-க்குக் கற்பிக்கத் தனிப்பட்ட தகவல்கள் பயன்படுத்தப்படுகின்றனவா.

இணைய உள்ளடக்கத்தின் கணிசமான பகுதியில் மனிதர்களைப் பற்றிய தகவல்கள் இருப்பதால், எங்கள் பயிற்சித் தரவில் தற்செயலாகத் தனிப்பட்ட தகவல்கள் இடம்பெறலாம். இருப்பினும், எங்கள் பயிற்சிச் செயல்முறையில் தனிப்பட்ட தகவல்கள் செயலாக்கப்படுவதைக் குறைக்க நடவடிக்கைகளை எடுக்கிறோம்.

கணிப்பு, ரீஸனிங், சிக்கலைத் தீர்த்தல் போன்ற மாடலின் திறன்களை வளர்ப்பதற்காகவே பயிற்சித் தரவைப் பயன்படுத்துகிறோம். தனிநபர்களைப் பற்றிய விவரத்தொகுப்புகளை உருவாக்கவோ, அவர்களைத் தொடர்புகொள்ளவோ, அவர்களுக்கேற்ற விளம்பரங்களை வழங்கவோ பயன்படுத்துவதில்லை.

சில நேரங்களில், பெயர்கள், முகவரிகள் போன்ற கூறுகள் மொழியில் எவ்வாறு செயல்படுகின்றன என்பதைப் புரிந்துகொள்ளவோ, பொதுவாழ்வுப் பிரமுகர்கள் மற்றும் நன்கு அறியப்பட்ட அமைப்புகளை அடையாளம் காணவோ மாடல்கள் தனிப்பட்ட தகவல்களிலிருந்து கற்றுக்கொள்ளலாம். இது மேலும் துல்லியமான, சூழலுக்குப் பொருத்தமான பதில்களை உருவாக்க மாடலுக்கு உதவுகிறது.

பயிற்சியின்போது தனிப்பட்ட தகவல்கள் எவ்வாறு பாதுகாக்கப்படுகின்றன.

பயிற்சியின்போது தனிப்பட்ட தகவல்கள் செயலாக்கப்படுவதைக் கட்டுப்படுத்த முனைப்புடன் நடவடிக்கைகளை எடுக்கிறோம். எடுத்துக்காட்டாக, பெருமளவில் தனிப்பட்ட தரவைத் திரட்டுவதாக அறியப்பட்ட மூலங்களை விலக்குகிறோம். பயிற்சிச் செயல்முறையில் தனிப்பட்ட தகவல்களைக் குறைக்க வடிகட்டிகளைப் பயன்படுத்துகிறோம். பயிற்சித் தரவு பதில்களில் மீண்டும் இடம்பெறும் அபாயத்தைக் குறைக்க, நகல் உள்ளடக்கத்தைக் கண்டறிந்து அகற்ற நடவடிக்கைகளையும் எடுக்கிறோம். மேலும், தனிநபர்களைப் பற்றிய அந்தரங்கமான அல்லது முக்கியமான தனிப்பட்ட தகவல்களைக் கேட்கும் கோரிக்கைகளுக்குப் பதிலளிப்பதைத் தவிர்க்க எங்கள் மாடல்களுக்குப் பயிற்சி அளிக்கிறோம். 

தகவல்களை எவ்வளவு காலம் தக்கவைக்கிறோம்

எங்கள் மாடல்களை உருவாக்கி மேம்படுத்துதல் மற்றும் அதனுடன் தொடர்புடைய அறிவியல் ஆராய்ச்சி உள்ளிட்ட, இந்தக் கட்டுரையிலும் எங்கள் பிரைவசி பாலிசியிலும் விவரிக்கப்பட்டுள்ள நோக்கங்களுக்கு நியாயமாகத் தேவைப்படும் காலம் வரை மட்டுமே பயிற்சித் தரவிலுள்ள தகவல்களைத் தக்கவைக்கிறோம். தகவல்களைத் தொடர்ந்து தக்கவைப்பது அவசியமா என்பதை உறுதிசெய்ய அவ்வப்போது பரிசீலிக்கிறோம். தகவலின் வகை மற்றும் அது பயன்படுத்தப்படும் விதத்தைப் பொறுத்துத் தக்கவைக்கும் காலம் மாறுபடும். தக்கவைக்கும் காலத்தைத் தீர்மானிக்கும்போது, தகவலைச் செயலாக்கும் நோக்கம், தகவலின் அளவு, தன்மை மற்றும் உணர்திறன், அங்கீகரிக்கப்படாத பயன்பாடு அல்லது வெளிப்படுத்தலால் ஏற்படக்கூடிய தீங்கு, எங்களுக்குப் பொருந்தும் சட்டக் கடமைகள் போன்ற காரணிகளைக் கருத்தில் கொள்கிறோம்.

ChatGPT உருவாக்கம் தனியுரிமைச் சட்டங்களுக்கு எவ்வாறு இணங்குகிறது.

பயிற்சித் தகவல்களைச் சட்டபூர்வமாகப் பயன்படுத்துகிறோம். அணுகல்தன்மைக் கருவிகள், வாடிக்கையாளர் ஆதரவு, மென்பொருள் உருவாக்கம், தனிப்பயனாக்கப்பட்ட கல்வி மற்றும் அறிவியல் ஆராய்ச்சி உள்ளிட்ட பல்வேறு பயனுள்ள பயன்பாடுகளை எங்கள் அடித்தள மாடல்கள் இயக்குகின்றன. இந்தத் திறன்கள், பொதுவில் கிடைக்கும் தகவல்கள் மற்றும் மூன்றாம் தரப்புக் கூட்டாளர்களிடமிருந்து பெறும் தகவல்கள் உள்ளிட்ட லார்ஜ்-ஸ்கேல் ட்ரெயினிங் தரவைச் சார்ந்துள்ளன. இந்தக் கட்டுரையில் விவரித்துள்ளபடி, பயிற்சியின்போது தனிப்பட்ட தகவல்கள் செயலாக்கப்படுவதைக் குறைக்கவும் அபாயங்களைக் கட்டுப்படுத்தவும் வடிவமைக்கப்பட்ட நடவடிக்கைகள் உள்ளிட்ட பாதுகாப்பு ஏற்பாடுகளைப் பயிற்சிச் செயல்முறை முழுவதும் பயன்படுத்துகிறோம். பயிற்சித் தகவல்களில் இடம்பெறும் தனிப்பட்ட தகவல்களைச் சேகரித்துப் பயன்படுத்துவதற்கு, பொதுத் தரவுப் பாதுகாப்பு ஒழுங்குமுறை போன்ற தனியுரிமைச் சட்டங்களின் கீழான நியாயமான நலன்களை அடிப்படையாகக் கொள்கிறோம். ஆர்டிஃபிஷியல் ஜெனரல் இன்டெலிஜென்ஸ் அனைவருக்கும் பயனளிக்க வேண்டும் என்ற எங்கள் நோக்கத்திற்கு ஏற்ப, பயனர்களுக்கும் ஒட்டுமொத்தச் சமூகத்திற்கும் பயன்படும் வகையில் எங்கள் மாடல்களுக்குப் பயிற்சி அளித்து மேம்படுத்துவதும் இதில் அடங்கும். இது எங்கள் பிரைவசி பாலிசியில் மேலும் விரிவாக விளக்கப்பட்டுள்ளது. இந்தத் தகவல்களைச் சட்டபூர்வமாகவும் பொறுப்புடனும் சேகரித்துப் பயன்படுத்துவதை உறுதிசெய்ய உதவும் வகையில், தரவுப் பாதுகாப்புத் தாக்க மதிப்பீட்டை மேற்கொண்டு முடித்துள்ளோம்.

தகவல்கள் எப்போது பகிரப்படலாம் அல்லது மாற்றப்படலாம்

நாங்கள் தனிப்பட்ட தகவல்களை “விற்பனை” செய்வதில்லை. எங்கள் பிரைவசி பாலிசியில் விவரிக்கப்பட்டுள்ள வரையறுக்கப்பட்ட சூழல்களில் மட்டுமே பயிற்சித் தரவிலுள்ள தனிப்பட்ட தகவல்களை வெளிப்படுத்துகிறோம். எடுத்துக்காட்டாக, எங்கள் மாடல்களின் உருவாக்கம், சோதனை, மேம்பாடு ஆகியவற்றுக்கு ஆதரவளிக்கும் இணை நிறுவனங்கள், விற்பனையாளர்கள் மற்றும் சேவை வழங்குநர்களுடன் தகவல்களைப் பகிரலாம். எங்கள் பிரைவசி பாலிசியில் விவரித்துள்ளபடி, சட்டக் கடமைக்கு இணங்குவதற்கோ, எங்கள் உரிமைகள், பாதுகாப்பு மற்றும் பத்திரத்தன்மையை அல்லது எங்கள் பயனர்கள், ஊழியர்கள் அல்லது பொதுமக்களுடையவற்றைப் பாதுகாப்பதற்கோ தகவல்களை வெளிப்படுத்துவது அவசியம் என நல்லெண்ணத்தின் அடிப்படையில் நம்பினால், அவற்றை வெளிப்படுத்தலாம்.

எங்கள் உள்கட்டமைப்பு உலகளவில் அமைந்துள்ளதால், பயிற்சித் தரவிலுள்ள தனிப்பட்ட தகவல்கள் ஐரோப்பியப் பொருளாதாரப் பகுதி, சுவிட்சர்லாந்து அல்லது ஐக்கிய இராச்சியத்திற்கு வெளியே உள்ள நாடுகளில் (அமெரிக்கா உட்பட) செயலாக்கப்படலாம். அவ்வாறு நிகழும்போது, எங்கள் பிரைவசி பாலிசியில் விவரித்துள்ளபடி, போதுமான தரவுப் பாதுகாப்பு இருப்பதை உறுதிப்படுத்தும் தீர்மானங்கள் அல்லது நிலையான ஒப்பந்த விதிகள் போன்ற உரிய பாதுகாப்பு ஏற்பாடுகளைப் பயன்படுத்துகிறோம்.

உங்கள் உரிமைகளும் அவற்றைப் பயன்படுத்தும் முறையும்

ஆட்சேபனைக் கோரிக்கைகளுக்கும் இதுபோன்ற உரிமைகள் சார்ந்த கோரிக்கைகளுக்கும் நாங்கள் பதிலளிக்கிறோம். மொழியைக் கற்றுக்கொள்வதன் விளைவாக, பொது இணையத்தில் பலமுறை தனிப்பட்ட தகவல்கள் இடம்பெறும் நபர்களைப் பற்றிய தகவல்கள் (எடுத்துக்காட்டாக, பொதுவாழ்வுப் பிரமுகர்கள்) சில நேரங்களில் ChatGPT பதில்களில் இடம்பெறலாம். குறிப்பிட்ட சட்ட அதிகார வரம்புகளுக்கு உட்பட்ட பகுதிகளில் உள்ள தனிநபர்கள், எங்கள் மாடல்கள் தங்களின் தனிப்பட்ட தகவல்களைச் செயலாக்குவதற்கு ஆட்சேபனை தெரிவிக்கலாம் அல்லது தரவு சார்ந்த தங்களது பிற உரிமைகளுக்கான கோரிக்கைகளை எங்கள் பிரைவசி போர்டல் மூலம் சமர்ப்பிக்கலாம். dsar@openai.com என்ற முகவரியைத் தொடர்புகொள்வதன் மூலமும் இந்த உரிமைகளைப் பயன்படுத்தலாம்.

உங்கள் கோரிக்கையை மதிப்பிட்டுப் பதிலளிக்க உதவும் வகையில், அது எந்தத் தனிப்பட்ட தகவலுடன் தொடர்புடையது என்பதைப் புரிந்துகொள்ளப் போதுமான விவரங்களை வழங்கவும். உங்கள் பெயர், தொடர்புடைய இணைய முகவரிகள், மாடல் வெளியீடுகளின் குறிப்பிட்ட எடுத்துக்காட்டுகள் அல்லது சிக்கலை அடையாளம் காண உதவும் பிற விவரங்கள் ஆகியவற்றை வழங்கலாம். சில நேரங்களில், நடவடிக்கை எடுப்பதற்கு முன் உங்கள் அடையாளத்தைச் சரிபார்க்கவோ, அந்தத் தகவல் உங்களுடன் தொடர்புடையது என்பதை உறுதிப்படுத்தவோ உங்களைக் கேட்கலாம். இந்தக் கோரிக்கைகளைச் சமர்ப்பிக்கும் முறை, சிறந்த நடைமுறைகள் மற்றும் கோரிக்கைகள் பரிசீலிக்கப்படும் விதம் குறித்த கூடுதல் தகவல்கள், ChatGPT-இலிருந்து தனிப்பட்ட தரவை அகற்றுவது பற்றிய எங்கள் ஹெல்ப் சென்டர் கட்டுரையில் உள்ளன. பொருந்தும் தனியுரிமைச் சட்டங்களுக்கு இணங்கக் கோரிக்கைகளைப் பரிசீலித்து, சட்டப்படி பொருந்தும் காலக்கெடுவுக்குள் பதிலளிக்கிறோம்.

தனியுரிமைச் சட்டங்களின்படி, சில உரிமைகளுக்கு வரம்புகள் இருக்கலாம் என்பதை நினைவில் கொள்ளவும். எடுத்துக்காட்டாக, தொடர்புடைய தகவலைச் சரிபார்க்க முடியாதபோது, கோரிக்கை OpenAI செயலாக்கும் தனிப்பட்ட தகவலுடன் தொடர்பில்லாதபோது, விதிவிலக்கு பொருந்தும்போது அல்லது கோரிக்கையை நிறைவேற்றாமல் இருப்பதற்கு வேறு சட்டபூர்வமான காரணம் இருக்கும்போது, எங்களால் கோரிக்கையை நிறைவேற்ற முடியாமல் போகலாம். ஒவ்வொரு கோரிக்கையும் அதன் தனிப்பட்ட சூழலுக்கு ஏற்ப மதிப்பிடப்படுகிறது. இதில், தனியுரிமை உரிமைகளுடன் கருத்துச் சுதந்திரம், பொது நலன் போன்ற பிற முக்கிய அம்சங்களையும் சமநிலையில் கருத்தில் கொள்ள வேண்டியிருக்கலாம்.

இருப்பினும், தனிப்பட்ட தகவல்களின் பாதுகாப்புக்கு முன்னுரிமை அளிக்கவும், பொருந்தும் அனைத்துத் தனியுரிமைச் சட்டங்களுக்கும் இணங்கவும் நாங்கள் முயற்சி செய்கிறோம். ஒரு சிக்கலை நாங்கள் போதுமான முறையில் கையாளவில்லை என நீங்கள் கருதினால், உங்கள் உள்ளூர் மேற்பார்வை ஆணையத்திடம் புகார் அளிக்க உங்களுக்கு உரிமை உண்டு.

எங்கள் இணையதளம், செயலிகள் மற்றும் சேவைகளை நீங்கள் பயன்படுத்தும்போது உங்களிடமிருந்தோ உங்களைப் பற்றியோ நாங்கள் சேகரிக்கும் தனிப்பட்ட தகவல்கள் தொடர்பான OpenAI-இன் நடைமுறைகளை மேலும் அறிய, எங்கள் பிரைவசி பாலிசியைப் பார்க்கவும்.