உள்ளடக்கம் OpenAI கருவிகளால் உருவாக்கப்பட்டதா என்பதை மக்கள் புரிந்துகொள்ள உதவ, SynthID நீர்க்குறிகள் மற்றும் உள்ளடக்கச் சான்றுகள் (C2PA) போன்ற மூலத்தடயங்களை OpenAI பயன்படுத்துகிறது. உள்ளடக்கத்தின் மூலத்தை அறிய மூலத்தடயங்கள் பயனுள்ள குறிப்புகளாக இருக்கலாம். ஆனால் அந்த உள்ளடக்கம் துல்லியமானது, திருத்தப்படாதது, சட்டப்படி உரிமை பெற்றது அல்லது சரியான சூழலில் வழங்கப்பட்டது என்பதற்கு அவை உத்தரவாதம் அளிக்காது.
C2PA தரநிலை என்றால் என்ன, அது எதற்கு உதவுகிறது?
ஊடகத்தின் மூலத்தையும் தொடர்புடைய தகவல்களையும் சரிபார்க்க, வெளியீட்டாளர்கள், நிறுவனங்கள் உள்ளிட்டோர் அதில் மீத்தரவைப் பதிக்க உதவும் திறந்த தொழில்நுட்பத் தரநிலையே C2PA. C2PA என்பது செயற்கை நுண்ணறிவால் உருவாக்கப்பட்ட உள்ளடக்கத்திற்கு மட்டும் உரியதல்ல. ஊடக உள்ளடக்கத்தின் மூலத்தையும் வரலாற்றையும், அதாவது அது எங்கிருந்து வந்தது என்பதையும் சான்றளிக்க, ஒளிப்படக் கருவி உற்பத்தியாளர்கள், செய்தி நிறுவனங்கள் உள்ளிட்டோரும் இதே தரநிலையை ஏற்றுவருகின்றனர்.
ஒரு கோப்பை உருவாக்கிய கருவி அல்லது சேவை, அது உருவாக்கப்பட்ட நேரம் மற்றும் அதன் மூலம் அல்லது வரலாறு பற்றிய பிற விவரங்கள் போன்ற தகவல்கள் C2PA மீத்தரவில் இடம்பெறலாம்.
C2PA பற்றி மேலும் அறிக.
SynthID என்றால் என்ன, அது எதற்கு உதவுகிறது?
SynthID என்பது உருவாக்கப்பட்ட ஊடகத்தில் நேரடியாக ஒரு தடயத்தைப் பதிக்கும், கண்ணுக்குப் புலப்படாத நீர்க்குறித் தொழில்நுட்பமாகும். மீத்தரவிலிருந்து மாறுபட்டு, இந்தத் தடயம் உள்ளடக்கத்தின் ஒரு பகுதியாகவே இருப்பதால் சில திருத்தங்கள் அல்லது மாற்றங்களுக்குப் பிறகும் நீடிக்கக்கூடும்.
C2PA மீத்தரவுடன் கூடுதலாக மற்றொரு மூலத்தடயத்தை SynthID வழங்குகிறது. எடுத்துக்காட்டாக, ஒரு கோப்பிலிருந்து மீத்தரவு அகற்றப்பட்டாலும், அந்த உள்ளடக்கம் ஆதரிக்கப்படும் OpenAI கருவிகளால் உருவாக்கப்பட்டது என்பதற்கான தடயத்தைப் பதிக்கப்பட்ட நீர்க்குறி தொடர்ந்து வழங்கக்கூடும்.
OpenAI உருவாக்கிய எந்த வகையான உள்ளடக்கங்களில் மூலத்தடயங்கள் இடம்பெறும்?
வெவ்வேறு உள்ளடக்க வகைகளுக்கு வெவ்வேறு மூலத்தடயங்களை OpenAI பயன்படுத்துகிறது.
| உள்ளடக்க வகை | மூலத்தடயங்கள் | குறிப்புகள் |
|---|---|---|
| படங்கள் | C2PA மீத்தரவும் SynthID நீர்க்குறிகளும் | ChatGPT, Codex மற்றும் OpenAI API மூலம் உருவாக்கப்படும் ஆதரிக்கப்படும் படங்களில் இரு தடயங்களும் இடம்பெறும். |
| ஒலி | SynthID நீர்க்குறிகள் | OpenAI உருவாக்கிய ஆதரிக்கப்படும் ஒலிக் கோப்புகளில், அந்த ஒலியிலேயே பதிக்கப்பட்ட செவிக்குப் புலப்படாத நீர்க்குறி இடம்பெறும். |
தயாரிப்பு, மாடல், ஏற்றுமதி முறை, கோப்பு வகை மற்றும் உள்ளடக்கம் உருவாக்கப்பட்ட காலத்தைப் பொறுத்து இதன் பயன்பாட்டு வரம்பு மாறுபடலாம்.
சில உள்ளடக்க வகைகளில் ஏன் வெவ்வேறு மூலத்தடயங்கள் பயன்படுத்தப்படுகின்றன?
வெவ்வேறு ஊடக வடிவங்கள் மூலத்தைப் பற்றிய தகவல்களை வெவ்வேறு விதங்களில் தக்கவைக்கின்றன.
C2PA உள்ளடக்கச் சான்றுகள் போன்ற மீத்தரவால் விரிவான தகவல்களை வழங்க முடியும். ஆனால் தளங்கள், திருத்தக் கருவிகள் அல்லது கோப்பு மாற்றங்களின்போது அது சில நேரங்களில் அகற்றப்படலாம்.
SynthID போன்ற நீர்க்குறிகள் உருவாக்கப்பட்ட ஊடகத்திலேயே பதிக்கப்படுவதால், சில மாற்றங்களுக்குப் பிறகும் நீடிக்கக்கூடும். எனினும், மீத்தரவுடன் ஒப்பிடும்போது நீர்க்குறிகள் பொதுவாகக் குறைவான சூழல் தகவலையே வழங்குகின்றன.
தொழில்நுட்ப ரீதியாகச் சாத்தியமானபோது, பொருத்தமான இடங்களில் இரு அணுகுமுறைகளையும் பயன்படுத்துவது வலுவான மூலத்தடயங்களை வழங்க உதவும்.
OpenAI கருவிகளால் உருவாக்கப்பட்ட படத்தில் கண்ணுக்குப் புலப்படும் நீர்க்குறியை எவ்வாறு சேர்ப்பது?
ChatGPT, Codex மற்றும் OpenAI API மூலம் உருவாக்கப்படும் படங்களில் கண்ணுக்குப் புலப்படும் அறிவிப்பைச் சேர்க்குமாறு மாடலுக்கு அறிவுறுத்திக் கோரலாம். எடுத்துக்காட்டாக, ஒரு படத்தை உருவாக்கும்போது, “படத்தில் கண்ணுக்குப் புலப்படும் OpenAI நீர்க்குறியைச் சேர்க்கவும்.” என்று கூறலாம்.
கண்ணுக்குப் புலப்படும் நீர்க்குறிகள், C2PA மீத்தரவு மற்றும் SynthID நீர்க்குறிகள் போன்ற பதிக்கப்பட்ட மூலத்தடயங்களிலிருந்து வேறுபட்டவை. ஒரு படம் OpenAI கருவிகளால் உருவாக்கப்பட்டதைப் பார்வையாளர்கள் அடையாளம் காண அவை உதவலாம். ஆனால் அவை இயந்திரம் படிக்கக்கூடிய மூலத்தடயங்களுக்குச் சமமானவை அல்ல.
உள்ளடக்கம் OpenAI கருவிகளால் உருவாக்கப்பட்டதா என்பதை எவ்வாறு சரிபார்ப்பது?
ஆதரிக்கப்படும் படம் அல்லது ஒலிக் கோப்பில், OpenAI கருவிகளால் உருவாக்கப்பட்ட அல்லது ஏற்றுமதி செய்யப்பட்ட உள்ளடக்கத்துடன் தொடர்புடைய மூலத்தடயங்கள் உள்ளனவா என்பதைச் சரிபார்க்க openai.com/verify தளத்திற்குச் செல்லலாம்.
ஆதரிக்கப்படும் கோப்பைப் பதிவேற்றியதும், SynthID நீர்க்குறி அல்லது OpenAI-யுடன் தொடர்புடைய நம்பகமான C2PA மானிஃபெஸ்ட் போன்ற, ஆதரிக்கப்படும் OpenAI மூலத்தடயங்களைக் கருவி தேடும்.
ஆதரிக்கப்படும் OpenAI மூலத்தடயத்தைக் கருவி கண்டறிந்தால், அந்த உள்ளடக்கம் OpenAI கருவிகளால் உருவாக்கப்பட்டது அல்லது அவற்றிலிருந்து ஏற்றுமதி செய்யப்பட்டது என்பதை அது குறிக்கிறது.
சரிபார்ப்பு முடிவின் பொருள் என்ன?
ஒரு தடயம் கண்டறியப்பட்டால், பதிவேற்றப்பட்ட உள்ளடக்கத்தில் OpenAI-யுடன் தொடர்புடைய, ஆதரிக்கப்படும் மூலத்தடயம் இருப்பதை உறுதிப்படுத்தக் கருவி உதவும்.
அந்த உள்ளடக்கம் துல்லியமானது, திருத்தப்படாதது, சட்டப்படி உரிமை பெற்றது அல்லது சரியான சூழலில் வழங்கப்பட்டது என்பதைக் கருவி உறுதிப்படுத்தாது. உள்ளடக்கத்தை உருவாக்கியது யார் அல்லது அது ஏன் உருவாக்கப்பட்டது என்பதையும் கருவி அடையாளம் காணாது.
எந்தத் தடயமும் கண்டறியப்படாவிட்டால் என்ன செய்வது?
எந்தத் தடயமும் கண்டறியப்படவில்லை என்றால், பதிவேற்றப்பட்ட கோப்பில் OpenAI வழங்கிய மூலத்தடயங்களைக் கருவி கண்டுபிடிக்கவில்லை என்று பொருள்.
பின்வரும் சூழல்களில் அந்த உள்ளடக்கம் OpenAI மூலம் உருவாக்கப்பட்டிருக்கவோ ஏற்றுமதி செய்யப்பட்டிருக்கவோ வாய்ப்புள்ளது:
மூலத்தடயங்கள் கிடைக்கத் தொடங்குவதற்கு முன்பே உள்ளடக்கம் உருவாக்கப்பட்டிருக்கலாம்.
ஆதரிக்கப்படாத தயாரிப்பு, மாடல், ஏற்றுமதி முறை அல்லது கோப்பு வகையிலிருந்து உள்ளடக்கம் வந்திருக்கலாம்.
பதிவேற்றம், பதிவிறக்கம், திருத்தம், மாற்றம் அல்லது பகிர்வின்போது மீத்தரவு அகற்றப்பட்டிருக்கலாம்.
சுருக்கம், வெட்டுதல், இரைச்சல், திருத்தங்கள், வடிவமாற்றம் அல்லது பிற மாற்றங்களால் நீர்க்குறி சிதைந்திருக்கலாம்.
ஒலித் துணுக்கு மிகக் குறுகியதாகவோ பெருமளவில் மாற்றப்பட்டதாகவோ இருக்கலாம்.
உரை வெளியீடுகளை ஆதரிக்கும் திட்டம் உள்ளதா?
செயற்கை நுண்ணறிவால் உருவாக்கப்பட்ட உள்ளடக்கத்தின் வெளிப்படைத்தன்மை தொடர்பான ஐரோப்பிய ஆணையத்தின் நடைமுறைக் கோவையின் கீழ் நாங்கள் அளித்துள்ள உறுதிப்பாடுகளுக்கு இணங்க, தரநிலைகளும் கருவிகளும் தொடர்ந்து மேம்படும்போது வாடிக்கையாளர்களும் உருவாக்குநர்களும் தங்களின் வெளிப்படைத்தன்மைக் கடமைகளைத் தெளிவான வழிகளில் நிறைவேற்ற உதவும் வகையில், உரை உள்ளிட்ட அனைத்து ஊடக வகைகளுக்கும் மூலத்தடயங்களை விரிவுபடுத்துவது எங்கள் இலக்கு.
பிற செயற்கை நுண்ணறிவுக் கருவிகளின் உள்ளடக்கத்தை OpenAI Verify-ஆல் கண்டறிய முடியுமா?
OpenAI கருவிகளால் உருவாக்கப்பட்ட அல்லது ஏற்றுமதி செய்யப்பட்ட உள்ளடக்கத்துடன் தொடர்புடைய, ஆதரிக்கப்படும் மூலத்தடயங்களைக் கண்டறியும் வகையில் OpenAI Verify வடிவமைக்கப்பட்டுள்ளது.
பிற செயற்கை நுண்ணறிவுச் சேவைகளால் உருவாக்கப்பட்ட உள்ளடக்கத்தைக் கண்டறிய இது வடிவமைக்கப்படவில்லை. மேலும், தொடர்புடைய தடயம் இல்லாவிட்டாலோ, ஆதரிக்கப்படாவிட்டாலோ அல்லது சிதைந்திருந்தாலோ, OpenAI உருவாக்கிய உள்ளடக்கத்தையும் இது கண்டறியாமல் போகலாம்.
API-ஐப் பயன்படுத்தி உருவாக்குநர்கள் உள்ளடக்கத்தைச் சரிபார்க்க முடியுமா?
ஆதரிக்கப்படும் உள்ளடக்கத்தில் OpenAI மூலத்தடயங்கள் உள்ளனவா என்பதைச் சரிபார்க்கவும், சரிபார்ப்பைத் தங்களின் செயலிகள் அல்லது பணிப்பாய்வுகளுடன் ஒருங்கிணைக்கவும், உருவாக்குநர்களும் நிறுவனங்களும் OpenAI-யின் சரிபார்ப்பு API-ஐப் பயன்படுத்தலாம். API அணுகல் பற்றிய தகவல்களுக்கு openai.com/verify தளத்திற்குச் செல்லவும். அதிகப் பயன்பாட்டு வரம்புகள் தேவைப்படும் நிறுவனங்கள், வரம்புகளை உயர்த்தக் கோரி விண்ணப்பிக்கலாம். மேலும் தகவல்களுக்கு openai.com/verify தளத்திற்குச் செல்லவும்.