கண்ணோட்டம்

தற்போதைய தகவல்களையும் தொடர்புடைய ஆதாரங்களுக்கான இணைப்புகளையும் கொண்டு கேள்விகளுக்குப் பதிலளிக்க ChatGPT இணையத்தில் தேட முடியும். உணவகங்கள், செய்திகள், வானிலை உள்ளிட்ட உள்ளூர் முடிவுகளைக் கண்டறிய இருப்பிடத் தகவலையும் அது பயன்படுத்தலாம்.

உங்கள் ChatGPT கணக்கில் ஏற்கெனவே உள்ள உரையாடல்கள், திட்டங்கள் மற்றும் கோப்புகளைக் கண்டறிய உதவும் பக்கப்பட்டித் தேடலிலிருந்து இணையத் தேடல் வேறுபட்டது. நீங்கள் சேமித்த உள்ளடக்கத்தில் தேட, இதைப் பார்க்கவும்: ChatGPT-இல் உங்கள் உரையாடல்கள், திட்டங்கள் மற்றும் கோப்புகளைக் கண்டறிதல்.

கிடைக்கும் தன்மை

ChatGPT Free, Go, Plus, ChatGPT Pro, Business, Enterprise மற்றும் Edu திட்டங்களில் இணையத் தேடல் கிடைக்கும். உள்நுழையாதவர்களும் இணையத் தேடலைப் பயன்படுத்தலாம்.

chatgpt.com தளத்திலும் ChatGPT கணினி மற்றும் கைப்பேசிச் செயலிகளிலும் இணையத்தில் தேடலாம். தேடல்கள் உங்கள் திட்டத்தின் பயன்பாட்டு வரம்புகளுக்கு உட்பட்டவை. உணவக முன்பதிவுகள் போன்ற சில அம்சங்களுக்குக் கூடுதல் தகுதித் தேவைகள் உள்ளன.

இணையத்தில் தேடுதல்

உங்கள் கேள்விக்குப் தற்போதைய தகவல்கள் பயனளிக்கும் எனில், ChatGPT தானாகவே இணையத்தில் தேடக்கூடும்.

இணையத் தேடலை நீங்களே தொடங்க:

1. ChatGPT-இல் ஓர் உரையாடலைத் திறக்கவும்.

2. அனைத்துக் கருவிகளையும் காண்க என்பதைத் தேர்ந்தெடுக்கவும்.

3. தேடு என்பதைத் தேர்ந்தெடுக்கவும்.

4. உங்கள் கேள்வியை உள்ளிட்டு அனுப்புங்கள்.

மெசேஜ் கம்போஸரில் / என்பதை உள்ளிட்டு தேடு என்பதையும் தேர்ந்தெடுக்கலாம். ஏற்கெனவே உள்ள பதிலை இணைய முடிவுகளுடன் மீண்டும் உருவாக்க, புதுப்பிப்புக் கட்டுப்பாட்டைத் தேர்ந்தெடுத்து, கிடைக்கும்போது மீண்டும் முயல்க அல்லது இணையத்தில் தேடு என்பதைத் தேர்ந்தெடுக்கவும்.

இணையத் தேடல் சிக்கல்களைத் தீர்த்தல்

தேடு என்பது தெரியவில்லை அல்லது இணையத்தில் தேட முடியாது என்று ChatGPT கூறினால்:

1. புதிய உரையாடலைத் தொடங்கி, கருவிகள் பட்டியலில் தேடு உள்ளதா எனச் சரிபார்க்கவும்.

2. ChatGPT செயலியைப் புதுப்பிக்கவும் அல்லது உங்கள் உலாவியில் chatgpt.com தளத்தை முயன்று பார்க்கவும்.

3. நீங்கள் பயன்படுத்த விரும்பிய கணக்கு அல்லது வர்க்ஸ்பேஸைத்தான் பயன்படுத்துகிறீர்களா என்றும், உங்கள் திட்டத்தின் பயன்பாட்டு வரம்பை எட்டவில்லையா என்றும் சரிபார்க்கவும்.

4. நிர்வகிக்கப்படும் வர்க்ஸ்பேஸில், உங்கள் பொறுப்புக்கு இணையத் தேடல் இயக்கப்பட்டுள்ளதா என நிர்வாகியிடம் கேளுங்கள்.

தேடல் இன்னும் கிடைக்கவில்லை என்றால், OpenAI ஆதரவுக் குழுவைத் தொடர்புகொண்டு, உங்கள் திட்டம், சாதனம், செயலி அல்லது உலாவிப் பதிப்பு மற்றும் சரியான பிழைச் செய்தியைத் தெரிவிக்கவும்.

ஆதாரங்களையும் முடிவுகளையும் மதிப்பாய்வு செய்தல்

இணையத் தேடலைப் பயன்படுத்தும் பதில்களில் மேற்கோள்கள் இடம்பெறலாம். மேற்கோளின் ஆதாரத்தைத் திறக்க அதைத் தேர்ந்தெடுக்கவும். கணினி இணையப் பதிப்பில், மேற்கோளின் முன்னோட்டத்தைக் காண அதன் மீது சுட்டியையும் வைக்கலாம்.

மேற்கோள் காட்டப்பட்ட ஆதாரங்களையும் தொடர்புடைய பிற இணைப்புகளையும் காண, கிடைக்கும்போது ஆதாரங்கள் என்பதைத் தேர்ந்தெடுக்கவும். பதிலில் படங்கள் இருந்தால், ஒரு படத்தின் ஆதாரத்தைக் காண அதைத் தேர்ந்தெடுக்கவும். iOS மற்றும் Android சாதனங்களில், தொடர்புடைய முடிவுகளுடன் வரைபடமும் இடம்பெறலாம்.

தேடல் முடிவுகளும் மேற்கோள்களும் முழுமையற்றதாகவோ, காலாவதியானதாகவோ, தவறானதாகவோ இருக்கலாம். மேற்கோள் காட்டப்பட்ட ஆதாரம் பதிலை ஆதரிக்கிறதா என்பதைச் சரிபார்க்க அதைத் திறந்து, அது வெளியிடப்பட்ட அல்லது புதுப்பிக்கப்பட்ட தேதியைப் பாருங்கள்; துல்லியம் முக்கியமானபோது அதிகாரப்பூர்வ ஆதாரத்தைப் பயன்படுத்துங்கள். முடிவு தவறாகத் தோன்றினால், குறிப்பிட்ட ஆதாரம், தேதி அல்லது இருப்பிடத்தைப் பயன்படுத்தி மீண்டும் தேடுமாறு ChatGPT-யிடம் கேளுங்கள்.

தேடல் வழங்குநர்களுடன் பகிரப்படும் தகவல்கள்

உங்கள் கேள்விகளுக்குப் பொருத்தமான பதில்களை வழங்க, ChatGPT தேடல் சில நேரங்களில் பிற தேடல் வழங்குநர்களுடன் இணைந்து செயல்படும். அவ்வாறு செயல்படும்போது, உங்கள் வினவலை ஒன்று அல்லது அதற்கு மேற்பட்ட குறிப்பிட்ட வினவல்களாக ChatGPT தேடல் பொதுவாக மாற்றி, அந்த வழங்குநர்களுக்கு அனுப்பும். எடுத்துக்காட்டாக, உயிரித் தொழில்நுட்ப ஆராய்ச்சியாளர் ஒருவர் ChatGPT-யிடம், “புற்றுநோய்க்கான CCR8-ஐ இலக்காகக் கொண்ட மருந்துகளின் உருவாக்கத்தில் சமீபத்திய நிலவரம் என்ன?” என்று கேட்டால், முதலில் “CCR8 நோயெதிர்ப்புச் சிகிச்சை மருந்து உருவாக்கம் 2025” என்ற வினவலைத் தேடல் கூட்டாளருக்கு ChatGPT அனுப்பக்கூடும். தொடக்க முடிவுகளை மதிப்பாய்வு செய்த பிறகு, “CHS-114 மாநாடு 2025” போன்ற மேலும் குறிப்பிட்ட வினவல்களைப் பிற தேடல் வழங்குநர்களுக்கு ChatGPT தேடல் அனுப்பலாம். உங்கள் ஐபி முகவரியின் அடிப்படையில் பொதுவான இருப்பிடத் தகவலையும் ChatGPT சேகரிக்கும்; முடிவுகளின் துல்லியத்தை மேம்படுத்த, அதை மூன்றாம் தரப்புத் தேடல் வழங்குநர்களுடன் பகிரக்கூடும். எடுத்துக்காட்டாக, ChatGPT-இல் “எனக்கு அருகிலுள்ள நல்ல உணவகங்கள் எவை?” என்று நீங்கள் உள்ளிட்டால், உங்கள் ஐபி முகவரியிலிருந்து நீங்கள் சான் பிரான்சிஸ்கோ பகுதியில் இருப்பதாக ChatGPT தீர்மானித்து, உங்கள் ப்ராம்ப்ட்டை “சான் பிரான்சிஸ்கோவின் சிறந்த உணவகங்கள்” என்ற தேடல் வினவலாக மாற்றக்கூடும். தேடலைச் செயல்படுத்துவதற்காக ஐபி முகவரியையோ உங்கள் ChatGPT கணக்குத் தகவலையோ மூன்றாம் தரப்புத் தேடல் வழங்குநர்களுடன் ChatGPT பகிராது.

தேடல் வழங்குநர்கள் வினவல்களை எவ்வாறு செயலாக்கலாம் என்பது பற்றிய கூடுதல் தகவலுக்கு, அவர்களின் பிரைவசி பாலிசிகளைப் பார்க்கவும்:

• Microsoft தனியுரிமை அறிக்கை.

• Shopify பிரைவசி பாலிசி.

மெமரி இயக்கப்பட்டிருந்தால், தேடல் வினவலை மாற்றியமைக்கும்போது தொடர்புடைய சேமிக்கப்பட்ட நினைவுகளை ChatGPT பயன்படுத்தக்கூடும். எடுத்துக்காட்டாக, நீங்கள் சைவ உணவு மட்டுமே உண்பவர் என்றும் சான் பிரான்சிஸ்கோவில் வசிப்பவர் என்றும் பகிர்ந்திருந்தால், உங்களுக்குப் பிடிக்கக்கூடிய அருகிலுள்ள உணவகங்களைக் கேட்கும்போது “சான் பிரான்சிஸ்கோவின் நல்ல முழுச் சைவ உணவகங்கள்” என்று ChatGPT தேடக்கூடும்.

சேமிக்கப்பட்ட நினைவுகளை நிர்வகிப்பது பற்றிய கூடுதல் தகவலுக்கு, இதைப் பார்க்கவும்: ChatGPT-இல் மெமரி.

இருப்பிடம்

தொடர்புடைய உள்ளூர் முடிவுகளை வழங்க, உங்கள் ஐபி முகவரியின் அடிப்படையில் தோராயமான இருப்பிடத்தை ChatGPT பயன்படுத்தக்கூடும். சாதன இருப்பிடத்தைப் பகிர்வது விருப்பத்திற்குரியது; இயல்பாக அது முடக்கப்பட்டிருக்கும்.

உங்கள் சாதன இருப்பிடத்தைப் பகிரத் தேர்வுசெய்தால், அருகிலுள்ள வணிகங்கள், உள்ளூர்ச் செய்திகள் மற்றும் வானிலை பற்றிய கேள்விகளுக்குப் பதிலளிக்க, மேலும் துல்லியமான தகவல்களை ChatGPT பயன்படுத்தலாம். iOS மற்றும் Android சாதனங்களில், தோராயமான சாதன இருப்பிடத்தைத் தொடர்ந்து பகிர்ந்துகொண்டே, துல்லிய இருப்பிடத்தை மட்டும் தனியாக முடக்கலாம்.

இருப்பிடப் பகிர்வை நிர்வகித்தல்

ChatGPT-இல் இருப்பிடப் பகிர்வை நிர்வகிக்க:

1. அமைப்புகள் என்பதைத் திறக்கவும்.

2. தரவுக் கட்டுப்பாடுகள் என்பதைத் தேர்ந்தெடுக்கவும்.

3. இருப்பிடம் என்பதைத் தேர்ந்தெடுக்கவும்.

4. கிடைக்கும் இருப்பிட அனுமதிகளை மதிப்பாய்வு செய்யுங்கள் அல்லது மாற்றுங்கள்.

இருப்பிடப் பகிர்வை இயக்கும்போது, ஒருமுறை அணுக அனுமதிக்கவா, ChatGPT-ஐப் பயன்படுத்தும்போது அனுமதிக்கவா அல்லது அணுகலை மறுக்கவா என உங்கள் உலாவி அல்லது சாதனம் கேட்கலாம். உங்கள் சாதன அமைப்புகளிலும் ChatGPT-இன் இருப்பிட அனுமதியை நிர்வகிக்கலாம்.

உங்கள் உலாவி முன்பு அணுகலை மறுத்திருந்தால், chatgpt.com-க்கான தள அமைப்புகளைத் திறந்து, இருப்பிடம் என்பதை அனுமதி என அமைத்துப் பக்கத்தைப் புதுப்பிக்கவும்.

பேரென்டல் கண்ட்ரோல்ஸை அமைத்துள்ள பெற்றோர், தங்கள் பதின்பருவப் பிள்ளையின் இருப்பிடப் பகிர்வை முடக்கலாம். மேலும் தகவலுக்கு, இதைப் பார்க்கவும்: ChatGPT-இல் பேரென்டல் கண்ட்ரோல்ஸ்.

உள்ளூர்த் தேடல் முடிவுகளை மேம்படுத்துதல்

உள்ளூர் முடிவுகள் தவறான பகுதியைக் காட்டினால்:

• உங்கள் கேள்வியில் நகரம், சுற்றுப்புறப் பகுதி அல்லது அஞ்சல் குறியீட்டைக் குறிப்பிடுங்கள்.

• உங்கள் சாதன இருப்பிடத்தைப் பகிரத் தேர்வுசெய்தால், ChatGPT-இலும் உங்கள் உலாவி அல்லது சாதன அமைப்புகளிலும் இருப்பிட அனுமதிகளைச் சரிபாருங்கள்.

• இருப்பிட அனுமதியை மாற்றிய பிறகு உங்கள் கேள்வியை மீண்டும் கேளுங்கள்.

தனியார் மெய்நிகர் வலையமைப்பு அல்லது பிணைய இருப்பிடம், உங்கள் ஐபி முகவரியிலிருந்து கணிக்கப்படும் தோராயமான இருப்பிடத்தைப் பாதிக்கலாம். மெமரி இயக்கப்பட்டிருந்தால், சேமிக்கப்பட்ட இருப்பிடத் தகவலும் தேடல் முடிவுகளைப் பாதிக்கலாம்.

பயன்படுத்தப்படும் மற்றும் சேமிக்கப்படும் தகவல்கள்

உங்கள் ChatGPT உரையாடலிலும் அதன் சூழலிலும் இடம்பெற்றுள்ள தகவல்களுக்கு வெளியே, உங்கள் துல்லிய இருப்பிடத்தை ChatGPT தனியாகச் சேமித்து வைக்காது. அருகிலுள்ள இடங்கள் போன்ற ChatGPT பதிலில் உள்ள தகவல்கள், நீங்கள் அவற்றை நீக்கும் வரை உரையாடல் வரலாற்றில் இருக்கும்.

பதிலில் காட்டப்படும் வரைபடங்கள் உங்கள் உரையாடல் வரலாற்றில் இருக்கும்; ஆனால் உங்கள் துல்லிய இருப்பிடம் வரைபடத்திலிருந்து அகற்றப்படும்.

அருகிலுள்ள வணிகப் பட்டியல்கள் அல்லது வானிலை அறிக்கைகள் போன்ற கூடுதல் உள்ளூர்த் தகவல்களை வழங்க உதவும் நம்பகமான மூன்றாம் தரப்பு வழங்குநர்களுடன், உங்களுக்கேற்ற முடிவுகளை உருவாக்குவதற்காக உங்கள் இருப்பிடத்தை ChatGPT பகிரக்கூடும். உங்களுக்குப் பொருத்தமான பதில்களை வழங்குவதற்காக மட்டுமே இருப்பிடத் தகவல் பகிரப்படும்; அதற்காகப் பகிரப்படும் தகவலின் அளவைக் குறைக்கவும் நாங்கள் நடவடிக்கை எடுக்கிறோம்.

உணவகத்தைக் கண்டறிந்து முன்பதிவு செய்தல்

உங்கள் இருப்பிடம், தேதி, நேரம், நபர்களின் எண்ணிக்கை மற்றும் விருப்பங்களின் அடிப்படையில் உணவகங்களையும் கிடைக்கும் முன்பதிவு நேரங்களையும் கண்டறிய ChatGPT உதவும். உணவகத்தைப் பொறுத்து, OpenTable, Resy அல்லது Yelp-இல் கிடைக்கும் நேரங்களை அது காட்டலாம்.

GPT-5.6 Sol அல்லது GPT-5.6 Luna-வைப் பயன்படுத்தும்போது, தகுதியான நுகர்வோர் திட்டங்களில் இணையம், கைப்பேசி மற்றும் கணினியில் முன்பதிவுத் தேடல் கிடைக்கும். இது ChatGPT வேலை அல்லது Business, Enterprise, Edu திட்டங்களில் கிடைக்காது.

OpenTable முன்பதிவுகள் உலகம் முழுவதும் கிடைக்கும்; Resy முன்பதிவுகள் அமெரிக்காவில் கிடைக்கும்; Yelp முன்பதிவுகள் அமெரிக்காவிலும் கனடாவிலும் கிடைக்கும். கிடைக்கும் நிலை உணவகத்தையும் இருப்பிடத்தையும் பொறுத்து மாறுபடும்.

கிடைக்கும் நேரத்தைச் சரிபார்த்து முன்பதிவு செய்யுங்கள்

1. உணவகம், தேதி, நேரம் மற்றும் வருகை தரும் நபர்களின் எண்ணிக்கையைக் குறிப்பிட்டு ChatGPT-யிடம் கேளுங்கள்.

2. கிடைக்கும் உணவகங்களையும் முன்பதிவு நேரங்களையும் மதிப்பாய்வு செய்யுங்கள்.

3. உணவகத்தையோ, கிடைக்கும்போது முன்பதிவு செய் என்பதையோ தேர்ந்தெடுக்கவும்.

4. உங்கள் முன்பதிவு விவரங்களை உறுதிப்படுத்தி, முன்பதிவுச் செயல்முறையை நிறைவுசெய்யுங்கள்.

உணவு வகை, செலவுத்திட்டம், உணவுக் கட்டுப்பாடுகள் அல்லது சூழல் போன்ற விருப்பங்களையும் குறிப்பிடலாம்; குறிப்பிட்ட உணவகம் பற்றியும் கேட்கலாம். முன்பதிவு கிடைக்கும் நிலை மாறக்கூடும் என்பதால், முன்பதிவு செய்வதற்கு முன் விவரங்களை மதிப்பாய்வு செய்யுங்கள்.

வழங்குநரைப் பொறுத்து, ChatGPT-இலேயே முன்பதிவை நிறைவுசெய்யலாம் அல்லது முன்பதிவு வழங்குநரிடம் தொடரலாம். OpenTable அல்லது Yelp முன்பதிவுக்குக் கடன் அட்டை தேவைப்பட்டால், முன்பதிவை நிறைவுசெய்ய OpenTable தளத்திற்கு அனுப்பப்படுவீர்கள்.

முன்பதிவுக் கூட்டாளர்களுடன் பகிரப்படும் தகவலை மதிப்பாய்வு செய்தல்

முன்பதிவு செய்யும்போது, உங்கள் பெயரையும் மின்னஞ்சல் முகவரியையும் முன்பதிவு வழங்குநருடன் பகிர்வதற்கான அனுமதியை ChatGPT கேட்கலாம். நீங்கள் அனுமதித்தால், முன்பதிவுச் செயல்முறையில் தெரியும் காலியான பெயர் மற்றும் மின்னஞ்சல் புலங்களை ChatGPT நிரப்பலாம்.

இதை ஒருமுறை அனுமதிக்கலாம், எதிர்கால முன்பதிவுகளுக்கு அனுமதிக்கலாம் அல்லது மறுத்துவிட்டு தகவலை நீங்களே உள்ளிடலாம். Resy தனது சொந்த கணக்கு உள்நுழைவைப் பயன்படுத்துவதால், Resy-க்கான இந்தப் புலங்களை ChatGPT நிரப்பாது.

நீங்கள் வழங்கிய அனுமதிகளை மதிப்பாய்வு செய்ய:

1. அமைப்புகள் என்பதைத் திறக்கவும்.

2. தரவுக் கட்டுப்பாடுகள் என்பதைத் தேர்ந்தெடுக்கவும்.

3. செயலிகளுடன் பகிரப்பட்ட தகவல்கள் என்பதைத் தேர்ந்தெடுக்கவும்.

4. கிடைக்கும் செயலி அனுமதிகளை மதிப்பாய்வு செய்யுங்கள் அல்லது மாற்றுங்கள்.

ஏற்கெனவே உள்ள முன்பதிவை நிர்வகித்தல்

முன்பதிவை நிறைவுசெய்த பிறகு, முன்பதிவு வழங்குநர் உறுதிப்படுத்தல் மின்னஞ்சலை அனுப்புவார். ஏற்கெனவே உள்ள முன்பதிவுகளை ChatGPT சேமிக்கவோ, மாற்றவோ, ரத்துசெய்யவோ, காட்டவோ செய்யாது.

முன்பதிவை மாற்ற அல்லது ரத்துசெய்ய, உங்கள் உறுதிப்படுத்தல் மின்னஞ்சலைப் பயன்படுத்துங்கள் அல்லது முன்பதிவு வழங்குநரை நேரடியாகத் தொடர்புகொள்ளுங்கள்.

குரல் உரையாடலின்போது தேடுதல்

குரல் உரையாடலின்போது, இணையத்தில் தேடுமாறு ChatGPT-யிடம் கேட்கலாம். குரல் முறையிலான இணையத் தேடல்கள் உங்கள் திட்டத்தின் பயன்பாட்டு வரம்புகளுக்கு உட்பட்டவை.

வாய்ஸ் கன்வர்சேஷன்ஸில் உணவக முன்பதிவுத் தேடல் கிடைக்காது.

மேலும் தகவலுக்கு, இதைப் பார்க்கவும்: ChatGPT வாய்ஸ்.

உங்கள் உலாவியின் இயல்புநிலைத் தேடுபொறியாக ChatGPT-ஐ அமைத்தல்

ChatGPT தேடல் நீட்டிப்பை நிறுவுவதன் மூலம், Google Chrome-இன் இயல்புநிலைத் தேடுபொறியாக ChatGPT-ஐ அமைக்கலாம்.

நீட்டிப்பை நிறுவிய பிறகு, ChatGPT உரையாடலைத் தொடங்க Chrome முகவரிப் பட்டியில் தேடலை உள்ளிடுங்கள். தேடலை Google-க்கு அனுப்ப, முதலில் ! என்பதை உள்ளிடுங்கள்.அதைத் தொடர்ந்து g மற்றும் உங்கள் தேடல் சொற்களை உள்ளிடுங்கள்.

தேடல் முடிவுகளில் உங்கள் இணையதளம் இடம்பெறச் செய்தல்

தொடர்புடைய, நம்பகமான தகவல்களைப் பயனர்கள் கண்டறிய உதவும் பல காரணிகளின் அடிப்படையில் தேடல் முடிவுகளை ChatGPT தரவரிசைப்படுத்துகிறது. இடம்பெறுவது உறுதியளிக்கப்படவில்லை.

இணையதளம் சேர்க்கப்படுவதற்குத் தகுதிபெற, OAI-Searchbot அந்தத் தளத்தை வலைவலம் வர அனுமதியுங்கள்; மேலும் இணையதள வழங்குநர் அல்லது உள்ளடக்க விநியோக வலையமைப்பு, OpenAI-இன் வெளியிடப்பட்ட தேடல் நிரலி ஐபி முகவரிகளிலிருந்து வரும் போக்குவரத்தை அனுமதிக்கிறதா என்பதை உறுதிப்படுத்துங்கள்.

அடிக்கடி கேட்கப்படும் கேள்விகள்

இணையத் தேடலுக்குத் துல்லிய இருப்பிடம் தேவையா?

இல்லை. உங்கள் சாதனத்தின் துல்லிய இருப்பிடத்தைப் பகிராமலேயே இணையத்தில் தேடலாம்; ஆனால் உள்ளூர் முடிவுகள் குறைவான துல்லியத்துடன் இருக்கலாம்.

எனது இருப்பிடத்தை மதிப்பிட ChatGPT எனது ஐபி முகவரியைப் பயன்படுத்துமா?

உங்கள் நாடு, மாநிலம் அல்லது நகரம் போன்ற பொதுவான இருப்பிடத்தை மதிப்பிட, உங்கள் ஐபி முகவரியை ChatGPT பயன்படுத்தக்கூடும். இந்தத் தோராயமான இருப்பிடம், அருகிலுள்ள உணவகங்கள், உள்ளூர்ச் செய்திகள் மற்றும் வானிலைக்கான முடிவுகளை மேம்படுத்தலாம்.

தேடலைச் செயல்படுத்துவதற்காக உங்கள் ஐபி முகவரியையோ ChatGPT கணக்குத் தகவலையோ மூன்றாம் தரப்புத் தேடல் வழங்குநர்களுடன் ChatGPT பகிராது.

இருப்பிடப் பகிர்வைப் பின்னர் முடக்க முடியுமா?

ஆம். ChatGPT அமைப்புகளிலோ, உங்கள் உலாவி அல்லது சாதனத்தின் இருப்பிட அனுமதிகளிலோ இருப்பிடப் பகிர்வை மதிப்பாய்வு செய்யலாம் அல்லது மாற்றலாம்.

முன்பதிவு நேரமோ முன்பதிவு பொத்தானோ ஏன் தெரியவில்லை?

ஆதரிக்கப்படும் வழங்குநரிடம் அந்த உணவகத்திற்கான தகவல் இருக்கும்போது மட்டுமே முன்பதிவு நேரங்களும் முன்பதிவு செய் என்பதும் தோன்றும். வேறொரு தேதி, நேரம், நபர்களின் எண்ணிக்கை அல்லது இருப்பிடத்தை முயன்று பாருங்கள்.

உணவக முன்பதிவு எப்போது உறுதிப்படுத்தப்படும்?

முன்பதிவுச் செயல்முறையை நிறைவுசெய்து OpenTable, Resy அல்லது Yelp-இடமிருந்து உறுதிப்படுத்தலைப் பெற்ற பிறகு முன்பதிவு உறுதியாகும். நீங்கள் முன்பதிவு செய்த பிறகு அதை ChatGPT சேமிக்காது.

முன்பதிவு தொடர்பான உதவியை எங்கே பெறலாம்?

ChatGPT-இல் உணவக முடிவு, உணவகப் பக்கம் அல்லது முன்பதிவு செய் பொத்தான் செயல்படவில்லை என்றால், OpenAI ஆதரவுக் குழுவைத் தொடர்புகொள்ளுங்கள்.

உறுதிப்படுத்தல் மின்னஞ்சல்கள், மாற்றங்கள், ரத்துசெய்தல்கள் அல்லது வழங்குநர் கணக்குச் சிக்கல்களுக்கு, முன்பதிவு வழங்குநரைத் தொடர்புகொள்ளுங்கள்.