ఆమోదయోగ్యం కాని స్థాయిలో ప్రమాదం కలిగించే కృత్రిమ మేధస్సు సాంకేతికతకు సంబంధించిన కొన్ని వినియోగాలను యూరోపియన్ యూనియన్ కృత్రిమ మేధస్సు చట్టంలోని అధికరణ 5 నిషేధిస్తుంది. మేము కొన్ని సాంకేతిక రక్షణలను అమలు చేస్తున్నప్పటికీ, సాధారణ ప్రయోజన కృత్రిమ మేధస్సు సాంకేతికత ప్రదాతగా OpenAI తన వినియోగదారులు (వ్యక్తిగత వినియోగదారులు, అభివృద్ధికర్తలు, సంస్థాగత వినియోగదారులు) కూడా వర్తించే చట్టపరమైన ఆవశ్యకతలను పాటించాలని ఆశిస్తుంది. వారు యూరోపియన్ యూనియన్లో నివసిస్తున్నా లేదా అక్కడ స్థాపితమై ఉన్నా, యూరోపియన్ యూనియన్ కృత్రిమ మేధస్సు చట్టం ప్రకారం చట్టవిరుద్ధమైన కార్యకలాపాల్లో పాల్గొనకుండా ఉండటం కూడా ఇందులో భాగమే. నిషేధిత పద్ధతులు ఏమిటో స్పష్టత ఇవ్వడమే ఈ వ్యాసం ఉద్దేశం. యూరోపియన్ యూనియన్ కృత్రిమ మేధస్సు చట్టం కింద మీ బాధ్యతలను ఎలా పాటించాలనే దానిపై చట్టపరమైన సలహా ఇవ్వడం దీని ఉద్దేశం కాదు.
కృత్రిమ మేధస్సు సంబంధిత దిగువ వినియోగాలను యూరోపియన్ యూనియన్ కృత్రిమ మేధస్సు చట్టం నిషేధిస్తుంది. మా వినియోగ విధానాలు, ఇతర నిబంధనల్లో మరింత వివరంగా పేర్కొన్నట్లుగా, వాటిలో పాల్గొనడానికి మీరు OpenAI సేవలను ఉపయోగించకూడదు:
ఒక వ్యక్తి లేదా వ్యక్తుల సమూహం ప్రవర్తనను గణనీయంగా మార్చేందుకు ఉద్దేశించిన అంతర్గతంగా గ్రహించలేని, ఉద్దేశపూర్వకంగా ప్రభావితం చేసే లేదా మోసపూరిత పద్ధతులను ఉపయోగించడం. అంటే, సమాచారం ఆధారంగా నిర్ణయం తీసుకునే వారి సామర్థ్యాన్ని దెబ్బతీసి, ఆ వ్యక్తికి లేదా ఇతరులకు హాని కలిగించే అవకాశం ఉన్న విధంగా వ్యవహరించడం.
ఒక వ్యక్తి లేదా వ్యక్తుల సమూహం వయస్సు, వైకల్యం, సామాజిక స్థితి లేదా ఆర్థిక స్థితి కారణంగా వారికి ఉన్న బలహీనతలను ఉపయోగించుకుని, వారి ప్రవర్తనను గణనీయంగా మార్చి, ఆ వ్యక్తికి లేదా ఇతరులకు తీవ్ర హాని కలిగించే అవకాశం ఉన్న విధంగా వ్యవహరించడం.
వ్యక్తులు లేదా సమూహాల ప్రవర్తన, వ్యక్తిగత లక్షణాలు లేదా ఊహించిన/అంచనా వేసిన లక్షణాల ఆధారంగా కొంత కాలంపాటు వారిని వర్గీకరించి, కింది పరిణామాల్లో ఏదో ఒకదానికి దారితీసే సామాజిక విలువాంకాన్ని కేటాయించడం:
సంబంధం లేని సామాజిక సందర్భాల్లో వ్యక్తులు లేదా సమూహాలకు ప్రతికూల వ్యవహారం ఎదురయ్యేలా చేయడం, లేదా
వ్యక్తులు లేదా సమూహాల ప్రవర్తనతో పోలిస్తే సమర్థించలేని లేదా అసమానమైన ప్రతికూల వ్యవహారం వారికి ఎదురయ్యేలా చేయడం.
వ్యక్తులు నేరానికి పాల్పడవచ్చో లేదో అంచనా వేయడానికి, వారి వివరాల విశ్లేషణ లేదా వ్యక్తిత్వ లక్షణాల మదింపుపై మాత్రమే ఆధారపడి ప్రమాద మదింపులు నిర్వహించడం.
అంతర్జాలం లేదా సీసీటీవీ దృశ్యాల నుంచి ముఖ చిత్రాలను లక్ష్యరహితంగా సేకరించడం ద్వారా ముఖ గుర్తింపు దత్తాంశ భాండాగారాలను సృష్టించడం లేదా విస్తరించడం.
కార్యాలయాల్లో లేదా విద్యా సంస్థల్లో వ్యక్తుల భావోద్వేగాలను ఊహించడం (వైద్యపరమైన లేదా భద్రతాపరమైన మినహాయింపు వర్తిస్తే తప్ప).
వ్యక్తుల జీవసంబంధ గుర్తింపు దత్తాంశం ఆధారంగా వారిని వర్గీకరించి, వారి జాతి, రాజకీయ అభిప్రాయాలు, కార్మిక సంఘ సభ్యత్వం, మతపరమైన లేదా తాత్విక విశ్వాసాలు, లైంగిక జీవితం లేదా లైంగిక ధోరణిని ఊహించడం (అధీకృత చట్ట అమలు వంటి సందర్భంలో చట్టబద్ధంగా పొందిన దత్తాంశ సమితుల ఆధారంగా చేస్తే తప్ప).
కింది అవసరాల్లో దేనికైనా ఖచ్చితంగా తప్పనిసరైతే తప్ప, చట్ట అమలు ప్రయోజనాల కోసం ప్రజలకు అందుబాటులో ఉండే ప్రదేశాల్లో దూరస్థ జీవసంబంధ గుర్తింపును “తక్షణ సమయంలో” నిర్వహించడం:
కనిపించకుండా పోయిన వ్యక్తులు లేదా అపహరణ, మానవ అక్రమ రవాణా, లైంగిక దోపిడీకి గురైన నిర్దిష్ట బాధితుల కోసం లక్ష్యిత అన్వేషణ;
ఒక వ్యక్తి జీవితం లేదా శారీరక భద్రతకు ఎదురయ్యే నిర్దిష్టమైన, తీవ్రమైన, ఆసన్న ముప్పును లేదా ఉగ్రవాద దాడిని నివారించడం;
కొన్ని నిర్దిష్ట నేరాలకు సంబంధించిన అనుమానితులను గుర్తించడం.
మా సేవలను ఎలా ఉపయోగించవచ్చు, నిషేధించబడిన ఇతర కార్యకలాపాలు ఏమిటి అనే మరింత సమాచారం కోసం, దయచేసి OpenAI వినియోగ విధానాలు, ఇతర నిబంధనలను చూడండి. మీ చట్టపరమైన బాధ్యతలను మదింపు చేసుకోవడానికి, మీ వ్యవస్థలు/ఉత్పత్తుల్లో నిషేధిత పద్ధతులను నివారించడానికి సహాయపడే మార్గదర్శకాలను కూడా యూరోపియన్ కమిషన్ విడుదల చేసింది.