ఖాతాలను మార్చుకునే సదుపాయం ప్రస్తుతం ChatGPT వెబ్‌లో అందుబాటులో ఉంది; Codex డెస్క్‌టాప్‌లో లేదా ChatGPT మొబైల్ యాప్‌లలో ఇంకా అందుబాటులో లేదు.

ఖాతాలను మార్చుకునే సదుపాయంతో ఒకేసారి 2 ChatGPT ఖాతాల్లో ప్రవేశించి ఉండవచ్చు, వాటి మధ్య వెంటనే మారవచ్చు — ఏ ఖాతా నుంచీ నిష్క్రమించాల్సిన అవసరం లేదు.

దీనితో ఒకే బ్రౌజర్ లేదా పరికరాన్ని ఉపయోగిస్తూనే ఉద్యోగ అవసరాలకు, వ్యక్తిగత అవసరాలకు వేర్వేరు ఖాతాలను సులభంగా ఉపయోగించవచ్చు.

ఖాతా మార్పిడి సాధనంతో చేయగల పనులు

ఖాతా మార్పిడి సాధనంతో మీరు:

• ఒకే వినియోగ వ్యవధిలో 2 ఖాతాల్లో ప్రవేశించి ఉండవచ్చు

• వాటి మధ్య వెంటనే మారవచ్చు

• సంభాషణలు, జ్ఞాపకం, చరిత్ర, బిల్లులు, వర్క్‌స్పేస్‌లను పూర్తిగా వేరుగా ఉంచుకోవచ్చు

ప్రతి ఖాతా స్వతంత్రంగానే ఉంటుంది. ఖాతాలను మార్చడం వల్ల అవి విలీనం కావు లేదా కలిసిపోవడం జరగదు.

ఖాతా మార్పిడి సాధనం పనిచేసే విధానం

2 ఖాతాల్లో ప్రవేశించి ఉండండి

మీరు ఈ ఖాతాల్లో ప్రవేశించి ఉండవచ్చు:

• ఒక వ్యక్తిగత ఖాతా (ఉదా., bobby@gmail.com)

• ఒక ఉద్యోగ ఖాతా (ఉదా., bobby@acmecorp.com)

ఒక సమయంలో ఒక ఖాతా మాత్రమే సక్రియంగా ఉంటుంది, కానీ మరో ఖాతాకు వెంటనే మారవచ్చు.

మీరు అదనపు ఖాతాలను సృష్టించవచ్చు, కానీ ఖాతా మార్పిడి సాధనం ద్వారా ఒక వినియోగ వ్యవధిలో గరిష్ఠంగా 2 ఖాతాల్లో మాత్రమే ప్రవేశించి ఉండవచ్చు.

ఖాతాను జోడించండి

రెండో ఖాతాను జోడించడానికి:

1. ఖాతా మెనూను తెరవండి.

2. ఖాతాను జోడించండి ఎంచుకోండి.

3. ఖాతాలో ప్రవేశించండి లేదా కొత్త ఖాతాను సృష్టించండి.

మరో ఖాతాను జోడించడానికి ప్రస్తుత ఖాతా నుంచి నిష్క్రమించాల్సిన అవసరం లేదు.

రెండో ఖాతాను సృష్టించడానికి చెల్లింపు అవసరం లేదు. మీరు కొత్తగా సృష్టించిన ఖాతా స్వయంచాలకంగా ఉచిత పథకంతో ప్రారంభమవుతుంది.

ఖాతాలను మార్చండి

ఖాతాలను మార్చడానికి ఖాతా మెనూను ఉపయోగించండి. మీరు ఖాతాను మార్చినప్పుడు, ఎంచుకున్న ఖాతాకు సంబంధించిన సంభాషణలు, జ్ఞాపకం, ఫైళ్లు, అమరికలు కనిపిస్తాయి. వర్క్‌స్పేస్‌లు ఉంటే, అవి ఆ ఖాతాకు సంబంధించినవే ఉంటాయి.

ఖాతాలను మార్చడం అంటే విలీనం చేయడం కాదు. ఖాతాలను మార్చడం వల్ల కిందివి జరగవు:

• ఖాతాల మధ్య సంభాషణలను బదిలీ చేయడం

• జ్ఞాపకం లేదా సంభాషణల చరిత్రను పంచుకోవడం

• ఫైళ్లు లేదా అప్‌లోడ్ చేసిన వాటిని పంచుకోవడం

• బిల్లులు లేదా చందాలను కలపడం

• వర్క్‌స్పేస్‌లను విలీనం చేయడం

మీ ఉద్యోగ డేటా మీ సంస్థ నియంత్రణలో ఉండాలనుకుంటే, సంభాషణను ప్రారంభించే ముందు మీ ఉద్యోగ ఖాతానే ఉపయోగిస్తున్నారని నిర్ధారించుకోండి.

ఉద్యోగ, ఎంటర్‌ప్రైజ్ ఖాతాలు

మీ ChatGPT ఖాతాను మీ సంస్థ నిర్వహిస్తుంటే:

• ఆ ఖాతాకు సంబంధించిన డేటాను చూడటానికి, నిర్వహించడానికి మీ నిర్వాహకుడికి అనుమతి ఉండవచ్చు.

• మీ సంస్థ నిర్వహించే ఖాతాలో సృష్టించిన డేటాకు మీ సంస్థ విధానాలు వర్తిస్తాయి.

• ఖాతాలను మార్చడం వల్ల వర్తించే విధానాలు మారవు.

మరింత సమాచారం కోసం మీ సంస్థ నిర్వహించే ChatGPT ఖాతాలో డేటాను చూడగల అనుమతులు చూడండి. మీరు ఏ ఖాతాను ఉపయోగిస్తున్నారో స్పష్టంగా తెలియకపోతే, ఖాతా మెనూలో సక్రియంగా చూపిస్తున్న ఖాతాను చూడండి. మీ సంస్థ నిర్వహించే ఖాతా గురించి సందేహాలు ఉంటే, మీ సమాచార సాంకేతిక విభాగ నిర్వాహకుడిని సంప్రదించండి.

ChatGPTలో ప్రవేశించడానికి మీరు ఉపయోగించేది ఖాతా. మీ సంభాషణలు, కంటెంట్, అమరికలు ఉండే చోటు వర్క్‌స్పేస్. ఒకే ఖాతాతో వ్యక్తిగత వర్క్‌స్పేస్, సంస్థ వర్క్‌స్పేస్ సహా పలు వర్క్‌స్పేస్‌లను ఉపయోగించవచ్చు. మీ ఉద్యోగ ఈమెయిల్ కింద ఉన్న వ్యక్తిగత వర్క్‌స్పేస్, మీ సొంత ఈమెయిల్ చిరునామాతో తెరిచిన ప్రత్యేక ఖాతా ఒకటి కావు.

వ్యక్తిగత వినియోగం కోసం, మీ సొంతమైన, మీ నియంత్రణలో ఉన్న ఈమెయిల్ చిరునామాతో ప్రత్యేక ఖాతాను సృష్టించండి. వ్యక్తిగత సంభాషణలు, డేటా కోసం ఉద్యోగ లేదా సంస్థ ఈమెయిల్ చిరునామాను ఉపయోగించవద్దు.

మీ ఉద్యోగం ముగిసి, మీ ఉద్యోగ ఈమెయిల్ లేదా సంస్థ నిర్వహించే వర్క్‌స్పేస్‌ను ఉపయోగించే అనుమతిని మీ యజమాని తొలగిస్తే, సంబంధిత ఖాతా లేదా వర్క్‌స్పేస్‌తో పాటు అందులో నిల్వ చేసిన వ్యక్తిగత డేటాను కూడా మీరు ఉపయోగించలేరు. ఖాతా మార్పిడి సదుపాయం ఆ అనుమతిని కొనసాగించదు, ఆ డేటాను మీ వ్యక్తిగత ఖాతాకు బదిలీ చేయదు.

మీ వ్యక్తిగత వర్క్‌స్పేస్‌ను ఎంటర్‌ప్రైజ్ లేదా బిజినెస్ వర్క్‌స్పేస్‌లో విలీనం చేస్తే, విలీనం తర్వాత వ్యక్తిగత వర్క్‌స్పేస్ మూసివేయబడుతుంది. విలీనం శాశ్వతమైనది: తర్వాత మీరు అసలు వ్యక్తిగత వర్క్‌స్పేస్‌ను విడదీయలేరు లేదా పునరుద్ధరించలేరు. కొన్ని బిజినెస్ ఆహ్వానాలు వ్యక్తిగత వర్క్‌స్పేస్‌ను వేరుగా ఉంచుకోవడానికి అనుమతిస్తాయి; కొనసాగించే ముందు అందుబాటులోని ఎంపికలను పరిశీలించండి.

ధృవీకరించిన సంస్థ ఈమెయిల్‌తో ఎంటర్‌ప్రైజ్‌లో చేరేటప్పుడు, మీ వ్యక్తిగత వర్క్‌స్పేస్‌ను విలీనం చేయడం ద్వారా లేదా అందులోని డేటాను ఎగుమతి చేసి తొలగించడం ద్వారా మూసివేయాల్సి రావచ్చు. వ్యక్తిగత వర్క్‌స్పేస్‌ను విలీనం చేయాలని లేదా తొలగించాలని బిజినెస్ నిర్వాహకులు మిమ్మల్ని బలవంతం చేయలేరు.

తరచుగా అడిగే ప్రశ్నలు

ఖాతా మార్పిడి సదుపాయంతో 2 ఖాతాలను విలీనం చేయవచ్చా.

చేయలేరు. ఖాతా మార్పిడి సదుపాయంతో పలు ఖాతాలను సులభంగా ఉపయోగించవచ్చు, కానీ అది వాటిని విలీనం చేయదు.

అన్ని రకాల పథకాలతో దీన్ని ఉపయోగించవచ్చా.

అన్ని రకాల పథకాలతో ఖాతా మార్పిడి సదుపాయాన్ని ఉపయోగించవచ్చు. అయితే, మీ సంస్థ నిర్వహించే వర్క్‌స్పేస్‌లో ఈ సదుపాయం అందుబాటులో ఉండాలా వద్దా అన్నది మీ సంస్థ నిర్ణయించవచ్చు. సంస్థ నిర్వహించే వర్క్‌స్పేస్‌లో ఖాతాలను జోడించే లేదా మార్చే ఎంపిక కనిపించకపోతే, మీ వర్క్‌స్పేస్ నిర్వాహకుడిని సంప్రదించండి.

నా వర్క్‌స్పేస్‌ను నిష్క్రియం చేస్తే ఏమవుతుంది.

ఖాతాకు అనుసంధానించిన వర్క్‌స్పేస్‌ను నిష్క్రియం చేస్తే:

• ఆ మార్పును వివరించే సూచన పట్టీ మీకు కనిపించవచ్చు.

• వేరే ఖాతాతో ప్రవేశించమని లేదా కొత్త చందాను కొనుగోలు చేయమని మిమ్మల్ని కోరవచ్చు (పథకం రకాన్ని బట్టి).

• ChatGPT మిమ్మల్ని స్వయంచాలకంగా మరో ఖాతాకు మార్చదు.

రెండో ఖాతాను ఎప్పుడు ఉపయోగించాలి.

మీకు కిందివి కావాలంటే ప్రత్యేక ఖాతా ఉపయోగపడుతుంది:

• ఉద్యోగ, వ్యక్తిగత సంభాషణలను స్పష్టంగా వేరు చేయడం

• వేర్వేరు సంభాషణల చరిత్రలు

• వేర్వేరు బిల్లులు లేదా చందా పథకాలు

• వేర్వేరు వర్క్‌స్పేస్‌లు

• వేర్వేరు గోప్యత లేదా నిర్వహణ నియంత్రణలు

మీ ఉద్యోగ కార్యకలాపాలు మీ సంస్థ పర్యవేక్షణలో ఉండాలనుకుంటే, ఉద్యోగ సంబంధిత సంభాషణలకు మీ సంస్థ నిర్వహించే ఉద్యోగ ఖాతాను ఉపయోగించండి.