అవలోకనం

ఐపీ అనుమతి జాబితా ఒక ఐచ్ఛిక భద్రతా సదుపాయం. దీని ద్వారా మీ OpenAI ఏపీఐని ఏ ఐపీ చిరునామాల నుంచి ఉపయోగించవచ్చో పరిమితం చేయవచ్చు.

దీన్ని అమలు చేస్తే, మీరు నిర్దేశించిన ఐపీ చిరునామాలు లేదా ఐపీ పరిధుల నుంచి వచ్చే అభ్యర్థనలు మాత్రమే అనుమతించబడతాయి. మిగతా అన్ని ఐపీల నుంచి వచ్చే అభ్యర్థనల్లో చెల్లుబాటు అయ్యే ఏపీఐ కీ ఉన్నప్పటికీ, అవి తిరస్కరించబడతాయి.

విశ్వసనీయ నెట్‌వర్క్ వ్యవస్థలకే ప్రాప్యతను పరిమితం చేయడం ద్వారా అనధికార ఏపీఐ వినియోగ ప్రమాదాన్ని తగ్గించడంలో తోడ్పడటం ఈ సదుపాయం ఉద్దేశం.

గమనిక: ఐపీ అనుమతి జాబితా ఏపీఐ అభ్యర్థనలకు మాత్రమే వర్తిస్తుంది. ఇది platform.openai.com ప్రాప్యతను లేదా వినియోగదారులు ఖాతాలోకి ప్రవేశించడాన్ని ప్రభావితం చేయదు.

ఐపీ అనుమతి జాబితాను ఎందుకు ఉపయోగించాలి

ఐపీ అనుమతి జాబితా మీకు ఈ విధంగా సహాయపడుతుంది:

• ఏపీఐ ప్రాప్యతను తెలిసిన మౌలిక వ్యవస్థలకే పరిమితం చేయడం (ఉదాహరణకు, మీ సర్వర్‌లు లేదా క్లౌడ్ వ్యవస్థలు)

• ఏపీఐ కీ బయటపడితే, దాని వల్ల కలిగే ముప్పును తగ్గించడం

• ఏపీఐ అభ్యర్థనలు ఎక్కడి నుంచి రావచ్చనే విషయంలో అదనపు నియంత్రణను కల్పించడం

స్థిరమైన లేదా స్పష్టంగా నిర్వచించిన నెట్‌వర్క్ పరిధుల నుంచి ఏపీఐ అభ్యర్థనలు వచ్చే ప్రత్యక్ష వినియోగ వ్యవస్థల్లో ఐపీ అనుమతి జాబితాను ఎక్కువగా ఉపయోగిస్తారు.

ఇది పనిచేసే విధానం

మీరు అనుమతించే ఐపీ చిరునామాలు లేదా సీఐడీఆర్ పరిధులతో ఒక జాబితాను ఏర్పాటు చేస్తారు.

• అనుమతించిన ఐపీల నుంచి వచ్చే అభ్యర్థనలు ఆమోదించబడతాయి.

• అనుమతి జాబితాలో లేని ఐపీల నుంచి వచ్చే అభ్యర్థనలు తిరస్కరించబడతాయి.

ఐపీ అనుమతి జాబితాను ఈ స్థాయుల్లో అమలు చేయవచ్చు:

• సంస్థ స్థాయిలో, లేదా

• ప్రాజెక్ట్ స్థాయిలో

లభ్యత

ఐపీ అనుమతి జాబితా సదుపాయం ఏపీఐ వినియోగదారులందరికీ అందుబాటులో ఉంది.

ఐపీ అనుమతి జాబితాను ఏర్పాటు చేయడానికి, కింది దశలను అనుసరించండి.

ఐపీ అనుమతి జాబితాను ఏర్పాటు చేయడం

గమనిక: మీరు గరిష్ఠంగా 50 ఐపీ చిరునామాలు లేదా సీఐడీఆర్ పరిధులను జోడించవచ్చు.

1. సెట్టింగ్‌లు తెరవండి.

2. భద్రత ఎంచుకోండి.

3. ఐపీ అనుమతి జాబితా ఎంచుకోండి.

4. ఒకటి లేదా అంతకంటే ఎక్కువ ఐపీ చిరునామాలు లేదా సీఐడీఆర్ పరిధులను జోడించండి.

5. (ఐచ్ఛికం) మీ అనుమతి జాబితాలో ఒక ఐపీ ఉందో లేదో నిర్ధారించుకోవడానికి తనిఖీ సాధనాన్ని ఉపయోగించండి.

6. అనుమతి జాబితాను వీటికి వర్తింపజేయండి:

   • ఒక నిర్దిష్ట ప్రాజెక్ట్‌కు, లేదా

   • మీ సంస్థ మొత్తానికి.

7. మీరు ఉపయోగించబోయే వ్యవస్థల నుంచి అభ్యర్థనలు పంపి పరీక్షించండి.

సంస్థ అంతటా అమలు చేయడానికి ముందు ఒకే ప్రాజెక్ట్‌తో ప్రారంభించాలని మేము సిఫార్సు చేస్తున్నాము.

మీరు చేసిన మార్పులు అమల్లోకి రావడానికి 15 నిమిషాల వరకు పట్టవచ్చు.


గమనిక: ఐపీ అనుమతి జాబితా సెట్టింగ్‌లను సవరించడానికి మీకు సంస్థలో తగిన అనుమతులు ఉండాలి.

సమస్యల పరిష్కారం

అభ్యర్థనలు అనుకోకుండా విఫలమవుతుంటే:

• అభ్యర్థన అనుమతించిన ఐపీ చిరునామా నుంచే వస్తోందని నిర్ధారించుకోండి.

• మీ మౌలిక వ్యవస్థల ఐపీ చిరునామాలు మారాయేమో తనిఖీ చేయండి.

• మీరు నిర్దేశించిన ఐపీ పరిధులు సరిగ్గా ఉన్నాయో సమీక్షించండి.

• సెట్టింగ్‌లలో చేసిన మార్పులు అంతటా అమల్లోకి రావడానికి 15 నిమిషాల వరకు వేచి ఉండండి.

• ఒక ఐపీకి అనుమతి ఉందో లేదో నిర్ధారించుకోవడానికి తనిఖీ సాధనాన్ని ఉపయోగించండి.

అభ్యర్థనను నిరోధించినప్పుడు ఏమి జరుగుతుంది

అనుమతి జాబితాలో లేని ఐపీ చిరునామా నుంచి అభ్యర్థన వస్తే, అది విఫలమై ఈ వివరాలు అందుతాయి:

• హెచ్‌టిటిపి స్థితి: 401 Unauthorized

• లోపం కోడ్: ip_not_authorized

ప్రతిస్పందన ఉదాహరణ:

{

 "error": {

   "message": "Your IP is not authorized to access this organization.",

   "type": "ip_not_authorized"

 }

}

తరచుగా అడిగే ప్రశ్నలు

నా ఏపీఐ కీని అనధికారికంగా ఉపయోగించడాన్ని ఐపీ అనుమతి జాబితా పూర్తిగా నిరోధిస్తుందా.

లేదు. ఏపీఐ అభ్యర్థనలు వచ్చే మూలాలను పరిమితం చేయడం ద్వారా ఐపీ అనుమతి జాబితా ప్రమాదాన్ని తగ్గించడంలో సహాయపడుతుంది. కానీ అన్ని రకాల దుర్వినియోగాన్ని పూర్తిగా నిరోధించదు. కీలను సురక్షితంగా భద్రపరచడం, క్రమం తప్పకుండా మార్చడం, ఖాతాకు పటిష్ఠమైన భద్రత కల్పించడం వంటి ఇతర ఉత్తమ భద్రతా పద్ధతులతో పాటు దీన్ని ఉపయోగించాలి. అదనపు భద్రత కోసం, మా సహాయ కేంద్రంలోని ఏపీఐ కీ భద్రతకు ఉత్తమ పద్ధతులు, అనధికార వినియోగాన్ని నిరోధించడం మార్గదర్శకాలను చదవండి.

ఐపీ అనుమతి జాబితా వల్ల ప్రతిస్పందనలో జాప్యం పెరుగుతుందా.

కొన్ని సందర్భాల్లో ఐపీ అనుమతి జాబితా వల్ల స్వల్ప జాప్యం ఏర్పడవచ్చు. సాధారణంగా ఇది ప్రారంభ అభ్యర్థనల్లో కనిపిస్తుంది. ఇది మొత్తం ఏపీఐ పనితీరును గణనీయంగా ప్రభావితం చేస్తుందని భావించడం లేదు.

ఐపీ అనుమతి జాబితా కారణంగానే అభ్యర్థన విఫలమవుతోందని ఎలా తెలుసుకోవాలి.

ఐపీ అనుమతి జాబితా కారణంగా విఫలమయ్యే అభ్యర్థనలకు ఈ ప్రతిస్పందన వస్తుంది:

• HTTP status: 401 Unauthorized

• Error code: ip_not_authorized