ChatGPTకు శక్తినిచ్చే మోడళ్లతో సహా OpenAI ఫౌండేషన్ మోడళ్లు మూడు ప్రధాన సమాచార వనరులను ఉపయోగించి అభివృద్ధి చేయబడతాయి: (1) ఇంటర్నెట్‌లో బహిరంగంగా అందుబాటులో ఉన్న సమాచారం, (2) మూడవ పక్షాలతో భాగస్వామ్యం ద్వారా మేము పొందే సమాచారం, (3) మా వినియోగదారులు, మానవ శిక్షకులు, పరిశోధకులు అందించే లేదా రూపొందించే సమాచారం.

ChatGPTలో ఉపయోగించే ఫౌండేషన్ మోడళ్ల వంటి వాటి అభివృద్ధిలో శిక్షణ డేటాను సిద్ధం చేయడం, ప్రీ-ట్రైనింగ్, శిక్షణానంతర ప్రక్రియలతో పాటు అమలు చేసిన తర్వాత నిరంతర మూల్యాంకనం, మెరుగుదల వంటి అనేక దశలు ఉంటాయి. మోడల్ పనితీరు, విశ్వసనీయత, భద్రతను మెరుగుపరచడం సహా వివిధ ప్రయోజనాల కోసం ఈ దశల్లో విభిన్న రకాల సమాచారాన్ని ఉపయోగించవచ్చు. 

ఈ మోడళ్ల అభివృద్ధికి మేము ఉపయోగించే సమాచారం, గోప్యతా చట్టాలకు అనుగుణంగా దాన్ని సేకరించి ఉపయోగించే విధానం, శిక్షణ ప్రక్రియ అంతటా అమలు చేసే రక్షణ చర్యల గురించి ఈ కథనం సమగ్ర అవలోకనాన్ని అందిస్తుంది. మా మోడళ్లను మెరుగుపరచడానికి ChatGPT సంభాషణలను ఉపయోగించకుండా నిలిపివేసే విధానంతో సహా, మా సేవల వినియోగదారుల నుంచి సమాచారాన్ని మేము ఎలా సేకరించి ఉపయోగిస్తామో తెలుసుకోవడానికి మా ప్రైవసీ పాలసీ, ఈ హెల్ప్ సెంటర్ కథనం చూడండి.

ChatGPT అంటే ఏమిటి, అది ఎలా పనిచేస్తుంది?

ChatGPT అనేది ఇంటర్నెట్ లేదా అనువర్తనం ద్వారా మీరు ఉపయోగించగల కృత్రిమ మేధ ఆధారిత సేవ. సమాచారాన్ని క్రమబద్ధీకరించడం, సంగ్రహించడం, అనువాదాల్లో సహాయం పొందడం, కోడింగ్, పరిశోధన, విశ్లేషణకు తోడ్పాటు పొందడం, వివిధ సాధనాల్లో బహుళ దశల పనులను పూర్తి చేయడం, చిత్రాలను విశ్లేషించడం లేదా రూపొందించడం, సృజనాత్మకతకు, ఆలోచనలకు ప్రేరణ పొందడం, ఇతర రోజువారీ కార్యకలాపాలు వంటి అనేక పనులకు మీరు ChatGPTను ఉపయోగించవచ్చు. వచనం, చిత్రాలు, శ్రవ్యం, దృశ్యమాధ్యమం సహా భారీ మొత్తంలోని సమాచారం నుంచి నమూనాలను నేర్చుకొని, వినియోగదారుల ప్రశ్నలు, సూచనలను అర్థం చేసుకుని సమాధానమిచ్చేలా ChatGPT రూపొందించబడింది. 

శిక్షణ సమయంలో, సందర్భంలో పదాలు సాధారణంగా ఎలా కలిసి వస్తాయనే విషయంతో సహా ఈ డేటాలోని సంబంధాలను మోడల్ విశ్లేషిస్తుంది. ఆ అవగాహనతో సమాధానాన్ని రూపొందించేటప్పుడు తర్వాత వచ్చే అవకాశం అత్యధికంగా ఉన్న పదాన్ని ఒక్కో పదంగా అంచనా వేస్తుంది. వచనాన్ని చిన్న భాగాలుగా మార్చవచ్చు. వాటిని కొన్నిసార్లు “టోకెన్లు” అంటారు. అవి పూర్తి పదాలు, పదాల భాగాలు లేదా విరామ చిహ్నాలను సూచించవచ్చు. మోడల్ ప్రాసెస్ చేసే వచనానికి టోకెన్లు నిర్మాణ భాగాలు. అదే విధంగా, చిత్రాల వంటి ఇతర రకాల కంటెంట్‌ను రూపొందించే మోడళ్లు, శిక్షణ డేటాలో పిక్సెల్‌లు ఒకదానితో ఒకటి, సంబంధిత శీర్షికలతో ఎలా ముడిపడి ఉంటాయో తెలిపే నమూనాలను నేర్చుకుంటాయి.

ఉదాహరణకు, “ఎడమవైపు తిరగకుండా, ఆమె ___ తిరిగింది” వంటి వాక్యాన్ని పూర్తి చేయమని మోడల్ నేర్చుకునే ప్రక్రియలో, అంటే “శిక్షణ” సమయంలో, దానికి పని ఇవ్వవచ్చు. శిక్షణ ప్రారంభంలో దాని సమాధానాలు చాలావరకు యాదృచ్ఛికంగా ఉంటాయి. అయితే, మోడల్ భారీ పరిమాణంలోని వచనాన్ని ప్రాసెస్ చేసి నేర్చుకుంటున్న కొద్దీ, నమూనాలను గుర్తించడంలో, తర్వాత వచ్చే అత్యంత సంభావ్య పదాన్ని అంచనా వేయడంలో మెరుగుపడుతుంది. దాని అవగాహనను మెరుగుపరచి, కచ్చితత్వాన్ని పెంచడానికి ఈ ప్రక్రియను లక్షలాది వాక్యాలపై పునరావృతం చేస్తారు.

“ఎడమవైపు తిరగకుండా, ఆమె కుడివైపు తిరిగింది,” “చుట్టూ తిరిగింది” లేదా “వెనక్కి తిరిగింది” అన్నట్లుగా ఒక వాక్యాన్ని పూర్తి చేయడానికి అనేక సమంజసమైన మార్గాలు ఉంటాయి. అందువల్ల మోడల్ సమాధానమిచ్చే విధానంలో సహజంగానే కొంత యాదృచ్ఛికత ఉంటుంది. ఫలితంగా, ఒకే ప్రశ్నను వేర్వేరు సందర్భాల్లో అడిగితే వేర్వేరు సమాధానాలు రావచ్చు.

యంత్ర అభ్యాస మోడళ్లలో “వెయిట్‌లు” లేదా “పారామీటర్‌లు” అని పిలిచే పెద్ద సంఖ్యా సమితులతో పాటు, ఆ సంఖ్యలను అర్థం చేసుకొని ఉపయోగించే కోడ్ ఉంటుంది. ఈ మోడళ్లు తాము శిక్షణ పొందిన డేటా ప్రతులను నిల్వ చేయవు లేదా ఉంచుకోవు. దానికి బదులుగా, మోడల్ నేర్చుకునే కొద్దీ అది గుర్తించిన నమూనాలను ప్రతిబింబించేలా దాని పారామీటర్‌ల విలువలు స్వల్పంగా సర్దుబాటు అవుతాయి. మునుపటి ఉదాహరణలో మోడల్ శిక్షణ వాక్యాలను నిల్వ చేయడం ద్వారా కాకుండా, తన అంతర్గత పారామీటర్‌లను నవీకరించడం ద్వారా యాదృచ్ఛిక పదాలను అంచనా వేసే స్థితి నుంచి మరింత కచ్చితమైన అంచనాలు వేసే స్థాయికి మెరుగుపడింది. శిక్షణ సమయంలో ప్రాసెస్ చేసే వాక్యాలు, చిత్రాలు లేదా శ్రవ్య సమాచారం ప్రతులను మోడల్ ఉంచుకోదు. ChatGPT తన శిక్షణ డేటా నుంచి “నకలు చేసి అతికించదు.” విస్తృతంగా అధ్యయనం చేసిన ఉపాధ్యాయుడు మూల విషయాలను కంఠస్థం చేయకుండా లేదా యథాతథంగా పునరుత్పత్తి చేయకుండా, భావాల మధ్య సంబంధాలను అర్థం చేసుకొని వాటిని వివరించే విధంగానే ఇది పనిచేస్తుంది. వినియోగదారు అభ్యర్థనకు సమాధానం రూపొందించేటప్పుడు, మోడల్ తాను నేర్చుకున్న ఈ వెయిట్‌లను ఉపయోగించి కొత్త కంటెంట్‌ను అంచనా వేసి సృష్టిస్తుంది.

ChatGPTకు నేర్పడానికి ఏ రకమైన సమాచారాన్ని ఉపయోగిస్తారు?

బహిరంగంగా అందుబాటులో ఉన్న ఇంటర్నెట్ కంటెంట్ విషయంలో, ఇంటర్నెట్‌లో ఉచితంగా, అందరికీ అందుబాటులో ఉన్న సమాచారాన్ని మాత్రమే మేము ఉపయోగిస్తాము. ఇందులో బహిరంగంగా అందుబాటులో ఉన్న వెబ్‌పేజీలు, ప్రజా చర్చావేదికలు, బ్లాగులు, పోస్ట్‌లు, ఇతర ఆన్‌లైన్ కంటెంట్ ఉండవచ్చు. ఉదాహరణకు, మీరు బహిరంగ ఆన్‌లైన్ చర్చావేదికలో పాల్గొన్నా, ప్రజలకు అందుబాటులో ఉండే బ్లాగు లేదా మరేదైనా పోస్ట్ చేసినా, ఆ కంటెంట్‌ను మోడల్ శిక్షణ ప్రయోజనాల కోసం మేము ఉపయోగించవచ్చు. అయితే, మా శిక్షణ ప్రక్రియలో వ్యక్తిగత సమాచార ప్రాసెసింగ్‌ను తగ్గించడానికి మేము చర్యలు తీసుకుంటాము.  బహిరంగంగా అందుబాటులో ఉన్న ఇంటర్నెట్ కంటెంట్‌ను సేకరించేటప్పుడు, చెల్లింపు అడ్డుగోడల వెనుక ఉన్నట్లు తెలిసిన వనరుల నుంచి లేదా డార్క్ వెబ్ నుంచి మేము ఉద్దేశపూర్వకంగా డేటాను సేకరించము. అదనంగా, ద్వేషపూరిత ప్రసంగం, వయోజన కంటెంట్, వ్యక్తిగత సమాచారాన్ని సమీకరించే సైట్‌లు, అవాంఛిత సందేశాలు వంటి మా మోడళ్లు నేర్చుకోకూడదని మేము భావించే విషయాలను తొలగించడానికి వడపోతలను వర్తింపజేస్తాము. మిగిలిన సమాచారాన్ని మా మోడళ్లకు శిక్షణ ఇవ్వడానికి ఉపయోగిస్తాము. 

మా మోడళ్ల శిక్షణకు తోడ్పడేందుకు బహిరంగ కంటెంట్‌ను పరిశీలించగల GPTBotను robots.txt ద్వారా నిరాకరించడం వంటి ప్రామాణిక వెబ్ నియంత్రణలను ఉపయోగించి, తమ సైట్‌లలోని బహిరంగ కంటెంట్‌ను శిక్షణ కోసం యాక్సెస్ చేయవచ్చో లేదో వెబ్‌సైట్ యజమానులు నిర్వహించవచ్చు. వెబ్‌సైట్ యజమానులు తమ సైట్‌లు, కంటెంట్ మా కృత్రిమ మేధ వ్యవస్థలతో ఎలా పరస్పర చర్య జరపాలో నిర్వహించేందుకు మేము మార్గదర్శకాలను అందిస్తున్నాము. 

మా మోడళ్లకు శిక్షణ ఇచ్చి వాటిని మెరుగుపరచడంలో సహాయపడేందుకు మూడవ పక్ష భాగస్వాముల సమాచారాన్ని కూడా ఉపయోగిస్తాము. ఇందులో మూడవ పక్షాలతో ఒప్పందాల ద్వారా మేము యాక్సెస్ చేసే డేటా సమితుల్లోని సమాచారంతో పాటు, మా విధానాలు, ఒప్పందాలు అనుమతించే మేరకు మానవ శిక్షకులు, పరిశోధకులు అందించిన లేదా రూపొందించిన సమాచారం ఉండవచ్చు. ఇది మా మోడళ్ల నాణ్యత, భద్రత, పనితీరును మెరుగుపరచడంలో సహాయపడుతుంది. డేటా సమితిని బట్టి ఈ వనరుల్లో వచనం, చిత్రాలు, శ్రవ్యం, దృశ్యమాధ్యమం లేదా ఇతర రకాల డేటా ఉండవచ్చు.

కొన్ని శిక్షణ ప్రక్రియల్లో మేము కృత్రిమ డేటాను కూడా క్రమంగా ఎక్కువగా ఉపయోగిస్తున్నాము. ఉదాహరణకు, కృత్రిమ సూచనలు, బహుభాషా ఉదాహరణలు లేదా ఇతర శిక్షణ సామగ్రిని రూపొందించడానికి సమాచారాన్ని, మా మోడళ్లను ఉపయోగించవచ్చు. డేటా తక్కువగా లేదా అసమతుల్యంగా ఉన్న రంగాల్లో శిక్షణ డేటాకు అదనపు సమాచారాన్ని జోడించడం ద్వారా కృత్రిమ డేటా మోడల్ పనితీరును మెరుగుపరచగలదు. మోడల్ అభివృద్ధిలో గోప్యతను మెరుగుపరిచే విధానాలకు కూడా ఇది తోడ్పడవచ్చు.

ChatGPTకు నేర్పడానికి వ్యక్తిగత సమాచారాన్ని ఉపయోగిస్తారా?

ఆన్‌లైన్ కంటెంట్‌లో గణనీయమైన భాగం వ్యక్తులకు సంబంధించిన సమాచారాన్ని కలిగి ఉంటుంది. అందువల్ల మా శిక్షణ డేటాలో యాదృచ్ఛికంగా వ్యక్తిగత సమాచారం ఉండవచ్చు. అయితే, మా శిక్షణ ప్రక్రియలో వ్యక్తిగత సమాచార ప్రాసెసింగ్‌ను తగ్గించడానికి మేము చర్యలు తీసుకుంటాము.

అంచనా వేయడం, రీజనింగ్, సమస్య పరిష్కారం వంటి మోడల్ సామర్థ్యాలను అభివృద్ధి చేయడానికి శిక్షణ డేటాను ఉపయోగిస్తాము. వ్యక్తుల ప్రొఫైళ్లను రూపొందించడానికి, వారిని సంప్రదించడానికి లేదా వారికి ప్రకటనలను వ్యక్తిగతీకరించడానికి కాదు.

కొన్ని సందర్భాల్లో, పేర్లు, చిరునామాలు వంటి అంశాలు భాషలో ఎలా పనిచేస్తాయో అర్థం చేసుకోవడానికి లేదా ప్రముఖ వ్యక్తులు, సుపరిచిత సంస్థలను గుర్తించడానికి మోడళ్లు వ్యక్తిగత సమాచారం నుంచి నేర్చుకోవచ్చు. ఇది మరింత కచ్చితమైన, సందర్భోచితమైన సమాధానాలను రూపొందించడంలో మోడల్‌కు సహాయపడుతుంది.

శిక్షణ సమయంలో వ్యక్తిగత సమాచారాన్ని ఎలా రక్షిస్తారు?

శిక్షణ సమయంలో వ్యక్తిగత సమాచార ప్రాసెసింగ్‌ను పరిమితం చేయడానికి మేము క్రియాశీల చర్యలు తీసుకుంటాము. ఉదాహరణకు, భారీ మొత్తంలో వ్యక్తిగత డేటాను సమీకరించే తెలిసిన వనరులను మినహాయిస్తాము, శిక్షణ ప్రక్రియలో వ్యక్తిగత సమాచారాన్ని తగ్గించడానికి వడపోతలను వర్తింపజేస్తాము, శిక్షణ డేటా పునరావృతమయ్యే ప్రమాదాన్ని తగ్గించేందుకు నకిలీ కంటెంట్‌ను గుర్తించి తొలగించే చర్యలు తీసుకుంటాము. అదనంగా, వ్యక్తులకు సంబంధించిన ప్రైవేట్ లేదా సున్నితమైన సమాచార అభ్యర్థనలకు సమాధానమివ్వకుండా మా మోడళ్లకు శిక్షణ ఇస్తాము. 

మేము సమాచారాన్ని ఎంతకాలం ఉంచుతాము

మా మోడళ్ల అభివృద్ధి, మెరుగుదల, సంబంధిత శాస్త్రీయ పరిశోధన ప్రయోజనాలతో సహా ఈ కథనంలో, మా ప్రైవసీ పాలసీలో వివరించిన ప్రయోజనాలకు సహేతుకంగా అవసరమైనంత కాలం మాత్రమే శిక్షణ డేటాలోని సమాచారాన్ని ఉంచుతాము. సమాచారాన్ని ఉంచడం ఇంకా అవసరమేనని నిర్ధారించడానికి క్రమానుగతంగా సమీక్షిస్తాము. సమాచార రకం, దాన్ని ఉపయోగించే విధానాన్ని బట్టి నిల్వ వ్యవధి మారుతుంది. నిల్వ వ్యవధిని నిర్ణయించేటప్పుడు సమాచారాన్ని ప్రాసెస్ చేసే ఉద్దేశం, దాని పరిమాణం, స్వభావం, సున్నితత్వం, అనధికారిక వినియోగం లేదా బహిర్గతం వల్ల సంభవించగల హాని, మాకు వర్తించే చట్టపరమైన బాధ్యతలు వంటి అంశాలను పరిగణిస్తాము.

ChatGPT అభివృద్ధి గోప్యతా చట్టాలకు ఎలా అనుగుణంగా ఉంటుంది?

మేము శిక్షణ సమాచారాన్ని చట్టబద్ధంగా ఉపయోగిస్తాము. సౌలభ్య సాధనాలు, వినియోగదారు సహాయం, సాఫ్ట్‌వేర్ అభివృద్ధి, వ్యక్తిగతీకరించిన విద్య, శాస్త్రీయ పరిశోధన సహా అనేక ప్రయోజనకర అనువర్తనాలకు మా ఫౌండేషన్ మోడళ్లు శక్తినిస్తాయి. ఈ సామర్థ్యాలు బహిరంగంగా అందుబాటులో ఉన్న సమాచారం, మూడవ పక్ష భాగస్వాముల సమాచారం సహా లార్జ్-స్కేల్ ట్రైనింగ్ డేటాపై ఆధారపడి ఉంటాయి. ఈ కథనంలో వివరించినట్లుగా, శిక్షణ ప్రక్రియలో వ్యక్తిగత సమాచార ప్రాసెసింగ్‌ను తగ్గించడానికి, ప్రమాదాలను తగ్గించడానికి రూపొందించిన చర్యలతో సహా ప్రక్రియ అంతటా రక్షణ చర్యలను అమలు చేస్తాము. ఆర్టిఫిషియల్ జనరల్ ఇంటెలిజెన్స్ అందరికీ ప్రయోజనం చేకూర్చేలా చూడాలనే మా లక్ష్యానికి అనుగుణంగా, వినియోగదారులు, విస్తృత సమాజం కోసం మా మోడళ్లకు శిక్షణ ఇచ్చి వాటిని మెరుగుపరచడం సహా, శిక్షణ సమాచారంలో ఉన్న వ్యక్తిగత సమాచారాన్ని సేకరించి ఉపయోగించడాన్ని GDPR వంటి గోప్యతా చట్టాల కింద చట్టబద్ధ ప్రయోజనాలపై ఆధారపరుస్తాము. దీనిని మా ప్రైవసీ పాలసీలో మరింత వివరంగా తెలియజేశాము. ఈ సమాచారాన్ని చట్టబద్ధంగా, బాధ్యతాయుతంగా సేకరించి ఉపయోగిస్తున్నామని నిర్ధారించడంలో సహాయపడేందుకు మేము డేటా రక్షణ ప్రభావ అంచనాను పూర్తి చేశాము.

సమాచారాన్ని ఎప్పుడు పంచుకోవచ్చు లేదా బదిలీ చేయవచ్చు

మేము వ్యక్తిగత సమాచారాన్ని “విక్రయించము.” మా ప్రైవసీ పాలసీలో వివరించిన పరిమిత సందర్భాల్లో మాత్రమే శిక్షణ డేటాలోని వ్యక్తిగత సమాచారాన్ని వెల్లడిస్తాము. ఉదాహరణకు, మా మోడళ్ల అభివృద్ధి, పరీక్ష, మెరుగుదలకు సహకరించే అనుబంధ సంస్థలు, విక్రేతలు, సేవా ప్రదాతలతో సమాచారాన్ని పంచుకోవచ్చు. మా ప్రైవసీ పాలసీలో వివరించినట్లుగా, చట్టపరమైన బాధ్యతను పాటించడానికి లేదా మా హక్కులు, భద్రత, రక్షణతో పాటు మా వినియోగదారులు, ఉద్యోగులు లేదా ప్రజల హక్కులు, భద్రత, రక్షణను కాపాడటానికి అవసరమని చిత్తశుద్ధితో విశ్వసించినప్పుడు కూడా సమాచారాన్ని వెల్లడించవచ్చు.

మా మౌలిక సదుపాయాలు ప్రపంచవ్యాప్తంగా ఉన్నందున, శిక్షణ డేటాలోని వ్యక్తిగత సమాచారాన్ని EEA, స్విట్జర్లాండ్ లేదా UK వెలుపలి దేశాల్లో, అమెరికాతో సహా, ప్రాసెస్ చేయవచ్చు. ఇలా జరిగినప్పుడు, మా ప్రైవసీ పాలసీలో వివరించినట్లుగా, తగినంత రక్షణ ఉందనే నిర్ణయాలు లేదా ప్రామాణిక ఒప్పంద నిబంధనలు వంటి సముచిత రక్షణ చర్యలను అమలు చేస్తాము.

మీ హక్కులు, వాటిని వినియోగించుకునే విధానం

అభ్యంతర అభ్యర్థనలు, ఇలాంటి ఇతర హక్కుల అభ్యర్థనలకు మేము స్పందిస్తాము. భాషను నేర్చుకున్న ఫలితంగా, బహిరంగ ఇంటర్నెట్‌లో పలుమార్లు వ్యక్తిగత సమాచారం కనిపించే వ్యక్తుల గురించి, ఉదాహరణకు ప్రముఖుల గురించి, ChatGPT సమాధానాల్లో కొన్నిసార్లు వ్యక్తిగత సమాచారం ఉండవచ్చు. కొన్ని అధికార పరిధుల్లోని వ్యక్తులు మా మోడళ్లు తమ వ్యక్తిగత సమాచారాన్ని ప్రాసెస్ చేయడంపై అభ్యంతరం తెలపవచ్చు లేదా మా ప్రైవసీ పోర్టల్ ద్వారా ఇతర డేటా వ్యక్తి హక్కుల అభ్యర్థనలు చేయవచ్చు. privacy@openai.comను సంప్రదించడం ద్వారా కూడా మీరు ఈ హక్కులను వినియోగించుకోవచ్చు.

మీ అభ్యర్థనను అంచనా వేసి స్పందించడంలో మాకు సహాయపడేందుకు, అది ఏ వ్యక్తిగత సమాచారానికి సంబంధించినదో అర్థం చేసుకోవడానికి సరిపడా వివరాలను అందించండి. ఉదాహరణకు మీ పేరు, సంబంధిత URLలు, నిర్దిష్ట మోడల్ అవుట్‌పుట్ ఉదాహరణలు లేదా సమస్యను గుర్తించడంలో సహాయపడే ఇతర వివరాలను ఇవ్వండి. కొన్ని సందర్భాల్లో, మేము చర్య తీసుకునే ముందు మీ గుర్తింపును ధృవీకరించమని లేదా సమాచారం మీకే సంబంధించినదని నిర్ధారించమని అడగవచ్చు. ఈ అభ్యర్థనలను సమర్పించే విధానం, ఉత్తమ పద్ధతులు, అభ్యర్థనలను సమీక్షించే తీరు గురించి మరింత సమాచారం ChatGPT నుంచి వ్యక్తిగత డేటా తొలగింపుపై మా హెల్ప్ సెంటర్ కథనంలో అందుబాటులో ఉంది. వర్తించే గోప్యతా చట్టాలకు అనుగుణంగా అభ్యర్థనలను సమీక్షించి, వర్తించే చట్టపరమైన గడువుల్లో స్పందిస్తాము.

గోప్యతా చట్టాల ప్రకారం కొన్ని హక్కులు సంపూర్ణమైనవి కాకపోవచ్చని గుర్తుంచుకోండి. ఉదాహరణకు, సంబంధిత సమాచారాన్ని ధృవీకరించలేనప్పుడు, అభ్యర్థన OpenAI ప్రాసెస్ చేసిన వ్యక్తిగత సమాచారానికి సంబంధించినది కానప్పుడు, మినహాయింపు వర్తించినప్పుడు లేదా అభ్యర్థనను నెరవేర్చకపోవడానికి మాకు మరో చట్టబద్ధ కారణం ఉన్నప్పుడు దాన్ని నెరవేర్చలేకపోవచ్చు. అభ్యర్థనలను ఒక్కొక్కటిగా అంచనా వేస్తాము. భావ ప్రకటన స్వేచ్ఛ, ప్రజా ప్రయోజనం వంటి ఇతర ముఖ్యమైన అంశాలతో గోప్యతా హక్కులను సమతుల్యం చేయాల్సి రావచ్చు.

అయితే, వ్యక్తిగత సమాచార రక్షణకు ప్రాధాన్యం ఇవ్వడానికి, వర్తించే అన్ని గోప్యతా చట్టాలను పాటించడానికి మేము కృషి చేస్తాము. మేము ఏదైనా సమస్యను తగిన విధంగా పరిష్కరించలేదని మీరు భావిస్తే, మీ స్థానిక పర్యవేక్షణ అధికార సంస్థకు ఫిర్యాదు చేసే హక్కు మీకు ఉంది.

మీరు మా వెబ్‌సైట్, అనువర్తనాలు, సేవలను ఉపయోగించినప్పుడు మీ నుంచి లేదా మీ గురించి మేము సేకరించే వ్యక్తిగత సమాచారానికి సంబంధించి OpenAI అనుసరించే పద్ధతుల గురించి మరింత సమాచారం కోసం మా ప్రైవసీ పాలసీ చూడండి.