Անձնական տվյալների հավաքում և օգտագործում (պարտադիր)
Սպառողական ծառայությունների դեպքում մեր Ծառայություններից օգտվելիս OpenAI-ն հավաքում և օգտագործում է ձեր անձնական տվյալները՝ ստորև նկարագրված կարգով։ Մեր բիզնես առաջարկներից, օրինակ՝ API-ից օգտվող հաճախորդների անունից մշակվող բովանդակության օգտագործումը կարգավորվում է տվյալ առաջարկներին վերաբերող հաճախորդների հետ մեր պայմանագրերով։ Տե՛ս մեր Կորպորատիվ գաղտնիության էջը։
Հավաքվող անձնական տվյալների տեսակները՝
Անձնական տվյալներ, որոնք տրամադրում եք մեր Ծառայություններից օգտվելու համար հաշիվ ստեղծելիս կամ մեզ հետ հաղորդակցվելիս՝
Հաշվի տվյալներ․ մեզ մոտ հաշիվ ստեղծելիս մենք հավաքում ենք ձեր հաշվի հետ կապված տվյալներ, այդ թվում՝ ձեր անունը, կոնտակտային տվյալները, հաշվի մուտքանունն ու գաղտնաբառը, ծննդյան ամսաթիվը, վճարային տվյալները և գործարքների պատմությունը (միասին՝ «Հաշվի տվյալներ»)։ Մեր որոշ Ծառայություններ կարող են նաև թույլ տալ որպես Հաշվի տվյալներ վերբեռնել պրոֆիլի նկար, օգտանուն կամ այլ տվյալներ։
Օգտատիրոջ բովանդակություն․ մենք հավաքում ենք մեր Ծառայություններին մուտքագրելիս ձեր տրամադրած անձնական տվյալները («Բովանդակություն»), այդ թվում՝ ձեր հուշումները և ձեր վերբեռնած այլ բովանդակությունը, օրինակ՝ ֆայլերը, պատկերները, ձայնագրություններն ու տեսանյութերը, Sora-ի կերպարները և կապակցված ծառայություններից ստացված տվյալները՝ կախված ձեր օգտագործած գործառույթներից։ Մեր որոշ Ծառայություններ թույլ են տալիս շփվել այլ օգտատերերի հետ, օրինակ՝ հրապարակումներ կամ մեկնաբանություններ անել կամ հաղորդագրություններ ուղարկել, և մենք այդ փոխգործակցությունը նույնպես համարում ենք Բովանդակություն։
Հաղորդակցության տվյալներ․ եթե հաղորդակցվում եք մեզ հետ, օրինակ՝ էլփոստով կամ սոցիալական ցանցերի մեր էջերի միջոցով, մենք կարող ենք հավաքել անձնական տվյալներ, այդ թվում՝ ձեր անունը, կոնտակտային տվյալները և ձեր ուղարկած հաղորդագրությունների բովանդակությունը («Հաղորդակցության տվյալներ»)։
Կոնտակտային տվյալներ․ եթե որոշեք կապակցել ձեր սարքի կոնտակտները, մենք կվերբեռնենք սարքի հասցեագրքերից ստացված տվյալները և կստուգենք, թե ձեր կոնտակտներից ովքեր են նույնպես օգտվում մեր Ծառայություններից։ Եթե ձեր կոնտակտներից որևէ մեկը դեռ չի օգտվում մեր Ծառայություններից, ձեզ կտեղեկացնենք, եթե նա հետագայում գրանցվի։Իմացեք ավելին ձեր կոնտակտները կապակցելու և մեր Ծառայություններից չօգտվող անձանց վերբեռնված կոնտակտային տվյալների օգտագործման եղանակի մասին։
Ձեր տրամադրած այլ տվյալներ․ մենք հավաքում ենք մեր միջոցառումներին կամ հարցումներին մասնակցելիս ձեր տված պատասխանները, ինչպես նաև մեզ կամ մեր անունից գործող մատակարարին ձեր ինքնությունը կամ տարիքը հաստատելու համար տրամադրած տվյալները։
Անձնական տվյալներ, որոնք ստանում ենք ծառայություններ այցելելիս, օգտագործելիս կամ դրանց հետ փոխգործակցելիս՝
Մատյանի տվյալներ․ մենք հավաքում ենք այն տվյալները, որոնք մեր Ծառայություններից օգտվելիս ձեր դիտարկիչը կամ սարքն ավտոմատ ուղարկում է։ Մատյանի տվյալները ներառում են ձեր ինտերնետային արձանագրության (IP) հասցեն, դիտարկիչի տեսակն ու կարգավորումները, հարցման ամսաթիվն ու ժամը և մեր Ծառայությունների հետ ձեր փոխգործակցության եղանակը։
Օգտագործման տվյալներ․ մենք հավաքում ենք Ծառայությունների օգտագործման վերաբերյալ տվյալներ, օրինակ՝ ձեր դիտած կամ փոխգործակցած բովանդակության տեսակները, օգտագործած գործառույթներն ու կատարած գործողությունները, ինչպես նաև ձեր ժամային գոտին, երկիրը, մուտքի ամսաթվերն ու ժամերը, այն ընդհանուր տարածքը, որտեղից ձեր սարքը մուտք է գործում Ծառայություններ, օգտատիրոջ ագենտն ու տարբերակը, համակարգչի կամ շարժական սարքի տեսակը և համակարգչի կապի տվյալները։ Եթե օգտագործում եք Atlas դիտարկիչը, կարող ենք նաև հավաքել ձեր դիտարկիչի տվյալները՝ համաձայն ձեր ընտրած կարգավորումների և ծառայության օգտագործման։
Գովազդային տվյալներ․ Free և Go օգտատերերի դեպքում, ձեր ընտրությունների ու կարգավորումների համաձայն, մենք հավաքում ենք ձեր գովազդների պատմության և հետաքրքրությունների վերաբերյալ տվյալներ, օրինակ՝ ձեր դիտած կամ փոխգործակցած գովազդային բովանդակության տեսակները։
Սարքի տվյալներ․ մենք հավաքում ենք Ծառայություններ մուտք գործելու համար օգտագործվող սարքի տվյալները, օրինակ՝ սարքի անունը, օպերացիոն համակարգը, սարքի նույնացուցիչները և օգտագործվող դիտարկիչը։ Հավաքվող տվյալները կարող են կախված լինել ձեր սարքի տեսակից և կարգավորումներից։
Քուքիներ և համանման տեխնոլոգիաներ․ մենք օգտագործում ենք քուքիներ և համանման տեխնոլոգիաներ՝ մեր Ծառայությունները գործարկելու ու կառավարելու և ձեր փորձառությունը բարելավելու համար։ Գաղտնիության քաղաքականության մեջ նկարագրված որոշ տվյալներ մենք պահպանում ենք քուքիների միջոցով, օրինակ՝ եթե մուտք չեք գործել, դիտարկման տարբեր աշխատաշրջաններում ձեր նախապատվությունները պահպանելու կամ նույնականացմանն ու հաճախորդների աջակցությանը նպաստելու համար։ Քուքիների օգտագործման մասին մանրամասների համար կարդացեք մեր Քուքիների մասին ծանուցումը։
Հավաքման և օգտագործման նպատակը՝
Մեր Ծառայությունները տրամադրելու, վերլուծելու և սպասարկելու համար, օրինակ՝ ChatGPT-ում ձեր հարցերին պատասխանելու նպատակով,
Մեր Ծառայությունները բարելավելու և զարգացնելու ու հետազոտություններ իրականացնելու համար, օրինակ՝ արտադրանքի նոր գործառույթներ մշակելու նպատակով,
Մեր բոլոր Ծառայություններում ձեր փորձառությունն անհատականացնելու համար, օրինակ՝ ձեզ ավելի համապատասխան Բովանդակություն տրամադրելու նպատակով,
ChatGPT-ում ձեզ գովազդ ցուցադրելու, օգտատերերի՝ այդ գովազդների հետ փոխգործակցությունն ընդհանուր մակարդակով հասկանալու և գովազդի որակը բարելավելու նպատակով մեր մարքեթինգային ու գովազդային ջանքերի արդյունավետությունը գնահատելու համար։ Իմացեք ավելին ChatGPT-ի գովազդների մասին,
Ձեզ հետ հաղորդակցվելու, այդ թվում՝ ձեր հարցերին պատասխանելու և մեր Ծառայությունների ու միջոցառումների մասին, օրինակ՝ Ծառայությունների փոփոխությունների կամ բարելավումների վերաբերյալ տեղեկություններ ուղարկելու համար,
Ձեր կոնտակտները կապակցելու դեպքում մեր Ծառայություններից օգտվող կոնտակտներին նույնականացնելու և հետագայում նրանց միանալու դեպքում ձեզ տեղեկացնելու համար,
Խարդախությունը, ապօրինի գործունեությունը կամ մեր Ծառայությունների չարաշահումը կանխելու համար, այդ թվում՝ մեր հարթակներում ներկայացված կամ փոխանակված Բովանդակությունը վերահսկելու միջոցով (ավելին իմացեք այստեղ), և
Իրավական պարտավորությունները կատարելու և մեր օգտատերերի, OpenAI-ի կամ երրորդ անձանց իրավունքները, գաղտնիությունը, անվտանգությունը կամ գույքը պաշտպանելու համար, օրինակ՝ ձեզ կամ այլոց վնասը կանխելու կամ ձեր տարիքը գնահատելու և տարիքին համապատասխան փորձառություն տրամադրելու նպատակով։
Պահպանման և օգտագործման ժամկետը՝
Մենք կպահպանենք ձեր անձնական տվյալները միայն այնքան ժամանակ, որքան անհրաժեշտ է ձեզ մեր Ծառայությունները տրամադրելու կամ այլ օրինական բիզնես նպատակներով, օրինակ՝ վեճերը լուծելու, ապահովությունն ու անվտանգությունն ապահովելու կամ մեր իրավական պարտավորությունները կատարելու համար։ Անձնական տվյալների պահպանման ժամկետը կախված է տվյալների տեսակից, դրանց օգտագործման եղանակից և շատ դեպքերում՝ ձեր կարգավորումներից։ Օրինակ՝
Տվյալներ, որոնք պահպանում ենք մինչև ձեր կողմից ջնջվելը․ մեր որոշ Ծառայություններ թույլ են տալիս ջնջել ձեր հաշվում պահվող անձնական տվյալները։ Օրինակ՝ կարող եք ջնջել ChatGPT-ի առանձին կամ բոլոր խոսակցությունները, առանձին Պահված հիշողություններ կամ ձեր հաշիվը։ Երբ որոշեք ջնջել անձնական տվյալները, մենք դրանք կհեռացնենք մեր համակարգերից 30 օրվա ընթացքում, բացառությամբ այն դեպքերի, երբ ստորև նկարագրված պատճառներով պետք է դրանք ավելի երկար պահենք, կամ երբ տվյալներն արդեն ապանույնականացվել և անջատվել են ձեր հաշվից, քանի որ թույլատրել եք մեզ օգտագործել ձեր Բովանդակությունը՝ մեր մոդելները բարելավելու համար։
Տվյալներ, որոնք ինքնաբերաբար ջնջում ենք․ որոշ դեպքերում անձնական տվյալներն ինքնաբերաբար կջնջվեն։ Օրինակ՝ Ժամանակավոր զրույցներն ինքնաբերաբար կջնջվեն 30 օրվա ընթացքում (բացառությամբ այն դեպքերի, երբ ստորև մանրամասն նկարագրված անվտանգության կամ իրավական պատճառներով պետք է դրանք պահպանենք), իսկ ձեր Atlas-ի ինկոգնիտո դիտարկման պատմությունը չի պահպանվի աշխատաշրջանն ավարտելուց հետո։
Տվյալներ, որոնք օրինական պաշտպանության, անվտանգության կամ իրավական պատճառներով ավելի երկար ենք պահպանում․ որոշ դեպքերում անձնական տվյալները պետք է ավելի երկար պահենք նույնիսկ ձեր կողմից դրանք ջնջելուց հետո, օրինակ՝ օրենքի պահանջը կատարելու, խարդախության ու չարաշահման դեմ պայքարելու, անվտանգությունն ապահովելու կամ ֆինանսական հաշվառման նպատակով։ Մասնավորապես՝
Եթե որոշակի Բովանդակություն կամ ձեր հաշիվն արգելափակվել է մեր օգտագործման կանոնների խախտման պատճառով, կարող ենք պահպանել այդ տվյալները՝ մեր ծառայությունները խարդախությունից, չարաշահումից կամ մեր կանոնների այլ խախտումներից պաշտպանելու համար,
Եթե օրենքով պարտավոր ենք պահպանել ձեր տվյալները (օրինակ՝ ստանում ենք օրինական դատական ծանուցագիր), կարող ենք դրանք պահպանել համապատասխան իրավական կամ կարգավորող պարտավորության ամբողջ ժամկետի ընթացքում,
Երբ ֆինանսական գործարքի կողմ ենք (օրինակ՝ մշակում ենք ChatGPT Plus կամ Pro հաշվի համար ձեր վճարումը կամ նպաստում ChatGPT-ում գնում կատարելուն), կարող ենք պահպանել վճարմանն ու գործարքին վերաբերող տվյալները՝ հաշվապահական հաշվառման, վեճերի լուծման և կարգավորող պահանջների կատարման նպատակով,
Երբ խնդրում եք ջնջել ձեր անձնական տվյալները, մենք պահպանում ենք ջնջման հարցման աուդիտային գրառումը, որպեսզի կարողանանք հաստատել, որ կատարել ենք հարցումը։
Պահպանման այս ժամկետները որոշելիս հաշվի ենք առնում մի շարք գործոններ, այդ թվում՝
Անձնական տվյալների մշակման մեր նպատակը (օրինակ՝ արդյոք դրանք պետք է պահպանենք մեր Ծառայությունները տրամադրելու համար),
Տվյալների ծավալը, բնույթը և զգայունությունը,
Չարտոնված օգտագործման կամ բացահայտման հետևանքով վնասի հնարավոր վտանգը,
Մեզ վերաբերող իրավական պահանջները։
Դուք կարող եք հրաժարվել վերը նկարագրված անձնական տվյալների հավաքմանն ու օգտագործմանը համաձայնություն տալուց։ Սակայն համաձայնությունից հրաժարվելու դեպքում կայքում ձեր գրանցումը կսահմանափակվի։
Անձնական տվյալների տրամադրում երրորդ անձանց / փոխանցում արտերկիր (պարտադիր)
Որոշ հանգամանքներում OpenAI-ն կարող է վերը նշված «Հավաքվող անձնական տվյալների տեսակները» բաժնում ընդգրկված ձեր անձնական տվյալները տրամադրել երրորդ անձանց՝ ստորև նկարագրված հատուկ և սահմանափակ նպատակներով։
Պետական մարմիններ կամ այլ երրորդ անձինք․ մենք կարող ենք օրենքին համապատասխան պետական մարմիններին, ոլորտի այլ մասնակիցներին կամ երրորդ անձանց տրամադրել ձեր անձնական տվյալները, այդ թվում՝ մեր Ծառայությունների հետ ձեր փոխգործակցության մասին տվյալները, եթե՝ (i) դա պահանջվում է իրավական պարտավորություն կատարելու համար, կամ բարեխղճորեն կարծում ենք, որ այդ գործողությունն անհրաժեշտ է նման պարտավորություն կատարելու համար, (ii) անհրաժեշտ է պաշտպանել մեր իրավունքները կամ գույքը, (iii) մեր հայեցողությամբ որոշում ենք, որ խախտվել են մեր պայմանները, կանոնները կամ օրենքը, (iv) անհրաժեշտ է հայտնաբերել կամ կանխել խարդախությունը կամ այլ ապօրինի գործունեությունը, (v) անհրաժեշտ է պաշտպանել մեր արտադրանքների, աշխատակիցների, օգտատերերի կամ հանրության ապահովությունը, անվտանգությունն ու ամբողջականությունը կամ (vi) անհրաժեշտ է պաշտպանվել իրավական պատասխանատվությունից։
Փոխկապակցված ընկերություններ․ մենք կարող ենք անձնական տվյալներ բացահայտել մեր փոխկապակցված ընկերություններին, այսինքն՝ OpenAI-ն վերահսկող, OpenAI-ի կողմից վերահսկվող կամ OpenAI-ի հետ ընդհանուր վերահսկողության ներքո գտնվող կազմակերպությանը։ Մեր փոխկապակցված ընկերությունները կարող են այդ անձնական տվյալներն օգտագործել մեր Գաղտնիության քաղաքականությանը համապատասխան։
Բիզնես հաշիվների ադմինիստրատորներ․ երբ միանում եք ChatGPT Enterprise կամ բիզնես հաշվին, այդ հաշվի ադմինիստրատորները կարող են մուտք գործել և կառավարել ձեր OpenAI հաշիվը, այդ թվում՝ հասանելիություն ստանալ ձեր Բովանդակությանը։ Բացի այդ, եթե հաշիվ եք ստեղծում ձեր գործատուին կամ այլ կազմակերպությանը պատկանող էլփոստի հասցեով, կարող ենք ձեր գործատուին կամ կազմակերպությանը հայտնել, որ հաշիվ ունեք, և տրամադրել հաշվի որոշ տվյալներ, օրինակ՝ ձեր էլփոստի հասցեն, որպեսզի, օրինակ, ձեզ հնարավոր լինի ավելացնել նրանց բիզնես հաշվին։
Այլ օգտատերեր և երրորդ անձինք, որոնց հետ փոխգործակցում կամ տվյալներ եք կիսում․ որոշ Ծառայություններ թույլ են տալիս փոխգործակցել կամ տվյալներ կիսել այլ օգտատերերի կամ երրորդ անձանց հետ։ Օրինակ՝ կարող եք տարածել այնպիսի բովանդակություն, ինչպիսիք են ChatGPT-ի խոսակցությունները կամ Sora-ի տեսանյութերը և կերպարները, կամ տվյալներ փոխանցել երրորդ կողմ հանդիսացող որոնման և գնումների գործընկերներին։ Երրորդ կողմ հանդիսացող գործընկերներին ձեր տրամադրած տվյալները կարգավորվում են նրանց սեփական պայմաններով և գաղտնիության քաղաքականություններով, ուստի նախքան տվյալներ տրամադրելը պետք է համոզվեք, որ հասկանում եք այդ պայմաններն ու քաղաքականությունները։
Անհրաժեշտության դեպքում այդ տվյալները կարող են ժամանակ առ ժամանակ հեռահաղորդակցության ցանցերով փոխանցվել Կորեայից և ԱՄՆ-ից բացի այլ երկրներ։
Դուք կարող եք հրաժարվել անձնական տվյալների տրամադրմանը և/կամ փոխանցմանը համաձայնություն տալուց՝ չտրամադրելով համաձայնություն կամ կապվելով մեզ հետ Կորեայի գաղտնիության քաղաքականության հավելվածում նշված կոնտակտային տվյալներով։ Սակայն համաձայնությունից հրաժարվելու դեպքում կայքում ձեր գրանցումը կսահմանափակվի։