მიმოხილვა

OpenAI გთავაზობთ მართვის საშუალებებს, რათა აკონტროლოთ, როგორ გამოიყენება თქვენი მონაცემები ChatGPT-დან და სხვა სამომხმარებლო სერვისებიდან. ხელმისაწვდომია მოდელის გაუმჯობესების პარამეტრები, მეხსიერების მართვა, დროებითი ჩატი, ანგარიშის წაშლა და კონფიდენციალურობასთან დაკავშირებული მოთხოვნების გაგზავნა.

მართვის საშუალებების ხელმისაწვდომობა დამოკიდებულია თქვენს გეგმაზე, ანგარიშის ტიპსა და სამუშაო სივრცის პარამეტრებზე. OpenAI ბიზნესისა და მართული სამუშაო სივრცეების მონაცემებს განსხვავებულად ამუშავებს, ვიდრე პირადი სამომხმარებლო ანგარიშების მონაცემებს.

მართეთ კონფიდენციალურობის პარამეტრები

ChatGPT-ში გახსენით პარამეტრები და აირჩიეთ მონაცემთა მართვა, რათა მართოთ მოდელის გაუმჯობესებასთან დაკავშირებული არჩევანი და მონაცემთა სხვა პარამეტრები. მეხსიერების პარამეტრები მდებარეობს განყოფილებაში „პარამეტრები > პერსონალიზაცია“.

კონფიდენციალურობის ცენტრი ასევე დაგეხმარებათ ამ შესაძლებლობების გაცნობასა და შესაბამისი პარამეტრების პოვნაში. დამატებითი ინფორმაციისთვის იხილეთ: მონაცემთა მართვა ChatGPT-ში.

დროებითი ჩატი

დროებითი ჩატები არ ჩნდება ჩატების ისტორიაში, არ ქმნის ან აახლებს დამახსოვრებულ ინფორმაციას და არ გამოიყენება OpenAI-ის მოდელების გასაუმჯობესებლად, სანამ ისინი დროებით ჩატებად რჩება. საუბრის დაწყებამდე აირჩიეთ, გსურთ თუ არა ჩატის პერსონალიზაცია. პერსონალიზებულ დროებით ჩატებს შეუძლიათ გამოიყენონ უკვე დამახსოვრებული ინფორმაცია, ინდივიდუალური ინსტრუქციები და დანამატები. პერსონალიზაციის გამორთვა ჩატის დაწყებისას შეგიძლიათ. ანგარიშისა და სამუშაო სივრცის შეზღუდვები კვლავ მოქმედებს. უსაფრთხოების მიზნით, OpenAI-მ შესაძლოა ასლი 30 დღემდე შეინახოს.

თუ დროებით ჩატს შეინახავთ, ის თქვენს ისტორიაში ჩვეულებრივ ჩატად იქცევა და მასზე თქვენი ანგარიშის პერსონალიზაციისა და მოდელის გაუმჯობესების პარამეტრები გავრცელდება.

დამატებითი ინფორმაციისთვის იხილეთ: დროებითი ჩატი ChatGPT-ში.

მოდელის გაუმჯობესება სამომხმარებლო და ბიზნესანგარიშების მონაცემებით

მოდელის მუშაობის გასაუმჯობესებლად შესაძლოა გამოვიყენოთ შიგთავსი, რომელსაც აგზავნით ChatGPT-სა და ჩვენს სხვა, ინდივიდუალური მომხმარებლებისთვის განკუთვნილ სერვისებში. მაგალითად, მომხმარებლის პარამეტრების მიხედვით, მოდელის მუშაობის გასაუმჯობესებლად შესაძლოა გამოვიყენოთ მომხმარებლის პრომპტები, მოდელის პასუხები და სხვა შიგთავსი, როგორიცაა სურათები და ფაილები.

დამატებითი ინფორმაციისთვის იხილეთ: როგორ გამოიყენება თქვენი მონაცემები მოდელის მუშაობის გასაუმჯობესებლად.

ნაგულისხმევად, OpenAI არ იყენებს ChatGPT Business-ის, Enterprise-ის, Edu-ს ან „ChatGPT ჯანდაცვის სექტორისთვის“ სამუშაო სივრცეების თუ API-პლატფორმის შიგთავსს თავისი მოდელების გასაუმჯობესებლად. ორგანიზაციებს შეუძლიათ აირჩიონ მონაცემთა გაზიარება, თუ ეს შესაძლებლობა ხელმისაწვდომია. დამატებითი ინფორმაციისთვის იხილეთ: კონფიდენციალურობა საწარმოებისთვის.

ანგარიშის წაშლა და ელფოსტის ხელახლა გამოყენება

ანგარიშის წაშლისას კარგავთ წვდომას მასთან დაკავშირებულ სერვისებზე, მათ შორის ChatGPT-სა და API-პლატფორმაზე. თუ ანგარიში სრულად წაიშალა და არა უბრალოდ დეაქტივირდა, 30 დღის შემდეგ შეძლებთ იმავე ელფოსტის მისამართით ახალი ანგარიშის შექმნას. ინსტრუქციისთვის იხილეთ: ChatGPT-ის ანგარიშის წაშლა.

მობილური ტელეფონის ნომრის ხელახლა გამოყენება

ერთი ტელეფონის ნომრით შესაძლებელია პირველი API გასაღების ვერიფიკაცია მაქსიმუმ 3 ანგარიშისთვის. ანგარიშის წაშლა API-ის ვერიფიკაციის ამ ლიმიტს არ ანულებს. ეს ლიმიტი არ უკავშირდება იმას, შეძლებთ თუ არა ანგარიშის წაშლის შემდეგ იმავე ნომრის გამოყენებას ChatGPT-ის ახალი ანგარიშისთვის.

გარკვეული გამონაკლისების გარდა, მომხმარებლებს, რომლებმაც ChatGPT-ის ანგარიში წაშალეს, ვაძლევთ იმავე ტელეფონის ნომრით ხელახლა რეგისტრაციის საშუალებას. თუ სამუდამოდ წაშალეთ ChatGPT-ის სამომხმარებლო ანგარიში (და ის ჩვენი პირობების ან წესების დარღვევის გამო არ გათიშულა), 30 დღის შემდეგ ტელეფონის ნომერს ჩვენი სისტემიდან წავშლით. ამის შემდეგ შეძლებთ იმავე ნომრით ხელახლა დარეგისტრირებას.

API-ისთვის ტელეფონით ვერიფიკაციისა და ნომრის ხელახლა გამოყენების შესახებ დამატებითი ინფორმაციისთვის იხილეთ: ტელეფონით ვერიფიკაციის მოთხოვნები.

ტელეფონის ნომერს ვერ მოხსნით OpenAI-ის არსებულ ანგარიშს.

წაშალეთ ჩატების ისტორია

შეგიძლიათ ჩატების ისტორიიდან ცალ-ცალკე წაშალოთ კონკრეტული საუბრები ან ერთბაშად გაასუფთაოთ მთელი ისტორია. წაშლილი ჩატები ჩვენი სისტემებიდან 30 დღის განმავლობაში იშლება, გარდა იმ შემთხვევებისა, როცა მათგან უკვე ამოღებულია საიდენტიფიკაციო ინფორმაცია და გაწყვეტილია კავშირი თქვენს ანგარიშთან, ან როცა მათი შენახვა უსაფრთხოების ან სამართლებრივი მიზეზებით გვევალება.

როგორ ვუზიარებთ შიგთავსს მომსახურების მიმწოდებლებს

შიგთავსს ვუზიარებთ სანდო მომსახურების მიმწოდებლების შერჩეულ ჯგუფს, რომელიც ჩვენი სერვისების მოწოდებაში გვეხმარება. ვაზიარებთ ამ მიზნის მისაღწევად საჭირო შიგთავსის მხოლოდ მინიმალურ ოდენობას. ჩვენს მომსახურების მიმწოდებლებს კონფიდენციალურობისა და უსაფრთხოების მკაცრი ვალდებულებები ეკისრებათ. არ ვაზიარებთ თქვენი ჩატების შიგთავსს მარკეტინგული ან სარეკლამო მიზნებისთვის. ჩვენი სარეკლამო პრაქტიკის შესახებ დამატებითი ინფორმაციისთვის იხილეთ: რეკლამები ChatGPT-ში.

დამატებითი ინფორმაციისთვის იხილეთ: კონფიდენციალურობის წესები.

სად ინახება შიგთავსი

შიგთავსი ინახება OpenAI-ისა და ჩვენი სანდო მომსახურების მიმწოდებლების სისტემებში, აშშ-სა და მსოფლიოს სხვა ქვეყნებში. მონაცემების ანოტირებისა და უსაფრთხოების მიზნით, შესაძლოა, შიგთავსის შერჩეული ნაწილები ასევე გავუგზავნოთ სანდო მომსახურების მიმწოდებლებს, რომლებსაც კონფიდენციალურობისა და უსაფრთხოების ვალდებულებები ეკისრებათ.

უფლებამოსილი პირების წვდომა შიგთავსზე

OpenAI-ის უფლებამოსილ თანამშრომელთა შეზღუდულ რაოდენობას, ასევე სანდო მომსახურების მიმწოდებლებს, რომლებსაც კონფიდენციალურობისა და უსაფრთხოების ვალდებულებები ეკისრებათ, მომხმარებლის შიგთავსზე წვდომა მხოლოდ საჭიროებისამებრ, შემდეგი მიზეზებით შეუძლიათ: (1) ბოროტად გამოყენების ან უსაფრთხოების ინციდენტის გამოსაძიებლად; (2) დახმარების გასაწევად, თუ ანგარიშთან დაკავშირებული კითხვებით მოგვმართავთ, ან იმ პრობლემების მოსაგვარებლად, რომლებიც პროდუქტის გამოყენებას აფერხებს; (3) სამართლებრივი საკითხების მოსაგვარებლად; ან (4) მოდელის მუშაობის გასაუმჯობესებლად (თუ ამაზე უარი არ გითქვამთ). შიგთავსზე წვდომა ტექნიკური საშუალებებით კონტროლდება და მხოლოდ უფლებამოსილ თანამშრომლებს ეძლევათ, სამსახურებრივი საჭიროების ფარგლებში. ამასთან, ვაკვირდებით და აღვრიცხავთ მომხმარებლის შიგთავსზე წვდომის ყველა შემთხვევას. უფლებამოსილმა თანამშრომლებმა მომხმარებლის ნებისმიერ შიგთავსზე წვდომამდე უნდა გაიარონ ტრენინგი უსაფრთხოებისა და კონფიდენციალურობის საკითხებზე.

გთხოვთ, არ შეიყვანოთ სენსიტიური ინფორმაცია, რომლის ნახვა ან გამოყენება სხვების მიერ არ გსურთ.

მონაცემების გაყიდვა და რეკლამის განმთავსებლების წვდომა

OpenAI არ ყიდის თქვენს მონაცემებს და არ უზიარებს რეკლამის განმთავსებლებს თქვენს საუბრებს ChatGPT-ში. დამატებითი ინფორმაციისთვის იხილეთ: რეკლამები ChatGPT-ში.

გაგზავნეთ კონფიდენციალურობასთან დაკავშირებული მოთხოვნა

გაგზავნეთ კონფიდენციალურობასთან დაკავშირებული მოთხოვნა კონფიდენციალურობის პორტალის მეშვეობით ან მოგვწერეთ ელფოსტაზე: dsar@openai.com.