Жалпы шолу

OpenAI ChatGPT пен тұтынушыларға арналған басқа қызметтердегі деректердің қалай пайдаланылатынын басқаруға көмектесетін құралдар ұсынады. Қолжетімді опцияларға модельді жақсарту параметрлері, жадты басқару, уақытша чат, аккаунтты жою және жекелікке қатысты сұраулар кіреді.

Қандай басқару құралдары қолжетімді болатыны жоспарыңызға, аккаунт түріне және жұмыс кеңістігінің параметрлеріне байланысты. OpenAI бизнес пен басқарылатын жұмыс кеңістіктерінің деректерін жеке тұтынушы аккаунттарының деректерінен өзгеше өңдейді.

Жекелік параметрлерін басқару

Модельді жақсарту параметрлерін және деректерге қатысты басқа баптауларды басқару үшін ChatGPT-тегі «Параметрлер» бөлімін ашып, «Деректерді басқару» тармағын таңдаңыз. Жад параметрлері «Параметрлер» > «Жекелендіру» бөлімінде орналасқан.

Жекелік орталығы да осы опцияларды түсінуге және тиісті параметрлерді табуға көмектеседі. Қосымша ақпарат: ChatGPT-тегі деректерді басқару.

Уақытша чат

Уақытша чаттар уақытша күйінде болған кезде чат тарихына енбейді, жадтағы мәліметтерді жасамайды не жаңартпайды және OpenAI модельдерін жақсарту үшін пайдаланылмайды. Әңгіме басталмас бұрын чаттың жекелендірілетінін не жекелендірілмейтінін таңдаңыз. Жекелендірілген уақытша чаттар жадтағы бар мәліметтерді, арнаулы нұсқауларды және плагиндерді пайдалана алады. Чатты бастаған кезде жекелендіруді өшіре аласыз. Аккаунт пен жұмыс кеңістігінің шектеулері күшінде қалады. OpenAI қауіпсіздік мақсатында көшірмені 30 күнге дейін сақтауы мүмкін.

Уақытша чатты сақтасаңыз, ол тарихыңыздағы кәдімгі чатқа айналады да, оған аккаунтыңыздың жекелендіру және модельді жақсарту параметрлері қолданылады.

Қосымша ақпарат: ChatGPT-тегі уақытша чат.

Тұтынушы және бизнес аккаунттарының деректері арқылы модельді жақсарту

ChatGPT пен жеке тұлғаларға арналған басқа қызметтерімізге жіберілген мазмұнды модель жұмысын жақсарту үшін пайдалануымыз мүмкін. Мысалы, пайдаланушының параметрлеріне қарай, оның сұрауларын, модель жауаптарын және суреттер мен файлдар сияқты басқа мазмұнды модель жұмысын жақсарту үшін пайдалануымыз мүмкін.

Қосымша ақпарат: Деректеріңіз модель жұмысын жақсарту үшін қалай пайдаланылады.

Әдепкіде OpenAI өз модельдерін жақсарту үшін ChatGPT Business, Enterprise, Edu немесе Денсаулық сақтау саласына арналған ChatGPT жұмыс кеңістіктеріндегі не API платформасындағы мазмұнды пайдаланбайды. Тиісті мүмкіндік қолжетімді болғанда, ұйымдар деректерін бөлісуді таңдай алады. Қосымша ақпарат: Кәсіпорын деректерінің жекелігі.

Аккаунтты жою және электрондық пошта мекенжайын қайта пайдалану

Аккаунтыңызды жойсаңыз, онымен байланысты қызметтерге, соның ішінде ChatGPT пен API платформасына қол жеткізе алмайсыз. Аккаунт жай ғана өшірілмей, толық жойылған болса, 30 күннен кейін сол электрондық пошта мекенжайымен жаңа аккаунт жасай аласыз. Нұсқаулар: ChatGPT аккаунтын жою.

Ұялы телефон нөмірін қайта пайдалану

Бір телефон нөмірімен ең көбі 3 аккаунттың әрқайсысындағы алғашқы API кілтін растауға болады. Аккаунтты жою API растауларының осы шегін нөлге түсірмейді. Бұл шектеу аккаунтты жойғаннан кейін нөмірді жаңа ChatGPT аккаунты үшін қайта пайдалану мүмкіндігіне қатысы жоқ.

Кейбір ерекше жағдайларды қоспағанда, ChatGPT аккаунтын жойған тұтынушыларға сол телефон нөмірімен қайта тіркелуге рұқсат береміз. ChatGPT-тегі жеке тұтынушы аккаунтыңызды біржола жойсаңыз (және ол шарттарымызды немесе саясаттарымызды бұзғаныңыз үшін өшірілмеген болса), телефон нөмірін 30 күннен кейін жүйемізден жоямыз. Содан кейін сол нөмірмен қайта тіркеле аласыз.

API үшін телефон арқылы растау және нөмірді қайта пайдалану туралы қосымша ақпарат: Телефон арқылы растау талаптары.

Қолданыстағы OpenAI аккаунтынан телефон нөмірін ажырату мүмкін емес.

Чат тарихын жою

Чат тарихындағы жекелеген әңгімелерді бір-бірлеп немесе бүкіл тарихты бірден өшіре аласыз. Өшірілген чаттар жүйелерімізден 30 күн ішінде жойылады. Бұған бұрын иесіздендіріліп, аккаунтыңызбен байланысы үзілген немесе қауіпсіздік не заң талаптарына байланысты сақтауға міндетті чаттар кірмейді.

Мазмұн қызмет көрсетушілерге қалай беріледі

Біз мазмұнды қызметтерімізді ұсынуға көмектесетін сенімді қызмет көрсетушілердің таңдалған тобына береміз. Біз осы мақсатқа жету үшін қажет мазмұнның ең аз көлемін ғана береміз. Қызмет көрсетушілеріміз құпиялылық пен қауіпсіздікке қатысты қатаң міндеттемелерді сақтауға тиіс. Чаттарыңыздың мазмұнын маркетинг немесе жарнама мақсатында бөліспейміз. Жарнамаға қатысты ұстанымдарымыз туралы қосымша ақпарат: ChatGPT-тегі жарнама.

Қосымша ақпарат: Жекелік саясаты.

Мазмұн қайда сақталады

Мазмұн OpenAI мен сенімді қызмет көрсетушілеріміздің АҚШ-та және әлемнің басқа елдерінде орналасқан жүйелерінде сақталады. Сондай-ақ деректерді белгілеу және қауіпсіздікті қамтамасыз ету мақсатында мазмұнның таңдалған бөліктерін сенімді қызмет көрсетушілерге жібере аламыз (олар құпиялылық пен қауіпсіздік міндеттемелерін сақтауға тиіс).

Уәкілетті қызметкерлердің мазмұнға қол жеткізуі

OpenAI-дың уәкілетті қызметкерлерінің шектеулі тобы, сондай-ақ құпиялылық пен қауіпсіздік міндеттемелерін сақтауға тиіс сенімді қызмет көрсетушілер пайдаланушы мазмұнына тек қажет болғанда, мына себептермен қол жеткізе алады: (1) теріс пайдалануды немесе қауіпсіздік оқиғасын тексеру; (2) аккаунтыңызға қатысты сұрақтармен бізге жүгінсеңіз, сізге қолдау көрсету немесе өнімді пайдалануға әсер ететін мәселелерді шешу; (3) құқықтық мәселелерді реттеу; (4) модель жұмысын жақсарту (егер сіз бұдан бас тартпаған болсаңыз). Мазмұнға қол жеткізу техникалық құралдармен бақыланады және тек қызметтік қажеттілігі бар уәкілетті қызметкерлерге рұқсат етіледі. Сондай-ақ біз пайдаланушы мазмұнына қол жеткізудің барлық жағдайларын қадағалап, тіркейміз. Уәкілетті қызметкерлер кез келген пайдаланушы мазмұнына қол жеткізбес бұрын қауіпсіздік пен жекелік бойынша оқудан өтуге міндетті.

Басқалардың қарағанын немесе пайдаланғанын қаламайтын құпия ақпаратты енгізбеңіз.

Деректерді сату және жарнама берушілердің оларға қол жеткізуі

OpenAI деректеріңізді сатпайды және ChatGPT-тегі әңгімелеріңізді жарнама берушілерге бермейді. Қосымша ақпарат: ChatGPT-тегі жарнама.

Жекелікке қатысты сұрау жіберу

Жекелікке қатысты сұрауды Жекелік порталы арқылы жіберіңіз немесе dsar@openai.com мекенжайына хат жазыңыз.