आढावा

ChatGPT आणि इतर वैयक्तिक वापरासाठीच्या सेवांमधील डेटा कसा वापरला जातो हे व्यवस्थापित करण्यात मदत करण्यासाठी OpenAI नियंत्रणे उपलब्ध करून देते. उपलब्ध पर्यायांमध्ये मॉडेल सुधारण्यासंबंधीची सेटिंग्ज, मेमरी नियंत्रणे, तात्पुरत्या गप्पा, खाते हटवणे आणि गोपनीयतेसंबंधी विनंत्या यांचा समावेश होतो.

तुमची योजना, खात्याचा प्रकार आणि वर्कस्पेस सेटिंग्ज यांवर कोणती नियंत्रणे उपलब्ध असतील हे ठरते. OpenAI व्यावसायिक आणि व्यवस्थापित वर्कस्पेसमधील डेटा हा वैयक्तिक वापरकर्त्यांच्या खात्यांमधील डेटापेक्षा वेगळ्या पद्धतीने हाताळते.

तुमची गोपनीयता सेटिंग्ज व्यवस्थापित करा

ChatGPT मध्ये, मॉडेल सुधारण्यासंबंधीची प्राधान्ये आणि इतर डेटा नियंत्रणे व्यवस्थापित करण्यासाठी सेटिंग्ज उघडा आणि डेटा नियंत्रणे निवडा. मेमरी सेटिंग्ज तुम्हाला सेटिंग्ज > वैयक्तिकीकरण येथे मिळतील.

हे पर्याय समजून घेण्यासाठी आणि संबंधित सेटिंग्ज शोधण्यासाठी गोपनीयता केंद्राचीही मदत होऊ शकते. अधिक माहितीसाठी, पहा: ChatGPT मधील डेटा नियंत्रणे.

तात्पुरत्या गप्पा

तात्पुरत्या गप्पा तुमच्या गप्पांच्या इतिहासात दिसत नाहीत, त्यांमुळे मेमरीतील नोंदी तयार किंवा अद्ययावत होत नाहीत आणि त्या तात्पुरत्या असेपर्यंत OpenAI ची मॉडेल सुधारण्यासाठी वापरल्या जात नाहीत. संभाषण सुरू होण्यापूर्वी, गप्पा तुमच्यासाठी वैयक्तिकीकृत करायच्या की नाही ते निवडा. वैयक्तिकीकृत तात्पुरत्या गप्पांमध्ये मेमरीतील विद्यमान नोंदी, सानुकूल सूचना आणि प्लगइन्स वापरता येतात. गप्पा सुरू करताना तुम्ही वैयक्तिकीकरण बंद करू शकता. खाते आणि वर्कस्पेसवरील निर्बंध तरीही लागू राहतात. सुरक्षिततेच्या उद्देशाने OpenAI एक प्रत जास्तीत जास्त 30 दिवस ठेवू शकते.

तुम्ही तात्पुरत्या गप्पा जतन केल्यास, त्या तुमच्या इतिहासातील नेहमीच्या गप्पा बनतात आणि त्यांना तुमच्या खात्याची वैयक्तिकीकरण व मॉडेल सुधारण्यासंबंधीची सेटिंग्ज लागू होतात.

अधिक माहितीसाठी, पहा: ChatGPT मधील तात्पुरत्या गप्पा.

वैयक्तिक आणि व्यावसायिक खात्यांसाठी मॉडेल सुधारणा

मॉडेलची कामगिरी सुधारण्यासाठी आम्ही ChatGPT आणि वैयक्तिक वापरासाठीच्या आमच्या इतर सेवांमध्ये दिलेला आशय वापरू शकतो. उदाहरणार्थ, वापरकर्त्याच्या सेटिंग्जनुसार, आम्ही मॉडेलची कामगिरी सुधारण्यासाठी वापरकर्त्याने दिलेल्या सूचना, मॉडेलचे प्रतिसाद आणि प्रतिमा व फाइल्स यांसारखा इतर आशय वापरू शकतो.

अधिक माहितीसाठी, पहा: मॉडेलची कामगिरी सुधारण्यासाठी तुमचा डेटा कसा वापरला जातो.

मूलभूत व्यवस्थेनुसार, OpenAI आपली मॉडेल सुधारण्यासाठी ChatGPT Business, Enterprise, Edu किंवा हेल्थकेअरसाठी ChatGPT यांच्या वर्कस्पेसमधील अथवा API प्लॅटफॉर्मवरील आशय वापरत नाही. पर्याय उपलब्ध असेल तेव्हा संस्था डेटा देण्याचा पर्याय निवडू शकतात. अधिक माहितीसाठी, पहा: व्यावसायिक गोपनीयता.

तुमचे खाते हटवा आणि तुमचा ईमेल पुन्हा वापरा

तुमचे खाते हटवल्यावर त्या खात्याशी संबंधित सेवांचा प्रवेश काढून घेतला जातो. यामध्ये ChatGPT आणि API प्लॅटफॉर्म यांचा समावेश होतो. खाते निष्क्रिय करण्याऐवजी पूर्णपणे हटवले असल्यास, 30 दिवसांनंतर तुम्ही त्याच ईमेल पत्त्याने नवीन खाते तयार करू शकता. सूचनांसाठी, पहा: तुमचे ChatGPT खाते हटवणे.

मोबाईल फोन क्रमांक पुन्हा वापरा

एका फोन क्रमांकाने जास्तीत जास्त 3 खात्यांमधील पहिल्या एपीआय कीची पडताळणी करता येते. खाते हटवल्याने एपीआय पडताळणीची ही मर्यादा पुन्हा सुरुवातीपासून लागू होत नाही. खाते हटवल्यानंतर नवीन ChatGPT खात्यासाठी तोच क्रमांक पुन्हा वापरता येतो की नाही, याच्याशी या मर्यादेचा संबंध नाही.

काही अपवाद वगळता, स्वतःचे ChatGPT खाते हटवलेल्या वैयक्तिक वापरकर्त्यांना आम्ही त्याच फोन क्रमांकाने पुन्हा नोंदणी करण्याची परवानगी देतो. तुम्ही तुमचे वैयक्तिक वापरासाठीचे ChatGPT खाते कायमचे हटवले असल्यास (आणि आमच्या अटी किंवा धोरणांचे उल्लंघन केल्यामुळे तुमचे खाते बंद केलेले नसल्यास), आम्ही 30 दिवसांनंतर तुमचा फोन क्रमांक आमच्या प्रणालीतून काढून टाकू. त्यानंतर तुम्ही त्याच क्रमांकाने पुन्हा नोंदणी करू शकता.

एपीआयसाठी फोन पडताळणी आणि क्रमांकाचा पुनर्वापर यांविषयी अधिक माहितीसाठी, पहा: फोन पडताळणीच्या आवश्यकता.

तुम्ही विद्यमान OpenAI खात्याशी जोडलेला फोन क्रमांक वेगळा करू शकत नाही.

तुमचा गप्पांचा इतिहास हटवा

तुम्ही तुमच्या गप्पांच्या इतिहासातून ठरावीक संभाषणे एकेक करून किंवा तुमचा संपूर्ण इतिहास एकाच वेळी हटवू शकता. तुम्ही हटवलेल्या गप्पा आमच्या प्रणालींमधून 30 दिवसांच्या आत हटवल्या जातात. मात्र, त्यांमधून ओळख पटवणारी माहिती पूर्वीच काढली असेल आणि त्या तुमच्या खात्याशी असलेला संबंध तोडला असेल, किंवा सुरक्षेच्या अथवा कायदेशीर कारणांसाठी आम्हाला त्या ठेवाव्या लागत असतील, तर याला अपवाद असतो.

सेवा पुरवठादारांना आशय कसा दिला जातो

आमच्या सेवा पुरवण्यात आम्हाला मदत करणाऱ्या निवडक विश्वसनीय सेवा पुरवठादारांना आम्ही आशय देतो. हा उद्देश साध्य करण्यासाठी आवश्यक तेवढाच किमान आशय आम्ही देतो आणि आमच्या सेवा पुरवठादारांना गोपनीयता व सुरक्षेविषयीच्या कडक बंधनांचे पालन करावे लागते. आम्ही तुमच्या गप्पांमधील आशय विपणन किंवा जाहिरातींसाठी इतरांना देत नाही. आमच्या जाहिरात पद्धतींबद्दल अधिक माहितीसाठी, पहा: ChatGPT मधील जाहिराती.

अधिक माहितीसाठी, पहा: प्रायव्हसी पॉलिसी.

आशय कुठे साठवला जातो

आशय अमेरिकेतील आणि जगभरातील OpenAI च्या प्रणालींवर तसेच आमच्या विश्वसनीय सेवा पुरवठादारांच्या प्रणालींवर साठवला जातो. डेटाला वर्णनात्मक नोंदी जोडण्यासाठी आणि सुरक्षिततेच्या उद्देशाने आम्ही आशयाचे निवडक भाग विश्वसनीय सेवा पुरवठादारांनाही पाठवू शकतो (त्यांना गोपनीयता आणि सुरक्षेविषयीच्या बंधनांचे पालन करावे लागते).

अधिकृत व्यक्तींना आशयाचा प्रवेश

OpenAI मधील मोजके अधिकृत कर्मचारी, तसेच गोपनीयता आणि सुरक्षेविषयीच्या बंधनांचे पालन करणारे विश्वसनीय सेवा पुरवठादार, केवळ पुढील कारणांसाठी आवश्यकतेनुसार वापरकर्त्यांचा आशय पाहू शकतात: (1) गैरवापर किंवा सुरक्षेशी संबंधित घटनेची चौकशी करणे; (2) तुम्ही तुमच्या खात्याविषयी प्रश्न घेऊन आमच्याशी संपर्क साधल्यास तुम्हाला मदत करणे किंवा उत्पादन वापरताना येणाऱ्या अडचणींचे निवारण करणे; (3) कायदेशीर बाबी हाताळणे; किंवा (4) मॉडेलची कामगिरी सुधारणे (तुम्ही यातून बाहेर पडण्याचा पर्याय निवडला नसेल तर). आशयाचा प्रवेश तांत्रिक प्रवेश नियंत्रणांच्या अधीन असतो आणि तो केवळ अधिकृत कर्मचाऱ्यांना, कामासाठी ती माहिती आवश्यक असेल तेव्हाच दिला जातो. याशिवाय, वापरकर्त्यांच्या आशयाला होणाऱ्या प्रत्येक प्रवेशावर आम्ही लक्ष ठेवतो आणि त्याची नोंद करतो. अधिकृत कर्मचाऱ्यांना कोणत्याही वापरकर्त्याचा आशय पाहण्यापूर्वी सुरक्षा आणि गोपनीयतेचे प्रशिक्षण घेणे बंधनकारक असते.

कृपया अशी संवेदनशील माहिती प्रविष्ट करू नका, जिचे परीक्षण किंवा वापर होऊ नये असे तुम्हाला वाटते.

डेटाची विक्री आणि जाहिरातदारांना प्रवेश

OpenAI तुमचा डेटा विकत नाही किंवा तुमचे ChatGPT मधील संभाषण जाहिरातदारांना देत नाही. अधिक माहितीसाठी, पहा: ChatGPT मधील जाहिराती.

गोपनीयतेसंबंधी विनंती सादर करा

प्रायव्हसी पोर्टलद्वारे गोपनीयतेसंबंधी विनंती सादर करा किंवा dsar@openai.com वर ईमेल पाठवा.